Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Diciembre tsiguʼ 2016

Guʼdaʼ náa Jeobá xúgíʼ xkujndu ndrígúlú

Guʼdaʼ náa Jeobá xúgíʼ xkujndu ndrígúlú

“Gutha̱a̱n xúgíʼ Dios rí naxmiéjuanla, numuu rí ikhaa naxmiéjunʼ jaʼyala” (1 PEDRO 5:7).

AJMÚÚ 60 GA̱JMA̱A̱ 23

1, 2. a) Náa numuu rí naxmiéjunʼ tikhun xa̱bi̱i̱ Dios rá. (Atayáá timbá xtiʼkhu.) b) Ndiéjunʼ gúʼyáá náa artículo rígi̱ rá.

RÍ MBIʼI xúgi̱, Satanás “jngruigo̱o̱ mbájndi xóo i̱ndi̱i̱ʼ bi̱ nandxaʼwá, bi̱ nda̱yáaʼ mikhu̱u̱ mbáa” (1 Ped. 5:8; Rev. 12:17). Ga̱jma̱a̱ numuu ikhaa, naʼni néʼngulú wéñuʼ. Asndu bi̱ ni̱ndxu̱lú xa̱bi̱i̱ Dios naxmiéjunlú wéñuʼ. Bi̱ nikuwa wajyúúʼ mangiin nixmiéjunʼ wéñuʼ. Mbá xkri̱da, náa Biblia naʼthí dí rey David nguáná nixmiéjunʼ wéñuʼ (Sal. 55:2). Ga̱jma̱a̱ apóstol Pablo nixmiéjunʼ “ga̱jma̱a̱ numuu xúgíʼ congregación” (2 Cor. 11:28). Mú, ndiéjunʼ gándoo gúʼni á mu nakumulú rí naxmiéjunlú wéñuʼ rá.

2 Anu̱lú bi̱ xtáa mekhuíí nimbáñun xa̱bi̱i̱ nákha wajyúúʼ bi̱ nixmiéjunʼ wéñuʼ mu makuwá tsímáá. Ga̱jma̱a̱ Jeobá nandoo maʼni xúʼko̱ kaʼnii náa ikháanʼlu rí mbiʼi xúgi̱. Náa Biblia naxkaxáanʼ muʼthán Dios xúgíʼ rí naʼni maxmiéjunʼlú, numuu rí ikhaa naxmiéjunʼ kaʼyulú (1 Ped. 5:7). Náa artículo rígi̱ gúʼyáá a̱jkhu̱ enii rí mambáyulúʼ mu xaxmiéjunlú. Timbá, muʼtájkáan. Raga̱jma̱, muraxnuu Ajngá rawunʼ Dios ga̱jma̱a̱ mundxaʼwáá edxu̱lúʼ rí naʼthí ikhí. Ragajtsú, muniʼñáʼ rí xi̱ʼ kaʼwu ndrígóo  Jeobá mambáyulúʼ. Rí maʼni a̱jkhu̱, muʼtháán mbáa bi̱ nambáxulúʼ gajmiúlú rí nakumulú. Índo̱ guʼyáá a̱jkhu̱ enii rígi̱, gundxaʼwamíjna̱ náa gándoo muriʼkhumijná.

“ATADAʼ NÁA JEOBÁ XKUJNDU NDRÍGÁʼ”

3. Xú káʼnii gándoo guʼdaʼ xkujndu ndrígúlú náa Jeobá rá.

3 Timbá rí ma̱ndoo muʼni mu xaxmiéjunlú wéñuʼ rí muʼdaʼ náa Jeobá xkujndu ndrígúlú índo̱ gúʼthán ga̱jma̱a̱ xúgíʼ a̱jkiu̱lú. Índo̱ rígá mbá rí naʼni maxmiéjunʼlú, Anu̱lú bi̱ xtáa mekhuíí nandoo rí muʼtháán xúgíʼ rí nakumulú. David niʼtákáñuu Jeobá: “Atagíʼ edxa̱ʼ, oh Dios, rí natajkáan”. Ga̱jma̱a̱ nda̱wa̱á niʼthí: “Atadaʼ náa Jeobá xkujndu ndrígáʼ, ga̱jma̱a̱ ikhaa má gambáyaʼ” (Sal. 55:1, 22). Á mu ni̱ʼni̱ má xúgíʼ rí nindoo mu muʼnimbánii xkujndu, ní xaxmiéjunlú itháan. Rí phú mambáyulúʼ nindxu̱u̱ rí muʼtájkáan náa Jeobá ga̱jma̱a̱ xúgíʼ a̱jkiu̱lú. Mú xú káʼnii gambáyulú rí muʼtájkáan rá. (Sal. 94:18, 19.)

4. Ndíjkha rí gíʼdoo numuu muʼtájkáan índo̱ najmúlú rá.

4 (Atraxnuu Filipenses 4:6, 7). * Xú káʼnii eriʼña̱a̱ Jeobá xúgíʼ rí nuʼtájkáan ga̱jma̱a̱ xúgíʼ a̱jkiu̱lú rá. Ikhaa ma̱ndoo mambáyulúʼ makuwáanʼ tsímáá ga̱jma̱a̱ rí muʼnigaʼduunʼ ku̱ma̱ rí naʼni gawúnlú. Índo̱ nuʼtájkáan numuu dí rígá mbá rí naʼni maxmiéjunʼlú o naʼnimíñulú, Dios naʼni makuwaanʼ tsímáá. Mbaʼin a̱ngiu̱lú nakuwa tsímáá, ga̱jma̱a̱ mangáanʼ ma̱ndoo makuwáanʼ tsímáá. “Tsímáá rí na̱ʼkha̱ náa Dios” ma̱ndoo mambáyulúʼ muraʼníí asndu xú káʼnii má xkujndu. Jeobá naʼthúlúʼ dí ragíʼmaa mamiñúlú, numuu rí ikhaa nikudaminaʼ maxtáa mijngii náa ikháanʼlu mu maxnúlúʼ tsiakii ga̱jma̱a̱ mambáyulúʼ (Is. 41:10). Nduʼyáá májánʼ rí mambanúu rígi̱.

AJNGÁ RAWUNʼ DIOS NAʼNI MAKUWÁANʼ TSÍMÁÁ

5. Xú káʼnii gándoo gambáyulú Ajngá rawunʼ Dios mu makuwáanʼ tsímáá rá.

5 Raga̱jma̱ numuu rí xóo makuwaanʼ tsímáá nindxu̱u̱ rí muraxnuu Biblia ga̱jma̱a̱ mundxaʼwamíjna̱ rí naʼthí ikhí. Náa numuu rí ma̱ndoo mambáyulúʼ Biblia rá. Numuu rí nindxu̱u̱ Ajngá rawunʼ Dios ga̱jma̱a̱ na̱ʼkha̱ xtágabu rí májánʼ rí mambáyulúʼ. Ikha jngó mámbá rí gakuwáanʼ gíná, gundxaʼwamíjna̱ náa ku̱ma̱ ndrígóo Dios ga̱jma̱a̱ xú káʼnii gambáyulú xtágabu ndrígóo. Xúʼko̱ ma̱ndoo maʼngulú, mutsi̱ji̱i̱ o muʼni níjni rí naxmiéjunlú. Jeobá niʼthí rí á mu nuraxnuu Ajngá rawunʼ muguaʼdáá ‹tsiakii› ga̱jma̱a̱ ní xámiñulu (Jos. 1:7-9).

Á mu kuaʼdáá mbá fe gujkhuʼ náa Jeobá, mbuʼyáá májánʼ rí ikhaa gáxnulú rí ndayúlú

6. Xú káʼnii embáyulú rí niʼthí Jesús rí mbiʼi xúgi̱ rá.

6 Náa Ajngá rawunʼ Dios ma̱ngaa ma̱ndoo muraxnuu xú káʼnii Jesús niʼtámíjná gajmíi̱n eʼwíínʼ. Xa̱bu̱ ninigu̱nʼ mudxawíín numuu rí Jesús nixnúún tsiakii ga̱jma̱a̱ niʼni maʼni̱i̱ a̱jkiu̱ún, itháan náa xa̱bu̱ gua̱bi̱nʼ ga̱jma̱a̱ bi̱ naxmiéjunʼ (atraxnuu  Mateo 11:28-30). Jesús nixmiéjunʼ wéñuʼ xú káʼnii ekumún eʼwíínʼ (Mar. 6:30-32). Jesús nimbáñun apóstoles ndrígio̱o̱, ma̱ngaa mambáyulúʼ mangáanʼ rí mbiʼi xúgi̱. Gajkhun má rí ikhiin nikuwa gajmiún ga̱jma̱a̱ ikháanʼ na̱nguá. Mú tséyóoʼ rí makuwáanʼ gajmiúlú Jesús mu ma̱ndoo mundrígú rí ikhaa nikudaminaʼ. Ikhaa nindxu̱u̱ Rey ndrígúlú ga̱jma̱a̱ asndu mekhuíí nasngájma rí nandoo kaʼyulú má xúʼko̱. Ikha jngó índo̱ rígá rí naʼni maxmiéjunʼlú, ma̱ndoo mbuʼyáá rí Jesús maxtáa ga̱jma̱á ni̱ndxu̱lú ma̱ngaa mambáyulúʼ índo̱ gáʼyóóʼ. Jesús naxnúlú tsiakii ga̱jma̱a̱ naʼthúlúʼ muguaʼthi̱i̱n mbá rí májánʼ nda̱wa̱á rí nambáyulúʼ mu xaxmiéjunlú (Heb. 2:17, 18; 4:16).

RÍ NAXNÁ XI̱ʼ KAʼWU NAMBÁYULÚ

7. Xú káʼnii embáyulú xi̱ʼ kaʼwu ndrígóo Dios rá.

7 Guʼyáá ajtsú rí mambáyulúʼ mu mutsi̱ji̱i̱ rí naʼni maxmiéjunʼlú. Jesús niʼthí rí Anu̱u̱ maxnúlúʼ xi̱ʼ kaʼwu ndrígóo á mu nunda̱ʼa̱a̱ (Luc. 11:10-13). Xi̱ʼ kaʼwu rígi̱ nindxu̱u̱ tsiakii ndrígóo Dios bi̱ gíʼdoo xúgíʼ tsiakii, ga̱jma̱a̱ nambáyulúʼ maga̱ja̱a̱ itháan rí xú káʼnii xa̱bu̱ ni̱ndxu̱lú (Col. 3:10). Biblia naxná mbiʼyuu rígi̱ xóo ‹rí naxná xi̱ʼ kaʼwu› (atraxnuu Gálatas 5:22, 23). * Índo̱ nusngajmá xú káʼnii xa̱bu̱ ni̱ndxu̱lú, nambáxulúʼ itháan májánʼ gajmiúlú eʼwíínʼ ga̱jma̱a̱ nuʼni gaʼduunʼ rí maʼni maxmiéjunʼlú wéñuʼ. Guʼyáá tikhuu rí xú káʼnii rí naxná espíritu ma̱ndoo mambáyulúʼ.

8-12. Xú káʼnii gambáyulú rí naxná xi̱ʼ kaʼwu rá.

8 “Rí maʼndulúʼ kuʼyamijná, gagi, tsímáá”. Índo̱ nduʼyamajkhún eʼwíínʼ ga̱jma̱a̱ nandulúʼ kuʼñúún, tsixmiéjunʼlú wéñuʼ. Náa numuu rá. Numuu rí índo̱ nusngájma rígi̱, nuʼni gaʼduunʼ mbaʼa rí maʼni makiʼnáanʼ ga̱jma̱a̱ rí maʼgáanʼ wéñuʼ. Xúʼko̱ xáʼniulu mingíjyúuʼ makuwáanʼ tsímáá gajmiúlú eʼwíínʼ (Rom. 12:10).

Índo̱ nusngajmá xú káʼnii xa̱bu̱ ni̱ndxu̱lú, nambáxulúʼ itháan májánʼ gajmiúlú eʼwíínʼ

9 “Maʼngo̱o̱ wéñuʼ a̱jkiu̱lúʼ, rí manindxu̱lúʼ xa̱bu̱ májánʼ a̱jkiu̱u̱n, muʼni rí májánʼ”. Náa Biblia naʼthí: “Ganindxala májáánʼ xa̱bu̱ gajmiála eʼwíínʼ, agaʼwíínʼ a̱jkia̱la kuyamíjna̱, ga̱jma̱a̱ guni mba̱a̱ a̱jkia̱la kuyamíjna̱” (Efes. 4:32). Índo̱ nuʼnimbaníí xtágabu rígi̱, nakuwáanʼ tsímáá gajmiúlú eʼwíínʼ ga̱jma̱a̱ nuʼni gaʼduunʼ rí maʼni maxmiéjunʼlú. Ma̱ngaa xáʼniulu mingíjyúuʼ muʼni gajmiúlú xkujndu rí gáguaʼdáá ga̱jma̱a̱ numuu rí ni̱ndxu̱lú xa̱bu̱ aʼkhá.

10 “Fe”. Rí mbiʼi xúgi̱ naʼni maʼgáanʼ rí maguaʼdáá wéñuʼ mbújkha̱a̱ (Prov. 18:11). Xú káʼnii gándoo muʼni mu xáʼgáanʼ ga̱jma̱a̱ numuu rígi̱ rá. Rí muʼnimbánii xtágabu ndrígóo apóstol Pablo rí makuwáanʼ gagi “ga̱jma̱a̱ rí kuaʼdáá xúgi”. Á mu kuaʼdáá mbá fe gujkhuʼ náa Jeobá, mbuʼyáá májánʼ rí ikhaa gáxnulú rí ndayúlú. Ikhaa nakudaminaʼ: “Nimbá miʼtsú xániʼñáʼ ga̱jma̱a̱ xániʼñátiga̱a̱n”. Ikha jngó nandoo nuʼthá xó má niʼthí Pablo: “Jeobá nindxu̱u̱ bi̱ nambáyuʼ; xámiñuʼ. Ndiéjunʼ gándoo gáʼniuʼ xa̱biya̱ rá.” (Heb. 13:5, 6.)

11 “Manindxu̱lúʼ xa̱bu̱ guabáanʼ, rí muñewa̱a̱n rí muʼni”. Xú káʼnii embáyulú  rígi̱ rá. Rígi̱ gambáyulú muʼni gaʼduunʼ rí muʼthá o rí muʼni rí maʼni maxmiéjunʼlú. Ma̱ngaa ní xágigáanʼ, ní xákiʼnáanʼ, ní xúndxaʼwajmíin eʼwíínʼ ga̱jma̱a̱ ní xúʼta wéñúúnʼ eʼwíínʼ (Efes. 4:31).

12 Mu mbuʼyáá rí gíʼdoo ‹tsiakii ñawúunʼ Dios› ga̱jma̱a̱ rí muʼdaʼ náa ikhaa xúgíʼ rí naʼni maxmiéjunʼlú, gíʼmáanʼ manindxu̱lúʼ xa̱bu̱ guabáanʼ (1 Ped. 5:6, 7). Á mu ni̱ndxu̱lú xa̱bu̱ wabaʼ, Jeobá mañewu̱nlú. Índo̱ nduʼyáá dí rígá rí ma̱ndoo muʼni ga̱jma̱a̱ rí xándoo muʼni, nusngajmá rí tséʼni rí nandulúʼ. Ikhú nánguá exmiéjunʼlú, numuu rí nakumulú kuʼyáá Dios (Miq. 6:8).

“MAXUXNAMIJNA-GÜEÑAʼLA GAʼKO”

13. Ndiéjunʼ nindoo gáʼthi Jesús índo̱ niʼthí: “Maxuxnamijna-güeñaʼla gaʼko” rá.

13 Jesús nixná xtágabu rígi̱: “Maxuxnamijna-güeñaʼla gaʼko” (atraxnuu Mateo 6:34). Mbáa mundxaʼwamíjna̱ rí xáʼngulú guʼnimbaníí xtágabu rígi̱. Mú, káʼnii nindoo gáʼthi Jesús rá. Táʼndoo gáʼthi rí xa̱bi̱i̱ Dios xaxmiéjunʼ nditháan. Nijmañulúʼ má rí rey David ga̱jma̱a̱ apóstol Pablo nikumu̱ún xúʼko̱ kaʼnii. Rí phú nindoo Jesús rí xa̱bi̱i̱ makru̱ʼu̱u̱n rí xambánuu nditháan á mu naxmiéjunʼ wéñuʼ. Muguaʼdáá xkujndu mámbá mbiʼi, ikha jngó xaxmiéjunlú wéñuʼ ga̱jma̱a̱ numuu xkujndu rí niguáʼdáálu nákha ginii o xkujndu rí guguaʼdáá nda̱wa̱á. Xú káʼnii gándoo gambáyulú xtágabu ndrígóo Jesús rí xaxmiéjunlú wéñuʼ rá.

14. Xú káʼnii gándoo mutsi̱ji̱i̱ rí naxmiéjunlú wéñuʼ rá.

14 Nguáná, naxmiéjunʼlu ga̱jma̱a̱ rí xú nikuwáanʼ nákha ginii. Mbáa xóó nagawúnlú wéñuʼ ga̱jma̱a̱ numuu rí nikiéʼkulú, maski ajndu niʼni tsiguʼ nirígá rígi̱. Nguáná, rey David ma̱ngaa nikumu̱u̱ xúʼko̱ kaʼnii índo̱ nindxa̱ʼwáminaʼ ga̱jma̱a̱ numuu aʼkhá rí nikudaminaʼ. Índo̱ niʼthí ga̱jma̱a̱ numuu rí nikiéʼkhúun, ikhaa ra̱ʼkhá tháán nixtáa ga̱jmá (Sal. 38:3, 4, 8, 18). Ikhú David niʼni mbá rí májánʼ wéñuʼ, ga̱jma̱a̱ mangáanʼ ma̱ndoo muʼni ikháá kayúʼ. Ndiʼyoo rí Jeobá magaʼwíínʼ a̱jkiu̱u̱n kaʼyoo ga̱jma̱a̱ maʼni mba̱a̱ a̱jkiu̱u̱n. David nidxuu wéñuʼ índo̱ ndiʼyoo rí Jeobá niʼni mba̱a̱ a̱jkiu̱u̱n kaʼyoo (atraxnuu Salmo 32:1, 5). *

15. a) Xú káʼnii imbo̱o̱ ikha ejmañulú náa rey David rá. b) Ndiéjunʼ gándoo muʼni mu mutsi̱ji̱i̱ rí naxmiéjunlú wéñuʼ rá. (Atayáá kúgumaʼá “ Rí mambáyaʼ mu xaxmiéjuanʼ wéñuʼ”.)

 15 Nguáná, mbáa naxmiéjunlú ga̱jma̱a̱ rí xóo kuwáanʼ xúgi̱. Mbá xkri̱da, índo̱ David niʼnirámáʼ Salmo 55, nimíñuu numuu rí nigíʼ muxiyáa (Sal. 55:2-5). Mú tániñuʼ dí rígi̱ maʼnimbáti̱ga̱a̱ rí naku̱mu̱u̱ kaʼyoo Jeobá. David niʼtákáñuu Jeobá rí mambáyúu. Mú ma̱ngaa ndiʼyoo rí ikhaa mbaʼyóoʼ mayambáá mu mambanúu xkujndu ndrígóo (2 Sam. 15:30-34). Najmañulúʼ imbo̱o̱ ikha ga̱jma̱a̱ numuu David. Xúniʼñáʼ rí naxmiéjunlú maʼtáñajunlú, guʼni xúgíʼ rí nandoo mu muʼnimbánii xkujndu ga̱jma̱a̱ gakumulú rí Jeobá mambáyulúʼ.

16. Xú káʼnii eʼni itháan gujkhuʼ fe ndrígúlú rí nandoo gáʼthúu̱n mbiʼyuu Dios rá.

16 Nguáná, mbáa naxmiéjunlú rí xú káʼnii gakuwáanʼ nda̱wa̱á. Mú ragíʼmaa maxmiéjunʼlú ga̱jma̱a̱ numuu rí xóó tsírígá. Nda̱wa̱á kayuʼ, tikhuu rí nikumulú rí magajnúu ra̱májánʼ na̱nguá nindxu̱u̱ xúʼko̱ kaʼnii. Ga̱jma̱a̱ garmáʼáan a̱jkiu̱lú rí Jeobá ma̱ndoo maʼni maʼngulú muraʼníí. Rí nandoo gáʼthúu̱n mbiʼyuu naʼni itháan gujkhuʼ fe ndrígúlú. Nakru̱ʼu̱lú rí mbiʼyuu Dios nandoo gáʼthúu̱n “Ikhaa Na’ni dí Marigá” (Éx. 3:14). Rí nandoo gáʼthúu̱n mbiʼyuu Dios nasngájma rí ikhaa maʼnimbánuu xúgíʼ rí nikudaminaʼ maxnúlúʼ. Ikha jngó ragíʼmaa maxmiéjunʼlú ga̱jma̱a̱ numuu rí marigá nda̱wa̱á. Nduʼyáá májánʼ rí Dios maʼni tsajkurámiinʼ xa̱bi̱i̱ bi̱ tséniñaʼ ga̱jma̱a̱ mambáñun mutsi̱ji̱i̱ rí naxmiéjunʼ wéñuʼ ga̱jma̱a̱ numuu xkujndu rí niguáʼdáá nákha ginii ga̱jma̱a̱ xkujndu rí nuraʼníí xúgi̱ ga̱jma̱a̱ rí gárígá nda̱wa̱á.

GUʼTHÁÁN MBÁA BI̱ NAMBÁXULÚ GAJMIÚLÚ

17, 18. Índo̱ naxmiéjunlú, xú káʼnii gambáyulú muʼtámíjná gajmiúlú mbáa bi̱ nambáxulúʼ gajmiúlú rá.

17 Imbo̱o̱ rí mambáyulúʼ mutsi̱ji̱i̱ rí naxmiéjunlú wéñuʼ nindxu̱u̱ rí muʼtháán mbáa bi̱ nambáxulúʼ gajmiúlú rí naʼni maxmiéjunʼlú ga̱jma̱a̱ xú káʼnii ekumulú. Mbáa ajmbiu̱lú o a̱ʼgiu̱lú, mbáa bi̱ nambáxulúʼ gajmiúlú o mbáa bi̱ kayá edxu̱u̱ náa congregación mambáyulúʼ makru̱ʼu̱lú májánʼ rí kuwáanʼ rugíʼnii. Náa Biblia naʼthúlúʼ rí naxmiéjunlú wéñuʼ “náa a̱jkiu̱u̱n xa̱bu̱ rígá rí naxmiéjunʼ wéñuʼ, rúʼko̱ naʼni gámbáa, mú ajngáa májánʼ naʼni maxtáa gagi” (Prov. 12:25). Ga̱jma̱a̱ ma̱ngaa naʼthí dí ra̱májánʼ gagájnuu á mu tseraxu̱u̱n eʼwíínʼ xa̱bu̱ (Prov. 15:22).

 18 Índo̱ nagimbáanʼ náa congregación ma̱ngaa mambáyulúʼ muraʼníí rí naʼni maxmiéjunʼlú wéñuʼ. Ikhí nakuwáanʼ gajmiúlú a̱ngiu̱lú, bi̱ naxmiéjúnʼ kuyulúʼ ga̱jma̱a̱ nandún muxnulu tsiakii (Heb. 10:24, 25). Rí “muxnamijná tsiakii” kanikháanʼ mambáyulúʼ muraʼníí asndu xú káʼnii xkujndu (Rom. 1:12).

RÍ MAMBAXÚLÚ GAJMIÚLÚ DIOS NAʼNI ITHÁAN GUJKIANʼ

19. Náa numuu natayáá májánʼ rí á mu nambáxa̱ʼ ga̱jma̱ʼ Dios maxnáʼ tsiakii rá.

19 Mbáa bi̱ kayá edxu̱u̱ náa congregación ndrígóo Canadá ndiʼyoo rí gíʼdoo numuu muʼdaʼ náa Jeobá xkujndu ndrígúlú. Ndxájulú bugi̱ gíʼdoo mbá ñajunʼ rí naʼni maʼgaaʼ wéñuʼ. Naʼsngáa ga̱jma̱a̱ naxná xtágabu náa escuela. Ma̱ngaa, gíʼdoo mbá nandii rí nikumu̱u̱ numuu rí naxmiéjunʼ wéñuʼ. Náa eyá tsiakii mu mambáyuminaʼ xá. Ikhaa naʼni mbá tsiakii mba̱a̱ mu mambáxúu̱ itháan májánʼ ga̱jma̱a̱ Jeobá. Ma̱ngaa nambáyúu rí maʼthúu̱n a̱ʼgiu̱u̱ xú káʼnii eku̱mu̱u̱ ga̱jma̱a̱ rí numbayíí bi̱ nambáxu̱u̱ gajmíi̱n. Bi̱ kuya̱ edxu̱u̱ náa congregación ga̱jma̱a̱ superintendente de circuito nimbayíí mbaʼyoo xkujndu xóo eʼyoo Jeobá. Nda̱wa̱á, mbáa médico nimbáyúu makro̱ʼo̱o̱ ga̱jma̱a̱ numuu nandii rí gíʼdoo. Ikhú ndxájulú ndiʼyoo rí ndiyóoʼ mariʼkhu̱u̱ hora rí nañajunʼ mu mbayáa xu̱ʼ ga̱jma̱a̱ maʼni ejercicio. Mañúú mañúú nijmañuu rí maʼni ga̱jma̱a̱ rí nikumu̱u̱. Rí xúgi̱ naniñuʼ náa ñawúunʼ Jeobá xúgíʼ rí ikhaa tséʼngo̱o̱ maʼni.

20. a) Xú káʼnii gándoo guʼdaʼ náa Jeobá rí naʼni maxmiéjunʼlú rá. b) Ndiéjunʼ gúʼyáá náa imbo̱o̱ artículo rá.

20 Náa artículo rígi̱ ndiʼyáá rí gíʼdoo wéñuʼ numuu muʼdaʼ náa Jeobá rí naʼni maxmiéjunʼlú índo̱ guʼtákáñii, índo̱ guraxnuu Ajngóo ga̱jma̱a̱ índo̱ gundxaʼwáá edxu̱lúʼ rí niraxnuu ikhí. Ma̱ngaa gíʼdoo numuu muniʼñáʼ rí xi̱ʼ kaʼwu ndrígóo Dios mambáyulúʼ, rí muʼtháán mbáa bi̱ nambáxulúʼ gajmiúlú ga̱jma̱a̱ rí mu̱ʼgua̱ náa nagimbáanʼ. Náa imbo̱o̱ artículo gúʼyáá xú káʼnii embáyulú rí nakudaminaʼ Jeobá dí marigá rí muʼdaʼ (Heb. 11:6).

^ párr. 4 Filipenses 4:6, 7: “Xaxmiéjuanʼla ga̱jma̱a̱ numuu nimbá, gutajkháan ga̱jma̱a̱ gutakáñii Dios ma̱ngaa guxna̱a̱ núma̱aʼ, gunda̱ʼa̱a̱ xúgíʼ rí eyála; ikhú tsímáá rí na̱ʼkha̱ náa Dios rí itháan gíʼdoo tsiakii, mañewu̱u̱n a̱jkia̱la ga̱jma̱a̱ rí nundxaʼwamíjna̱ ga̱jma̱a̱ numuu Cristo Jesús”.

^ párr. 7 Gálatas 5:22, 23: “Xi̱ʼ kaʼwu nambáyulúʼ muguaʼdáá: Rí maʼndulúʼ kuʼyamijná, gagi, tsímáá, rí maʼngo̱o̱ wéñuʼ a̱jkiu̱lúʼ, rí manindxu̱lúʼ xa̱bu̱ májánʼ a̱jkiu̱u̱n, muʼni rí májánʼ, fe, rí manindxu̱lúʼ xa̱bu̱ guabáanʼ, rí muñewa̱a̱n rí muʼni. Nda̱a̱ nimbá xtángoo rí mariʼkhuu rígi̱”.

^ párr. 14 Salmo 32:1-3, 5: “Tsímáá xa̱bu̱ bi̱ niguma mba̱a̱ a̱jkiu̱u̱n kuyáá, nijngudi̱i̱ aʼkhúun. Asndu ndiʼkhún nitha aʼkhúunʼ, ga̱jma̱a̱ na̱nguá nirkaʼwumúʼúunʼ rí nikiéʼkhúunʼ. Nitha̱: “Mani majphúʼ náa Jeobá xúgíʼ dí xkawiʼ wéñuʼ rí nini”. Ga̱jma̱a̱ ikháánʼ mínaʼ nitani mba̱a̱ a̱jkia̱nʼ ga̱jma̱a̱ numuu akhúunʼ”.