Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Septiembre tsiguʼ 2017

Ajngá rawunʼ Dios gíʼdoo tsiakii

Ajngá rawunʼ Dios gíʼdoo tsiakii

“Ajngá rawunʼ Dios ndaʼya, ga̱jma̱a̱ gíʼdoo tsiakii” (HEB. 4:12).

AJMÚÚ 96 GA̱JMA̱A̱ 94

1. Náa numuu rí nduʼyáá májánʼ rí Ajngá rawunʼ Dios gíʼdoo tsiakii rá. (Atayáá timbá xtiʼkhu.)

XA̱BI̱I̱ Jeobá nduʼyáá májánʼ rí “ajngá rawunʼ Dios ndaʼya, ga̱jma̱a̱ gíʼdoo tsiakii” (Heb. 4:12). Nduyáá rí ajngóo Dios rígá náa Biblia, gíʼdoo tsiakii mu mariʼkhuu vida ndrígúlú ga̱jma̱a̱ ndrígu̱ún eʼwíínʼ xa̱bu̱. Nákha xóó tsénindxu̱ún xa̱bi̱i̱ Jeobá, tikhun nuni kuʼwáʼ, najmún droga o nuxuda̱mi̱jna̱ aʼkhá gajmiún mbáa. Eʼwíínʼ najmaʼniinʼ wéñuʼ o niguáʼdáá mbújkha̱a̱, mú nakumu̱ún rí nda̱a̱ numuu xúgíʼ rígi̱ (Ecl. 2:3-11). Ga̱jma̱a̱ numuu tsiakii ndrígóo Biblia, mbaʼin bi̱ nikumu̱ún rí na̱nguá guáʼthi̱i̱n nimbá rí xúgi̱ rígá mbá rí májánʼ rí guáʼthi̱i̱n ga̱jma̱a̱ nduyáá xóo makuwa. Mbáa nanigulúʼ índo̱ nuraxnuu tikhuu historias ndrígu̱ún náa sección “Biblia niriʼkhu̱u̱ rí xóo makuwá”. Ga̱jma̱a̱ ndiʼyáá rí maski ajndu ni̱ndxu̱lú má xa̱bi̱i̱ Jeobá, xúgiáanʼ ndayúlú rí Biblia mambáyulúʼ mu mba̱ja̱ rí mambáxulúʼ gajmiúlú Jeobá.

2. Ndiéjunʼ nimbáñun tikhun nákha siglo timbá ga̱jma̱a̱ numuu tsiakii ndrígóo Ajngá rawunʼ Dios rá.

2 Tseʼniulú tsiánguá rí mbiʼi xúgi̱ mbaʼin xa̱bu̱ niriʼkumijná wéñuʼ índo̱ nunigajmaa Ajngá rawunʼ Dios. Xúgi̱ kaʼnii nirígá nákha siglo timbá, bi̱ niguáʼthi̱i̱n rí magúun mekhuíí (atraxnuu  1 Corintios 6:9-11). * Apóstol Pablo niʼthí ga̱jma̱a̱ numún xa̱bu̱ bi̱ xátaʼa̱a̱n náa Reino ndrígóo Dios, ga̱jma̱a̱ nda̱wa̱á niʼthún cristianos: “Xúʼko̱ kaʼnii nini̱ndxa̱la tikuáanʼ rí ikháanʼ”. Mú Ajngá rawunʼ Dios ga̱jma̱a̱ xi̱ʼ kaʼwu nimbáñun mu muriʼkhumijná. Asndu nda̱wa̱á rí ninindxu̱ún cristianos, tikhun nixudami̱jna̱ aʼkhá rí niʼni rí ni xámbaxu̱u̱n májánʼ gajmiún Jeobá. Mbá xkri̱da, náa Biblia naʼthí ga̱jma̱a̱ numuu mbáa cristiano bi̱ nixtiyáaʼ bi̱ nigumaa expulsar. Mú nda̱wa̱á niriʼkuminaʼ ga̱jma̱a̱ nitanga̱a̱ náa congregación (1 Cor. 5:1-5; 2 Cor. 2:5-8). Naxnúlú tsiakii índo̱ nduʼyáá rí mbaʼin a̱ngiu̱lú nuriʼkhumijná ga̱jma̱a̱ numuu Ajngá rawunʼ Dios.

3. Ndiéjunʼ gajmañulú náa artículo rígi̱ rá.

3 Numuu rí Jeobá nixnúlú mbá Ajngá rawunʼ rí gíʼdoo tsiakii, nandulúʼ majmulúʼ májánʼ (2 Tim. 2:15). Ikha jngó náa artículo rígi̱ mbuʼyáá rí ma̱ngoo muʼni mu ma̱ndoo majmulúʼ májánʼ tsiakii ndrígóo Biblia náa ajtsú enii rígi̱. Timbá, náa vida ndrígúlú. Rí maʼni a̱jma̱, náa muʼtáraʼa. Ga̱jma̱a̱ rí maʼni ajtsú, rí xóo muʼsngáa náa plataforma. Náa muʼnigajmaa rígi̱ mambáyulúʼ musngajmá rí nandulúʼ kuʼyáá ga̱jma̱a̱ nuxnáa núma̱aʼ Anu̱lú bi̱ xtáa mekhuíí, bi̱ naʼsngúlúʼ mu makuwáanʼ májánʼ (Is. 48:17).

NÁA VIDA NDRÍGÚLÚ

4. a) Ndiéjunʼ gíʼmaa muʼni á mu nandulúʼ rí Ajngá rawunʼ Dios mambáyulúʼ rá. b) Náa mbi̱ʼi̱i̱ etanigajmaa Biblia ikháánʼ rá.

4 Á mu nandulúʼ rí Ajngá rawunʼ Dios mambáyulúʼ, mbaʼyóoʼ rí muraxnuu xúgíʼ mbiʼi á mu nandoo (Jos. 1:8). Gajkhun má rí mbaʼánʼ rí ikháanʼ na̱nguá guapáanʼ, mú xúniʼñáʼ rí nimbá maguikulúʼ muʼnigajmaa, asndu má ñajunʼ rí kuaʼdáálu (atraxnuu Efesios 5:15, 16). * Ma̱ndoo muraxnuu Biblia miʼcha̱, wakhaʼ o wakhííʼ. Nakumulú xóo nikumu̱u̱ bi̱ niʼnirámáʼ Biblia bi̱ niʼthí: “¡Phú nandoʼ ka̱yo̱o̱ xtángoo ndrígáʼ! Kañiʼ mbiʼi endxa̱ʼwa̱mínáʼ ga̱jma̱a̱ numuu ikhaa” (Sal. 119:97).

5, 6. a) Ndíjkha gíʼdoo numuu mundxaʼwami̱jna̱ rá. b) Xú káʼnii gándoo gambáyulú rí mundxaʼwamíjna̱ rá. c) Xú káʼnii nimbáyaʼ ikháánʼ rí matraxnuu Ajngá rawunʼ Dios ga̱jma̱a̱ rí matatsaʼwamínáʼ rí naʼthí ikhí rá.

5 Raʼkháa i̱ndó muraxnuu Biblia, ndayóoʼ mundxaʼwamíjna̱ tsumáá rí kuwáanʼ ruraxnuu (Sal. 1:1-3). I̱ndó xúʼko̱ ma̱ndoo  muʼgíʼ muʼnimbaníí ku̱ma̱ rí na̱ʼkha̱ náa Ajngá rawunʼ Dios. Tséʼniuu má á mu nuraxnuu náa i̱yi̱i̱ʼ o náa aparato electrónico, meta ndrígúlú gíʼmaa maʼni rí majngúun asndu náa awúu̱n a̱jkiu̱lú.

6 Xú káʼnii gándoo gambáyulú rí nundxa̱ʼwa̱míjna̱ rá. Tikhun índo̱ nagún ruraxnuu naguajun ga̱jma̱a̱ nuni graxe̱ xóo rígi̱: “Ndiéjunʼ eʼsngóʼ rígi̱ ga̱jma̱a̱ numuu Jeobá rá. Lá xtáá má ranimbánuu ikha rígi̱ náa vida ndrígóʼ ráʼ. Lá rígá xóó rí ndayóoʼ mani itháan májánʼ ráʼ.” Á mu nundxa̱ʼwa̱míjna̱ rí naʼthí náa Ajngá rawunʼ Dios ga̱jma̱a̱ nuʼthá káñii, maxkaxáanʼ muʼgíʼ muʼnimbánii xtágabu ndrígóo. Xúʼko̱ gáʼni rí majmulúʼ májánʼ tsiakii ndrígóo Ajngá rawunʼ Dios náa vida ndrígúlú (2 Cor. 10:4, 5).

NÁA NUʼTÁRAʼA

7. Xú káʼnii gándoo gájmulúʼ májánʼ Ajngá rawunʼ Dios índo̱ na̱jkua̱lú guʼtáraʼa rá.

7 Xú káʼnii gándoo gambáyulú Ajngá rawunʼ Dios náa nuʼtáraʼa rá. Mbá nindxu̱u̱ rí majmulúʼ má xúʼko̱. Mbáa ndxájulú niʼthí: “Á mu nadxuʼ ga̱jma̱ʼ Jeobá mámbá guʼwá, lá marata̱ mbáwíín ikháánʼ o matatsiʼñáanʼ rí maʼthí ikhaa dxe̱ʼ.” Ndiéjunʼ nindoo gáʼthi xá. Rí índo̱ nuraxnuu Biblia mu maʼdxun mbáa xa̱bu̱, nindxu̱u̱ xóo rí muniʼñáaʼ rí maʼthí Jeobá. Mbá versículo rí májánʼ kaxtaʼwíí gíʼdoo itháan tsiakii ki xóo rí muʼthá ikháanʼ (1 Tes. 2:13). Ikha jngó guraximíjna̱: “Índo̱ na̱jkhá gátaráʼa, lá naniminaʼ magúxnuu Biblia índo̱ nandoo ráʼ.”

8. Náa numuu dí raʼkháa i̱ndó mbaʼyóoʼ muraxnuu texto rí na̱ʼkha̱ náa Biblia mbáa xa̱bu̱ rá.

8 Gajkhun má, dí raʼkháa i̱ndó muraxnuu texto ndrígóo Biblia náa xa̱bu̱. Xó má nirígá nákha siglo timbá, mbaʼin xa̱bu̱ rí mbiʼi xúgi̱ tsíkru̱ʼu̱u̱n dí naʼthí náa Biblia (Rom. 10:2). Xákumulú rí mbáa makro̱ʼo̱o̱ mbá versículo rí muraxnuu. Rí gíʼdoo muʼni dí matangáanʼ muʼthá mbá ajngáa o mbá frase dí gíʼdoo numuu ga̱jma̱a̱ muʼthán ndiéjunʼ eyoo  gáʼthúu̱n. Xúʼko̱, Ajngá rawunʼ Dios maʼga̱nú náa edxu̱u̱ ga̱jma̱a̱ náa a̱jkiu̱u̱n xa̱bu̱ (atraxnuu Lucas 24:32).

9. Arathá ga̱jma̱a̱ mbá xkri̱da xú káʼnii gándoo musngajmá mbá versículo rí maʼni rí xa̱bu̱ mbaʼyamajkuu Biblia.

9 Índo̱ gusngajmá mbá versículo, gíʼmaa muʼni rí xa̱bu̱ mbaʼyamajkuu Biblia. Mbá xkri̱da, ma̱ndoo muʼthá: “Guʼyáá rí naʼthí Dios ga̱jma̱a̱ numuu rígi̱”. Mú á mu nuʼtháán mbáa bi̱ na̱nguá nindxu̱u̱ cristiano, ma̱ndoo muʼtháán: “Atayáá rí naʼthí náa ajngá rawunʼ Dios”. O á mu xa̱bu̱ na̱nguá eyoo gáʼyoo ga̱jma̱a̱ numuu nimbá religión, ma̱ndoo muraxi̱i̱: “Lá nitadxuun ikháánʼ ajngáa rígi̱ rí niʼni má rígá ráʼ.” Numuu rí mámbáa xa̱bu̱ mixtiʼkhuii, gíʼmaa muriʼkhuíí xóo muʼtháán mámbáa (1 Cor. 9:22, 23).

10. a) Ndiéjunʼ nigíʼnuu mbáa ndxájulú rá. b) Arathá xú káʼnii nitayáá ikháánʼ rí Ajngá rawunʼ Dios gíʼdoo tsiakii índo̱ narataráʼa.

10 Mbaʼin a̱ngiu̱lú nduyáá rí majmúún Ajngá rawunʼ Dios náa nutaraʼa mambáñun wéñuʼ xa̱bu̱. Mbá xkri̱da, mbáa ndxájulú na̱jkha̱ gáʼyoo mbáa xa̱bu̱ nikhi̱i̱ bi̱ mba̱yu̱ʼ má tsiguʼ má eguxnuu revistas ndrígúlú. Mbóo mbiʼi, raʼkháa mbóó niniñuʼ revista rí nuxiʼ La Atalaya, ma̱ngaa niguxnuu mbóo texto rí na̱ʼkha̱ má ikhí náa revista. Ninindxu̱u̱ 2 Corintios 1:3, 4, náa naʼthí rí Jeobá nindxu̱u̱ “Anu̱lú bi̱ nagáwiinʼ a̱jkiu̱u̱n ga̱jma̱a̱ Dios bi̱ naʼni̱i̱ a̱jkiu̱lú”, ga̱jma̱a̱ “bi̱ naʼni̱i̱ a̱jkiu̱lú náa xúgíʼ gamiéjunʼ rí kuaʼdáá”. Xa̱bu̱ bugi̱ niniguʼ wéñuʼ texto rígi̱ rí asndu nindo̱ʼo̱o̱ mata̱nga̱a̱ maguxnuu mbu̱júu̱ versículo rígi̱. Nda̱wa̱á, niʼthí rí ikhaa ga̱jma̱a̱ a̱ʼgiu̱u̱ nda̱ñúnʼ wéñuʼ rí maʼni̱i̱ a̱jkiu̱ún ga̱jma̱a̱ rí nandún majmañún itháan ga̱jma̱a̱ numuu Biblia. Xó má eʼyáá, rí majmulúʼ Ajngá rawunʼ náa nuʼtáraʼa ma̱ndoo maʼni rí tsiakii ndrígóo Dios mambáñun xa̱bu̱ (Hech. 19:20).

ÍNDO̱ GUʼSNGÁA NÁA PLATAFORMA

11. Ndiéjunʼ ñajunʼ guáʼdáá a̱ngiu̱lú bi̱ nusngáa náa plataforma rá.

11 Xúgiáanʼ nanigulúʼ mu̱ʼgua̱ náa reunión ga̱jma̱a̱ náa asamblea. Rí phú numuu rí na̱jkua̱ ikhí nindxu̱u̱ mu mbuʼyamajkuíí Jeobá. Mú ma̱ngaa na̱jkua̱ mu mambáyulúʼ rí nusngáa. A̱ngiu̱lú bi̱ nusngáa náa plataforma guáʼdáá mbá ñajunʼ kiejunʼ, mú ma̱ngaa nindxu̱u̱ mbá ñajunʼ mba̱a̱ (Sant. 3:1). Ikha jngó gíʼdoo wéñuʼ numuu rí xúgíʼ rí nusngáa ma̱ʼkha̱ náa Biblia. Á mu ikháánʼ ni̱ndxa̱ʼ mbáa bi̱ gíʼdoo ñajunʼ rúʼko̱, ndiéjunʼ gándoo matani mu tsiakii ndrígóo Ajngá rawunʼ Dios marigá náa bi̱ nudxawíín rá.

12. Xú káʼnii gándoo gaʼyoo bi̱ naxná discurso rí Biblia nagiʼdoo itháan numuu náa discurso ndrígóo xá.

12 Atatsíñaʼ rí Biblia magiʼdoo itháan numuu náa discurso ndrígáʼ (Juan 7:16). Índo̱ garaxna discurso, á mu najmaʼ mbá historia o mbá xkri̱da atayáá májánʼ rí xúgíʼ rí gárata maʼni rí mbuyamajkuíí Biblia, raʼkháa rí mbuyamajkuaʼ ikháánʼ. Ma̱ngaa, garmáʼáan a̱jkia̱nʼ rí raʼkháa ikháá nindxu̱u̱ rí matraxnuu Biblia ki xóo rí marasngáa ga̱jma̱a̱ numuu Biblia. Á mu najmaʼ mbaʼa textos mbaʼin xa̱bu̱ xarmáʼáan a̱jkiu̱ún. Ikha jngó atayááʼ májánʼ mbá texto rí maraxnuu ga̱jma̱a̱, atríyaʼ mbiʼi matraxnuu, maratha̱a̱n rí eyoo gáʼthúu̱n, mataʼgíʼ xkri̱da ga̱jma̱a̱ maratha̱a̱n xú káʼnii gámbáyúu (Neh. 8:8). Á mu discurso na̱ʼkha̱ náa bosquejo ndrígóo organización, atanigajmaa ajngáa rí na̱ʼkha̱ ikhí ga̱jma̱a̱ textos, ga̱jma̱a̱ atagíʼ ma̱ta̱ya̱a̱ xú káʼnii kagujtuminaʼ nájma̱ rígi̱. Nda̱wa̱á, atraʼwíí versículos rí majmaʼ mu marasngáa ku̱ma̱ ndrígóo bosquejo (mataxkamaa ikha rí mambáyaʼ náa lección 21 asndu 23 ndrígóo Benefíciese de la Escuela del Ministerio Teocrático). Mú rí itháan gíʼdoo numuu nindxu̱u̱ rí matanda̱ʼa̱a̱ Jeobá rí  mambáyaʼ marasngáa májánʼ Ajngá rawunʼ (atraxnuu Esdras 7:10 * ga̱jma̱a̱ Proverbios 3:13, 14). *

13. a) Xú káʼnii nimbáyúu mbáa ndxájulú rí xú kaʼnii ejmúún Biblia náa mbá reunión xá. b) Xú káʼnii nimbáyaʼ ikháánʼ índo̱ najmaa Biblia náa reunión rá.

13 Guʼyáá xú káʼnii nimbáyúu mbá ndxájulú bi̱ xtáa náa Australia rí xú kaʼnii ejmúún Biblia náa mbá reunión. Ikhaa nákha ninindxu̱u̱ mbá dxáʼgú nigumaa mbá dí raʼkhí wéñuʼ, mú nigruigú ajngáa ndrígóo Biblia ga̱jma̱a̱ nixnáximinaʼ náa Jeobá. Maski asndu xúʼko̱. Naʼniu mingíjyúuʼ maʼnimbo̱o̱ rí Jeobá nandoo kaʼyoo. Mbó mbiʼi, niʼdxawun náa mbá reunión mbá texto rí ni̱jkha̱nú asndu náa a̱jkiu̱u̱n. Nda̱wa̱á rí nindxa̱ʼwa̱mínáʼ ga̱jma̱a̱ niguxnuu eʼwáʼ versículos, ni̱jkha̱nú ndiʼyoo rí Dios nandoo kaʼyoo. * Ikháánʼ rá, lá nitadxawíín mbá miʼtsú náa mbá reunión o náa mbá asamblea mbá texto rí ni̱jkha̱nú asndu náa awúnʼ a̱jkia̱nʼ ráʼ. (Neh. 8:12.)

14. Xú kaʼnii gusngajmá rí nangajulú kuʼyáá Ajngá rawunʼ Dios rá.

14 Xúgiáanʼ nuxnáa númaa numuu rí Jeobá Dios nixnulú Ajngóo ga̱jma̱a̱ rí niʼnimbánuu rí mbajyúuʼ asndu kámuu (1 Ped. 1:24, 25). Ikha jngó, xúniʼñáanʼ ruraxnuu, guʼgíiʼ muʼnimbaníí ga̱jma̱a̱ majmulúʼ mú mumbaʼñúún eʼwíínʼ. Xúʼko̱ gusngajmá rí nandulúʼ kuʼyáá ga̱jma̱a̱ rí nangajulú rígi̱ rí gíʼdoo wéñuʼ numuu. Mú rí itháan gíʼdoo numuu, nindxu̱u̱ rí musngajmá dí nandulúʼ kuʼyáá Jeobá bi̱ niʼni.

^ párr. 2 1 Corintios 6:9-11: “¡Xú káʼnii! Lá na̱nguá eya̱a̱ dí xa̱bu̱ bi̱ tseni rí jmbu xátaʼa̱a̱n náa reino ndrígóo Dios ráʼ. Xuniʼñámíjná dí muninduwáanʼlá. Ni má xa̱bu̱ bi̱ nubúnʼ gajmiún bi̱ xóó tsediin asndu má bi̱ nduyamajkún xándú, ni má bi̱ nubúnʼ gajmiún bi̱ raʼkháa guʼñún o ajmbiún, ni xa̱bekha bi̱ a̱jma̱ ñajúnʼ asndu má xa̱bekha bi̱ nubúnʼ gajmiún xa̱bekha, ni má xa̱bu̱ bi̱ nuni kuʼwáʼ, ni má xa̱bu̱ bi̱ nandún maguaʼdáá wéñuʼ, ni má xa̱bu̱ najngi̱i̱n, ni má xa̱bu̱ bi̱ nutha wéñuʼ eʼwíínʼ, ni má xa̱bu̱ bi̱ nurawíkáñúnʼ a̱ngiu̱ún dí guáʼdáá xáta̱ʼa̱a̱n náa reino ndrígóo Dios. Mú, xúʼko̱ kaʼnii nini̱ndxa̱la tikuáanʼ rí ikháanʼ. Mú niguma kaʼwáanʼ ga̱jma̱a̱ ikháanʼ nini̱ndxa̱la jmbii náa mbiʼyuu Señor Jesucristo ga̱jma̱a̱ xi̱ʼ ndrígóo Dios”.

^ párr. 4 Efesios 5:15, 16: “Tsumáá gúya̱a̱ xú káʼnii majngruigala xáʼni xóo xa̱bu̱ bi̱ tséyáá, gíʼmaa muni xóo xa̱bu̱ bi̱ nduyáá wéñuʼ, gutsila xúgíʼ mbiʼi dí naguanúu, numuu dí mingíjyúuʼ wéñuʼ mbiʼi rí kuwáanʼlu”.

^ párr. 12 Esdras 7:10: “Esdras niʼniratoo a̱jkiu̱u̱n mu mbaʼyoo rí eʼthí náa xtángoo ndrígóo Jeobá ga̱jma̱a̱ magíʼ maʼnimbánuu ma̱ngaa mu maʼsngáa náa Israel xtángoo ga̱jma̱a̱ rí jmbu”.

^ párr. 12 Proverbios 3:13, 14: “Tsímáá xtáa xa̱bu̱ bi̱ naxkamaa itháan ku̱ma̱, ga̱jma̱a̱ xa̱biya̱ bi̱ najmañuu maraʼwíí rí maʼni, numuu rí matada̱ʼ rígi̱ nindxu̱u̱ itháan ki xóo plata; ga̱jma̱a̱ itháan nayambáá ki xóo oro”.

^ párr. 13 Atayáá kúgumaʼá “ Xúgíʼ niriʼkhuu”.