Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Agosto tsiguʼ 2017

Xú káʼnii gándoo guriʼkumijná mbájkhu rá.

Xú káʼnii gándoo guriʼkumijná mbájkhu rá.

“Guʼgíʼ guriʼkumijná rí xú káʼnii nindxala” (COL. 3:10).

AJMÚÚ 126 GA̱JMA̱A̱ 28

1, 2. a) Náa numuu nduʼyáá rí ma̱ndoo muriʼkhumijná rí xóo nini̱ndxu̱lú rá. b) Xú káʼnii cualidades rí xóo muriʼkhumijná na̱ʼkha̱ náa Colosenses 3:10-14 rá.

AJNGÁA “guriʼkumijná rí xú káʼnii nindxala” na̱ʼkha̱ a̱jma̱ nuthu náa Traducción del Nuevo Mundo de las Santas Escrituras (Efes. 4:24; Col. 3:10). Nandoo gáʼthúu̱n matriʼkuminaʼ “xó má eyoo Dios”. Lá ma̱ndoo muriʼkhumijná xúʼko̱ kaʼnii ráʼ. Xúʼko̱, numuu rí Jeobá niʼniáanʼ xó má ikhaa. Ikha jngó ma̱ndoo manindxu̱lúʼ xó má kaʼnii nindxu̱u̱ ikhaa (Gén. 1:26, 27; Efes. 5:1).

2 Gajkhun má rí xúgiáanʼ nindrígúu aʼkhá ndrígóo Adán ga̱jma̱a̱ Eva, ikha jngó nandulúʼ muʼni dí raʼkhí. Ma̱ngaa dí rígá mbájndi ma̱ndoo maʼni rí muʼni dí raʼkhí. Mú ma̱ndoo manindxu̱lúʼ xó má Jeobá eyoo numuu rí ikhaa nambáyulúʼ. Mu maxnúlúʼ tsiakii muʼni rígi̱, náa artículo rígi̱ mbuʼyáá mbaʼa enii cualidades rí xú káʼnii muriʼkhumijná rí Pablo niʼnirámáʼ náa Biblia (atraxnuu Colosenses 3:10-14). * Ga̱jma̱a̱ mbuʼyáá xú káʼnii gusngajmá índo̱ na̱jkua̱ guʼtáraʼa.

 GAKUWÁANʼ MBÁ KAMBÁXULÚ

3. Xú káʼnii nindxu̱u̱ mbá rí gíʼdoo numuu rí nakujmaa rí nuʼgíʼ nuriʼkhumijná rá.

3 Nda̱wa̱á rí Pablo nixnúlú tsiakii rí muʼgíʼ muriʼkhumijná, niʼthí ga̱jma̱a̱ numuu mbá rí gíʼdoo wéñuʼ numuu, nindxu̱u̱ rí xuraʼwíin xa̱bu̱. Náa Colosenses 3:11 niʼthí: “Náa nda̱wa̱a̱ griego ní má judío, náa nda̱wi̱i̱n bi̱ kuda tsinúʼ náa xuñúnʼ ga̱jma̱a̱ bi̱ rakúda, bi̱ naguwáʼ imba̱ níʼkhá, escita, ñumbáá, ga̱jma̱a̱ bi̱ raʼkháa ñumbáá”. * Nimbáa bi̱ xtáa náa congregación gíʼmaa maku̱mu̱u̱ rí itháan gíʼdoo numuu ki xóo eʼwíínʼ numuu raza ndrígóo, xuajen náa xtáa ga̱jma̱a̱ rí gíʼdoo mbújkha̱a̱. Náa numuu rí na̱nguá rá. Numuu rí cristianos gajkhun ni̱ndxu̱ún ‹mbáa xa̱bu̱›, xóo muʼthá, xúgínʼ kuwa kambáxu̱u̱n (Gál. 3:28).

4. a) Xú káʼnii gíʼmaa munimi̱jna̱ bi̱ ni̱ndxu̱ún xa̱bi̱i̱ Dios rá. b) Náa numuu gáʼni mingíjyúuʼ rí cristianos makuwa mbá kambáxu̱u̱n rá.

4 Índo̱ nuʼgíʼ nuriʼkhumijná, nduʼyamajkhún xúgínʼ xa̱bu̱ ga̱jma̱a̱ nduʼñún rí guáʼdáá numún tséʼniuu xú káʼnii raza ndrígu̱ún, á mu guáʼdáá mbújkha̱a̱ o na̱nguá (Rom. 2:11). Naʼni mingíjyúuʼ rígi̱ náa tikhu xuajen. Mbá xkri̱da, nákha ginii Xa̱bu̱ Ñajunʼ náa Sudáfrica niʼni wájínʼ xa̱bu̱ xó má raza ndrígu̱ún. Nirígá colonia náa kuwa xa̱bu̱ bi̱ guáʼdáá mbújkha̱a̱, xuajen náa kuwa xa̱bu̱ skuniúnʼ ga̱jma̱a̱ i̱mba̱ níʼkhá náa kuwa mestizos. Mbaʼin xa̱bi̱i̱ Jeobá kuwa náa xuajen rúʼko̱. Mú Cuerpo Gobernante nindoo maxnún tsiakii a̱ngiu̱lú mu munimbaníí xtágabu rí na̱ʼkha̱ náa 2 Corintios 6:13, náa naʼthí: “Gurmbáʼtaa a̱jkia̱lá”. Ikha jngó, gu̱nʼ octubre tsiguʼ 2013 niríyaʼ mbá awan kiejunʼ mu a̱ngiu̱lú muniʼnumijná itháan májánʼ. Xú káʼnii gúni xá.

5, 6. a) Ndiéjunʼ niguma náa mbá xuajen mu mambáxu̱u̱n a̱ngiu̱lú rá. (Atayáá timbá xtiʼkhu.) b) Xú káʼnii nimbáñun a̱ngiu̱lú awan rígi̱ rá.

5 Awan rígi̱ ninindxu̱u̱ rí a̱jma̱ congregación mixtiʼkhu bi̱ nuthi mixtiʼkhu ajngáa o raza makuwá mbóó índo̱ naguámbáa xmáná. Nutaraʼa ga̱jma̱a̱ nagún mbóó náa reunión ga̱jma̱a̱ nuthúún magún náa guʼwún. Mbaʼa congregación ninimbánii awan rígi̱. Sucursal nigruigú mbaʼa ajngáa májánʼ náa xa̱bu̱ bi̱ na̱nguá ni̱ndxu̱ún xa̱bi̱i̱ Jeobá. Mbá xkri̱da, mbáa ndxajkun niʼthí: “Na̱nguá ni̱ndxu̱ʼ xa̱bi̱i̱ Jeobá, mu nda̱yo̱o̱ rí ñajunʼ rí nunila nindxu̱u̱ májánʼ wéñuʼ ma̱ngaa tsiguiyala kuyamíjna̱ ga̱jma̱a̱ numuu rí nindxa̱la mixtiʼkhu raza”. Xú káʼnii nimbáñun awan rígi̱ a̱ngiu̱lú rá.

6 Nákha ginii, mbáa ndxájulú bi̱ naʼthí ajngáa xhosa bi̱ nagumbiʼyuu Noma tsíyoo gáʼthún rí magún náa goʼwóo a̱ngiu̱lú bi̱ miʼxíin bi̱ kuwa náa congregación rí nuthi ajngáa inglés. Mú nda̱wa̱á rí niʼtáraʼa gajmíi̱n ga̱jma̱a̱ rí nixtáa náa guʼwún, niʼthí: “¡Ni̱ndxu̱ún xóo ikháanʼ!”. Ikha jngó índo̱ congregación ndrígóo nigruiguíin a̱ngiu̱lú bi̱ kuwa náa congregación inglés, niʼni mújúnʼ ganitsu ga̱jma̱a̱ niʼthún tikhun rí magún gupiʼtsu náa goʼwóo. Ma̱ngaa ikhí ni̱jkha̱ mbáa ndxájulú bi̱ kayá edxu̱u̱ bi̱ nindxu̱u̱ raza miʼxáa. Ikhaa niʼthí: “Niʼniuʼ tsiánguá índo̱ ndi̱yo̱o̱ rí ikhaa taxmiéjunʼ magiʼi náa mbá caja plástico rí mijmbaʼ wéñuʼ”. Awan rígi̱ xóó rígá xúgi̱. Ga̱jma̱a̱ numuu rúʼko̱ rí mbaʼin a̱ngiu̱lú nambáxu̱u̱n gajmiún mbaʼin a̱ngiu̱lú ga̱jma̱a̱ nandún muniʼnuʼ má xúʼko̱ eʼwíínʼ a̱ngiu̱lú bi̱ ni̱ndxu̱ún i̱mba̱ raza ga̱jma̱a̱ bi̱ mixtiʼkhu xóo kuwa.

GAGAʼWÍÍNʼ A̱JKIU̱LÚ GA̱JMA̱A̱ GUʼNI RÍ MÁJÁNʼ

7. Náa numuu rí ndayóoʼ musngajma rí nagáwiinʼ a̱jkiu̱lú kuʼñúún eʼwíínʼ rá.

7 Índo̱ kaʼnííʼ kuwáanʼ náa numbaaʼ ndrígóo Satanás, mumíniiʼ ga̱jma̱a̱ numuu rí nda̱a̱ ñajunʼ, nandii gakhi̱i̱, rí xa̱bu̱ nuxkulú, gamiéjunʼ, tsikúwáʼ ga̱jma̱a̱ i̱ʼwáʼ xkujndu. Ndayóoʼ magaʼwíínʼ a̱jkiu̱lú mu ma̱ndoo  mumbañún eʼwíínʼ. Rí magaʼwíínʼ a̱jkiu̱lú maxkaxáanʼ muʼni rí májánʼ (Efes. 4:32). Cualidad rígi̱ mambáyulúʼ mbuʼyaridáá Dios ga̱jma̱a̱ muʼni̱i̱ a̱jkiu̱ún eʼwíínʼ (2 Cor. 1:3, 4).

8. Ndiéjunʼ garigá á mu nusngajmá rí nagáwiinʼ a̱jkiu̱lú ga̱jma̱a̱ nuʼniu̱u̱n rí májánʼ xúgínʼ bi̱ kuwa náa congregación rá. Araxná mbá xkri̱da.

8 Mbáa náa congregación ndrígúlú kuwa a̱ngiu̱lú bi̱ niguwáʼ i̱mba̱ níʼkhá o rí migíníi. Xú káʼnii esngajmún rí nuʼniu̱u̱n rí májánʼ xá. Rí mambáxulúʼ májánʼ gajmiúlú ga̱jma̱a̱ mumbáñuun mu makumún rí guáʼdáá numún náa congregación (1 Cor. 12:22, 25). Guʼyáá rí nigíʼnuu Dannykarl, bi̱ nigájnuu náa Filipinas mu maʼga̱ náa Japón. Náa niñajunʼ, na̱nguá eñún kuyáá xóo eñún kuñún japoneses. Mú mbóo mbiʼi ni̱jkha̱ náa reunión náa nagún xa̱bi̱i̱ Jeobá. Ikhaa narmáʼáan a̱jkiu̱u̱n: “Mbá xúgínʼ ni̱ndxu̱ún japoneses. Mú nindrigún májánʼ, niniuʼ asndu xóo nuniʼniúnʼ má mba̱yu̱ʼ tsiguʼ”. A̱ngiu̱lú túniñanʼ runi̱i̱ rí májánʼ, ga̱jma̱a̱ rúʼko̱ nimbáyúu mu mambaxúu ga̱jma̱a̱ Dios. Nijngúun má iyááʼ ga̱jma̱a̱ rí xúgi̱ nindxu̱u̱ mbáa bi̱ kayá edxu̱u̱. Eʼwíínʼ a̱ngiu̱lú bi̱ kuya̱ edxu̱u̱ náa congregación nduyáá rí ikhaa ga̱jma̱a̱ a̱ʼgiu̱u̱, Jennifer, nuruguambáá wéñuʼ náa congregación. Nuthi: “A̱ngiu̱lú bugi̱ bi̱ ni̱ndxu̱ún precursores na̱nguá guáʼdáá wéñuʼ ga̱jma̱a̱ ni̱ndxu̱ún mbá xkri̱da májánʼ rí nandoo gáʼthúu̱n muʼgíʼ ginii ñajunʼ ndrígóo Reino” (Luc. 12:31).

9, 10. Ndiéjunʼ rí nundrigúu tikhun a̱ngiu̱lú numuu rí nigáwiinʼ a̱jkiu̱ún kuñún xa̱bu̱ náa nutaraʼa rá.

9 Rí muʼtáraʼa naʼni rí muʼniu̱u̱n “rí májánʼ xúgínʼ” (Gál. 6:10). Mbaʼin xa̱bi̱i̱ Jeobá nigíʼdi̱i̱ nijmañún imbo̱o̱ ajngáa numuu rí nagáwiinʼ a̱jkiu̱ún kuñún xa̱bu̱ bi̱ naguwáʼ i̱mba̱ níʼkhá (1 Cor. 9:23). Rígi̱ naguguambáá wéñuʼ. Mbá xkri̱da, mbáa precursora bi̱ xtáa náa Australia bi̱ nagumbiʼyuu Tiffany nindoo maguguambáá náa mbá congregación náa nuthi ajngáa suajili náa xuajen Brisbane. Maski ajndu niʼniuu mingíjyúuʼ wéñuʼ majmañuu ajngáa rígi̱, naku̱mu̱u̱ rí niguma tsajkurámááʼ. Naʼthí: “Bi̱ nandoo majmañuu itháan náa maʼtáraʼa, ndayóoʼ maʼga̱ náa mbá congregación náa nuthi imbo̱o̱ ajngáa. Nindxu̱u̱ xóo magajnáʼ i̱mba̱ níʼkhá mu xtaa má náa xuajñanʼ. Ga̱jma̱a̱ ma̱ndoo ma̱ta̱ya̱a̱ xú káʼnii eñún kuyamijná náa xúgíʼ numbaaʼ”.

Ndiéjunʼ exkaxi̱i̱n cristianos mumbañún xa̱bu̱ bi̱ naguwáʼ i̱mba̱ níʼkhá rá. (Atayáá kutriga̱ 10)

10 Ma̱ngaa guʼyáá xú káʼnii nini mbá guʼwíin bi̱ kuwa náa Japón. Aʼdiún bi̱ nagumbiʼyuu Sakiko, naʼthí: “Tsiguʼ 1990, nixkamin mbaʼin xa̱bu̱ bi̱ naguwáʼ Brasil náa nutaraʼaxu. Índo̱ nuraxnuxu náa Biblia ndrígu̱ún náa ajngáa portugués xóo Revelación 21:3, 4 o Salmo 37:10, 11, 29, nugíʼ májánʼ edxu̱ún mudxuun ga̱jma̱a̱ nguáná asndu numbiyaʼ”. Mú rí nigáwiinʼ a̱jkiu̱ún nixkaxi̱i̱n muni itháan. Sakiko naʼthí xóó: “Índo̱ ndiya̱a̱xu rí nandún majmañún ga̱jma̱a̱ numuu Jeobá,  xúgiáanʼ ninduxu majmañuxu ajngáa portugués”. Nda̱wa̱á, niyambáá mu marigá mbá congregación náa nuthi ajngáa portugués. Tsiguʼ nda̱wa̱á, nimbañúún mbaʼin xa̱bu̱ bi̱ naguwáʼ i̱mba̱ níʼkhá mu mani̱ndxu̱ún xa̱bi̱i̱ Jeobá. Sakiko naʼthí: “Ninixu mba̱a̱ tsiakii mu majmañuxu ajngáa, mu tánindxu̱u̱ ndíí. Nuxna̱a̱xu wéñuʼ núma̱aʼ Jeobá” (atraxnuu Hechos 10:34, 35).

GANINDXU̱LÚ XA̱BU̱ GUABÁANʼ

11, 12. a) Náa numuu guriʼkumijná rí xú kaʼniáanʼ rá. b) Ndiéjunʼ gambáyulú manindxu̱lúʼ xa̱bu̱ guabáanʼ rá.

11 Rígá mbá numuu mu muriʼkhumijná rí xú kaʼniáanʼ, gíʼmaa mani̱ndxu̱u̱ mu muʼni mba̱a̱ Jeobá, raʼkháa mu xa̱bu̱ mbuyamajkhulú ikháanʼ. Garmáʼáan a̱jkiu̱lú rí mbáa ángel bi̱ nda̱a̱ aʼkhúun nikudaminaʼ aʼkhá ga̱jma̱a̱ niʼnimbamínáʼ (atayáá ma̱ngaa Ezequiel 28:17). Ikháanʼ mangáanʼ naʼniulú itháan gakhi̱i̱ mu muniʼñáʼ ruʼnimbaʼumíjna̱ numuu rí ni̱ndxu̱lú xa̱bu̱ aʼkhá. Maski ajndu xúʼko̱, ma̱ndoo manindxu̱lúʼ xa̱bu̱ guabáanʼ. Xú káʼnii rá.

12 Mbaʼyóoʼ muraxnuu Biblia xúgíʼ mbiʼi ga̱jma̱a̱ mundxaʼwamíjna̱ rí niraxnuu (Deut. 17:18-20). Mbá rí mambáyulúʼ wéñuʼ nindxu̱u̱ rí mundxaʼwamíjna̱ rí niʼsngáa Jesús ga̱jma̱a̱ rí ikhaa ninindxu̱u̱ xa̱bu̱ guabaaʼ (Mat. 20:28). Ikhaa ninindxu̱u̱ mbáa xa̱bu̱ guabaaʼ wéñuʼ rí asndu niʼjñáa rajkúún apóstoles ndrígóo (Juan 13:12-17). Ma̱ngaa gíʼmaa munda̱ʼa̱a̱ má xúʼko̱ Dios rí maxnúlúʼ xi̱ʼ kaʼwu ndrígóo mu muʼni gajmiúlú xúgíʼ rí gáʼni mbuʼyáá rí ikháanʼ kuaʼdáá itháan numulúʼ ki xóo eʼwíínʼ (Gál. 6:3, 4; Filip. 2:3).

13. Ndiéjunʼ gundrígú á mu nani̱ndxu̱lú xa̱bu̱ guabáanʼ rá.

13 (Atraxnuu Proverbios 22:4). * Jeobá nandoo rí xúgínʼ xa̱bi̱i̱ manindxu̱lúʼ xa̱bu̱ guabáanʼ. Á mu nani̱ndxu̱lú xúʼko̱, mbaʼa rí gundrigúu. Mbá xkri̱da, maʼni rí makuwáanʼ mbá jnduʼ ga̱jma̱a̱ mbá tsímáá náa congregación. Ma̱ngaa, Jeobá maxnúlúʼ mbaʼa rí májánʼ rí na̱nguá kaʼyulú mundrígú. Apóstol Pedro niʼthí: “Xúgiáanʼ gani̱ndxa̱la xa̱bu̱ guabaaʼ náa ikháanʼla, numuu rí Dios tsíyoo gáʼñun bi̱ nunimbaʼumíjna̱, mú ikhaa nandoo kaʼñún xa̱bu̱ gua̱bi̱nʼ” (1 Ped. 5:5).

GANINDXU̱LÚ XA̱BU̱ MANSO GA̱JMA̱A̱ GAʼNGO̱O̱ A̱JKIU̱LÚ

14. Tsáa nagíʼ mbá májánʼ xkri̱da rí nindxu̱u̱ manso ga̱jma̱a̱ rí naʼngo̱o̱ a̱jkiu̱u̱n rá.

14 Rí mbiʼi xúgi̱, kuwa bi̱ nakumu̱ún rí xa̱bu̱ manso o bi̱ nda̱a̱ rí eni namíñun. Mú raʼkháa xúʼko̱ kaʼnii nindxu̱u̱. Cualidad rí nagui̱i̱ rígi̱ na̱ʼkha̱ náa Jeobá, xa̱bu̱ bi̱ itháan gíʼdoo tsiakii náa xúgíʼ numbaaʼ. Ikhaa bi̱ nagíʼ májánʼ xkri̱da rí nindxu̱u̱ manso ga̱jma̱a̱ naʼngo̱o̱ a̱jkiu̱u̱n (2 Ped. 3:9). Atayáá xú káʼnii Jeobá nijmiuu ángeles mu mariʼña̱a̱ graxe̱ ndrígóo Abrahán ga̱jma̱a̱ Lot (Gén. 18:22-33; 19:18-21). Ma̱ngaa nduʼyáá rí xú káʼnii niʼngo̱o̱ a̱jkiu̱u̱n ga̱jma̱a̱ numuu xuajen Israel mbá mil quinientos tsiguʼ (Ezeq. 33:11).

15. Xú káʼnii xkri̱da nixná Jesús rá.

15 Jesús ninindxu̱u̱ ‹manso› (Mat. 11:29). Ra̱ʼkhá tháán niʼngo̱o̱ a̱jkiu̱u̱n ga̱jma̱a̱ numuu xúgíʼ rí táʼngu̱u̱n gúní discípulos. Índo̱ nixtáa náa tsu̱du̱u̱ Ku̱ba̱ʼ, niʼngo̱o̱ mutanumáá ga̱jma̱a̱ munitsudi̱i̱ xa̱bu̱ bi̱ guáʼdaa sia̱nʼ. Ma̱ngaa ninindxu̱u̱ manso ga̱jma̱a̱ niʼngo̱o̱ a̱jkiu̱u̱n asndu náa nikháñu. Índo̱ xtáa ramínuuʼ náa ixi̱, nindo̱ʼo̱o̱ Jeobá rí maʼni mba̱a̱ a̱jkiu̱u̱n kaʼñún bi̱ nuxiyáa. Niʼthí: “Tsiya ri ini” (Luc. 23:34). Xó má ndiʼyáá, Jesús ninindxu̱u̱ manso ga̱jma̱a̱ niʼngo̱o̱ a̱jkiu̱u̱n maski ajndu nimínuuʼ  wéñuʼ. ¡Nixnúlú mbá májánʼ xkri̱da! (Atraxnuu 1 Pedro 2:21-23). *

16. Xú káʼnii gándoo musngajmá rí ni̱ndxu̱lú xa̱bu̱ manso ga̱jma̱a̱ rí naʼngo̱o̱ a̱jkiu̱lú rá.

16 Xú káʼnii gándoo gusngajmá rí ni̱ndxu̱lú xa̱bu̱ manso ga̱jma̱a̱ rí naʼngo̱o̱ a̱jkiu̱lú rá. Mbá nindxu̱u̱ rí muʼni mba̱a̱ a̱jkiu̱lú kuʼñúún eʼwíínʼ. Pablo niʼnirámáʼ náa inún cristianos: “Gaʼngo̱o̱ a̱jkia̱la kuyamíjna̱ ga̱jma̱a̱ guni mba̱a̱ a̱jkia̱la kuyamíjna̱ má xúʼko̱ á mu mbáa naxiéʼkhá ga̱jma̱a̱ numuu imba̱a̱. Xó má Jeobá niʼni mba̱a̱ a̱jkiu̱u̱n kaʼyalá má xúʼko̱, xúʼko̱ má gúni mangáanʼ” (Col. 3:13). Nakujmaa rí ndayóoʼ manindxu̱lúʼ xa̱bu̱ manso ga̱jma̱a̱ maʼngo̱o̱ a̱jkiu̱lú mu muʼnimbulúʼ kiʼtáñajunʼ rígi̱. Índo̱ gúʼni, nuyambáá mu makuwáanʼ mbá kambáxulú náa congregación.

17. Ndíjkha gíʼdoo wéñuʼ numuu rí manindxu̱lúʼ xa̱bu̱ manso ga̱jma̱a̱ rí maʼngo̱o̱ a̱jkiu̱lú rá.

17 Jeobá na̱ndu̱ʼu̱lú rí muriʼkhumijná mu manindxu̱lúʼ xa̱bu̱ manso ga̱jma̱a̱ rí maʼngo̱o̱ a̱jkiu̱lú. Gíʼdoo wéñuʼ numuu muʼni rígi̱ á mu nandulúʼ makuwáanʼ náa numbaaʼ nuxi̱ʼ (Mat. 5:5; Sant. 1:21). Rí itháan gíʼdoo numuu rí á mu nuʼni rígi̱, mbuʼyamajkuíí Jeobá ga̱jma̱a̱ mumbáñuun xa̱bu̱ mu munimbu̱ún rí naʼsngáa náa Biblia (Gál. 6:1; 2 Tim. 2:24, 25).

GAʼNDULÚʼ KUʼYAMÍJNA̱

18. Xú káʼnii kagujtuminaʼ rí maʼndulú kuʼñúún xa̱bu̱ ga̱jma̱a̱ rí xáʼndulú kuʼñúún tikhuinʼ xa̱bu̱ rá.

18 Xúgíʼ cualidad rí ndiʼyáá gi̱i̱ kagujtuminaʼ ga̱jma̱a̱ ngajua. Mbá xkri̱da, discípulo Santiago ndiyóoʼ maxprígún a̱ngui̱i̱n numuu rí nuniu̱u̱n rí májánʼ bi̱ guáʼdáá ki xóo bi̱ migíníi. Niʼthún dí rúʼko̱ nanújngorámuʼ xtángoo ndrígóo Dios: “Gaʼndaʼ xtayáá xa̱bu̱ numbaaʼ ga̱jma̱ʼ xó má eyaʼ xtayaminaʼ ikháánʼ”. Nda̱wa̱á niʼthí: “Mú á mu nandala ku̱ñu̱u̱n tikuiinʼ xa̱bu̱, nuxuʼdámijná aʼkhá” (Sant. 2:8, 9). Á mu nandulúʼ kuʼñúún xa̱bu̱, xambáxulú gajmiúlú i̱ndó bi̱ ninigajmaa itháan, numuu raza ndrígu̱ún o numuu rí guáʼdáá mbújkha̱a̱. Índo̱ muʼni rígi̱ raʼkháa i̱ndó musngajmá, ndayóoʼ manindxu̱lúʼ xúʼko̱ kaʼnii.

19. Náa numuu gíʼmaa maʼndulú kuʼyamíjna̱ rá.

19 Rí maʼndulú kuʼñúún eʼwíínʼ ma̱ngaa nandoo gáʼthúu̱n rí “maʼngulú xúgíʼ ga̱jma̱a̱ muʼni rí májánʼ” ga̱jma̱a̱ “xúxuximíjna” (1 Cor. 13:4). Ikha jngó ndayóoʼ maʼngo̱o̱ a̱jkiu̱lú, manindxu̱lúʼ mbáa xa̱bu̱ májánʼ ga̱jma̱a̱ mbáa xa̱bu̱ guabaaʼ mu muʼguá kuʼyúlú ajngáa ndrígóo Reino náa xa̱bu̱ (Mat. 28:19). Ma̱ngaa rígi̱ mambáyulúʼ mu mambaxúlúʼ májánʼ gajmiúlú xúgínʼ a̱ngiu̱lú náa congregación. Á mu xúgiáanʼ nusngajmá ngajua rígi̱, náa congregación makuwá mbá jnduʼ ga̱jma̱a̱ mbuyamajkuíí Jeobá. Ma̱ngaa, eʼwíínʼ xa̱bu̱ manigu̱nʼ majmañún rí gajkhun. Ikha jngó, náa Biblia xóo naguámbóo naʼthí rí xóo nindxu̱u̱ xa̱bu̱ bi̱ nariʼkuminaʼ ga̱jma̱a̱ ajngáa rígi̱: “Ga̱jma̱a̱ xúgíʼ dí i̱ʼwáʼ, gíʼmaa maʼndala ku̱ñu̱u̱n xúgínʼ, numuu dí rúʼko̱ naruwáanʼla májánʼ wéñuʼ” (Col. 3:14).

‹XÚNIʼÑÁʼ RURIʼKHUMIJNÁ›

20. a) Xú káʼnii gíʼmaa muraximíjna̱ ga̱jma̱a̱ náa numuu rá. b) Ndiéjunʼ rí kuaʼti̱i̱n marigá rá.

20 Xúgiáanʼ gíʼmaa muraximíjna̱: “Ndiéjunʼ rí itháan ma̱ndoo mani mu mariʼkuminaʼ rí xóo ni̱ndxu̱ʼ rá.” Gíʼmaa muʼtákáñii Jeobá rí mambáyulúʼ ga̱jma̱a̱ muʼnimíjna̱ mu muʼni gámbáa xúgíʼ ku̱ma̱ ga̱jma̱a̱ rí maʼni rí xanújngaʼlu náa naʼtáñajunʼ Reino ndrígóo Dios (Gál. 5:19-21). Ma̱ngaa gíʼmaa muraximíjna̱: “Lá nariʼkhu̱u̱ má xúʼko̱ rí nandxa̱ʼwa̱mínáʼ mu manigu̱ʼ Dios ráʼ.” (Efes. 4:23, 24.) Xúgi̱ rí ni̱ndxu̱lú xa̱bu̱ aʼkhá, maʼni gakhi̱i̱ mu̱ʼgua̱ ruriʼkhumijná. ¡Ra̱ʼkhá tháán mitsaan gáʼni índo̱ xúgínʼ xa̱bu̱ numbaaʼ ní xaguaʼdáá aʼkhá ga̱jma̱a̱ mani̱ndxu̱ún míjínʼ kámuu mbiʼi!

^ párr. 2 Colosenses 3:10-14: “Ga̱jma̱a̱ guʼgíʼ guriʼkumijná rí xú káʼnii nindxala, ga̱jma̱a̱ ku̱ma̱ nuxi̱ʼ maʼga̱ raʼni nuxi̱ʼ xó má kaʼnii nindxu̱u̱ Bi̱ phú niʼni, náa nda̱wa̱a̱ griego ní má judío, náa nda̱wi̱i̱n bi̱ kuda tsinúʼ náa xuñúnʼ ga̱jma̱a̱ bi̱ rakúda, bi̱ naguwáʼ imba̱ níʼkhá, escita, ñumbáá, ga̱jma̱a̱ bi̱ raʼkháa ñumbáá, indió Cristo nindxu̱u̱ xúgíʼ náa xúgínʼ. Xóo e̱ji̱i̱n Dios, mikaʼwáanʼ bi̱ nandoʼ kayala, aguaʼdáá rí nandala kuyamíjna̱ numuu rí nagáwiinʼ a̱jkia̱la gani̱ndxa̱la xa̱bu̱ bi̱ májánʼ a̱jkiu̱u̱n, xunimbami̱jna̱, gani̱ndxa̱la xa̱bu̱ guabáanʼ wéñuʼ ga̱jma̱a̱ gaʼngo̱o̱ a̱jkia̱la. Gaʼngo̱o̱ a̱jkia̱la kuyamíjna̱ ga̱jma̱a̱ guni mba̱a̱ a̱jkia̱la kuyamíjna̱ má xúʼko̱ á mu mbáa naxiéʼkhá ga̱jma̱a̱ numuu imba̱a̱. Xó má Jeobá niʼni mba̱a̱ a̱jkiu̱u̱n kaʼyalá má xúʼko̱, xúʼko̱ má gúni mangáanʼ. Mú, ga̱jma̱a̱ xúgíʼ dí i̱ʼwáʼ, gíʼmaa maʼndala ku̱ñu̱u̱n xúgínʼ, numuu dí rúʼko̱ naruwáanʼla májánʼ wéñuʼ”.

^ párr. 3 Nákha wajyúúʼ, xa̱bu̱ nduñún escitas xóo xa̱bu̱ bi̱ tsejmañún nditháan ga̱jma̱a̱ naguiñunʼ kuñún.

^ párr. 13 Proverbios 22:4: “Rí manindxaʼ xa̱bu̱ guabaaʼ ga̱jma̱a̱ rí mamiñáʼ xtayáá Jeobá maʼni rí maraʼdáá wéñuʼ ma̱ngaa gloria ga̱jma̱a̱ vida”.

^ párr. 15 1 Pedro 2:21-23: “Ikha jngó, ikhaa nindxa̱ʼwála muni rígi̱, numuu rí asndu Cristo nimínuuʼ ga̱jma̱a̱ numulúʼ, niniñuʼ mbá xkri̱da mu mbuyaridáá tsumáá rí niʼni ikhaa. Ikhaa takudaminaʼ aʼkhá, nimbá rí minduwaʼ tagajnuu náa rawuunʼ. Índo̱ nitha wéñiʼ, ikhaa tátanga̱a̱ maʼtá wéñuʼ. Índo̱ xtáa ramínuʼ, ikhaa nda̱a̱ rí niʼthún, ikhaa niniñuʼ xúgíʼ náa ñawúunʼ bi̱ naʼtáñajunʼ jmbu”.