Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Agosto tsiguʼ 2017

 HISTORIA NDRÍGÓO XA̱BU̱

Bi̱ naʼngo̱o̱ naraʼnuu tsáʼkhá naguma tsajkurámááʼ

Bi̱ naʼngo̱o̱ naraʼnuu tsáʼkhá naguma tsajkurámááʼ

“NI̱NDXA̱ʼ mbáa xa̱bu̱ ra̱májáánʼ, niʼthúnʼ mbáa oficial ndrígóo Xa̱bu̱ Ñajunʼ. Nitatsíñaaʼ a̱ʼdiáaʼ ga̱jma̱a̱ a̱ʼgia̱ʼ kagu̱ ewáan ada̱. Tsáa gáxnún rí mu̱phu̱ ga̱jma̱a̱ tsáa gañewu̱u̱n xá. Atatsíñaʼ religión ndrígáʼ ga̱jma̱a̱ ayuʼ guʼwáaʼ”. Mú ikhúúnʼ niriʼñuu: “Ikhúúnʼ na̱nguá niniʼñúʼ, ikháanʼ nirajtuwún. Káʼnii delito nikudáminaʼ ikhúúnʼ rá.” Oficial niriʼñuʼ: “Nda̱a̱ imbo̱o̱ delito mitsáʼkhúun wéñuʼ ki xóo rí manindxa̱ʼ xa̱bi̱i̱ Jeobá”.

Rígi̱ nirígá nákha tsiguʼ 1959 náa mbá guʼwá e̱jua̱nʼ ndrígóo Irkutsk, náa Rusia. Mú ikhúúnʼ ga̱jmu̱ʼ a̱ʼgiu̱ʼ María, ninduxu muguajún jmbu má xúʼko̱ ga̱jma̱a̱ mumíniʼxu “ga̱jma̱a̱ numuu rí jmbu” (1 Ped. 3:13, 14). Ga̱jma̱a̱ Dios niʼni tsajkurámáánʼ ga̱jma̱a̱ numuu rúʼko̱. Rígi̱ nindxu̱u̱ historia ndrígúxu̱.

Nixtáá nákha tsiguʼ 1933 náa mbá xuajen ndrígóo Ucrania rí nagumbiʼyuu Zolotniki. Nákha tsiguʼ 1937, amiiʼ ni̱ndxu̱ún xa̱bi̱i̱ Jeobá ga̱jma̱a̱ kuwa náa Francia, niguwáʼ gúyuxu ga̱jma̱a̱ nixnuxu libros Gobierno ga̱jma̱a̱ Liberación, rí nini Sociedad Watch Tower. Índo̱ anu̱ʼ niguxnuu, nigiʼdoo fe náa Dios mbu̱júu̱. Mú nákha tsiguʼ 1939 niʼniuu wéñuʼ nandii. Mú nákha xóó tsikháñuu niʼthúu̱n ru̱dúʼ: “Rígi̱ nindxu̱u̱ rí gajkhun. Arasngúún e̱ji̱n”.

SIBERIA: MBÁ NUXI̱ʼ TERRITORIO MU MUTARÁʼAXU

Gu̱nʼ abril tsiguʼ 1951, Xa̱bu̱ Ñajunʼ nigi̱ʼdi̱i̱ nixuʼmiin náa Siberia mbaʼin xa̱bi̱i̱ Jeobá bi̱ kuwa xígií náa najnguáan A̱jkha̱ʼ náa Unión Soviética. Ru̱dúʼ, giʼtioʼ bi̱ chíʼgíʼ ga̱jma̱a̱ ikhúúnʼ nigún kudáanʼ náa región occidental ndrígóo Ucrania. Nda̱wa̱á rí ni̱jkuáxu itháan rí 6,000 kilómetros ga̱jma̱a̱ tren, ni̱jkuánúxu náa xuajen Tulun, náa Siberia. A̱jma̱ xmáná nda̱wa̱á, ndxájuʼ bi̱ giʼnii, Bogdan, ni̱jkha̱nú náa kuwa xa̱bu̱ bi̱ nuxudiinʼ náa guʼwá e̱jua̱nʼ mijngii xuajen Angarsk. Nitháán rí maxtáa mbá skíñúʼ witsu tsiguʼ náa mañajunʼ gakhi̱i̱ wéñuʼ.

Ru̱dúʼ, giʼtioʼ Grigory ga̱jma̱a̱ ikhúúnʼ nutaráʼaxu náa kuwa xa̱bu̱, ga̱jma̱a̱ ndayóoʼ mbu̱ya̱a̱xu rí mutha. Mbá xkri̱da, nuraxu̱u̱n xa̱bu̱: “Lá natayáá tsáa egujua̱a̱ mbáa xede̱ rá.” Á mu nuxkamaa mbáa bi̱ nandoo magujua̱a̱ mbáa, nutha̱a̱nxu dí ra̱ʼkhá tháán májánʼ ki̱ʼni̱i̱ xujkhúʼ bugi̱. Nda̱wa̱á nutha̱a̱nxu ga̱jma̱a̱ numuu bi̱ Niʼniáanʼ. Ikhú mbá periódico niʼthí rí xa̱bi̱i̱ Jeobá nuraxi̱ ga̱jma̱a̱ numún xede̱, mú ikháanʼ nduʼyáá rí nduʼñíinʼ mugu̱. Gajkhun rí nixkamin mbaʼin xa̱bu̱ guabiinʼ xóo mugu̱. Ra̱ʼkhá tháán niniguxu munigajmaa numuu Biblia gajmiúxu̱ xa̱bu̱ buʼko̱ bi̱ guabiinʼ ga̱jma̱a̱ májánʼ a̱jkiu̱ún. Rí xúgi̱, náa Tulun rígá mbá congregación ga̱jma̱a̱ kúwi̱i̱n itháan rí mbá ciento publicadores.

 XÚ KÁʼNII NININDXU̱U̱ TSÁʼKHÁ RÍ NIRAʼNUU A̱ʼGIU̱ʼ

A̱ʼgiu̱ʼ Maria, nininuʼ rí gajkhun náa Ucrania nákha nirígá Raga̱jma̱ Guerra náa xúgíʼ Numbaaʼ. Índo̱ ikhaa gíʼdoo 18 tsiguuʼ, mbáa oficial ndrígóo Xa̱bu̱ Ñajunʼ naʼthúu̱n má xúʼko̱ mu mabóoʼ ga̱jma̱a̱, mú María táʼndoo mbá kayuʼ. Mbóo mbiʼi, índo̱ nitanga̱a̱ náa goʼwóo, xa̱bu̱ bugi̱ kabóoʼ náa xiyao. Mú Maria nigájnuu ragáyúu. Oficial nikiʼnáa wéñuʼ ga̱jma̱a̱ niʼthúu̱n rí magida̱ʼ náa guʼwá e̱jua̱nʼ numuu rí nindxu̱u̱ xa̱bi̱i̱ Jeobá. Ga̱jma̱a̱ xúʼko̱ má nirígá; tsiguʼ 1952 nitháán rí maxtáa mbá gu̱wa̱ʼ tsiguʼ náa guʼwá e̱jua̱nʼ. Nikumu̱u̱ rí nigíʼnuu xóo José, rí nixudaʼ guʼwá e̱jua̱nʼ numuu rí niwi̱ji̱ jmbu náa Jeobá (Gén. 39:12, 20). Bi̱ ni̱jkha̱ kayáa Maria náa tribunal ndrígóo guʼwá e̱jua̱nʼ niʼthúu̱n: “Xámiñaʼ. Mbaʼin xa̱bu̱ bi̱ nikuwa náa guʼwá e̱jua̱nʼ na̱nguá nitígu̱u̱n gamajkhu”. Ajngáa rúʼko̱ nixnúu wéñuʼ tsiakii.

Tsiguʼ 1952 asndu 1956, Maria nixtáa rañajunʼ náa mbaaʼ dí rígá ñajunʼ gakhi̱i̱ dí gíʼ náa mijngii xuajen Gorki (rí xúgi̱ Nizni Nóvgorod), náa Rusia. Numuu rí nutsudaa marubu ixi̱ maski ajndu naʼni wéñuʼ miguwan, niʼniuu itháan nandii. Nákha tsiguʼ 1956 niriyaaʼ ga̱jma̱a̱ nixuʼmaa náa Tulun.

MITSÍNGUÁNʼ NÁA GOʼWÓOʼ

Mbáa ndxájulú niʼthúnʼ rí ma̱ʼkha̱nú mbáa ndxájulú a̱ʼgu̱ náa Tulún, ikha jngó ni̱jkhá gáraʼnuu ga̱jma̱a̱ bicicleta náa naguáʼnu autobús mu mambáyúu ga̱jma̱a̱ rí kagu̱. Ninigiu̱ʼ Maria asndu nákha ndi̱yo̱o̱. Maski ajndu niʼniuʼ mingíjyúuʼ rí ikhaa maʼndoo kaʼyoʼ, mú nda̱wa̱á ikhaa nindoo. Nidamíjnáxu nákha tsiguʼ 1957 ga̱jma̱a̱ mbá tsiguʼ nda̱wa̱á nigumaa a̱ʼdiúxu Irina. Ra̱ʼkhá tháán nidxuxu, mú rígi̱ tájyúuʼ wéñuʼ numuu rí tsiguʼ 1959 nirtuwún numuu rí nani imprimir i̱yi̱i̱ʼ rí nagájnuu náa Biblia. Nixtáá mbáwun mbá majun igu̱nʼ náa mbá guʼwá e̱jua̱nʼ. Mú maxtáá tsímáá má xúʼko̱, natajkáan nángi eʼni, nani ajmúú náa Jeobá ga̱jma̱a̱ nandxa̱ʼwa̱mínáʼ rí nda̱wa̱a̱ tsáa erikhoʼ náa xtáá rataráʼa.

Náa mbaaʼ náa niñajunʼ gakhi̱i̱ (1962)

Mbá miʼtsú nákha kuwa runiuʼ graxe̱, mbáa oficial niʼthúnʼ gakhi̱i̱: “¡Inuu má muxujmbírigi̱i̱n xúgínʼ xa̱bi̱i̱ Jeobá xóo tsijní!”. Ikhúúnʼ niriʼñuu: “Jesús niʼthí rí ajngáa rí májánʼ ndrígóo Reino miʼtáraʼa náa xúgíʼ xuajen, ga̱jma̱a̱ nimbáa xáʼngo̱o̱ garikhoo”. Nda̱wa̱á oficial bugi̱ ndiyáaʼ imbo̱o̱ xóo maʼthúnʼ ga̱jma̱a̱ nigíʼ maʼniuʼ rí maniʼñúʼ creencias ndrígóʼ, xó má nitha nákha ginii. Numuu rí táʼngo̱o̱ gúni rí maniʼñúʼ fe ndrígóʼ índo̱ ninimiñúʼ ga̱jma̱a̱ rí matangu̱ún náa goʼwóoʼ, nithu̱nʼ rí maxtáá mañajunʼ gakhi̱i̱ mbá juwan tsiguʼ náa mbaaʼ rí gíʼ mijngii náa Saransk. Nákha ejkhá náa kamba̱a̱ náa mbaaʼ rúʼko̱ nidxuun rí nigumaa imba̱a̱ a̱ʼdióʼ, Olga. Maski ajndu a̱ʼgiu̱ʼ gajmíi̱n e̱ji̱nʼ kuwa mitsínguánʼ wéñuʼ, nixnúʼ wéñuʼ tsiakii mba̱yo̱o̱ rí ikhúúnʼ ga̱jmu̱ʼ Maria kuwáanʼxu jmbu náa iduu Jeobá.

Maria gajmíi̱n e̱ji̱nʼ, Olga ga̱jma̱a̱ Irina (1965)

Maria na̱ʼkhá gáʼyooʼ mámbá tsiguʼ náa Saransk, maski ajndu rí ma̱ʼkha̱ ga̱jma̱a̱ maʼga̱a̱ naʼni mbá gu̱wa̱ʼ ijma̱ mbiʼi náa tren. Mámbá rí na̱ʼkha̱ nayéʼkha mbá edi̱i̱ botas nuxi̱ʼ ga̱jma̱a̱ awúu̱n rúʼko̱ erkaʼwu i̱yi̱i̱ʼ nuxi̱ʼ Bi̱ Nayejngoo. Narmáʼáan a̱jkiu̱nʼ wéñuʼ mbá miʼtsú rí Maria ni̱ʼkha̱ gáʼyooʼ gajmíi̱n nájmi̱i̱n waʼxioʼ. Xó má tatsaʼwáminaʼ, ra̱ʼkhá tháán nidxuuʼ índo̱ ndi̱ñu̱u̱n.

I̱MBA̱ NÍʼKHÁ GA̱JMA̱A̱ I̱ʼWÁʼ XKUJNDU

Nákha tsiguʼ 1966 nigájnaaʼ náa mbaaʼ náa niñajunʼ gakhi̱i̱, ga̱jma̱a̱ ni̱jkhá gáxtáá gajmíi̱nʼ bi̱ kuwa náa goʼwóoʼ náa xuajen Armavir, mijngii náa  mar Negro. Ikhí nigumiin e̱jñu̱xu Yaroslav ga̱jma̱a̱ Pavel.

Táʼni má mba̱yu̱ʼ, rí oficiales ndrígio̱o̱ Xa̱bu̱ Ñajunʼ nigi̱ʼdi̱i̱ ndiyááʼ náa guʼwúxu i̱yi̱i̱ʼ rí nagájnuu náa Biblia. Ndiyááʼ xúgíʼ, asndu náa rígá rí naʼphu̱ xede̱. Mbóo miʼtsú, oficiales naruñinʼ numuu rí naʼni mijkha wéñuʼ ga̱jma̱a̱ mbá yujndaʼ xúgíʼ xtíñún. Maria nigáwiinʼ a̱jkiu̱u̱n kaʼñún, numuu rí ndaʼyoo rí ikhiin i̱ndó nunimbu̱ún rí nuthúún muni. Ikha jngó nixnúún rí muwa̱a̱n ga̱jma̱a̱ ni̱ʼkha̱ kayóo mbá cepillo mu muni kaʼwi̱i̱ xtíñún, iyaʼ ga̱jma̱a̱ toallas. Nda̱wa̱á, índo̱ ni̱ʼkha̱nú bi̱ naʼtáñajúnʼ oficiales, ikhiin nitháán rí májánʼ wéñuʼ niniu̱u̱nxu. Índo̱ nigúun, bi̱ naʼtáñajúnʼ ninduʼwá ga̱jma̱á ni̱ndxu̱xu̱ʼ ga̱jma̱a̱ niʼtángauxu ga̱jma̱a̱ ñawúunʼ. Ra̱ʼkhá tháán nidxuxu índo̱ ndiya̱a̱xu dí erígá índo̱ nuʼni mbá tsiakii mu muʼni ‹gajmiúlú dí ra̱májánʼ índo̱ nuʼni rí májánʼ› (Rom. 12:21).

Tséʼniuu má dí nirígá, tuniʼñáʼxu rutaraʼa náa Armavir. Ma̱ngaa niyambááxu náa kuwa mbá nguáthi̱i̱n publicadores náa xuajen mijngii rí nagumbiʼyuu Kurgáninsk. Nadxuʼ mata rí xúgi̱ rígá mbá majun congregaciones náa xuajen Armavir ga̱jma̱a̱ a̱jkhu̱ náa xuajen Kurgáninsk.

Náa xúgíʼ tsiguʼ rígi̱, nguáná túnixu ñajuunʼ Jeobá xóo gíʼmaa. Nuxna̱a̱xu wéñuʼ núma̱aʼ rí Jeobá nijmiuu xa̱bi̱i̱ bi̱ jmbii mu muxnuxu xtágabu rí ndiyúxu ga̱jma̱a̱ mu muxnuxu tsiakii (Sal. 130:3). Ma̱ngaa niʼni gakhi̱i̱ munixu ñajuunʼ Jeobá índo̱ oficiales ndrígu̱ún Xa̱bu̱ Ñajunʼ nitu̱ʼu̱u̱n náa congregación. Nutaraʼa wéñuʼ ga̱jma̱a̱ nisngajma rí ninigu̱nʼ wéñuʼ rí gajkhun. Tikhun asndu nikhánun ñajunʼ kiejunʼ náa xuajñu Jeobá. Mú nda̱wa̱á ndiya̱a̱xu tsíin phú ñajúúnʼ.

Nákha tsiguʼ 1978, índo̱ Maria gíʼdoo 45 tsiguʼ, nigu ewáan imba̱a̱ ada̱. Numuu rí na̱nguá májánʼ ámiu̱u̱, doctores nikumu̱ún rí migamíi makhañúu ga̱jma̱a̱ nitháán rí maríguíi a̱ʼdiúxu. Ikhaa táʼndoo mbá kayuʼ. Ikha jngó tikhun doctores nigún ruxkháá náa xúgíʼ hospital ga̱jma̱a̱ mbá itsu̱ náa ga̱jnu̱ʼ mbá thana rí maʼni maríguíi a̱ʼdióo. Mu mañewu̱u̱n vida ndrígóo ada̱, Maria nigájnuu ragáyúu náa hospital.

Numuu rí oficiales nithuxu rí magajnúxu náa xuajen rúʼko̱, ni̱jkuáxu gakuwáanʼxu náa mbá xuajen rí gíʼ mijngii Tallin, náa Estonia, rí kaʼyoo Unión Soviética nákha ikhú. Maski ajndu doctores nithi i̱mba̱ núthu, ikhí María nigiʼdaa mbáa dxámá gújkuííʼ ga̱jma̱a̱ májánʼ, ada̱ bugi̱ nixnambíʼixu Vitaly.

Nda̱wa̱á nigájnuxu náa Estonia ga̱jma̱a̱ ni̱jkuá gakúwáanʼxu náa Nezlobnaia, xígií sur ndrígóo Rusia. Nutaráʼaxu tsumáá wéñuʼ náa xuajen rí tri̱ga̱ mijngii, náa naguwáʼ xa̱bu̱ bi̱ kuwa i̱mba̱ níʼkhá numuu rí naʼniún nandii. Xa̱bu̱ bi̱ naguwáʼ náa i̱ʼwáʼ xuajen mba̱ʼu̱ nagún ikhí mu maguma thanún, mú tikhun índo̱ nagúun naguáʼthi̱i̱n makuwá kámuu mbiʼi.

NUSNGÚÚN E̱JÑU̱XU MAʼNDÚN KUYÁÁ JEOBÁ

Ninixu mbá tsiakii mu mumbáñuun e̱jñu̱xu maʼndún kuyáá Jeobá ga̱jma̱a̱ maʼndún muni ñajuunʼ. Nuthu̱u̱nxu maguwáʼ náa guʼwúxu a̱ngiu̱lú bi̱ nugíʼ májánʼ xkri̱da náa e̱ji̱n. Mbáa bi̱ na̱ʼkha̱ raʼyuxu má xúʼko̱ ninindxu̱u̱ giʼtioʼ Grigory, ikhaa ninindxu̱u̱ superintendente viajante tsiguʼ 1970 asndu tsiguʼ 1995. Xúgiáanʼ naniguxu wéñuʼ índo̱ na̱ʼkha̱ numuu rí mixnduʼwáa wéñuʼ ga̱jma̱a̱ naʼni wéñuʼ ajngá mbi̱ji̱. Índo̱ naguwáʼ gúyuxu a̱ngiu̱lú nuni tikhuu gitsíin ga̱jma̱a̱ rí na̱ʼkha̱ náa Biblia, ga̱jma̱a̱ rúʼko̱ niguguambáá mu e̱jñu̱xu manigu̱nʼ wéñuʼ historias rí na̱ʼkha̱ náa Biblia.

E̱ji̱nʼ gajmiún guʼñún.

Nagi̱ʼdu̱u̱ náa ñawun xti̱ya̱ʼ, fila kidíiʼ: Yaroslav, Pavel (bi̱ nindxu̱u̱ a̱ʼdióo) ga̱jma̱a̱ Vitaly

Fila ginii: Alyona, Raya ga̱jma̱a̱ Svetlana

 Nákha tsiguʼ 1987 a̱ʼdiúxu Yaroslav ni̱jkha̱ náa xuajen Riga, náa Letonia, náa ma̱ndoo maʼtáraʼa májánʼ. Mú numuu rí tándoo gánindxu̱u̱ soldado, nitháán rí maxtáa mbá tsiguʼ tikhu náa guʼwá e̱jua̱nʼ. Nixtáa náa míjna gu̱wa̱ʼ guʼwá e̱jua̱nʼ. Rí ni̱thu̱u̱n xú káʼnii nixtáá ikhúúnʼ náa guʼwá e̱jua̱nʼ nimbáyúu wéñuʼ mu maʼngo̱o̱ ikhí. Nda̱wa̱á nigíʼdu̱u̱ ninindxu̱u̱ precursor. Nákha tsiguʼ 1990, índo̱ Pavel gíʼdoo 19 tsiguuʼ, nindoo mani̱ndxu̱u̱ precursor náa Sajalín, mbá mbaaʼ rí gíwanʼ náa tapo̱o̱ iyaʼ xígií norte ndrígóo Japón. Índo̱ nidxáwinxu tániguxu. I̱ndó kúwi̱i̱n mbá 20 publicadores náa xúgíʼ isla ga̱jma̱a̱ ikháanʼ kúwáanʼxu mbá 9,000 kilómetros rí mitsínguánʼ. Mú, nda̱wa̱á niniʼñáʼxu maʼga̱. Ga̱jma̱a̱ májánʼ ninindxu̱u̱ rígi̱. Xa̱bu̱ ninigu̱nʼ mudxawíín ajngóo ndrígóo Reino. Táʼni má mba̱yu̱ʼ tsiguʼ índo̱ nirígá mbá migiñuʼ congregación. Pavel niʼtáraʼa náa Sajalín asndu tsiguʼ 1995. Tsiguʼ rúʼko̱, indió a̱ʼdiúxu Vitaly, a̱ʼdiúxu bi̱ itháan chíʼgíʼ, xtáa gajmiúxu. Asndu nákha chíʼgíʼ naniguʼ maguxnuu wéñuʼ Biblia. Índo̱ nigiʼdoo 14 tsiguuʼ nigíʼdu̱u̱ ninindxu̱u̱ precursor ga̱jma̱a̱ mangúún ninindxu̱ʼ precursor mbá a̱jma̱ tsiguʼ. Ra̱ʼkhá tháán mitsaan ninindxu̱u̱ tsiguʼ rúʼko̱. Índo̱ nigiʼdoo 19 tsiguuʼ, Vitaly nigájnuu mu mani̱ndxu̱u̱ precursor especial.

Nákha tsiguʼ 1952 mbáa oficial niʼthúu̱n Maria: “Atatsíñaʼ fe ndrígáʼ o maradaʼ mbá gu̱wa̱ʼ tsiguʼ náa guʼwá e̱jua̱nʼ. Índo̱ gagajnáʼ, maʼni nikhi̱i̱n ga̱jma̱a̱ maraxtaa mbáwiin”. Mú raʼkháa xúʼko̱ nirígá. Ikhúúnʼ ga̱jmu̱ʼ ikhaa nikumuxuʼ xú káʼnii Jeobá Dios ndrígúxu̱ nandoo kaʼyuxu, mangiin e̱jñu̱xu ga̱jma̱a̱ mangiin xúgínʼ bi̱ nisngúúnxu rí gajkhun. Ma̱ngaa ra̱ʼkhá tháán mitsaan ninindxu̱u̱ rí muʼguá náa nikuwa e̱jñu̱xu numuu rí ikhí ndiya̱a̱xu xú káʼnii a̱ngiu̱lú nuxna̱a̱ wéñuʼ núma̱aʼ numuu rí nimbañún muniʼnuʼ rí gajkhun.

NUXNA̱A̱XU WÉÑUʼ NÚMA̱Aʼ NUMUU RÍ MÁJÁNʼ WÉÑUʼ A̱JKIU̱U̱N JEOBÁ

Nákha tsiguʼ 1991 nijmaʼnuʼ ñajunʼ ndrígu̱ún xa̱bi̱i̱ Jeobá. Rúʼko̱ niguguambáá mu miʼtáraʼa itháan. Congregación niʼtsi mbá autobús mu muʼguáxu gutaráʼa índo̱ naguámbáa xmáná náa xuajen ga̱jma̱a̱ xuajen rí tri̱ga̱ mbájndi.

Ga̱jmu̱ʼ a̱ʼgiu̱ʼ nákha tsiguʼ 2011

Nadxuʼ wéñuʼ rí Yaroslav ga̱jma̱a̱ a̱ʼgiu̱u̱, Alyona, xóo Pavel ga̱jma̱a̱ a̱ʼgiu̱u̱, Raya, muñajunʼ náa Betel. Ma̱ngaa, Vitaly a̱ʼgiu̱u̱, Svetlana, nuni ñajunʼ circuito. Irina xtáa náa Alemania, ga̱jma̱a̱ ajmbio̱o̱, Vladimir, mangiin ajtsíin e̱ji̱i̱n kuya̱ edxu̱u̱ náa congregación. Olga xtáa náa Estonia ga̱jma̱a̱ naʼtároʼoʼ má xúʼko̱. Ra̱ʼkhá tháán migíná rí a̱ʼgiu̱ʼ Maria nikháñu nákha tsiguʼ 2014. Ra̱ʼkhá tháán eyoʼ mba̱yo̱o̱ mbu̱júu̱ índo̱ gagabi̱i̱. Rí xúgi̱ xtáá náa Bielgorod, ga̱jma̱a̱ a̱ngiu̱lú náa congregación numbayúʼ wéñuʼ.

Náa xúgíʼ tsiguʼ rígi̱ nijmañuʼ rí gakhi̱i̱ mañajún jmbu náa Dios, mú tsímáá rí Dios naxnáʼ, nindxu̱u̱ mbá tesoro rí gíʼdoo wéñuʼ numuu. Numuu rí niʼnguxú náa xúgíʼ tsáʼkhá, niguma tsajkurámáánʼ itháan ki xóo rí nindxa̱ʼwa̱míjna̱xu. Nákha xóó tsijpátrígú Unión Soviética tsiguʼ 1991, nikuwa itháan rí 40,000 publicadores. Rí xúgi̱, náa xuajen rí nákha ikhú kaʼyoo Unión Soviética, kúwi̱i̱n itháan rí 400,000 publicadores. Rí xúgi̱ gúʼdoo mbá 83 tsiguuʼ ga̱jma̱a̱ xóó ka̱ya̱ edxu̱u̱ náa congregación. Jeobá naxnúʼ ikhúúnʼ tsiakii rí ndayóoʼ mu maʼngo̱ʼ. Nda̱yo̱o̱ rí Jeobá naxnúʼ rí májánʼ (Sal. 13:5, 6).