Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Junio tsiguʼ 2016

Guxnáa núma̱aʼ Jeobá numuu rí ikhaa Naʼsngúlú

Guxnáa núma̱aʼ Jeobá numuu rí ikhaa Naʼsngúlú

Oh Jeobá, ikháánʼ nindxaaʼ Anu̱xu. Ikháanʼ ni̱ndxu̱xu ku̱ba̱ʼ, ga̱jma̱a̱ ikháánʼ ni̱ndxa̱ʼ bi̱ Niʼniáanʼxu, ma̱ngaa nitaniáanʼxu xúgiáanʼ ga̱jma̱a̱ ñawáanʼ” (ISAÍAS 64:8).

AJMÚÚ 89 GA̱JMA̱A̱ 26

1. Ndíjkha rí Jeobá najmañuu naʼni itháan májánʼ ki xóo mbáa xa̱bu̱ rá.

GU̱Nʼ noviembre tsiguʼ 2010, mbáa xa̱bu̱ nindoo maʼni numuu 70 millón rí mbújkha̱a̱ dólar ga̱jma̱a̱ numuu rayaʼ china dí nixtangujua náa Inglaterra. Phú naʼniulú tsiánguá índo̱ nduʼyáá rí mbáa bi̱ naʼni daan ma̱ndoo majmuu mbá rí najmaʼnuuʼ wéñuʼ ga̱jma̱a̱ rí na̱nguá minumuu xóo ku̱ba̱ʼ mu maʼni mbá dí ra̱ʼkhá tháán mitsaan ma̱ngaa rí gíʼdoo wéñuʼ numuu. Jeobá nindxu̱u̱ xóo mbáa bi̱ naʼni daan. Mú ikhaa nindxu̱u̱ bi̱ itháan májánʼ, ki xóo mbáa xa̱bu̱ bi̱ naʼni daan náa tsu̱du̱u̱ ku̱ba̱ʼ. Náa Biblia naʼthí rí Jeobá nijmuu “yujndoʼ ku̱ba̱ʼ” mú maʼnii mbáa xa̱bu̱ jmbii, bi̱ nigumbiʼyuu Adán (Gén. 2:7, nota). Xa̱bu̱ buʼko̱ ninindxu̱u̱ “ade Dios” ga̱jma̱a̱ nigumaa mu ma̱ndoo mbaʼyáridoo xú káʼnii nindxu̱u̱ Jeobá (Luc. 3:38).

2, 3. Xú káʼnii gándoo guʼyaridáá rí xóo nini israelitas bi̱ nitanga̱a̱ a̱jkiu̱ún rá.

2 Índo̱ Adán táʼnimbo̱o̱ kaʼyoo bi̱ Niʼnii, nánguá ninindxu̱u̱ a̱ʼdióo Dios. Mú mbaʼin bi̱ e̱ji̱i̱n niraʼwíí mumbayíí Jeobá xóo mbáa Xa̱bu̱ Ñajunʼ (Heb. 12:1). Ikhiin ninimbu̱ún kuʼyáá bi̱ Niʼniwíin. Xúʼko̱  túmbayíí Satanás ga̱jma̱a̱ nisngajma rí Jeobá nindúún maʼni anu̱ún (Juan 8:44). Rí niguájun jmbu náa Dios naʼni marmáʼáan a̱jkiu̱lú rí israelitas bi̱ nitanga̱a̱ a̱jkiu̱ún nithi mbá miʼtsú: “Oh Jeobá, ikháánʼ nindxaaʼ Anu̱xu. Ikháanʼ ni̱ndxu̱xu ku̱ba̱ʼ, ga̱jma̱a̱ ikháánʼ ni̱ndxa̱ʼ bi̱ Niʼniáanʼxu, ma̱ngaa nitaniáanʼxu xúgiáanʼ ga̱jma̱a̱ ñawáanʼ” (Is. 64:8) (atayáá kutriga̱ “Ndiéjunʼ eyoo gáʼthúu̱n”).

3 Rí mbiʼi xúgi̱, bi̱ ni̱ndxu̱lú xa̱bi̱i̱ Dios nu̱ʼni̱ mbá tsiakii mu mbuʼyaridáá rí nini ikhiin ga̱jma̱a̱ muʼnimbulúʼ kuʼyáá bi̱ Niʼniáanʼ. Phú mba̱a̱ gamajkhu muʼthá rí Jeobá nindxu̱u̱ Anu̱lú. Nandulúʼ rí ikhaa mambáyulúʼ muriʼkhumijná. Ikha jngó gíʼmaa muraximíjna̱lú: “Lá ni̱ndxu̱ʼ xóo mbá ku̱ba̱ʼ rí naniñaminaʼ mu Dios majmuu mú maʼni mbá daan rí gíʼdoo wéñuʼ numuu ráʼ. Lá nda̱ñu̱u̱n a̱ngui̱nʼ xóo ku̱ba̱ʼ rí Jeobá xóó xtáa raʼni mújúnʼ ráʼ.” Mu mambáyulúʼ mundxaʼwamíjna̱ rí májánʼ, náa artículo rígi̱ gúʼyáá ajtsú enii. Timbá, xú káʼnii eraʼwíin Jeobá bi̱ maʼsngúún rá. Raga̱jma̱, ndíjkha rí naʼsngúún xá. Ga̱jma̱a̱ ragajtsú, xú káʼnii eʼsngúún xá.

XÚ KÁʼNII ERAʼWÍIN JEOBÁ BI̱ MAʼSNGÚÚN RÁ.

4. Xú káʼnii eraʼwíin Jeobá bi̱ ma̱ʼkha̱ kagu̱u̱n xá. Araxná mbá xkri̱da.

4 Jeobá tséʼñuun xa̱bu̱ xóo eʼñún ikháanʼ. Ikhaa ndaʼyoo a̱jkiu̱u̱n mámbáa xa̱bu̱ ga̱jma̱a̱ ndaʼyoo xú káʼnii phú nindxu̱u̱ (atraxnuu 1 Samuel 16:7b). * Mbá rí nasngájma rí xú káʼnii eʼni ikhaa nindxu̱u̱ índo̱ ikhaa nigíʼ congregación cristiana. Ikhaa ni̱ʼkha̱ kagu̱u̱n náa ikhaa ga̱jma̱a̱ náa A̱ʼdióo mbaʼin xa̱bu̱ bi̱ xóo nakujmiin rí na̱nguá guáʼdáá numún (Juan 6:44). Mbáa rí ikhiin ninindxu̱u̱ mbáa xa̱bu̱ ede̱ judío náa guʼwá ndxajkun bi̱ nagumbiʼyuu Saulo. Ninindxu̱u̱ mbáa xa̱bu̱ bi̱ niʼnimbamínáʼ, bi̱ nixkúún cristianos ga̱jma̱a̱ niʼthí rí minduwaʼ ga̱jma̱a̱ numún (1 Tim. 1:13). Mú Jeobá ndiʼyoo a̱jkiu̱u̱n ga̱jma̱a̱ ndiʼyoo rí Saulo na̱nguá ninindxu̱u̱ mbá ku̱ba̱ʼ rí tséjmaa nditháan (Prov. 17:3). Dios ndiʼyoo rí Saulo nindxu̱u̱ mbá ku̱ba̱ʼ rí ma̱ndoo majmuu mu maʼni ‹mbá vaso kiejunʼ› bi̱ maʼtáruʼun “xabo gentiles, gajma na’ inu reyes, gajma na’ inu ijin xabo Israel” (Hech. 9:15). Jeobá ma̱ngaa niraʼwíin eʼwíínʼ xa̱bu̱ bi̱ maʼsngúún mu mani̱ndxu̱ún xóo rayaʼ rí “guiʼdo numu” (Rom. 9:21). Tikhun xa̱bu̱ buʼko̱ nini kuʼwáʼ, nijngi̱i̱n ga̱jma̱a̱ nibúúnʼ gajmiún eʼwíínʼ (1 Cor. 6:9-11). Mú índo̱ nijmañún ga̱jma̱a̱ numuu Dios, niʼni itháan gujkhuʼ fe ndrígu̱ún ga̱jma̱a̱ niniñami̱jna̱ rí ikhaa maʼsngúún.

Ragíʼmaa muʼthá dí raʼkhí numún a̱ngiu̱lú ni má bi̱ na̱jkua̱ gúʼtaruʼun

5, 6. a) Á mu nakru̱ʼu̱lú rí Jeobá nindxu̱u̱ bi̱ Niʼniáanʼ, xú káʼnii gúʼñúún xa̱bu̱ náa na̱jkua̱ guʼtáraʼa rá. b) Á mu nakru̱ʼu̱lú rí Jeobá nindxu̱u̱ bi̱ Niʼniáanʼ, xú káʼnii gúʼñúún a̱ngiu̱lú bi̱ kuya̱ edxu̱u̱ náa congregación rá.

5 Nduʼyáá gajkhun rí Jeobá ma̱ndoo maraʼwíin ga̱jma̱a̱ ma̱ʼkha̱ kagu̱u̱n xa̱bu̱ májánʼ a̱jkiu̱ún. Ikha jngó ragíʼmaa muʼthá dí raʼkhí ga̱jma̱a̱ numún a̱ngiu̱lú ní má xa̱bu̱ bi̱ na̱jkua̱ gúʼtaruʼun. Nditháan xundxa̱ʼwa̱míjna̱ rí mbáa xa̱bu̱ xáʼga̱nú mani̱ndxu̱u̱ xa̱bi̱i̱ Jeobá. Guʼyáá xkri̱da ndrígóo mbáa xa̱biya̱ bi̱ mbiʼyuu Michael.  Ikhaa naʼthí: “Índo̱ naguwaʼ gúyooʼ bi̱ nutaraʼa numuu Jeobá narugua̱a̱ xkrugua ga̱jma̱a̱ nani rí xóo nimbáa nda̱wa̱a̱. Na̱nguá nigúʼdoo gajmajkhuʼ gajmíi̱nʼ. Nda̱wa̱á, niniʼnúnʼ i̱mba̱ níʼkhá xa̱bu̱ bi̱ kuwa náa mbá guʼwíin bi̱ nini maguanúʼ tsiánguá numuu rí májánʼ eni. Mbá mbiʼi nidxuun rí ikhiin ni̱ndxu̱ún bi̱ nutaraʼa numuu Jeobá. Mú tándoo gánimbooʼ. Rí xóo eni niʼni rí maraximínaʼ náa numuu rí taʼndoʼ gáñu̱u̱n. Núkhu ndi̱yo̱o̱ rí nini xúʼko̱ kaʼnii numuu rí tseniʼnúnʼ ga̱jma̱a̱ ninimbooʼ rí xóo ethi eʼwíínʼ ga̱jma̱a̱ numún”. Michael nindoo mbaʼyoo itháan ga̱jma̱a̱ numún ikhiin, ikha jngó nindoo rí musngáá ga̱jma̱a̱ numuu Biblia. Nda̱wa̱á nijngúun iyááʼ ga̱jma̱a̱ ni̱jkha̱nú niʼni káxi̱ ñajunʼ Jeobá.

6 Á mu nduʼyáá májánʼ rí Jeobá nindxu̱u̱ bi̱ Niʼniáanʼ, rúʼko̱ gáʼni rí muʼniu̱u̱n rí májánʼ eʼwíínʼ a̱ngiu̱lú náa congregación. Mbuʼñún xóo ku̱ba̱ʼ rí Jeobá xóó xtáa raʼni mújúnʼ. Xúʼko̱ eʼñún Jeobá. Ikhaa ndaʼyoo xú káʼnii a̱jkiu̱ún ga̱jma̱a̱ rí nda̱wa̱á ní xáguáʼdáá aʼkhá. Ma̱ngaa ndaʼyoo xú káʼnii xa̱bu̱ gánindxu̱ún nda̱wa̱á (Sal. 130:3). Xú káʼnii gándoo guʼyaridáá Jeobá rá. Rí mundxaʼwamíjna̱ rí májánʼ ga̱jma̱a̱ numún a̱ngiu̱lú. Asndu ma̱ndoo muñajunʼ gajmiúlú Dios ga̱jma̱a̱ mumbáñuun a̱ngiu̱lú mu muriʼkhumijná má xúʼko̱ (1 Tes. 5:14, 15). Bi̱ kuya̱ edxu̱u̱ náa congregación gíʼmaa muxna mbá májánʼ xkri̱da ga̱jma̱a̱ numuu rígi̱ (Efes. 4:8, 11-13).

NÁA NUMUU RÍ NAʼSNGÚLÚʼ JEOBÁ RÁ.

7. Ndíjkha rí gíʼmáanʼ muxnáa núma̱aʼ rí naxprígulú Jeobá rá.

7 Tikhun xa̱bu̱ nuthi rí i̱ndó nduyáá rí gíʼdoo numuu rí nixprigún anu̱ún índo̱ ikhiin guáʼdiin e̱ji̱n. Índo̱ naʼni guaniáanʼ, nduʼyáá rí gíʼdoo numuu rí anu̱lú nixprigúlú numuu rí nakru̱ʼu̱lú rí ikhiin nindúún kuyulúʼ (atraxnuu Hebreos 12:5, 6, 11). * Jeobá nandoo kaʼyulú numuu rí ni̱ndxu̱lú e̱ji̱i̱n. Ikha jngó naxprígulú ga̱jma̱a̱ naʼsngúlúʼ ga̱jma̱a̱ májánʼ. Nandoo rí muraʼwíí muʼni rí májánʼ, rí makuwáanʼ tsímáá ga̱jma̱a̱ rí maʼndulú kuʼyáá xóo Anu̱lú (Prov. 23:15). Tsíyoo mumíniiʼlú ga̱jma̱a̱ rí makhañúlúʼ numuu rí tátanga̱a̱ a̱jkiu̱lú náa aʼkhá ndrígúlú (Efes. 2:2, 3).

Jeobá nandoo kaʼyulú numuu rí ni̱ndxu̱lú e̱ji̱i̱n. Ikha jngó naxprígulú ga̱jma̱a̱ naʼsngúlúʼ ga̱jma̱a̱ májánʼ

8, 9. a) Xú káʼnii eʼsngúlúʼ Jeobá rí mbiʼi xúgi̱ rá. b) Náa numbaaʼ nuxi̱ʼ, xú káʼnii gaʼsngúlú má xúʼko̱ Jeobá rá.

8 Nákha xóó tseniʼnííʼ Jeobá, mbáa tániguʼ Jeobá rí xú káʼnii nini̱ndxu̱lú. Mú ikhaa nimbáyulúʼ muriʼkhumijná, ga̱jma̱a̱ xúgi̱ májánʼ a̱jkiu̱lú (Is. 11:6-8; Col. 3:9, 10). Rí mbiʼi xúgi̱ Jeobá naʼsngúlúʼ ga̱jma̱a̱ najmuu mbá rí kiejunʼ wéñuʼ rí nagumbiʼyuu paraíso rí na̱ʼkha̱ náa Dios. Náa paraíso rígi̱ kuwáanʼlu tsímáá maski ajndu kuwáanʼ náa numbaaʼ dí ra̱májánʼ kayuʼ. Ma̱ngaa, a̱ngiu̱lú bi̱ niganiin náa mbá guʼwá náa tusngajma rí nindúún kuñún rí xúgi̱ kuwa náa paraíso rí na̱ʼkha̱ náa Dios, náa majñúnʼ a̱ngiu̱lú bi̱ nandún kuñún gajkhun (Juan 13:35). Ga̱jma̱a̱ xúgiáanʼ nijmañulúʼ musngajmá rí nandulúʼ kuʼñúún eʼwíínʼ. Mú rí itháan  gíʼdoo numuu rí nuniʼnííʼ Anu̱lú bi̱ xtáa mekhuíí ga̱jma̱a̱ rí ikhaa nandoo kaʼyulú (Sant. 4:8).

9 Náa numbaaʼ nuxi̱ʼ muguaʼdáá xúgíʼ rí májánʼ rí gáxná paraíso rí na̱ʼkha̱ náa Dios. Ma̱ngaa makuwáanʼ náa Ku̱ba̱ʼ mitsaan náa majñu̱ʼ Reino ndrígóo Dios. Mbiʼi rúʼko̱, ra̱ʼkhá tháán májánʼ gaʼsngulú Jeobá rí asndu tsindxaʼwáá edxu̱lúʼ rí mbiʼi xúgi̱ xú káʼnii gáʼni (Is. 11:9). Dios ma̱ngaa maʼni rí edxu̱lúʼ ga̱jma̱a̱ xuyulúʼ mani̱ndxu̱u̱ itháan májánʼ. Ikhú ní xáʼniulu mingíjyúuʼ majmañulúʼ ga̱jma̱a̱ numuu ikhaa ga̱jma̱a̱ muʼnimbulúʼ kuʼyáá káxi̱. Ikha jngó guniʼñáanʼ rí Jeobá maʼsngulúʼ má xúʼko̱. Gusngajmá rí nuxnáa núma̱aʼ numuu rí nandoo kaʼyulú xúʼko̱ kaʼnii (Prov. 3:11, 12).

XÚ KÁNII EʼSNGÚLÚʼ JEOBÁ RÁ.

10. Xú káʼnii nisngájma Jesús rí ndiyáridoo bi̱ Niʼniáanʼ rá.

10 Xó má xa̱bu̱ bi̱ naʼni daan naninuʼ májánʼ ku̱ba̱ʼ rí najmuu, Jeobá naniniáanʼ májánʼ wéñuʼ. Ndaʼyoo ndiéjunʼ rí naʼni makiéʼkulú, rí eʼngulú muʼni ga̱jma̱a̱ rí niriʼkumijná xóo cristianos. Índo̱ naʼsngúlúʼ, ikhaa ndaʼyoo xúgíʼ rígi̱ (atraxnuu Salmo 103:10-14). * Mu makru̱ʼu̱lú itháan májánʼ xú káʼnii eʼyulú Jeobá, gundxaʼwamíjna̱ xú káʼnii niʼni Jesús índo̱ xa̱bi̱i̱ nikiéʼkhun. Nguáná, ikhiin nigiʼdu̱u̱n mu mbuyáá tsáa gíʼdoo itháan numuu. Á mu ikháanʼ nikuwáanʼ ikhí, ndiéjunʼ gundxaʼwamíjna̱ ga̱jma̱a̱ numún xa̱bi̱i̱ xá. Mbáa mundxaʼwamíjna̱ rí ninindxu̱ún xóo mbá ku̱ba̱ʼ rí mingíjyúuʼ majmaa. Mú Jesús táʼñuun xúʼko̱ kaʼnii. Ikhaa ndiʼyoo rí ma̱ndoo mambáñun muriʼkhumijná. Xú káʼnii gáʼni xá. Rí maxnún xtágabu ga̱jma̱a̱ májánʼ, ma̱ngaa maxnún mbá májánʼ xkri̱da rí mani̱ndxu̱ún xa̱bu̱ gua̱bi̱nʼ (Mar. 9:33-37; 10:37, 41-45; Luc. 22:24-27). Nda̱wa̱á rí Jesús nigabi̱i̱, xa̱bi̱i̱ nindrigú xi̱ʼ kaʼwu ga̱jma̱a̱ nánguá nixmiéjunʼ ga̱jma̱a̱ numuu tsáa gíʼdoo itháan numuu. Rí nini, nigími̱jna̱ muni ñajunʼ rí Jesús nikuʼmiin muni (Hech. 5:42).

11. a) Xú káʼnii nisngájma David rí ninindxu̱u̱ mbá ku̱ba̱ʼ gua̱ba̱ʼ rá. b) Xú káʼnii gándoo guʼyaridáálu xá.

11 Rí mbiʼi xúgi̱, Jeobá najmuu Biblia, xi̱ʼ kaʼwu ndrígóo ga̱jma̱a̱ congregación mu maʼsngúlú. Á mu nandulúʼ rí Biblia maʼsngúlú ndayóoʼ muraxnuu, mundxaʼwamíjna̱ rí niraxnuu ga̱jma̱a̱ munda̱ʼa̱a̱ Dios rí mambáyulúʼ muʼnimbulúʼ. Rey David niʼthúu̱n Jeobá: “Rí mbruʼun nandxaʼwamínaʼ ga̱jma̱a̱ numaaʼ” (Sal. 63:6). Ma̱ngaa niʼnirámáʼ: “Mani mba̱a̱ Jeobá, bi̱ naxnúʼ xtágabu. Índo̱ mbruʼun naxpriguʼ rí nandxaʼwaminaʼ itháan mijnuʼ” (Sal. 16:7, nota). Xóo eʼyáá, David ninindxu̱u̱ xóo mbá ku̱ba̱ʼ gua̱ba̱ʼ. Ikhaa nindxa̱ʼwáminaʼ ga̱jma̱a̱ numuu xtágabu rí nixnúu Jeobá ga̱jma̱a̱ niniñaminaʼ mariʼkhuu xóo endxa̱ʼóo edxu̱u̱ ga̱jma̱a̱ xóo eku̱mu̱u̱. Asndu niniñaminaʼ índo̱ mbá xtágabu niʼniuu mingíjyúuʼ magruigú (2 Sam. 12:1-13). Xú káʼnii gándoo guʼyaridáá xkri̱da ndrígóo rí ninindxu̱u̱ xa̱bu̱ gua̱ba̱ʼ ga̱jma̱a̱ rí niʼnimbo̱o̱ xá. Guraximíjna̱: “Índo̱ nagúxnuu Biblia, lá nandxa̱ʼwa̱mínáʼ ga̱jma̱a̱ naniʼñúʼ rí xtágabu ndrígóo Jeobá mariʼkhuu rí endxa̱ʼwa̱mínáʼ ga̱jma̱a̱ rí naku̱mu̱ʼ ráʼ. Lá ma̱ndoo mani xóó itháan májánʼ ráʼ.” (Sal. 1:2, 3.)

12, 13. Xú káʼnii ejmuu Jeobá xi̱ʼ kaʼwu ga̱jma̱a̱ congregación mu maʼsngúlú rá.

12 Xi̱ʼ kaʼwu mbaʼa enii náa ma̱ndoo maʼsngulúʼ.  Mbá xkri̱da, ma̱ndoo mambáyulúʼ mbuʼyaridáá xú káʼnii ninindxu̱u̱ Jesús ga̱jma̱a̱ maguaʼdáá rí naxná xi̱ʼ kaʼwu (Gál. 5:22, 23). Mbá nindxu̱u̱ rí maʼndulú kuʼyamijná. Numuu rí nandulúʼ kuʼyáá Dios, nandulúʼ muʼnimbulúʼ ga̱jma̱a̱ muniʼñáaʼ rí ikhaa maʼsngulúʼ numuu rí nduʼyáá rí xúgíʼ rí naʼthúlúʼ muʼni mambáyulúʼ. Ma̱ngaa xi̱ʼ kaʼwu ma̱ndoo maxnúlúʼ tsiakii mu xúniʼñáʼ rí numbaaʼ xkawiiʼ rígi̱ mariʼkuáanʼ (Efes. 2:2). Gundxaʼwamíjna̱ ga̱jma̱a̱ numuu apóstol Pablo. Índo̱ nindxu̱u̱ mbáa dxámá, nixtáa majñúnʼ xa̱bu̱ ede̱ judío bi̱ kuya̱ edxu̱u̱ náa guʼwá ndxajkun. Mú xi̱ʼ kaʼwu nimbáyúu mariʼkuminaʼ. Ikha jngó niʼnirámáʼ nda̱wa̱á: “Náa xúgíʼ rí nandoʼ mani gúʼdoo tsiakii rí na̱ʼkha̱ náa Dios” (Filip. 4:13). Mangáanʼ gíʼmaa munda̱ʼa̱a̱ Jeobá ga̱jma̱a̱ xúgíʼ a̱jkiu̱lú rí maxnúlúʼ xi̱ʼ kaʼwu, ga̱jma̱a̱ ikhaa mariʼña̱a̱ rí nuʼtájkáan (Sal. 10:17).

Jeobá najmiuu bi̱ kuya̱ edxu̱u̱ mu musngúlú, ikha jngó gíʼmaa muʼdxuun xtágabu rí nuxnulu. (Atayáá kutriga̱ 12 ga̱jma̱a̱ 13.)

13 Jeobá ma̱ngaa najmuu congregación ga̱jma̱a̱ bi̱ kuya̱ edxu̱u̱ mu musngulú. Mbá xkri̱da, índo̱ bi̱ kuya̱ edxu̱u̱ nduyáá dí rígá mbá rí naʼni makiéʼkulú, nugíʼ mumbayulúʼ. Mú tsexnulú xtágabu rí nakumu̱ún ikhiin (Gál. 6:1). Rí phú nuni, ni̱ndxu̱ún xa̱bu̱ gua̱bi̱nʼ ga̱jma̱a̱ nunda̱ʼa̱a̱ Jeobá rí maxnún ku̱ma̱. Nda̱wa̱á nduyáaʼ rí naʼthí náa Biblia ga̱jma̱a̱ náa i̱yi̱i̱ʼ ndrígúlú mu muxnulu májánʼ xtágabu. Ikha jngó índo̱ bi̱ kuya̱ edxu̱u̱ gúxnulú mbá xtágabu ga̱jma̱a̱ ngajua rí xú káʼnii xtiin muʼgíiʼ o i̱ʼwáʼ numuu, garmáʼáan a̱jkiu̱lú dí rúʼko̱ nasngájma rí Dios nandoo kaʼyulú. Á mu nuʼnimbánii xtágabu ndrígu̱ún, manindxu̱lúʼ xóo mbá ku̱ba̱ʼ gua̱ba̱ʼ rí Jeobá ma̱ndoo majmuu. Ga̱jma̱a̱ rúʼko̱ ma̱ndoo mambáyulúʼ wéñuʼ.

14. Maski ajndu Jeobá kaʼyoo mañajunʼ ku̱ba̱ʼ, xú káʼnii eʼyámajkuu rí eraʼwíí maʼni mámbáa xá.

14 Á mu nakru̱ʼu̱lú xú káʼnii Jeobá naʼsngúlúʼ, mambáxulúʼ itháan májánʼ gajmiúlú a̱ngiu̱lú. Ma̱ngaa, mundxaʼwamíjna̱ rí májánʼ ga̱jma̱a̱ numún xa̱bu̱ náa nuʼtáraʼa ga̱jma̱a̱ xa̱bu̱ bi̱ nuʼsngúún ga̱jma̱a̱ numuu Biblia. Nákha wajyúúʼ,  índo̱ mbáa xa̱bu̱ nañajunʼ ku̱ba̱ʼ, mañúú mañúú ejkha̱ raʼni kaʼwii ga̱jma̱a̱ naguwíi itsí. Xúʼko̱ eʼni Jeobá, ikhaa nambáñun xa̱bu̱ bi̱ nandún majuiʼsngúún. Mú ndaʼyamajkuu rí eraʼwíí muni. Tsetsudiin muriʼkhumijná. Rí phú naʼni, mañúú mañúú eʼsngúún xú káʼnii nindxu̱u̱ ikha ndrígóo ga̱jma̱a̱ naniñuʼ rí ikhiin muraʼwíí á mu muriʼkhumijná.

15, 16. Xú káʼnii esngajma bi̱ kuwa runigajmaa Biblia rí nandún rí Jeobá maʼsngúún xá. Atagíʼ mbá xkri̱da.

15 Guʼyáá rí nigíʼnuu Tessie, mbáa ndxájulú bi̱ xtáa Australia. Índo̱ nigíʼdu̱u̱ niʼnigajmaa Biblia, ra̱mingíjyúuʼ niʼniuu makro̱ʼo̱o̱ rí xtáa rajmañuu. Mú tsiriʼkuminaʼ ní má tséjkha̱ náa reunión. Bi̱ naʼsngóo ga̱jma̱a̱ numuu Biblia niʼtájkáan náa Jeobá ga̱jma̱a̱ nindoo maniñuʼ raʼsngóo. Ikhú nirígá mbá rí tágiʼthu̱u̱n. Índo̱ kuwa runigajmaa, Tessie niʼthúu̱n bi̱ naʼsngóo náa numuu rí tsiriʼkuminaʼ. Niʼthúu̱n rí naku̱mu̱u̱ rí a̱jma̱ inuu numuu rí naniguʼ maʼtsíin ga̱jma̱a̱ numuu mbújkha̱a̱. Mú ikhú niʼthúu̱n rí nigíminaʼ rí ná xátanga̱a̱ maʼtsíin.

16 Tájyúuʼ índo̱ Tessie nigíʼdu̱u̱ ra̱jkha̱ reunión ga̱jma̱a̱ nisngajma rí naʼni xóo eʼni mbáa cristiano, maski ajndu bi̱ nimbáxu̱u̱ gajmíi̱n nákha ginii nutsijmaa. Nda̱wa̱á nijngúun iyááʼ ga̱jma̱a̱ ninindxu̱u̱ precursora regular maski ajndu gíʼdiin a̱jmi̱i̱n e̱ji̱n majkhinʼ. Índo̱ mbáa bi̱ xtáa raʼnigajmaa Biblia nagíʼdu̱u̱ nariʼkuminaʼ, Jeobá nakuʼmaminaʼ náa ikhaa ga̱jma̱a̱ naʼsngóo mu maʼga̱nú mani̱ndxu̱u̱ xóo mbá rayaʼ rí gíʼdoo wéñuʼ numuu.

17. a) Náa numuu rí nanigua̱ʼ ikháánʼ rí Jeobá nindxu̱u̱ bi̱ Niʼníín rá. b) Ndiéjunʼ gúʼyáá náa imbo̱o̱ artículo rá.

17 Rí mbiʼi xúgi̱ rígá xuajen náa bi̱ nuñajunʼ ku̱ba̱ʼ nuni xóó rayaʼ mitsaan ga̱jma̱a̱ ñawúúnʼ. Xúʼko̱ má kaʼnii Jeobá naxnúlú xtágabu mu maʼsngulúʼ, ga̱jma̱a̱ nda̱wa̱á ndaʼyoo xú káʼnii eriʼñalú (atraxnuu Salmo 32:8). * Lá nduʼyáá rí Jeobá naxmiéjunʼ kaʼyulú mámbáa rí ikháanʼlu rá. Lá nduʼyáá xú káʼnii nariʼkuáanʼlu tsumáá wéñuʼ xáʼ. Ndiéjunʼ gambáyulú mu manindxu̱lúʼ xóo ku̱ba̱ʼ rí Jeobá ma̱ndoo majmuu rá. Ndiéjunʼ guʼni gaʼduunʼ á mu tsíyulú manindxu̱lúʼ xóo ku̱ba̱ʼ rí xándoo majmaa rá. Ga̱jma̱a̱ xú káʼnii gándoo xa̱bu̱ muñajunʼ gajmiún Jeobá mu musngúún ejñúnʼ xá. Mbuʼyáá náa imbo̱o̱ artículo.

^ párr. 4 1 Samuel 16:7: “Mú Jeobá niʼthúu̱n Samuel: “Xáta̱ya̱a̱ xú káʼnii inuu ní xóo mba̱yi̱ʼ, numuu rí táraʼwíí ikhaa. Numuu dí raʼkháa xóo eʼyoo xa̱bu̱ xúʼko̱ eʼyoo Dios, numuu rí xa̱bu̱ i̱ndó ndaʼyoo rí inuu, mu Jeobá ndaʼyoo a̱jkiu̱u̱n”.

^ párr. 7 Hebreos 12:5, 6, 11: “Mú nigumala mbá kayuʼ rí nijuiʼtála ikháanʼ xóo e̱ji̱n: “A̱ʼdióoʼ, xáta̱ya̱a̱ rí asndu xóo ragíʼdoo numuu índo̱ naxpriguaʼ Jeobá, ní xákaguabáanʼ índo̱ ikhaa gáxpriguaʼ; numuu rí Jeobá naxprígúu bi̱ nandoo kaʼyoo; ikhaa naxpájtii bi̱ nagruiguíi xóo a̱ʼdióo”. Gajkhun má rí índo̱ nuxpriguáʼ tséʼni maraxtaa gagi, nindxu̱u̱ ma̱jti̱ʼ; mú nda̱wa̱á, bi̱ nigumaratiin ikhí, naʼni makuwá tsímáá ga̱jma̱a̱ jmbu”.

^ párr. 10 Salmo 103:10-14: “Jeobá nagáwiinʼ a̱jkiu̱u̱n ga̱jma̱a̱ májánʼ a̱jkiu̱u̱n, tsikiʼnáa nacha̱ ga̱jma̱a̱ naʼni wéñuʼ dí májánʼ. Ikhaa xaʼthuluʼ nángi eʼni rí nakiéʼkuluʼ, asndu má xakíʼnáa kámuu mbiʼi. Ikhaa tséʼni gínáanʼ ga̱jma̱a̱ numuu aʼkhá ndrígúlú; ga̱jma̱a̱ tséʼkha̱ kayóo dí ra̱májánʼ náa ikháanʼ índo̱ nuʼni dí raʼkhí. Xó má mekhu itháan mitsidaanʼ ki xóo ku̱ba̱ʼ, rí májánʼ wéñuʼ a̱jkiu̱u̱n itháan mba̱a̱ náa bi̱ namíñun kuyáá. Xó má mitsínguánʼ egajnuu a̱jkha̱ʼ asndu náa narmáʼáan, xúʼko̱ má mitsínguánʼ eniñuʼ aʼkhá ndrígúlú. Xó má mbáa xa̱bu̱ nagáwíínʼ a̱jkiu̱u̱n kaʼñúún e̱ji̱i̱n, xúʼko̱ má Jeobá nagáwíínʼ a̱jkiu̱u̱n kaʼñúún bi̱ nuni ñajunʼ. Numuu rí ikhaa ndaʼyoo rí xú káʼnii ni̱ndxu̱lú ga̱jma̱a̱ ikhaa ndaʼyoo rí yujndaʼ ñajunlú”.

^ párr. 17 Salmo 32:8: “Mani rí majmañaʼ, ga̱jma̱a̱ masngáaʼ náa kamba̱a̱ rí gíʼmaa midxuʼ. Maxtáá rayaʼ índo̱ gaxnaʼ xtágabu”.