Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Agosto tsiguʼ 2016

Ndiéjunʼ gándoo muni bi̱ nidamijná mu makuwá májánʼ rá.

Ndiéjunʼ gándoo muni bi̱ nidamijná mu makuwá májánʼ rá.

“Mú, mámbáa dí ikháanʼ, gaʼndoo kaʼyoo a̱ʼgiu̱u̱ xó má eyoo kaʼyaminaʼ ikhaa; xúʼko̱ má a̱ʼgu̱ gíʼmaa mbaʼyamajkuu wéñuʼ ajmbio̱o̱” (EFESIOS 5:33).

AJMÚÚ 87 GA̱JMA̱A̱ 3

1. Maski ajndu bi̱ nidamijná nugi̱ʼdi̱i̱ nakuwa gagi wéñuʼ, mú ndiéjunʼ guguaʼthi̱i̱n xá. (Atayáá timbá xtiʼkhu.)

RÍ NANDÚN kuyamijná novios ni̱jkha̱ raʼni itháan mba̱a̱ rí asndu nindúún mudamijná. Índo̱ na̱jkha̱nú mbiʼi rí mudamijná ga̱jma̱a̱ novio ndaʼyoo novia rí mitsiʼyáa wéñuʼ, nájmi̱i̱n kuwa gagi wéñuʼ. Ikhú nuxuda̱mi̱jna̱ rí xúninduwamijná. Mú nda̱wa̱á rí nidamijná mbaʼyóoʼ muriʼkhuíí xóo kuwa mu ma̱ndoo makuwá jnduʼ. Jeobá niʼni rí mudamijná, ga̱jma̱a̱ ikhaa nandoo rí xúgínʼ makuwa gagi ma̱ngaa rí xúraʼníí xkujndu. Ikha jngó nixnúún májánʼ xtágabu náa Biblia (Prov. 18:22). Maski ajndu xúʼko̱, xúgiáanʼ ni̱ndxu̱lú xa̱bu̱ aʼkhá. Ikha jngó náa Biblia naʼthí rí bi̱ nidamijná “maguaʼdáá xkujndu” (1 Cor. 7:28). Xú káʼnii gándoo guni mu xáguaʼdáá wéñuʼ xkujndu bi̱ nidamijná rá. Ga̱jma̱a̱ ndiéjunʼ gáʼyóóʼ muni mu makuwa májánʼ xá.

2. Xú káʼnii ngajua kaʼyoo marigá náa xa̱bu̱ bi̱ nidamijná rá.

 2 Náa Biblia naʼsngáa rí ngajua gíʼdoo wéñuʼ numuu. Mú rígá mixtiʼkhu ngajua rí ndayóoʼ musngajma bi̱ nidamijná. Mbá xkri̱da, gíʼmaa musngajma rí nandún kuyamijná xóo bi̱ nambáxu̱u̱n ga̱jma̱a̱ xóo bi̱ nidamijná. Ga̱jma̱a̱ á mu guáʼdiin e̱jñún, itháan kaʼyoo musngajma ngajua náa mbá guʼwíin. Mú rí itháan gíʼdoo numuu mu ma̱ndoo makuwá májánʼ bi̱ nidamijná nindxu̱u̱ ngajua rí na̱ʼkha̱ náa Biblia. Apóstol Pablo niʼthí ga̱jma̱a̱ numuu ngajua rígi̱: “Mámbáa dí ikháanʼ, gaʼndoo kaʼyoo a̱ʼgiu̱u̱ xó má eyoo kaʼyaminaʼ ikhaa; xúʼko̱ má a̱ʼgu̱ gíʼmaa mbaʼyamajkuu wéñuʼ ajmbio̱o̱” (Efes. 5:33).

ÑAJUNʼ RÍ NIKHÁNÁÁ XA̱BIYA̱ GA̱JMA̱A̱ A̱ʼGU̱

3. Nguáthá gíʼmaa maʼndún kuyamijná bi̱ nidamijná rá.

3 Pablo niʼnirámáʼ: “Ikháanʼla xa̱bu̱ bi̱ ninigu̱nʼ má, gaʼndala ku̱ñu̱u̱n má xúʼko̱ guʼyalaʼ, xó má Cristo nindoo kaʼyoo congregación rí asndu nixnáximinaʼ ga̱jma̱a̱ numuu” (Efes. 5:25). Rí mbiʼi xúgi̱ bi̱ cristianos nduyaridáá Jesús rí nandún kuyamijná xó má Jesús nindoo kaʼñún xa̱bi̱i̱ (atraxnuu Juan 13:34, 35; 15:12, 13). Nguáthá gíʼmaa maʼndún kuyamijná cristianos bi̱ nidamijná rá. Gíʼmaa maʼndún kuyamijná wéñuʼ rí asndu maʼndún makhañún ga̱jma̱a̱ numún. Mú índo̱ rígá xkujndu gakhi̱i̱, tikhun mbáa nundxa̱ʼwa̱míjna̱ rí na̱nguá eñún kuyamijná wéñuʼ. Ndiéjunʼ gándoo gambáñun xá. Nindxu̱u̱ ngajua rí na̱ʼkha̱ náa Biblia. Náa numuu rá. Numuu rí ngajua rígi̱ “xúgíʼ naʼngo̱o̱ a̱jkiu̱u̱n, xúgíʼ naʼnimbo̱o̱, xúgíʼ nagiʼthu̱u̱n ga̱jma̱a̱ xúgíʼ naʼngo̱o̱ naraʼnuu” ga̱jma̱a̱ “nimbá miʼtsú xámbáa” (1 Cor. 13:7, 8). Bi̱ nidamijná gíʼmaa marmáʼáan a̱jkiu̱ún rí nixudami̱jna̱ maʼndún kuyamijná ga̱jma̱a̱ rí xuninduwamijná. Rígi̱ maʼni mbuyáaʼ Jeobá ga̱jma̱a̱ muñajunʼ mbóó mu munimbánii asndu xú káʼnii má xkujndu.

4, 5. a) Xú káʼnii ñajunʼ nikána xa̱biya̱ rá. b) Xú káʼnii gíʼmaa mbaʼyoo a̱ʼgu̱ ñajunʼ rí gíʼdoo náa mbá guʼwíin rá. c) Ndiéjunʼ ndiyóoʼ muni bi̱ nidamijná rá.

4 Pablo niʼthí ñajunʼ rí kaʼyoo xa̱biya̱ ga̱jma̱a̱ a̱ʼgu̱. Ikhaa niʼthí: “Gu̱ʼu̱ bi̱ ninuju̱nʼ gíʼmaa dí munimbaníí rí ethi ajmbiún xó má náa Señor, numuu rí xa̱biya̱ kayá edxu̱u̱ náa a̱ʼgiu̱u̱ xó má Cristo kayá edxu̱u̱ náa congregación” (Efes. 5:22, 23). Xa̱biya̱ bi̱ gíʼdaa a̱ʼgiu̱u̱ gíʼmaa masngájma rí nandoo kaʼyoo xó má Jesús, bi̱ “kayá edxu̱u̱ náa congregación”. A̱ʼgu̱ tséndxa̱ʼóo edxu̱u̱ rí ajmbio̱o̱ gíʼdoo itháan numuu ki xóo ikhaa. Jeobá niʼthí rí a̱ʼgu̱ gíʼdoo mbá ñajunʼ rí gíʼdoo wéñuʼ numuu. Ikhaa niʼthí: “Ra̱májánʼ rí xa̱biya̱ maxtáa mbáwíi. Mani̱i̱ mbáa bi̱ mambáyúu, xóo mbáa bi̱ kaʼyoo ikhaa” (Gén. 2:18). A̱ʼgu̱ gíʼmaa mambáyúu ajmbio̱o̱ mu mbayá májánʼ edxu̱u̱ náa mbá guʼwíin. Índo̱ xa̱biya̱ nandoo kaʼyoo a̱ʼgiu̱u̱ xóo Jesús, ikhaa ndaʼyoo rí naxtie̱wa̱a̱n. Ma̱ngaa tséʼniuu mingíjyúuʼ mbaʼyamajkuu ga̱jma̱a̱ mambáyúu náa rí garaʼwíí maʼni ajmbio̱o̱.

Rí muni xó má eyoo Jeobá naʼni makuwa itháan jnduʼ bi̱ nidamijná

5 Mbáa ndxájulú bi̱ mbiʼyuu Cathy naʼthí: “Nákha mbáwun, nani rí nandoʼ ga̱jma̱a̱ nañewumínaʼ má ikhúúnʼ. Mú índo̱ ninujúnʼ, ndiyóoʼ mba̱yo̱o̱ rí xtáa ajmbioʼ ma̱ngaa”. Ikhaa naʼthí rí nindxu̱u̱ mingíjyúuʼ wéñuʼ, mú rí muni xó má eyoo Jeobá niʼni rí makuwa itháan jnduʼ [1] (atayáá nota rí na̱ʼkha̱ náa námbá artículo). Ajmbio̱o̱ mbiʼyuu Fred ga̱jma̱a̱ naʼthí: “Naʼniuʼ mingíjyúuʼ maraʼwíí rí mani. Mú  itháan mingíjyúuʼ índo̱ natatsigúnʼ, numuu rí ndayóoʼ ma̱ta̱ya̱a̱ ga̱jma̱a̱ numún a̱jmi̱i̱n xa̱bu̱. Mú mámbá mbiʼi naʼniuʼ itháan ra̱mingíjyúuʼ numuu rí na̱ndo̱ʼo̱o̱ Jeobá mambáyuʼ ga̱jma̱a̱ nadxuun májánʼ rí naʼthí a̱ʼgiu̱ʼ. Naku̱mu̱ʼ rí nambáxuxu májánʼ wéñuʼ”.

6. Ndíjkha rí ngajua “naruwáanʼla májánʼ wéñuʼ” índo̱ rígá xkujndu rá.

6 Ndiéjunʼ eñúnʼ bi̱ nidamijná mu muraʼníí xkujndu rá. Náa Biblia naʼthí: “Gaʼngo̱o̱ a̱jkia̱la kuyamíjna̱ ga̱jma̱a̱ guni mba̱a̱ a̱jkia̱la kuyamíjna̱ má xúʼko̱”. Numuu rí ñajúnʼ xa̱bu̱ aʼkhá, xa̱biya̱ ga̱jma̱a̱ a̱ʼgu̱ makiéʼkhun ga̱jma̱a̱ maguaʼdáá xkujndu. Índo̱ guguaʼnii rígi̱, ma̱ndoo majmañún ga̱jma̱a̱ numuu rí nakiéʼkhun, majmañún muni mba̱a̱ a̱jkiu̱ún kuyamijná ga̱jma̱a̱ maʼndún kuyamijná xó má eʼthí náa Biblia. Ngajua rígi̱ “naruwáanʼla májánʼ wéñuʼ” (Col. 3:13, 14). Bi̱ nidamijná ma̱ndoo musngajma ngajua rígi̱, rí maʼngo̱o̱ a̱jkiu̱ún, mani̱ndxu̱ún gua̱bi̱nʼ ga̱jma̱a̱ ‹xagun ku̱ñu̱u̱n sia̱nʼ› (1 Cor. 13:4, 5). Gíʼmaa munimbánii nacha̱ asndu xú káʼnii xkujndu, nákha xóó tsémbá mbiʼi (Efes. 4:26, 27). Ndayóoʼ manindxa̱ʼ xa̱bu̱ guabaaʼ ga̱jma̱a̱ maraʼdáá tsiakii mu maratha: “Nagawúnʼ rí niniaʼ”. Mú rí matanda̱ʼa̱ rí maʼni mba̱a̱ a̱jkiu̱u̱n kaʼyaʼ nayambáá mu mambanúu xkujndu ga̱jma̱a̱ naʼni maraxtaa itháan jnduʼ ga̱jma̱ʼ bi̱ ndiyáa.

GÍʼDOO NUMUU MUSNGAJMA RÍ NANDÚN KUYAMIJNÁ

7, 8. a) Xú káʼnii xtágabu exná Biblia ga̱jma̱a̱ numuu rí mubu̱nʼ bi̱ nidamijná rá. b) Náa numuu rí gíʼmaa musngajma rí nanigúnʼ kuyamijná bi̱ nidamijná rá.

7 Náa Biblia naxná májánʼ xtágabu rí mambáñún bi̱ nidamijná mu mbuyáá májánʼ ga̱jma̱a̱ numuu rí mubu̱nʼ (atraxnuu 1 Corintios 7:3-5). * Gíʼdoo wéñuʼ numuu rí mámbáa rí ikhiin mbaʼyoo rí ekumún ga̱jma̱a̱ rí ndayóoʼ imba̱a̱. Á mu xa̱biya̱ tsesngájma rí nandoo kaʼyoo a̱ʼgiu̱u̱, ikhaa maʼniuu mingíjyúuʼ maniguuʼ mabo̱ʼ ga̱jma̱a̱. Náa Biblia naʼthúu̱n xa̱biya̱ rí maʼniuu a̱ʼgiu̱u̱ xóo ‹má ku̱ma̱ rí gíʼdoo› (1 Ped. 3:7). Xa̱biya̱ nimbá miʼtsú ragíʼmaa matsudaa a̱ʼgiu̱u̱ rí mabóoʼ ga̱jma̱a̱ ni má rí maʼniuu tsiakii. Rígi̱ gíʼmaa muni á mu nájmi̱i̱n nandún. Mú nakujmaa rí xa̱biya̱ xtáa itháan xawii ki xóo a̱ʼgu̱ mu mubu̱nʼ. Mú gíʼmaa muni índo̱ nájmi̱i̱n nagua̱ʼa̱ muni.

8 Mú náa Biblia tséʼthi mbájmbu xú káʼnii gíʼmaa musngajma rí nanigúnʼ kuyamijná bi̱ nidamijná. Mú naʼsngáa rí gíʼdoo numuu musngajma rí nanigu̱nʼ kuyamijná (Cant. de Cant. 1:2; 2:6). Xó má eʼyáá, cristianos bi̱ ninigu̱nʼ o ninuju̱nʼ gíʼmaa musngajma rí nandún kuyamijná.

9. Náa numuu dí ra̱májánʼ maʼnda̱ʼ mataba̱ʼ ga̱jma̱a̱ mbáa bi̱ tíyáa rá.

9 Tikhun nini gámbáa rí nidamijná numuu rí nanigu̱nʼ mbuyáá pornografía o nusngajma rí nandún mubu̱nʼ gajmiún imba̱a̱ xa̱bu̱. Xóo rígi̱, phú ra̱májánʼ  nindxu̱u̱ ga̱jma̱a̱ ndayóoʼ muʼni gajmiúlú rígi̱. Á mu nandulúʼ kuʼyáá wéñuʼ Jeobá ga̱jma̱a̱ xa̱bu̱ numbaaʼ gajmiúlú, xúniʼñáʼ rí asndu nimbáa maʼni gachúu rí niʼdamijná. Ragíʼmaa muʼni nimbá rí makujmaa rí kuwáanʼ ruʼtsíin gajmiúlú mbáa bi̱ túʼyáa numuu dí rúʼko̱ masngájma rí nda̱a̱ ngajua. Garmáʼáan a̱jkiu̱lú rí Dios ndaʼyoo xúgíʼ rí nundxa̱ʼwa̱míjna̱ ga̱jma̱a̱ rí nuʼnilú. Xúʼko̱ gáʼni rí maʼndulú muʼni rí naniguʼ ga̱jma̱a̱ mbóó a̱jkiu̱lú náa ajmbiu̱lú o a̱ʼgiu̱lú (atraxnuu Mateo 5:27, 28; Hebreos 4:13). *

ÍNDO̱ RÍGÁ XKUJNDU

10, 11. a) Ndiéjunʼ erígá náa tikhu xuajen ga̱jma̱a̱ numuu rí xa̱bu̱ nuniñami̱jna̱a̱ rá. b) Ndiéjunʼ eʼthí Biblia ga̱jma̱a̱ numuu rí nuniñami̱jna̱a̱ xá. c) Ndiéjunʼ gambáñun bi̱ nidamijná mu xúniñami̱jna̱a̱ mbá nacha̱ kayuʼ rá.

10 Tikhun xa̱bu̱ nuraʼwíí muniñami̱jna̱a̱ índo̱ tséʼngu̱u̱n gunimbánii xkujndu gakhii. Náa tikhu xuajen, mbá tikuapi̱i̱n bi̱ nidamijná naguáʼnu nuniñami̱jna̱a̱. Xkujndu rígi̱ tsékujmaa wéñuʼ náa xa̱bi̱i̱ Jeobá. Mú naʼni itháan mbaʼin xa̱bi̱i̱ Jeobá bi̱ nidamijná naguáʼdáá xkujndu gakhii wéñuʼ.

11 Náa Biblia naʼthí: “A̱ʼgu̱ ragíʼmaa maniñuʼ ajmbio̱o̱; mú á mu ikhaa najkha̱a̱, gaxtáa mbáwíi xánujunʼla, o, á mu na̱nguá, gambaxíiʼ ga̱jma̱a̱ ajmbio̱o̱; ga̱jma̱a̱ xa̱biya̱ ragíʼmaa maniñuʼ a̱ʼgiu̱u̱” (1 Cor. 7:10, 11). Tikhun bi̱ nidamijná mbáa nundxa̱ʼwa̱míjna̱ rí xkujndu rí guáʼdáá nindxu̱u̱ mingíjyúuʼ wéñuʼ rí asndu ndayóoʼ muniñami̱jna̱a̱. Mú Jesús niʼthí rí muniñami̱jna̱a̱ na̱nguá nindxu̱u̱ mbá gitsíin. Jesús nitanga̱a̱ niʼthí rí Dios má niʼthí ga̱jma̱a̱ numuu rí mudamijná, niʼthí: “Ri niruhua Dios maxarakuhuaji xabo” (Mat. 19:3-6; Gén. 2:24). Nakujmaa kaʼwu rí Jeobá nandoo rí bi̱ nidamijná makuwá mbóó (1 Cor. 7:39). Xúgiáanʼ gíʼmaa marmáʼáan a̱jkiu̱lú rí Jeobá manda̱ʼa̱a̱ cuenta ga̱jma̱a̱ rí gúʼni. Rígi̱ mambáyulúʼ muʼnimbánii xkujndu mbá nacha̱, nákha xóó tséʼni mingíjyúuʼ.

Bi̱ nidamijná nunimbánii xkujndu ndrígu̱ún numuu rí nuniñami̱jna̱ rí Dios maxnún ikha

12. Ndíjkha rí ma̱ndoo mundxa̱ʼwa̱a̱ edxu̱ún rí muniñami̱jna̱a̱ bi̱ nidamijná rá.

12 Ndíjkha rí tikhun bi̱ nidamijná guáʼdáá xkujndu gakhii wéñuʼ rá. Tikhun nakuwa gíná o nakiʼníin numuu rí na̱nguá kuwa xóo nikumu̱ún. Naguáʼdáá má xúʼko̱ xkujndu numuu rí mixtiʼkhu xóo ni̱jkha̱ ranuun o xóo endxa̱ʼwa̱a̱ edxu̱ún. Nguáná guáʼdáá xkujndu gajmiún bi̱ kuñún, numuu mbújkha̱a̱ o xú káʼnii muni mbanuu e̱jñún. Mú májánʼ índo̱ nduʼyáá rí mbaʼin cristiano bi̱ nidamijná nunimbánii xkujndu ndrígu̱ún numuu rí nuniñami̱jna̱ rí Dios maxnún ikha.

13. Arathá náa numuu rí ma̱ndoo muniñami̱jna̱a̱.

13 Ma̱ndoo marigá mbá rí gíʼdoo numuu mu bi̱ nidamijná muniñami̱jna̱a̱. Tikhun niraʼwíí muniñami̱jna̱a̱ numuu xkujndu gakhii rí naguáʼdáá xóo rí tsíñún gumbañúún bi̱ kuwa náa guʼwún, rí nuxnún wéñuʼ ga̱jma̱a̱ rí gamíi muniñaʼ rambáxu̱u̱n gajmiún  Dios. Índo̱ rígá xkujndu gakhii, bi̱ nidamijná gíʼmaa munda̱ʼa̱ rí mixtambáñuun guni bi̱ kuya̱ edxu̱u̱. Xa̱bekha bugi̱ guáʼdáá itháan ku̱ma̱ ga̱jma̱a̱ ma̱ndoo mumbayála mu munimbánii xtágabu ndrígóo Dios. Á mu bi̱ nidamijná nunda̱ʼa̱a̱ Jeobá xi̱ʼ kaʼwu ndrígóo, ma̱ndoo munimbánii ikha ndrígóo Biblia ga̱jma̱a̱ musngajma rí ni̱ndxu̱ún cristianos (Gál. 5:22, 23) [2] .

14. Ndiéjunʼ eʼthúún Biblia a̱ngiu̱lú bi̱ ndi̱ya̱a̱ mbáa bi̱ na̱nguá nindxu̱u̱ xa̱bi̱i̱ Jeobá rá.

14 Náa Biblia naʼsngáa dí rígá mbaʼa numuu májánʼ mu bi̱ nidamijná xuniñami̱jna̱ maski ajndu mbáa tséʼni ñajunʼ Jeobá (atraxnuu 1 Corintios 7:12-14). * Bi̱ rañájunʼ xa̱bi̱i̱ Jeobá “naguma tsajkurámááʼ” numuu rí ndi̱ya̱a̱ mbáa bi̱ nindxu̱u̱ xa̱bi̱i̱ Jeobá. Ga̱jma̱a̱ e̱ji̱i̱n majkhinʼ ni̱ndxu̱ún “santos”, ikha jngó Dios nañewu̱u̱n. Pablo niʼthún cristianos: “A̱ʼgu̱, xú káʼnii tayáá rí xátani kríyaaʼ ajmbiaʼ o xa̱biya̱, xú káʼnii tayáá rí xátani kríyaaʼ a̱ʼgia̱ʼ rá.” (1 Cor. 7:16.) Rígá wéñuʼ xkri̱da ndrígu̱ún cristianos bi̱ nimbañúún ajmbiún o guʼñún mani̱ndxu̱ún xa̱bi̱i̱ Jeobá.

15, 16. a) Xú káʼnii xtágabu exnúu Biblia a̱ʼgu̱ bi̱ ndiyáa mbáa bi̱ rañájunʼ xa̱bi̱i̱ Jeobá rá. b) Ndiéjunʼ gáʼni mbá cristiano “á mu bi̱ tséʼyamajkhuu Dios najkha̱a̱” rá.

15 Apóstol Pedro naxnún xtágabu gu̱ʼu̱ cristianas rí mbuyamajkún ajmbiún mú “á mu tikuin na̱nguá enimbu̱ún ajngáa, maguanu munimbu̱ún ga̱jma̱a̱ numuu rí xóo kuwa runi guʼñún, numuu rí ikhiin míninʼ nduyáá rí guʼñún nuni rí májánʼ ga̱jma̱a̱ guáʼdáá wéñuʼ gamajkhún”. A̱ʼgu̱ cristiana gíʼmaa masngájma mbá “espíritu gua̱ba̱ʼ a̱jkiu̱u̱n, rí gíʼdoo numuu náa inuu Dios” (1 Ped. 3:1-4). Á mu mbáa cristiana  naʼnimbánuu xtágabu rígi̱, xúʼko̱ gáʼni rí ma̱ndoo mambáyúu ajmbio̱o̱ mu mani̱ndxu̱u̱ xa̱bi̱i̱ Jeobá ki xóo rí xúgíʼ mbiʼi maʼthúu̱n ga̱jma̱a̱ numuu rí naku̱mu̱u̱.

16 Mú, ndiéjunʼ garigá á mu mbáa xa̱biya̱ bi̱ na̱nguá nindxu̱u̱ xa̱bi̱i̱ Jeobá naʼthí maniñaaʼ a̱ʼgiu̱u̱ xá. Náa Biblia naʼthí: “Á mu bi̱ tséʼyamajkhuu Dios najkha̱a̱, ga̱ʼga̱a̱ má; ndxájulú xa̱biya̱ o a̱ʼgu̱ rakáʼyoo magumaa tsiakii ga̱jma̱a̱ numuu rígi̱, mú Dios nandoo rí maraxtaa tsímáá” (1 Cor. 7:15). Xó má eʼyáá, xa̱bi̱i̱ Jeobá ragíʼmaa maʼniuu tsiakii mu mbáa bi̱ tséʼnimbo̱o̱ maguanúu. Maski asndu rí muniñami̱jna̱a̱ maʼni makuwa tsímáá mú náa Biblia naʼthí rí xándoo manigúnʼ o manújunʼ mbu̱júu̱ʼ. Mú mbáa nda̱wa̱á, bi̱ rañajunʼ xa̱bi̱i̱ Jeobá magíʼ mata̱nga̱a̱ mu maʼnimbánuu xkujndu. Ga̱jma̱a̱ asndu maʼga̱nú mani̱ndxu̱u̱ xa̱bi̱i̱ Jeobá.

NDIÉJUNʼ RÍ ITHÁAN GÍʼDOO NUMUU NÁA BI̱ NIDAMIJNÁ RÁ.

Á mu nuñewa̱a̱n rí nduyamajkuíí Jeobá, rí nidamijná maʼni itháan tsímáá. (Atayáá kutriga̱ 17.)

17. Ndiéjunʼ rí itháan gíʼdoo numuu náa cristianos bi̱ nidamijná rá.

17 Numuu rí kuwaanʼ náa “iwáá mbiʼi”, nindxu̱u̱ “mbiʼi gakhi̱i̱ ga̱jma̱a̱ maʼni mingíjyúuʼ” (2 Tim. 3:1-5). Ikha jngó ndayóoʼ muñeumíjna̱ ga̱jma̱a̱ mambáxulu májánʼ gajmiúlú Jeobá. Pablo niʼthí: “Nánguá eguanúu mba̱yu̱ʼ mbiʼi”. Nda̱wa̱á niʼthí rí “bi̱ guáʼdiin guʼñún” gíʼmaa muni “xóo nda̱wi̱i̱n”. Ga̱jma̱a̱ xóó niʼthí rí “bi̱ najmún numbaaʼ” gíʼmaa muni “xóo bi̱ tséjmún káxi̱ kayuʼ” (1 Cor. 7:29-31). Mú Pablo tándoo gáʼthi rí cristiano bi̱ ninigu̱nʼ xúñawu̱u̱n bi̱ ndi̱ya̱a̱. Mú rí kuwáanʼ náa iwáá mbiʼi, rí itháan gíʼdoo numuu náa ikháanʼlu rí muʼni ñajunʼ Jeobá (Mat. 6:33).

18. Xú káʼnii gándoo bi̱ nidamijná makuwá gagi rá.

18 Náa mbiʼi rí mingíjyúuʼ xúgi̱, mbaʼin bi̱ nidamijná nuniñami̱jna̱a̱. Xú káʼnii gándoo bi̱ nidamijná makuwá gagi ga̱jma̱a̱ rí xaguaʼdáá wéñuʼ xkujndu rá. Rí makuwáanʼ mijngii náa Jeobá ga̱jma̱a̱ náa xuajñu, muʼnimbulúʼ ikha rí na̱ʼkha̱ náa Biblia ga̱jma̱a̱ rí naxná xi̱ʼ kaʼwu. Á mu nunila, mbuyamajkuíí rí “niruhua Dios” (Mar. 10:9).

^ [1] (kutriga̱ 5): Nixtiʼkhu̱u̱ mbiʼñún.

^ [2] (kutriga̱ 13): Atayáá libro “Manténganse en el amor de Dios”, apéndice “¿Qué dice la Biblia sobre el divorcio y la separación?”.

^ párr. 7 1 Corintios 7:3-5: “Xa̱biya̱ gaxnúu a̱ʼgiu̱u̱ rí kaʼyoo; mú a̱ʼgu̱ xúʼko̱ má gáʼni ga̱jma̱a̱ ajmbio̱o̱. A̱ʼgu̱ tséʼtañajunʼ xuyuʼ, ajmbio̱o̱ eʼtáñajunʼ; xúʼko̱ má xa̱biya̱ tséʼtañajunʼ xuyuʼ, a̱ʼgiu̱u̱ eʼtáñajunʼ. Xúniʼñáʼ rubala, i̱ndó á mu xúʼko̱ nimbánala mbá nguáthá mbiʼi, mu majmala mbiʼi mutajkáan ga̱jma̱a̱ nda̱wa̱á mubala mbu̱júu̱, mu xágruiga̱ tsáʼkhá Satanás náa inala numuu rí tsebala”.

^ párr. 9 Hebreos 4:13: “Ga̱jma̱a̱ nimbá rí niʼni Dios xándoo gárkaʼuminaʼ náa inuu, numuu rí xúgíʼ rígá pa̱jnu̱ ga̱jma̱a̱ ndaʼyoo májánʼ náa bi̱ muxnaxíi cuenta”.

^ párr. 14 1 Corintios 7:12-14: “Mú eʼwíínʼ na̱thu̱u̱n, xúʼko̱ ikhúúnʼ, raʼkháa Señor, á mu mbáa ndxájulú gíʼdaa a̱ʼgiu̱u̱ bi̱ tséʼyamajkhuu Dios, mú a̱ʼgu̱ nandoo maxtáa ga̱jma̱a̱, xániñuʼ; ga̱jma̱a̱ a̱ʼgu̱ bi̱ gíʼdaa ajmbio̱o̱ bi̱ tséʼyamajkhuu Dios, ga̱jma̱a̱ ajmbio̱o̱ nandoo maxtáa ga̱jma̱a̱, xániñuʼ. Numuu rí xa̱biya̱ bi̱ tséʼyamajkhuu Dios naguma tsajkurámááʼ ga̱jma̱a̱ numuu a̱ʼgiu̱u̱, ga̱jma̱a̱ a̱ʼgu̱ naguma tsajkurámááʼ ga̱jma̱a̱ numuu ndxájulú; xúʼko̱ má e̱jñún kaʼñún náa numbaaʼ, mú xúgi̱ ni̱ndxu̱ún santos”.