Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Mayo tsiguʼ 2017

Kúwáanʼxu tsímáá numuu rí nánguá guáʼdááxu wéñuʼ

Kúwáanʼxu tsímáá numuu rí nánguá guáʼdááxu wéñuʼ

DANIEL GA̱JMA̱A̱ MÍRIAM nidamijná nákha septiembre tsiguʼ 2000 ga̱jma̱a̱ niguáʼdáá mbújkha̱a̱ mu makuwá májánʼ náa Barcelona (España). Daniel naʼthí: “Rí nudaʼxu naʼngo̱o̱ mu muguáʼxu náa restaurantes rí itháan májánʼ, muguáʼxu i̱mba̱ níʼkhá ga̱jma̱a̱ rí muʼgíʼxu xtíin rí májánʼ. Ma̱ngaa, tséniʼñáaʼ rutaráʼaxu”. Mú rígá rí niriʼkhuu náa vida ndrígu̱ún.

Náa mbá asamblea dí nirígá tsiguʼ 2006, Daniel nidxawun mbá discurso rí ni̱jkha̱nú asndu náa a̱jkiu̱u̱n rí asndu niʼniuu maraximínaʼ: “Lá nuʼni xúgíʼ rí naʼngulú mu mu̱ʼgua̱ kuʼdiin náa kamba̱a̱ rí maʼni makuwá kámuu mbiʼi bi̱ nagún náa makhañún ráʼ.” (Prov. 24:11.) Náa discurso naʼthí rí gíʼmaa muʼtáraʼa ajngóo Biblia numuu rí xúʼko̱ xa̱bu̱ makáwíin (Hech. 20:26, 27). Daniel narmáʼáan a̱jkiu̱u̱n: “Niku̱mu̱ʼ rí Jeobá niʼthúnʼ ikhúún”. Náa discurso niʼthí rí índo̱ nuʼnimi̱jna̱ muʼni ñajunʼ Jeobá nakuwáanʼ itháan gagi. Daniel ndiʼyoo dí rúʼko̱ nindxu̱u̱ gajkhun, numuu rí Míriam nindxu̱u̱ má precursora ga̱jma̱a̱ nadxuu a̱jkiu̱u̱n.

Discurso rígi̱ niʼniuu tsiánguá ikha jngó nigíʼdu̱u̱ niriʼkhu̱u̱ vida ndrígóo. Nigíʼdu̱u̱ niñajunʼ nguáthá horas, niʼni precursor ga̱jma̱a̱ nindxa̱ʼóo edxu̱u̱ rí gagi gakúwi̱i̱n Míriam ga̱jma̱a̱ ikhaa á mu nagún gúyambáá náa ndayóoʼ miʼtáraʼa.

GINII XKUJNDU, NDA̱WA̱Á AJNGÁA RÍ MAJAN

 Nákha gu̱nʼ mayo tsigu 2007, Daniel ga̱jma̱a̱ Míriam niniñaaʼ ñajunʼ ndrígu̱ún ma̱ngaa nigún gakuwa panamá, náa mbáa xuajen rí nininuʼ má. Nitaraʼa tikhun islas rí mbiʼyuu archipiélago Bocas del Toro, náa lamáa ndrígóo Caribe. Xúgínʼ bi̱ kuwa ikhí ni̱ndxu̱ún xa̱bu̱ guaymíes. Daniel ga̱jma̱a̱ Míriam ndiyáá rí maʼngo̱o̱ makuwá náa Panamá mbá migiñuʼ gu̱nʼ ga̱jma̱a̱ mbújkha̱a̱ rí niyexi̱i̱.

Nagún islas ga̱jma̱a̱ barco ma̱ngaa bicicleta. Xóó narmáʼáan a̱jkiu̱ún timbá miʼtsú rí nigún gájmaa bicicleta náa kúbá rí juímuu mbóʼ mbiʼi rí naʼni mijkha wéñuʼ mbá 30 kilómetros. Daniel niʼni néʼngo̱o̱ wéñuʼ asndu nigíiʼ makamíndúu. Mú a̱jma̱ guʼwíin xa̱bu̱ guaymíes bi̱ ikhiin niniʼnunʼ nimbañúún wéñuʼ itháan índo̱ Daniel ga̱jma̱a̱ Míriam nijmañún tikhu ajngáa guaymí. Tájyúuʼ má niguáʼdiin 23 xa̱bu̱ bi̱ nisngúún ga̱jma̱a̱ numuu Biblia.

Ndiéjunʼ nini índo̱ niguámbu̱u̱n mbújkha̱a̱ xá. Daniel naʼthí: “Nigajtaa iyoʼ iduxu índo̱ nindxa̱ʼwa̱míjna̱xu rí matangáanʼxu náa España”. Nikuwa gíná wéñuʼ índo̱ ndiyáá rí muniñunʼ bi̱ nusngúún”. Mbá gu̱nʼ nda̱wa̱á nindrigú mbá ajngáa májánʼ. Míriam naʼthí: “Nitha̱a̱nxu rí mani̱ndxu̱xuʼ precursores especiales. Nidxuxu wéñuʼ rí maguanáxu náa asignación ndrígúxu̱”.

RÍ IWÁÁ GAGI EʼNI A̱JKIU̱ÚN

Numuu rí nirígá tikhuu rí nixtiʼkhuu náa organización, Daniel ga̱jma̱a̱ Míriam niniñaaʼ ranindxu̱ún precursores especiales nákha tsiguʼ 2015. Ndiéjunʼ guni xá. Nikumu̱ún kuyáá ajngáa rí naʼthí Salmo 37:5: “Atanimbánii rí nataxúdaminaʼ náa Jeobá, ga̱ku̱ma̱ʼ xtayáá ikhaa ga̱jma̱a̱ ikhaa má gámbáyaʼ”. Nixkamaa mbá ñajunʼ rí naniñuʼ mani̱ndxu̱ún precursores regulares, ga̱jma̱a̱ xúgi̱ nuyambáá náa mbá congregación dí rígá náa xuajen Veraguas (Panamá).

Daniel naʼthí: “Nákha xóó tséjkuáʼxu España niku̱mu̱xu rí xáʼnguxu makuwaanʼ ga̱jma̱a̱ mbá lájuíin mbújkha̱a̱. Rí xúgi̱ nunixu, ga̱jma̱a̱ tsíyuxu nditháan rí gíʼdoo numuu”. Náa numuu kúwi̱i̱n gagi xá. Ikhiin nuthi: “Rí mumbáñunxu xa̱bu̱ muniʼniiʼ Jeobá naʼni itháan gagi a̱jkiu̱xuʼ”.