Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Agosto tsiguʼ 2016

Lá nduʼyáá rí ndayóoʼ muʼniratiin eʼwíínʼ ráʼ.

Lá nduʼyáá rí ndayóoʼ muʼniratiin eʼwíínʼ ráʼ.

“Ra̱ʼkhá tháán májánʼ gásngala” (PROVERBIOS 4:2).

AJMÚÚ 93 GA̱JMA̱A̱ 96

1, 2. Náa numuu rí gíʼmaa muʼniratiin eʼwíínʼ mu muni ñajunʼ dí rígá náa congregación rá.

JESÚS niʼniminaʼ wéñuʼ mu maʼtáraʼa ajngáa rí májánʼ numuu Reino. Mú ma̱ngaa nijmuu mba̱yu̱ʼ mbiʼi mu maʼniratiin xa̱bi̱i̱. Niʼsngúún mu musngáa májánʼ ga̱jma̱a̱ mani̱ndxu̱ún xóo báxtúu bi̱ nuña̱wu̱u̱n xa̱bi̱i̱ Dios (Mat. 10:5-7). Felipe ninindxu̱u̱ mbáa cristiano bi̱ niʼtáraʼa má xúʼko̱. Mú ma̱ngaa niʼsngúún waʼxioʼ mutaraʼa (Hech. 21:8, 9). Rí mbiʼi xúgi̱, mangáanʼ gíʼmaa muʼniratiin eʼwíínʼ. Náa numuu rá.

2 Náa congregación dí rígá xúgíʼ numbaaʼ kuwa mbaʼin xa̱bu̱ bi̱ ndiʼkhún nijmañún rí gajkhun ga̱jma̱a̱ numuu Biblia ga̱jma̱a̱ xóó tséjngúún iyááʼ. Xa̱bu̱ buʼko̱ nda̱ñúnʼ rí muʼniratiin. Ndayóoʼ mumbáñuun makru̱ʼu̱u̱n náa numuu rí májánʼ majmañún muraxnuu ga̱jma̱a̱ munigajmaa ndajkúun Biblia. Ma̱ngaa gíʼmaa muʼniratiin mu mutaraʼa ga̱jma̱a̱ musngúún eʼwíínʼ ajngáa ndrígóo Reino. A̱ngiu̱lú bi̱ ndiʼkhún nijngún iyaʼ mangiin nda̱ñúnʼ miʼniratiin mu nda̱wa̱á ma̱ndoo mani̱ndxu̱ún siervos ministeriales ga̱jma̱a̱ bi̱ mbu̱ya̱ edxu̱u̱.  Xúgínʼ bi̱ kuwa náa congregación ma̱ndoo mumbañún wéñuʼ bi̱ nuxu̱nʼ (Prov. 4:2).

GUʼSNGÚN BI̱ NUXU̱Nʼ MU MUNIGAJMAA BIBLIA NDAJKÚUN

3, 4. a) Náa numuu Pablo niʼthí rí muʼnigajmaa Escrituras kagujtuminaʼ ga̱jma̱a̱ rí muʼtáraʼa rá. b) Mú ma̱ndoo muʼthúún eʼwíínʼ rí munigajmaa ndajkúun Biblia, ndiéjunʼ gíʼmaa muʼni rá.

3 Xúgiáanʼ bi̱ nuʼni ñajunʼ Jeobá ndayúlú muraxnuu ga̱jma̱a̱ muʼnigajmaa Biblia mu majmañulúʼ ndiéjunʼ eyoo Dios muʼni. Apóstol Pablo niʼthún rígi̱ a̱ngui̱i̱n bi̱ kuwa náa xuajen Colosas: “Tséniʼñáaʼ rutájkáan ga̱jma̱a̱ numala ga̱jma̱a̱ munda̱ʼa̱xu rí maguaʼdáá mbá ku̱ma̱ jmbu rí nandoo ikhaa”, xóo muʼthá, muʼni rí nandoo Dios. Ndíjkha rí nigiʼdoo wéñuʼ numuu rí cristianos bugi̱ muraxnuu ga̱jma̱a̱ munigajmaa Escrituras rá. Pablo niʼthí dí rígi̱ maʼni rí majmañún ga̱jma̱a̱ mambáñún makuwá “xó má eyoo Jeobá” mu ikhaa maxtáa gagi. Ma̱ngaa mambáñún mu muni “xúgíʼ ñajunʼ rí nindxu̱u̱ májánʼ” rí Jeobá nindoo muni, itháan índo̱ nutaraʼa ajngáa rí májánʼ (Col. 1:9, 10). Ikha jngó índo̱ nuʼsngáa ga̱jma̱a̱ numuu Biblia, mumbáñuun xa̱bu̱ makru̱ʼu̱u̱n rí á mu nuraxnuu má xúʼko̱ ga̱jma̱a̱ nunigajmaa Biblia mambáñun muni ñajunʼ Jeobá.

4 Á mu nandulúʼ muʼthúún bi̱ nuʼsngúún rí munigajmaa Biblia ndajkúun, mangáanʼ gíʼmaa muʼnigajmaa. Rí muraxnuu Biblia má xúʼko̱ ga̱jma̱a̱ mundxaʼwamíjna̱ rí naʼthí ikhí mambáyulúʼ náa vida ndrígúlú ma̱ngaa náa muʼtáraʼa. Mbá xkri̱da, á mu mbáa xa̱bu̱ náa nuʼtáraʼa naʼniulú mbá graxe̱ mingíjyúuʼ wéñuʼ, ma̱ndoo muriʼña̱a̱ ga̱jma̱a̱ Biblia. O índo̱ nuraxnuu rí Jesús, Pablo ga̱jma̱a̱ eʼwíínʼ tákagua̱binʼ índo̱ nitaraʼa, maxnúlúʼ tsiakii ga̱jma̱a̱ muʼtáraʼa má xúʼko̱ maski ajndu mingíjyúuʼ. Índo̱ nuʼthúún eʼwíínʼ rí nijmañulúʼ rí niʼnigajmaa̱ Biblia ga̱jma̱a̱ xú káʼnii nimbáyulúʼ, mbáa ikhiin maʼndún munigajmaa itháan mu mambáñun rí naʼthí ikhí.

5. Arathá mbá rí xóo mambáñun bi̱ nuʼsngúún mu maguʼwún munigajmaa Biblia ndajkúun.

5 Mbáa nuraximíjna̱ xú káʼnii gumbáyii bi̱ nuʼsngáá mu maguʼwun maʼnigajmaa Biblia. Ma̱ndoo musngajmáá xú káʼnii gándoo gáʼniratoo i̱yi̱i̱ʼ rí muʼnigajmaa gajmiúlú. Mbáa xkri̱da, ma̱ndoo muʼtháán bi̱ nuʼsngáa rí maguxnuu apéndice rí na̱ʼkha̱ náa libro Dí naʼsngáa náa Biblia, ga̱jma̱a̱ rí mbayáaʼ versículo ndrígóo Biblia rí na̱ʼkha̱ ikhí. Nda̱wa̱á ma̱ndoo musngajmáá xú káʼnii gáʼnirataminaʼ  ga̱jma̱a̱ i̱yi̱i̱ʼ rí muʼnigajmaa náa reunión. Ma̱ngaa ma̱ndoo muʼtháán rí ma̱ndoo maguxnuu xúgíʼ revistas Bi̱ nayejngoo ga̱jma̱a̱ ¡Despertad! Ga̱jma̱a̱ ma̱ndoo muʼsngáá rí maxkamaa graxe̱ rí nariʼña̱a̱ náa Biblia, mbáa ma̱ndoo majmaʼ programa ndrígóo computadora Watchtower Library o BIBLIOTECA NÁA INTERNET Watchtower. Índo̱ bi̱ narasngáá gáʼni xúgíʼ rígi̱ mbáa maniguuʼ ga̱jma̱a̱ maʼndoo majmañuu itháan.

6. a) Xú káʼnii gándoo gátambáñun bi̱ narasngúún mu manigu̱nʼ munigajmaa Ajngáa rawunʼ Dios rá. b) Ndiéjunʼ gáʼga̱nú maʼni bi̱ nuʼsngáa á mu na̱jkha̱nú naniguʼ rí xtáa rajmañuu náa Escritura xá.

6 Índo̱ nuʼnigajmaa Biblia gajmiúlú mbáa, nandulúʼ mbaʼyoo rí Biblia gíʼdoo numuu rí nambáyúu maniniiʼ itháan májánʼ Jeobá. Guʼsngáá rí maniguuʼ maʼnigajmaa, ga̱jma̱a̱ xúʼni̱ kañíí. Índo̱ gájma̱ñuu itháan ga̱jma̱a̱ numuu Biblia, itháan gaʼndoo maʼnigajmaa. Mbáa maku̱mu̱u̱ xó má bi̱ niʼnirámáʼ salmo índo̱ niʼthí: “Rí maʼgá kanuu náa Dios. Nañambáminaʼ náa Tátá Jeobá bi̱ Niʼni xúgíʼ dí rígá náa numbaaʼ” (Sal. 73:28). Xi̱ʼ ndrígóo Jeobá mambáyúu bi̱ nuʼsngáá mu maʼndoo mambáxu̱u̱ ga̱jma̱a̱ ikhaa.

GUʼSNGÚN BI̱ NUXUNʼ MU MUTARAʼA GA̱JMA̱A̱ MUSNGÁA

7. Xú káʼnii Jesús niʼniratiin xa̱bi̱i̱ mu mutaraʼa ga̱jma̱a̱ numuu Reino rá. (Atayáá timbá xtiʼkhu.)

7 Mbaʼa rí gándoo gajmañulú rí xú káʼnii Jesús niʼniratiin xa̱bi̱i̱. Ikhaa niʼtáraʼa gajmíi̱n ga̱jma̱a̱ ikhiin ndiyáá xú káʼnii niʼsngúún xa̱bu̱. Jesús ma̱ngaa niʼthún ndiéjunʼ rí phú gúní índo̱ rí mutaraʼa (Mateo, capítulo 10) [1] (atayáá nota rí na̱ʼkha̱ náa námbá artículo). Na̱nguá ninújngoo mba̱yu̱ʼ mbiʼi índo̱ xa̱bi̱i̱ nijmañún musngáa rí gajkhun ga̱jma̱a̱ numuu Dios (Mat. 11:1). Guʼyáá a̱jma̱ ikha rí ma̱ndoo muʼsngúún bi̱ nuxunʼ índo̱ kuwáanʼ ruʼtáraʼa.

8, 9. a) Xú káʼnii eʼtamíjná Jesús gajmíi̱n xa̱bu̱ rá. b) Xú káʼnii gándoo gumbáñuun bi̱ ndiʼkhún etaraʼa mu mutamijná gajmiún xa̱bu̱ xóo niʼni Jesús rá.

8 Mutamíjná gajmiún xa̱bu̱. Jesús raʼkháa i̱ndó niʼthí náa inún mbaʼin xa̱bu̱. Ma̱ngaa niʼsngóo mámbáa xa̱bu̱. Ga̱jma̱a̱ ndiyáaʼ mambaxúu gajmíi̱n eʼwíínʼ. Mbá xkri̱da, mbá miʼtsú niʼtámíjná májánʼ ga̱jma̱a̱ mbáa a̱ʼgu̱ bi̱ ni̱jkha̱ garíyaaʼ iyaʼ náa mbá pozo dí rígá mijngii náa xuajen Sicar (Juan 4:5-30). I̱mba̱ miʼtsú niʼtámíjná ga̱jma̱a̱ mbáa xa̱bu̱ bi̱ naruma mbújkha̱a̱ ga̱jma̱a̱ nigumbiʼyuu Mateo Leví. Jesús niʼthúu̱n mani̱ndxu̱u̱ xa̱bi̱i̱, ga̱jma̱a̱ Mateo nindoo. Nda̱wa̱á xa̱bu̱ bugi̱ niʼthúu̱n Jesús ga̱jma̱a̱ eʼwíínʼ rí magún guphiʼtsu náa goʼwóo. Ikhí, Jesús niʼtámíjná gajmíi̱n mbaʼin xa̱bu̱ (Mat. 9:9; Luc. 5:27-39).

Á mu nduʼyááʼ mambáxulu gajmiúlú xa̱bu̱ ga̱jma̱a̱ á mu májánʼ a̱jkiu̱lú gajmiúlú eʼwíínʼ, mbáa maʼndún mudxawíín

9 Mbáa xa̱bu̱ bi̱ nigumbiʼyuu Natanael niʼthí mbaʼa dí ra̱májánʼ ga̱jma̱a̱ numún xa̱bu̱ Nazaret, náa xuajñu Jesús. Maski ajndu xúʼko̱, Jesús ndiyáaʼ mambaxúu ga̱jma̱a̱. Rí nirígá, Natanael niriʼkhuu rí  endxa̱ʼwa̱mínáʼ ga̱jma̱a̱ numuu Jesús ga̱jma̱a̱ nindoo majmañuu itháan ga̱jma̱a̱ numuu ikhaa (Juan 1:46-51). Ndiéjunʼ eʼsngúlúʼ xkri̱da ndrígóo Jesús rá. Rí á mu nduʼyáaʼ mambáxulu gajmiúlú xa̱bu̱ ga̱jma̱a̱ á mu májánʼ a̱jkiu̱lú gajmiúlú eʼwíínʼ, mbáa maʼndún mudxawíín [2] . Guʼsngún bi̱ nuxunʼ rí mani̱ndxu̱ún xa̱bu̱ májánʼ a̱jkiu̱ún ga̱jma̱a̱ rí maʼndún mambaxúún gajmiún eʼwíínʼ. Xúʼko̱ manigu̱u̱nʼ mutaraʼa itháan.

10-12. a) Ndiéjunʼ niʼni Jesús mú xa̱bu̱ maʼndún mudxawíín rá. b) Xú káʼnii gándoo gumbáñuun publicador bi̱ nuxunʼ mu musngáa májánʼ rí gajkhun rá.

10 Musngúún bi̱ nandún mudxawíín. Jesús niʼtáraʼa káxi̱ ajtsú tsiguʼ tikhu. Mú índo̱ xa̱bu̱ nindúún mudxawíín rí gáʼthi, ikhaa niríyaʼ mbiʼi mu maxtáa gajmíi̱n ga̱jma̱a̱ mbaʼa rí niʼsngúún. Mbá xkri̱da, mbá miʼtsú niguáʼnu mbaʼin xa̱bu̱ náa rawunʼ iyaʼ mu mudxawíín rí gáʼthi. Jesús nitsimuu náa mbá barca ga̱jma̱a̱ Pedro ma̱ngaa asndu ikhí niʼsngúún xa̱bu̱. Nda̱wa̱á nindoo maʼsngóo mbá ikha Pedro. Niʼni mbá milagro índo̱ nimbáyúu mu magujtuun mbaʼin e̱gi̱ʼ. Nda̱wa̱á niʼthúu̱n: ‹Rí xúgi̱ marajtun xa̱bu̱›. Náa Biblia naʼthí rí mbá nacha̱ Pedro ga̱jma̱a̱ bi̱ xtáa gajmíi̱n “ningujuin naʼ raun mbaxo gajma barco, aʼkue ri niniñaʼ mba xugui”. Ikhú ninindxu̱ún xa̱bi̱i̱ Jesús (Luc. 5:1-11).

11 Mbáa xa̱bu̱ bi̱ nigumbiʼyuu Nicodemo ma̱ngaa nindoo majmañuu itháan ga̱jma̱a̱ numuu Jesús. Mú ninindxu̱u̱ mbáa bi̱ nigiʼdoo wéñuʼ numuu náa Xa̱bu̱ Ñajunʼ judíos. Ikha jngó nimiñuu rí guthi eʼwíínʼ índo̱ gúyáá rí naʼtámíjná ga̱jma̱a̱ Jesús. Ikha jngó ni̱jkha̱ mbruʼun. Jesús nigruiguíi májánʼ ga̱jma̱a̱ niʼthúu̱n mbaʼa rí gíʼdoo wéñuʼ numuu (Juan 3:1, 2). Jesús nixtáa xawii mu maríyaaʼ mbiʼi mu maʼsngúún rí gajkhun xa̱bu̱ ga̱jma̱a̱ mu maguaʼdáá itháan fe. Ikháanʼ mangáanʼ ndayóoʼ makuwaanʼ xawii mu matangáanʼ gúʼñúún xa̱bu̱ índo̱ ikhiin gaguapiin ga̱jma̱a̱ mumbáñuun makru̱ʼu̱u̱n Biblia.

12 Índo̱ nuʼtáraʼa gajmiúlú bi̱ nuxunʼ, ma̱ndoo muʼsngúún rí matangi̱ín gúñún xa̱bu̱ bi̱ nakujmaa rí nandún mudxawíín. Ma̱ngaa ma̱ndoo muʼthúún mu̱ʼgua̱ gajmiúlú gúʼñúún xa̱bu̱ ga̱jma̱a̱ muʼsngúún ga̱jma̱a̱ numuu Biblia. Xúʼko̱ majmañún musngáa májánʼ Biblia ga̱jma̱a̱ makuwa gagi rí mumbañún muniʼniiʼ Jeobá. Nda̱wa̱á ikhiin maʼdxúún rí matangi̱i̱n gúñún xa̱bu̱ mu musngúún ga̱jma̱a̱ numuu Biblia. Ma̱ngaa majmañún maʼngo̱o̱ a̱jkiu̱ún ga̱jma̱a̱ rí xáʼni néʼngu̱u̱n á mu tséxkamiin xa̱bu̱ náa guʼwún (Gál. 5:22) (atayáá kúgumaʼá “ Ndxájulú tágaaʼ”).

GUʼSNGÚN BI̱ NUXUNʼ MU MUMBÁÑÚN A̱NGIU̱LÚ

13, 14. a) Ndiéjunʼ ejmañulú ga̱jma̱a̱ numún xa̱bi̱i̱ Jeobá bi̱ numbañún eʼwíínʼ rá. b) Xú káʼnii gándoo gúʼsnguun jiáma ga̱jma̱a̱ bi̱ nuxunʼ mu musngajma rí nandún kuñún a̱ngiu̱lú rá.

13 Jeobá nandoo rí xa̱bi̱i̱ maʼndulú kuʼyamijná xóo kaníkháanʼ ga̱jma̱a̱ mumbayumíjná (atraxnuu Lucas 22:24-27 ga̱jma̱a̱ 1 Pedro 1:22). * Náa Biblia naʼthí rí Jesús niʼni xúgíʼ rí eʼngo̱o̱ mu mambáñun xa̱bu̱. Asndu nixnáximinaʼ ga̱jma̱a̱ numulúʼ (Mat. 20:28). Mbáa cristiana bi̱ nigumbiʼyuu Dorcas naguʼwun naʼniún rí májánʼ eʼwíínʼ (Hech. 9:36, 39). Ga̱jma̱a̱ imba̱a̱ cristiana bi̱ nigumbiʼyuu María  ‹niʼni mbaʼa ñajunʼ› ga̱jma̱a̱ numún a̱ngui̱i̱n bi̱ kuwa náa Roma (Rom. 16:6). Xú káʼnii gándoo gumbáñuun bi̱ nuxunʼ mu makru̱ʼu̱u̱n rí gíʼdoo wéñuʼ numuu muʼniu̱u̱n rí májánʼ a̱ngiu̱lú rá.

Gumbáñuun bi̱ nuxu̱nʼ mu maʼndún kuñún a̱ngiu̱lú ga̱jma̱a̱ muniu̱u̱n rí májánʼ. (Atayáá kutriga̱ 13 ga̱jma̱a̱ 14.)

14 Ma̱ndoo muʼthúún bi̱ nuxunʼ mu mu̱ʼgua̱ gajmiúlú gúʼñúún a̱ngiu̱lú guanii o bi̱ naʼniún nandii. Xa̱bu̱ bi̱ guáʼdiin e̱ji̱n ma̱ndoo magún kudiin e̱jñún índo̱ gágun gúñún a̱ngiu̱lú bugi̱ índo̱ gándoo. Bi̱ kuya̱ edxu̱u̱ ma̱ndoo mundu̱ʼu̱u̱n jiáma o bi̱ nuxunʼ mu magún ku̱ñu̱u̱n ganitsu náa a̱ngiu̱lú guanuu o muni̱i̱ guʼwún. Á mu jiáma ga̱jma̱a̱ bi̱ nuxu̱nʼ nduyáá rí nuñeumíjna̱lú, xúʼko̱ má guni mangiin. Guʼyáá rí niʼni mbáa bi̱ kayá edxu̱u̱. Índo̱ naʼtáraʼa náa mbá xuajen chíʼgíʼ, na̱jkha̱ gáʼñun a̱ngiu̱lú bi̱ kuwa ikhí mu mbaʼyoo xú káʼnii kuwa. Ga̱jma̱a̱ numuu rí niʼni, mbáa dxámá bi̱ na̱jkha̱ ga̱jma̱a̱ má xúʼko̱ nijmañuu mandxaʼwáminaʼ xú káʼnii gándoo gambáñun a̱ngiu̱lú (Rom. 12:10).

15. Ndíjkha gíʼdoo numuu rí bi̱ kuya̱ edxu̱u̱ maxmiéjunʼ kuñún rí xóo egún ruñajunʼ a̱ngiu̱lú náa congregación rá.

15 Jeobá najmiuu xa̱bekha mu musngáa Ajngóo náa congregación. Ikha jngó gíʼdoo wéñuʼ numuu rí a̱ngiu̱lú majmañún musngáa májánʼ índo̱ nuxna discurso. Bi̱ kuya̱ edxu̱u̱ ma̱ndoo mumbañún mu magún ruñajunʼ itháan májánʼ. Mbá xkri̱da, ma̱ndoo mudxawíín mbáa siervo ministerial xú káʼnii eʼnirataminaʼ ga̱jma̱a̱ mbá discurso (Neh. 8:8) [3] .

16, 17. a) Xú káʼnii nisngájma Pablo rí nixmiéjunʼ kaʼyoo rí xú káʼnii ejkha̱ rañajunʼ Timoteo rá. b) Xú káʼnii gándoo bi̱ kuya̱ edxu̱u̱ muniratiin bi̱ mani̱ndxu̱ún báxtúu náa congregación nda̱wa̱á rá.

16 Ndayóoʼ wéñuʼ rí magumaratiin eʼwíínʼ a̱ngiu̱lú mu mani̱ndxu̱ún báxtúu náa congregación (atayáá kúgumaʼá “Ndiéjunʼ eyoo gáʼthúu̱n”). Pablo niʼniratoo Timoteo ga̱jma̱a̱ niʼthúu̱n rí maʼniratiin eʼwíínʼ. Nixnúu xtágabu rígi̱: “Araʼdáá má xúʼko̱ tsiakii náa rí májánʼ a̱jkiu̱u̱n Dios rí na̱ʼkha̱ ga̱jma̱a̱ numuu Cristo Jesús, rí nitadxawíín ga̱jma̱a̱ numuʼ náa inún mbaʼin testigos, xúgíʼ rígi̱ araxnún muni xa̱bu̱ jmbiin, bi̱ majmaratiin mu musngúún eʼwíínʼ” (2 Tim. 2:1, 2). Timoteo mbaʼa rí nijmañuu náa Pablo, bi̱ kayá edxu̱u̱ ga̱jma̱a̱ ninindxu̱u̱ apóstol. Tikhu rí niʼsngóo nindxu̱u̱ rí xú káʼnii maʼtáraʼa itháan májánʼ ga̱jma̱a̱ xú káʼnii gambáñun eʼwíínʼ náa congregación (2 Tim. 3:10-12).

17 Pablo niʼsngóo mba̱yu̱ʼ mbiʼi Timoteo numuu rí nindoo maʼniratoo májánʼ wéñuʼ (Hech. 16:1-5). Xú káʼnii gándoo bi̱  kuya̱ edxu̱u̱ muni ikháá má xóo niʼni Pablo rá. Rí mutún bi̱ ni̱ndxu̱ún siervos ministeriales bi̱ najmañún itháan mu magún gúxnún tsiakii tikhun a̱ngiu̱lú. Xúʼko̱, siervos ministeriales majmañún xú káʼnii musngúún eʼwíínʼ ga̱jma̱a̱ maʼngo̱o̱ a̱jkiu̱ún ma̱ngaa maʼndún kuñún eʼwíínʼ. Ma̱ngaa majmañún mbuyáaʼ ikha ndrígóo Jeobá mu muñewu̱u̱n xa̱bi̱i̱ (1 Ped. 5:2).

GÍʼDOO WÉÑUʼ NUMUU MIʼNIRATIIN EʼWÍÍNʼ

18. Ndíjkha rí gíʼdoo numuu muʼniratiin eʼwíínʼ mu muni ñajunʼ Jeobá rá.

18 Xúgi̱ rí inuu ma̱ʼkha̱ fin, mbaʼin nda̱ñúnʼ magumaratiin mu musngáa itháan májánʼ. Ma̱ngaa ndayóoʼ rí a̱ngiu̱lú majmañún muñewa̱a̱n congregación. Jeobá nandoo rí xúgínʼ xa̱bi̱i̱ magumaratiin májánʼ ga̱jma̱a̱ nixnúlú mbá ñajunʼ rí májánʼ wéñuʼ rí muʼniratiin bi̱ nuxu̱nʼ. Ikha jngó, gíʼdoo numuu muʼniratiin eʼwíínʼ xó má niʼni Jesús ga̱jma̱a̱ Pablo. Ndayóoʼ muʼniratiin xúgínʼ bi̱ gáʼngulú, numuu rí xóó ndayóoʼ muʼtáraʼa wéñuʼ nákha xóó tséʼkha̱ fin.

19. Xú káʼnii tayáá ikháánʼ rí májánʼ gáʼni á mu nuʼni tsiakii mu muʼniratiin a̱ngiu̱lú rá.

19 Rí muʼniratiin eʼwíínʼ ndayóoʼ mbiʼi ga̱jma̱a̱ tsiakii. Mú nduʼyáá májánʼ rí Jeobá ga̱jma̱a̱ Jesús mumbayulúʼ mu mbuʼyáá xú káʼnii gúʼniratiin itháan májánʼ. Nadxulú índo̱ nduʼyáá rí bi̱ nuxu̱nʼ nunimi̱jna̱ muñajunʼ gakhii náa congregación ga̱jma̱a̱ náa nuʼtáraʼa (1 Tim. 4:10). Ma̱ngaa, guʼni xúgíʼ rí naʼngulú mu muʼni itháan ñajunʼ Dios, rí manindxu̱lúʼ itháan májánʼ xa̱bu̱ ga̱jma̱a̱ mambáxulúʼ itháan májánʼ gajmiúlú Jeobá.

^ [1] (kutriga̱ 7): Mbá xkri̱da, Jesús niʼthún xa̱bi̱i̱ rí gíʼmaa muni rígi̱: 1) Mutaraʼa ga̱jma̱a̱ numuu Reino; 2) mbuyáá májánʼ rí Jeobá má gáxnún ganitsu ga̱jma̱a̱ xtíin rí gáʼñúnʼ; 3) xúgiʼdu̱u̱n gajmiún xa̱bu̱; 4) makumún kuyáá Jeobá índo̱ gúxkúún, ga̱jma̱a̱ 5) xámiñuun rí gúniu̱u̱n xa̱bu̱.

^ [2] (kutriga̱ 9): Atayáá libro Benefíciese de la Escuela del Ministerio Teocrático, ináa 62 asndu 64. Ikhí mataxkamaa rí mambáyaʼ mu maratamíjná gajmiáanʼ xa̱bu̱ náa naratáraʼa.

^ [3] (kutriga̱ 15): Atayáá libro Benefíciese de la Escuela del Ministerio Teocrático, ináa 52 asndu 61. Ikhí mataxkamaa ikha rí mambáñun a̱ngiu̱lú mu musngáa itháan májánʼ náa congregación.

^ párr. 13 1 Pedro 1:22: “Rí xúgi̱ rí nini kaʼwumijnáala numuu rí ninimbala náa rí gajkhun ga̱jma̱a̱ rí nandala kuyamíjna̱ gajkhun, ga̱jma̱a̱ gaʼndala kuyamíjna̱ ga̱jma̱a̱ xúgíʼ a̱jkia̱la”.