Atambaʼtaa mu matraxnuu

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

Atraʼwíí ajngáa me̱ʼpha̱a̱

Lá kuwáanʼ rumbayúmíjná náa Jeobá ráʼ.

Lá kuwáanʼ rumbayúmíjná náa Jeobá ráʼ.

“Jeobá xtáa raʼni káwíin xa̱bi̱i̱; ga̱jma̱a̱ nimbáa bi̱ nambáyuminaʼ náa ikhaa majuiʼthá rí gíʼdoo aʼkhúun” (SAL. 34:22).

AJMÚÚ 8 GA̱JMA̱A̱ 54

1. Xú káʼnii ekumún mbaʼin xa̱bi̱i̱ Dios ga̱jma̱a̱ numuu aʼkhá rá.

MBÓO miʼtsú, apóstol Pablo nikaguabaaʼ wéñuʼ rí asndu niʼthí: “¡Ra̱ʼkhá tháán migínuun xa̱bu̱ ni̱ndxu̱ʼ!” (Rom. 7:24). Mbiʼi xúgi̱, mbaʼin xa̱bi̱i̱ Dios nakumu̱ún xúʼko̱ kaʼnii xóo ikhaa. Maski ajndu cristianos nuʼgíʼ nuni rí naniguʼ Jeobá, xúgiáanʼ nakiéʼkulu numuu rí nindrígúu aʼkhá. Ga̱jma̱a̱ tikhun bi̱ nixudami̱jna̱ aʼkhá rí mitsáʼkhúun wéñuʼ naguanu nundxa̱ʼwa̱míjna̱ rí Jeobá nditháan xáʼni mba̱a̱ a̱jkiu̱u̱n kaʼñún.

2. a) Rí naʼthí náa Salmo 34:22, náa numuu rí xáʼyóoʼ makuwa gíná wéñuʼ xa̱bi̱i̱ Dios ga̱jma̱a̱ numuu rí nikiéʼkún rá. b) Ndiéjunʼ gúʼyáá náa artículo rígi̱ rá. (Atayáá kúgumaʼá “ Lá nandoo gáʼthúu̱n ikha o mbaʼa rí kiʼtáriyaʼ ráʼ.”)

2 Náa Biblia naʼthí rí bi̱ numbayúmi̱jna̱ náa Jeobá xáʼyóoʼ maxmiéjunʼ wéñuʼ ga̱jma̱a̱ numuu aʼkhún (atraxnuu Salmo 34:22). * Ndiéjunʼ eyoo gáʼthúu̱n rí matambáyuminaʼ náa Jeobá rá. Ndiéjunʼ gáʼyooʼ muʼni mu Jeobá magáwíinʼ a̱jkiu̱u̱n ga̱jma̱a̱ maʼni mba̱a̱ a̱jkiu̱u̱n kaʼyulúʼ rá. Muriʼña̱a̱ graxe̱ rígi̱ índo̱ guʼnigajmaa ndiéjunʼ ninindxu̱u̱ ga̱jma̱a̱ náa nijmaa xuajen náa nimbayúmíjná rí niʼthí náa Xtángoo nákha wajyúúʼ náa  Israel. Pacto ndrígóo Xtángoo rúʼko̱ nixtiʼkuriyaʼ ga̱jma̱a̱ imbo̱o̱ nákha ndxa̱a̱ ndrígóo Pentecostés tsiguʼ 33. Mú garmáʼáan a̱jkiu̱lú rí Jeobá nixná Xtángoo rígi̱. Ikha jngó, rí naʼthí ga̱jma̱a̱ numuu xuajin náa numbayúmíjná naʼsngúlú rí eku̱mu̱u̱ Jeobá ga̱jma̱a̱ numuu aʼkhá, ga̱jma̱a̱ numún bi̱ nixudami̱jna̱ aʼkhá ga̱jma̱a̱ bi̱ nagáwíínʼ a̱jkiu̱ún. Gugíʼdi̱i̱ mbuʼyáá náa numuu nirígá xuajen rígi̱ ga̱jma̱a̱ xú káʼnii niyambáá.

“GUXNA IKHÁANʼLA XUAJIN NÁA MUMBAYÚMÍJNÁ”

3. Ndiéjunʼ rí ndiyóoʼ muni̱i̱ xa̱bu̱ Israel gajmiún bi̱ naxíyáa ndxájuu rá.

3 Jeobá ndiʼyoo rí nindxu̱u̱ mitsáʼkháan wéñuʼ rí mbáa israelita maríya kaʼyúʼ vida ndrígóo mbáa xa̱bu̱. Á mu rúʼko̱ erígá, xa̱biya̱ bi̱ kaʼyoo mijngii, bi̱ najmaʼniiʼ xóo bi̱ “maʼni numa̱a̱ eʼdi”, gíʼmaa maxíyáa bi̱ nixíyáa ndxájuu (Núm. 35:19). Xúʼko̱ kaʼnii bi̱ nixíyáa ndxájuu naʼni numuu ga̱jma̱a̱ vida ndrígóo eʼdi rí nixídíí. Bi̱ maʼni numa̱a̱ eʼdi mbaʼyóoʼ maʼni nacha̱ mu Ku̱ba̱ʼ rí Jeobá niʼthí maxnún xáguma gachíí, numuu rí Jeobá niʼthí rí magadíí eʼdiuu xa̱bu̱ bi̱ “naʼni gachúu ku̱ba̱ʼ”. Ga̱jma̱a̱ niʼthí: “Ga̱jma̱a̱ xúni̱ gachíí ku̱ba̱ʼ náa kuwáanʼla” (Núm. 35:33, 34).

4. Ndiéjunʼ erígá índo̱ mbáa israelita naxíyáa ndxájuu, mú tséʼni kiejunʼ xá.

4 Ndiéjunʼ erígá ga̱jma̱a̱ mbáa israelita bi̱ taxíyáa kiejunʼ ndxájuu rá. Maski ajndu xúʼko̱, bi̱ nixíyáa ndxájuu gíʼdoo aʼkhúun numuu rí nixídíí eʼdiuu mbáa bi̱ nda̱a̱ aʼkhúun (Gén. 9:5). Mú numuu rí táʼni kiejunʼ, Jeobá naniñuʼ rí magaʼwíínʼ a̱jkiu̱u̱n kuyáá. Bi̱ nixíyáa ndxájuu gíʼmaa magayútoʼoo náa mbá xuajin náa mambáyuminaʼ, náa mambáyuminaʼ mu xáxíyáa bi̱ maʼni numa̱a̱ eʼdi. Mú xándoo gagajnúu ikhí asndu índo̱ gakháñuu bi̱ kayá edxu̱u̱ náa ndxajkun (Núm. 35:15, 28).

5. Náa numuu rí xuajin náa nimbayúmi̱jna̱ mambáyulúʼ makru̱ʼu̱lú itháan májánʼ rí eyoo Jeobá rá.

5 Jeobá niʼthúu̱n Josué rí maraʼwíí xuajen rígi̱ ga̱jma̱a̱ ajngáa rígi̱: “Guxna ikháanʼla xuajin náa mumbayúmíjná”. Ikha jngó mínaʼ Dios niʼthí rí xuajen rígi̱ magiʼdoo mbá ñajunʼ kiejunʼ, xóo muʼthá, rí maʼga̱nú mani̱ndxu̱u̱ mitsáʼkháan (Jos. 20:1, 2, 7, 8). Ikha jngó ma̱ndoo muraximíjna̱: “Xú káʼnii embáyulú xuajin náa numbayúmi̱jna̱ makru̱ʼu̱lú rí nagáwiinʼ a̱jkiu̱u̱n kaʼyulú Dios rá. Ga̱jma̱a̱ xú káʼnii eʼsngúlúʼ rí mumbayúmíjná náa Jeobá rí mbiʼi xúgi̱ rá.”

BI̱ NIXÍYÁA NDXÁJUU MBAʼYÓOʼ “MAʼTHÍ MU MUDXUUN BI̱ KUYA̱ EDXU̱U̱”

6, 7. a) Ndiéjunʼ ndiyóoʼ muni bi̱ kuya̱ edxu̱u̱ índo̱ mbáa xa̱bu̱ taxíyáa kiejunʼ ndxájuu rá. (Atayáá timbá xtiʼkhu.) b) Náa numuu rí májánʼ rí xa̱bu̱ bi̱ nixíyáa ndxájuu maʼtámíjná gajmíi̱n bi̱ kuya̱ edxu̱u̱ rá.

6 Índo̱ mbáa israelita naxíyáa mbáa, mú táʼni kiejunʼ, ndiyóoʼ magayúu náa xuajin náa numbayúmi̱jna̱ ga̱jma̱a̱ maʼthí rí niʼni náa xkrugoo xuajen “mu mudxuun bi̱ kuya̱ edxu̱u̱”. Ikhiin gíʼmaa muriguíi májánʼ (Jos. 20:4). Nguáthá mbiʼi nda̱wa̱á, mbaʼyoo muxuʼmaa náa nixíyáa ndxájuu mu bi̱ kuya̱ edxu̱u̱ náa xuajen muthi káʼnii gúni̱i̱ (atraxnuu Números 35:24, 25). * Á mu bugi̱ naguanu nduyáá rí táʼni kiejunʼ, nuniñaʼ magutrígáa náa xuajin náa mambáyuminaʼ.

7 Náa numuu rí bi̱ nixíyáa ndxájuu ndiyóoʼ maʼtámíjná gajmíi̱n bi̱ kuya̱ edxu̱u̱ rá. Mu ikhiin maguaʼdáá kaʼwu congregación ndrígóo Israel ga̱jma̱a̱ mu mumbayíí rí Jeobá magaʼwíínʼ a̱jkiu̱u̱n kaʼyoo. Mbáa bi̱ naʼnigajmaa wéñuʼ ga̱jma̱a̱ numuu Biblia naʼthí rí á mu xa̱bu̱ bi̱ nixíyáa ndxájuu tséʼtimíjná gajmíi̱n bi̱ kuya̱ edxu̱u̱ migamíi makhañúu. Ga̱jma̱a̱ xóó niʼthí: “Eʼdiuu rígá náa edxu̱u̱, numuu rí tájmuu rí Dios nixnúu mu mañewu̱u̱n”. Bi̱ nixíyáa ndxájuu mú táʼni kiejunʼ ma̱ndoo mixtambáyii, mu ndiyóoʼ rí mbayáaʼ mixtambáyii ga̱jma̱a̱ maniñaminaʼ mumbayíí. Á mu tsegáyúu náa xuajin rígi̱, bi̱ maʼni numa̱a̱ eʼdi ma̱ndoo maxíyáa.

8, 9. Náa numuu rí gíʼmaa manda̱ʼa̱ mumbayíí bi̱ kuya̱ edxu̱u̱ bi̱ nikudaminaʼ aʼkhá rí mitsáʼkhúun rá.

 8 Rí mbiʼi xúgi̱, cristiano bi̱ nikudaminaʼ aʼkhá rí mitsáʼkháan ndayóoʼ mbayáaʼ rí mumbayíí bi̱ kuya̱ edxu̱u̱ náa congregación. Ndíjkha gíʼdoo numuu maʼni xá. Timbá, numuu rí Jeobá naʼthí náa Ajngóo rí bi̱ kuya̱ edxu̱u̱ munimbaníí aʼkhá rí mitsáʼkháan wéñuʼ (Sant. 5:14-16). Raga̱jma̱ numuu, bi̱ kuya̱ edxu̱u̱ kuwa mu mumbañún bi̱ natanga̱a̱ a̱jkiu̱ún mu Dios maʼndoo kaʼñún mbu̱júu̱ ga̱jma̱a̱ ní xúni̱ aʼkhá rúʼko̱ (Gál. 6:1; Heb. 12:11). Ga̱jma̱a̱ rí maʼni ajtsú, bi̱ kuya̱ edxu̱u̱ nindrigi̱i̱n ga̱jma̱a̱ nijuiʼsngúún mu mumbañún bi̱ natanga̱a̱ a̱jkiu̱ún makuwa tsímáá. Jeobá naʼthí rí bi̱ kuya̱ edxu̱u̱ ni̱ndxu̱ún xóo “náa natawu̱nʼ índo̱ naxnúu wéñuʼ ruʼwa” (Is. 32:1, 2). Lá ragájkhun dí xúgíʼ rígi̱ nindxu̱u̱ mbá rí xóo nasngájma rí nagáwiinʼ a̱jkiu̱u̱n Dios ráʼ.

9 Mbaʼin xa̱bi̱i̱ Dios niʼni̱i̱ a̱jkiu̱ún índo̱ nitamijná gajmiún bi̱ kuya̱ edxu̱u̱ ga̱jma̱a̱ índo̱ niniñami̱jna̱ mumbañún. Mbá xkri̱da, mbáa ndxájulú bi̱ mbiʼyuu Daniel nikudaminaʼ mbá aʼkhá rí mitsáʼkhúun wéñuʼ, mú táʼthún mba̱yu̱ʼ igu̱nʼ bi̱ kuya̱ edxu̱u̱. Ikhaa naʼthí: “Numuu rí ninújngoo mba̱yu̱ʼ mbiʼi, nikumuʼ rí nándáa rí ma̱ndoo muni mu mumbayúʼ”. Daniel namiñuu má xúʼko̱ rí makujmaa pa̱jnu̱ rí niʼni. Ga̱jma̱a̱ mámbá mbiʼi rí naʼtájkáan, nikumu̱u̱ rí gíʼmaa mbayáaʼ magíʼdu̱u̱ maʼthúu̱n Jeobá rí maʼni mba̱a̱ a̱jkiu̱u̱n kaʼyoo. Nda̱wa̱á, ndiyáaʼ mumbayíí bi̱ kuya̱ edxu̱u̱. Índo̱ narmáʼáan a̱jkiu̱u̱n rí nirígá, naʼthí: “Gajkhun má rí nimíñuʼ matamíjná gajmíi̱nʼ bi̱ kuya̱ edxu̱u̱. Mú nda̱wa̱á rí ni̱thu̱u̱n, nikumuʼ rí asndu nigajta̱a̱ mbá rí mikewun náa tsu̱du̱ʼ. Rí xúgi̱ naku̱mu̱ʼ rí nda̱a̱ rí erikhoʼ mathu̱u̱n Jeobá”. Rí xúgi̱ Daniel nánguá eʼni gawúunʼ conciencia ndrígóo ga̱jma̱a̱ xíjkhoo nitháán mani̱ndxu̱u̱ siervo ministerial.

“GÍʼMAA MAGAYÚU NÁA MBÁ XUAJEN RÍGI̱”

10. Ndiéjunʼ ndiyóoʼ maʼni bi̱ nixíyáa ndxájuu á mu nandoo magaʼwíínʼ a̱jkiu̱u̱n kuyáá xá.

10 Á mu bi̱ táxíyáa kiejunʼ ndxájuu nandoo rí magaʼwíínʼ a̱jkiu̱u̱n kuyáá, mbaʼyoo rí nacha̱ maraʼwíí dí maʼni ga̱jma̱a̱ magayúu náa xuajin náa numbayúmi̱jna̱ dí gíʼ itháan mijngii (atraxnuu Josué 20:4). * Maxtáa xóó á mu naʼniminaʼ maʼga̱nú  nacha̱ náa xuajin ga̱jma̱a̱ maguanúu ikhí asndu índo̱ ndxajkun bi̱ kayá edxu̱u̱ gakháñuu. Rígi̱ nandoo gáʼthúu̱n rí maniñuʼ mbaʼa, xóo ñajunʼ ndrígóo, rí májánʼ dí gíʼdoo náa xtáa ga̱jma̱a̱ dí xáʼga̱ náa i̱ʼwáʼ xuajin (Núm. 35:25). * Mú tsiakii rí gáʼni xánindxu̱u̱ ndíí. Á mu xa̱bu̱ bi̱ nixíyáa ndxájuu nagájnuu náa xuajin rígi̱ náa numbayúmi̱jna̱, nasngájma rí tsixmiéjunʼ rí niríya kaʼyúʼ vida ndrígóo imba̱a̱ xa̱bu̱, ga̱jma̱a̱ rí vida ndrígóo migamíi mandáti̱ga̱.

11. Ndiéjunʼ gándoo maʼni mbáa cristiano bi̱ natanga̱a̱ a̱jkiu̱u̱n mu masngájma rí nandoo rí Dios magáʼwiinʼ a̱jkiu̱u̱n kaʼyoo xá.

11 Rí mbiʼi xúgi̱, bi̱ natanga̱a̱ a̱jkiu̱u̱n rígá rí eyóoʼ maʼni mu Dios magaʼwíínʼ a̱jkiu̱u̱n kaʼyoo. Gíʼdoo rí maniñuʼ aʼkhá rí xtáa raʼni, mú ma̱ngaa mbaʼyóoʼ maʼni kaníí xúgíʼ rí maxkaxi̱i̱ makudaminaʼ aʼkhá. Ga̱jma̱a̱ xi̱ʼ kaʼwu, apóstol Pablo niʼthí rí cristianos bi̱ kuwa náa Corinto bi̱ nitanga̱a̱ a̱jkiu̱ún ga̱jma̱a̱ numuu aʼkhá rí nixudami̱jna̱ nikuwa gíná “numuu rí [nini] rí májánʼ” ga̱jma̱a̱ dí rígi̱ niʼni rí ikhiin ‹muni kaʼwumijnáa, xúʼko̱ rí makiʼníin, xúʼko̱, gamíi, xúʼko̱, rí maʼndún wéñuʼ, xúʼko̱ rí maxíñu̱u̱n, xúʼko̱ nuni jmbi̱i̱ dí ra̱májánʼ› (2 Cor. 7:10, 11). Á mu mangáanʼ nuʼni xúgíʼ rí nandoo mu muniʼñáaʼ ru̱ʼni̱ mbá aʼkhá rí migamíi wéñuʼ, musngájmaa Jeobá rí naxmiéjunlú wéñuʼ rí niʼni ga̱jma̱a̱ rí nandulúʼ rí ikhaa magaʼwíínʼ a̱jkiu̱u̱n kaʼyulúʼ.

12. Ndiéjunʼ rí ndayóoʼ maʼni gaʼduunʼ mbáa cristiano mu Dios masngájmuu rí nagáwiinʼ a̱jkiu̱u̱n kaʼyoo xá.

12 Ndiéjunʼ rí gáʼyooʼ maniñuʼ mbáa cristiano mu Dios magaʼwíínʼ a̱jkiu̱u̱n kaʼyoo xá. Gíʼmaa maʼni gaʼduunʼ rí naniguʼ á mu dí rígi̱ maʼga̱ kayáa makudaminaʼ aʼkhá (Mat. 18:8, 9). Mbá xkri̱da, á mu bi̱ nambáxulúʼ gajmiúlú xumbayúlú muʼni rí májánʼ, lá xóó mambaxúlúʼ gajmiúlú xáʼ. Á mu naʼniulú gakhi̱i̱ muniʼñáʼ raʼwan iya najnga̱a̱, lá nuʼni gaʼduunʼ náa rí maʼga̱ kaguáanʼ muʼwan itháan ráʼ. Á mu nuʼni tsiakii mu muxprígumíjná rí nagua̱ʼa̱ muʼbúlú gajmiúlú mbáa, lá nuʼni gaʼduunʼ xúgíʼ película, ináa ndrígóo Internet o i̱ʼwáʼ rí nuʼni rí maʼni mundxaʼwamíjna̱ rí mitsaga ráʼ. Garmáʼáan a̱jkiu̱lú rí xúgíʼ tsiakii rí gúʼni mu muguajún jmbu náa Jeobá xánindxu̱u̱ ndíí. Nda̱a̱ imbo̱ʼ rí maʼni gawúnlú wéñuʼ ki xóo rí makumulúʼ rí Dios niniñulú. Mú nda̱a̱ imbo̱ʼ rí maʼni makuwáanʼ itháan gagi rí makumulúʼ náa “ngajua rí jmbu dí rígá asndu kámuu mbiʼi” (Is. 54:7, 8).

“IKHÍ MA̱NDOO MUMBAYÚMÍJNÁ”

13. Náa numuu rí bi̱ nixíyáa ndxájuu ma̱ndoo maku̱mu̱u̱ rí xtáa májánʼ ga̱jma̱a̱ tsímáá náa xuajin náa numbayúmíjná xá.

13 Índo̱ bi̱ nixíyáa ndxájuu xtáa má náa xuajin rúʼko̱ náa numbayúmíjná, nikríyaaʼ má. Jeobá niʼthí ga̱jma̱a̱ numuu xuajen rígi̱: “Ikhí ma̱ndoo mumbayúmi̱jna̱” (Jos. 20:2, 3). Ikhaa tánda̱ʼa̱ rí miʼtháán mbu̱júu̱ rí káʼnii gágíʼnuu xa̱bu̱ bi̱ nixíyáa ndxájuu. Na̱nguá eniñaaʼ mato̱ʼo̱o̱ bi̱ maʼni numa̱a̱ eʼdi náa xuajen ga̱jma̱a̱ rí maxíyáa. Á mu bi̱ nixíyáa ndxájuu xtáa náa xuajen, Dios eñawu̱u̱n ga̱jma̱a̱ ní ragíʼmaa mamiñúu. Na̱nguá xtáa náa mbá guʼwá e̱jua̱nʼ, numuu rí nandoo nañajunʼ, nandoo nambáñun eʼwíínʼ xa̱bu̱ ga̱jma̱a̱ maʼni tsímáá ñajunʼ Jeobá. Ma̱ndoo maxtáa májánʼ ga̱jma̱a̱ tsímáá.

Ga̱ku̱ma̱ʼ xtayáá Jeobá rí ikhaa naʼni mba̱a̱ a̱jkiu̱u̱n kaʼyaʼ.(Atayáá kutriga̱ 14 asndu 16).

14. Ndiéjunʼ rí ndayóoʼ mbaʼyoo mbáa cristiano bi̱ nitanga̱a̱ a̱jkiu̱u̱n bi̱ nikudaminaʼ mbá aʼkhá rí mitsáʼkhúun rá.

14 Kuwa xa̱bi̱i̱ Dios bi̱ nitanga̱a̱ a̱jkiu̱ún ga̱jma̱a̱ numuu mbá aʼkhá mitsáʼkhúun mú xóó nagawúnʼ ga̱jma̱a̱ numuu rí nikiéʼkhun. Tikhun nakumu̱ún rí Jeobá ndaʼyoo mbá rí mitsaga náa ikhiin. Á mu xúʼko̱ ku̱ma̱ʼ ikháánʼ, garmáʼáan a̱jkia̱nʼ rí Jeobá nigáwiinʼ a̱jkiu̱u̱n kaʼyaʼ ga̱jma̱a̱ niʼni mba̱a̱ a̱jkiu̱u̱n kaʼyaʼ. Ikha jngó ragíʼmaa mamiñáʼ. Daniel, bi̱ niʼthá náa kutriga̱ 9, ndiʼyoo dí rígi̱ gajkhun nindxu̱u̱. Nda̱wa̱á rí bi̱ kuya̱ edxu̱u̱ nixpriguíí ga̱jma̱a̱ nimbayíí mu magiʼdoo mbá conciencia mikaʼwu, nikumu̱u̱ rí asndu xúʼko̱ nindoo nixtáa májánʼ. Ikhaa niʼthí: “Nánguá ku̱mu̱ʼ rí gúʼdoo aʼkhúnʼ. Índo̱ aʼkhá ni̱jkha̱, ni̱jkha̱ má kámuu. Xó má Jeobá eʼthí, ikhaa nagu rí kuʼdalu ga̱jma̱a̱ nagrui̱ga̱ mitsínguánʼ wéñuʼ náa ikháanʼ. Nánguá  mbuʼyáá itháan”. Nákha ginii niʼthá rí índo̱ bi̱ nixíyáa ndxájuu xtáa náa xuajin náa numbayúmi̱jna̱, xáʼyóoʼ mamiñúu kaʼyoo bi̱ maʼni numa̱a̱ eʼdi. Xúʼko̱ má índo̱ Jeobá niʼni mba̱a̱ a̱jkiu̱u̱n ga̱jma̱a̱ numuu aʼkhá ndrígúlú, ragíʼmaa mamiñúlú rí mata̱nga̱a̱ maʼthúlú mbu̱júu̱ rí káʼnii niʼni (atraxnuu Salmo 103:8-12). *

15, 16. Xú káʼnii embáyulú ikháanʼ índo̱ nduʼyáá rí Jesús nixnáximinaʼ ga̱jma̱a̱ numulúʼ ga̱jma̱a̱ rí nindxu̱u̱ bi̱ Kayá edxu̱u̱ náa Ndxajkun rá.

15 Mú kuaʼdáá itháan numuu rí ikháanʼ makumulúʼ kuʼyáá Jeobá rí ikhaa magaʼwíínʼ a̱jkiu̱u̱n kaʼyulú. Xó má ndiʼyáá nákha ginii náa artículo rígi̱, Pablo niʼthí rí ikhaa nikáguabaaʼ wéñuʼ ga̱jma̱a̱ nixtáa gíná wéñuʼ numuu rí tsíyoo maʼnimbo̱o̱ kaʼyoo Jeobá xó má gíʼmaa. Mú maski ajndu niʼniminaʼ wéñuʼ ga̱jma̱a̱ numuu aʼkhá ga̱jma̱a̱ xóo nixtáa nákha ginii, niʼthí: “¡Núma̱aʼ Dios ga̱jma̱a̱ numuu Jesucristo, Señor ndrígúlú!” (Rom. 7:25). Numuu rí nitanga̱a̱ a̱jkiu̱u̱n, ndiʼyoo májánʼ rí Jeobá niʼni mba̱a̱ a̱jkiu̱u̱n kaʼyoo ga̱jma̱a̱ numuu Jesús. Cristo nixnáximinaʼ ga̱jma̱a̱ numulúʼ, ga̱jma̱a̱ xúʼko̱ naʼni rí marigá kaʼwu conciencia ndrígúlú ga̱jma̱a̱ naʼni makuwáanʼ tsímáá (Heb. 9:13, 14). Ga̱jma̱a̱ numuu rí nindxu̱u̱ bi̱ Kayá edxu̱u̱ náa Ndxajkun, “ma̱ndoo maʼni káwíin mbájkhu bi̱ naguáʼnu mijngii náa Dios ga̱jma̱a̱ numuu ikhaa, numuu rí ikhaa xtáa má xúʼko̱ mu maʼthí ga̱jma̱a̱ numún” (Heb. 7:24, 25). Nákha wajyúúʼ, ñajunʼ rí naʼni mbáa bi̱ kayá edxu̱u̱ náa ndxajkun naʼni mbuyáá israelitas rí Jeobá maʼni mba̱a̱ a̱jkiu̱u̱n ga̱jma̱a̱ numuu aʼkhún. Rí mbiʼi xúgi̱, ñajunʼ rí naʼni Jesús xóo bi̱ Kayá edxu̱u̱ náa Ndxajkun naxnúlú tikhuu rí naʼni mbuʼyáá májánʼ rí magáwíinʼ a̱jkiu̱u̱n kaʼyulú ga̱jma̱a̱ numuu “rí májánʼ rí na̱nguá kaʼyulúʼ mundrígú mbiʼi rí gáʼyulúʼ” (Heb. 4:15, 16).

16 Á mu, nandaʼ matambáyuminaʼ náa Jeobá, araʼdáá fe náa Jesús. Xátatsaʼwa̱a̱ edxa̱ʼ rí nijuiʼtsiwáanʼ nindxu̱u̱ mu maʼga̱ náa xúgínʼ xa̱bu̱. Araʼdáá fe náa rí nijuiʼtsiwáanʼ mambáyaʼ mangáán (Gál. 2:20, 21). Araʼdáá fe rí nijuiʼtsiwáanʼ nayambáá mu Dios maʼni mba̱a̱ a̱jkiu̱u̱n ga̱jma̱a̱ numuu aʼkhá rí ikháánʼ nitaxúdaminaʼ. Ga̱jma̱a̱ araʼdáá fe rí nijuiʼtsiwáanʼ maʼni rí ikháánʼ maraxtaa kámuu. Tsigijñaʼ rí nixnáxi̱ Jesús nindxu̱u̱ mbá regalo rí Jeobá nixnáʼ ikháánʼ.

17. Náa numuu rí nandaʼ ikháánʼ matambáyuminaʼ náa Jeobá rá.

17 Xuajin náa nimbayúmi̱jna̱ nasngájma rí Jeobá nagáwiinʼ a̱jkiu̱u̱n kaʼyulú. Ga̱jma̱a̱ numuu xuajin rúʼko̱ nisngájma rí vida nindxu̱u̱ mitsáʼkháan wéñuʼ. Mú ma̱ngaa nasngájma májánʼ xú káʼnii embayúlú bi̱ kuya̱ edxu̱u̱, ndiéjunʼ eyoo gáʼthúu̱n rí gajkhun mata̱nga̱a̱ a̱jkiu̱lúʼ ga̱jma̱a̱ xú káʼnii eʼyáá rí ikhaa naʼni mba̱a̱ a̱jkiu̱u̱n kaʼyulú xá. Lá numbayúmi̱jna̱ náa Jeobá ráʼ. Ikhaa nindxu̱u̱ náa bi̱ ma̱ndoo mumbayúmi̱jna̱ itháan májánʼ (Sal. 91:1, 2). Náa imbo̱o̱ artículo, mbuʼyáá xú káʼnii náa xuajin náa nimbayúmíjná mambáyulúʼ mbuʼyaridáá Jeobá, xkri̱da májánʼ bi̱ naʼni rí jmbu ga̱jma̱a̱ bi̱ nagáwiinʼ a̱jkiu̱u̱n.

^ párr. 2 Salmo 34:22: “Jeobá xtáa raʼni káwíin xa̱bi̱i̱; ga̱jma̱a̱ nimbáa bi̱ nambáyuminaʼ náa ikhaa majuiʼthá rí gíʼdoo aʼkhúun”.

^ párr. 6 Números 35:24, 25: “Ikhú asamblea maʼnimbánuu numuu bi̱ nixnúu ndxájuu ga̱jma̱a̱ bi̱ maʼni numa̱a̱ eʼdi, xó má nirígá. Ga̱jma̱a̱ asamblea mbaʼyóoʼ maʼnikríyaaʼ bi̱ nixíyáa ndxájuu náa xa̱bu̱ bi̱ maʼni numa̱a̱ eʼdi, ga̱jma̱a̱ asamblea mbaʼyóoʼ makuʼmaa nákhi náa xuajin náa nigáyúu mu mambáyuminaʼ, ga̱jma̱a̱ ikhaa gíʼmaa maxtáa ikhí asndu índo̱ gakháñuu bi̱ kayá edxu̱u̱ náa ndxajkun bi̱ nixtiyáaʼ ga̱jma̱a̱ aceite rí mikaʼwu”.

^ párr. 10 Josué 20:4: “Ga̱jma̱a̱ ikhaa gíʼmaa magayúu náa mbá xuajen rígi̱ ga̱jma̱a̱ mawiji̱ náa riejuun xuajen ga̱jma̱a̱ maʼthí mu mudxuun bi̱ kuya̱ edxu̱u̱ náa xuajen; ga̱jma̱a̱ ikhiin gíʼmaa mundriguíi náa xuajen ga̱jma̱a̱ muxnáá náa maxtáa ga̱jma̱a̱ ikhaa maxtáa gajmíi̱n ikhiin”.

^ párr. 10 Mbaʼa i̱yi̱i̱ʼ ndrígu̱ún judíos naʼthí rí bi̱ kuwa náa goʼwóo bi̱ nixíyáa ndxájuu nagún gakuwa gajmiún ikhaa náa xuajin náa numbayúmíjná.

^ párr. 14 Salmo 103:8-12: “Jeobá naʼni mba̱a̱ a̱jkiu̱u̱n ga̱jma̱a̱ májánʼ wéñuʼ a̱jkiu̱u̱n, tsíkiʼnáa nacha̱ ga̱jma̱a̱ naʼni wéñuʼ dí májánʼ. Ikhaa xaʼthuluʼ nángi eʼni rí nakiéʼkulu, asndu má xákiʼnáa kámuu mbiʼi. Ikhaa tséʼni gínáanʼ ga̱jma̱a̱ numuu aʼkhá ndrígúlú; ga̱jma̱a̱ tséʼkha̱ kayóo dí ra̱májánʼ náa ikháanʼ índo̱ nuʼni dí raʼkhí. Xó má mekhu itháan mitsidaanʼ ki xóo ku̱ba̱ʼ, rí májánʼ wéñuʼ a̱jkiu̱u̱n itháan mba̱a̱ náa bi̱ namíñun kuyáá. Xó má mitsínguánʼ egájnuu a̱jkha̱ʼ asndu náa narmáʼáan, xúʼko̱ má mitsínguánʼ eniñuʼ aʼkhá ndrígúlú”.