Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Agosto tsiguʼ 2016

 HISTORIA NDRÍGÓO XA̱BU̱

Rí maxnu̱u̱n eʼwíínʼ naʼni maxtáá gagi

Rí maxnu̱u̱n eʼwíínʼ naʼni maxtáá gagi

ÍNDO̱ nigúʼdoo 12 tsiguʼ ndi̱yo̱o̱ rí gúʼdoo mbá rí gíʼdoo wéñuʼ numuu rí ma̱ndoo maxnu̱u̱n eʼwíínʼ. Náa mbá asamblea, mbáa ndxájulú niraxuʼ á mu nandoʼ mataráʼa ga̱jmu̱ʼ ikhaa. Ikhúúnʼ nimbá miʼtsú tataráʼa mu ni̱thu̱u̱n rí ma̱ndoo. Índo̱ ni̱jkuánúxu náa mutaráʼa, ndxájulú nixnúʼ tikhu folletos rí naʼthí ga̱jma̱a̱ numuu Reino ndrígóo Dios. Ga̱jma̱a̱ niʼthúunʼ rí mataraʼa náa mbá níjniúu calle ga̱jma̱a̱ ikhaa i̱mba̱ níjniúu. Maski ajndu nimíñuʼ, nigíʼdu̱u̱ nitaraʼa náa mámbá guʼwá. Índo̱ rí ndi̱yo̱o̱ tájyúuʼ niniʼñúʼ mbá xúgíʼ folleto. Nikujmaa kaʼwu rí gúʼdoo mbá rí mbaʼin xa̱bu̱ nandún.

Nigumún tsiguʼ 1923 náa mbá xuajen ndrígóo Chatham, rí kaʼyoo Kent (Inglaterra). Nguáthá tsiguʼ kidíiʼ niguámbá Timbá Guerra náa xúgíʼ numbaaʼ, ga̱jma̱a̱ xa̱bu̱ niguaʼti̱i̱n rí numbaaʼ maʼni itháan májánʼ. Mú rúʼko̱ tárígá, mbaʼin nikiʼníin. Xúʼko̱ má nikumu̱ún anu̱ʼ. Mangiin niʼni makiʼníin ndxajkun bautistas, numuu rí i̱ndó nindúún wéñuʼ maguaʼdáá ñajunʼ náa guʼwá ndxajkun. Índo̱ ikhúúnʼ nigúʼdoo mbá mijna gu̱wa̱ʼ tsiguʼ, ru̱dúʼ nigíʼdu̱u̱ ra̱jkha̱ náa Guʼwá nagimbíi̱n bi̱ nunigajmaa Biblia. Ikhí nagimbíi̱n xa̱bi̱i̱ Jeobá mu muni reunión ndrígu̱ún, rí nigumbiʼyuu “clases”. Mbáa ndxájulú niʼsngúxu bi̱ ñajunxu e̱ji̱n ga̱jma̱a̱ Biblia ma̱ngaa libro El Arpa de Dios. Ikhúúnʼ niniguʼ wéñuʼ rí nijmañuʼ.

NIJMAÑUʼ NÁA XA̱BU̱ WANII

Índo̱ ninindxu̱ʼ mbáa dxámá, niniguʼ mathu̱u̱n xa̱bu̱ rí májánʼ rí eʼthí marigá Ajngáa rawunʼ Dios. Mbaʼa nuthu nitaráʼa mbáwun náa mámbá guʼwá. Mú nijmañuʼ wéñuʼ índo̱ nitaráʼa gajmíi̱nʼ eʼwíínʼ a̱ngiu̱lú. Mbá xkri̱da, mbá mbiʼi ikhúúnʼ ga̱jmu̱ʼ mbáa ndxájulú nikhi̱i̱ na̱jkuáxu̱ gutaraʼa ga̱jma̱a̱ bicicleta. Índo̱ nijnújnguxu náa níjniúu mbáa ndxajkun, ikhúúnʼ nitha: “Aʼkho̱ ejkha̱ mbáa tsu̱jtuunʼ”. Ndxájulú niwi̱ji̱ ga̱jma̱a̱ niʼthúunʼ rí mutrigáanʼxu náa mbá xminduʼ. Nda̱wa̱á niraxuʼ: “Tsáa niʼtháanʼ rí kaʼyaʼ marata̱ tsáa nindxu̱u̱ tsu̱jtuunʼ o na̱nguá rá. Gakuwaanʼ gagi índo̱ nuʼtáraʼa ajngáa rí májánʼ ga̱jma̱a̱ guniʼñáanʼ xúgíʼ náa ñawúunʼ Jeobá”. Ikhú mbaʼa rí nijmañuʼ rí itháan rígá gagi rí maraxna ki xóo rí matrigú (Mat. 25:31-33; Hech. 20:35).

Imba̱a̱ ndxájulú nikhi̱i̱ niʼsngóʼ rí mu makuwáanʼ gagi índo̱ nuxná, nguáná ndayóoʼ maʼngo̱o̱ a̱jkiu̱lú ga̱jma̱a̱ maʼngulú. A̱ʼgiu̱u̱ tsíyoo gáʼñun xa̱bi̱i̱ Jeobá. Mbá mbiʼi ikhaa niʼthúunʼ maʼgá gakuíʼtsu ga̱jmu̱ʼ náa goʼwóo. A̱ʼgiu̱u̱ nikiʼnáa wéñuʼ numuu rí ikhaa ni̱jkha̱ gáʼtaraʼa ga̱jma̱a̱ nigíʼdu̱u̱ nidaʼ náa  ikháanʼxu náa gajti té. Ndxájulú na̱nguá nikiʼnáa ga̱jma̱a̱ a̱ʼgiu̱u̱, rí niʼni, asndu nanduʼwá ni̱jkha̱ gasngutámáʼ náa gajti té. Tsiguʼ nda̱wa̱á a̱ʼgiu̱u̱ nijngúun iyááʼ xóo mbáa bi̱ naʼtáraʼa numuu Jeobá. Nirígá rí májánʼ numuu rí ndxájulú niʼngo̱o̱ wéñuʼ a̱jkiu̱u̱n.

Nákha gu̱nʼ septiembre tsiguʼ 1939, Gran Bretaña niʼni guerra ga̱jma̱a̱ Alemania. Ikhúúnʼ gúʼdoo 16 tsiguʼ. Ru̱dúʼ ga̱jma̱a̱ ikhúúnʼ nijngúnxu iyaʼ náa xuajen Dover gu̱nʼ marzo tsiguʼ 1940. Gu̱nʼ junio tsiguʼ má rúʼko̱, ndi̱ñu̱u̱n asndu náa goʼwóoʼ mbaʼin wéñuʼ soldados bi̱ nanújngun ga̱jma̱a̱ carro mba̱ʼu̱. Ni̱ndxu̱ún bi̱ nikáwíin náa guerra ndrígóo Dunkerque. Nindoo ndi̱yo̱o̱ dí ra̱ʼkhá tháán migíná inún ga̱jma̱a̱ nda̱a̱ dí guáʼthi̱i̱n mbá kayuʼ. Nindoʼ mathu̱u̱n wéñuʼ ga̱jma̱a̱ numuu Reino ndrígóo Dios ga̱jma̱a̱ dí maguáʼthi̱i̱n rí májánʼ nda̱wa̱á. Tsiguʼ má rúʼko̱, Alemania nigíʼdu̱u̱ nidaʼ bomba náa Gran Bretaña. Xúgíʼ mbruʼun, xa̱bu̱ alemanes bi̱ nudaʼ bomba nanújngun náa kuwáanʼxu. Nimíñuxuʼ wéñuʼ índo̱ nidxáwiinxu xóo ejpatrígú bomba. I̱mba̱ néjtsuu ndu̱ya̱a̱xu rí mbaʼa guʼwá niguámbáa. Xúgíʼ rígi̱ nimbáyuʼ mba̱yo̱o̱ májánʼ rí i̱ndó náa Reino ndrígóo Dios ma̱ndoo maxtáá májánʼ nda̱wa̱á.

NAXNA MÁ XÚʼKO̱ RÍ GÚʼDOO

Nigíʼdu̱u̱ nini káxi̱ ñajunʼ Jeobá tsiguʼ 1941. Ikhú nigíʼdu̱u̱ nixtáá gagi wéñuʼ. Nákha ginii nixtáá rañajunʼ náa mbá fábrica ndrígóo Xa̱bu̱ Ñajunʼ náa Chatham náa nisngóoʼ mani barcos. Mbaʼin nindúún ñajunʼ rígi̱ numuu rí naxnún mbaʼa rí májánʼ. Mu xa̱bi̱i̱ Dios nduʼyáá rí ragíʼmaa muyambáá náa guerras. Ga̱jma̱a̱ tsiguʼ 1941, ma̱ngaa nikru̱ʼu̱xu rí cristianos ragíʼmaa muyambáá maguma ajua̱nʼ (Juan 18:36). Náa fábrica rí niñajunʼ niʼni submarinos, ikha jngó niniñuʼ mu mani káxi̱ ñajunʼ Jeobá. Timbá náa nixuʼmún maʼgá ninindxu̱u̱ Cirencester, mbá xuajen nagui̱i̱ náa Cotswolds.

Índo̱ nigúʼdoo 18 tsiguʼ, nixtáá mbá mijna gu̱wa̱ʼ gu̱nʼ náa guʼwá e̱jua̱nʼ numuu rí ninigaʼduunʼ maʼgá náa ejército. Nixtáá gíná wéñuʼ índo̱ nirugua̱a̱ xkrugoo guʼwá e̱jua̱nʼ ga̱jma̱a̱ niguanúʼ mbáwun. Mú nguáthá mbiʼi nda̱wa̱á, bi̱ nuñewa̱a̱n guʼwá e̱jua̱nʼ ga̱jma̱a̱ bi̱ kajchún ikhí nigi̱ʼdi̱i̱ niraxuʼ náa numuu rí xtáá ikhí. Nixtáa gagi índo̱ nindoo ni̱thu̱u̱n ga̱jma̱a̱ numuu rí nanimboʼ.

Nda̱wa̱á rí nigájnaaʼ náa guʼwá e̱jua̱nʼ, nitaráʼa náa mbaʼa xuajen rí kaʼyoo Kent ga̱jmu̱ʼ ndxájulú Leonard Smith. * Ikhí xuajñuxu nájmáanʼ. Nákha ikhú, xa̱bu̱ nazis nigi̱ʼdi̱i̱ nidaʼ bomba náa Londres. Mu maguanu ikhí, avión ndrígu̱ún ndiyóoʼ magún tsu̱du̱u̱ xuajen rí kaʼyoo Kent. Asndu nákha tsiguʼ 1944, itháan rí 1,000  bombas nijngutígú náa Kent. Bombas rígi̱ ninindxu̱u̱ avión rí nda̱wa̱a̱ tsáa ejkha̱ kayóo ga̱jma̱a̱ rí kagu̱ wéñuʼ bombas. Índo̱ nudxáwiinxu rí motor najuíyuʼ, ndu̱ya̱a̱xu rí xájyúuʼ majpátrigu ga̱jma̱a̱ majmidá. Xúgiáanʼxu namíñuxu wéñuʼ. Ikhú nusngúúnxu xa̱bu̱ gajmii mangiin ajtsíin e̱ji̱i̱n ga̱jma̱a̱ Biblia. Nguáná nutrigáanʼxu náa agoo mesa ajua̱nʼ mu muñeumíjna̱xu á mu mbá bomba naʼni gámbáa guʼwá. Nda̱wa̱á xúgínʼ ikhiin nijngún iyááʼ.

NITARÁʼA AJNGÁA RÍ MÁJÁNʼ NÁA I̱ʼWÁʼ XUAJEN

Nataráʼa rí marigá mbá asamblea índo̱ ninindxu̱ʼ mbáa precursor náa Irlanda (agoo).

Nda̱wa̱á rí nijngoo guerra, nini̱ndxu̱xu̱ʼ precursor a̱jma̱ tsiguʼ náa sur ndrígóo Irlanda. Na̱jkuáxu̱ náa mámbá guʼwá rutaxu rí ni̱ndxu̱xu̱ʼ misioneros ga̱jma̱a̱ nuraxixu náa gándoo maguánuxú. Nixnaxu revistas náa calle. Mú Irlanda mixtiʼkhu wéñuʼ ki xóo Inglaterra. Mbaʼin nikumu̱ún dí raʼkhí mundxaʼwamíjna̱ rí xa̱bu̱ mudxawíín ajngáa rí na̱jkua̱ kuyuxu náa mbá xuajen rí kuwa wéñuʼ católico. Índo̱ mbáa xa̱bu̱ niʼnimíñuxu, ni̱jkhá gáthu̱u̱n policía. Ikhaa niriʼñuʼ: “Ndiéjunʼ lá xtaʼti̱i̱n jnu rá.” Tákumuxu rí ndxajkun nutañajúnʼ xa̱bu̱ ikhí. Á mu xa̱bu̱ nundrigú libro ndrígúlú, nandáti̱gu̱u̱n ñajunʼ ndrígu̱ún. Ga̱jma̱a̱ ikháanʼxu ndiyóoʼ magajnúxu náa kuwáanʼ.

Nda̱wa̱á ndiya̱a̱xu rí índo̱ na̱jkuánuxu timbá miʼtsú náa mbá xuajen, itháan májánʼ rí muʼtáraʼa náa ndxajkun xániniáanʼxu. Ikha jngó, ndiyóoʼ mu̱ʼguáxu gúñu̱u̱n xa̱bu̱ bi̱ kuwa mitsínguánʼ. Nda̱wa̱á nitarúʼunxu xa̱bu̱ bi̱ kuwa mijngii. Náa xuajen Kilkenny, ninigajmaa gajmiúxu̱ mbáa dxámá ajtsú ikhoo rí mbá xmáná. Nisngááxu maski ajndu xa̱bu̱ bi̱ nikiʼníin wéñuʼ kuyuxu nindúún muxnuxu. Numuu rí niniguʼ wéñuʼ masngáa ga̱jma̱a̱ numuu Biblia nindoʼ magumaratún mu mani̱ndxu̱ʼ misionero. Ikha jngó ninimajtíí solicitud mu maʼgá Náa Galaad ndrígóo Watchtower náa nawaʼsngúún ga̱jma̱a̱ numuu Biblia.

Velero Sibia ninindxu̱u̱ guʼwúxu tsiguʼ 1948 asndu 1953.

Nithu̱nʼ maʼgá náa curso rí ndijyúuʼ witsu igu̱nʼ náa Nueva York. Nda̱wa̱á rí niguámboʼ, ikhúúnʼ gajmíi̱nʼ imbíjtsi̱i̱n a̱ngiu̱lú nixuʼmáxuʼ muʼguá náa mbaaʼ rí tuaʼan náa tapo̱o̱ iyaʼ Caribe. Nákha noviembre tsiguʼ 1948, niniʼñáʼxu Nueva York ga̱jma̱a̱ ni̱jkuáxu náa mbá velero rí gíʼdoo mbá 18 metros rí nigumbiʼyuu Sibia. Nidxuʼ wéñuʼ numuu rí nimbá miʼtsú táʼga ga̱jma̱a̱ velero. Mbáa bi̱ nixtáá ga̱jmu̱ʼ náa clase nigumbiʼyuu Gust Maki ga̱jma̱a̱ ninindxu̱u̱ capitán bi̱ najmañuu maʼga̱ kayóo velero. Niʼsngúxu mbá chíʼgíʼ xú muʼguá kuyuxu velero, xóo muxuxíi ga̱jma̱a̱ muxruígúu xtíin ndrígóo velero, majmuxu brújula ga̱jma̱a̱ mu̱ʼguáxu náa naxnúu giñánʼ. Gust ni̱jkha̱ kayóo májánʼ wéñuʼ velero mbá 30 mbiʼi náa ruʼwa mbiiʼ asndu índo̱ ni̱jkuánúxu náa Bahamas.

‹GUTARÁʼA NÁA MBAAʼ RÍ RÍGÁ NÁA TAPHOO IYAʼ›

Nda̱wa̱á rí nitaráʼaxu mbá nguáthá igu̱nʼ náa mbaaʼ itháan ma̱jkha̱ʼ dí rígá náa taphoo iyaʼ Bahamas, ni̱jkuáxu ma̱ngaa náa Sotavento ga̱jma̱a̱ Barlovento. Mbaaʼ rígi̱ rígá mbá 800 kilómetros asndu náa mbaaʼ Vírgenes ga̱jma̱a̱ Trinidad. Mbá witsu tsiguʼ nitaráʼaxu náa xúgíʼ mbaaʼ rí mitsínguánʼ wéñuʼ náa nda̱wi̱i̱n xa̱bi̱i̱ Jeobá. Nguáná na̱nguá eyoo muxuʼmáxu o mudríguxu correo mbaʼa xmáná. Mú kúwáanʼxu gagi rí mutaxu ga̱jma̱a̱ numuu Jeobá náa ‹mbaʼa mbaaʼ dí rígá náa taphoo iyaʼ› (Jer. 31:10).

A̱jkhu̱u̱n misioneros bi̱ kuwa náa Sibia (de izquierda a derecha): Ron Parkin, Dick Ryde, Gust Maki ga̱jma̱a̱ Stanley Carter.

Índo̱ na̱jkuánuxu náa rawunʼ iyaʼ xa̱bu̱ nadxún wéñuʼ ga̱jma̱a̱ naguwáʼ mu mbuyáá tsíin ni̱ndxu̱xu̱ʼ. Tikhun na̱nguá ndiyáá nimbá velero xóo ndrígúxu̱ ikháanʼ o mbáa xa̱bu̱ miʼxáa. Ni̱ndxu̱ún xa̱bu̱ bi̱ nduyááʼ mambáxu̱u̱n májánʼ gajmiún eʼwíínʼ bi̱ nuninuʼ májánʼ Biblia. Mbaʼa nuthu nuxnuxu e̱gi̱ʼ, xndú diin ga̱jma̱a̱ maní. Maski ajndu na̱nguá gáʼchú wéñuʼ náa velero ndrígúxú, mu ikhí nuni májáánʼxu ganitsu, nunúʼxu ga̱jma̱a̱ nujñáanʼxu xtíin.

 Naguájtáaxu náa velero na̱jkuáxu̱ gúñu̱u̱n xa̱bu̱ kañiʼ mbiʼi. Nuthu̱u̱nxu rí marigá mbá discurso rí nagájnuu náa Biblia. Índo̱ nakhííʼ nunixu mawán campana ndrígóo velero. Ra̱ʼkhá tháán mitsaan ma̱ta̱ya̱a̱ rí naguánu xa̱bu̱. Lámparas ndrígu̱ún rí na̱ʼkhu̱u̱ aceite nakujmaa xóo a̱ʼgua̱a̱n rí naguájtaa náa kúbá. Nguáná naguánu mbá cien xa̱bu̱ ga̱jma̱a̱ nuni graxe̱ asndu itháan mbruʼun. Nanigu̱nʼ wéñuʼ muni ajmúú, nuniraʼmáʼxu náa máquina tikhu ajmúú ndrígóo Reino mu muxnu̱u̱nxu. Nájkuáanʼxu bi̱ ñajunxu misionero nunimi̱jna̱xu muni ajmúú itháan májánʼ. Nda̱wa̱á nugi̱ʼdi̱i̱ nuni ajmúú ga̱jma̱á ni̱ndxu̱xu̱ʼ ga̱jma̱a̱ aʼwún nawáán mitsaan wéñuʼ. ¡Ra̱ʼkhá tháán gagi nindxu̱u̱ mbiʼi rúʼko̱!

Nda̱wa̱á rí ninigajmaa Biblia, tikhun bi̱ nusngúnxu nagún ga̱jma̱a̱ ni̱ndxu̱xu̱ʼ índo̱ na̱jkuá gúñu̱u̱nxu eʼwíínʼ mu majmañún itháan ga̱jma̱a̱ numuu Biblia. Nda̱wa̱á rí nikúwáanʼxu nguáthá xmáná náa mbá xuajen, ikhú ndiyóoʼ mu̱ʼguáaʼxu. Mú nundu̱ʼu̱u̱nxu bi̱ itháan nandún majmañún rí munigajmaa gajmiún eʼwíínʼ asndu índo̱ gatangáanʼxu. Nadxuu a̱jkiu̱xuʼ índo̱ nunimbánii rí nuthu̱u̱nxu.

Rí mbiʼi xúgi̱, mbaʼa mbaaʼ rúʼko̱ nagún wéñuʼ xa̱bu̱. Mú nákha ikhú tsímáá wéñuʼ. I̱ndó rígá iyaʼ miʼñuu, playa mitsaan ga̱jma̱a̱ palmeras. Mú na̱jkuáxu̱ náa mámbá mbaaʼ dí rígá taphoo iyaʼ rí mbruʼun. Delfines jnguʼún ga̱jma̱a̱ nutsíin náa níjniúu velero ndrígúxu̱. Ga̱jma̱a̱ i̱ndó nudxáwiinxu xóo ejkha̱ velero náa taphoo iyaʼ. Ga̱jma̱a̱ índo̱ gu̱nʼ nakujmaa náa lamáa nindxu̱u̱ asndu xóo mbá kamba̱a̱ xngiyaʼ rí na̱jkha̱ kaguáanʼ asndu náa rawunʼ iyaʼ.

Nda̱wa̱á rí ninújngoo mbá witsu tsiguʼ rí nitaráʼaxu náa mbaaʼ dí rígá taphoo iyaʼ, ni̱jkuáxu náa Puerto Rico mu mbuʼyáaʼxu mbá barco rí gíʼdoo motor. Índo̱ nijkuánuxu ikhí, niniʼnííʼ mbáa misionera mitsiʼyáa wéñuʼ bi̱ nigumbiʼyuu Maxine Boyd... ¡ga̱jma̱a̱ nindoʼ ka̱yo̱o̱! Maxine niʼtáraʼa ga̱jma̱a̱ gagi asndu nákha lájuíin. Ninindxu̱u̱ misionera náa República Dominicana asndu tsiguʼ 1950. Tsiguʼ rúʼko̱, Xa̱bu̱ Ñajunʼ católico nixkriyaʼ náa xuajen rúʼko̱. Numuu rí ikhúúnʼ na̱jkhá náa barco, i̱ndó ma̱ndoo maxtáá mbá gu̱nʼ náa Puerto Rico. Nda̱wa̱á, mbaʼyóoʼ matangu̱ún náa mbaaʼ dí rígá taphoo iyaʼ ga̱jma̱a̱ maguanúʼ ikhí nguáthá tsiguʼ. Ikha jngó nitamínaʼ: “Ronald, á mu nandaʼ xtayáá dxáʼgú bugi̱, ndayóoʼ maʼcha̱ʼ”. Ajtsú xmáná nda̱wa̱á nindo̱ʼo̱o̱ rí mba̱ya̱a̱, ga̱jma̱a̱ juwan xmáná nda̱wa̱á nidamíjna̱xu. Nixuʼmáanʼxu náa Puerto Rico xóo misioneros. Ikha jngó nánguá nitsimuʼ náa barco nuxi̱ʼ.

Nákha tsiguʼ 1956 nigíʼdu̱u̱ mani ñajunʼ xóo superintendente ndrígóo circuito. Nájmáanʼxu niniguxu muʼguá gúñu̱u̱n a̱ngiu̱lú. Mbaʼin rí ikhiin migíníi. Mbá xkri̱da, náa mbá xuajen chíʼgíʼ rí nagumbiʼyuu Potala Pastillo nikuwa a̱jma̱ guʼwíin xa̱bi̱i̱ Jeobá bi̱ guáʼdiin mbaʼin wéñuʼ e̱ji̱n. Ikhúúnʼ naguʼwunʼ madu̱u̱ flauta mu mudxawíín. Mbáa dxáʼgú bi̱ mbiʼyuu Hilda mbá mbiʼi niraxu̱u̱ á mu nandoo maʼga̱ gáʼtaraʼa ga̱jma̱a̱ ni̱ndxu̱xu̱ʼ. Ikhaa niʼthí: “Nandoʼ mu xándoo maʼgá. Nda̱a̱ chádoʼ”. Nitsixu mbá edi̱i̱ ga̱jma̱a̱ ni̱jkha̱ gáʼtaraʼa ga̱jma̱á ni̱ndxu̱xu̱ʼ. Tsiguʼ nda̱wa̱á, ikhúúnʼ ga̱jmu̱ʼ Maxine ni̱jkuáxu náa Brooklyn nákha tsiguʼ 1972. Ikhí mbáa ndxájulú a̱ʼgu̱ bi̱ ni̱jkha̱ náa clase Náa Galaad ndrígóo Watchtower náa nawaʼsngúún ga̱jma̱a̱ numuu Biblia ni̱ʼkha̱ garaxáanʼ. Itháan maʼga̱a̱ náa Ecuador náa nixuʼmaa maʼga̱ índo̱ niʼthúxu: “Lá tséya̱a̱ tsáa ni̱ndxu̱ʼ ráʼ. Ikhúúnʼ ni̱ndxu̱ʼ ada̱ bi̱ nixtáa náa Pastillo bi̱ ragíʼdoo chádoo”. ¡Nindxu̱u̱ Hilda! Nikúwáanʼxu gagi wéñuʼ rí asndu nimbiyaʼxu.

Nákha tsiguʼ 1960, nigíʼdi̱i̱xu niñajunʼ náa sucursal dí rígá náa Puerto Rico, dí rígá náa mbá guʼwá náa Santurce (San Juan). Nákha ginii, mbáa ndxájulú bi̱ nagumbiʼyuu Lennart Johnson ga̱jmu̱ʼ ikhúúnʼ ninixu xúgíʼ ñajunʼ. Ikhaa ga̱jma̱a̱ a̱ʼgiu̱u̱ ninindxu̱ún timbíi̱n xa̱bi̱i̱ Jeobá náa República Dominicana. Ga̱jma̱a̱ nákha tsiguʼ 1957, nigún Puerto Rico. Náa sucursal, Maxine nakuʼmaa revistas náa xa̱bu̱ bi̱ nunda̱ʼa̱. Nakuʼma itháan rí 1,000 revistas mámbá xmáná. Ikhaa niniguʼ wéñuʼ maʼni ñajunʼ rígi̱ numuu rí nindxa̱ʼwáminaʼ rí xúgínʼ xa̱bu̱ buʼko̱ kuwa rajmañún ga̱jma̱a̱ numuu Jeobá.

Niniguʼ wéñuʼ ñajunʼ náa Betel numuu rí najmuʼ tsiakii mu mani ñajunʼ Jeobá. Mú niʼni mingíjyúuʼ. Mbá xkri̱da, nákha tsiguʼ 1967 ndiyóoʼ maniratoo mbaʼa wéñuʼ mu marigá asamblea internacional náa Puerto Rico. Nixmiéjunʼ wéñuʼ. Nákha ikhú Nathan Knorr ni̱jkha̱ náa Puerto Rico. Ikhaa exnún ikha bi̱ nutaraʼa numuu Jeobá nákha ikhú. Ikhúúnʼ niniratoo iñúnʼ misioneros bi̱ niguwáʼ ikhú, mú ikhaa nikumu̱u̱ rí táni. Ikha nixnúʼ xtágabu ga̱jma̱a̱ niʼthúunʼ rí nini maxtáa gíná. Ikhúúnʼ taʼndoʼ magiʼduʼ ga̱jmu̱ʼ, mú niku̱mu̱ʼ rí raʼkhí rí niʼthúunʼ. Nikiʼnún mbá nguáthá mbiʼi. Maski ajndu xúʼko̱, índo̱ ndi̱yo̱o̱ mbiʼi nda̱wa̱á,  ikhaa niʼtúxu mu̱ʼguáxu náa cuartiu ga̱jma̱a̱ niʼni mújúnʼ mbá ganitsu.

Ni̱jkuá gúñu̱u̱nxu mbaʼa nuthu bi̱ kuwa náa goʼwóoʼ náa Inglaterra. Anu̱ʼ táʼndoo maʼnigajmaa Biblia índo̱ ikhúúnʼ ga̱jmu̱ʼ ru̱dúʼ ninigajmaaxu Biblia. Mú índo̱ a̱ngiu̱lú bi̱ kuwa náa Betel nagún ikhí, ru̱dúʼ naʼthúún maguanún ikhí. Anu̱ʼ ndiʼyoo rí superintendentes ndrígóo Betel ninindxu̱ún guabiinʼ. Na̱nguá ni̱ndxu̱ún xóo ndxajkun bi̱ nini maxtáa gíná tsiguʼ kidíiʼ. Nda̱wa̱á ni̱jkha̱nú nijngúun iyááʼ nákha tsiguʼ 1962.

Ga̱jma̱a̱ Maxine náa Puerto Rico nda̱wa̱á rí nidamíjnáxu ga̱jma̱a̱ índo̱ niʼni 50 tsiguʼ rí nidamíjnáxu, 2003.

Maxine nikháñu nákha tsiguʼ 2011. Ra̱ʼkhá tháán eyoʼ magabi̱i̱ mu mba̱yo̱o̱ mbu̱júu̱ʼ. Rí mandxa̱ʼwa̱mínáʼ rúʼko̱ naʼni maxtáá gagi. Rí nikúwáanʼxu mbóó mbá 58 tsiguʼ, ndiya̱a̱xu rí niʼni mbaʼin xa̱bi̱i̱ Jeobá náa Puerto Rico, nákha ginii ni̱ndxu̱ún 650 rí xúgi̱ ni̱ndxu̱ún mbá 26,000. Nákha tsiguʼ 2013, sucursal ndrígóo Puerto Rico niwa̱a̱ ga̱jma̱a̱ Estados Unidos. Ga̱jma̱a̱ nithunʼ mañajunʼ náa Wallkill (Nueva York). Nda̱wa̱á rí nixtáá mbá 60 tsiguʼ náa mbaaʼ dí rígá náa taphoo iyaʼ nikumuʼ rí ni̱ndxu̱ʼ mbáa puertorriqueño xóo coquí, nindxu̱u̱ mbáa ragudu bi̱ xtáa ikhí ga̱jma̱a̱ índo̱ naʼni wakhííʼ nandxaʼwá “¡coquí, coquí!”. Nixtáá tsímáá wéñuʼ náa Puerto Rico, mú ni̱jkha̱nú mbiʼi maʼgá i̱mba̱ níʼkhá.

“DIOS NANDOO KAʼYOO BI̱ NAXNÁ GA̱JMA̱A̱ GAGI”

Xóó naniguʼ mani ñajunʼ náa Betel. Gúʼdoo itháan rí 90 tsiguʼ, ga̱jma̱a̱ ñajunʼ ndrígóʼ nindxu̱u̱ rí maxnu̱u̱ tsiakii betelitas. Asndu nákha ni̱ʼkhánú náa Wallkill, nimbáñun itháan rí 600 a̱ngiu̱lú gu̱ʼu̱ ga̱jma̱a̱ xa̱bekha. Tikhun naguwáʼ gúyooʼ mu mutu̱nʼ xkujndu rí guáʼdáá ikhiin o rí guáʼdáá náa guʼwún. Eʼwíínʼ nundo̱ʼo̱ʼ xtágabu mu makuwá májánʼ náa Betel. Eʼwíínʼ nundo̱ʼo̱ʼ xtágabu numuu rí ndiʼkhún nidamijná o bi̱ nixuʼmiin xóo precursores. Nadxaun xúgínʼ bi̱ nandún mutamijná ga̱jma̱á ni̱ndxu̱ʼ. Ga̱jma̱a̱ índo̱ nandoo na̱thu̱u̱n: “‹Dios nandoo kaʼyoo bi̱ naxná ga̱jma̱a̱ gagi›. Ikha jngó araxtaa gagi náa natiajunʼ, numuu rí natani ñajunʼ Jeobá” (2 Cor. 9:7).

Á mu nandulúʼ makuwáanʼ gagi náa Betel o i̱mba̱ níʼkhá, gíʼmaa mundxaʼwamíjna̱ ndíjkha rí gíʼdoo wéñuʼ numuu rí kuwáanʼ ru̱ʼni̱. Xúgíʼ rí nuʼni náa Betel nindxu̱u̱ mbá ñajunʼ mitsáʼkháan. Ga̱jma̱a̱ ñajunʼ rí nuʼnilú numbáñuun “ñumba tsí jmbi tsí májánʼ indxaʼhuaminaʼ” mu muxnún a̱ngiu̱lú bi̱ kuwa náa xúgíʼ numbaaʼ ganitsu rí na̱ʼkha̱ náa Dios (Mat. 24:45). Tséʼniuu náa kuwáanʼ ru̱ʼni̱ ñajunʼ Jeobá, ma̱ndoo muʼni mba̱a̱. Ganigulú xúgíʼ rí ikhaa na̱ndu̱ʼu̱lú muʼni, numuu rí “Dios nandoo kaʼyoo bi̱ naxná ga̱jma̱a̱ gagi”.

^ párr. 13 Historia ndrígóo Leonard Smith nigájnuu náa La Atalaya 15 ñajunʼ gu̱nʼ abril tsiguʼ 2012.