Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Mayo tsiguʼ 2017

Xú káʼnii gumbáñuun e̱jñún “bi̱ naguwáʼ i̱mba̱ níʼkhá” rá.

Xú káʼnii gumbáñuun e̱jñún “bi̱ naguwáʼ i̱mba̱ níʼkhá” rá.

“Nda̱a̱ imbo̱ʼ dí maʼni maʼdxuʼ wéñuʼ: Rí madxawun rí e̱ji̱nʼ jngruigu̱u̱n má xúʼko̱ náa dí gajkhun” (3 JUAN 4).

AJMÚÚ 88 GA̱JMA̱A̱ 41

1, 2. a) Xú káʼnii xkujndu guáʼdáá e̱jñún bi̱ naguwáʼ i̱mba̱ ni̱ʼkhá rá. b) Xú káʼnii graxe̱ gáxti̱ʼña̱a̱ náa artículo rígi̱ rá.

MBÁA xa̱bi̱i̱ Jeobá bi̱ mbiʼyuu Joshua niʼthí: “Anu̱ʼ ga̱jma̱a̱ ru̱dúʼ naguwáʼ i̱mba̱ níʼkhá, asndu má nákha chíʼgiúnʼ natha ajngún ikhiin náa goʼwóoʼ ga̱jma̱a̱ náa congregación”. Mú índo̱ Joshua nigíʼdu̱u̱ ni̱jkha̱a̱ escuela, niniguuʼ maʼthí ajngáa dí nuthi ikhí. Ikhaa naʼthí xóó: “Mba̱yu̱ʼ tsiguʼ nda̱wa̱á, nixtiʼkhuu mbá kayuʼ, tákroʼoʼ dí nuthi náa nagimbáanʼxu ga̱jma̱a̱ táni xóo má rí nuni anu̱ʼ ga̱jma̱a̱ ru̱dúʼ”. Mbaʼin naguaʼnii xó má nigíʼnuu Joshua.

2 Rí mbiʼi xúgi̱, itháan dí 240 millón xa̱bu̱ na̱nguá kúwi̱i̱n náa xuajen dí nigumiin. Á mu ikháánʼ ni̱ndxa̱ʼ anu̱ún e̱ji̱n bi̱ na̱ʼkha̱ i̱mba̱ níʼkhá, xú káʼnii gándoo gátambáñun e̱jña̱ʼ mu maʼndún kuyáá Jeobá ga̱jma̱a̱ majngruigu̱u̱n “má xúʼko̱ náa dí gajkhun” rá. (3 Juan 4.) Ga̱jma̱a̱ xú káʼnii gándoo guyambáá eʼwíínʼ a̱ngiu̱lú bi̱ kuwa náa congregación rá.

XA̱BU̱ BI̱ GUÁʼDIIN E̱JI̱N, GUXNA MBÁ XKRI̱DA MÁJÁN

3, 4. a) Xú káʼnii gándoo xa̱bu̱ bi̱ guáʼdiin e̱jñún muxnún mbá májánʼ xkri̱da rá. b) Ndiéjunʼ dí ragíʼmaa maguáʼthi̱i̱n náa e̱jñún xá.

3 Bi̱ guáʼdiin e̱ji̱n, á mu nandala dí e̱jña̱la mambaxúún májánʼ  gajmiún Jeobá ga̱jma̱a̱ makuwá kámuu mbiʼi, gíʼdoo wéñuʼ numuu muxnu̱u̱n májánʼ xkri̱da. Á mu e̱jña̱la nduyáá rí ‹nuʼgíʼ ginii reino›, majmañún rí Jeobá gáxnún dí gáʼñúnʼ mámbá mbiʼi (Mat. 6:33, 34). Atani dí magiʼdoo itháan numuu dí matani ñajunʼ Jeobá ki xóo dí mataʼyááʼ itháan mbújkha̱a̱. Xaguaʼdáá wéñuʼ ga̱jma̱a̱ gunimi̱jna̱ dí xagiʼmáanʼla. Gunimi̱jna̱ dí muguaʼdáá “ri mapu-ihua guiʼdo numu mikui”, xóo muʼthá, rí Jeobá ma̱ndoo kaʼyala, raʼkháa rí mbuʼyáaʼ itháan mbújkha̱a̱ o dí ‹mudrigú gamajkhu ndrígu̱ún xa̱bu̱› (Juan 12:43; atraxnuu Marcos 10:21, 22).

4 Xaguaʼdáá wéñuʼ ñajunʼ rí xándoo makuwáanʼ gajmiála e̱jña̱la. Guthu̱u̱n dí nadxala wéñuʼ ga̱jma̱a̱ numún ikhiin índo̱ nugíʼ nuni ginii ñajunʼ Jeobá ga̱jma̱a̱ tséyááʼ maguaʼdáá mbújkha̱a̱ mu majmúún ikhiin o muxnala ikháanʼ. Nditháan xundxa̱ʼwa̱míjna̱ dí e̱ji̱n gíʼmaa muñajunʼ mu muxnún mbújkha̱a̱ anu̱ún. Garmáʼáan a̱jkia̱la dí “e̱ji̱n ragíʼmaa muraxi̱i̱ mbújkha̱a̱ muxnún anu̱ún, rí anu̱ún mbuyáaʼ mbújkha̱a̱ muxnún e̱jñún” (2 Cor. 12:14).

XA̱BU̱ BI̱ GUÁʼDIIN E̱JI̱N, GAJMAÑALA MIXTIʼKHU AJNGÁA

5. Náa numuu dí xa̱bu̱ bi̱ guáʼdiin e̱ji̱n gíʼmaa mutún má xúʼko̱ ga̱jma̱a̱ numuu Jeobá rá.

5 Xó má niʼtáriyaʼ náa Biblia, xa̱bu̱ “bi̱ nuthi xúgíʼ ajngáa náa xuajin mba̱ʼu̱” kuwa ratu̱ʼu̱u̱n náa xuajñu Jeobá (Zac. 8:23). Bi̱ guáʼdiin e̱ji̱nʼ, á mu e̱jña̱la na̱nguá ekru̱ʼu̱u̱n májánʼ ajngáa dí ikháanʼ nutha̱la, maʼniala mingíjyúuʼ musngúún dí gajkhun. Ikhiin ni̱ndxu̱ún bi̱ itháan gíʼdoo numuu musngúúnla numuu Biblia, i̱ndó á mu ikhiin nuniʼniiʼ Jeobá ma̱ndoo makuwá kámuu mbiʼi (Juan 17:3). Ikha jngó ikháanʼla gíʼmaa muthu̱u̱n má xúʼko̱ dí naʼsngáa Jeobá (atraxnuu Deuteronomio 6:6, 7). *

E̱jña̱la ni̱ndxu̱ún bi̱ itháan gíʼdoo numuu musngúnla numuu Biblia

6. Ndiéjunʼ yambáá dí e̱ji̱n majmañún ajngún anu̱ún rá. (Atayáá timbá xtiʼkhu.)

6 Mbáa e̱jña̱la majmañún ajngáa dí nuthi náa kuwáanʼ índo̱ kúwi̱i̱n náa escuela o kuwa gajmiún eʼwíínʼ xa̱bu̱. Mú i̱ndó majmañún ajngáa dí nuthala á mu ikháanʼ naguʼwanʼla mutamíjná gajmiála ikhiin. Á mu najmañún, xáʼniún mingíjyúuʼ mutamijná ga̱jma̱á nindxa̱la ga̱jma̱a̱ mutala xóo ekumún. Mú rígá i̱ʼwáʼ dí nayambáá. Dí majmañaaʼ maratha mbaʼa ajngáa maʼni dí matatsaʼwa̱a̱ itháan edxa̱ʼ ga̱jma̱a̱ mambáyaʼ makruaʼaʼ xú káʼnii endxaʼwamíjna̱ eʼwíínʼ xa̱bu̱. Ma̱ngaa, mambáyaʼ marataráʼa itháan. “Dí maxtáá náa mbá congregación náa nuthi imbo̱ʼ ajngáa nindxu̱u̱ mitsaan wéñuʼ. Ga̱jma̱a̱ nanigu̱ʼ mayambáá náa ndayóoʼ itháan”, eʼthí Carolina, a̱ʼdióo mbáa bi̱ na̱ʼkha̱ i̱mba̱ níʼkhá.

7. Ndiéjunʼ gándoo muni xa̱bu̱ bi̱ guáʼdiin e̱ji̱n á mu ikhiin nuthi imbo̱ʼ ajngáa xá.

7 Mañu mañu, e̱jñún bi̱ naguwáʼ i̱mba̱ níʼkhá maʼga̱ rajmañún xóo eni, xóo kúwi̱i̱n ga̱jma̱a̱ xóo ethi xa̱bu̱ náa kuwa. Ikha jngó tikhun nánguá eñún guthi ga̱jma̱a̱ nánguá ejmiin guthi ajngáa dí nuthi anu̱ún. Á mu rí xúʼko̱, lá ma̱ndoo ikháanʼ majmañala mutha maski ajndu mbá chíʼgíʼ ajngáa dí nuthi xa̱bu̱ náa kuwáanʼ ráʼ.  Xáʼniala mingíjyúuʼ mumbáñuun e̱jña̱la mani̱ndxu̱ún cristianos á mu ndu̱ya̱a̱ ndiéjunʼ etamijná gajmiún eʼwíínʼ, náa eni gagimijná ga̱jma̱a̱ xú káʼnii eni tarea dí muxnaxi̱i̱ náa escuela. Ma̱ngaa ma̱ndoo mumbáñún itháan májánʼ á mu nandoo nutamíjná gajmiála maestros ndrígu̱ún. Gajkhun má dí á mu majmañaaʼ imbo̱ʼ ajngáa ndayóoʼ matríyaʼ mbiʼi, tsiakii ga̱jma̱a̱ dí ma̱nindxa̱a̱ʼ xa̱bu̱ guabaaʼ. Xánindxu̱u̱ ndíí dí majmañaaʼ imbo̱ʼ ajngáa. Atatsaʼwáminaʼ rígi̱. Á mu a̱ʼdiáaʼ nánguá eʼdxun, lá ragájkhun dí mataniminaʼ majmañaaʼ ajngáa señas mu maratamíjná ga̱jma̱a̱ xáʼ. Á mu rí a̱ʼdiáaʼ najmañuu itháan imbo̱ʼ ajngáa, lá raʼkháa májánʼ gáʼni dí majmañaaʼ maratamíjná ga̱jma̱ʼ xáʼ. *

8. Xú káʼnii gándoo gumbañúún e̱jñún maski ajndu tsethi májánʼ ajngáa rí nuthi náa kúwi̱i̱n xá.

8 Tikhun anu̱ún e̱ji̱n bi̱ naguwáʼ i̱mba̱ níʼkhá, mbáa maʼniún mingíjyúuʼ mutamijná májánʼ gajmiún e̱jñún náa imbo̱ʼ nuxi̱ʼ ajngáa. Ikha jngó maʼniún miʼskhaa mumbañún e̱jñún makru̱ʼu̱u̱n ‹rí nasngáa náa Biblia› (2 Tim. 3:15). Mbáa xúʼko̱ xtáá ikháánʼ. Maski ajndu xúʼko̱, ma̱ndoo mumbáñuun e̱jña̱la muniʼniiʼ ga̱jma̱a̱ maʼndún kuyáá Jeobá. Mbáa bi̱ kayá edxu̱u̱ mbiʼyuu Shan niʼthí: “Ru̱dúʼ, mbáwíi niʼni mbajáanʼxu, ikhaa na̱nguá ejmañuu májánʼ ajngáa dí nakru̱ʼu̱xu ikháanʼxu ga̱jma̱a̱ ikháanʼxu tsémañuxu májánʼ ajngóo ikhaa. Mú índo̱ ndi̱yo̱o̱ rí naʼnigajmaa, naʼtájkáan ga̱jma̱a̱ dí naʼniminaʼ xúgíʼ xmáná mu maʼnigajmaa ga̱jma̱a̱ ni̱ndxu̱xu̱ʼ mbáa guʼwáanʼ niʼni dí mbu̱ya̱a̱xu dí itháan gíʼdoo numuu muniʼnííʼxu Jeobá”.

9. Xú káʼnii gándoo xa̱bu̱ mumbañún e̱jñún bi̱ ndayóoʼ munigajmaa a̱jma̱ ajngáa rá.

9 Mbáa Tikhun e̱ji̱n ndayóoʼ majmañún ga̱jma̱a̱ numuu Jeobá náa a̱jma̱ ajngáa. Náa numuu rá. Numuu rí nuthi mbá ajngáa náa escuela ga̱jma̱a̱ imbo̱ʼ náa guʼwún. Ikha jngó, xa̱bu̱ bi̱ guáʼdiin e̱ji̱n najmún i̱yi̱i̱ʼ, aʼwá ga̱jma̱a̱ videos náa a̱jma̱ ajngáa. Xa̱bu̱ bi̱ guáʼdiin e̱ji̱n bi̱ naguwáʼ i̱mba̱ níʼkhá, ndayóoʼ muriyaʼ itháan mbiʼi ga̱jma̱a̱ tsiakii mu mumbañún e̱jñún mambaxúún májánʼ gajmiún Jeobá.

NÁA CONGREGACIÓN GÍʼMAA MUʼGUALA RÁ.

10. a) Tsáa gíʼmaa maraʼwíí xú káʼnii congregación gíʼmaa makuwá mbá guʼwíin rá. b) Ndiéjunʼ gíʼmaa muni bi̱ kuya̱ edxu̱u̱ náa mbá guʼwíin nákha xóó tsíraʼwíí rí muni xá.

10 Á mu xa̱bu̱ “bi̱ naguwáʼ i̱mba̱ níʼkhá” kuwa mitsínguánʼ náa eʼwíínʼ Testigos bi̱ nuthi ajngún, gíʼmaa magún náa congregación náa kuwa (Sal. 146:9). Á mu rígá mijngii congregación náa nuthi ajngáa ndrígu̱ún, bi̱ kayá edxu̱u̱ náa mbá guʼwá gíʼmaa mbaʼyoo náa congregación gíʼmaa magún bi̱ kuwa náa goʼwóo. Mú nákha xóó tsíraʼwíí dí maʼni, ikhaa gíʼmaa mbaʼyoo tsumáá ga̱jma̱a̱ ma̱ndo̱ʼo̱o̱ Jeobá dí maxnúu ikha. Ma̱ngaa, gíʼmaa maʼtámíjná ga̱jma̱a̱ a̱ʼgiu̱u̱ gajmíi̱n e̱ji̱i̱n (1 Cor. 11:3).  Ndiéjunʼ gíʼmaa mbaʼyoo xá. Xú káʼnii ikha ndrígóo Biblia gámbáyúu mu maraʼwíí dí maʼni xá.

Bi̱ kayá edxu̱u̱ náa mbá guʼwá gíʼmaa mbaʼyoo xú káʼnii congregación mambáñún bi̱ kuwa náa goʼwóo

11, 12. a) Xú káʼnii embáñun e̱ji̱n ajngáa rí nuthi ga̱jma̱a̱ rí najmañún náa reunión xá. b) Náa numuu dí tikhun e̱ji̱n tsíñún gajmañún ajngáa rí nuthi anu̱ún xá.

11 Anu̱ún e̱ji̱n gíʼmaa mbuyáá ndiéjunʼ phú eñún e̱jñún. Mu e̱ji̱n makru̱ʼu̱u̱n májánʼ kiʼsngáa ndrígóo Biblia, xáʼngo̱o̱ i̱ndó rí najmañún mámbá xmáná náa reunión. Mú, á mu nagún reunión náa ajngáa dí nakru̱ʼu̱u̱n itháan májánʼ, mbáa majmañún numuu dí kúwi̱i̱n ikhí. Mbá majmañún itháan ki xóo nundxa̱ʼwa̱a̱ edxu̱ún anu̱ún. Maʼni mingíjyúuʼ majmañún e̱ji̱n á mu tsíkru̱ʼu̱u̱n dí nuthi náa reunión (atraxnuu 1 Corintios 14:9, 11). * Ajngáa dí najmañuu nákha chíʼgíʼ mbáa ada̱ xáʼyóoʼ má maʼni ikháá ajngáa dí xóo endxa̱ʼwáminaʼ ga̱jma̱a̱ dí eku̱mu̱u̱. Tikhun e̱ji̱n najmañún nuriʼña̱a̱ graxe̱ náa reunión, muxná demostración o muxná discurso náa ajngún anu̱ún, mú na̱nguá esngajma rí xóo phú nundxa̱ʼwa̱a̱ edxu̱ún ikhiin ga̱jma̱a̱ rí nakumu̱ún.

12 Raʼkháa i̱ndó ajngáa nindxu̱u̱ dí naʼni makujmiin xóo xa̱bu̱ ga̱jma̱a̱ rí nundxa̱ʼwa̱a̱ edxu̱ún e̱ji̱n. Rígi̱ nigíʼnuu Joshua, bi̱ niʼthá nákha ginii. Ndxájuu bi̱ mbiʼyuu Esther, naʼthí: “E̱ji̱n nduyáá dí ajngáa, xóo nuni, xóo nuthi ga̱jma̱a̱ religión ndrígu̱ún anu̱ún nindxu̱u̱ mbá kajua̱a̱”. Á mu e̱ji̱n na̱nguá ekumún dí ni̱ndxu̱ún xóo anu̱ún, mbáa xáʼndun majmañún ajngún o xúndrigú religión ndrígu̱ún anu̱ún. Ndiéjunʼ gándoo muni anu̱ún e̱ji̱n á mu xúʼko̱ rígá rá.

13, 14. a) Náa numuu niriʼkhui̱i̱ congregación ndrígu̱ún mbá guʼwíin bi̱ naguwáʼ i̱mba̱ níʼkhá rá. b) Xú káʼnii nini anu̱ún e̱ji̱n bugi̱ mu mambaxúún má xúʼko̱ gajmiún Jeobá rá.

13 Bi̱ cristianos gíʼmaa mbuyáá rí gáʼñúnʼ e̱jñún ki xóo rí gáʼñúnʼ ikhiin (1 Cor. 10:24). Samuel, anu̱u̱ Joshua ga̱jma̱a̱ Esther niʼthí: “Ikhúúnʼ ga̱jmu̱ʼ a̱ʼgiu̱ʼ ndi̱ñu̱u̱n e̱jñu̱xu xú káʼnii ajngáa rí na̱jkha̱nú asndu náa a̱jkiu̱ún, ga̱jma̱a̱ nitajkáanxu rí majmañuxu mbu̱ya̱a̱ rí munixu. Ma̱ngaa, ninda̱ʼa̱a̱ Jeobá rí maxnún ku̱ma̱. Dí nixtiʼña̱a̱ rí nitajkháan tánindxu̱u̱ xóo dí nindúún ikhiin. Samuel niʼthí ga̱jma̱a̱ numún e̱ji̱i̱n: “Índo̱ ndiya̱a̱xu dí na̱nguá ejmañún wéñuʼ náa reunión náa nuthi ajngúxuʼ, ikha jngó nithaxu rí muriʼkhui̱i̱ congregación. Ni̱jkuáxu jnduʼ náa reunión ga̱jma̱a̱ ni̱jkuáxu gutaráʼa gajmiúxu̱. Ma̱ngaa, nuthu̱u̱nxu a̱ngiu̱xu mú maguwáʼ guphiʼtsu ga̱jma̱a̱ rí mu̱ʼguáxu pasiá. Xúgíʼ rúʼko̱ niyambáá mu e̱jñu̱xu muniʼnúnʼ itháan májánʼ a̱ngiu̱lú ga̱jma̱a̱ mbuyáá Jeobá raʼkháa i̱ndó xóo Dios ndrígu̱ún, mbuyáá xóo Anu̱ún ga̱jma̱a̱ bi̱ Nambáxu̱u̱n gajmiún. Ndiya̱a̱xu dí rúʼko̱ itháan gíʼdoo numuu ki xóo dí majmañún muthi májánʼ ajngúxuʼ”.

14 Samuel naʼthí dí mu mambáxu̱u̱n itháan májánʼ gajmiún Jeobá, a̱ʼgiu̱u̱ ga̱jma̱a̱ ikhaa nagún reunión náa nuthi ajngún. Ikhaa naʼthí xóó: “Guáʼdááxu mbaʼa ñajunʼ dí munixu ga̱jma̱a̱ néʼnguxu. Mú Jeobá niʼni tsajkurámúúʼ tsiakii dí ninixu, ikha jngó nuxna̱a̱xu núma̱aʼ. Nájtsíin e̱jñu̱xu nuni káxi̱ ñajunʼ Jeobá”.

NDIÉJUNʼ GÁNDOO MUNI JIÁMA RÁ.

15. Náa numuu rí mbáa ndxájulú nindxa̱ʼwáminaʼ dí itháan májánʼ mariʼkhu̱u̱ congregación náa nuthi ajngáa dí nakro̱ʼo̱o̱ ikhaa xá.

15 Índo̱ e̱ji̱n nanuun, mbáa maguánu mbuyáá dí ma̱ndoo muni itháan ñajunʼ  Jeobá náa mbá congregación dí nuthi ajngáa dí nakru̱ʼu̱u̱n itháan májánʼ. Á mu xúʼko̱, anu̱ún e̱ji̱n ragíʼmaa mundxa̱ʼwa̱a̱ edxu̱ún rí e̱jñún tsíñún gúñún ikhiin. Mbáa ndxájulú bi̱ mbiʼyuu Kristina narmáʼáan a̱jkiu̱u̱n: “Nikroʼoʼ lájuíin ajngóo anu̱ʼ ga̱jma̱a̱ ru̱dúʼ, mú phú niʼniuʼ mingíjyúuʼ makro̱ʼo̱ʼ dí najuiʼthá náa reunión. Índo̱ niʼni 12 tsiguʼ, ni̱jkhá náa mbá asamblea náa ajngáa rí nuthi náa escuela. Ikhú ni̱jkhánú ndi̱yo̱o̱ dí xtáá radxuun dí gajkhun. Imbo̱ʼ dí nimbáyuʼ índo̱ nitajkháan náa ajngáa dí natha náa escuela. ¡Asndu ikhú na̱thu̱u̱n Jeobá ga̱jma̱a̱ xúgíʼ a̱jkiu̱nʼ!” (Hech. 2:11, 41). Índo̱ Kristina nigiʼdoo 18 tsiguʼ, niʼtámíjná gajmíi̱n anu̱u̱ dí mariʼkhuu congregación náa ajngáa dí nuthi náa kuwa. Ikhaa naʼthí: “Dí majmañuʼ ga̱jma̱a̱ numuu Jeobá náa ajngáa dí nuthi náa escuela nixkaxu̱u̱n manimbánuu dí najmañuʼ”. Nda̱wa̱á, Kristina ninindxu̱u̱ precursora regular, rúʼko̱ naʼni rí maxtáa gagi wéñuʼ.

16. Náa numuu rí Nadia nadxuu dí niguanúu náa nuthi imbo̱ʼ ajngáa rá.

16 Jiáma, lá nandala makuwáanʼ náa congregación náa nuthi ajngáa dí iwáá nakruaʼala ráʼ. Á mu xúʼko̱, atraxi̱mínáʼ ndíjkha. Lá numuu rí rúʼko̱ mambáyaʼ matambaxáʼ itháan májánʼ ga̱jma̱ʼ Jeobá ráʼ. (Sant. 4:8.) O numuu dí tsíyaaʼ dí ana̱ʼ ga̱jma̱a̱ rudáaʼ mbuyáá xúgíʼ dí natani o numuu dí tsíyaaʼ matani nimbá náa congregación ráʼ. Atayáá dí naʼthí Nadia, bi̱ xtáa xúgi̱ náa Betel: “Índo̱ rí a̱ngui̱nʼ ga̱jma̱a̱ ikhúúnʼ kaʼnííʼ majkiánʼxu ninduxu muriʼkhui̱i̱ congregación náa ajngáa dí nuthi náa kuwáanʼxu”. Mú anu̱u̱ ga̱jma̱a̱ ru̱dúu̱ ndiyáá dí xambáñuun mambaxúún itháan májánʼ gajmiún Jeobá. Nadia ndaʼyoo: “Rí xúgi̱ nuxna̱a̱xu núma̱aʼ dí ninimi̱jna̱ wéñuʼ musngúxu ajngún ga̱jma̱a̱ dí nini maguánuxu náa congregación dí nuthi imbo̱ʼ ajngáa. Rúʼko̱ nimbáyuxu wéñuʼ ga̱jma̱a̱ niʼni dí ma̱ndoo mumbáñunxu eʼwíínʼ xa̱bu̱ muniʼniiʼ Jeobá”.

XÓO GÁNDOO GUYAMBÁÁ EʼWÍÍNʼ RÁ.

17. a) Tsíin nixnúún Jeobá ñajunʼ rí musngúún e̱ji̱n rá. b) Ndiéjunʼ gándoo muni xa̱bu̱ mu musngúún e̱jñún rí gajkhun rá.

17 Jeobá niʼni dí xa̱bu̱ musngúún e̱jñún dí gajkhun. Táxnúún ñajunʼ rígi̱ xiʼñúnʼ e̱ji̱n ni má eʼwíínʼ xa̱bu̱ (atraxnu Proverbios 1:8 * ga̱jma̱a̱ 31:10, 27, 28). * Mbáa xa̱bu̱ bi̱ tsíninuʼ májánʼ ajngáa rí nuthi náa kuwa ndayóoʼ mumbáñuun mu maʼga̱nú náa a̱jkiu̱ún e̱jñún. Índo̱ ikhiin nunda̱ʼa̱ rí mumbañún, tséni numuu rí tsíñún musngúún e̱jñún. Nunda̱ʼa̱ rí mumbañún mu musngúún “xóo eʼthí náa xtángoo ga̱jma̱a̱ xó má endxa̱ʼóo edxu̱u̱ Jeobá” (Efes. 6:4). Mbá xkri̱da, ma̱ndoo mundu̱ʼu̱u̱n ikha bi̱ kuya̱ edxu̱u̱ náa congregación xóo ma̱ndoo munigajmaa mbá guʼwíin. Ma̱ngaa ma̱ndoo mundu̱ʼu̱u̱n rí mumbañún muxkamiin bi̱ mumbaxún gajmiún e̱jñún.

Xa̱bu̱ gajmiún e̱jñún nambáñun índo̱ nambáxu̱u̱n gajmiún eʼwíínʼ a̱ngiu̱lú. (Atayáá kutriga̱ 18 ga̱jma̱a̱ 19.)

18, 19. a) Xú káʼnii gándoo gumbaʼñún eʼwíínʼ cristianos bi̱ itháan jiáma rá. b) Ndiéjunʼ rí muni má xúʼko̱ bi̱ guáʼdiin e̱ji̱n rá.

18 Mu mumbañún e̱jñún, ikhiin nguáná ma̱ndoo muthún eʼwíínʼ mu munigajmaa mbá guʼwíin gajmiún. Mbaʼin jiáma najmañún rí májánʼ índo̱ nagájnún gutaraʼa gajmiún eʼwíínʼ a̱ngiu̱lú o nuʼni i̱ʼwáʼ gajmiún ikhiin (Prov. 27:17). Shan, bi̱  niʼthá ga̱jma̱a̱ numuu nákha ginii, naʼthí: “Narmáʼáan a̱jkiu̱nʼ májánʼ ga̱jma̱a̱ numún a̱ngiu̱lú bi̱ nimbayúʼ. Mámbá rí numbayúʼ mani mújúnʼ asignación, rígá mbaʼa rí najmañuʼ. Ga̱jma̱a̱ niniguʼ wéñuʼ rí nunixu mu maʼni gagi a̱jkiu̱xuʼ”.

19 A̱ngiu̱lú bi̱ gumbañúún bi̱ guáʼdiin e̱ji̱n gíʼmaa muthún má xúʼko̱ e̱ji̱n rí guyamajkún anu̱ún. Xú káʼnii gándoo muni xá. Rí muthi rí májánʼ numún ikhiin ga̱jma̱a̱ mbuyamajkuíí ñajunʼ rí guáʼdáá mu musngúún e̱jñún. Ma̱ngaa bi̱ gumbañúún e̱jñún a̱ngiu̱lú bugi̱ gíʼmaa muñewa̱a̱n rí nuni mu nimbáa xa̱bu̱ xáʼyoo dí ra̱májánʼ rígi̱ (1 Ped. 2:12). Maski ajndu bi̱ guáʼdiin e̱ji̱n ma̱ndoo mudu̱ʼu̱u̱n eʼwíínʼ rí mumbañún, mu ikhiin gíʼmaa musngúún e̱jñún rí gajkhun. Gíʼmaa mbuyáá xú káʼnii eʼwíínʼ numbañún bi̱ kuwa náa guʼwún.

20. Xú káʼnii gándoo xa̱bu̱ mumbañún e̱jñún mu mani̱ndxu̱ún xa̱bi̱i̱ jmbii náa inuu Jeobá rá.

20 Gunda̱ʼa̱a̱ Jeobá rí mambáyala ga̱jma̱a̱ gunimíjna̱ má xúʼko̱ (atraxnuu 2 Crónicas 15:7). * Gu̱ya̱a̱ rí itháan gíʼdoo numuu rí e̱jña̱la mambaxúún gajmiún Jeobá raʼkháa rí nandala ikháanʼ. Guni xúgíʼ rí naʼngo̱o̱ mu Ajngá rawunʼ Dios maʼga̱nú asndu náa a̱jkiu̱ún e̱jña̱la. Gaku̱ma̱la rí e̱jña̱la ma̱ndoo maguanu mani̱ndxu̱ún xa̱bi̱i̱ Jeobá. Índo̱ ikhiin guni rí naʼthí náa Biblia ga̱jma̱a̱ mbuyaridáá rí nunila, ikháanʼ maku̱ma̱la xó má apóstol Juan. Índo̱ niʼthí ga̱jma̱a̱ numún a̱ngui̱i̱n, niʼthí: “Nda̱a̱ imbo̱ʼ dí maʼni maʼdxuʼ wéñuʼ: Rí madxawun rí e̱ji̱nʼ jngruigu̱u̱n má xúʼko̱ náa dí gajkhun” (3 Juan 4).

^ párr. 5 Deuteronomio 6:6, 7: “Ga̱jma̱a̱ ajngáa rí xtáá ratha̱nʼ xúgi̱ gíʼmaa magiwa̱nʼ náa a̱jkia̱nʼ; ga̱jma̱a̱ gíʼmaa matagídáʼ náa edxu̱u̱ a̱ʼdiáaʼ ga̱jma̱a̱ gíʼmaa marata̱a̱n índo̱ gáraʼwún náa guʼwáaʼ ga̱jma̱a̱ índo̱ gajngruigaʼ náa kamba̱a̱ ga̱jma̱a̱ índo̱ gátaba̱ʼ ga̱jma̱a̱ índo̱ gáraxunʼ”.

^ párr. 7 Atayáá artículo “Usted puede aprender otro idioma”, náa ¡Despertad! gu̱nʼ marzo tsiguʼ 2007, ináa 10 asndu 12.

^ párr. 11 1 Corintios 14:9, 11: “Xúʼko̱ má kayuʼ mangáanʼ, á mu rí najmala ajngáa dí mingíjyúuʼ, xú káʼnii gúyáá rí najuiʼthá xá. Maʼni xóo rí nutamijnala ga̱jma̱a̱ giñánʼ. Ikha jngó, á mu ikhúúnʼ na̱nguá ekroʼoʼ dí nuthu̱nʼ, bi̱ xtáa raʼthí mbaʼyoo dí ni̱ndxu̱ʼ xóo mbáa bi̱ na̱ʼkha̱ i̱mba̱ níʼkhá, ga̱jma̱a̱ ikhúúnʼ mba̱yo̱o̱ dí na̱ʼkha̱ i̱mba̱ níʼkhá bi̱ xtáa raʼthí”.

^ párr. 17 Proverbios 1:8: “Atadxun, a̱ʼdióoʼ índo̱ naxpriguaʼ ana̱ʼ, ga̱jma̱a̱ xátatsiʼñáʼ xtángoo ndrígóo ru̱dáʼ”.

^ párr. 17 Proverbios 31:10, 27, 28: “Mbáa a̱ʼgu̱ bi̱ najmaa, tsáa gándoo gáxkamaa xá. Itháan gíʼdoo numuu ikhaa ki xóo corales. Ndaʼyoo xú káʼnii ñajunʼ rígá náa goʼwóo, ga̱jma̱a̱ nditháan na̱nguá eskoo. E̱ji̱i̱n naguáxu̱ún ga̱jma̱a̱ nuthi dí ikhaa xtáa gagi; ajmbio̱o̱ nagixi̱i̱ ga̱jma̱a̱ ndaʼyamajkuu”.

^ párr. 20 2 Crónicas 15:7: “Ga̱jma̱a̱ ikháanʼla, gaguaʼdáá tsiakii ga̱jma̱a̱ xúniʼñátígú ñawánla, numuu dí rígá mbá rí muʼdaʼla ga̱jma̱a̱ numuu ñajunʼ rí gúnila”.