Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Mayo tsiguʼ 2017

“Lá nandaʼ xta̱yo̱ʼ itháan ki xóo rígi̱ ráʼ.”

“Lá nandaʼ xta̱yo̱ʼ itháan ki xóo rígi̱ ráʼ.”

“Simón a̱ʼdióo Juan, lá nandaʼ xta̱yo̱ʼ itháan ki xóo rígi̱ ráʼ.” (JUAN 21:15).

AJMÚÚ 128 GA̱JMA̱A̱ 45

1, 2. Nda̱wa̱á rí nigíʼ maguwíin e̱gi̱ʼ kañiʼ mbruʼun, ndiéjunʼ nijmañuu Pedro rá.

MBÁ juiin xa̱bi̱i̱ Jesús nikuwa ruñíinʼ e̱gi̱ʼ kañiʼ mbruʼun náa lamáa ndrígóo Galilea, mú táʼngu̱u̱n garugua̱a̱ nimbáa e̱gi̱ʼ. Índo̱ nijtsi, mbáa xa̱bu̱ xtáa raʼñún asndu rawunʼ lamáa. Ninindxu̱u̱ Jesús bi̱ nigabi̱i̱. “Jesús niʼtun: ‹Gudamaʼanla ama naʼ nijñu mujun barco, iki ri muratunla iguiʼ›. Aʼkue nidamaʼen ama iki, asjndo nangua iʼngun muxmatriyaʼ ama iki, numu ri mapumbaʼin iguiʼ nitin” (Juan 21:1-6).

2 Jesús nixnúún e̱gi̱ʼ ga̱jma̱a̱ pan xa̱bi̱i̱ mu muphiʼtsu. Nda̱wa̱á ndiʼyoo Simón Pedro ga̱jma̱a̱ niraxu̱u̱: “Simón a̱ʼdióo Juan, lá nandaʼ xta̱yo̱ʼ itháan ki xóo rígi̱ ráʼ.” Jesús ndaʼyoo rí Pedro naniguʼ maguwíin e̱gi̱ʼ. Nakujmaa rí Jesús xtáa raraxu̱u̱ Pedro á mu nandoo kaʼyoo itháan ikhaa ga̱jma̱a̱ rí naʼsngáa ki xóo rí maguwíin e̱gi̱ʼ. Pedro niriʼñuu Jesús: “Tátá, ikháánʼ natayáá rí nandoʼ ka̱ya̱ʼ” (Juan 21:15).  Pedro nijmañuu mbá rí gíʼdoo numuu: Rí gíʼmaa maʼndoo kaʼyoo Cristo ki xóo rí i̱ʼwáʼ. Asndu mbiʼi rúʼko̱, Pedro nisngájma rí nandoo kaʼyoo Cristo índo̱ niʼtáraʼa má xúʼko̱. Xúʼko̱ ni̱jkha̱nú niyambáá wéñuʼ náa congregación.

3. Xú káʼnii xa̱bu̱ gíʼmaa manindxu̱lúʼ ikháanʼ ráʼ.

3 Ndiéjunʼ eʼsngúlúʼ rí Jesús niʼthúu̱n Pedro rá. Rí gíʼmaa muñeumíjna̱ ga̱jma̱a̱ rí xúniʼñáʼ raʼndulú kuʼyáá Cristo. Jesús ndiʼyoo rí numbaaʼ rígi̱ maʼni néʼngulú ga̱jma̱a̱ rí maguaʼdáá wéñuʼ gamiéjunʼ. Náa historia ndrígóo xa̱bu̱ bi̱ naʼdu, Jesús niʼthí rí tikhun xa̱bu̱ mudrigú ‹ajngáa ndrígóo reino› ga̱jma̱a̱ gagi. Mú ma̱ngaa niʼthí rí ‹tsiakii ndrígóo mbújkha̱a̱ maʼni nduwiinʼ› ga̱jma̱a̱ xa̱bu̱ buʼko̱ ni xákuwa gagi (Mat. 13:19-22; Mar. 4:19). Á mu tsíñeumíjna̱, gamiéjunʼ rí kuaʼdáá ma̱ndoo maʼni gachúu rí nambáxulúʼ gajmiúlú Jeobá. Ikha jngó, Jesús niʼthúún xa̱bi̱i̱: “Guñahuamijna-ma ikanʼla, maxundxaʼhuamijnala ri indo mapeʼtso-güeñaʼla, jame muhuanla iya majnganʼla, ni maxuxnamijnala gaʼko gajma numu ri riga naʼ tsudu numba rigueʼ” (Luc. 21:34).

4. Ndiéjunʼ gambáyulú mbuʼyáá á mu nandulúʼ kuʼyáá itháan Cristo rá. (Atayáá timbá xtiʼkhu.)

4 Xó má Pedro, ikháanʼ mangáanʼ ma̱ndoo musngájma rí nandulúʼ kuʼyáá Cristo índo̱ nuʼgíʼ ginii rí muʼtáraʼa. Xú káʼnii gúʼyáá á mu nuʼni má xúʼko̱ rá. Ma̱ndoo muraximíjna̱: “Ndiéjunʼ rí gíʼdoo itháan numuu náa ikhúún rá. Ndiéjunʼ eʼni maxtáá gagi rá. Lá rí maʼni ñajunʼ Jeobá o i̱ʼwáʼ ráʼ.” Mu muriʼña̱a̱ graxe̱ rígi̱, guʼyáá ajtsú enii rí xú káʼnii ma̱ndoo mambáa rí nandulúʼ kuʼyáá Cristo. Nindxu̱u̱ ñajunʼ, gitsíin ga̱jma̱a̱ mbújkha̱a̱.

GUʼGÍʼ ÑAJUNʼ NÁA KAʼYOO

5. Ndiéjunʼ ñajunʼ guaʼdáá bi̱ kuya̱ edxu̱u̱ náa mbá guʼwá rá.

5 Pedro taguwíin e̱gi̱ʼ i̱ndó numuu rí naniguʼ. Naʼni mu mañewu̱u̱n bi̱ kuwa náa goʼwóo. Rí mbiʼi xúgi̱ bi̱ kuya̱ edxu̱u̱ náa mbá guʼwá guáʼdáá ñajunʼ rí Jeobá nixnúún muni ikhiin (1 Tim 5:8). Mu munimbánii ñajunʼ rígi̱, ndayóoʼ muñajunʼ gakhi̱i̱. Mú náa iwáá mbiʼi rígi̱, ñajunʼ ma̱ndoo maʼni néʼngulú.

6. Náa numuu rí ñajunʼ ma̱ndoo maʼni rí maraxtaa maxmiéjuanʼ rá.

6 Rí mbiʼi xúgi̱, kuwa itháan xa̱bu̱ bi̱ nduʼyáaʼ ñajunʼ, mu ñajunʼ nda̱a̱. Ikha jngó, nugiʼdu̱u̱n mu muxkamaa mbá ñajunʼ. Mbaʼin xa̱bu̱ nduyáá rí ndayóoʼ muñajunʼ itháan hora, mú tsédaaʼ mba̱a̱ mbújkha̱a̱. Rí mbiʼi xúgi̱ empresas nuni itháan ñajunʼ gajmiún nguáthi̱i̱n xa̱bu̱. Rígi̱ naʼni rí bi̱ nuñajunʼ maʼni néʼngu̱u̱n ga̱jma̱a̱ asndu naʼniún nandii. Mbaʼin namiñun mandáti̱gu̱u̱n ñajunʼ rí guáʼdáá á mu tseni xúgíʼ rí naʼthúu̱n jefe ndrígu̱ún.

Bi̱ ni̱ndxu̱lú cristianos naguajún itháan jmbu náa Jeobá ki xóo náa eʼwíínʼ

7, 8. a) Tsáa inuu eguajún jmbu rá. b) Ndiéjunʼ nijmañuu mbá ndxájulú Tailandia ga̱jma̱a̱ numuu ñajunʼ rá.

7 Bi̱ ni̱ndxu̱lú cristianos naguajún  itháan jmbu náa Jeobá ki xóo náa jefe o náa eʼwíínʼ xa̱bu̱ (Luc. 10:27). Nuñajunʼ mu makhánulúʼ rí ndayúlú ga̱jma̱a̱ mu ma̱ndoo muʼni ñajunʼ Jeobá. Mú á mu tsíñeumíjna̱lu, ñajunʼ ma̱ndoo maʼni gachúu rí nambáxulúʼ gajmiúlú Dios. Guʼyáá rí naʼsngúlú rí nigíʼnuu mbáa ndxájulú náa Tailandia. Ikhaa naʼthí: “Nani májáánʼ computadoras, mbá ñajunʼ nagui̱i̱, mú naríyaʼ kaʼyúʼ wéñuʼ horas. Ikha jngó tagúʼdoo mbiʼi mu mani ñajunʼ Dios. Nda̱wa̱á ndi̱yo̱o̱ rí ndayóoʼ mariʼkhuu ñajunʼ mu maʼgíiʼ gíníi Reino”. Ndiéjunʼ niʼni ndxájulú bugi̱ rá.

8 Ikhaa naʼthí: “Mbá tsiguʼ rí niriyaʼ awan rí mani, ikhú nigíʼdu̱u̱ nigujua nieve náa calle. Nákha ginii, niʼniuʼ mingíjyúuʼ makhánúʼ mbújkha̱a̱, ga̱jma̱a̱ nixtáá gíná. Índo̱ nda̱ñu̱u̱n bi̱ niñajunʼ gajmíi̱nʼ nákha ginii, nunduʼwajmún ga̱jma̱a̱ niraxuʼ náa numuu niku̱mu̱ʼ rí magu̱jua̱ nieve nindxu̱u̱ itháan májánʼ ki xóo rí mani computadoras náa mbá guʼwá rí gíʼdoo aire acondicionado. Nindo̱ʼo̱o̱ Jeobá rí mambáyuʼ maʼngo̱ʼ ga̱jma̱a̱ mu magúʼdoo itháan mbiʼi mu mani ñajunʼ Dios. Mú tájyúuʼ nixtiʼkhuu xúgíʼ. Ndi̱yo̱o̱ májánʼ rí itháan nanigu̱nʼ mutsi xa̱bu̱ ga̱jma̱a̱ nieve ndrígóʼ ninindxu̱u̱ itháan májánʼ. Nda̱wa̱á, nagujua̱ xúgíʼ nieve rí nani mámbá mbiʼi. Rí xúgi̱ nadaʼ itháan ki xóo nákha nani májáánʼ computadoras. Xtáa itháan gagi numuu rí nánguá exmiéjunʼ xóo nákha ginii. Mú, rí itháan gíʼdoo numuu, rí naku̱mu̱ʼ rí xtáá itháan mijngii ga̱jmu̱ʼ Jeobá” (atraxnuu Mateo 5:3, 6).

Lá naniguʼ itháan ñajunʼ rí gúʼdoo ki xóo mani ñajunʼ Jeobá ráʼ.

9. Xú káʼnii gándoo gúʼyáá awáán ñajunʼ rá.

9 Jeobá naniguuʼ rí muñajunʼ, ga̱jma̱a̱ gíʼdoo numuu muʼni (Prov. 12:14). Mú xúniʼñáʼ rí ñajunʼ magiʼdoo itháan numuu ki xóo rí muʼni ñajunʼ Jeobá. Rí maguaʼdáá rí ndayúlú, Jesús niʼthí: “Guini-jayi ri naʼtañajun Dios guʼyala, gajma ri jmbu ri riga naʼ Ika, ikajngo maʼka ika mba xugui ruʼkue majanaʼla” (Mat. 6:33). Rí xúgi̱, xú káʼnii gándoo gúʼyáá á mu nduʼyáá awáán ñajunʼ rá. Ma̱ndoo muraximíjna̱: “Lá naniguʼ wéñuʼ ñajunʼ ndrígóʼ ki xóo rí maʼni ñajunʼ Jeobá ráʼ.” Rí guriʼña̱a̱ mambáyulúʼ mbuʼyáá kaʼwu tsáa phú eyulú kuʼyáá.

10. Ndiéjunʼ rí gíʼdoo numuu niʼsngáa Jesús rá.

10 Jesús niʼsngúlúʼ ndiéjunʼ rí gíʼmaa magiʼdoo itháan numuu náa vida ndrígúlú. Mbá mbiʼi, ikhaa ni̱jkha̱ náa goʼwóo María ga̱jma̱a̱ Marta, bi̱ kanikhiin. Mbá nacha̱ Marta niʼni mújúnʼ ganitsu mu mikhu Jesús, mú María nigi̱ʼi̱ mu maʼdxun. Ikhú, Marta nikiʼnáa numuu rí María tsembáyúu. Mú Jesús niʼthúu̱n Marta: “María niraʼwíí rí itháan májánʼ ga̱jma̱a̱ nimbáa xariya kaʼyúʼ” (Luc. 10:38-42). Ikhú Jesús niʼsngáa mbá rí gíʼdoo numuu. Ndiéjunʼ nindxu̱u̱ rá. Mú xáʼni jngawáanʼ dí rígá náa numbaaʼ rígi̱ ga̱jma̱a̱ musngajmáá rí nandulúʼ  kuʼyáá Cristo, gíʼmaa muraʼwíí “rí itháan májánʼ”. Rígi̱ nandoo gáʼthúu̱n rí mambáxulúʼ gajmiúlú Jeobá gíʼmaa magiʼdoo itháán numuu náa vida ndrígúlú.

XÚ KÁʼNII GURAʼWÍÍ RÍ MUʼNI GAGIMIJNÁ RÁ.

11. Ndiéjunʼ eʼthí náa Biblia ga̱jma̱a̱ numuu rí mbuʼyáaxulú ga̱jma̱a̱ rí muʼni gagimijná rá.

11 Xúgiáanʼ kuaʼdáá wéñuʼ ñajunʼ. Ikha jngó nguáná ndayóoʼ mbuʼyáaxulú. Náa Biblia naʼthí: “Mú náa xa̱bu̱, nda̱a̱ imbo̱ʼ rí itháan májánʼ rí makuiʼtsu ga̱jma̱a̱ maga̱a̱n ma̱ngaa mbaʼyoo rí májánʼ ga̱jma̱a̱ numuu ñajunʼ ndrígóo” (Ecle. 2:24). Jesús ndiʼyoo rí xa̱bi̱i̱ ndiyóoʼ mbu̱ya̱a̱ xu̱únʼ. Mbá xkri̱da, nda̱wa̱á rí nitaraʼa wéñuʼ, Jesús niʼthún: “Agajnahuiyaʼla ndakuanʼla jani, aʼguala naʼ mbaguina mba jañi, guya tan xaʼla” (Mar. 6:31, 32).

12. Náa numuu rí gíʼmaa muñeumíjna̱ ga̱jma̱a̱ numuu gitsíin rá. Atagíʼ mbá xkri̱da.

12 Rí muʼni gagimijná nayambáá mu mbuʼyáaxulú. Mú gíʼmaa muñeumíjna̱ mu xágiʼdoo itháan numuu náa vida ndrígúlú. Nákha siglo timbá, mbaʼin nikumu̱ún rígi̱: “Guphiʼtsu ga̱jma̱a̱ guʼwa̱a̱n numuu rí gájtsii makhañúlúʼ” (1 Cor. 15:32). Rí mbiʼi xúgi̱, xúʼko̱ má ekumún xa̱bu̱. Mbá xkri̱da, mbáa dxámá Europa occidental nigíʼdu̱u̱ ni̱jkha̱ reunión. Mú naniguʼ wéñuʼ maʼtsíin ikha jngó niniñuʼ ra̱jkha̱. Nda̱wa̱á, ndiʼyoo dí rígi̱ niʼni magiʼdoo wéñuʼ xkujndu. Ikha jngó nigíʼdu̱u̱ raʼnigajmaa mbu̱júu̱ʼ Biblia. Ga̱jma̱a̱ nda̱wa̱á nigíʼdu̱u̱ niʼtáraʼa ajngáa ndrígóo Reino. Nda̱wa̱á rí nijngu̱u̱n iyaʼ, ikhaa naʼthí rí i̱ndó nagáwiinʼ a̱jkiu̱u̱n numuu rí nindáti̱go̱o̱ wéñuʼ mbiʼi. Niʼthí rí maʼni ñajunʼ Jeobá naʼni maxtáa itháan gagi ki xóo rí maʼni rí naxná numbaaʼ.

13. a) Atagíʼ mbá xkri̱da náa numuu dí ra̱májánʼ rí muríyaʼ wéñuʼ tiempo mu muʼni gagimijná rá. b) Ndiéjunʼ gambáyulú mu mbuʼyáá awáán rí muʼni gagimijná rá.

13 Gitsíin gíʼmaa maʼni rí mbuʼyáaxulú. Ikha jngó, nguáthá tiempo gándoo matani rá. Náa imbo̱ʼ xkri̱da mambáyulúʼ muriʼña̱a̱ graxe̱ rígi̱. Mbaʼánʼ rí ikháanʼ nanigulúʼ pan ga̱jma̱a̱ dulce. Mú nduʼyáá rí maʼniulú nandii á mu naʼphu̱ tsejtsí mbiʼi. Á mu nandulúʼ rí xáʼniulu nandii, gíʼmaa mu̱ʼphu̱ ganitsu rí mambáyulúʼ. Xúʼko̱ má á mu najmulú wéñuʼ tiempo náa rí muʼni gagimijná ní xambáxulú májánʼ gajmiúlú Jeobá. Ndiéjunʼ gambáyulú mbuʼyáá awáán rí muʼni gagimijná rá. Ma̱ndoo muʼnirámáʼ horas rí niʼni mbá xmáná náa ñajuunʼ Jeobá xóo náa reunión, muʼtáraʼa ga̱jma̱a̱ rí muʼnigajmaa Biblia. Nda̱wa̱á muʼnirámáʼ horas rí niʼni xmáná rúʼko̱ náa gitsíin, televisión, videojuegos o i̱ʼwáʼ. Índo̱ gúʼyáá horas, mbuʼyáá á mu mbaʼyóoʼ muriʼkhui̱i̱ (atraxnuu Efesios 5:15, 16). *

14. Ndiéjunʼ gambáyulú mu muraʼwíí májánʼ xóo muʼni gagimijná rá.

14 Jeobá naniñulú muraʼwíí xú káʼnii gúʼni gagimijná. Bi̱ kuya̱ edxu̱u̱ náa mbá guʼwá ma̱ndoo muraʼwíí xú káʼnii gúni gagimijná. Náa Biblia na̱ʼkha̱ ikha rí nasngájma rí nandxa̱ʼwáminaʼ  Jeobá. Ikha rígi̱ nambáyulúʼ muraʼwíí rí májánʼ. * Rí muʼni gagimijná nindxu̱u̱ mbá regalo ndrígóo Dios (Ecle. 3:12, 13). Gajkhun má rí xúgiáanʼ mixtiʼkhu xóo enigulúʼ muʼni gagimijná (Gál. 6:4, 5). Mú tséʼniuu má rí nanigulúʼ, gíʼmaa muñeumíjna̱. Jesús niʼthí: “Numu ri naʼ riga ri mapu-ihua guiʼdo numu kuaʼdala, indo-ma ika aguihuanʼ akianʼla-juya” (Mat. 6:21). Á mu nandulúʼ kuʼyáá Rey, Jesús, musngajmá rí Reino gíʼdoo itháan numuu náa ikháanʼ. Xú káʼnii gusngajmá rá. Ga̱jma̱a̱ xóo rí nundxa̱ʼwa̱míjna̱, nuʼthá ga̱jma̱a̱ rí nuʼni (Filip. 1:9, 10).

GUÑEUMÍJNA̱ JMA̱A̱ NUMUU RÍ XAGUAʼDÁÁ WÉÑUʼ

15, 16. a) Náa numuu rí maguaʼdáá nindxu̱u̱ mbá tsáʼkhá rá. b) Ndiéjunʼ niʼthí Jesús ga̱jma̱a̱ numuu rí maguaʼdáá wéñuʼ rá.

15 Mbaʼin xa̱bu̱ rí mbiʼi xúgi̱ nanigu̱nʼ maguaʼdáá rí itháan nuxi̱ʼ, teléfonos celulares, computadoras ga̱jma̱a̱ i̱ʼwáʼ. Nijngutígúun numuu rí nindúún maguaʼdáá wéñuʼ ma̱ngaa numuu rí ndiyáá rí gíʼdoo itháan numuu mbújkha̱a̱. Bi̱ ni̱ndxu̱lú cristianos gíʼmaa mundxaʼwamíjna̱ mu mbuʼyáá ndiéjunʼ gíʼdoo itháan numuu náa ikháanʼ. Guraximíjna̱: “Lá nandxaʼwamínáʼ má xúʼko̱ ga̱jma̱a̱ numuu carro rí itháan nuxi̱ʼ o náa moda ki xóo rí maʼnirataminaʼ rí kaʼyoo reunión ráʼ. Lá gúʼdoo wéñuʼ ñajunʼ  rí asndu nánguá gúʼdoo tiempo matajkáan o magúxnuu Biblia ráʼ.” Á mu tsíñeumíjna̱lu, maʼndulú maguaʼdáá itháan ki xóo rí maʼndulú kuʼyáá Cristo. Gíʼmaa mundxaʼwamíjna̱ rí niʼthí Jesús: “Maxaniguaʼ-güeñaʼla ri maguaʼda” wéñuʼ dí rígá” (Luc. 12:15). Náa numuu niʼthí rígi̱ Jesús rá.

Xándoo muxná rí itháan májánʼ Jeobá á mu nduʼyáaʼ maguaʼdáá itháan

16 Jesús niʼthí: “Nimba xabo maxaxo majma naʼ inu ajmi xabo ri mbo miʼtsu, numu ri mba maxaxo gaʼyo, imba tsi maʼne akuinjaʼyo, o maʼnemajanmineʼ inu mba, imba tsi maxaxo gaʼyo. Maxaxo gajmaʼla naʼ inu Dios xi maguihuanʼ-güeño akianʼla-juya riqueza” (Mat. 6:24). Xándoo muxnáá rí itháan májánʼ Jeobá á mu nduʼyáaʼ maguaʼdáá itháan. Numuu rí ni̱ndxu̱lú xa̱bu̱ aʼkhá, gíʼmaa muʼni gaʼduunʼ rí “eguaʼa xuyulúʼ muʼni”, mbá nindxu̱u̱ rí maʼndulú maguaʼdáá (Efes. 2:3).

17. a) Náa numuu rí naʼniún mingíjyúuʼ tikhun xa̱bu̱ mbuyáá awáán rí maʼndún maguaʼdáá itháan rá. b) Ndiéjunʼ gambáyulú muʼni gaʼduunʼ rí maʼndulú muguaʼdáá wéñuʼ rá.

17 Mbaʼin xa̱bu̱ nandún muni rí nandoo a̱jkiu̱ún rí asndu tséyáá awáán rí maguaʼdáá (atraxnuu 1 Corintios 2:14). * Numuu rí tséndxa̱ʼwa̱a̱ májánʼ edxu̱ún, tséʼngu̱u̱n gúyáá rí nindxu̱u̱ májánʼ ga̱jma̱a̱ dí ra̱májánʼ (Heb. 5:11-14). Rígi̱ maʼni rí maʼndún maguaʼdáá itháan. Ga̱jma̱a̱ índo̱ guáʼdáá itháan, itháan nandún maguaʼdáá (Ecle. 5:10). Mú ma̱ndoo muʼni gaʼduunʼ ku̱ma̱ rígi̱. Xú káʼnii rá. Rí muraxnuu má xúʼko̱ Biblia. Rígi̱ maxnúlúʼ tsiakii mu muʼni gaʼduunʼ rí maʼndulú maguaʼdáá itháan (1 Ped. 2:2). Jesús niriyaʼ mbiʼi mu mandxaʼwáminaʼ náa ku̱ma̱ ndrígóo Jeobá, ikha jngó niʼngo̱o̱ niraʼnuu tsáʼkhá ndrígóo Gixa̱a̱ (Mat. 4:8-10). Á mu tsíyulú majngutíguáanʼ náa rí mbuʼyáaʼ maguaʼdáá, gíʼmaa muʼnimbánii xtágabu ndrígóo Jeobá. Xúʼko̱ gusngajmáá Jesús rí nandulúʼ kuʼyáá itháan ki xóo rí maguaʼdáá itháan mbújkha̱a̱.

Ndiéjunʼ rí gíʼdoo itháan numuu náa vida ndrígúlú rá. (Atayáá kutriga̱ 18.)

18. Ndiéjunʼ gíʼmaa magiʼdoo itháan numuu náa ikháanʼ rá.

18 Índo̱ Jesús niraxu̱u̱ Pedro: “Lá nandaʼ xta̱yo̱ʼ itháan ki xóo rígi̱ ráʼ.” Ikhaa xtáa raʼsngóo rí maʼni ñajunʼ Jeobá gíʼmaa magiʼdoo itháan numuu náa vida ndrígóo. Ikha jngó, mbiʼyuu Pedro nandoo gáʼthúu̱n “Xíʼtóo itsí”, numuu rí nisngájma rí nindxu̱u̱ jmbii xóo mbá itsí náa ñajunʼ ndrígóo Jeobá (Hech. 4:5-20). Ikháanʼ mangáanʼ gíʼmaa mbuʼyáá á mú rí nandulúʼ kuʼyáá Cristo nindxu̱u̱ jmbu xóo mbá itsí. Guʼyáá rí ñajunʼ, gitsíin ga̱jma̱a̱ mbújkha̱a̱ marigá náa kaʼyoo. Á mu nuʼni, muʼtháán Jesús xóo niʼthí Pedro: “Tátá, ikháánʼ natayáá rí nandoʼ ka̱ya̱ʼ”.

^ párr. 13 Efesios 5:15, 16: “Tsumáá gúya̱a̱ xú káʼnii majngruigala xáʼni xóo xa̱bu̱ bi̱ tséyáá, gíʼmaa muni xóo xa̱bu̱ bi̱ nduyáá wéñuʼ, gutsila xúgíʼ mbiʼi dí naguanúu, numuu dí mingíjyúuʼ wéñuʼ mbiʼi rí kuwáanʼlu”.

^ párr. 14 Atayáá artículo “¿Son sanas nuestras diversiones?”, náa La Atalaya 15 ñajunʼ gu̱nʼ octubre tsiguʼ 2011, ináa 9 asndu 12, kutriga̱ 6 asndu 15.

^ párr. 17 1 Corintios 2:14: “Mú xa̱bu̱ numbaaʼ na̱nguá gruigú rí naxná xi̱ʼ ndrígóo Dios, numuu rí tséjmaa eʼyoo ikhaa; ga̱jma̱a̱ xáʼga̱nú maninuʼ, numuu dí raguáʼdáá xi̱ʼ ndrígóo Dios”.