Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Junio tsiguʼ 2016

“Jeobá Dios ndrígúlú nindxu̱u̱ mbáwíi Jeobá”

“Jeobá Dios ndrígúlú nindxu̱u̱ mbáwíi Jeobá”

“Atadxawíín, oh Israel: Jeobá Dios ndrígúlú nindxu̱u̱ mbáwíi Jeobá” (DEUTERONOMIO 6:4).

AJMÚÚ 138 GA̱JMA̱A̱ 112

1, 2. a) Ndíjkha rí najmaʼnuuʼ wéñuʼ ajngáa dí na̱ʼkha̱ náa Deuteronomio 6:4 rá. b) Náa numuu rí Moisés niʼthí ajngáa rígi̱ rá.

BI̱ JUDÍOS guáʼdáá mbá rí nitajkháan rí gíʼdoo wéñuʼ numuu rí nagájnuu náa Deuteronomio 6:4. Rí nutajkháan rígi̱ nagumbiʼyuu shemá, numuu rí nindxu̱u̱ timbá ajngáa rí na̱ʼkha̱ náa versículo rígi̱ náa ajngáa hebreo. Asndu má nákha wajyúúʼ mbaʼin judíos nuthi ajngáa rígi̱ mámbá miʼcha̱ ga̱jma̱a̱ índo̱ námbá mbiʼi mu musngajma rí ikhiin i̱ndó nduyamajkuíí mbáa Dios.

2 Ajngáa rúʼko̱ niʼthí Moisés nákha tsiguʼ 1473 nákha xóó tséʼkha̱ Cristo índo̱ niʼthí mbá discurso mu maʼtángawúún israelitas. Ikhiin kuwa náa ku̱ba̱ʼ ndrígóo Moab, xawii mu makidiin mañu Jordán ga̱jma̱a̱ matu̱ʼu̱u̱n náa Ku̱ba̱ʼ rí Jeobá niʼthí maxnún (Deut. 6:1). Moisés nixnúún ikha mbá 40 tsiguʼ. Ga̱jma̱a̱ ajngóo nindoo maxnún tsiakii mu xámiñuun, makumún kuyáá Jeobá ga̱jma̱a̱ muguajún jmbu náa ikhaa. Náa numuu rá. Numuu rí ndaʼyoo rí muraʼníí mbaʼa xkujndu. Ikha jngó nda̱wa̱á rí niʼthún ga̱jma̱a̱ numuu Gu̱wa̱ʼ Xtángoo ndrígóo Jeobá ga̱jma̱a̱ i̱ʼwáʼ ikha,  Moisés niʼni marmáʼáan a̱jkiu̱ún ajngáa rí gíʼdoo wéñuʼ numuu dí na̱ʼkha̱ náa Deuteronomio 6:4, 5 (atraxnuu). *

3. Xú káʼnii graxe̱ gúriʼña̱a̱ náa artículo rígi̱ rá.

3 Bi̱ israelitas ndiyáá rí Dios Jeobá nindxu̱u̱ “mbáwíi Jeobá” ndrígu̱ún. Israelitas bi̱ niguájun jmbu ndiyamajkuíí mbáwíi Dios, bi̱ ndiyamajkuíí xiʼñúúnʼ. Mú, ndíjkha jngó rí Moisés niʼni marmáʼáan a̱jkiu̱ún bi̱ israelitas rí Jeobá nindxu̱u̱ “mbáwíi Jeobá” rá. Xú káʼnii embríguii rígi̱ ga̱jma̱a̱ rí maʼndulú kuʼyáá Dios ga̱jma̱a̱ xúgíʼ a̱jkiu̱lú, ga̱jma̱a̱ xúgíʼ nimiulu, ma̱ngaa xúgíʼ tsiakii ndrígúlú rá. Ga̱jma̱a̱ ndíjkha rí gíʼdoo numuu eʼyáá ikháanʼ rí mbiʼi xúgi̱ ajngáa rí naʼthí náa Deuteronomio 6:4, 5 rá.

DIOS NDRÍGÚLÚ NINDXU̱U̱ “MBÁWÍI JEOBÁ”

4, 5. a) Ndiéjunʼ eyoo gáʼthúu̱n “mbáwíi Jeobá” rá. b) Ndíjkha rí Jeobá mixtiʼkuii ki xóo eʼwíínʼ dios rá.

4 Nda̱wa̱a̱ imba̱a̱ xóo Jeobá. Ajngáa “mbáwíi Jeobá” nandoo gáʼthúu̱n mbaʼa. Mbá dí ikhaa nindxu̱u̱ rí nda̱wa̱a̱ imba̱a̱ xóo Jeobá, rí nimbáa na̱nguá nindxu̱u̱ xóo ikhaa ní má tsembríguii ga̱jma̱a̱ nimbáa. Ndíjkha rí Moisés nijmuu ajngáa rígi̱ rá. Xó má eʼyáá, ra̱ʼkha̱ mu masngájma dí raʼkhí matatsimbaʼ náa trinidad. Jeobá niʼniriyaʼ mekhu ga̱jma̱a̱ Ku̱ba̱ʼ. Ikhaa nindxu̱u̱ Rey náa xúgíʼ numbaaʼ ga̱jma̱a̱ i̱ndó ikhaa nindxu̱u̱ Dios bi̱ gajkhun. Nda̱wa̱a̱ imba̱a̱ dios xóo ikhaa (2 Sam. 7:22). Ikha jngó Moisés nijmuu ajngáa “mbáwíi Jeobá” mú maʼni marmáʼáan a̱jkiu̱ún bi̱ israelitas rí i̱ndó gíʼmaa mbuʼyamajkuíí Jeobá. Ragíʼmaa muni xóo xa̱bu̱ bi̱ kuwa náa xuajen mijngii, bi̱ nduyamajkhún mbaʼin dios. Xa̱bu̱ buʼko̱ nikumu̱ún rí dios ndrígu̱ún naʼni marigá tikhu dí rígá náa tsu̱du̱u̱ Ku̱ba̱ʼ.

5 Mbá xkri̱da, bi̱ nikuwa náa Egipto ndiyamajkuíí Ra, dios ndrígóo A̱jkha̱ʼ; Nut, diosa ndrígóo mekhu; Geb, dios ndrígóo Ku̱ba̱ʼ, ga̱jma̱a̱ Hapi, dios ndrígóo mañu Nilo. Ma̱ngaa ndiyamajkhún mbaʼin xujkhúʼ. Mú Jeobá nisngájma ga̱jma̱a̱ gu̱wa̱ʼ gamiéjunʼ rí ikhaa nindxu̱u̱ itháan mba̱a̱ ki xóo eʼwíínʼ dios. Bi̱ nikuwa náa Canaán ndiyáá rí dios bi̱ itháan nigiʼdoo numuu ninindxu̱u̱ Baal. Nikumu̱ún rí dios bugi̱ niʼni rí marigá vida. Ma̱ngaa nikumu̱ún rí ninindxu̱u̱ dios ndrígóo mekhu, ruʼwa ga̱jma̱a̱ a̱jkhu̱u̱n. Náa mbaʼa xuajen, xa̱bu̱ nikumu̱ún rí Baal mañewu̱u̱n (Núm. 25:3). Mú bi̱ israelitas gíʼmaa marmáʼáan a̱jkiu̱ún rí Dios ndrígu̱ún nindxu̱u̱ ‹Dios gajkhun› ga̱jma̱a̱ nda̱wa̱a̱ imba̱a̱ xóo ikhaa, “mbáwíi Jeobá” (Deut. 4:35, 39).

Jeobá nditháan tsiriʼkuminaʼ. Nindxu̱u̱ jmbii, naʼnimbánuu rí naʼthí ga̱jma̱a̱ naʼthí má xúʼko̱ rí gajkhun

6, 7. a) Ndiéjunʼ eyoo gáʼthúu̱n ma̱ngaa ajngáa “mbáwíi Jeobá” rá. b) Xú káʼnii nisngájma Dios rí nindxu̱u̱ “mbáwíi Jeobá” rá.

6 Jeobá tsiriʼkuminaʼ ga̱jma̱a̱ naʼnimbánuu rí naʼthí. Ajngáa “mbáwíi Jeobá” ma̱ngaa nandoo gáʼthúu̱n rí ma̱ndoo maku̱ma̱ʼ xtayáá ga̱jma̱a̱ naʼnimbánuu rí nakudaminaʼ. Ikhaa nditháan tsiriʼkuminaʼ. Nindxu̱u̱ jmbii, naʼnimbánuu rí naʼthí ga̱jma̱a̱ naʼthí má xúʼko̱ rí gajkhun. Xú káʼnii nisngajma xá. Mbá xkri̱da,  ikhaa niʼthúu̱n Abrahán rí e̱ji̱n makuwa náa Ku̱ba̱ʼ rí ikhaa niʼthí maxná. Jeobá taríʼkhuu rí nindoo maʼni ga̱jma̱a̱ niʼni mbaʼa milagros mu maʼnimbánuu rígi̱ 430 tsiguʼ nda̱wa̱á (Gén. 12:1, 2, 7; Éx. 12:40, 41).

7 Mba̱yu̱ʼ tsiguʼ nda̱wa̱á, Jeobá niʼthí rí israelitas ninindxu̱ún xa̱bi̱i̱ ga̱jma̱a̱ niʼthún: “Ikhúúnʼ má nindxu̱ʼ. Nákha ikhúúnʼ xtáá na̱nguá nigumaa nimbáa Dios, ga̱jma̱a̱ nda̱wa̱á na̱nguá má nixtáa imba̱a̱ Dios”. Jeobá nasngájma kaʼwu rí niʼthí maʼni xaxtiʼkhuu nditháan índo̱ niʼthí: “Xúgíʼ mbiʼi ikhúúnʼ má Ni̱ndxu̱ʼ” (Is. 43:10, 13; 44:6; 48:12). Israelitas niguáʼdáá mbá ñajunʼ rí nigiʼdoo wéñuʼ numuu rí muni ñajunʼ Dios bi̱ tsiriʼkuminaʼ nditháan ga̱jma̱a̱ naʼnimbánuu rí naʼthí. Mangáanʼ kuaʼdáá ikhaa má ñajunʼ (Mal. 3:6; Sant. 1:17).

8, 9. a) Ndiéjunʼ gíʼthu̱u̱n Jeobá rí muni xa̱bi̱i̱ rá. b) Ndiéjunʼ niʼthí Jesús rí niʼni makujmaa rí nigiʼdoo numuu ajngáa rí niʼthí Moisés rá.

8 Rí niʼthúún Moisés bi̱ israelitas ma̱ngaa niʼni marmáʼáan a̱jkiu̱ún rí Jeobá maʼndoo kaʼñúún ga̱jma̱a̱ mañewu̱u̱n má xúʼko̱. Mú Jeobá nigi̱ʼthu̱u̱n rí ikhiin mbuyamajkuíí i̱ndó ikhaa ga̱jma̱a̱ rí maʼndún kuyáá ga̱jma̱a̱ xúgíʼ a̱jkiu̱ún, nímiu̱ún ga̱jma̱a̱ tsiakii ndrígu̱ún (atayáá kúgumaʼá “Ndiéjunʼ eyoo gáʼthúu̱n”). Ma̱ngaa xa̱bu̱ ndiyóoʼ mutún má xúʼko̱ e̱jñún ga̱jma̱a̱ numuu Jeobá. Mu xúʼko̱ mangiin mbuyamajkuíí i̱ndó Jeobá (Deut. 6:6-9).

9 Numuu rí Jeobá tsériʼkhuu rí nakudaminaʼ, rí xúgi̱ ikhaa gíʼthu̱u̱n rí xa̱bi̱i̱ muni ikhaa kayúʼ xóo israelitas. Ikha jngó, á mu nandulúʼ rí ikhaa maniguuʼ rí nduʼyamajkuíí, ikháanʼ mangáanʼ gíʼmaa mbuʼyamajkuíí i̱ndó ikhaa ga̱jma̱a̱ maʼndulú kuʼyáá ga̱jma̱a̱ xúgíʼ a̱jkiu̱lú, edxu̱lúʼ ga̱jma̱a̱ tsiakii ndrígúlú. Jesús niʼthí dí rígi̱ nindxu̱u̱ kiʼtáñajunʼ rí itháan gíʼdoo numuu ga̱jma̱a̱ xúʼko̱ niʼni makujmaa rí gíʼdoo wéñuʼ numuu ajngáa rí niʼthí Moisés (atraxnuu Marcos 12:28-31). Rí xúgi̱ gúʼyáá xú káʼnii gándoo gusngajmá rí nakumulú rí “Jeobá Dios ndrígúlú nindxu̱u̱ mbáwíi Jeobá”.

GUʼYAMAJKUÍÍ I̱NDÓ JEOBÁ

10, 11. a) Ndiéjunʼ eyoo gáʼthúu̱n mbuʼyamajkuíí i̱ndó Jeobá rá. b) Xú káʼnii nisngajma ajtsíin jiáma hebreos rí i̱ndó nduyamajkuíí Jeobá rá.

10 I̱ndó Jeobá Dios eʼyamajkuíílú. Ragíʼmaa mbuʼyamajkún eʼwíínʼ dios ni muxuʼdáaʼlu ku̱ma̱ o rí nuni i̱ʼwáʼ religión rí minduwaʼ índo̱ nduʼyamajkuíí Jeobá. Ikhaa na̱nguá nindxu̱u̱ i̱ndó mbáa Dios bi̱ itháan mba̱a̱ náa ikhiin ga̱jma̱a̱ rí itháan gíʼdoo tsiakii ki xóo ikhiin. Ikhaa nindxu̱u̱ Dios gajkhun. Ikha jngó i̱ndó gíʼmaa mbuʼyamajkuíí ikhaa (atraxnuu Revelación 4:11). *

11 Náa libro ndrígóo Daniel naʼthí ga̱jma̱a̱ numún a̱jkhu̱u̱n jiáma hebreos bi̱ nagumbiʼñún Daniel, Hananías, Misael ga̱jma̱a̱ Azarías. Xú káʼnii nisngajma rí ndiyamajkuíí i̱ndó Jeobá xá. Nini gaʼduunʼ mu̱phu̱ ganitsu rí xa̱bi̱i̱ Dios xándoo mu̱phu̱. Ma̱ngaa nájtsíin bi̱ nambáxu̱u̱ gajmíi̱n Daniel tusmbatigu̱u̱n náa inuu xándú bi̱ ki̱ʼni̱i̱ ga̱jma̱a̱ oro bi̱ niʼnii rey ndrígóo Babilonia. Nikru̱ʼu̱u̱n májánʼ rí i̱ndó gíʼmaa mbuyamajkuíí Jeobá. Ikha jngó ninindxu̱ún jmbiin má xúʼko̱ náa ikhaa (Dan. 2:1-3:30).

Jeobá gíʼmaa magiʼdoo itháan numuu náa ikháanʼ

12. Á mu nandulúʼ mbuʼyamajkuíí i̱ndó Jeobá, ndiéjunʼ rí gíʼmaa muñeumíjna̱lú rá.

 12 Jeobá gíʼmaa magiʼdoo itháan numuu náa ikháanʼ. Á mu nandulúʼ mbuʼyamajkuíí i̱ndó ikhaa, gíʼmaa muguaʼdáá tsu̱ma̱ mu xúʼni̱ i̱ʼwáʼ dí ragíʼdoo numuu. Ndiéjunʼ nindxu̱u̱ rúʼko̱ rá. Náa Gu̱wa̱ʼ Xtángoo, Jeobá niʼthí rí xa̱bi̱i̱ xándoo mbuyamajkún eʼwíínʼ dios. Ikhiin ndiyóoʼ muni gaʼduunʼ xúgíʼ enii rí xóo eyamajkuíí dios bi̱ ragájkhun (Deut. 5:6-10). Rí mbiʼi xúgi̱ rígá mbaʼa enii rí xóo mbuyamajkún eʼwíínʼ dios, ga̱jma̱a̱ tikhuu naʼni mingíjyúuʼ mbuʼyáá xóo nindxu̱u̱. Mú Jeobá tsiriʼkuminaʼ ga̱jma̱a̱ gíʼthu̱u̱n rí muʼni gaʼduunʼ xúgíʼ rígi̱. Ikhaa nindxu̱u̱ má xúʼko̱ “mbáwíi Jeobá”. Ikha jngó guʼyáá xú káʼnii gándoo guʼni gaʼduunʼ rí xóo nduyamajkhún eʼwíínʼ dios.

13. Ndiéjunʼ gándoo maʼni gachúu rí nambáxulúʼ gajmiúlú Jeobá rá.

13 Tikhuu rí ma̱ndoo maʼni gachúu rí mambáxulúʼ gajmiúlú Jeobá na̱ʼkha̱ náa Colosenses 3:5 (atraxnuu). * Versículo rígi̱ naʼthí rí á mu nandaaʼ maraʼdáá wéñuʼ nindxu̱u̱ rí xóo matayamajkún eʼwíínʼ dios. Náa numuu rá. Numuu rí índo̱ nandulúʼ muguaʼdáá wéñuʼ rí gíʼdoo numuu o mbújkha̱a̱, rígi̱ marikhulú xóo mbáa dios bi̱ gíʼdoo tsiakii. Xúgíʼ aʼkhá rí na̱ʼkha̱ raʼthí náa Colosenses 3:5 nambánii ga̱jma̱a̱ rí maʼndaaʼ maraʼdáá wéñuʼ. Á mu nandulúʼ muguaʼdáá wéñuʼ rígi̱, ma̱ndoo mugíʼdi̱i̱ maʼndulú kuʼyáá itháan ki xóo Dios. Ga̱jma̱a̱ ikhú makuwáanʼ ruʼyamajkhuíí imba̱a̱ dios, ikhú Jeobá ní xánindxu̱u̱ “mbáwíi Jeobá” náa ikháanʼ. Nditháan xaguáʼníílú xúʼko̱.

14. Ndiéjunʼ niʼthí apóstol Juan rá.

14 Apóstol Juan niʼthí kayúʼ xó má rígi̱. Niʼthí ga̱jma̱a̱ numuu “rí nagua̱ʼa̱ xuyulúʼ, rí nagua̱ʼa̱ idulú ga̱jma̱a̱ ma̱ngaa rí nanigulúʼ muʼni”. Ga̱jma̱a̱ niʼthí rí á mu mbáa nandoo kaʼyoo xúgíʼ dí rígá náa numbaaʼ, “Anu̱lú xándoo kaʼyoo” (1 Juan 2:15, 16). Ikha jngó gíʼmaa muyajmamijná má xúʼko̱. Mbáa mbuʼyáá rí nanigulúʼ gitsíin, xa̱bu̱, xú káʼnii eguwu̱nʼ xtíñún ga̱jma̱a̱ xóo eniratamijná náa numbaaʼ. O mbáa nandulúʼ mu̱ʼgua̱ náa universidad mu maguaʼdáá “rí gíʼdoo wéñuʼ numuu” náa numbaaʼ rígi̱ (Jer. 45:4, 5). Mú numbaaʼ nuxi̱ʼ gíʼ mijngii wéñuʼ. Ikha jngó gíʼmaa marmáʼáan a̱jkiu̱lú ajngáa rí niʼthí Moisés. Á mu nakru̱ʼu̱lú ga̱jma̱a̱ nakumulú rí “Jeobá Dios ndrígúlú nindxu̱u̱ mbáwíi Jeobá”, mbuʼyamajkuíí i̱ndó ikhaa ga̱jma̱a̱ muʼni ñajunʼ xóo eyoo ikhaa (Heb. 12:28, 29).

GUÑEʼWA̱A̱N RÍ MAKUWÁANʼ MBÁ KAMBÁXULÚ NÁA CONGREGACIÓN

15. Náa numuu rí Pablo niʼni marmáʼáan a̱jkiu̱ún cristianos rí Dios nindxu̱u̱ mbáwíi Jeobá rá

15 Ajngáa “mbáwíi Jeobá” ma̱ngaa naʼni marmáʼáan a̱jkiu̱lú rí Jeobá nandoo rí xa̱bi̱i̱ makuwáanʼ mbá kambáxulú ga̱jma̱a̱ mbóó rí gúʼgíʼ muʼnilú. Nákha mbiʼi rí nikuwa timbíi̱n cristianos, mbaʼin rí ikhiin ninindxu̱ún judíos, griegos, romanos o bi̱ niguwáʼ náa i̱ʼwáʼ xuajen mba̱ʼu̱. Mixtiʼkhu xóo nikúwi̱i̱n, xóo eguʼwúnʼ eni ga̱jma̱a̱ xóo endxaʼwamíjna̱. Ikha jngó tikhun naʼniún mingíjyúuʼ munimbánii rí nijmañún o muniñaʼ rí nini nákha ginii. Ikha jngó apóstol Pablo ndiyóoʼ maʼni marmáʼáan  a̱jkiu̱ún rí cristianos guáʼdaa mbáwíi Dios bi̱ nindxu̱u̱ Jeobá (atraxnuu 1 Corintios 8:5, 6). *

Jeobá nandoo rí xa̱bi̱i̱ makuwáanʼ mbá kambáxulú ga̱jma̱a̱ mbóó rí gúʼgíʼ muʼnilú

16, 17. a) Xú káʼnii rí kiʼtáriyaʼ xtáa rambánuu mbiʼi xúgi̱ ga̱jma̱a̱ ndiéjunʼ erígá rá. b) Ndiéjunʼ gándoo gáʼni gachúu rí makuwáanʼ mbá kambáxulú rá.

16 Ndiéjunʼ gíʼmaa maʼni congregación cristiana rí mbiʼi xúgi̱ rá. Gaʼyee Isaías niʼthí rí ‹índo̱ gártumuu mbiʼi› xa̱bu̱ xúgíʼ xuajen mbuyamajkuíí mbá kambáxu̱u̱n Jeobá. Xa̱bu̱ bugi̱ muthi: “Ga̱jma̱a̱ ikhaa maʼthúlú xú káʼnii nindxu̱u̱ kambo̱o̱, ga̱jma̱a̱ ikháanʼ majngruigulú náa kamba̱a̱ ndrígóo” (Is. 2:2, 3). Nadxulú índo̱ nduʼyáá xú káʼnii embánuu rí kiʼtáriyaʼ rígi̱. Rí narígá, a̱ngiu̱lú naguwaʼ mixtiʼkhu xuajen, nuthi i̱ʼwáʼ ajngáa ga̱jma̱a̱ mixtiʼkhu xóo kuwa. Mú xúgiáanʼ nduʼyamajkuíí Jeobá mbá kambáxulú. Gajkhun má, xúgíʼ rígi̱ ma̱ndoo maʼni rí muguaʼdáálu xkujndu.

Lá nuʼnimi̱jna̱ muyambáá mu makuwáanʼ mbá kambáxulú náa congregación ráʼ. (Atayáá náa kutriga̱ 16 asndu 19.)

17 Mbá xkri̱da, xú káʼnii eʼñúún a̱ngiu̱lú bi̱ naguwáʼ náa i̱ʼwáʼ xuajen rá. Mbáa nuthi imbo̱o̱ ajngáa, mixtiʼkhu xtíñún, i̱ʼwáʼ rí naguʼún nuni o asndu guáʼdáá i̱ʼwáʼ ganitsu. Lá tsíyulú gúʼñúún  a̱ngiu̱lú buʼko̱ ga̱jma̱a̱ i̱ndó nakuwáanʼ itháan gajmiúlú bi̱ kúwi̱i̱n ga̱jma̱a̱ bi̱ naguʼún nuni xó má ikháanʼ ráʼ. Ga̱jma̱a̱ xóo eʼñúún bi̱ kuya̱ edxu̱u̱ bi̱ kuwa náa xuajñulu bi̱ itháan majkhinʼ ki xóo ikháanʼ o ni̱ndxu̱ún i̱mba̱ raza o mixtiʼkhu xóo kúwi̱i̱n rá. Á mu tsíñeumíjna̱lú, ma̱ndoo maʼni rí xúgíʼ rígi̱ maʼni gawúnlú ga̱jma̱a̱ maʼni rí xákuwáanʼ kambáxulú.

18, 19. a) Xú káʼnii xtágabu exkamaa náa Efesios 4:1-3 rá. b) Ndiéjunʼ gáʼni rí makuwáanʼ mbá kambáxulú náa congregación rá.

18 Xú káʼnii gándoo guʼni mu xáguáʼdáá xkujndu rígi̱ rá. Rí muʼnimbánii xtágabu rí nixnúún apóstol Pablo cristianos bi̱ kuwa náa Éfeso, mbá xuajen rí gíʼdoo wéñuʼ ga̱jma̱a̱ xa̱bu̱ bi̱ ni̱ndxu̱ún mixtiʼkun (atraxnuu Efesios 4:1-3). * Pablo niʼthí ga̱jma̱a̱ numuu rí manindxu̱lúʼ xa̱bu̱ guabaaʼ, májánʼ a̱jkiu̱lú, maʼngo̱o̱ a̱jkiu̱lú ga̱jma̱a̱ maʼndulú kuʼyamijná. Rígi̱ nindxu̱u̱ xóo columnas gujkhuʼ rí kayóo guʼwá. Mu mbá guʼwá mawiji̱ gujkhuʼ ndayóoʼ muñajunʼ wéñuʼ. Ikha jngó Pablo niʼthún cristianos bi̱ kuwa náa Éfeso rí munimi̱jna̱ makuwá mbá kambáxu̱u̱n má xúʼko̱ náa congregación.

19 Xúgiáanʼ gíʼmaa muʼnimi̱jna̱lú muyambáá mu makuwáanʼ mbá kambáxulú náa congregación. Ndiéjunʼ gándoo muʼni mu marigá rígi̱ rá. Timbá, gusngajmá rí niʼthí Pablo xóo rí manindxu̱lúʼ xa̱bu̱ guabaaʼ, májánʼ a̱jkiu̱lú, maʼngo̱o̱ a̱jkiu̱lú ga̱jma̱a̱ maʼndulú kuʼyamijná. Raga̱jma̱, muʼni tsiakimijna mu marigá tsímáá. Náa congregación, xkujndu rí guáʼdáá a̱ngiu̱lú nindxu̱u̱ xóo tsúwáʼ náa columna. Xkujndu rígi̱ ma̱ndoo maʼni rí xákuwáanʼ mbá jnduʼ. Ikha jngó ndayóoʼ muʼnimi̱jna̱ mu muʼnimbánii. Xúʼko̱ gáʼni rí makuwáanʼ tsímáá ga̱jma̱a̱ mbá kambáxulú.

20. Xú káʼnii esngajmá rí nakru̱ʼu̱lú rí “Jeobá Dios ndrígúlú nindxu̱u̱ mbáwíi Jeobá” rá.

20 “Jeobá Dios ndrígúlú nindxu̱u̱ mbáwíi Jeobá”. Phú gajkhun nindxu̱u̱ ajngáa rígi̱. Bi̱ israelitas nixnúún tsiakii mu maʼngu̱u̱n muraʼníí xkujndu rí niguáʼdáá índo̱ nitu̱ʼu̱u̱n náa ku̱ba̱ʼ rí Jeobá niʼthí maxnún. Mangáanʼ ma̱ndoo maxnúlúʼ tsiakii mu makáwáanʼ índo̱ garigá majphú mba̱a̱ gaʼkhu ga̱jma̱a̱ muʼni marigá tsímáá, ma̱ngaa makuwáanʼ mbá kambáxulú náa Ku̱ba̱ʼ mitsaan. Lá nakru̱ʼu̱lú rí “Jeobá Dios ndrígúlú nindxu̱u̱ mbáwíi Jeobá” rá. Á mu xúʼko̱, guʼyamajkuíí i̱ndó ikhaa. Gaʼndulúʼ kuʼyáá má xúʼko̱ ma̱ngaa muʼni ñajunʼ ga̱jma̱a̱ xúgíʼ a̱jkiu̱lú, edxu̱lúʼ ga̱jma̱a̱ tsiakii ndrígúlú. Guʼnimi̱jna̱ má xúʼko̱ mu makuwáanʼ tsímáá ga̱jma̱a̱ mbá kambáxulú gajmiúlú a̱ngiu̱lú. Á mu nu̱ʼni̱ má xúʼko̱ rígi̱, Jesús maʼthí rí ni̱ndxu̱lú xóo mugu̱ ga̱jma̱a̱ maʼthúlú ajngáa rígi̱: “Ahuala, tsanʼla huamatsakuhuanʼla neʼne Tateʼ, guyala ri naʼtañajun Dios, ri riga-ma jambani mbuyala asjndo naki niguiʼi numba” (Mat. 25:34).

^ párr. 2 Deuteronomio 6:4, 5: “Atadxawíín, oh Israel: Jeobá Dios ndrígúlú nindxu̱u̱ mbáwíi Jeobá. Gíʼmaa maʼndaʼ xtayáá Jeobá Dios ndrígia̱ʼ ga̱jma̱a̱ xúgíʼ a̱jkia̱nʼ ga̱jma̱a̱ xúgíʼ nímia̱nʼ ga̱jma̱a̱ xúgíʼ tsiakii rí xtaʼdáá”.

^ párr. 10 Revelación 4:11: “Jeobá, mínaʼ ikháánʼ, kaʼyaʼ rí matrigú gloria, gamajkhu ga̱jma̱a̱ tsiakii, numuu rí ikháánʼ nitani xúgíʼ dí rígá, ga̱jma̱a̱ numaʼ ikháánʼ nindoo niguma xúgíʼ”.

^ párr. 13 Colosenses 3:5: “Guxruigu dí na̱nda̱ʼa̱ xuyala dí rígá náa tsu̱du̱u̱ ku̱ba̱ʼ xóo rí mataba̱ʼ ga̱jma̱ʼ mbáa bi̱ xóó tséyáa, dí mitsaga wéñuʼ, dí nagua̱ʼa̱ mataba̱ʼ ga̱jma̱ʼ mbáa, dí nandaʼ matani mbá rí maʼni gawáanʼ o maʼni gawúunʼ eʼwíínʼ ga̱jma̱a̱ dí maʼndaʼ maraʼdáá wéñuʼ, xúgíʼ rúʼko̱ nindxu̱u̱ xóo matiamajkún xándú”.

^ párr. 15 1 Corintios 8:5, 6: “Numuu rí maski ajndu kuwa bi̱ nagumbiʼñún “dios”, náa mekhu o náa tsu̱du̱u̱ Ku̱ba̱ʼ, xó má kuwa mbaʼin dios ga̱jma̱a̱ mbaʼin “señor”, náa ikháanʼlu xtáa mbáwíi Dios bi̱ ñajunʼ Anu̱lú, bi̱ niʼni xúgíʼ dí rígá, ga̱jma̱a̱ náa ikhaa guwaʼ mangáanʼlu; ga̱jma̱a̱ xtáa mbáwíi Señor, ikhaa má Jesucristo, ga̱jma̱a̱ numuu ikhaa ni̱jkha̱nú nirígá xúgíʼ, ga̱jma̱a̱ numuu ikhaa kuwáanʼ mangáanʼ”.

^ párr. 18 Efesios 4:1-3: “Ikhúúnʼ, bi̱ kruʼún guʼwá e̱jua̱nʼ ga̱jma̱a̱ numuu Señor, natakháñala rí gafrigala xó má gíʼmaa numuu rí Dios nindxa̱ʼwála, gani̱ndxa̱la xa̱bu̱ guabáanʼ ga̱jma̱a̱ májánʼ a̱jkia̱la, xákiʼnáanʼla, gáʼngo̱o̱ a̱jkia̱la kuyamíjna̱, guʼyáaʼ wéñuʼ ga̱jma̱a̱ guni tsiakimijna makuwáanʼ mbá jnduʼ náa espíritu rí naʼni makuwáanʼ tsímáá”.