Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Septiembre tsiguʼ 2016

Lá nduʼyamajkuíí Dios ga̱jma̱a̱ xtíin rí naguʼwúnlú ráʼ.

Lá nduʼyamajkuíí Dios ga̱jma̱a̱ xtíin rí naguʼwúnlú ráʼ.

“Guni xúgíʼ rígi̱ mu maʼga̱ gamajkhu náa Dios” (1 CORINTIOS 10:31).

AJMÚÚ 34 GA̱JMA̱A̱ 61

1, 2. Ndíjkha rí gíʼdoo numuu eyáá xa̱bi̱i̱ Jeobá rí mugíʼ xtíin rí kaʼyoo rá.

MBÁ periódico holandés niʼthí xú káʼnii xtíin kaguwu̱nʼ xa̱bu̱ ede̱ náa guʼwá ndxajkun índo̱ nigún náa reunión ndrígu̱ún. Niʼthí rí mbaʼin rí ikhiin niguwu̱nʼ xtíin rí tséʼgui̱i̱, itháan numuu rí naʼni mijkha. Ma̱ngaa periódico niʼthí ga̱jma̱a̱ numún xa̱bi̱i̱ Jeobá bi̱ nigún náa mbá asamblea, niʼthí rí xtíñún nindxu̱u̱ mixtiʼkhu. Periódico niʼthí rí e̱ji̱n ga̱jma̱a̱ xa̱bekha kugíʼ corbata ga̱jma̱a̱ saco. Ma̱ngaa niʼthí rí wa̱ʼxa̱ʼ mangiin gu̱ʼu̱ nugíʼ gajnúu rí nagájnuu xúgi̱, mú mbi̱jua̱ xó má kaʼyoo. Bi̱ ni̱ndxu̱ún xa̱bi̱i̱ Jeobá najuiʼthún má xúʼko̱ rí májánʼ xtíñún. Apóstol Pablo niʼthí rí cristianos gíʼmaa mugíʼ xtíin “rí kaʼyoo ga̱jma̱a̱ rí nakujmaa májánʼ”, numuu dí rúʼko̱ gíʼmaa muni xa̱bi̱i̱ Dios (1 Tim. 2:9, 10). Maski ajndu Pablo gi̱jyooʼ xtáa raʼthí ga̱jma̱a̱ numún gu̱ʼu̱, xtángoo rígi̱ ma̱ngaa nambáñun xa̱bekha.

2 Xa̱bi̱i̱ Dios nduyáá rí gíʼdoo numuu mugíʼ xtíin rí  kaʼyoo numuu rí Dios bi̱ nuʼni ñajunʼ ma̱ngaa ndaʼyoo rí gíʼdoo numuu (Gén. 3:21). Jeobá nindxu̱u̱ Rey náa xúgíʼ numbaaʼ. Ga̱jma̱a̱ Biblia naʼthí kaʼwu rí ikhaa gíʼdoo xtángoo rí xú káʼnii xtíin gíʼmaa mugíʼ xa̱bi̱i̱. Ikha jngó xtíin rí guraʼwíí ragíʼmaa manigulúʼ i̱ndó ikháanʼ. Rí itháan gíʼdoo numuu rí maniguuʼ Jeobá, Dios bi̱ nindxu̱u̱ Rey ndrígúlú.

3. Ndiéjunʼ eʼsngúlúʼ xtángoo ndrígóo Moisés ga̱jma̱a̱ numuu xtíin rí naguʼwúnlú rá.

3 Náa xtángoo ndrígóo Moisés nirígá ikha rí niñewu̱u̱n israelitas ga̱jma̱a̱ numuu rí i̱ʼwáʼ xuajen dí nirígá mijngii nini rí mitsaga wéñuʼ. Náa Xtángoo nisngájma rí Jeobá nagui̱yu̱ʼ índo̱ xa̱bu̱ nugíʼ xtíin rí tsékujmaa májánʼ á mu xtíñuu a̱ʼgu̱ o xa̱biya̱ (atraxnuu Deuteronomio 22:5). * Xtángoo ndrígóo Moisés naʼsngúlú rí Jeobá tsínigu̱ʼ xtíin rí naʼni rí xa̱bekha makujmiin xóo gu̱ʼu̱, ni má xtíin rí naʼni rí gu̱ʼu̱ makujmiin xóo xa̱bekha, xúʼko̱ má xtíin rí naʼni miʼskhoo ma̱ta̱ya̱a̱ tsíin ni̱ndxu̱ún xa̱bekha ga̱jma̱a̱ tsíin ni̱ndxu̱ún gu̱ʼu̱.

4. Ndiéjunʼ gambáñun cristianos mu muraʼwíí rí májánʼ ga̱jma̱a̱ numuu xtíin rí mugíʼ xá.

4 Ikha rí na̱ʼkha̱ náa Biblia ma̱ndoo mambáyulúʼ mu muraʼwíí rí májánʼ ga̱jma̱a̱ numuu xtíin rí muʼgíʼ. Ikha rígi̱ nañambáá tséʼniuu á mu naʼni mijkha o miguwan, xóo eguʼwunlu ekuwaanʼ o xuajen náa kuwáanʼ. Tséyulú mbá lista mba̱a̱ mu maʼthúlú xú káʼnii xtíin rí ma̱ndoo mugíʼ o na̱nguá. I̱ndó ndayóoʼ muʼnimbánii ikha rí na̱ʼkha̱ náa Biblia rí naniñulú muʼgíʼ rí nanigulúʼ. Guʼyáá tikhu ikha rí mambáyulúʼ mbuʼyáá xú káʼnii rí “májánʼ ga̱jma̱a̱ dí naniguuʼ ga̱jma̱a̱ xúgíʼ rí jmbu rí e̱nda̱ʼa̱ Dios” índo̱ guraʼwíí xú káʼnii xtíin gúʼgíʼ (Rom. 12:1, 2).

“NUSNGAJMÁ DÍ ÑAJUNXU XA̱BI̱I̱ DIOS”

5, 6. Xú káʼnii gíʼmaa mbuyáá xtíñúlú eʼwíínʼ rá.

5 Jeobá niʼni rí apóstol Pablo maʼnirámáʼ mbá ikha rí gíʼdoo wéñuʼ numuu rí nuraxnuu náa 2 Corintios 6:4 (atraxnuu). * Rí xóó ekujmáanʼ naʼthí tsáa ni̱ndxu̱lú ga̱jma̱a̱ rígi̱ gáʼni rí xa̱bu̱ mundxaʼwamíjna̱ i̱mba̱ núthu ga̱jma̱a̱ numulúʼ (1 Sam. 16:7). Numuu rí ni̱ndxu̱lú xa̱bi̱i̱ Dios, ragíʼmaa muʼgíʼ mbáa xtíin i̱ndó á mu ikháanʼ nanigulúʼ. Ikha rí na̱ʼkha̱ náa Biblia gíʼmaa mambáyulúʼ mu xaguʼwúnlu xtíin rí xa̱ʼ, rí nasngájma xuyulúʼ o sexy. Xóo muʼthá gíʼmaa muʼni  gaʼduunʼ xtíin rí nasngájma dí rakáʼyoo makujmaa. Nimbáa ragíʼmaa maxkájkiu̱u̱n ní má mayexi i̱mba̱ ni̱ʼkhá índo̱ gáʼyoo xtíin rí kuʼgíʼ.

Á mu na̱jkua̱lú kaʼwáanʼ, nuʼgíʼ xtíin rí kaʼyoo, mbáa ikhú mbuyamajkulu itháan xóo xa̱bi̱i̱ Jeobá

6 Á mu na̱jkua̱lú kaʼwáanʼ, kiʼniratáanʼ májánʼ ga̱jma̱a̱ xtíin rí kaʼyoo, mbáa xa̱bu̱ mbuyamajkuíí itháan organización ndrígúlú ga̱jma̱a̱ ikháanʼ xóo xa̱bi̱i̱ Jeobá. Mbáa asndu maʼndún majmañún itháan ga̱jma̱a̱ numuu Dios bi̱ nduʼyamajkuíí. Ga̱jma̱a̱ mbáa mudxawíín ajngáa rí maʼni káwíin.

7, 8. Nguáná gíʼdoo wéñuʼ numuu rí muʼgíʼ májánʼ xtíñúlú rá.

7 Numuu rí kuaʼdáá gamajkuu náa Dios bi̱ kaʼwii, náa a̱ngiu̱lú ga̱jma̱a̱ náa xa̱bu̱ bi̱ nuʼtáruʼun, gíʼmaa muʼgíʼ xtíin rí mbaʼyamajkuu Jeobá ga̱jma̱a̱ ajngáa rí nuʼtáraʼa (Rom. 13:8-10). Rí muʼgíʼ májánʼ xtíñúlú gíʼdoo wéñuʼ numuu, itháan índo̱ na̱jkua̱ náa nagimbáanʼ o índo̱ nuʼtáraʼa. Xtíin rí gúʼgíʼ gíʼmaa masngájma rí ni̱ndxu̱lú xa̱bi̱i̱ Dios (1 Tim. 2:10). Mú rígá xtíin rí nakujmaa májánʼ náa xuajñanʼ mú  tsékujmaa májánʼ náa imbo̱o̱ xuajen. Ikha jngó tséʼniuu má náa kuwaanʼ, xa̱bi̱i̱ Jeobá gíʼmaa muʼgíʼ mbá xtíin rí xáʼni gawúunʼ eʼwíínʼ.

Rí xóo kaʼnii xtíñúlú, lá maʼni rí eʼwíínʼ mbuyamajkuíí Dios bi̱ nuʼthá ga̱jma̱a̱ numuu ráʼ. (Atayáá kutriga̱ 7 ga̱jma̱a̱ 8.)

8 (Atraxnuu 1 Corintios 10:31). * Índo̱ na̱jkua̱ náa asambleas, xtíñúlú gíʼmaa makujmaa májánʼ ga̱jma̱a̱ xó má kaʼyoo. Ragíʼmaa mbuʼyaridáá xtíin rí itháan najmún xa̱bu̱ náa numbaaʼ. Ma̱ngaa ragíʼmaa muʼgíʼ xtíin rí tséʼgui̱i̱ kayuʼ nákha xóó tséjkua̱ asamblea o nda̱wa̱á rí ni̱jkua̱lú, ni má índo̱ na̱jkua̱nú náa hotel o na̱jkua̱ʼ. Xúʼko̱ maʼdxulú índo̱ muʼthá rí ni̱ndxu̱lú xa̱bi̱i̱ Jeobá ga̱jma̱a̱ makuwaanʼ xawii mu muʼtáraʼa asndu náa má mbi̱ʼi̱i̱.

9, 10. Xú káʼnii gambáyulú Filipenses 2:4 mu mbuʼyáá xú káʼnii xtíin guʼgíʼ rá.

9 (Atraxnuu Filipenses 2:4). * Náa numuu rí gíʼmaa maxmiéjunʼlú rí xóo eyáá eʼwíínʼ a̱ngiu̱lú xtíin rí nuʼgíʼ rá. Mbá numuu nindxu̱u̱, rí xa̱bi̱i̱ Dios nunimi̱jna̱ wéñuʼ mu munimbánii xtágabu rígi̱: “Guni gámbáa dí na̱nda̱ʼa̱ xuyala dí rígá náa tsu̱du̱u̱ ku̱ba̱ʼ rí mataxuʼdáminaʼ aʼkhá ga̱jma̱ʼ mbáa, dí mitsaga wéñuʼ, dí nagua̱ʼa̱ wéñuʼ mataba̱ʼ ga̱jma̱ʼ mbáa” (Col. 3:2, 5). Tikhun a̱ngiu̱lú nixudami̱jna̱ aʼkhá nákha xóó tsénindxu̱ún xa̱bi̱i̱ Jeobá, ga̱jma̱a̱ mbáa xóó nunimi̱jna̱ munigaʼduunʼ rúʼko̱. Á mu tseñawumíjna̱lu, rí xóo xtíin rí nuʼgíʼ ma̱ndoo maʼniún itháan mingíjyúuʼ munimbánii xtágabu ndrígóo Biblia ga̱jma̱a̱ mbaʼyóoʼ munigaʼduunʼ itháan rí nagua̱ʼa̱ muni (1 Cor. 6:9-11). Lá ragájkhun dí tsíyulú marigá rúʼko̱ ráʼ.

10 Índo̱ kuwáanʼ gajmiúlú a̱ngiu̱lú, nakáwáanʼ náa kuwa xa̱bu̱ bi̱ nuni aʼkhá. Rí muʼgíʼ májánʼ xtíñúlú nambáyulúʼ mu muñewa̱a̱n rúʼko̱, xó má náa Guʼwá nagimbáanʼ o asndu náa má kuwaanʼ. Gajkhun má rí ma̱ndoo muraʼwíí xtíin rí muʼgíʼ. Mú ma̱ngaa kaʼyulú muʼgíʼ xtíin rí mambáñun eʼwíínʼ mundxaʼwamíjna̱, muthi ga̱jma̱a̱ muni rí kaʼwu rí nandoo Dios (1 Ped. 1:15, 16). Sniguʼ rí nindxu̱u̱ gajkhun ‹tséʼni nditháan dí raʼkhí, na̱nguá eyááʼ i̱ndó rí ndayóoʼ ikhaa› (1 Cor. 13:4, 5).

XTÍIN RÍ KAʼYOO MATAʼGÍʼ NÁA NADXUʼ O NÁA XTAA

11, 12. Xú káʼnii gambáyulú Eclesiastés 3:1, 17 mu muʼni rí kaʼyoo rá.

11 Índo̱ guraʼwíí xú káʼnii xtíin gúʼgíʼ, bi̱ ñajunlú xa̱bi̱i̱ Dios nduʼyáá dí “rígá mbóo mbiʼi mu maguma xúgíʼ” (Ecl. 3:1, 17). Rí á mu naʼni mijkha o miguwan, o gu̱nʼ rí kuwáanʼ o i̱ʼwáʼ ma̱ndoo maʼni rí muʼgíʼ xtíin mixtiʼkhu. Mú ikha ndrígóo Jeobá tsixtiʼkhuu (Mal. 3:6).

Mú ikha ndrígóo Jeobá tsixtiʼkhuu

12 Náa xuajen rí naʼni mijkha wéñuʼ naʼni itháan miʼskhaa matraʼwíí xtíin  rí kaʼyoo ga̱jma̱a̱ rí nagui̱i̱. A̱ngiu̱lú nuxna̱a̱ núma̱aʼ numuu rí tseguʼwúnlu xtíin rí xa̱ʼ wéñuʼ o xawaʼ rí nasngájma xúgíʼ xuyulúʼ (Job 31:1). Maski ajndu kuwaanʼ náa playa o náa mbá alberca, xtíin rí najngúlú ga̱jma̱a̱ náa iyaʼ gíʼmaa mani̱ndxu̱u̱ rí kaʼyoo (Prov. 11:2, 20). Mbaʼin xa̱bu̱ náa numbaaʼ naguwu̱nʼ xtíin rí nasngájma xúgíʼ. Mú ikháanʼ gíʼmaa mbuʼyáá rí xtíñúlú mbaʼyamajkuu Jeobá, bi̱ nindxu̱u̱ mbáa Dios kaʼwii.

13. Náa numuu rí gíʼmaa marmáʼáan a̱jkiu̱lú ga̱jma̱a̱ numuu xtágabu rí na̱ʼkha̱ 1 Corintios 10:32, 33 índo̱ nuraʼwíí xtíñúlú rá.

13 Rígá i̱mba̱ ikha rí gíʼdoo numuu rí gíʼmaa muʼnimbánii índo̱ nuraʼwíí xtíin rí muʼgíʼ. Gíʼmaa muñeumíjna̱ mu xúʼni̱ gawíínʼ ku̱ma̱ ndrígu̱ún eʼwíínʼ (atraxnuu 1 Corintios 10:32, 33). * Ikháanʼ kaʼyulú mbuʼyáá rí xuguʼwúnlu xtíin rí maʼni gawúunʼ a̱ngiu̱lú, o bi̱ tseni ñajunʼ Jeobá. Apóstol Pablo niʼnirámáʼ: “Mámbáa rí ikháanʼ gaʼni rí naniguʼ xa̱bu̱ numbaaʼ ga̱jma̱a̱ rí májánʼ, rí mambáyúu ikhaa”. Ga̱jma̱a̱ nda̱wa̱á niʼthí náa numuu: “Numuu rí asndu Cristo táʼni rí naniguuʼ ikhaa” (Rom. 15:2, 3). Jesús ndiʼyoo rí itháan gíʼdoo numuu maʼni rí nandoo Dios ki xóo rí naniguuʼ ikhaa. Xúʼko̱ má gíʼmaa muʼni mangáanʼ. Ikha jngó, nimbá miʼtsú xaguʼwúnlu xtíin rí ikháanʼ enigulúʼ, mú maʼni rí xa̱bu̱ xúdxawíín ajngáa rí na̱jkua̱ kuʼyúlú.

14. Xú káʼnii gándoo gusngún e̱jñún mu mbuyamajkuíí Dios ga̱jma̱a̱ xtíin rí gúgíʼ xá.

14 Xa̱bu̱ bi̱ guáʼdiin e̱ji̱n kaʼñún musngúún e̱jñún munimbánii ikha rí na̱ʼkha̱ náa Biblia. Mú raʼkháa i̱ndó rúʼko̱ ma̱ngaa rí ikhiin gajmiún e̱jñún muguwu̱nʼ xtíin ga̱jma̱a̱ muniratamijná xó má kaʼyoo mu rúʼko̱ maʼni maxtáa gagi Jeobá (Prov. 22:6; 27:11). Xú káʼnii gándoo musngúún e̱jñún mu mbuyamajkuíí Dios ga̱jma̱a̱ xtángoo ndrígóo xá. Rí muxnún mbá xkri̱da májánʼ ga̱jma̱a̱ musngúún náa minaʼ ga̱jma̱a̱ xú káʼnii guxkamaa xtíin májánʼ. Ma̱ngaa gíʼmaa musngúún e̱jñún rí itháan gíʼdoo numuu muraʼwíí mbá xtíin rí mbaʼyamajkuu Jeobá ki xóo xtíin rí nanigu̱nʼ ikhiin.

GAJMULÚ MÁJÁNʼ KU̱MA̱ NDRÍGÚLÚ

15. Ndiéjunʼ gíʼmaa mambáyulúʼ mu muraʼwíí muʼni rí májánʼ rá.

15 Biblia naxná ikha rí ma̱ndoo mambáyulúʼ muraʼwíí muʼni rí májánʼ rí mbaʼyamajkuu Dios. Maski ajndu xúʼko̱, xtíin rí gúʼgíʼ masngájma rí nanigulúʼ. Xtíin rí nanigulúʼ ga̱jma̱a̱ rí gúʼtsi ma̱ndoo mani̱ndxu̱u̱ mixtiʼkhu náa eʼwíínʼ. Mú xtíñúlú gíʼmaa maʼni mikaʼwu má xúʼko̱ ga̱jma̱a̱ májánʼ, ma̱ngaa rí kaʼyoo náa na̱jkua̱ ga̱jma̱a̱ náa xuajen rí kuwaanʼ.

16. Ndíjkha rí gíʼdoo numuu muʼnimi̱jna̱ mu muguʼwúnlu mbá xtíin májánʼ rá.

16 Mingíjyúuʼ mataxkamaa mbá xtíin rí kaʼyoo ga̱jma̱a̱ májánʼ. Náa mbaʼa tienda i̱ndó nugujua̱ xtíin dí rígá náa moda. Ikha jngó mbáa mbaʼyóoʼ mbiʼi  mu mataxkamaa mbá gajnúu, blusa ga̱jma̱a̱ vestido rí kaʼyoo, o mu mataxkamaa traje ga̱jma̱a̱ jmuu rí na̱nguá xa̱ʼ wéñuʼ. Mú tsiakii rí gátani magiʼdoo numuu. Ndíjkha rá. Timbá, numuu rí a̱ngiu̱lú mbuyáá ga̱jma̱a̱ muxna̱a̱ núma̱aʼ rí nuʼnimi̱jna̱ muʼgíʼ xtíin mitsaan ga̱jma̱a̱ rí májánʼ. Raga̱jma̱, numuu rí mbuʼyamajkuíí Anu̱lú Mekhuíí. Maʼdxulú itháan rí mbuʼyamajkuíí Jeobá ki xóo tsiakii rí gúʼni mu muʼgíʼ mbá xtíin májánʼ.

17. Ndiéjunʼ nindxu̱u̱ tikhuu rí gíʼmaa mbaʼyoo mbáa ndxájulú á mu nandxa̱ʼwáminaʼ maniñuʼ mbaʼya stawunʼ rá.

17 Lá májánʼ rí a̱ngiu̱lú muniñaʼ mbaʼya stawún ráʼ. Náa xtángoo ndrígóo Moisés ninda̱ʼa̱ rí xa̱bekha muniñaʼ mbaʼya stawúnʼ. Mú bi̱ ni̱ndxu̱lú cristianos na̱nguá kaʼyulú muʼnimbánii Xtángoo rúʼko̱ (Lev. 19:27; 21:5; Gál. 3:24, 25). Náa tikhuu xuajen nakujmaa májánʼ ga̱jma̱a̱ nda̱a̱ rí ethi á mu stawúnʼ nijui̱ʼda̱ májánʼ, ga̱jma̱a̱ rúʼko̱ xáʼniún tsiánguá bi̱ nudxawíín ajngáa rí na̱jkua̱ kuʼyúlú. Náa i̱ʼwáʼ xuajen tikhun a̱ngiu̱lú bi̱ kuya̱ edxu̱u̱ guáʼdáá stawúnʼ. Maski ajndu xúʼko̱, ikhí, tikhun a̱ngiu̱lú tsíñún guniñaʼ mbaʼya stawúnʼ (1 Cor. 8:9, 13; 10:32). Náa i̱ʼwáʼ xuajen, xa̱bekha na̱nguá eniñaʼ mbaʼya stawúnʼ, ga̱jma̱a̱ tsékujmaa májánʼ rí bi̱ kuya̱ edxu̱u̱ maguaʼdáá stawúnʼ. Á mu ikhí mbáa ndxájulú naniñuʼ mbaʼya stawunʼ, mbáa na̱nguá xtáa raʼyamajkuu Dios ga̱jma̱a̱ rí na̱nguá nindxu̱u̱ “xa̱bu̱ májánʼ” (1 Tim. 3:2, 7; Rom. 15:1-3).

18, 19. Xú káʼnii embáyulú Miqueas 6:8 rá.

18 Ra̱ʼkhá tháán exnáa núma̱aʼ Jeobá rí tséxnulu mbá lista mba̱a̱ ga̱jma̱a̱ numuu xtíin rí muʼgíʼ o muʼniratamijná. Ikhaa naniñuʼ muraʼwíí rí muʼni xó má ikha rí na̱ʼkha̱ náa Biblia. Ikha jngó asndu índo̱ nuraʼwíí xtíin rí muʼgíʼ ga̱jma̱a̱ muʼniratamijná, ma̱ndoo musngajmá rí nandulúʼ manindxu̱lúʼ xa̱bu̱ guabaaʼ índo̱ kuwáanʼ ru̱ʼni̱ ñajunʼ Dios, xó má eʼthí Miqueas 6:8.

19 Gíʼmaa manindxu̱lúʼ xa̱bu̱ guabaaʼ ga̱jma̱a̱ mbuʼyáá rí Jeobá nindxu̱u̱ kaʼwii, ga̱jma̱a̱ rí xtángoo ndrígóo naxnúlú májánʼ ikha. Á mu nandulúʼ manindxu̱lúʼ xa̱bu̱ guabaaʼ muʼnimbánii rígi̱ náa vida ndrígúlú. Ma̱ngaa, rí manindxu̱lúʼ xa̱bu̱ guabaaʼ maʼni rí mbuʼyamajkuíí rí nakumu̱ún ma̱ngaa rí nuthi eʼwíínʼ xa̱bu̱.

20. Xú káʼnii gíʼmaa maʼniún eʼwíínʼ xtíin rí nuʼgíʼ ga̱jma̱a̱ xóo eʼni ratamijná rá.

20 Xtíñúlú gíʼmaa masngájma kaʼwu rí ni̱ndxu̱lú xa̱bi̱i̱ Jeobá. Xtángoo ndrígóo Dios itháan gíʼdoo numuu ga̱jma̱a̱ nadxulú rí nuʼnimbánii. Ma̱ndoo muʼthúún xúgínʼ a̱ngiu̱lú rí májánʼ xtíin e̱gi̱ʼ ga̱jma̱a̱ nuni rí májánʼ. Ikhiin naguwaʼ kudiin xa̱bu̱ bi̱ gajkhun nandún majmañún ga̱jma̱a̱ numuu ajngáa rí ma̱ndoo maʼni káwíin, rí naʼthí náa Biblia ga̱jma̱a̱ nduyamajkuíí ma̱ngaa nuni rí maʼdxuu Jeobá. Á mu nuraʼwíí muʼni rí májánʼ ga̱jma̱a̱ numuu xtíin rí muʼgíʼ, muxnáá má xúʼko̱ gamajkhu Dios bi̱ nagíʼ “xtíin rí kaʼyoo ga̱jma̱a̱ rí naxpíbiʼ” (Sal. 104:1, 2).

^ párr. 3 Deuteronomio 22:5: “Mbáa a̱ʼgu̱ ragíʼmaa magíʼ xtíñuu mbáa xa̱biya̱, ní má xa̱biya̱ ragíʼmaa magíʼ xtíñuu mbáa a̱ʼgu̱. Asndu tsáa bi̱ gáʼni rígi̱, phú xkawiiʼ eʼyoo Jeobá Dios ndrígáʼ”.

^ párr. 5 2 Corintios 6:4: “Náa xúgíʼ dí nunixu, nusngajmá dí ñajunxu xa̱bi̱i̱ Dios, numuu rí nuraʼnííxu xúgíʼ, xó má gamiéjunʼ, dí ndayúxuʼ, xkujndu”.

^ párr. 8 1 Corintios 10:31: “Tséʼniuu á mu kuwáanʼ ruphiʼtsu, o nawa̱a̱nla, o rígá i̱mba̱ rí kuwáanʼ runi, guni xúgíʼ rígi̱ mu maʼga̱ gamajkhu náa Dios”.

^ párr. 9 Filipenses 2:4: “Xaxmiéjuanla kuyamíjna̱ i̱ndó ga̱jma̱a̱ numala ikháanʼ, ma̱ngaa gíʼmaa maxmiéjuanla kuñu̱u̱n eʼwíínʼ”.

^ párr. 13 1 Corintios 10:32, 33: “Xúni̱ dí eʼwíínʼ majngrádiinʼ xó má bi̱ judíos, bi̱ griegos ga̱jma̱a̱ bi̱ kúwi̱i̱n náa congregación ndrígóo Dios, xó má ikhúúnʼ nani rí nanigu̱nʼ xúgínʼ xa̱bu̱ náa xúgíʼ, tséyááʼ rí mambáyuʼ ikhúúnʼ, nani rí mambáñun mbaʼin mu ma̱ndoo makáwíin”.