Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Febrero tsiguʼ 2016

Ganindxu̱lú jmbii náa Jeobá

Ganindxu̱lú jmbii náa Jeobá

“Gaxtáa Jeobá ga̱jma̱á nindxulú ga̱jma̱a̱ náa ejñulú asndu kámuu mbiʼi” (1 SAMUEL 20:42).

AJMÚÚ 125 GA̱JMA̱A̱ 62

1, 2. Náa numuu rí naʼniulú tsiánguá rí Jonatán nimbáxu̱u̱ ga̱jma̱a̱ David ma̱ngaa ninindxu̱u̱ jmbii náa ikhaa xá.

MBÁA Jonatán ndiʼyamajkuu wéñuʼ David. Dxámá bugi̱ támiñuu índo̱ nixíyáa Goliat bi̱ mba̱yi̱ʼ wéñuʼ ga̱jma̱a̱ ni̱jkha̱ kayóo edxu̱u̱ náa Saúl rey bi̱ nixtáa náa Israel, anu̱u̱ Jonatán (1 Sam. 17:57). Jonatán ndiʼyoo májánʼ rí Dios xtáa rambáyúu David. Asndu nákhi mbiʼi rúʼko̱, Jonatán ga̱jma̱a̱ David nimbáxu̱u̱n májánʼ wéñuʼ. Nimbánuu rí ikhiin mani̱ndxu̱ún jmbiin má xúʼko̱ (1 Sam. 18:1-3). Ga̱jma̱a̱ xúʼko̱ má nini.

2 Naʼniulú tsiánguá índo̱ nduʼyáá rí Jonatán nimbáxu̱u̱ májánʼ ga̱jma̱a̱ David ma̱ngaa ninindxu̱u̱ jmbii náa ikhaa. Náa numuu rá. Numuu rí Jonatán ninindxu̱u̱ a̱ʼdióo rey Saúl, ikha jngó ikhaa kaʼyoo maʼtáñajunʼ. Mú Jeobá ndiyáaʼ David mu mani̱ndxu̱u̱ rey, raʼkháa Jonatán. Maski ajndu xúʼko̱ Jonatán ninindxu̱u̱ jmbii náa David. Índo̱ Saúl ndiyáaʼ David mu maxíyáa, Jonatán nixmiéjunʼ wéñuʼ kaʼyoo bi̱ nimbáxu̱u̱ ga̱jma̱a̱. Numuu rí ndiʼyoo rí David nixtáa náa Ku̱ba̱ʼ mixooʼ náa Hores, Jonatán ni̱jkha̱ ikhí ga̱jma̱a̱ nixnúu tsiakii mu mawiji̱ jmbu má xúʼko̱ náa Jeobá. Niʼthúu̱n:  “Xámiñaʼ numuu rí xaxkamán anu̱ʼ Saúl ga̱jma̱a̱ ikháánʼ manindxa̱ʼ rey náa Israel, ga̱jma̱a̱ ikhúúnʼ matañájunʼ nda̱wa̱á rí ikháánʼ” (1 Sam. 23:16, 17).

3. a) Ndiéjunʼ rí itháan gíʼdoo numuu ndiʼyoo Jonatán rá. b) Ga̱jma̱a̱ xú káʼnii eʼyáá rí nigiʼdoo itháan numuu rí mani̱ndxu̱u̱ jmbii náa Dios rá. (Atayáá timbá xtiʼkhu.)

3 Xúgiáanʼ nanigulúʼ rí xa̱bu̱ mani̱ndxu̱ún jmbiin. Mú, lá i̱ndó nanigulúʼ xkridoo Jonatán numuu rí ninindxu̱u̱ jmbii náa David ráʼ. Na̱nguá. Nanigulúʼ numuu rí ikhaa ndiʼyoo rí itháan gíʼdoo numuu mani̱ndxu̱u̱ jmbii náa Dios. Ikha jngó ninindxu̱u̱ jmbii náa David ga̱jma̱a̱ táxigúu kaʼyoo. Ma̱ngaa Jonatán asndu nimbáyúu maku̱mu̱u̱ kaʼyoo Jeobá. Mbá nájmi̱i̱n nimbáxu̱u̱n májánʼ wéñuʼ ga̱jma̱a̱ ninindxu̱ún jmbiin náa Jeobá. Ninimbaníí rí nithi: “Gaxtáa Jeobá ga̱jma̱á ni̱ndxu̱lú ga̱jma̱a̱ náa e̱jñu̱lú asndu kámuu mbiʼi” (1 Sam. 20:42).

4. a) Ndiéjunʼ eʼni rí makuwáanʼ gagi rá. b) Ndiéjunʼ gúʼyáá náa artículo rígi̱ rá.

4 Mangáanʼ gíʼmáanʼ manindxu̱lúʼ jmbii náa bi̱ kuʼñúún, bi̱ nambáxulúʼ gajmiúlú ga̱jma̱a̱ náa a̱ngiu̱lú bi̱ kuwa náa congregación (1 Tes. 2:10, 11). Mu itháan gíʼmaa manindxu̱lúʼ jmbii náa Jeobá numuu rí ikhaa niʼniáanʼ (Rev. 4:11). Á mu nuʼni xúʼko̱ kaʼnii, naʼni makuwáanʼ gagi. Mú nduʼyáá rí gíʼmaa manindxu̱lúʼ jmbii má xúʼko̱ náa Jeobá, asndu índo̱ narígá rí mingíjyúuʼ. Náa artículo rígi̱ gúʼyáá a̱jkhu̱ enii xú káʼnii embáyulú xkri̱da ndrígóo Jonatán mu manindxu̱lúʼ xa̱bu̱ jmbii náa Dios. Timbá, índo̱ nakumulú rí mbáa bi̱ kayá edxu̱u̱ na̱nguá kaʼyoo magruigú gamajkhu. Raga̱jma̱, índo̱ guraʼwíí tsáa guʼnimbulúʼ kuʼyáá. Ragajtsú, índo̱ mbáa bi̱ kayá edxu̱u̱ naʼniulú dí raʼkhí. Ga̱jma̱a̱ rí maʼni a̱jkhu̱, índo̱ naʼniulú mingíjyúuʼ muʼnimbánii rí niʼthá.

ÍNDO̱ NAKUMULÚ RÍ MBÁA BI̱ KAYÁ EDXU̱U̱ NA̱NGUÁ KAʼYOO MAGRUIGÚ GAMAJKHU

5. Náa numuu rí israelitas niʼniún mingíjyúuʼ mani̱ndxu̱ún jmbiin náa Jeobá índo̱ Saúl xtáa xóo rey rá.

5 Jonatán ga̱jma̱a̱ eʼwíínʼ israelitas mingíjyúuʼ nikúwi̱i̱n. Anu̱u̱ Jonatán nánguá niʼnimbo̱o̱, ikha jngó Jeobá niʼthí rí ní xánindxu̱u̱ rey náa Israel (1 Sam. 15:17-23). Mú Jeobá niniñuʼ rí Saúl maʼtáñajunʼ mba̱yu̱ʼ tsiguʼ. Numuu rí Saúl xtáa raʼtáñajunʼ náa ‹trono ndrígóo Jeobá›, ga̱jma̱a̱ xtáa raʼni dí ra̱májánʼ wéñuʼ, israelitas niʼniún mingíjyúuʼ mani̱ndxu̱ún jmbiin náa Jeobá (1 Cró. 29:23).

6. Náa numuu eʼyáá rí Jonatán ninindxu̱u̱ jmbii náa Jeobá rá.

6 Jonatán ninindxu̱u̱ jmbii náa Jeobá. Xú káʼnii eʼyáá rá. Ga̱jma̱a̱ rí niʼni nda̱wa̱á rí Saúl táʼnimbo̱o̱ kaʼyoo Dios (1 Sam. 13:13, 14). Mbiʼi rúʼko̱, mbaʼin wéñuʼ soldados bi̱ sia̱nʼ niguáʼdáá mbá 30,000 carros dí muni ga̱jma̱a̱ guerra mu magún guxmijná náa Israel. Káaʼ 600 soldados niguaʼdiin israelitas. Ga̱jma̱a̱ i̱ndó rey Saúl ga̱jma̱a̱ Jonatán kuda ajua̱nʼ. Mú Jonatán támiñuu. Nirmáʼáan a̱jkiu̱u̱n rí niʼthí gaʼyee Samuel: “Jeobá xániñuʼ xuajñu ga̱jma̱a̱ numuu mbiʼyuu rí mba̱a̱ wéñuʼ” (1 Sam. 12:22). Ikha jngó Jonatán niʼthúu̱n mbáa soldado: “Nda̱a̱ rí marikhoo Jeobá mu maʼni káwíin mbaʼin o mbá nguáthi̱i̱n”. Ga̱jma̱a̱ nájmi̱i̱n nigún ma̱ngaa niradíin mbá 20 soldados bi̱ sia̱nʼ. Nakujmaa májánʼ rí Jonatán nigiʼdoo fe náa Jeobá ga̱jma̱a̱ ikhaa má niʼni tsajkurámááʼ numuu rúʼko̱. Ikhaa niʼni rí maʼxma, ikhú soldados bi̱ sia̱nʼ nimiñun wéñuʼ rí nigi̱ʼdi̱i̱ niradímíjná. Xúʼko̱ niʼni rí israelitas niʼngu̱u̱n (1 Sam. 13:5, 15, 22; 14:1, 2, 6, 14, 15, 20).

7. Ndiéjunʼ niʼni Jonatán rá.

7 Maski ajndu rey Saúl táʼnimbo̱o̱ kaʼyoo Jeobá, Jonatán niʼnimbo̱o̱ má xúʼko̱ rí niʼthúu̱n  anu̱u̱. Mbá xkri̱da, ni̱jkha̱ ga̱jma̱a̱ anu̱u̱ náa mbá guerra mu mañewu̱u̱n xuajñu Jeobá (1 Sam. 31:1, 2).

8, 9. Ndíjkha rí gíʼmaa mbuʼyamajkún bi̱ nutañajunlú rá.

8 Xú káʼnii gándoo guʼyaridáá Jonatán ga̱jma̱a̱ manindxu̱lúʼ jmbii náa Dios rá. Rí muʼnimbulúʼ má xúʼko̱ índo̱ gándoo náa Xa̱bu̱ Ñajunʼ bi̱ xtáa náa kuwáanʼ. Jeobá naniñuʼ rí “Xa̱bu̱ Ñajunʼ” mutañajunlú ga̱jma̱a̱ rí mbuʼyamajkún (atraxnuu Romanos 13:1, 2). * Ikha jngó nduʼyamajkhún xúgínʼ Xa̱bu̱ Ñajunʼ, maski ajndu mbáa rí ikhiin tséʼni rí májánʼ ga̱jma̱a̱ nduʼyáá rí rakáʼyoo muxnáá gamajkhu. Jeobá ma̱ngaa nagiʼthu̱u̱n rí mbuʼyamajkún xúgínʼ xa̱bu̱ bi̱ ikhaa naʼni muyégun edxu̱u̱ náa mbáa guʼwíin ga̱jma̱a̱ náa congregación (1 Cor. 11:3; Heb. 13:17).

Mbá rí xóo manindxu̱lúʼ jmbi náa Jeobá nindxu̱u̱ rí mbuʼyamajkuíí bi̱ ndiʼyáa maski ajndu na̱nguá nindxu̱u̱ xa̱bi̱i̱ Jeobá. (Atayáá kutriga̱ 9)

9 Guʼyáá xkri̱da ndrígóo ndxájulú Olga bi̱ xtáa náa Sudamérica. Ikhaa nisngajma rí ninindxu̱u̱ jmbii náa Jeobá [1] (atayáá nota rí na̱ʼkha̱ náa námbá artículo). Ajmbio̱o̱ ra̱ʼkhá tháán eʼni gínáa. Nguáná ikhaa tseʼtamíjná ga̱jma̱a̱ o naʼthúu̱n ajngáa rí mixkawiʼ numuu rí nindxu̱u̱ xa̱bi̱i̱ Jeobá. Asndu ni̱jkha̱nú niʼthúu̱n rí maniñaʼ ga̱jma̱a̱ maʼga̱ kagui̱i̱n e̱ji̱i̱n. Mú ikhaa ndiʼyamajkuu má xúʼko̱ ga̱jma̱a̱ tátanga̱a̱ maʼniuu dí ra̱májánʼ. Ikhaa niʼniminaʼ mani̱ndxu̱u̱ mbáa májáánʼ a̱ʼgu̱. Naʼni mújúnʼ rí mikhu, naʼjñáa xtíñuu ga̱jma̱a̱ nañewu̱u̱n  bi̱ kuwa náa goʼwóo (Rom. 12:17). Ma̱ngaa índo̱ nandoo, na̱jkha̱ ga̱jma̱a̱ ajmbio̱o̱ gáʼñun a̱ngui̱i̱n ma̱ngaa bi̱ nambáxu̱u̱ gajmíi̱n. Mbá xkri̱da, índo̱ nikháñu jmégiu̱u̱ Olga, ikhaa niʼni ratoo xúgíʼ mu maʼga̱ ikhí, náa imbo̱o̱ xuajin. Numuu rí funeral nirígá náa mbá guʼwá ndxajkun, ikhaa nigi̱ʼthu̱u̱n rexa̱a̱ asndu índo̱ ajmbio̱o̱ nigájna̱a̱. Nda̱wa̱á rí ninújngoo mba̱yu̱ʼ tsiguʼ, ajmbio̱o̱ ninindxu̱u̱ itháan májáánʼ xa̱bu̱. Xúʼko̱ niʼni numuu rí ikhaa niʼngo̱o̱ wéñuʼ a̱jkiu̱u̱n ga̱jma̱a̱ ndiʼyamajkuu má xúʼko̱. Rí xúgi̱ ajmbio̱o̱ naʼthúu̱n rí xándati̱go̱o̱ reunión ga̱jma̱a̱ na̱jkha̱ kayáa náa Guʼwá nagimbáanʼ. Nguáná asndu naguanúu ga̱jma̱a̱ Olga náa reunión (1 Ped. 3:1).

ÍNDO̱ GURAʼWÍÍ TSÁA GUʼNIMBULÚʼ KUʼYÁÁ

10. Ndiéjunʼ nimbáyúu Jonatán mu maraʼwíí májánʼ rí maʼni rá.

10 Índo̱ Saúl niʼthí rí nandoo maxíyáa David, Jonatán ndiyóoʼ maraʼwíí á mu mani̱ndxu̱u̱ jmbii náa anu̱u̱ o náa David. Mingíjyúuʼ ninindxu̱u̱ rígi̱ numuu rí Jonatán nindoo mani̱ndxu̱u̱ jmbii náa nájmi̱i̱n ikhiin. Ndiéjunʼ nimbáyúu mu mbaʼyoo káʼnii gáʼni xá. Ikhaa ndiʼyoo rí Jeobá nambáyúu David, raʼkháa Saúl. Ikha jngó niraʼwíí mani̱ndxu̱u̱ jmbii náa David. Ginii niʼthúu̱n David rí garkaʼuminaʼ ga̱jma̱a̱ nda̱wa̱á niʼthúu̱n anu̱u̱ rí xaxíyáa David (atraxnuu 1 Samuel 19:2, 4). *

11, 12. Ndiéjunʼ gúʼni á mu nandulúʼ kuʼyáá Dios rá.

11 Á mu nandulúʼ kuʼyáá Dios, manindxu̱lúʼ itháan jmbii náa ikhaa ki xóo náa eʼwíínʼ xa̱bu̱, asndu bi̱ kuʼñúún. Guʼyáá xkridoo mbáa ndxájulú bi̱ mbiʼyuu Alice, bi̱ xtáa náa Australia. Ikhaa ndiyóoʼ maraʼwíí tsáa gáʼnimbo̱o̱ kaʼyoo. Índo̱ xtáa rajmañuu ga̱jma̱a̱ numuu Biblia, niʼthún bi̱ kaʼñún rí xtáa rajmañuu. Mbá mbiʼi niʼthún rí ní xáʼniriyaaʼ itháan Navidad ga̱jma̱a̱ niʼthún náa numuu. Ginii ikhiin nikuwa gíná mú nda̱wa̱á nikiʼníin wéñuʼ. Nikumu̱ún rí ikhaa nánguá eyoo kaʼñún. Ru̱dúu̱ niʼthúu̱n rí nánguá eyoo mbaʼyoo nditháan. Alice niʼthí: “Ra̱ʼkhá tháán nigawúnʼ numuu rí nandoʼ ka̱ñu̱u̱n a̱ngui̱nʼ. Mú nitha má rí mani ñajunʼ Jeobá ga̱jma̱a̱ Jesús, ikha jngó nijngúnʼ iyááʼ índo̱ nirígá asamblea” (Mat. 10:37).

12 Á mu nandulúʼ kuʼyáá Dios, manindxu̱lúʼ itháan jmbii náa ikhaa ki xóo náa i̱ʼwáʼ, xóo mbá equipo náa nutsíin, náa nuʼnigajmaa o xuajñulú. Gundxa̱ʼwámi̱jna̱ ga̱jma̱a̱ numuu ndxájulú bi̱ nagumbiʼyuu Henry. Ikhaa naʼtsíin ajedrez náa mbá equipo náa naʼnigajmaa ga̱jma̱a̱ nigíminaʼ madaʼ náa mbá campeonato. Mú tsíguaphaa maʼga̱ gáʼtaraʼa ga̱jma̱a̱ maʼga̱ reunión numuu rí ikhaa naʼtsíin xúgíʼ sábado ga̱jma̱a̱ domingo. Mbá mbiʼi ndiʼyoo rí itháan nanindxu̱u̱ jmbii náa naʼnigajmaa ki xóo náa Jeobá. Ikha jngó nigájna̱a̱ náa equipo náa nutsíin ajedrez (Mat. 6:33).

13. Á mu nandulúʼ manindxu̱lúʼ jmbii náa Dios, ndiéjunʼ gúʼni índo̱ gúguaʼdáá xkujndu gajmiúlú bi̱ kuʼñúún rá.

13 Nguáná naʼni mingíjyúuʼ manindxu̱lúʼ xa̱bu̱ jmbii náa mbaʼin bi̱ kuʼñúún. Guʼyáá xkridoo ndxájulú Ken. Ikhaa naʼthí dí ru̱dúu̱ nikhi̱i̱ má wéñuʼ, ikha jngó nindoo maʼga̱ gáʼyoo mbaʼa nuthu ga̱jma̱a̱ rí ma̱ʼkha̱ nguáná mu maguanúu náa goʼwóo. Mu ru̱dúu̱ ga̱jma̱a̱ a̱ʼgiu̱u̱ tsimbáxu̱u̱n májánʼ. Ken tseʼyoo rí maʼni mu nájmi̱i̱n makuwá gagi. Ikhaa nindoo mani̱ndxu̱u̱ jmbii náa Jeobá. Ikha jngó nindxa̱ʼwáminaʼ rí naʼthí náa Biblia. Ikhú ni̱jkha̱nú ndiʼyoo rí Dios gíʼthu̱u̱n rí ndayóoʼ maʼni maxtáa gagi a̱ʼgiu̱u̱ ga̱jma̱a̱ rí mani̱ndxu̱u̱  jmbii náa ikhaa. Ikha jngó ndiyáaʼ mbá rí maʼni mu maxtáa gagi. Niʼthímijna ga̱jma̱a̱ a̱ʼgiu̱u̱ ma̱ngaa niʼthúu̱n náa numuu rí ndayóoʼ mani̱ndxu̱u̱ májánʼ xa̱bu̱ ga̱jma̱a̱ ru̱dúu̱. Ga̱jma̱a̱ niʼthúu̱n ru̱dúu̱ náa numuu rí ndayóoʼ mbaʼyamajkuu a̱ʼgiu̱u̱ (atraxnuu Génesis 2:24 * ga̱jma̱a̱ 1 Corintios 13:4, 5). *

ÍNDO̱ MBÁA NDXÁJULÚ BI̱ KAYÁ EDXU̱U̱ NAʼNIULÚ DÍ RAʼKHÍ

14. Ndiéjunʼ niʼniuu Saúl Jonatán rá.

14 Ma̱ndoo musngajmá rí nandulúʼ manindxu̱lúʼ jmbii náa Jeobá índo̱ mbáa ndxájulú bi̱ kayá edxu̱u̱ naʼniulú mbá dí raʼkhí. Dios nigíiʼ Saúl mu mani̱ndxu̱u̱ rey, mú rey niʼni gínáa a̱ʼdióo. Tákro̱ʼo̱o̱ náa numuu rí Jonatán nindoo kaʼyoo wéñuʼ David. Ikha jngó, índo̱ Jonatán nigíiʼ mambáyúu David, Saúl nikiʼnáa wéñuʼ rí asndu niríyaʼ majkhuu náa inún mbaʼin xa̱bu̱. Mú Jonatán ndiʼyamajkuu má xúʼko̱ anu̱u̱. Ma̱ngaa ninindxu̱u̱ jmbii náa Jeobá ga̱jma̱a̱ náa David, bi̱ ndiyáaʼ Dios mu maʼga̱nú mani̱ndxu̱u̱ rey náa Israel (1 Sam. 20:30-41).

15. Ndiéjunʼ gíʼmáanʼ muʼni á mu mbáa ndxájulú naʼniulú dí raʼkhí rá.

15 Rí mbiʼi xúgi̱, bi̱ kuya̱ edxu̱u̱ nunimi̱jna̱ muniu̱u̱n rí májánʼ xúgínʼ bi̱ kuwa náa congregación. Mú numuu rí ikhiin ni̱ndxu̱ún xa̱bu̱ aʼkhá, mbáa nguáná xákru̱ʼu̱u̱n dí eʼnilú (1 Sam. 1:13-17). Á mu mbóo miʼtsú nuniulú dí raʼkhí, ganindxu̱lú jmbii má xúʼko̱ náa Jeobá.

 ÍNDO̱ NAʼNIULÚ MINGÍJYÚUʼ MUʼNIMBÁNII RÍ NIʼTHÁ

16. Nguáná gáʼyóoʼ manindxu̱lúʼ jmbii náa Dios ga̱jma̱a̱ xúʼni̱ rí nandulúʼ ikháanʼ rá.

16 Saúl nindoo rí Jonatán mani̱ndxu̱u̱ rey, raʼkháa David (1 Sam. 20:31). Jonatán na̱nguá niʼni rí nindoo ikhaa ní má tágiminaʼ mani̱ndxu̱u̱ rey. Ikhaa nindoo kaʼyoo Jeobá ga̱jma̱a̱ ninindxu̱u̱ jmbii náa ikhaa, niʼnimbánuu rí niʼthúu̱n David bi̱ nimbáxu̱u̱ ga̱jma̱a̱. Náa Biblia naʼthí rí bi̱ ni̱ndxu̱ún jmbiin náa Jeobá ga̱jma̱a̱ nandún kuyáá, nunimbánii rí nixudami̱jna̱ muni maski ajndu xúndrigú rí májánʼ (Sal. 15:4). Mbá xkri̱da, á mu niʼthá rí muʼni mbá ñajunʼ ndayóoʼ muʼnimbánii maski ajndu maʼniulú mingíjyúuʼ. Ga̱jma̱a̱ á mu kuaʼdáá mbá xkujndu gajmiúlú bi̱ ndiʼyáa, manindxu̱lúʼ jmbii gajmiúlú numuu rí nandulúʼ kuʼyáá Jeobá (atraxnuu Malaquías 2:13-16). *

Á mu niʼthá rí muʼni mbá ñajunʼ ndayóoʼ muʼnimbánii numuu rí nandulúʼ manindxu̱lúʼ jmbii náa Dios. (Atayáá kutriga̱ 16)

17. Ndiéjunʼ nijmañaʼ náa artículo rígi̱ rá.

17 Xó má Jonatán nandulúʼ manindxu̱lúʼ jmbii náa Dios, maski ajndu nuraʼníí xkujndu dí mingíjyúuʼ. Ikha jngó, ganindxu̱lú jmbii náa a̱ngiu̱lú, maski ajndu nguáná nuni rí makuwáanʼ gíná. Xúʼko̱ muʼni rí Jeobá maxtáa gagi ga̱jma̱a̱ rúʼko̱ maʼni dí makuwáanʼ itháan gagi ikháanʼlu (Prov. 27:11). Ma̱ndoo mbuʼyáá gajkhun dí ikhaa mañewu̱nlú má xúʼko̱. Náa imbo̱ʼ artículo muʼthá ga̱jma̱a̱ numuu eʼwíínʼ xa̱bu̱ bi̱ nikuwa nákha mbiʼi rí nixtáa David. Mbuʼyáá rí tikhun ninindxu̱ún jmbiin náa Dios, mú eʼwíínʼ na̱nguá. Ga̱jma̱a̱ mbuʼyáá ndiéjunʼ gándoo gájmañúlúʼ náa mámbáa dí ikhiin.

^ [1] (kutriga̱ 9): Nixtiʼkhu̱u̱ mbiʼñún.

^ párr. 8 Romanos 13:1, 2: “Xúgínʼ xa̱bu̱ gíʼmaa munimbánii rí nuthi Xa̱bu̱ Ñajunʼ, numuu rí ikhiin kuwa ga̱jma̱a̱ numuu Dios; Xa̱bu̱ Ñajunʼ bi̱ kuwa nigruigi̱i̱n Dios náa kaʼñún. Ikha jngó, bi̱ tséʼnimbo̱o̱ náa Xa̱bu̱ Ñajunʼ tséʼnimbánuu awan rí nigíiʼ Dios; bi̱ tsenimbánii rígi̱ maxtandi̱ʼi̱i̱n cuenta”.

^ párr. 10 1 Samuel 19:2, 4: “Mú Jonatán a̱ʼdióo Saúl, ra̱ʼkhá tháán nindoo kaʼyoo David. Ikha jngó Jonatán niʼthúu̱n David: “Anu̱ʼ Saúl ndañánʼ maxíña̱a̱n. Atani péñu, araxtaa xawii miʼcha̱ araxtaa náa ngo̱ʼo̱o̱ ga̱jma̱a̱ atarkaʼuminaʼ. Ikhú Jonatán niʼthúu̱n anu̱u̱ Saúl rí májánʼ ga̱jma̱a̱ numuu David: “Xakiéʼkháanʼ ga̱jma̱a̱ numuu xa̱bia̱ʼ David, numuu rí ikhaa takiéʼkhúun ga̱jma̱á ni̱ndxa̱ʼ, ga̱jma̱a̱ xúgíʼ rí niʼni ninindxu̱u̱ májánʼ náa ikháánʼ”.

^ párr. 13 Génesis 2:24: “Ikha jngó xa̱biya̱ maniñuʼ anu̱u̱ ga̱jma̱a̱ ru̱dúu̱ gíʼdoo rí maxtáa ga̱jma̱a̱ a̱ʼgiu̱u̱ ma̱ngoo maguanu mani̱ndxu̱ún mbóó xuwiʼ”.

^ párr. 13 1 Corintios 13:4, 5: “Rí maʼndulú kuʼñúún eʼwíínʼ gáʼni rí maʼngulú xúgíʼ ga̱jma̱a̱ muʼni rí májánʼ. Rí maʼndulú kuʼñúún eʼwíínʼ maʼni rí xaxígulúʼ, xúʼnimba̱mi̱jna̱, xúxuximíjna, xúʼni̱ nditháan dí raʼkhí, na̱nguá eʼyáaʼ i̱ndó rí nda̱yúlúʼ ikháanʼ, tsikiʼnáanʼlu nacha̱. Tsejkua kuʼyulú sia̱nʼ”.

^ párr. 16 Malaquías 2:13-16: “Ga̱jma̱a̱ rígi̱ maʼni raga̱jma̱ rí ikháanʼ nunila, rí nuni marugoo ga̱jma̱a̱ iyoʼ idala náa altar ndrígóo Jeobá, ga̱jma̱a̱ rí numbiyaʼla ga̱jma̱a̱ rí nutsínala, ikha jngó ní xágruígú tsigijñaʼ rí naguwaʼ kudala ikháanʼ. Ga̱jma̱a̱ ikháanʼ nithala: ‹Náa numuu rá.› Ga̱jma̱a̱ numuu rígi̱: Rí Jeobá nindxu̱u̱ testigo náa ikháánʼ ga̱jma̱a̱ a̱ʼgia̱ʼ bi̱ ndiyáa asndu nákha dxámá, bi̱ ikháánʼ nitani̱ nduwaʼ maski ajndu ikhaa xtaa ga̱jma̱ʼ ga̱jma̱a̱ a̱ʼgia̱ʼ bi̱ niraxnáá ajngáaʼ. Numuu rí ikhaa naguiyuʼ kaʼyoo rí xa̱bu̱ muniñamijna̱a̱, niʼthí Jeobá Dios ndrígóo Israel, bi̱ narugoo ga̱jma̱a̱ xtíñuu dí raʼkhí, niʼthí Jeobá bi̱ gíʼdiin mbaʼin ejército. Ga̱jma̱a̱ gíʼmaa muñeumíjna̱la náa xi̱ʼ ndrígála ma̱ngaa ragíʼmáanʼ muni nduwaʼ”.