“Atraxnuu má xúʼko̱ náa kuwa mbaʼin xa̱bu̱, araxnún tsiakii, arasngúún” (1 TIMOTEO 4:13).

AJMÚÚ 45 GA̱JMA̱A̱ 70

1, 2. a) Xú káʼnii nimbánuu Isaías 60:22 rí mbiʼi xúgi̱ rá. b) Ndiéjunʼ eyóoʼ náa xuajñu Jeobá rá.

“BI̱ LÁJUÍIN maʼga̱nú mani̱ndxu̱u̱ mil, ga̱jma̱a̱ bi̱ chíʼgíʼ mbá xuajin bi̱ gíʼdoo tsiakii” (Is. 60:22). Rí kiʼtáriyaʼ rígi̱ nambánuu rí mbiʼi xúgi̱ rí fin gíiʼ mijngii. Mbá xkri̱da, nakha tsiguʼ 2015 kuwa mbá 8,220,105 xa̱bi̱i̱ Jeobá tsí nutaraʼa náa xúgíʼ numbaaʼ. Jeobá niʼthí ajngáa rígi̱ ga̱jma̱a̱ numuu rí xuajñu mbaja̱a̱: “Ikhúúnʼ minuʼ, Jeobá, mani rí mba̱jo̱o̱ mbiʼi rí kaʼyoo”. Rígi̱ nandoo gáʼthún rí maguaʼdáá itháan ñajunʼ muʼni. Lá kuwáanʼ ru̱ʼni̱ xúgíʼ tsiakii mu muʼtáraʼa ga̱jma̱a̱ muʼsngáa ajngáa ndrígóo Reino ráʼ. Mbaʼin a̱ngiu̱lú ni̱ndxu̱ún precursores regulares o auxiliares. Tikhun nigún i̱mba̱ níʼkhá mu mutaraʼa itháan. Ga̱jma̱a̱ eʼwíínʼ kuwa ruñajunʼ gakhii náa naguma Guʼwá náa nagimbáanʼ.

2 Rí mbá xúgíʼ tsiguʼ narígá mbá 2,000 congregación. Náa congregación rúʼko̱ ndayóoʼ makuwá bi̱ mbu̱ya̱ edxu̱u̱ ga̱jma̱a̱ siervos ministeriales. Ikha jngó, mámbá tsiguʼ ndayóoʼ rí mbaʼin wéñuʼ a̱ngiu̱lú maguanu mani̱ndxu̱ún siervos ministeriales ga̱jma̱a̱ ikhiin maguánu mani̱ndxu̱ún bi̱  mbu̱ya̱ edxu̱u̱. Nakujmaa kaʼwu rí xúgiáanʼ ndayóoʼ muʼni má xúʼko̱ “ñajunʼ ndrígóo Señor”, tséʼniuu á mu ni̱ndxu̱lú xa̱bekha o gu̱ʼu̱ (1 Cor. 15:58).

NDIÉJUNʼ EYÓOʼ MU MUʼNI ITHÁAN ÑAJUNʼ DIOS RÁ.

3, 4. Xú káʼnii meta gándoo gaguaʼdáá rá.

3 (Atraxnuu 1 Timoteo 3:1). * Apóstol Pablo nixnúún tsiakii a̱ngiu̱lú bi̱ nunimi̱jna̱ maguaʼdáá itháan ñajunʼ náa congregación. Rí niʼthí Pablo naʼni mundxaʼwamíjna̱ náa mbáa bi̱ naʼniminaʼ o asndu nakruíyaʼ ñawúunʼ mu magujtuun mbá dí rígá mitsínguánʼ. Mbá xkri̱da, gundxaʼwamíjna̱ rí mbáa ndxájulú gíʼdoo meta mu mani̱ndxu̱u̱ siervo ministerial. Mbáa na̱jkha̱nú ndaʼyoo rí ndayóoʼ mani̱ndxu̱u̱ mbáa cristiano itháan májáánʼ. Índo̱ gáʼni rígi̱ ga̱jma̱a̱ nanindxu̱u̱ siervo ministerial, nda̱wa̱á maʼniminaʼ xóó mu mani̱ndxu̱u̱ mbáa bi̱ mbayá edxu̱u̱ náa congregación.

4 Tikhun a̱ngiu̱lú nuriʼkuíí xóo kuwa mu muni itháan ñajunʼ Jeobá. Mbá xkri̱da, mbáa nandún mani̱ndxu̱ún precursores, muñajunʼ náa Betel o muni Guʼwá náa nagimbáanʼ. Guʼyáá xú káʼnii Biblia ma̱ndoo mambáyulúʼ mu muʼni itháan ñajunʼ Jeobá.

GÚʼNI MÁ XÚʼKO̱ ITHÁAN ÑAJUNʼ DIOS

5. Xú káʼnii gándoo muni itháan ñajunʼ Jeobá jiáma o wa̱ʼxa̱ʼ rá.

5 Bi̱ ni̱ndxu̱ún jiáma o wa̱ʼxa̱ʼ na̱nguá eʼniún nandii ga̱jma̱a̱ guáʼdáá tsiakii, ikha jngó rígá mbaʼa rí ma̱ndoo muni ga̱jma̱a̱ numuu Jeobá (atraxnuu Proverbios 20:29). * Tikhun jiáma bi̱ kuwa náa Betel nuni imprimir ga̱jma̱a̱ nuni libros. Mbaʼin nuni o nuni̱i̱ májáánʼ Guʼwá náa nagimbáanʼ. Eʼwíínʼ nuxnaximi̱jna̱ muñambáá náa nirígá gamiéjunʼ. Ga̱jma̱a̱ mbaʼin precursor najmañún i̱ʼwáʼ ajngáa o nagún náa i̱ʼwáʼ xuajen mu mutaraʼa itháan.

6-8. a) Ndiéjunʼ nimbáyúu mbáa dxámá mu mariʼkhuu xóo eʼyoo ñajunʼ rí naʼni náa Dios ga̱jma̱a̱ ndiéjunʼ nirígá rá. b) Xú káʼnii gándoo gúʼyáá rí “Jeobá nindxu̱u̱ májáánʼ” rá.

6 Maski ajndu nandulúʼ kuʼyáá Jeobá ga̱jma̱a̱ nandulúʼ muxnáá rí itháan májánʼ, ma̱ndoo maku̱mu̱lú xóo ndxájulú bi̱ nagumbiʼyuu Aarón. Ikhaa nindoo manigu̱ʼ rí naʼni ga̱jma̱a̱ numuu Jeobá, mú na̱nguá nixtáa gagi. Ni̱jkha̱ reunión ga̱jma̱a̱ niʼtáraʼa asndu nákha nindxu̱u̱ mbáa ada̱, mú niskhoo eʼni. Ndiéjunʼ niʼni xá.

7 Niʼniminaʼ maguxnuu Biblia xúgíʼ mbiʼi, maʼnirataminaʼ mu maʼga̱ reunión ga̱jma̱a̱ rí makuxi̱ ñawúunʼ ikhí. Ma̱ngaa, nigíʼdu̱u̱ niʼtáraʼa itháan. Xúgíʼ rígi̱ nimbáyúu mu maʼni itháan ñajunʼ Dios ga̱jma̱a̱ nigíʼdu̱u̱ nindoo kaʼyoo itháan. Ga̱jma̱a̱ ikhú niʼni itháan gagi a̱jkiu̱u̱n. Ninindxu̱u̱ precursor, niñambáá náa xuajen rí nirígá gamiéjunʼ ga̱jma̱a̱ ni̱jkha̱ gátaráʼa i̱ʼwáʼ xuajen. Rí xúgi̱ nindxu̱u̱ bi̱ kayá edxu̱u̱ ga̱jma̱a̱ xtáa náa Betel. Xú káʼnii eku̱mu̱u̱ xá. Naʼthí rí ndiʼyoo dí “Jeobá nindxu̱u̱ májáánʼ”. Ma̱ngaa, naku̱mu̱u̱ rí gíʼmaa ga̱jma̱a̱ Jeobá ma̱ngaa nandoo maʼni itháan náa ikhaa. Ikhaa ndaʼyoo dí rígi̱ niʼni tsajkurámááʼ itháan.

 8 Mbáa bi̱ niʼnirámáʼ salmo niʼthí: “Ganigua̱la ga̱jma̱a̱ gu̱ya̱a̱ rí Jeobá nindxu̱u̱ májáánʼ”. Niʼthí xóó: “Mú bi̱ nduyááʼ Jeobá, maxáʼñúnʼ asndu nimbá rí májánʼ” (atraxnuu Salmo 34:8-10). * Índo̱ nuxnáá rí itháan májánʼ Jeobá, nakuwáanʼ gagi numuu rí nduʼyáá rí naniguʼ. Ga̱jma̱a̱ ikhaa maʼnimbánuu rí niʼthí mañewu̱nlú.

XÁʼNI NÉʼNGULÚ

9, 10. Ndíjkha rí gíʼdoo numuu rí muguaʼthi̱i̱n rá.

9 Mbáa nandulúʼ muʼni itháan ñajunʼ Jeobá. Mú, ndiéjunʼ rí gúʼni á mu niʼni má mba̱yu̱ʼ rí kuwáanʼ raguáʼthi̱i̱n mu muxnulu mbá ñajunʼ náa congregación o naxtiʼkhuu rí muʼni rá. Á mu naguaʼnii rígi̱, gáʼngo̱o̱ a̱jkiu̱lú (Miq. 7:7). Mbáa Jeobá maniñuʼ má marigá rígi̱. Mú gakumulú kuʼyáá má xúʼko̱ rí ikhaa má gambáyulú. Gundxaʼwamíjna̱ náa xkri̱da ndrígóo Abrahán. Jeobá niʼthúu̱n maxnúu mbáa ada̱, mu ninújngoo mba̱yu̱ʼ tsiguʼ rí nixtáa Isaac. Índo̱ Abrahán xtáa ragiʼthu̱u̱n, niʼngo̱o̱ a̱jkiu̱u̱n ga̱jma̱a̱ tandati̱go̱o̱ fe náa Jeobá (Gén. 15:3, 4; 21:5; Heb. 6:12-15).

10 Xúʼko̱, rí maguáʼthi̱i̱n nindxu̱u̱ mingíjyúuʼ (Prov. 13:12). Á mu nundxa̱ʼwa̱míjna̱ má xúʼko̱ ga̱jma̱a̱ numuu ñajunʼ, makánajkulú. Itháan májánʼ rí majmulúʼ tiempo mu manindxu̱lúʼ itháan májáánʼ xa̱bu̱ rí mambáyulúʼ muʼni ñajunʼ náa congregación. Guʼyáá ajtsú rí ma̱ndoo muʼni rí kuwaanʼ raguáʼthi̱i̱n.

Rí muraxnuu Biblia ga̱jma̱a̱ mundxaʼwamíjna̱ rí naʼthí ikhí manindxu̱lúʼ xa̱bu̱ ndaʼyoo ma̱ngaa muraʼwíí májánʼ rí muʼni

11. a) Xú káʼnii xa̱bu̱ guʼnimi̱jna̱ manindxu̱lúʼ rá. b) Ndíjkha rí gíʼdoo numuu muʼni rá.

11 Guʼnimi̱jna̱ manindxu̱lúʼ itháan májánʼ xa̱bu̱. Á mu nuraxnuu Biblia ga̱jma̱a̱ nundxa̱ʼwa̱míjna̱ rí nuraxnuu, manindxu̱lúʼ xa̱bu̱ bi̱ ndaʼyoo, mundxaʼwamíjna̱ kaʼwu ga̱jma̱a̱ muraʼwíí muʼni rí májánʼ. Gíʼdoo numuu rí a̱ngiu̱lú maguaʼdáá xtiʼkhuu rígi̱ mu muñewa̱a̱n congregación (Prov. 1:1-4; Tito 1:7-9). Índo̱ nuʼnigajmaa Biblia, nduʼyáá rí endxa̱ʼo̱o̱ edxu̱u̱ Jeobá ga̱jma̱a̱ numuu mbaʼa temas. Ga̱jma̱a̱ xúgíʼ mbiʼi ma̱ndoo majmulúʼ rí najmañulúʼ mu muraʼwíí muʼni rí naniguʼ. Mbá xkri̱da, mbuʼyáá xú káʼnii gúʼniu̱u̱n eʼwíínʼ, xú káʼnii gajmulú májánʼ mbújkha̱a̱, muraʼwíí májánʼ xtíin rí muʼgíiʼ ga̱jma̱a̱ xú káʼnii gúʼni gagimijná.

12. Xú káʼnii gándoo gusngajma bi̱ kuwa náa congregación rí ni̱ndxu̱ún jmbiin rá.

12 Guʼnimi̱jna̱ mu muʼnimbánii májánʼ ñajunʼ rí gakhánulú. Índo̱ xuajñu Dios xtáa raʼni̱i̱ templo, Nehemías ndiyóoʼ xa̱bu̱ bi̱ mumbayíí mu muni mbaʼa ñajunʼ. Tsíin niraʼwíin xá. Bi̱ guáʼdáá mbá a̱jkiu̱ún májánʼ. Ikhaa ndaʼyoo rí ikhiin nandún kuyáá Dios ga̱jma̱a̱ rí munimbánii májánʼ ñajunʼ rí gáxnún (Neh. 7:2; 13:12, 13). Xúʼko̱ má káʼnii rí mbiʼi  xúgi̱. Á mu mbáa ndxájulú nindxu̱u̱ jmbii ga̱jma̱a̱ nañajunʼ gakhii, majmaʼniiʼ numuu rí májánʼ a̱jkiu̱u̱n. Ikhú mbáa makhánáʼ itháan ñajunʼ (1 Cor. 4:2). Tséʼniuu á mu ni̱ndxu̱lú xa̱biya̱ o a̱ʼgu̱, guʼnimbánii májánʼ ñajunʼ rí nakhánulú muʼni (atraxnuu 1 Timoteo 5:25). *

13. Xú káʼnii gándoo guʼyaridáá José índo̱ gúniúlú dí ra̱májánʼ xá.

13 Gumbáyumi̱jna̱ náa Jeobá. Á mu mbáa naʼniulú mbá dí ra̱májánʼ, ndiéjunʼ gándoo gúʼni rá. Ma̱ndoo muʼthán xú káʼnii eʼni a̱jkiu̱lú. Mú á mu nusngájma rí nuʼthá ikháanʼ nindxu̱u̱ itháan májánʼ, ma̱ndoo muʼni rí marigá itháan xkujndu. Gundxaʼwamíjna̱ náa xkri̱da májánʼ ndrígóo José. A̱ngui̱i̱n nini̱i̱ dí ra̱májánʼ kayuʼ, ga̱jma̱a̱ nda̱wa̱á niguma tsu̱di̱i̱ mbá rí táʼni ga̱jma̱a̱ ni̱jkhá guʼwá e̱jua̱nʼ. Mú ikhaa nimbáyuminaʼ náa Jeobá. Nindxa̱ʼwáminaʼ ga̱jma̱a̱ numuu rí nikudaminaʼ Dios ma̱ngaa niwi̱ji̱ jmbu (Sal. 105:19). Índo̱ nimínuuʼ, ikhú ninindxu̱u̱ itháan májánʼ xa̱bu̱ rí nda̱wa̱á nimbáyúu índo̱ nigruigú mbá ñajunʼ rí itháan gíʼdoo numuu (Gén. 41:37-44; 45:4-8). Á mu mbáa xa̱bu̱ naʼniulú mbá dí ra̱májánʼ, gunda̱ʼa̱a̱ ku̱ma̱ Jeobá. Ikhaa mambáyulúʼ mu xákiʼnáanʼlú ga̱jma̱a̱ manindxu̱lúʼ májánʼ xa̱bu̱ índo̱ gutamijná gajmiúlú (atraxnuu 1 Pedro 5:10). *

 GUʼTÁRAʼA ITHÁAN MÁJÁNʼ

14, 15. a) Náa numuu rí ndayóoʼ muʼtáraʼa itháan májánʼ rá. b) Xú káʼnii gándoo guriʼkui̱i̱ rí muʼtáraʼa rá. (Atayáa timbá xtiʼkhu ga̱jma̱a̱ kúgumaʼá “ “Lá ma̱ndoo mbuʼyáaʼ i̱ʼwáʼ xóo muʼtáraʼa ráʼ.”)

14 Pablo niʼthúu̱n Timoteo rí gaʼtáriyaʼ itháan májánʼ Ajngá rawunʼ Dios. Ma̱ngaa niʼthúu̱n: “Atiewumínaʼ ikháánʼ ga̱jma̱a̱ rí narasngáa” (1 Tim. 4:13, 16). Timoteo xtáa raʼtáraʼa má mba̱yu̱ʼ tsiguʼ. Mú, náa numuu rí ndayóoʼ maʼtáraʼa itháan májánʼ xá. Numuu rí xa̱bu̱ ga̱jma̱a̱ rí xóo kuwa naxtiʼkhuu. Á mu Timoteo nandoo rí xa̱bu̱ mudxawíín, ndiyóoʼ rí maʼni rataminaʼ itháan májánʼ ga̱jma̱a̱ mariʼkhuu rí xóo naʼsngáa. Mangáanʼ ndayóoʼ muʼni xúʼko̱ kaʼnii índo̱ nuʼtáraʼa.

15 Índo̱ na̱jkua̱ guʼtáraʼa, mbáa nguáná tséxkamiin mbaʼin xa̱bu̱ náa guʼwún. Mú náa i̱ʼwáʼ xuajen, xa̱bu̱ kuwa náa guʼwún mú xándoo matu̱ʼu̱lú náa kuwa. Á mu nugíʼnii rígi̱, mbáa ma̱ndoo majmulúʼ i̱ʼwáʼ awan mu muʼtámíjná gajmiúlú xa̱bu̱.

16. Xú káʼnii gándoo gúʼtaraʼa náa nanújngun mbaʼin xa̱bu̱ rá.

16 Mbaʼin a̱ngiu̱lú nanigu̱nʼ mutaraʼa náa nanújngun mbaʼin xa̱bu̱, xóo náa naguáju̱n tren ga̱jma̱a̱ autobús, náa xuáá ga̱jma̱a̱ náa parques. Xú káʼnii egi̱ʼdi̱i̱ etaraʼa xá. Tikhun nuthi rí ndiyáá náa noticia. Iʼwíínʼ nutún xa̱bu̱ ga̱jma̱a̱ numuu e̱jñún o nuni mbá graxe̱ ga̱jma̱a̱ numuu ñajunʼ rí guáʼdáá. Á mu nduyáá rí xa̱bu̱ naniguʼ rí kuwa rutamijná gajmiún, nutháán rí naʼthí náa Biblia ga̱jma̱a̱ nuraxi̱i̱ rí endxa̱ʼwáminaʼ. Xúʼko̱ nutamijná májánʼ wéñuʼ ga̱jma̱a̱ numuu Biblia.

17, 18. a) Ndiéjunʼ gambáyulú mu xámiñulu rí muʼtáraʼa náa kuwa mbaʼin xa̱bu̱ rá. b) Náa numuu ku̱ma̱ʼ ikháanʼ rí ma̱ndoo mambáyaʼ índo̱ narataráʼa mu maku̱ma̱ʼ xóo David índo̱ niʼni mba̱a̱ Jeobá rá.

17 Mbáa naʼniulú mingíjyúuʼ mugíʼdi̱i̱ muʼtámíjná gajmiúlú mbáa bi̱ tsíniʼníiʼ náa calle. Rúʼko̱ nigíʼnuu Eddie, mbáa precursor bi̱ xtáa xuajen Nueva York. Ndiéjunʼ nimbáyúu mu xámiñuu xá. Naʼthí rí índo̱ nuʼnigajmaa mbá guʼwíin, ikhaa ga̱jma̱a̱ a̱ʼgiu̱u̱ nduyáaʼ itháan rí mambáñun muriʼña̱a̱ xa̱bu̱ náa nutaraʼa. Ma̱ngaa nuraxu̱u̱n eʼwíínʼ xa̱bi̱i̱ Jeobá. Rí xúgi̱ Eddie naniguʼ maʼtáraʼa náa nanújngun mbaʼin xa̱bu̱.

18 Á mu nanigulúʼ itháan ga̱jma̱a̱ nuʼnimi̱jna̱ muʼtáraʼa itháan májánʼ, eʼwíínʼ mbuyáá rí kuwáanʼ ruñajunʼ itháan (atraxnuu 1 Timoteo 4:15). * Mbáa asndu mumbáyii mbáa xa̱bu̱ mu mani̱ndxu̱u̱ xa̱bi̱i̱ Jeobá. David niʼthí: “Mani mba̱a̱ mbiʼyuu Jeobá xúgíʼ mbiʼi; ga̱jma̱a̱ rawunʼ maʼni mba̱a̱n má xúʼko̱. Nakuxíminaʼ náa Jeobá; bi̱ ra̱ʼkhá tháán májánʼ a̱jkiu̱ún mudxawíín ga̱jma̱a̱ maʼdxúún” (Sal. 34:1, 2).

GUÑAJUNʼ ITHÁAN MU MBUʼYAMAJKUÍÍ JEOBÁ

19. Náa numuu rí ma̱ndoo maxtáa gagi mbáa xa̱bi̱i̱ Jeobá bi̱ nindxu̱u̱ jmbii maski ajndu tséʼngo̱o̱ maʼni xúgíʼ rí nandoo xá.

19 David ma̱ngaa niʼthí: “Xúgíʼ rí nitani̱ maʼni mba̱a̱n, oh Jeobá, ga̱jma̱a̱ bi̱ ni̱ndxu̱ún jmbiin náa ikháánʼ muni mba̱a̱n. Ikhiin muthi rí gíʼdoo wéñuʼ numuu reino ndrígáʼ, ga̱jma̱a̱ muthi  numuu tsiakii ndrígáʼ, mu mbuyáá e̱jñún xa̱bu̱ xóo nijmuu tsiakii ndrígóo ga̱jma̱a̱ gloria rí nakujmaa náa reino ndrígóo” (Sal. 145:10-12). Tsíin nandún kuyáá Jeobá ga̱jma̱a̱ ni̱ndxu̱ún jmbiin nandún mutún eʼwíínʼ xa̱bu̱ ga̱jma̱a̱ numuu ikhaa. Mú á mu ni̱ndxu̱lú xa̱bu̱ guanii o guáʼdáálu nandii, mbáa xándoo muʼtáraʼa náa mámbá guʼwá xóo rí nanigulúʼ. Ndiéjunʼ gándoo muʼni rá. Garmáʼáan a̱jkiu̱lú má xúʼko̱ rí nuʼni mba̱a̱ Jeobá mámbá rí nuʼthúún eʼwíínʼ ga̱jma̱a̱ numuu, xóo médicos o enfermeras. Mú á mu kuwáanʼ náa guʼwá e̱jua̱nʼ rá. Maski ajndu xúʼko̱, mbáa ma̱ndoo muʼthúún eʼwíínʼ ga̱jma̱a̱ numuu Jeobá. Rígi̱ naʼni maxtáa gagi (Prov. 27:11). Ikhaa ma̱ngaa nadxuu rí muʼni ñajunʼ maski ajndu bi̱ kuʼñúún na̱nguá eni (1 Ped. 3:1-4). Maski ajndu kuwáanʼ náa xkujndu iwáá gakhii ma̱ndoo muʼni ñajunʼ Jeobá, mambáxulu itháan májánʼ gajmiúlú ga̱jma̱a̱ muʼni itháan ñajunʼ.

20, 21. Xú káʼnii gambáñun eʼwíínʼ rí muʼni itháan ñajunʼ Jeobá rá.

20 Jeobá maʼni tsajkurámáánʼ á mu nambáxulúʼ má xúʼko̱ gajmiúlú ikhaa ga̱jma̱a̱ nuʼni ñajunʼ xúgíʼ rí naʼngulú. Á mu nuriyaʼ májánʼ awan o nuriʼkui̱i̱ xóo kuwaanʼ, mbáa ma̱ndoo mumbáñún xa̱bu̱ mu muniʼnuʼ rí mitsaan rí nakudaminaʼ maʼni Dios. Ga̱jma̱a̱ mbáa asndu ma̱ndoo mumbáñuun itháan a̱ngiu̱lú. Índo̱ ikhiin gúyáá rí nuʼnimi̱jna̱ mu muʼni itháan ñajunʼ náa congregación, ikhiin maʼndún kuyulúʼ itháan.

21 Tséʼniuu má nguáthá tsiguʼ eʼni ñajunʼ Jeobá, xúgiáanʼ ma̱ndoo mambáxulu gajmiúlú ikhaa ga̱jma̱a̱ muʼni itháan ñajunʼ. Náa i̱mba̱ artículo mbuʼyáá xú káʼnii gándoo gumbáñuun eʼwíínʼ mu muñajunʼ itháan.

^ párr. 3 1 Timoteo 3:1: “Ajngáa rúʼko̱ nindxu̱u̱ gajkhun. Á mu mbáa xa̱biya̱ nandoo mani̱ndxu̱u̱ superintendente, nandoo magiʼdoo mbá ñajunʼ májánʼ”.

^ párr. 5 Proverbios 20:29: “Rí naʼni mitsiʼñíin jiáma ga̱jma̱a̱ wa̱ʼxa̱ʼ nindxu̱u̱ tsiakii ndrígu̱ún, ga̱jma̱a̱ rí naʼni mitsiʼñíin xa̱bu̱ guanii nindxu̱u̱ xngiʼxúún”.

^ párr. 8 Salmo 34:8-10: “Ganigua̱la ga̱jma̱a̱ gu̱ya̱a̱ rí Jeobá nindxu̱u̱ májáánʼ; gagi wéñuʼ xtáa xa̱bu̱ bi̱ nambáyuminaʼ náa ikhaa. Gamiñála ku̱ya̱a̱ Jeobá, ikháanʼ bi̱ nindxala santos ndrígóo, numuu rí nimbá tséʼñúnʼ bi̱ namiñun kuyáá. Asndu e̱ji̱i̱n león bi̱ gújkuíínʼ niguánu nixkidxu̱u̱n; mú bi̱ nduyááʼ Jeobá, maxáʼñúnʼ asndu nimbá rí májánʼ”.

^ párr. 12 1 Timoteo 5:25: “Xúʼko̱ má ma̱ngaa, ñajunʼ rí májánʼ nakujmaa pa̱jnu̱, ga̱jma̱a̱ rí na̱nguá xándoo marigá ngu̱ʼwa̱”.

^ párr. 13 1 Pedro 5:10: “Mú nda̱wa̱á rí nimíniʼ nguáthá mbiʼi, Dios bi̱ májánʼ wéñuʼ a̱jkiu̱u̱n, bi̱ nindxa̱ʼwála náa gloria ndrígóo rí kajua̱a̱ ga̱jma̱a̱ Cristo, ikha má gámbóo raʼniratáanʼla; ikhaa gáʼni rí maguajún jmbu, ga̱jma̱a̱ rí maguajún gujkhuʼ”.

^ párr. 18 1 Timoteo 4:15: “Atatsaʼwáminaʼ ga̱jma̱a̱ numuu rígi̱; atagíminaʼ matanimbánii, mú xúgínʼ gúyáá rí natani itháan májánʼ”.