Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Junio tsiguʼ 2016

Rí gíʼdoo itháan numuu ki xóo diamantes

Rí gíʼdoo itháan numuu ki xóo diamantes

Xa̱bu̱ nduyáá rí gíʼdoo wéñuʼ numuu diamantes xóo xábí rí mitsaan wéñuʼ. Tikhuu minumuu millones rí mbújkha̱a̱ dólar. Mú Dios ndaʼyoo dí rígá imbo̱o̱ rí itháan gíʼdoo numuu xóo diamantes o i̱ʼwáʼ xábí. Ndiéjunʼ nindxu̱u̱ rá.

 Haykanush nindxu̱u̱ mbáa a̱ʼgu̱ bi̱ xtáa ga̱jma̱a̱ ajmbio̱o̱ náa xuajen Armenia. Nájmi̱i̱n ni̱ndxu̱ún publicadores bi̱ xóó tséjngúun iyááʼ. Xóo, muʼthá, xóó tséjngúun iyááʼ mú nagájnún gutaraʼa. Mbá mbiʼi, ikhaa nixkamaa mbá pasaporte mijngii náa xtáa. Náa awúu̱n pasaporte gajthi tarjetas ndrígóo banco ga̱jma̱a̱ mba̱a̱ wéñuʼ mbújkha̱a̱. Ikhaa niʼthúu̱n ajmbio̱o̱ rí nixka̱ma̱a̱.

Ikhiin niguáʼdáá mba̱a̱ xkujndu ga̱jma̱a̱ numuu mbújkha̱a̱ ma̱ngaa gidxóó rí ndayóoʼ muni numa̱a̱. Mú taguanún ga̱jma̱a̱ mbújkha̱a̱, ikhiin nigún ku̱ñu̱u̱n náa dirección rí kama náa pasaporte. Xa̱bu̱ bi̱ ndrígóo pasaporte ga̱jma̱a̱ bi̱ kuwa náa goʼwóo niguanún tsiánguá. Haykanush ga̱jma̱a̱ ajmbio̱o̱ nithi rí kuwa runigajmaa Biblia ga̱jma̱a̱ nijmañún rí gíʼmaa muni rí jmbu. Ma̱ngaa nithúún ga̱jma̱a̱ numuu bi̱ nutaraʼa numuu Jeobá ma̱ngaa niniñaaʼ mbaʼa i̱yi̱i̱ʼ rí nagájnuu náa Biblia.

Bi̱ kuwa mbá guʼwíin nindúún muxnáá mbújkha̱a̱ Haykanush, mú ikhaa tágruigú. I̱mba̱ néjtsuu, a̱ʼgiu̱u̱ bi̱ ndrígóo pasaporte ni̱jkha̱ gáʼyoo Haykanush ga̱jma̱a̱ ajmbio̱o̱. Ga̱jma̱a̱ mu masngájma rí naxnáa wéñuʼ núma̱aʼ, ikhaa nixnúu Haykanush mbá anillo rí gíʼdoo diamantes.

Xó má mbá guʼwíin xa̱bu̱ bugi̱ mbaʼin xa̱bu̱ maʼniún tsiánguá rí niʼni Haykanush ga̱jma̱a̱ ajmbio̱o̱. Mú, lá naʼniuu tsiánguá Jeobá ráʼ. Ndiéjunʼ endxa̱ʼóo edxu̱u̱ ikhaa ga̱jma̱a̱ numuu rí májánʼ niʼni xá. Lá nigiʼdoo numuu rí ikhiin muni rí jmbu xáʼ.

RÍ ITHÁAN GÍʼDOO NUMUU KI XÓO RÍ MARAʼDÁÁ WÉÑUʼ

Ra̱mingíjyúuʼ maxtiʼña̱a̱ graxe̱ rígi̱. Náa numuu rá. Numuu rí xa̱bi̱i̱ Dios nduyáá rí mbuyaridáá rí xóo nindxu̱u̱ Jeobá gíʼdoo itháan numuu náa ikhaa ki xóo oro, diamantes o i̱ʼwáʼ rí gíʼdoo numuu. Jeobá ndaʼyoo mbá rí gíʼdoo numuu rí xa̱bu̱ tséyáá xúʼko̱ kaʼnii (Is. 55:8, 9). Ikhaa ndaʼyoo rí gíʼdoo wéñuʼ numuu tsiakii rí nuni xa̱bi̱i̱ mu mbuyaridáá rí xóo nindxu̱u̱ ikhaa.

Mbá xkri̱da, guʼyáá rí naʼthí náa Biblia ga̱jma̱a̱ numuu rí makruaʼaʼ ma̱ngaa numuu ku̱ma̱ náa Proverbios 3:13-15: “Tsímáá xtáa xa̱bu̱ bi̱ naxkamaa itháan ku̱ma̱, ga̱jma̱a̱ xa̱biya̱ bi̱ najmañuu maraʼwíí rí maʼni, numuu rí matada̱ʼ rígi̱ nindxu̱u̱ itháan ki xóo plata; ga̱jma̱a̱ itháan nayambáá ki xóo oro. Nindxu̱u̱ itháan mitsaan ki xóo corales, asndu nda̱a̱ i̱mba̱ rí nandaʼ ikháánʼ rí ma̱ndoo maraʼni̱i̱ ga̱jma̱a̱”. Nduʼyáá májánʼ rí Jeobá ndaʼyoo rí gíʼdoo numuu xúgíʼ rígi̱ itháan ki xóo mbá tesoro.

Ndiéjunʼ gándoo gúʼthá ga̱jma̱a̱ numuu rí matani rí jmbu rá.

Mínaʼ Jeobá naʼni rí jmbu. Náa Biblia naʼthí rí ikhaa ‹xándoo maʼni nduwaʼ› (Tito 1:2). Ga̱jma̱a̱ ikhaa niʼni rí apóstol Pablo maʼnirámáʼ ajngáa rígi̱ náa inún mbá nguéjmi̱i̱n cristianos: “Gakuwáanʼ rutajkháan ga̱jma̱a̱ numuxu, numuu rí nduyaxu dí kaʼwu ku̱ma̱ ndrígúxu̱, numuu dí nanduxu muthaxu rí gajkhun o rí jmbu náa xúgíʼ” (Heb. 13:18).

Jesucristo nixná mbá májánʼ xkri̱da rí manindxu̱lúʼ xa̱bu̱ jmbii. Mbá miʼtsú, Caifás bi̱ kayá edxu̱u̱ náa ndxajkun niʼthúu̱n: “Gajma mbiʼyu Dios tsi ndaʼya, natajañaʼ ri maratanʼxoʼ xi Ikan ñajuanʼ Cristo tsi ñajun Ade Dios”. Jesús ninindxu̱u̱ jmbii ga̱jma̱a̱ niʼthí rí ikhaa nindxu̱u̱ Cristo o Mesías. Niʼthí rí jmbu maski ajndu ndiʼyoo rí Xa̱bu̱ Ñajunʼ judío ma̱ndoo muxruiga̱a̱ numuu rí niʼthí dí ra̱májánʼ náa inuu Dios ga̱jma̱a̱ muxuʼma muxiyáa (Mat. 26:63-67).

 Ikháánʼ rá. Lá ma̱ndoo matada̱ʼ itháan á mu natani nduwaʼ o tserata mbájmbu ráʼ. Mbáa asndu ma̱ndoo matambáñun eʼwíínʼ á mu natani nduwaʼ. Lá manindxa̱ʼ xóó xa̱bu̱ jmbii ráʼ.

NÁA NUMUU RÍ MINGÍJYÚUʼ MUʼNI RÍ JMBU RÁ.

Náa iwáá mbiʼi rígi̱ mingíjyúuʼ nindxu̱u̱ matani rí jmbu numuu rí mbaʼin xa̱bu̱ i̱ndó naxmiéjunʼ kuyamijná ga̱jma̱a̱ numún ga̱jma̱a̱ nanigu̱nʼ wéñuʼ mbújkha̱a̱ (2 Tim. 3:2). Índo̱ nda̱a̱ mbújkha̱a̱ o naʼni mingíjyúuʼ makhánun ñajunʼ, mbaʼin nuni kuʼwáʼ, nuni nduwaʼ o asndu i̱ʼwáʼ dí ra̱májánʼ. Rígi̱ naguʼwún nuni mbaʼin xa̱bu̱ ma̱ngaa nakumu̱ún rí i̱ndó xúʼko̱ ma̱ndoo makhánun rí nda̱ñúnʼ. Asndu tikhun cristianos naguanu nuni mbaʼa dí ra̱májánʼ. Ga̱jma̱a̱ nda̱wa̱á nandáti̱gu̱u̱n gamajkhu náa congregación (1 Tim. 3:8; Tito 1:7).

Mú mbaʼin cristianos nduyaridáá Jesús ga̱jma̱a̱ ni̱ndxu̱ún jmbiin. Nduyáá rí  mbuyaridáá Dios gíʼdoo itháan numuu ki xóo mbá rí gíʼdoo numuu o mbá rí mambáyaʼ ikháánʼ. Ikha jngó jiáma o wa̱ʼxa̱ʼ bi̱ kuwa náa escuela tseni nduwaʼ mu makhánun májánʼ calificación (Prov. 20:23). Raʼkháa má xúgíʼ mbiʼi gúxnaʼ gamajkhu ga̱jma̱a̱ numuu rí natani, xóo nigíʼnuu Haykanush. Maski ajndu xúʼko̱, Dios naʼthí rí matani rí jmbu nindxu̱u̱ májánʼ. Rígi̱ nambáyulúʼ mu xáʼni gawúnlú ku̱ma̱ ndrígúlú, rí gíʼdoo wéñuʼ numuu.

Xkri̱da ndrígóo Gagik ma̱ngaa nasngájmulúʼ rí itháan májánʼ manindxu̱lúʼ xa̱bu̱ jmbii. Ikhaa naʼthí rí nákha xóó tsénindxu̱u̱ xa̱bi̱i̱ Jeobá, nañajunʼ náa mbá empresa mba̱a̱. Mú xáʼni numa náa Xa̱bu̱ Ñajunʼ, xa̱bu̱ bi̱ ndrígóo empresa tséʼthi xúgíʼ rí na̱da̱ʼ náa nagujua̱. Numuu rí Gagik ninindxu̱u̱ director, ndiyóoʼ rí ikhaa maxnúu mbújkha̱a̱ inspector ndrígóo Xa̱bu̱ Ñajunʼ mu manújngorámuʼ rí xtáa raʼni empresa. Ikha jngó Gagik nijmaʼniiʼ xóo mbáa xa̱bu̱ bi̱ tséʼni rí jmbu. Mú nijmañuu rí naʼsngáa náa Biblia ga̱jma̱a̱ niʼni gaʼduunʼ maʼni dí ra̱májánʼ, maski ajndu na̱da̱ʼ májánʼ. Ikha jngó nigíʼ empresa ndrígóo. Asndu nákha timbá mbiʼi niʼni xó má kaʼyoo ga̱jma̱a̱ niʼni numuu xúgíʼ xó má eʼthá xtángoo (2 Cor. 8:21).

Ma̱ngaa, Gagik naʼthí rí numuu rí na̱da̱ʼ tapha rí xóo nákha ginii, niʼni mingíjyúuʼ maxnún rí ndañún bi̱ kuwa náa goʼwóo. Mú xúgi̱ xtáa itháan gagi ga̱jma̱a̱ xtáa tsímáá náa iduu Jeobá. Naxnún mbá májánʼ xkri̱da nájmi̱i̱n e̱ji̱i̱n ga̱jma̱a̱ gíʼdoo ñajunʼ náa congregación. Ma̱ngaa najmaʼniiʼ rí nindxu̱u̱ mbáa xa̱bu̱ jmbii náa Xa̱bu̱ Ñajunʼ ga̱jma̱a̱ náa eʼwíínʼ xa̱bu̱ bi̱ nañajunʼ gajmíi̱n.

JEOBÁ NAMBÁYULÚ

Jeobá nandoo kaʼñún bi̱ nduyamajkuíí ma̱ngaa nduyaridáá rí nindxu̱u̱ jmbii (Tito 2:10). Ikhaa nakudaminaʼ rí mambáyulúʼ á mu nuʼgíʼ nduʼyaridáá rí xóo káʼnii nindxu̱u̱ ikhaa. Jeobá niʼni rí rey David maʼnirámáʼ rí maski ajndu ikhaa nindxu̱u̱ mbáa xa̱bu̱ nikhi̱i̱, nimbá miʼtsú táʼyoo mbáa xa̱bu̱ jmbii maguanáti̱go̱o̱ ní má e̱ji̱i̱n bi̱ nda̱a̱ rí mu̱phu̱ (Sal. 37:25).

Mbá xkri̱da ninindxu̱u̱ Rut bi̱ niʼni rí jmbu. Ninindxu̱u̱ mbáa a̱ʼgu̱ bi̱ tániñuʼ dxagiu̱u̱ maski ajndu nikhi̱i̱. Rut ni̱jkha̱ gáxtáa náa Israel, náa nindoo mbaʼyamajkuu Dios gajkhun (Rut 1:16, 17). Ninindxu̱u̱ mbáa a̱ʼgu̱ bi̱ niʼni rí jmbu bi̱ niñajunʼ gakhii, niguxi̱i̱ rí niniñaaʼ xa̱bu̱ náa mbaaʼ rí nuraxi̱i̱ xa̱bu̱ gíníi xó má niʼthí náa xtángoo ndrígóo Moisés. Jeobá niña̱wu̱u̱n má xúʼko̱ Rut ga̱jma̱a̱ dxagiu̱u̱, xó má niʼni ga̱jma̱a̱ rey David tsiguʼ nda̱wa̱á (Rut 2:2-18). Mú Dios raʼkháa i̱ndó rúʼko̱ niʼni ga̱jma̱a̱ Rut ma̱ngaa nixnúu rí ndiyóoʼ. Niʼni rí Rey David ga̱jma̱a̱ Mesías ma̱ʼkha̱ náa ikhaa (Rut 4:13-17; Mat. 1:5, 16).

Rí mbiʼi xúgi̱, mbaʼin xa̱bi̱i̱ Dios naʼniún mingíjyúuʼ muguaʼdáá rí nda̱ñúnʼ. Mú ikhiin na̱nguá eyááʼ mbá rí xáʼniun mingíjyúuʼ ga̱jma̱a̱ muni xóo dí rakáʼyoo. Rí nuni, nunimi̱jna̱ muñajunʼ májánʼ. Xúʼko̱ nusngajma rí xóo nindxu̱u̱ Dios bi̱ naʼni rí jmbu itháan gíʼdoo numuu ki xóo i̱ʼwáʼ (Prov. 12:24; Efes. 4:28).

Náa xúgíʼ numbaaʼ, cristianos nduyaridáá Rut ga̱jma̱a̱ nusngajma rí Dios ma̱ndoo mañewu̱u̱n. Nduyáá rí mambanúu ajngáa rígi̱ rí niʼthí Jeobá: “Nimbá miʼtsú xániʼñáʼ ga̱jma̱a̱ xániʼñátiga̱a̱n” (Heb. 13:5). Mbaʼa nuthu Jeobá nisngájma rí ikhaa nambáñun bi̱ nuni rí jmbu. Ikhaa naʼnimbánuu má xúʼko̱ rí maxnún xa̱bi̱i̱ rí nda̱ñúnʼ (Mat. 6:33).

Xa̱bu̱ numbaaʼ nduyamajkuíí wéñuʼ diamantes ga̱jma̱a̱ eʼwíínʼ i̱ʼwáʼ rí gíʼdoo wéñuʼ numuu. Mú Anu̱lú bi̱ xtáa mekhuíí ndaʼyoo rí itháan gíʼdoo numuu muʼthá rí gajkhun ga̱jma̱a̱ i̱ʼwáʼ rí xú ni̱ndxu̱lú ki xóo mbá xábí rí gíʼdoo numuu.

Índo̱ nuʼni rí jmbu, ma̱ndoo muʼtáraʼa tsímáá rí xáʼni gawúunʼ ku̱ma̱ ndrígúlú.