“Agajnáʼla ikhí xuajñunʼ” (REVELACIÓN 18:4).

AJMÚÚ 101 GA̱JMA̱A̱ 93

1. a) Xú káʼnii eʼyáá rí xuajñu Dios magumakríyaaʼ náa Babilonia la Grande rá. b) Ndiéjunʼ graxe̱ guriʼña̱a̱ rá.

NÁA timbá artículo ndiʼyáá rí cristianos jmbiin niguáʼnu nikuwa náa majñu̱ʼ Babilonia la Grande. Mú, lá maʼga̱nú mbiʼi rí maguma káwíin xáʼ. Xúʼko̱, numuu rí náa Biblia Dios naʼtáñajúúnʼ xuajñu rí magajnaán náa Babilonia la Grande (atraxnuu Revelación 18:4). * Rígi̱ nasngájma rí cristiano maguma káwíin náa religión dí ragájkhun. Mú nguáná. Mu mbuʼyáá ginii ndayóoʼ muriʼña̱a̱ graxe̱ rígi̱: Ndiéjunʼ nigími̱jna̱ muni bi̱ Nunigajmaa Biblia ga̱jma̱a̱ numuu Babilonia la Grande asndu nákha xóó tséʼni tsiguʼ 1914 rá. Lá nitaraʼa ga̱jma̱a̱ gagi a̱ngiu̱lú nákha nirígá timbá guerra náa xúgíʼ numbaaʼ ráʼ. Lá nikuwa náa majñu̱ʼ Babilonia nákha ikhú numuu rí ndiyóoʼ magumaxprígún xáʼ.

“NAJPÁTRÍGÚ BABILONIA”

2. Ndiéjunʼ nigími̱jna̱ muni bi̱ Nunigajmaa Biblia asndu nákha xóó tsírígá Timbá Guerra rá.

2 Timbá guerra náa xúgíʼ numbaaʼ nirígá tsiguʼ 1914  ga̱jma̱a̱ 1918. Mba̱yu̱ʼ tsiguʼ ginii, Charles Taze Russell gajmíi̱n bi̱ Nunigajmaa Biblia ndiyáá rí náa cristiandad túsngáa rí gajkhun rí naʼthí náa Biblia (atayáá kúgumaʼá “Ndiéjunʼ eyoo gáʼthúu̱n”). Ikha jngó nitsíngumi̱jna̱ mbá kayuʼ náa religión dí ragájkhun. Tsiguʼ 1879 revista rígi̱ náa ajngáa inglés niʼthí rí xúgíʼ guʼwá ndxajkun bi̱ naʼthí rí nindxu̱u̱ mbáa novia jmbii náa Cristo mú numbañún Xa̱bu̱ Ñajunʼ bi̱ kuwa náa Babilonia la Grande, rí náa Biblia naʼthí rí nindxu̱u̱ mbáa a̱ʼgu̱ bi̱ nagujuamínaʼ (atraxnuu Revelación 17:1, 2). *

3. Ndiéjunʼ nini bi̱ Ninigajmaa Biblia mu musngajma rí ní xákuwa náa religión dí ragájkhun rá. (Atayáá timbá xtiʼkhu.)

3 Bi̱ niguájun jmbu nákha ikhú ndiyáá rí Dios xáʼni tsajkurámiinʼ á mu nuyambáá má xúʼko̱ náa religión dí ragájkhun. Ikha jngó mbaʼin nixuʼma mbá carta náa guʼwá ndxájkun ndrígu̱ún mu muthi rí ní xákuwa ikhí. Tikhun niraxnuu carta náa inún xúgínʼ náa guʼwá ndxajkun. Náa xuajen rí tándoo muni nixuʼma carta náa inuu mámbáa xa̱bu̱ bi̱ xtáa náa guʼwá ndxajkun. Bi̱ Ninigajmaa Biblia nisngajma kaʼwu rí nánguá eñún makuwá náa religión dí ragájkhun. Tsiguʼ kidíiʼ asndu gamíi makhañún á mu nuni rígi̱. Mú nákha tsiguʼ 1870, Xa̱bu̱ Ñajunʼ náa mbaʼa xuajen mba̱ʼu̱ nánguá niyambáá náa Guʼwá ndxajkun xóo nákha ginii. Ikha jngó xa̱bu̱ nandoo nuthi ga̱jma̱a̱ numuu Biblia ma̱ngaa nuthi rí tsénimbu̱ún rí nusngáa náa guʼwá ndxajkun.

4. Ndiéjunʼ nikru̱ʼu̱u̱n bi̱ Nunigajmaa Biblia ga̱jma̱a̱ numuu Babilonia la Grande nákha Timbá Guerra ga̱jma̱a̱ ndiéjunʼ nini xá.

4 Bi̱ Ninigajmaa Biblia nikru̱ʼu̱u̱n rí raʼkháa i̱ndó mutún a̱ngiu̱ún, bi̱ nambáxu̱u̱n gajmiún ga̱jma̱a̱ bi̱ nagún náa guʼwá ndxájkiún rí nánguá muyambáá náa religión dí ragájkhun. Nindúún mutún xúgínʼ rí Babilonia la Grande nindxu̱u̱ xóo mbáa a̱ʼgu̱ bi̱ nagujuamínaʼ. Ikha jngó nákha gu̱nʼ diciembre tsiguʼ 1917 asndu índo̱ nagíʼdu̱u̱ tsiguʼ 1918, mbá nguéjmi̱i̱n bi̱ Nunigajmaa Biblia nixnaraʼa ga̱jma̱a̱ gagi mbá 10 millones tratado rí na̱ʼkha̱ artículo “Najpátrígú Babilonia”. Náa tratado rígi̱ naʼthí dí ra̱májánʼ eʼni cristiandad. Xó má eʼyáá, bi̱ kuya̱ edxu̱u̱ náa guʼwá ndxajkun nikiʼníin me̱ndaʼkho. Mú rígi̱ táguikhún bi̱ Nunigajmaa Biblia. Nigími̱jna̱ mutaraʼa má xúʼko̱ ga̱jma̱a̱ munimbu̱ún kuyáá “Dios xóo Xa̱bu̱ Ñajunʼ raʼkháa náa xa̱bu̱” (Hech. 5:29). Xúgíʼ rígi̱ nasngájmulúʼ rí cristianos túgi̱ʼdi̱i̱ makuwá náa majñu̱ʼ Babilonia nákha Timbá Guerra. Ikhú kuwa raguma káwíin náa religión dí ragájkhun ga̱jma̱a̱ numbañún eʼwíínʼ mu muni rúʼko̱.

NITARAʼA GA̱JMA̱A̱ GAGI NÁKHA TIMBÁ GUERRA

5. Xú káʼnii eʼyáá rí a̱ngiu̱lú nitaraʼa ga̱jma̱a̱ gagi nakha Timbá Guerra rá.

5 Nákha wajyúúʼ niʼthá rí xa̱bi̱i̱ Dios túni  rí naniguʼ ikhaa nákha Timbá Guerra numuu rí tútaraʼa ga̱jma̱a̱ gagi. Nikumulú rí ga̱jma̱a̱ numuu rígi̱ Jeobá niniñúnʼ rí makuwá náa majñu̱ʼ Babilonia la Grande mbá tiempo. Mú a̱ngiu̱lú jmbiin bi̱ nini ñajunʼ Dios tsiguʼ 1914 ga̱jma̱a̱ 1918 nithi nda̱wa̱á rí ikhiin nitaraʼa xó má niʼngu̱u̱n xóo mbá grupo. Rí makru̱ʼu̱lú rí niguaʼnii bi̱ Ninigajmaa Biblia nakha tsiguʼ rúʼko̱, nandoo nakru̱ʼu̱lú itháan májánʼ tikhu rí naʼthí náa Biblia.

A̱ngiu̱lú jmbiin bi̱ nini ñajunʼ Dios tsiguʼ 1914 ga̱jma̱a̱ 1918 nitaraʼa xó má niʼngu̱u̱n

6, 7. a) Xú káʼnii xkujndu niguáʼdaa bi̱ Ninigajmaa Biblia nákha Timbá Guerra rá. b) Ndiéjunʼ esngájma rí bi̱ Ninigajmaa Biblia nikuwa gagi wéñuʼ rá.

6 Bi̱ Ninigajmaa Biblia túniñanʼ rutaraʼa náa guerra. Mú ma̱ngaa niguaʼdáá tikhuu xkujndu. Guʼyáá a̱jma̱. Timbá rí tajmañún majmúún i̱ndó Biblia mu mutaraʼa. Niguʼwún muxna i̱yi̱i̱ʼ ga̱jma̱a̱ ikhí maʼthí rí gajkhun rí na̱ʼkha̱ náa Biblia. Mbáa i̱yi̱i̱ʼ rígi̱ ninindxu̱u̱ libro The Finished Mystery (El misterio terminado). Ikha jngó mbaʼin a̱ngiu̱lú niʼniún mingíjyúuʼ mutaraʼa índo̱ Xa̱bu̱ Ñajunʼ tániñuʼ majmúún libro rígi̱ nákha nigi̱ʼdu̱u̱ tsiguʼ 1918. Raga̱jma̱ xkujndu ninindxu̱u̱ rí tsiguʼ má rúʼko̱ nigi̱ʼdu̱u̱ nandii rí nagumbiʼyuu gripe española. Numuu dí nandii rúʼko̱ na̱jkha̱ ridoo, a̱ngiu̱lú niʼniún miʼskhaa wéñuʼ mutaraʼa. Maski ajndu xúʼko̱ bi̱ Ninigajmaa Biblia nini xúgíʼ rí nindoo mu mutaraʼa.

Bi̱ Ninigajmaa Biblia nitaraʼa gagi wéñuʼ. (Atayáá kutriga̱ 6 ga̱jma̱a̱ 7.)

7 Mbá nguáthi̱i̱n a̱ngiu̱lú bi̱ nikuwa nákha tsiguʼ 1914 nisngajma “Foto-Drama de la Creación”. Náa programa rígi̱ nasngájma xtiʼkhu ga̱jma̱a̱ películas ma̱ngaa aʼwá, ikha jngó nindúún mbuyáá wéñuʼ nákha ikhú. Naʼthí xú káʼnii nigi̱ʼdu̱u̱ nixtáa Adán asndu índo̱ gámbóo raʼtáñajunʼ Cristo. Tsiguʼ rí nigájnuu, ndiyáá itháan rí 9,000,000 xa̱bu̱. Ra̱ʼkhá tháán mbaʼin xa̱bu̱ ndiyáá rí asndu xóó tséʼni xúʼko̱ mbaʼin xa̱bi̱i̱ Dios rí mbiʼi xúgi̱ náa xúgíʼ numbaaʼ. I̱ʼwáʼ i̱yi̱i̱ʼ nasngájma rí tsiguʼ 1916 itháan rí 809,000 xa̱bu̱ nigún náa nagimbáanʼ náa Estados Unidos. Ga̱jma̱a̱  tsiguʼ 1918 nigún itháan rí 950,000 xa̱bu̱. Nakujmaa rí bi̱ Ninigajmaa Biblia nikuwa gagi wéñuʼ.

A̱ngiu̱lú bi̱ nuxna ikha náa ñajunʼ nigími̱jna̱ mu muxnún i̱yi̱i̱ʼ ga̱jma̱a̱ muxnún tsiakii xúgínʼ bi̱ Nunigajmaa Biblia

8. Ndiéjunʼ nini a̱ngiu̱lú bi̱ nixna ikha mu mumbáñún bi̱ Nunigajmaa Biblia nákha Timbá Guerra rá.

8 Nákha Timbá Guerra, a̱ngiu̱lú bi̱ nuxna ikha náa ñajunʼ nigími̱jna̱ wéñuʼ mu muxna i̱yi̱i̱ʼ ga̱jma̱a̱ muxnún tsiakii xúgínʼ bi̱ Nunigajmaa Biblia. Ga̱jma̱a̱ rí nindúún kuñún ma̱ngaa rí nimbañúún, a̱ngiu̱lú niguáʼdaa tsiakii mu mutaraʼa má xúʼko̱. Ndxájulú Richard Barber ninindxu̱u̱ mbáa bi̱ niʼtáraʼa ga̱jma̱a̱ gagi tsiguʼ rúʼko̱. Ikhaa niʼthí: “Niʼngulú niʼni rí tikhun superintendentes viajantes muñajunʼ má xúʼko̱ ga̱jma̱a̱ nixnáraʼa má xúʼko̱ i̱yi̱i̱ʼ The Watch Tower. Asndu nixuʼmáxu náa Canadá, náa na̱nguá xóo mixnáraʼa”. Ga̱jma̱a̱ niʼthí xóó: “Asndu nikuʼmá ga̱jma̱a̱ correo i̱yi̱i̱ʼ ma̱jkha̱ʼ The Finished Mystery náa tikhun a̱ngiu̱lú bi̱ nigajtaa kaʼñúnʼ. Ndxájulú Rutherford ninda̱ʼa̱ rí munixu asambleas náa mbaʼa xuajen dí rígá náa oeste ndrígóo Estados Unidos ga̱jma̱a̱ rí muxuʼmíinxu bi̱ muxna discurso mu muxnún wéñuʼ tsiakii a̱ngiu̱lú”.

NDIYÓOʼ MURIʼKHU̱U̱ TIKHU

9. a) Náa numuu rí ndiyóoʼ muxprigún xa̱bi̱i̱ Dios nákha tsiguʼ 1914 ga̱jma̱a̱ 1919 rá. b) Ndiéjunʼ rí ndiyóoʼ muni xa̱bi̱i̱ Dios ga̱jma̱a̱ ndiéjunʼ gíʼmaa mundxaʼwamíjna̱ rá.

9 Bi̱ Ninigajmaa Biblia xóó ndiyóoʼ muriʼkhuíí tikhuu. Xóó tákru̱ʼu̱u̱n májánʼ índo̱ náa Biblia naʼthí rí gíʼmaa muʼnimbulúʼ náa Xa̱bu̱ Ñajunʼ (Rom. 13:1). Ikha jngó taguajun jmbu má xúʼko̱ índo̱ nirígá guerra. Mbá xkri̱da, presidente ndrígóo Estados Unidos nindu̱ʼu̱u̱n xa̱bu̱ rí mutajkáan rí marigá tsímáá mbiʼi 30 ñajunʼ gu̱nʼ mayo tsiguʼ 1918. Revista rígi̱ náa ajngáa inglés nixkaxi̱i̱n bi̱ Nunigajmaa Biblia rí mangiin mutajkáan. Tikhun a̱ngiu̱lú nixna mbújkha̱a̱ mu majmaa náa guerra, tikhun asndu ninindxu̱ún soldados ga̱jma̱a̱ niguájun ginuu náa guerra. Xó má eʼyáá, ndiyóoʼ rí muxprigún. Mú ragíʼmaa mundxaʼwamíjna̱ rí ga̱jma̱a̱ numuu rúʼko̱ niguáʼnu nikuwa náa majñu̱ʼ Babilonia. Asndu nákha nirígá timbá guerra nánguá má kuwa náa religión dí ragájkhun (atraxnuu Lucas 12:47, 48).

Bi̱ Nunigajmaa Biblia tákru̱ʼu̱u̱n májánʼ ndiéjunʼ nindoo gáʼthúu̱n rí muguajún jmbu. Mú nikru̱ʼu̱u̱n dí ra̱májánʼ muxi̱ya̱a̱ mbáa xa̱bu̱

10. Xú káʼnii nisngajma bi̱ Ninigajmaa Biblia rí nduyamajkuíí vida rá.

10 Gajkhun má rí bi̱ Ninigajmaa Biblia tákru̱ʼu̱u̱n májánʼ ndiéjunʼ nindoo gáʼthúu̱n rí muguajún jmbu. Mú nikru̱ʼu̱u̱n dí ra̱májánʼ muxi̱ya̱a̱ mbáa xa̱bu̱. Ikha jngó asndu bi̱ nguéjmi̱i̱n bi̱ ninindxu̱ún soldados tájmun ajua̱nʼ mu muxi̱ya̱a̱ mbáa. Ikha jngó tikhun dí ikhiin nixuʼmiin magún náa inuu guerra mu muradíin.

11. Xú káʼnii nini Xa̱bu̱ Ñajunʼ índo̱ bi̱ Ninigajmaa Biblia ninigaʼduunʼ magún náa guerra rá.

11 Gixa̱a̱ nikiʼnáa wéñuʼ rí a̱ngiu̱lú niguájun jmbu náa Dios. Ikha jngó nijmuu xtángoo mu maʼni gawúunʼ (Sal. 94:20). Mbá xkri̱da, mbáa general ndrígóo ejército bi̱  xtáa náa Estados Unidos niʼthúu̱n ndxájulú Rutherford ga̱jma̱a̱ Van Amburgh rí Xa̱bu̱ Ñajunʼ nigíʼ maʼni i̱mba̱ xtángoo nuxi̱ʼ rí ma̱ndoo muradíin bi̱ tsíñún magún náa guerra. General xtáa raʼthí ga̱jma̱a̱ numún xúgínʼ bi̱ Nunigajmaa Biblia. Ra̱ʼkhá tháán ekiʼnáa índo̱ niʼthúu̱n ndxájulú Rutherford rí xtángoo tagajnuu numuu rí presidente ndrígóo xuajen tániñuʼ. Ga̱jma̱a̱ xóó niʼthí: “Mú ndu̱ya̱a̱xu xú káʼnii gaxtuguáanʼla, ¡ga̱jma̱a̱ munixu!”.

12, 13. a) Náa numuu rí nixudiinʼ mbá migiñuʼ a̱ngiu̱lú náa guʼwá e̱jua̱nʼ rá. b) Lá niniñaaʼ runimbu̱ún kuyáá Jeobá rí nigún náa guʼwá e̱jua̱nʼ xáʼ. Arathá.

12 Xa̱bu̱ Ñajunʼ nixkamaa xóo muni gíníi bi̱ Ninigajmaa Biblia. Nirugua̱a̱ ndxájulú Rutherford ga̱jma̱a̱ Van Amburgh ga̱jma̱a̱ imbá juwiin a̱ngiu̱lú bi̱ kuya̱ edxu̱u̱ náa Sociedad Watch Tower. Juez bi̱ kayá edxu̱u̱ náa xkujndu rígi̱ niʼthí rí a̱ngiu̱lú bugi̱ ninindxu̱ún itháan ra̱míjínʼ ki xóo soldados alemanes. Niʼthí rí nitha wéñiʼ Xa̱bu̱ Ñajunʼ, ejército ga̱jma̱a̱ náa xúgínʼ ndxajkun, ga̱jma̱a̱ numuu rúʼko̱ ndiyóoʼ muni gíníi [1] (atayáá nota rí na̱ʼkha̱ náa námbá artículo). Ikha jngó bi̱ mbá migiñuʼ a̱ngiu̱lú nithúún rí makuwá mba̱yu̱ʼ tsiguʼ náa guʼwá e̱jua̱nʼ ga̱jma̱a̱ nixuʼmiin náa Atlanta (Georgia, Estados Unidos). Mú índo̱ niguámbá guerra, Xa̱bu̱ Ñajunʼ niniñuʼ magajnún ga̱jma̱a̱ nixuxi̱i̱ i̱yi̱i̱ʼ.

13 Maski ajndu migiñuʼ a̱ngiu̱lú bi̱ nikuwa náa guʼwá e̱jua̱nʼ, ndiyáá májánʼ rí ikhiin munimbu̱ún xtángoo ndrígóo Dios. Xú káʼnii eʼyáá rá. Numuu rí niniraʼmáʼ náa inuu presidente ndrígóo Estados Unidos rí maniñúnʼ magajníin. Náa carta nithi rí xándoo muxi̱ya̱a̱ nimbáa ga̱jma̱a̱ rí nditháan xúni̱ numuu rí náa Biblia niʼthí dí ragíʼmaa muradíin eʼwíínʼ. Ma̱ngaa, nithi rí asndu tsáa xa̱bu̱ bi̱ nixnáximinaʼ náa Dios ga̱jma̱a̱ makiéʼkúunʼ kiejunʼ náa Dios ní xándoo kaʼyoo ga̱jma̱a̱ maʼni gámbáa. ¡Ikhiin támiñuun! Ikhiin ninimi̱jna̱ munimbu̱ún má xúʼko̱ náa Jeobá.

 NIGUMA KÁWÍIN

14. Arathá ga̱jma̱a̱ Biblia rí nirígá nákha tsiguʼ 1914 asndu 1919.

14 Náa Ajngá rawunʼ Dios naʼthí rí nigíʼniin bi̱ Ninigajmaa Biblia asndu nákha tsiguʼ 1914 asndu índo̱ nigi̱ʼdu̱u̱ tsiguʼ 1919 náa Malaquías 3:1-3 * (atraxnuu). Náa versículos rígi̱, “Señor bi̱ gajkhun” nindxu̱u̱ Jeobá ga̱jma̱a̱ “bi̱ maʼga̱ kayóo ajngáa” nindxu̱u̱ Jesucristo. Ikhiin niguwáʼ guyexi rí eni “e̱ji̱i̱n Leví”, bi̱ nandoo gáʼthúu̱n bi̱ kaxtaʼwíin. Nda̱wa̱á rí Jeobá nixprígún ga̱jma̱a̱ niʼni kaʼwi̱i̱n bi̱ kaxtaʼwíin, nikuwa xawii mu mudrigú mbá ñajunʼ nuxi̱ʼ. Tsiguʼ 1919, Jesús nigíiʼ mbáa “ñumba tsi jmbi, tsi majan indxaʼhuaminaʼ” mu maxnúu ikha xuajñu Dios (Mat. 24:45). Asndu ikhú xa̱bi̱i̱ Dios nigájnaán náa majñu̱ʼ Babilonia la Grande. Asndu nákha ikhú kuwa rajmañún ndiéjunʼ rí nandoo Dios, ga̱jma̱a̱ nandún kuyáá itháan. ¡Ra̱ʼkhá tháán exna̱a̱ núma̱aʼ numuu rí Jeobá naʼni tsajkurámiinʼ! [2]

15. Xú káʼnii exnáa núma̱aʼ rí niguma káwáanʼ náa Babilonia la Grande rá.

15 Nadxulú wéñuʼ rí Jeobá niʼni káwáanʼ náa Babilonia la Grande. Satanás tséʼngo̱o̱ gáʼni gámbóo rí mbuyamajkuíí Dios. Mú gíʼmaa marmáʼáan a̱jkiu̱lú náa numuu rí niʼni káwáanʼ Jeobá. Ikhaa nandoo rí xúgínʼ maguma káwíin (2 Cor. 6:1). Mú kuwa mbaʼin wéñuʼ xa̱bu̱ bi̱ kuwa raʼtáñajúúnʼ religión dí ragájkhun ga̱jma̱a̱ rí ndayóoʼ mumbáñunlú. Guʼni xúgíʼ rí eyoo mu mbuʼyaridúún a̱ngiu̱lú bi̱ niguájun jmbu ga̱jma̱a̱ gumbañúún xa̱bu̱ mu magajnáan náa religión dí ragájkhun.

^ [1] (kutriga̱ 12): Atayáá libro La fe en marcha, ndrígóo A. H. Macmillan, ináa 94.

^ [2] (kutriga̱ 14): Rí nikuwa judíos náa majñu̱ʼ Babilonia nambánii ga̱jma̱a̱ rí niguaʼnii cristianos nda̱wa̱á rí nigi̱ʼdu̱u̱ nikuwa apóstatas. Mú xándoo muʼthá rí índo̱ nikuwa judíos náa majñu̱ʼ Babilonia nandoo gáʼthúu̱n rí niguaʼnii cristianos bi̱ kaxtaʼwíin. Ikha jngó ragíʼmaa mbuʼyáaʼ mbá rí nandoo gáʼthúu̱n náa mámbá rí niguáʼniin judíos. Rígá tikhu rí tsembánii. Mbá xkri̱da, judíos nikuwa mbá 70 tsiguʼ náa majñu̱ʼ Babilonia, mú cristianos nikuwa itháan mba̱yu̱ʼ.

^ párr. 1 Revelación 18:4: “Ma̱ngaa nidxáun mbá aʼwá náa mekhuíí rí niʼthí: “Agajnáʼla ikhí xuajñunʼ, á mu tsíyalá mundáwami̱jna̱ ga̱jma̱a̱ aʼkhá dí nuni ikhiin, ma̱ngaa á mu tsíyalá mudrígulá gamiéjunʼ dí mundrigú ikhiin”.”

^ párr. 2 Revelación 17:1, 2: “Ga̱jma̱a̱ mbáa bi̱ juwiin ángeles bi̱ kuya̱ juwan tazón ni̱ʼkha̱ ga̱jma̱a̱ niʼthímijna ga̱jma̱á ni̱ndxu̱ʼ, ma̱ngaa niʼthí: “Ayi̱, masngajmáʼ rí magíʼnuu a̱ʼgu̱ bi̱ nagujuamínaʼ bi̱ nagi̱ʼi̱ náa rígá mba̱a̱ iyaʼ, numuu dí reyes bi̱ kuwa náa tsu̱du̱u̱ ku̱ba̱ʼ nini aʼkhá gajmiún, mangiin bi̱ kuwa náa tsu̱du̱u̱ ku̱ba̱ʼ nijngi̱i̱n ga̱jma̱a̱ vino ndrígu̱ún aʼkhá”.”

^ párr. 14 Malaquías 3:1-3: ““¡Gu̱ya̱a̱!, nakuʼmáa mbáa bi̱ maʼga̱ kayóo ajngáa, ga̱jma̱a̱ ikhaa mambáʼtoo mbá kamba̱a̱ náa inuʼ ikhúúnʼ. Ga̱jma̱a̱ mbá nacha̱ gáʼkha̱ náa templo Ndrígóo Señor bi̱ gajkhun, bi̱ ikháanʼ nduʼyáaʼ ga̱jma̱a̱ bi̱ ma̱ʼkha̱ kayóo ajngáa rí nambánuu bi̱ nandala ku̱ya̱a̱. ¡Gu̱ya̱a̱! Ikhaa ma̱ʼkha̱”, niʼthí Jeobá bi̱ gíʼdiin mbaʼin ejércitos. “Mú tsáa gáʼngo̱o̱ gáraʼnuu mbiʼi ndrígóo, ga̱jma̱a̱ tsáa gáʼngo̱o̱ gawi̱ji̱ índo̱ ikhaa gákujmaa xáʼ. Numuu rí ikhaa mani̱ndxu̱u̱ xóo aguʼ rí natsikháxi ga̱jma̱a̱ xóo xábú rí najmún bi̱ nujñáa Ga̱jma̱a̱ tsigijñaʼ ndrígóo Judá ga̱jma̱a̱ Jerusalén phú mani̱ndxu̱u̱ mitsaan náa Jeobá, xó má nákha ginii ga̱jma̱a̱ nákha wajyúúʼ”.