Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Diciembre tsiguʼ 2016

“Á mu nundxa̱ʼwa̱míjna̱ náa espíritu nandoo gáʼthúu̱n vida ga̱jma̱a̱ tsímáá”

“Á mu nundxa̱ʼwa̱míjna̱ náa espíritu nandoo gáʼthúu̱n vida ga̱jma̱a̱ tsímáá”

“Bi̱ nakuwa xó má espíritu, nuni xó má eyoo espíritu” (ROMANOS 8:5).

AJMÚÚ 57 GA̱JMA̱A̱ 52

1, 2. Ndíjkha rí gíʼdoo wéñuʼ numuu capítulo 8 ndrígóo Romanos náa bi̱ kaxtaʼwíin rá.

ÍNDO̱ nuʼniku̱ma̱a̱ rí nikháñu Jesús, ma̱ndoo muraxnuu Romanos 8:15-17. Versículos rígi̱ naʼthí xú káʼnii eyáá bi̱ kaxtaʼwíin rí guáʼthi̱i̱n makuwá kámuu mekhuíí. Romanos 8:1 naʼthí rí bi̱ kaxtaʼwíin kuwa “kambáxu̱u̱n gajmiún Cristo Jesús”. Mú, lá nigumaraʼmáʼ capítulo 8 ndrígóo Romanos i̱ndó mu munimbaníí bi̱ kaxtaʼwíin ráʼ. Lá ma̱ndoo mambáñun mangiin bi̱ guáʼthi̱i̱n makuwá kámuu mbiʼi náa tsu̱du̱u̱ Ku̱ba̱ʼ ráʼ.

2 Náa capítulo 8 ndrígóo Romanos nigumaraʼmáʼ itháan mu mbuyáá bi̱ kaxtaʼwíin. Náa capítulo rígi̱ naʼthí rí bi̱ kaxtaʼwíin nundrigú “espíritu” ga̱jma̱a̱ guáʼthi̱i̱n rí magruiguíin “xóo e̱ji̱i̱n, índo̱ niguma káwíin” náa xuñúnʼ (Rom. 8:23). Índo̱ nagabi̱ín mekhuíí, naguánu nanindxuún e̱ji̱i̱n Dios. Ga̱jma̱a̱ numuu rí niʼtsiwáanʼ, Jeobá niʼni mba̱a̱ a̱jkiu̱u̱n kaʼyoo aʼkhá ndrígu̱ún ga̱jma̱a̱ naʼthí rí ni̱ndxu̱ún jmbiin, ikha jngó  ma̱ndoo mani̱ndxu̱ún e̱ji̱i̱n ikhaa (Rom. 3:23-26; 4:25; 8:30).

3. Náa numuu rí gíʼmaa muʼnigajmaa capítulo 8 ndrígóo Romanos bi̱ guáʼthi̱i̱n makuwá kámuu náa tsu̱du̱u̱ Ku̱ba̱ʼ rá.

3 Náa capítulo 4 ndrígóo Romanos, Pablo niʼnirámáʼ ga̱jma̱a̱ numuu Abrahán. Xa̱biya̱ bugi̱ nixtáa mba̱yu̱ʼ tsiguʼ wapháá nákha Jesús xóó tsexnáximinaʼ makhañúu mu maʼni káwáanʼ. Maski ajndu Abrahán na̱nguá ninindxu̱u̱ mbáa bi̱ kixtiyáʼ, Jeobá ndiʼyoo xóo mbáa xa̱bu̱ jmbii (atraxnuu Romanos 4:20-22). * Xúʼko̱ má xúgi̱, Jeobá ma̱ndoo mbaʼñún jmbiin cristianos bi̱ naguáju̱n jmbu bi̱ guáʼthi̱i̱n makuwá kámuu náa tsu̱du̱u̱ Ku̱ba̱ʼ. Cristianos bugi̱ mangiin gíʼmaa munigajmaa capítulo 8 ndrígóo Romanos numuu rí xtágabu rígi̱ ma̱ndoo mambáñun.

4. Ndiéjunʼ gíʼmaa muraximíjna̱ índo̱ nuraxnuu Romanos 8:21 rá.

4 Náa Romanos 8:21, Jeobá nakudaminaʼ rí “xúgíʼ rí niguma magumakríyaaʼ náa rí kaxtuʼwájma” náa aʼkhá ga̱jma̱a̱ rí nakháñulú. Rígi̱ nandoo gáʼthúu̱n rí bi̱ gakuwa náa Ku̱ba̱ʼ mitsaan “maguma káwíin xóo e̱ji̱i̱n Dios”. Índo̱ nuraxnuu versículo rígi̱ gíʼmaa muraximíjna̱: “Lá ndayaminaʼ náa numbaaʼ nuxi̱ʼ ráʼ.” Guʼyáá rí gíʼmaa muʼni mu makuwaanʼ ikhí.

 “NUNDXA̱ʼWA̱MÍJNA̱ NÁA XUWIʼ”

5. Ndiéjunʼ niʼthí Pablo náa Romanos 8:4-8, 12, 13 rá.

5 (Atraxnuu Romanos 8:4-8, 12, 13). * Náa capítulo 8 ndrígóo Romanos, Pablo niʼthí ga̱jma̱a̱ numuu a̱jmi̱i̱n enii xa̱bu̱. Niʼthí ga̱jma̱a̱ numún bi̱ nikuwa “xóo eyoo xuwiʼ” ga̱jma̱a̱ bi̱ kuwa “xóo eyoo espíritu”. Mbáa nundxa̱ʼwa̱míjna̱ rí Pablo xtáa raʼthí ga̱jma̱a̱ bi̱ raʼkhíin cristianos ga̱jma̱a̱ bi̱ ni̱ndxu̱ún. Mú Pablo niʼnirámáʼ náa inún cristianos, bi̱ ‹nitatsaʼwún mani̱ndxu̱ún santos› (Rom. 1:7). Ikha jngó bi̱ nikuwa “xóo eyoo xuwiʼ” ga̱jma̱a̱ bi̱ nikuwa “xóo eyoo espíritu” ninindxu̱ún cristianos. Mú xú káʼnii mixtiʼkhu nindxu̱u̱ rá.

6, 7. a) Ndiéjunʼ eyoo gáʼthúu̱n ajngáa xuwiʼ náa Biblia rá. b) Xú káʼnii nindxu̱u̱ “xuwiʼ” rí niʼthí Pablo náa Romanos 8:4-8, 12, 13 rá.

6 Náa Biblia, ajngáa xuwiʼ rígá mbaʼa rí nandoo gáʼthúu̱n. Nguáná nandoo gáʼthúu̱n xuyuʼ mbáa xa̱bu̱ (Rom. 2:28; 1 Cor. 15:39, 50). Ma̱ngaa nandoo gáʼthúu̱n rí xú káʼnii kuyamijná xa̱bu̱. Mbá xkri̱da, náa Biblia naʼthí rí Jesús nindxu̱u̱  “bi̱ ni̱ʼkha̱ náa David náa xuwiʼ”. Ga̱jma̱a̱ Pablo niʼthí rí judíos ‹kuyamijná náa xuwiʼ› (Rom. 1:3; 9:3).

7 Mú, xú káʼnii nindxu̱u̱ “xuwiʼ” rí niʼthí Pablo náa Romanos 8:4-8, 12, 13 rá. Mu makru̱ʼu̱lú, guʼnigajmaa rí eʼthí náa Romanos 7:5. Ikhí Pablo niʼthí rí ikhaa gajmíi̱n eʼwíínʼ cristianos nikuwa “xóo eyoo xuwiʼ”, nákha xóó tsénindxu̱ún cristianos, niniñami̱jna̱ rí “aʼkhá dí ra̱májánʼ” maʼga̱ kagu̱u̱n. Ikha jngó bi̱ kuwa “xóo eyoo xuwiʼ” ni̱ndxu̱ún bi̱ nuniñami̱jna̱ muni dí ra̱májánʼ ga̱jma̱a̱ nuni rí nandún.

8. Náa numuu rí Pablo niʼthún bi̱ kaxtaʼwíin rí xákuwa “xóo eyoo xuwiʼ” rá.

8 Náa numuu niʼtáruʼun Pablo cristianos bi̱ kaxtaʼwíin rí xákuwa “xóo eyoo xuwiʼ” rá. Numuu rí asndu tsáa xa̱bi̱i̱ Dios ma̱ndoo maʼni rí magiʼdoo itháan numuu rí nagua̱ʼa̱ maʼni náa vida ndrígóo. Mbá xkri̱da, Pablo niʼthí rí tikhun a̱ngiu̱lú náa Roma ninindxu̱ún esclavos náa rí nigua̱ʼa̱ muni. Mbáa nindoo gáʼthi rí mubúúnʼ, ganitsu o i̱ʼwáʼ nigiʼdoo itháan numuu náa vida ndrígu̱ún (Rom. 16:17, 18; Filip. 3:18, 19; Jud. 4, 8, 12). Ga̱jma̱a̱ náa xuajen Corinto, mbáa cristiano nibóo̱ʼ ga̱jma̱a̱ ‹a̱ʼgiu̱u̱ anu̱u̱› mbaʼa nuthu (1 Cor. 5:1). Ndiyóoʼ rí Pablo maʼthúún rúʼko̱ timbíi̱n cristianos rí xákuwa “xóo eyoo xuwiʼ” (Rom. 8:5, 6). Ga̱jma̱a̱ rí mbiʼi xúgi̱, mangáanʼ ndayúlú.

9. Ndiéjunʼ rí tsíyoo gáʼthúu̱n Romanos 8:6 rá.

9 Ajngáa rígi̱ nayambáá rí mbiʼi xúgi̱. Asndu mbáa bi̱ niʼni má mba̱yu̱ʼ tsiguʼ eʼni ñajunʼ Jeobá ma̱ndoo maxtáa “xóo eyoo xuwiʼ”. Mú Romanos 8:6 tsíyoo gáʼthúu̱n dí ra̱májánʼ rí matatsaʼwamínáʼ náa ganitsu, ñajunʼ, gitsíin o rí maʼnda̱ʼ xtayáá mbáa. Rígi̱ ku narígá má. Jesús ma̱ngaa niniguʼ makuiʼtsu ga̱jma̱a̱ asndu nixniʼtsun mbaʼin xa̱bu̱. Ga̱jma̱a̱ nguáná ndiyóoʼ mbayáaʼ xu̱ʼ. Ma̱ngaa, Pablo niʼthí rí gíʼdoo numuu rí xa̱bu̱ gajmii mubúúnʼ.

Ndiéjunʼ enigulúʼ muʼthá itháan rá. (Atayáá kutriga̱ 10 ga̱jma̱a̱ 11.)

10. Ndiéjunʼ eyoo gáʼthúu̱n rí “nundxa̱ʼwa̱míjna̱” rá.

10 Ndiéjunʼ eyoo gáʼthúu̱n rí “nundxa̱ʼwa̱míjna̱” rá. Ajngáa rí nijmuu Pablo nandoo gáʼthúu̱n mundxaʼwamíjna̱ náa rí eyulú muʼni ga̱jma̱a̱ awan rí kuaʼdáá. Mbáa xa̱bu̱ ndaʼyoo niʼthí rí ajngáa rígi̱ kaʼyoo náa xa̱bu̱ bi̱ nundxa̱ʼwa̱míjna̱ i̱ndó rí nandún ikhiin ga̱jma̱a̱ xúgíʼ mbiʼi nuthi ga̱jma̱a̱ numuu rígi̱. Rígi̱ rí gíʼdoo itháan numuu náa ikhiin ga̱jma̱a̱ rúʼko̱ rí nuni náa vida ndrígu̱ún.

Ndiéjunʼ gíʼdoo itháan numuu náa vida ndrígúlú rá.

11. Ndiéjunʼ gándoo magiʼdoo itháan numuu náa ikháanʼlu rá.

11 Cristianos bi̱ nikuwa náa Roma gíʼmaa muyajmamijná ga̱jma̱a̱ mbuyáá ndiéjunʼ rí gíʼdoo itháan numuu náa ikhiin. Lá ninindxu̱u̱ “numuu xuwiʼ” ráʼ. Mangáanʼ gíʼmaa mbuʼyáá rí gíʼdoo itháan numuu. Ndiéjunʼ ma̱ndoo magiʼdoo itháan numuu rá. Mu mbuʼyáá guraximíjna̱: “Ndiéjunʼ rí itháan eniguʼ mata. Ndiéjunʼ rí itháan nanigu̱ʼ mani”. Tikhun naguanu nduyáá rí nundxa̱ʼwa̱míjna̱ má xúʼko̱ rí muwa̱a̱n mixtiʼkhu vino, rí muniratáá guʼwá, mutsi xtíin, náa gájmun mbújkha̱a̱ o náa gaguun vacación. Rígi̱ na̱nguá nindxu̱u̱ ra̱májánʼ. Rígi̱ ku narígá má. Ga̱jma̱a̱ numuu  vino, garmáʼáan a̱jkiu̱lú náa a̱jma̱ xkri̱da. Mínaʼ Jesús nirtaxi̱i̱ iyaʼ vino náa ninigu̱nʼ xa̱bu̱, ga̱jma̱a̱ Pablo nixnúu xtágabu Timoteo rí maga̱a̱n “mbá chíʼgíʼ vino” mu maʼni̱i̱ itháan májánʼ a̱jkiu̱u̱n (1 Tim. 5:23; Juan 2:3-11). Mú vino tágiʼdoo itháan numuu náa ikhiin. Ga̱jma̱a̱ ikháanʼlu rá. Ndiéjunʼ gíʼdoo itháan numuu náa vida ndrígúlú rá.

12, 13. Náa numuu rí gíʼmaa mbuʼyáá rí gíʼdoo itháan numuu náa vida ndrígúlú rá.

12 Náa numuu rí gíʼmaa muñewa̱a̱n ndiéjunʼ rí gíʼdoo itháan numuu náa vida ndrígúlú rá. Pablo niʼthí: “Á mu nundxa̱ʼwa̱míjna̱ náa xuwiʼ nandoo gáʼthúu̱n rí makhañúlúʼ” (Rom. 8:6). Á mu nakuwáanʼ “xóo eyoo xuwiʼ”, ma̱ndoo maʼni rí xambáxulú gajmiúlú Dios ga̱jma̱a̱ nda̱wa̱á ní xákuwáanʼ. Mú ma̱ndoo muʼni rí xugíʼnii rígi̱. Xúgiáanʼ ma̱ndoo muriʼkhumijná. Lá narmáʼáan a̱jkiu̱lú eʼni xa̱bu̱ Corinto bi̱ ndiyóoʼ magumaa expulsar rá. Ikhaa niriʼkuminaʼ, niniñuʼ raʼni dí mitsaga ga̱jma̱a̱ niʼni mbu̱júu̱ ñajunʼ Jeobá (2 Cor. 2:6-8).

13 Maski ajndu xa̱biya̱ buʼko̱ xtáa raʼni mbá dí raʼkhí kayuʼ “xóo eyoo xuwiʼ”, mú niriʼkuminaʼ. Á mu mbáa cristiano nagíʼdu̱u̱ raʼni dí ra̱májánʼ ga̱jma̱a̱ tséʼni rí nandoo Jeobá, ma̱ngaa ma̱ndoo mariʼkuminaʼ. Rí marmáʼáan a̱jkia̱nʼ náa ajngáa rí niʼthí Pablo ma̱ndoo maxnáʼ tsiakii mu matriʼkuminaʼ.

“NUNDXA̱ʼWA̱MÍJNA̱ NÁA ESPÍRITU”

14, 15. a) Ndiéjunʼ gándoo gundxaʼwamíjna̱ rá. b) Ndiéjunʼ tsíyoo gáʼthúu̱n “nundxa̱ʼwa̱míjna̱ náa espíritu” rá.

14 Nda̱wa̱á rí niʼthí ga̱jma̱a̱ numuu gamíi rí mundxaʼwamíjna̱ “náa xuwiʼ”, Pablo niʼthí: “Á mu nundxa̱ʼwa̱míjna̱ náa espíritu nandoo gáʼthúu̱n vida ga̱jma̱a̱ rí tsímáá”. Nindxu̱u̱ mbá rí májánʼ wéñuʼ rí muʼdaʼlu.

15 Mú “nundxa̱ʼwa̱míjna̱ náa espíritu” tsíyoo gáʼthúu̱n rí xúgíʼ mbiʼi gíʼmaa mundxaʼwamíjna̱ náa Jeobá, náa Biblia, ga̱jma̱a̱ muʼthá i̱ndó ga̱jma̱a̱ numuu rígi̱. Cristianos nakuwáanʼ xó má eʼwíínʼ. Mbá xkri̱da, cristianos bi̱ nikuwa nákha siglo timbá niphiʼtsu, niʼwa̱a̱n, nidamijná, niguáʼdiin e̱jñún ga̱jma̱a̱ niñajunʼ (Mar. 6:3; 1 Tes. 2:9).

Rí itháan nigiʼdoo numuu náa Pablo ninindxu̱u̱ rí maʼni ñajunʼ Jeobá

16. Ndiéjunʼ nigiʼdoo itháan numuu náa Pablo rá.

16 Mú ni Pablo ni eʼwíínʼ cristianos bi̱ nikuwa nákha siglo timbá túniñanʼ dí rígi̱ magiʼdoo itháan numuu náa vida ndrígu̱ún. Mbá xkri̱da, nduʼyáá rí Pablo nixtáa raʼni guʼwá xtíin mu makánaa mbújkha̱a̱. Mú ñajunʼ ndrígóo tágiʼdoo itháan numuu náa ikhaa. Rí itháan nigiʼdoo numuu náa Pablo ninindxu̱u̱ rí maʼni ñajunʼ Jeobá. Ikhaa nigíʼ edxu̱u̱ náa maʼtáraʼa ga̱jma̱a̱ rí maʼsngáa (atraxnuu Hechos 18:2-4; 20:20, 21, 34, 35). A̱ngiu̱lú náa Roma gíʼmaa mbuyaridáá Pablo, xúʼko̱ má mangáanʼ (Rom. 15:15, 16).

17. Ndiéjunʼ rí guʼdaʼ á mu “nundxa̱ʼwa̱míjna̱ náa espíritu” rá.

17 Ndiéjunʼ rí guʼdaʼ á mu “nundxa̱ʼwa̱míjna̱ náa espíritu” rá. Romanos 8:6 naʼthí: “Á mu nundxa̱ʼwa̱míjna̱ náa espíritu nandoo gáʼthúu̱n vida ga̱jma̱a̱ rí tsímáá”.  Ajngáa rígi̱ nandoo gáʼthúu̱n rí muniʼñáʼ rí Jeobá maxnúlúʼ ikha ga̱jma̱a̱ xi̱ʼ kaʼwu ndrígóo ga̱jma̱a̱ gajmañulú mundxaʼwamíjna̱ xóo ikhaa. Dios nakudaminaʼ rí makuwáanʼ tsímáá xúgi̱ ga̱jma̱a̱ rí makuwáanʼ kámuu nda̱wa̱á.

Ga̱jma̱a̱ numuu Jeobá ma̱ndoo muʼni rí xágawúunʼ edxu̱lúʼ

18. Xú káʼnii gándoo gúʼni mu marigá rí tsímáá á mu “nundxa̱ʼwa̱míjna̱ náa espíritu” rá.

18 Pablo ma̱ngaa niʼthí rí á mu “nundxa̱ʼwa̱míjna̱ náa espíritu” maxnúlúʼ rí tsímáá. Xúgiáanʼ nandulúʼ makuwáanʼ tsímáá, itháan rí xágawúunʼ edxu̱lúʼ. Mú nguáthi̱i̱n bi̱ naʼngu̱u̱n nuni rígi̱. Xú káʼnii gándoo makuwáanʼ tsímáá á mu “nundxa̱ʼwa̱míjna̱ náa espíritu” rá. Ga̱jma̱a̱ numuu Jeobá ma̱ndoo muʼni rí xágawúunʼ edxu̱lúʼ. Ma̱ngaa ma̱ndoo makuwáanʼ tsímáá gajmiúlú bi̱ kuwa náa guʼwúlú ga̱jma̱a̱ eʼwíínʼ cristianos. Numuu rí xúgiáanʼ ni̱ndxu̱lú xa̱bu̱ aʼkhá, nguáná naguáʼdáá xkujndu gajmiúlú a̱ngiu̱lú. Ikhú, nuʼnimbánii xtágabu ndrígóo Jesús: “Gambaxiʼ gajmaʼ dxiyaʼ” (Mat. 5:24). Garmáʼáan a̱jkiu̱lú rí mangiin a̱ngiu̱lú nuni ñajunʼ Jeobá, “Dios bi̱ naxná rí tsímáá” (Rom. 15:33; 16:20).

19. Xú káʼnii gakuwáanʼ rá.

19 Á mu “nundxa̱ʼwa̱míjna̱ náa espíritu”, ma̱ngaa makuwáanʼ tsímáá, tsímáá gajmiúlú Dios. Gaʼyee Isaías niʼthí rí Jeobá mañewu̱u̱n bi̱ nakumu̱ún kuyáá káxi̱ ga̱jma̱a̱ ikhaa maxnún rí tsímáá kámuu (Is. 26:3; atraxnuu Romanos 5:1). *

20. Ndiéjunʼ rí guʼdaʼ á mu nuʼnimbaníí xtágabu rí na̱ʼkha̱ náa Romanos capítulo 8 rá.

20 Tséʼniuu á mu kuaʼti̱i̱n makuwáanʼ mekhuíí o náa tsu̱du̱u̱ Ku̱ba̱ʼ, xúgiáanʼ gándoo gambáyulú Romanos capítulo 8. Nuxnáa núma̱aʼ rí Biblia naxkaxáanʼ muʼni ñajunʼ Jeobá ga̱jma̱a̱ tséxkaxáanʼ muʼni rí nandulúʼ. Á mu “nundxa̱ʼwa̱míjna̱ náa espíritu”, ma̱ndoo muʼdaʼ rígi̱ rí mitsaan wéñuʼ: “Makuwáanʼlu kámuu mbiʼi ga̱jma̱a̱ numuu Cristo Jesús bi̱ nindxu̱u̱ Señor ndrígiulúʼ” (Rom. 6:23).

^ párr. 3 Romanos 4:20-22: “Mú ga̱jma̱a̱ rí nikudaminaʼ Dios, táʼni a̱jma̱ a̱jkiu̱u̱n rí asndu xóo nda̱a̱ fe, ikhaa nigiʼdoo tsiakii ga̱jma̱a̱ numuu fe, nixtáa raʼni mba̱a̱ Dios ga̱jma̱a̱ ndiʼyoo májánʼ rí niʼthí ikhaa maʼnimbánuu ma̱ngaa ma̱ndoo maʼni. Mú, “ikhaa niʼni rí jmbu”.”

^ párr. 5 Romanos 8:4-8, 12, 13: “Mu mambanúu náa ikháanʼ Xtángoo rí jmbu bi̱ najngruigulú raʼkháa xóo eyoo xuwiʼ, najngruigulú xóo eyoo espíritu. Numuu rí bi̱ kuwa ga̱jma̱a̱ numuu xuwiʼ i̱ndó nundxa̱ʼwa̱míjna̱ ga̱jma̱a̱ numuu xuwiʼ, mú bi̱ nakuwa xó má espíritu, nuni xó má eyoo espíritu. Numuu rí á mu nundxa̱ʼwa̱míjna̱ náa xuwiʼ nandoo gáʼthúu̱n rí makhañúlúʼ, mú á mu nundxa̱ʼwa̱míjna̱ náa espíritu nandoo gáʼthúu̱n vida ga̱jma̱a̱ rí tsímáá; numuu rí mataʼgíʼ edxa̱ʼ náa xuwiʼ nandoo gáʼthúu̱n rí xambáxaʼ ga̱jma̱ʼ Dios, numuu dí rígi̱ na̱nguá kagujtuminaʼ náa xtángoo Dios, ni má xarigá. Ikha jngó bi̱ kuwa náa xuwiʼ xándoo muni rí naniguʼ Dios. Ikha jngó, a̱ngui̱nʼ, na̱nguá kuwáanʼ ga̱jma̱a̱ tsiakii náa xuwiʼ, mu muʼni rí eyoo xuwiʼ; numuu rí á mu ikháanʼ kuwáanʼ xóo eyoo xuwiʼ, phú gajkhun rí makhañala; mú á mu ga̱jma̱a̱ numuu espíritu nuʼni rí makhañúu rí nandoo xuyala, makuwáanʼ”.

^ párr. 19 Romanos 5:1 “Rí xúgi̱, rí najuiʼtúlú rí ni̱ndxu̱lú jmbii ga̱jma̱a̱ numuu fe, gakuwaanʼ gagi gajmiúlú Dios ga̱jma̱a̱ numuu Señor Jesucristo”.