Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Julio tsiguʼ 2016

“Xámiñaʼ. Ikhúúnʼ má gambayaaʼ”

“Xámiñaʼ. Ikhúúnʼ má gambayaaʼ”

GUNDXAʼWAMÍJNA̱ rí kuwaanʼ ra̱jkua̱ náa mbá calle índo̱ mbruʼun má. Nda̱a̱ tsu̱ma̱ eʼyáá rí mbáa na̱ʼkha̱ ki̱dxu̱lú. Á mu naguajúnlu, ma̱ngaa nawi̱ji̱. Á mu na̱jkua̱ itháan nacha̱, ma̱ngaa na̱jkha̱ itháan nacha̱. Ikhú narmáʼáan a̱jkiu̱lú rí mijngii ikhí xtáa mbáa bi̱ nambáxulúʼ gajmiúlú. Ikha jngó nagayúlú asndu índo̱ na̱jkua̱nú náa goʼwóo. Índo̱ ikhaa narmbáʼtoo xkrugua ga̱jma̱a̱ naniñulú manújngulú, naʼni̱i̱ a̱jkiu̱lú numuu rí nduʼyáá rí nikáwáanʼ.

Mbáa rígi̱ nimbá miʼtsú tagíʼnulu. Mú mbáa rígá i̱ʼwáʼ rí naʼni maxmiéjunʼlú. Mbá xkri̱da, lá kuwaanʼ ru̱ʼni̱ gajmiúlú mbá rí naʼni makiéʼkulú mu najpátriguáanʼ nángi eʼni ráʼ. Lá nánguá kuaʼdáá ñajunʼ ga̱jma̱a̱ naʼni mingíjyúuʼ muxkamaa imbo̱o̱ ráʼ. Lá naxmiéjunlú rí na̱jkha̱ raganiáanʼ ga̱jma̱a̱ rí naʼniulú nandii ráʼ. Lá rígá imbo̱o̱ rí naʼni maxmiéjunʼlú ráʼ.

Tséʼniuu má káʼnii exmiéjunlú, májánʼ rí mambáxulu gajmiúlú mbáa bi̱ maʼdxawunlu ga̱jma̱a̱ rí maʼndoo mambáyulúʼ. Lá kuaʼdaa mbáa xúʼko̱ kaʼnii ráʼ. Xúʼko̱. Jeobá nindxu̱u̱. Ikhaa nimbáxu̱u̱ májánʼ ga̱jma̱a̱ Abrahán bi̱ ninindxu̱u̱ jmbii, xóo eʼthí náa Isaías 41:8-13. Náa versículo 10, Jeobá nakudaminaʼ náa mámbáa rí ikháanʼ: “Xámiñaʼ, numuu rí ikhúúnʼ xtáá ga̱jma̱ʼ. Xatiexi asndu náa, numuu dí ni̱ndxu̱ʼ Dios ndrígáʼ. Gajkhun dí ikhúúnʼ mani gakhi̱i̱ a̱jkia̱nʼ. Phú gajkhun dí ikhúúnʼ mambáyaʼ. Xúʼko̱, phú gajkhun rí ikhúúnʼ magujtúwíín ga̱jma̱a̱ ñawun mújúnʼ dí naʼni dí jmbu”. Ga̱jma̱a̱ náa versículo 13 naʼthí: “Ikhúúnʼ Jeobá Dios ndrígáʼ, xtáá ragújtúun ñawun májáánʼ, Bi̱ naʼthán: ‹Xámiñaʼ. Ikhúúnʼ má gambayaaʼ›”.

“IKHÚÚNʼ MAGUJTÚWÍÍN”

Ajngáa ndrígóo Jeobá rí nuraxnuu náa Isaías naʼni̱i̱ a̱jkiu̱lú wéñuʼ. Lá nuʼgíiʼ nundxa̱ʼwa̱míjna̱ rí Jeobá nakudaminaʼ maxnúlúʼ ráʼ. Náa versículo rígi̱ tséʼthi rí kuwaanʼ rajkua náa níjniúu Jeobá ga̱jma̱a̱ ikhaa nagujtun ñawúnluʼ. Á mu xúʼko̱, ikhaa magujtuun ga̱jma̱a̱ “ñawun mújúnʼ” ñawun xti̱yu̱lú. Mú náa versículo naʼthí rí Jeobá nakruiyaʼ “ñawun mújúnʼ dí naʼni dí jmbu” ga̱jma̱a̱ nagujtun ñawun mújúnlú, xóo nandoo makudáanʼlu ga̱jma̱a̱ maguwáanʼ náa mbá xkujndu gakhii. Índo̱ ikhaa nagujtun ñawun mújúnlú, naxnúlú tsiakii índo̱ naʼthí: “Xámiñaʼ. Ikhúúnʼ má gambayaaʼ”.

Lá nduʼyáá Jeobá xóo mbáa bi̱ nambáxulúʼ gajmiúlú ga̱jma̱a̱ xóo Anu̱lú bi̱ nandoo kaʼyulúʼ ráʼ. Lá nakumulú rí ikhaa gambáyulú índo̱ gúraʼní xkujndu ráʼ. Ikhaa naxmiéjunʼ kaʼyulú ga̱jma̱a̱ nandoo mambáyulúʼ. Índo̱ kuaʼdáá xkujndu, nandoo rí makuwaanʼ tsímáá. Náa numuu rá. Numuu rí nandoo kaʼyulú wéñuʼ. “Ikhaa mambáyulúʼ nacha̱ índo̱ kuaʼdáálu gamiéjunʼ” (Sal. 46:1).

LÁ NAGAWUNLU GA̱JMA̱A̱ RÍ NIKIÉʼKULU RÁʼ.

Tikhun cristianos nundxa̱ʼwa̱míjna̱ má xúʼko̱ ga̱jma̱a̱ numuu rí nikiéʼkhun nákha wajyúúʼ ga̱jma̱a̱  nuraximíjna̱ á mu Dios niʼni mba̱a̱ a̱jkiu̱u̱n kaʼñún. Á mu nakumulú xúʼko̱, gundxaʼwamíjna̱ ga̱jma̱a̱ numuu Job bi̱ ninindxu̱u̱ jmbii. Ikhaa ndiʼyoo rí nikudaminaʼ aʼkhá índo̱ ninindxu̱u̱ mbáa dxámá (Job 13:26). David ma̱ngaa ndiʼyoo rí nikudaminaʼ aʼkhá índo̱ ninindxu̱u̱ mbáa dxámá. Ikha jngó nindo̱ʼo̱o̱ Jeobá rí xarmáʼáan a̱jkiu̱u̱n ga̱jma̱a̱ numuu aʼkhúun (Sal. 25:7). Numuu rí xúgínʼ ni̱ndxu̱ún xa̱bu̱ aʼkhá, náa Biblia naʼthí rí “xúgínʼ nixudami̱jna̱ aʼkhá ga̱jma̱a̱ na̱nguá eʼngu̱u̱n gúxkamaa gloria ndrígóo Dios” (Rom. 3:23).

Ajngáa rí na̱ʼkha̱ náa Isaías 41 nigumaraʼmáʼ mu mudxawíín israelitas. Ikhiin nixudami̱jna̱ aʼkhá rí mitsáʼkhúun wéñuʼ rí Jeobá niʼthí maxnún castigo índo̱ gáʼga kiʼdiin náa Babilonia (Is. 39:6, 7). Mú ma̱ngaa niʼthúu̱n rí maʼni káwi̱i̱n bi̱ gátangi̱i̱n náa ikhaa (Is. 41:8, 9; 49:8). Rí mbiʼi xúgi̱, Jeobá ma̱ngaa nasngájma rí nandoo kaʼñún ga̱jma̱a̱ nagáwiinʼ a̱jkiu̱u̱n náa xa̱bu̱ bi̱ natangi̱ín ga̱jma̱a̱ xúgíʼ a̱jkiu̱ún ma̱ngaa nunimi̱jna̱ mu muni rí naniguʼ (Sal. 51:1).

Guʼyáá rí nigíʼnuu mbáa cristiano bi̱ nagumbiʼyuu Takuya. * Ikhaa naʼniminaʼ mu xáʼyoo pornografía ga̱jma̱a̱ xáʼni rí maku̱mu̱u̱ rí xtáa rabóoʼ ga̱jma̱a̱ mbáa. Mú nakiéʼkúun nángi eʼni. Ikhaa nikumu̱u̱ rí na̱nguá gíʼdoo nditháan numuu. Mú índo̱ naʼthá kháñuu Jeobá rí mani mba̱a̱ a̱jkiu̱u̱n kaʼyoo, naku̱mu̱u̱ rí Dios nakuxi̱i̱ nda̱wa̱á rí nijpátriga̱a̱. Xú káʼnii niʼni rúʼko̱ Jeobá rá. Nijmiuu bi̱ kuya̱ edxu̱u̱. Ikhiin nitháán Takuya rí maʼtáruʼun ga̱jma̱a̱ teléfono mámbá rí nakiéʼkúun. Ikhaa ndaʼyoo rí mingíjyúuʼ rí maʼtáruʼun mú índo̱ naʼni xúʼko̱ ikhaa naxtáa itháan májánʼ. Mbá mbiʼi, bi̱ kuya̱ edxu̱u̱ ninda̱ʼa̱a̱ superintendente ndrígóo circuito rí magún gúyáá Takuya. Índo̱ superintendente ni̱jkha̱ gáʼyoo, niʼthúu̱n rí ikhaa na̱nguá xtáa ikhí numuu rí ikhaa nandoo, bi̱ kuya̱ edxu̱u̱ ndiyáaʼ ikhaa mu magún gúyáá. Takuya naʼthí rí maski ajndu ikhaa xtáa raʼni aʼkhá, Jeobá nijmiuu bi̱ kuya̱ edxu̱u̱ mu mumbayíí. Nda̱wa̱á niniñuʼ raʼni aʼkhá ga̱jma̱a̱ ninindxu̱u̱ precursor regular. Rí xúgi̱ xtáa náa mbá sucursal. Jeobá nimbáyúu ndxájulú bugi̱, ga̱jma̱a̱ mambáyulúʼ mangáanʼ índo̱ guxuʼdámíjná aʼkhá.

ÍNDO̱ NAXMIÉJUNLÚ MBUʼYÁAʼ MBÁ ÑAJUNʼ

Tikhun naxmiéjúnʼ wéñuʼ numuu rí nánguá guáʼdáá mbá ñajunʼ ga̱jma̱a̱ na̱nguá exkamaa imbo̱o̱. Mingíjyúuʼ nindxu̱u̱ índo̱ mbaʼin xa̱bu̱ tsíñún gúxnún ñajunʼ. Rígi̱ naʼni rí mbaʼin makumún rí na̱nguá guáʼdáá numún. Á mu nagíʼnulú rígi̱, xú káʼnii gándoo gambáyulú Jeobá rá. Mbáa xáxnulú mbá nacha̱ mbá ñajunʼ májánʼ wéñuʼ, mú ma̱ndoo maʼni marmáʼáan a̱jkiu̱lú ajngáa rígi̱ rí niʼthí David: “Mbáa dxámá ninindxu̱ʼ ikhúúnʼ, rí xúgi̱ nikiu̱u̱n má, mú xóó tséyóo nimbáa xa̱bu̱ jmbii bi̱ niniñaaʼ mbá kayuʼ, ní má e̱ji̱i̱n rí nduyaaʼ pan” (Sal. 37:25). Kuaʼdáá wéñuʼ numuu náa inuu Jeobá. Ikhaa naxnúlú “ñawun mújúnʼ dí naʼni dí jmbu” mu muguaʼdáá rí ndayúlú mu muʼni ñajuunʼ má xúʼko̱.

Xú káʼnii gándoo gambáyulú Jeobá á mu nánguá kuaʼdáá ñajunʼ rá.

Náa Colombia, mbáa ndxájulú bi̱ nagumbiʼyuu Sara ndiʼyoo xú káʼnii Jeobá nimbáyúu. Ikhaa niñajunʼ xúgíʼ mbiʼi náa mbá compañía rí gíʼdoo wéñuʼ numuu ga̱jma̱a̱ nidaaʼ wéñuʼ mbújkha̱a̱. Mú nindoo maʼni itháan ñajunʼ Jeobá. Ikha jngó niniñuʼ ñajunʼ rúʼko̱ ga̱jma̱a̱ ninindxu̱u̱ precursora. Numuu  rí niʼniuu mingíjyúuʼ maxkamaa mbá ñajunʼ náa xáʼyóoʼ mañajunʼ xúgíʼ mbiʼi, nigíiʼ náa naxtango̱jo̱o̱ helado. Mú nánguá nigiʼdoo mbújkha̱a̱ ikha jngó ndiyóoʼ marugua̱a̱. Ikhaa niʼthí rí ajtsú tsiguʼ niʼni mba̱yu̱ʼ wéñuʼ, mú Jeobá nimbáyúu maʼngo̱o̱. Nijmañuu mbaʼyoo ndiéjunʼ rí ndayóoʼ itháan ga̱jma̱a̱ ndiéjunʼ gáʼni mu xaxmiéjunʼ wéñuʼ rí xú káʼnii gaxtáa imbá néjtsuu (Mat. 6:33, 34). Nda̱wa̱á, xa̱bu̱ bi̱ niñajunʼ ga̱jma̱a̱ nákha ginii niʼtároʼoo mu maxnúu ñajunʼ rí nigiʼdoo ginii. Ikhaa niʼthúu̱n rí mañajunʼ á mu i̱ndó nañajunʼ tapha mbiʼi ga̱jma̱a̱ á mu naxnúu mbiʼi mu maʼga̱ reunión ga̱jma̱a̱ asambleas. Xa̱bu̱ niʼthí rí ma̱ndoo. Rí xúgi̱ Sara nánguá edaaʼ wéñuʼ xóo nákha ginii, mú xóó nindxu̱u̱ precursora. Ikhaa naʼthí rí índo̱ niraʼnuu mbiʼi mingíjyúuʼ ndiʼyoo xú káʼnii Jeobá nimbáyúu májánʼ wéñuʼ.

ÍNDO̱ NAXMIÉJUNLÚ RÍ MAʼNI XA̱BU̱ GUANIÁNʼ

Mbaʼin naxmiéjunʼ numuu rí na̱jkha̱ raʼni xa̱bu̱ guanii ga̱jma̱a̱ rí inu muniñaʼ ruñajunʼ. Nuraximíjna̱ á mu maguaʼdáá mbújkha̱a̱ mu makuwá tsímáá. Ma̱ngaa naxmiéjunʼ numuu dí tsíñún maʼniún nandii nda̱wa̱á. Mbáa rey David niʼthá kháñuu Jeobá: “Xátatsiʼñúʼ rí nikiu̱u̱n má; xátatsiʼñúʼ índo̱ nándáa tsiakii ndrígóʼ” (Sal. 71:9, 18).

Ndiéjunʼ gambáñun xa̱bu̱ guanii mú xaxmiéjunʼ wéñuʼ ga̱jma̱a̱ numuu rí garigá nda̱wa̱á rá. Rí muguaʼdáá itháan fe náa Dios ga̱jma̱a̱ rí makumún kuyáá rí ikhaa má gáxnún xúgíʼ rí nda̱ñúnʼ. Tikhun nikuwa májánʼ índo̱ niguáʼdáá itháan mbújkha̱a̱. Ikha jngó mbáa mbaʼyóoʼ majmañún makuwa gagi ga̱jma̱a̱ rí guáʼdáá. Mbáa asndu mbuyáá rí itháan mambáñun mu xáʼniun nandii á mu naʼphu̱ “mbá xúbá yaʼwu” ki xó mbá xúbá xuwiʼ miʼtsí (Prov. 15:17). Á mu nuʼni má xúʼko̱ ñajunʼ Jeobá, ikhaa mbaʼyoo májánʼ rí maguaʼdáá xúgíʼ rí gáʼyulúʼ índo̱ ganindxu̱lú xa̱bu̱ guaniánʼ.

José ga̱jma̱a̱ Rose ma̱ngaa Tony ga̱jma̱a̱ Wendy

Gundxaʼwamíjna̱ numuu José ga̱jma̱a̱ Rose, xa̱bu̱ gajmii bi̱ kuwa runi káxi̱ ñajunʼ Jeobá mbá 65 tsiguʼ. Náa xúgíʼ tsiguʼ rígi̱ niraʼníí mbaʼa xkujndu. Mbá xkri̱da, ndiyóoʼ muñewa̱a̱n anu̱u̱ Rose, bi̱ ndiyóoʼ muñewa̱a̱n kañiʼ mbruʼun ga̱jma̱a̱ kañiʼ mbiʼi. Ma̱ngaa, José ndiyóoʼ muthii ga̱jma̱a̱ numuu cáncer ma̱ngaa magruigú quimioterapia. Xú káʼnii nimbáñun Jeobá xa̱bu̱ gajmii bugi̱ ráʼ. Nijmiuu a̱jmi̱i̱n xa̱bi̱i̱ bi̱ nagumbiʼñún Tony ga̱jma̱a̱ Wendy. Ikhiin guáʼdáá mbá guʼwá ga̱jma̱a̱ nindúún rí majmúún xúʼkhiín bi̱ kuwa rúni ñajunʼ Jeobá káxi̱. Tony narmáʼáan a̱jkiu̱u̱n rí índo̱ xtáa náa secundaria, índo̱ nayexi náa ventana ndaʼñún rí nutaraʼa má xúʼko̱ José ga̱jma̱a̱ Rose. Ra̱ʼkha̱ tháán eniguʼ mbaʼyoo rí ikhiin kuwa rutaraʼa ga̱jma̱a̱ gagi, rígi̱ niʼni maguanún tsiánguá. Xóo má José ga̱jma̱a̱ Rose nini ñajunʼ Jeobá xúgíʼ mbiʼi ndrígu̱ún, Tony ga̱jma̱a̱ Wendy nixnátiʼñun guʼwá. Ikhiin nimbañúún má gu̱wa̱ʼ nítsu tsiguʼ José ga̱jma̱a̱ Rose, rí xúgi̱ guáʼdáá mbáa 85 tsiguʼ. José ga̱jma̱a̱ Rose nduyáá Tony ga̱jma̱a̱ Wendy xóo mbá regalo ndrígóo Jeobá.

Jeobá naʼthúlúʼ rígi̱: “Xámiñaʼ. Ikhúúnʼ má gambayaaʼ”. Ikhaa ma̱ngaa naxnúlú “ñawun mújúnʼ dí naʼni dí jmbu”. Lá muxruiyaʼ ñawúnlú mu murajtuun ñawúunʼ ikhaa xáʼ.

^ párr. 11 Nixtiʼkhu̱u̱ mbiʼñún.