Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Junio tsiguʼ 2016

Xúniʼñáʼ rí aʼkhún eʼwíínʼ mani majngrádáanʼ

Xúniʼñáʼ rí aʼkhún eʼwíínʼ mani majngrádáanʼ

“Guni mba̱a̱ a̱jkia̱la kuyamíjna̱ má xúʼko̱” (COLOSENSES 3:13).

AJMÚÚ 121 GA̱JMA̱A̱ 75

1, 2. Ndiéjunʼ niʼtáriyaʼ Jeobá ga̱jma̱a̱ rí xú káʼnii gája̱a̱ xuajñu rá.

RÍ MBIʼI xúgi̱ kuwa mbá nguéjmi̱i̱n xa̱bu̱ bi̱ nandún kuyáá Dios ga̱jma̱a̱ nandún muni ñajunʼ. Najmaʼnunʼ xóo xa̱bi̱i̱ Jeobá. Gajkhun má rí nuxudami̱jna̱ aʼkhá, mú Jeobá naxnún ikha ga̱jma̱a̱ naʼni tsajkurámiinʼ ga̱jma̱a̱ xi̱ʼ ndrígóo. Guʼyáá xú káʼnii eʼni.

2 Nákha 1914, káaʼ mbá nguáthi̱i̱n xa̱bu̱ nduyamajkuíí Jeobá. Numuu rí ikhaa naʼni tsajkurámuʼ náa nutaraʼa, mbaʼin wéñuʼ xa̱bu̱ nuniʼnuʼ rí gajkhun rí naʼsngáa Biblia ga̱jma̱a̱ nanindxuún xa̱bi̱i̱ Jeobá. Dios niʼtáriyaʼ rí xuajñu maʼga̱ rajoo, niʼthí: “Bi̱ lájuíin maʼga̱nú mani̱ndxu̱u̱ mil, ga̱jma̱a̱ bi̱ chíʼgíʼ mbá xuajin bi̱ gíʼdoo tsiakii. Ikhúúnʼ minuunʼ, Jeobá, mani rí mba̱jo̱o̱ mbiʼi rí kaʼyoo” (Is. 60:22). Ikháanʼ nduʼyáá rí xtáa rambánuu rí mbiʼi xúgi̱ dí kiʼtáriyaʼ rígi̱. Xuajñu Dios nindxu̱u̱ xóo mbá xuajen mba̱a̱ wéñuʼ náa kuwa itháan rí migiñuʼ millón xa̱bi̱i̱. Ikha jngó kuaʼdiin itháan xa̱bu̱ ki xóo mbaʼa xuajen mba̱ʼu̱ náa numbaaʼ.

3. Xú káʼnii esngajma rí nandún kuyamijná xa̱bi̱i̱ Dios rá.

 3 Náa iwáá mbiʼi rígi̱, Jeobá nambáñun xa̱bi̱i̱ mu maʼndún kuyamijná itháan. “Dios nandoo kaʼñúún xúgínʼ” ga̱jma̱a̱ nandoo rí xa̱bi̱i̱ mbuyaridáá (1 Juan 4:8). Jesús nindoo rí xa̱bi̱i̱ maʼndún kuyamijná. Ma̱ngaa niʼthún: “Xúʼko̱ xúgínʼ gúyáá dí ikháanʼla nindxa̱laʼ xa̱bi̱ʼ, á mu nandala kuyamíjna̱” (Juan 13:34, 35). Rí mbiʼi xúgi̱, xuajñu Jeobá nusngajmaa rí nandún kuyamijná asndu índo̱ narígá guerras. Mbá xkri̱da, nákha nirígá Raga̱jma̱ Guerra náa xúgíʼ Numbaaʼ nikháñun mbá 55 millones xa̱bu̱. Mú xa̱bi̱i̱ Jeobá túxiyáa nimbáa náa guerra rúʼko̱ (atraxnuu Miqueas 4:1, 3). * Rígi̱ nambáñun mu maxaguáʼdáá aʼkhún ga̱jma̱a̱ numuu ‹eʼdiún xa̱bu̱›” (Hech. 20:26).

4. Náa numuu rí nuʼthá rí na̱jkha̱ rajoo itháan xuajñu Dios rá.

4 Rí mbiʼi xúgi̱, xuajñu Dios na̱jkha̱ rajoo itháan maski ajndu xtáa mbáa xa̱bu̱ sia̱nʼ bi̱ gíʼdoo wéñuʼ tsiakii. Ikhaa nindxu̱u̱ Satanás, “dios ndrígóo numbaaʼ rígi̱” (2 Cor. 4:4). Satanás kaguajtun xúgíʼ organización políticas ndrígóo numbaaʼ rígi̱ ga̱jma̱a̱ náa nuxna noticia, ma̱ngaa najmuu rígi̱ mu matsi̱ji̱ rí nuʼtáraʼalu. Mú ikhaa xándoo matsi̱ji̱ ñajunʼ rígi̱. Ndaʼyoo “rí na̱jkha̱ ratumuu mbiʼi”, ikha jngó naʼni rí muniʼñáaʼ ru̱ʼni̱ ñajunʼ Jeobá (Rev. 12:12).

LÁ MAGUAJÚN JMBU ÍNDO̱ EʼWÍÍNʼ GAKIÉʼKHUN RÁʼ.

5. Náa numuu rí eʼwíínʼ nguáná nuni gawúnlú rá. (Atayáá timbá xtiʼkhu.)

5 Xa̱bi̱i̱ Dios nduʼyáá rí gíʼdoo wéñuʼ maʼndulú kuʼyáá ikhaa ga̱jma̱a̱ eʼwíínʼ xa̱bu̱. Jesús niʼthí: “‹Gíʼmaa maʼnda̱ʼ xtayáá Jeobá Dios ndrígia̱ʼ ga̱jma̱a̱ xúgíʼ a̱jkia̱nʼ, ga̱jma̱a̱ xúgíʼ nímia̱nʼ ga̱jma̱a̱ xúgíʼ ku̱ma̱ ndrígáʼ›. Rígi̱ nindxu̱u̱ rí itháan mba̱a̱ ga̱jma̱a̱ timbá kiʼtáñajunʼ. Raga̱jma̱, ikhaa má kayúʼ xóo rígi̱: ‹Gíʼmaa maʼnda̱ʼ xtayáá xa̱bu̱ numbaaʼ ga̱jma̱ʼ xó má eyaʼ xtayaminaʼ ikháánʼ›” (Mat. 22:35-39). Mú náa Biblia naʼthúlúʼ rí xúgiáanʼ nagumáanʼ ga̱jma̱a̱ aʼkhá numuu rí Adán nikiéʼkúun (atraxnuu Romanos 5:12, 19). * Ikha jngó, mbáa maxtáa mbáa ndxájulú náa congregación bi̱ maʼni o maʼthí mbá rí maʼni gawúnlú. Ndiéjunʼ guʼni rá. Lá maʼndulú kuʼyáá má xúʼko̱ Jeobá ráʼ. Lá maguajún jmbu náa ikhaa ga̱jma̱a̱ náa xuajñu xáʼ. (Atayáá kúgumaʼá “Ndiéjunʼ eyoo gáʼthúu̱n”.) Náa Biblia naʼthí ga̱jma̱a̱ numuu tikhun xa̱bi̱i̱ Dios bi̱ nithi o nini gawúunʼ eʼwíínʼ. Guʼyáá ndiéjunʼ gándoo gajmañulú rí nigíʼniin ikhiin.

Xú káʼnii ni̱ʼni̱ á mu nikuwáanʼ náa Israel mbiʼi rí nixtáa Elí gajmíi̱n e̱ji̱i̱n rá. (Atayáá kutriga̱ 6.)

6. Ndiéjunʼ rí nikiéʼkúun Elí rá.

6 Gundxaʼwamíjna̱ ga̱jma̱a̱ numuu Elí. Ikhaa kayá edxu̱u̱ náa ndxajkun náa xuajen Israel, ga̱jma̱a̱ a̱jmi̱i̱n e̱ji̱i̱n tsénimbu̱ún xtángoo ndrígóo Jeobá. Náa Biblia naʼthí rí e̱ji̱i̱n Elí ninindxu̱ún ra̱míjínʼ  ga̱jma̱a̱ túyamajkuíí Jeobá (1 Sam. 2:12). Elí ndiʼyoo rí e̱ji̱i̱n kuwa runi dí ra̱májánʼ wéñuʼ. Mú ikhaa nikiéʼkhun numuu rí taxpriguun xó má gíʼmaa. Nda̱wa̱á Jeobá nixnúu castigo Elí ga̱jma̱a̱ nájmi̱i̱n e̱ji̱i̱n. Ma̱ngaa tániñúnʼ rí e̱ji̱i̱n Elí mani̱ndxu̱ún bi̱ mbu̱ya̱ edxu̱u̱ náa ndxajkun (1 Sam. 3:10-14). Gundxaʼwamíjna̱ rí kuwaanʼ ikhú ga̱jma̱a̱ nduʼyáá rí Elí naniñúnʼ e̱ji̱i̱n muni dí ra̱májánʼ wéñuʼ. Ndiéjunʼ gúʼni rá. Lá muniʼñáʼ rí fe rí kuaʼdáá náa Jeobá makágua̱ba̱ʼ ga̱jma̱a̱ muniʼñáaʼ xáʼ.

7. a) Xú kaʼnii ninindxu̱u̱ aʼkhá rí nikudaminaʼ David rá. b) Ndiéjunʼ niʼni Dios ga̱jma̱a̱ numuu rí niʼni David rá.

7 Rí xúgi̱ guʼthá ga̱jma̱a̱ numuu rey David. Ikhaa ninindxu̱u̱ májáánʼ xa̱bu̱, ikha jngó Jeobá nindoo kaʼyoo wéñuʼ (1 Sam. 13:13, 14; Hech. 13:22). Mú asndu David nikudaminaʼ aʼkhá mba̱a̱. Mbá xkri̱da, mbá mbiʼi nibóo̱ʼ ga̱jma̱a̱ a̱ʼgiu̱u̱ soldado ndrígóo, bi̱ nigumbiʼyuu Urías ga̱jma̱a̱ ikhaa xtáa náa mbá guerra. A̱ʼgu̱ nigui̱i̱ ada̱. Numuu rí David táʼndoo mbuyáá eʼwíínʼ rí ikhaa niʼni, nikuʼma muthán Urías rí maʼga̱a̱ náa goʼwóo. David nindoo rí ikhaa mabóoʼ ga̱jma̱a̱ a̱ʼgiu̱u̱. Xúʼko̱ xa̱bu̱ makumún rí nindxu̱u̱ a̱ʼdióo Urías. Mú Urías táʼndoo gáʼga̱a̱ náa goʼwóo. Ikha jngó David niríyaʼ awan mu makhañúu náa i̱mba̱ guerra. David gajmíi̱n bi̱ kuwa náa goʼwóo niminiinʼ wéñuʼ ga̱jma̱a̱ numuu aʼkhá ndrígóo David (2 Sam. 12:9-12). Mú Jeobá nigáwiinʼ a̱jkiu̱u̱n kaʼyoʼ David ga̱jma̱a̱ niʼni mba̱a̱ a̱jkiu̱u̱n. Ikhaa ndaʼyoo rí David nindoo maʼni rí májánʼ (1 Rey. 9:4). Á mu nikuwáanʼ mbiʼi rúʼko̱, xú káʼnii gakumulú ga̱jma̱a̱ rí niʼni David rá. Lá muniʼñáaʼ runi ñajunʼ Jeobá rá.

8. a) Ndiéjunʼ rí taʼnimbánuu Pedro rá. b) Náa numuu rí Jeobá xóó nijmiuu Pedro maski ajndu ikhaa nikiéʼkúun xá.

 8 I̱mba̱ xkri̱da rí na̱ʼkha̱ náa Biblia nindxu̱u̱ apóstol Pedro. Jesús ndiyáaʼ mu mani̱ndxu̱u̱ mbáa apóstol ndrígóo. Maski asndu xúʼko̱, nguáná Pedro niʼthí o niʼni rí tánindxu̱u̱ májánʼ. Mbá xkri̱da, mbá miʼtsú nixná ajngóo rí xániñuʼ nditháan Jesús, maski ajndu eʼwíínʼ muniñaʼ (Mar. 14:27-31, 50). Mú nda̱wa̱á rí ni̱jkuáa, xúgínʼ apóstoles niniñaaʼ, asndu Pedro. Ga̱jma̱a̱ ajtsú nuthu Pedro niʼthí rí tsíniniiʼ Jesús (Mar. 14:53, 54, 66-72). Mú Pedro nixtáa gíná wéñuʼ ga̱jma̱a̱ rí niʼni. Ikha jngó Jeobá niʼni mba̱a̱ a̱jkiu̱u̱n kaʼyoo ga̱jma̱a̱ nixnúu má xúʼko̱ ñajunʼ. Á mu ikháanʼ nini̱ndxu̱lú xa̱bi̱i̱ nákha ikhú ga̱jma̱a̱ niʼdxawíín rí niʼni Pedro, lá xóó makumulúʼ kuʼyáá Jeobá ráʼ.

Gíʼmaa makumulú kuyáá Jeobá rí ikhaa mani rí májánʼ ga̱jma̱a̱ rí jmbu

9. Náa numuu rí ikháánʼ naku̱ma̱ʼ rí Dios naʼni má xúʼko̱ rí jmbu rá.

9 Ndiéjunʼ ejmañulú náa xkri̱da rígi̱ rá. Rí tikhun xa̱bi̱i̱ Jeobá nini dí ra̱májánʼ ga̱jma̱a̱ nini gawúunʼ wéñuʼ eʼwíínʼ. Á mu narígá rígi̱, ndiéjunʼ gúʼni rá. Lá muniʼñáʼ rajkua náa nagimbáanʼ ga̱jma̱a̱ muniʼñáaʼ Jeobá ga̱jma̱a̱ xuajñu ráʼ. O marmáʼáan a̱jkiu̱lú rí Jeobá májánʼ a̱jkiu̱u̱n ga̱jma̱a̱ naxnúu mbiʼi xa̱bu̱ mu mata̱nga̱a̱. Mú, á mu xa̱bu̱ tsétanga̱a̱ a̱jkiu̱u̱n náa aʼkhá mba̱a̱ rí nikudaminaʼ rá. Lá nakumulú rí Jeobá xtáa raʼyoo xúgíʼ ga̱jma̱a̱ rí ikhaa maʼnimbánuu índo̱ gáʼyóoʼ ráʼ. Ikhaa ma̱ndoo maxkriyaaʼ mbáa xa̱bu̱ náa congregación á mu ndayóoʼ. Mú gíʼmaa makumulú kuyáá Jeobá rí ikhaa maʼni rí májánʼ ga̱jma̱a̱ rí jmbu.

GANINDXULÚ JMBII MÁ XÚʼKO̱

10. Ndiéjunʼ nikro̱ʼo̱o̱ Jesús ga̱jma̱a̱ rí nikiéʼkúun Judas Iscariote ga̱jma̱a̱ Pedro rá.

10 Náa Biblia naʼthí ga̱jma̱a̱ numún mbaʼin xa̱bi̱i̱ Dios bi̱ niguájun jmbu náa ikhaa ga̱jma̱a̱ náa xuajñu maski ajndu eʼwíínʼ nixudami̱jna̱ aʼkhá rí itháan mba̱a̱. Xkri̱da rí itháan májánʼ ninindxu̱u̱ Jesús. Índo̱ nacho̱o̱ maraʼwíin gu̱wa̱ʼ e̱jmi̱i̱n apóstoles ndrígóo, kañiʼ mbruʼun nindo̱ʼo̱o̱ Anu̱u̱ mambáyúu. Mú nda̱wa̱á Judas Iscariote bi̱ ninindxu̱u̱ mbáa apóstol nigujua̱a̱. Ma̱ngaa, apóstol Pedro niʼthí rí tániniiʼ Jesús (Luc. 6:12-16; 22:2-6, 31, 32). Jesús nikro̱ʼo̱o̱ rí Jeobá ga̱jma̱a̱ eʼwíínʼ discípulos na̱nguá niguáʼdáá aʼkhún rí niʼni Judas Iscariote ga̱jma̱a̱ Pedro. Ikha jngó Jesús nixtáa mijngii náa Anu̱u̱ ga̱jma̱a̱ tániñuʼ raʼni ñajuunʼ. Ikha jngó Jeobá niʼni tsajkurámááʼ índo̱ niʼniga̱bi̱i̱ ga̱jma̱a̱ nda̱wa̱á nigíiʼ xóo Rey náa mekhuíí (Mat. 28:7, 18-20).

11. Ndiéjunʼ niʼtáriyaʼ náa Biblia ga̱jma̱a̱ numún xa̱bi̱i̱ Dios bi̱ kuwa xúgi̱ rá.

11 Xkri̱da ndrígóo Jesús naʼsngúlúʼ manindxu̱lúʼ jmbii náa Jeobá ga̱jma̱a̱ náa xuajñu. Ga̱jma̱a̱ rígá mbaʼa numuu mu muʼni xúʼko̱ káʼnii. Nandoo nduʼyáá rí Jeobá xtáa raxnúlú ikhaa náa iwáá mbiʼi rígi̱. Nambáyulúʼ muʼtáraʼa náa xúgíʼ numbaaʼ. Mú i̱ndó ikháanʼ kuwaanʼ ru̱ʼni̱ rígi̱. Ma̱ngaa kuwaanʼ jnduʼ ga̱jma̱a̱ gagi numuu rí Dios naʼsngúlúʼ xúgíʼ rígi̱. Náa Biblia  niʼtáriyaʼ rí xa̱bi̱i̱ makuwa gagi (Is. 65:14).

Xánindxu̱u̱ májánʼ muniʼñáʼ Jeobá o xuajñu numuu rí mbáa nikiéʼkúun

12. Xú káʼnii gíʼmaa mbuʼyáá índo̱ eʼwíínʼ gakiéʼkhun rá.

12 Kuwaanʼ gagi numuu rí Jeobá naxnúlú ikha ga̱jma̱a̱ nambáyulúʼ muʼni mbaʼa rí májánʼ. Xa̱bu̱ bi̱ kuwa náa numbaaʼ ndrígóo Satanás na̱nguá kuwa gagi ga̱jma̱a̱ na̱nguá guáʼthi̱i̱n marigá mbá rí májánʼ nda̱wa̱á. Ikha jngó índo̱ eʼwíínʼ gakiéʼkhun náa congregación, gundxaʼwamíjna̱ xú káʼnii gíʼmaa mbuʼñún ga̱jma̱a̱ xú káʼnii gúʼni. Xúʼyáá xóo mbá numuu mu muniʼñáʼ Jeobá ga̱jma̱a̱ xuajñu. Rúʼko̱ xánindxu̱u̱ májánʼ. Rí itháan májánʼ rí manindxu̱lúʼ jmbii náa Jeobá ga̱jma̱a̱ guʼnimbánii ikhaa ndrígóo. Guʼyáá xú káʼnii gándoo gúʼni.

XÚ KÁʼNII GÍʼMAA MUʼNI RÁ.

13, 14. a) Náa numuu rí gíʼmaa maʼngo̱o̱ a̱jkiu̱lú kuʼyamijná rá. b) Ndiéjunʼ rí nandulúʼ marmáʼáan a̱jkiu̱lú rá.

13 Ndiéjunʼ gíʼmaa muʼni á mu mbáa ndxájulú naʼthí o naʼni mbá rí naʼni gawúnlú rá. Náa Biblia naʼthí dí ragíʼmaa magawúnlu mbá nacha̱ (Ecl. 7:9). Xúgiáanʼ ni̱ndxu̱lú xa̱bu̱ aʼkhá ga̱jma̱a̱ nakiéʼkulu. Ikha jngó gíʼmaa maʼngo̱o̱ a̱jkiu̱lú ga̱jma̱a̱ garmáʼáan a̱jkiu̱lú rí a̱ngiu̱lú nguáná muthi o muni mbá rí nindxu̱u̱ ra̱májánʼ. Ma̱ngaa, na̱nguá nindxu̱u̱ májánʼ rí mundxaʼwamíjna̱ náa rí nikiéʼkhun eʼwíínʼ, numuu rí ma̱ndoo muniʼñáʼ ru̱ʼni̱ ñajunʼ Jeobá ga̱jma̱a̱ gagi. Ga̱jma̱a̱ rí itháan ra̱májánʼ rí fe ndrígúlú ma̱ndoo maguabaaʼ ma̱ngaa asndu ma̱ndoo muniʼñáʼ xuajñu Jeobá. Xúʼko̱ xándoo muʼni ñajunʼ Jeobá ni má xándoo muguaʼthi̱i̱n makuwaanʼ náa numbaaʼ nuxi̱ʼ.

14 Ndiéjunʼ gambáyulú muʼni ñajunʼ Jeobá ga̱jma̱a̱ gagi índo̱ eʼwíínʼ nuni gawúnlú rá. Rí marmáʼáan a̱jkiu̱lú ajngáa ndrígóo Jeobá rí naxná tsiakii: “Mani mbá nuxi̱ʼ mekhu ga̱jma̱a̱ mbá ku̱ba̱ʼ nuxi̱ʼ; ga̱jma̱a̱ nimbáa ní xarmáʼáan a̱jkiu̱u̱n dí nirígá nákha ikhú” (Is. 65:17; 2 Ped. 3:13). Jeobá maxnúlúʼ xúgíʼ rígi̱ á mu naguajún jmbu má xúʼko̱ náa ikhaa.

15. Ndiéjunʼ niʼthí Jesús rí gíʼmaa muʼni índo̱ eʼwíínʼ nakiéʼkhun rá.

15 Gajkhun má rí xóó na̱nguá kuwáanʼ náa numbaaʼ nuxi̱ʼ. Ikha jngó, á mu mbáa naʼni gawúnlú, gundxaʼwamíjna̱ rí nandoo Jeobá muʼnilú. Mbá xkri̱da, Jesús niʼthí: “Numu ri xi nuni mba akianʼla-juñula xabo tsi nuñaʼla ri ramajan, maʼne mba akuin Anaʼla tsi xta mikui-jaʼyaʼla manganʼla. Indo xi tsini mba akianʼla-juñula xabo tsi nuñaʼla ri ramajan, ni-ma Anaʼla maxaʼne mba akuin-jaʼyaʼla manganʼla gajma numu ri ramajan inila”. Ga̱jma̱a̱ índo̱ apóstol Pedro niraxu̱u̱ Jesús á mu káaʼ “juwan nuthu” gíʼmaa muʼni mba̱a̱ a̱jkiu̱ún kuñún, Jesús niriʼñuu: “Rí asndu ajtsú skíñúʼ gu̱wa̱ʼ ijuwan nuthu”. Jesús niʼsngúlúʼ rí gíʼmaa muʼni mba̱a̱ a̱jkiu̱lú kuʼñúún má xúʼko̱ eʼwíínʼ (Mat. 6:14, 15; 18:21, 22).

16. Xú káʼnii májánʼ xkri̱da nigíʼ José rá.

16 Xkri̱da ndrígóo José naʼsngúlúʼ xú káʼnii gíʼmaa muriʼña índo̱ eʼwíínʼ nuni  gawúnlú. José ga̱jma̱a̱ giʼtio̱o̱, i̱ndó ikhiin ninindxu̱ún e̱ji̱i̱n Jacob bi̱ nigiʼdiin ga̱jma̱a̱ Raquel. Jacob nigiʼdiin imbá gu̱wi̱nʼ e̱ji̱i̱n mú itháan nindoo kaʼyoo José ki xóo eʼwíínʼ. Rígi̱ niʼni rí eʼwíínʼ a̱ngui̱i̱n José makiʼníin. Ra̱ʼkhá tháán niguiñunʼ kuyáá wéñuʼ rí asndu nigujua̱a̱ xóo esclavo. Bi̱ nitsi̱i̱ José nigún ku̱ya̱a̱ náa Egipto. Nda̱wa̱á rí ninújngoo mba̱yu̱ʼ tsiguʼ, rey bi̱ xtáa náa Egipto niʼni rí José mani̱ndxu̱u̱ bi̱ ragajmi̱i̱n xa̱bu̱ bi̱ itháan gíʼdoo tsiakii náa xúgíʼ xuajen. Rey niguanúu tsiánguá ga̱jma̱a̱ xúgíʼ rí májánʼ rí niʼni José. Niʼni tsiguʼ índo̱ a̱ngui̱i̱n José nigún gutsi ganitsu náa Egipto numuu rí náa xuajñún nándáa rí mu̱phu̱. Índo̱ ndiyáá José na̱nguá niniʼniiʼ. Mú ikhaa niniʼnuunʼ. Maski ajndu ikhiin nini gínáa mbanda̱ʼkho, ikhaa táʼni gíníi. Rí niʼni, nigíʼ tsáʼkhá inún mu mbaʼyoo á mu gajkhun niriʼkumijná. Índo̱ José ndiʼyoo rí niriʼkumijná, niʼthún rí ikhaa nindxu̱u̱ ndxájun. Tsiguʼ nda̱wa̱á, niʼni maʼni̱i̱ a̱jkiu̱ún ga̱jma̱a̱ niʼthún ‹rí xámiñuun numuu rí ikhaa maxnún má xúʼko̱ ganitsu ikhiin gajmiún e̱jñún› (Gén. 50:21).

17. Xú káʼnii gátani ikháánʼ índo̱ eʼwíínʼ gakiéʼkhun rá.

17 Garmáʼáan a̱jkiu̱lú rí xúgiáanʼ nakiéʼkulu, ikha jngó mangáanʼ nuʼni gawúunʼ eʼwíínʼ. Ikha jngó á mu nduʼyáá rí niʼni gawíínʼ mbáa, guʼnimbánii xtágabu ndrígóo Biblia. Gunda̱ʼa̱ rí muni mba̱a̱ a̱jkiu̱ún kuyulúʼ ga̱jma̱a̱ guʼgíiʼ gakuwáanʼ tsímáá (atraxnuu Mateo 5:23, 24). Lá ragájkhun rí nanigulúʼ índo̱ eʼwíínʼ nuni mba̱a̱ a̱jkiu̱ún kuyulúʼ ráʼ. Ikha jngó mangáanʼ gíʼmaa muʼni mba̱a̱ a̱jkiu̱lú kuʼñúún. Colosenses 3:13 naxnúlú xtágabu rígi̱: “Gaʼngo̱o̱ a̱jkia̱la kuyamíjna̱ ga̱jma̱a̱ guni mba̱a̱ a̱jkia̱la kuyamíjna̱ má xúʼko̱ á mu mbáa naxiéʼkhá ga̱jma̱a̱ numuu imba̱a̱. Xó má Jeobá niʼni mba̱a̱ a̱jkiu̱u̱n kaʼyalá má xúʼko̱, xúʼko̱ má gúni mangáanʼ”. Á mu gajkhun nandulúʼ kuʼñúún a̱ngiu̱lú, xákiʼnáanʼlú má xúʼko̱ ga̱jma̱a̱ numuu rí niniulú nákha ginii (1 Cor. 13:5). Ga̱jma̱a̱ á mu ikháanʼ nuʼni mba̱a̱ a̱jkiu̱lú kuʼñúún, Jeobá ma̱ngaa maʼni mba̱a̱ a̱jkiu̱u̱n kaʼyulú. Ikha jngó, gagaʼwíínʼ a̱jkiu̱lú kuʼñúún eʼwíínʼ, xó má Jeobá nagáwíínʼ a̱jkiu̱u̱n kaʼyulú (atraxnuu Salmo 103:12-14). *

^ párr. 3 Miqueas 4:1, 3: “Índo̱ gatumuu mbiʼi, kúbá rí nindxu̱u̱ goʼwóo Jeobá mawi̱ji̱ gujkhuʼ náa inuu kúbá, ga̱jma̱a̱ makujmaa náa xúgíʼ inuu kúbá; ga̱jma̱a̱ ikhí gagun xúgíʼ xuajin. Ga̱jma̱a̱ ikhaa maʼthún dí raʼkhí nini mbaʼa xuajin, ga̱jma̱a̱ maʼni rí ní xágiʼdu̱u̱n xuajin mba̱ʼu̱ bi̱ guáʼdáá wéñuʼ numún dí rígá mitsínguánʼ. Ga̱jma̱a̱ chídí ndrígu̱ún muni̱i̱la xóo arado ga̱jma̱a̱ lanzas ndrígu̱ún muni̱i̱la xóo ajua̱n rí narujtu iná. Nimbá xuajin ní xuradímijna ga̱jma̱a̱ chídí, asndu ní xagun náa guerra”.

^ párr. 5 Romanos 5:12, 19: “Ikha jngó, ga̱jma̱a̱ numuu mbáwíi xa̱bu̱ nito̱ʼo̱o̱ aʼkhá náa numbaaʼ. Ma̱ngaa rí nakháñulú nito̱ʼo̱o̱ ga̱jma̱a̱ numuu aʼkhá, rí nakháñulú nigadráʼa náa xúgínʼ xa̱bu̱ numuu rí xúgínʼ xa̱bu̱ nixuda̱mi̱jna̱ aʼkhá. Xó má rí táʼnimbo̱o̱ mbáa xa̱biya̱ mbaʼin ninindxu̱ún xa̱bu̱ aʼkhá, xúʼko̱ má ma̱ngaa, ga̱jma̱a̱ numuu rí mbáa xa̱bu̱ niʼnimbo̱o̱ mbaʼin mani̱ndxu̱ún jmbiin”.

^ párr. 17 Salmo 103:12-14: “Xó má mitsinguanʼ egajnuu ajkha̱ʼ asndu náa narmáʼáan, xúʼko̱ má mitsinguanʼ eniñuʼ aʼkhá ndrígúluʼ. Xó má mbáa xa̱bu̱ nagáwíínʼ a̱jkiu̱u̱n kaʼñún e̱ji̱i̱n, xúʼko̱ má Jeobá nagáwíínʼ a̱jkiu̱u̱n kaʼñún bi̱ nuni ñajunʼ. Numuu rí ikhaa ndaʼyoo rí xú káʼnii nindxulú ga̱jma̱a̱ ikhaa ndaʼyoo rí yujndaʼ ñajunlú”.