Atambaʼtaa mu matraxnuu

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

Atraʼwíí ajngáa me̱ʼpha̱a̱

“Ajngá rawunʼ Dios ndaʼya”.

Graxe̱ rí nuni bi̱ nuraxnuu

Graxe̱ rí nuni bi̱ nuraxnuu

Ndiéjunʼ eyoo gáʼthúu̱n Hebreos 4:12 índo̱ naʼthí rí “ajngá rawunʼ Dios ndaʼya, ga̱jma̱a̱ gíʼdoo tsiakii” rá.

Rí na̱ʼkha̱ raʼthí ginii ga̱jma̱a̱ rí naʼthí nda̱wa̱á nambáyulúʼ makru̱ʼu̱lú rí “ajngá rawunʼ Dios” rí niʼthí Pablo nindxu̱u̱ rí niʼthí Dios ga̱jma̱a̱ numuu rí nagíʼ maʼni, xó má eʼthí náa Biblia.

Náa i̱yu̱lúʼ, mbaʼa nuthu najmulú Hebreos 4:12 mu muʼsngáa rí Biblia gíʼdoo tsiakii mu mariʼkhuu vida ndrígu̱ún xa̱bu̱. Ga̱jma̱a̱ rúʼko̱ nindxu̱u̱ gajkhun. Mú ma̱ngaa májánʼ makru̱ʼu̱lú ndiéjunʼ xtáa raʼthí Pablo índo̱ niʼnirámáʼ versículo rígi̱. Ikhaa xtáa raxnún tsiakii a̱ngiu̱lú hebreos mu muyambáá náa rí nagíʼ maʼni Dios. Náa Escrituras najuiʼthá mbaʼa enii ga̱jma̱a̱ numuu rígi̱. Ikhú Pablo nijmuu xkri̱da ndrígu̱ún israelitas rí Dios niʼni káwíin náa Egipto. Ikhiin ma̱ndoo matu̱ʼu̱u̱n náa “ku̱ba̱ʼ rí naxná leche ga̱jma̱a̱ yááʼ”, rí Dios nikudaminaʼ maxnún. Ikhí ma̱ndoo mbu̱ya̱a̱ xúnʼ (Éx. 3:8; Deut. 12:9, 10).

Rúʼko̱ rí nindoo Dios. Mú israelitas tusngajma fe náa Jeobá ga̱jma̱a̱ túnimbu̱ún, ikha jngó mbaʼin rí ikhiin tátu̱ʼu̱u̱n náa rí ndayáa xu̱ʼ Dios (Núm. 14:30; Jos. 14:6-10). Maski ajndu xúʼko̱, Pablo niʼthí rí xóó rígá rí nijuiʼthúlú mu “matu̱ʼu̱lú náa rí ndayáa xu̱ʼ” Dios (Heb. 3:16-19; 4:1). Nakujmaa kaʼwu rí ‹nakudaminaʼ› nindxu̱u̱ mbá lájuíin rí Dios nisngajma ga̱jma̱a̱ numuu rí nagíʼ maʼni. Xó má cristianos hebreos, mangáanʼ ma̱ndoo muraxnuu ga̱jma̱a̱ numuu rí nagíʼ maʼni Dios ma̱ngaa rí muñajunʼ gajmiúlú. Mu masngájma Pablo rí na̱ʼkha̱ náa Escrituras rí ekudaminaʼ maʼni Dios, nijmuu rí naʼthí náa Génesis 2:2 ga̱jma̱a̱ Salmo 95:11.

INadxulú mbuʼyáá dí rígá xóó rí “nijuiʼthúlú matu̱ʼu̱lú náa rí ndayáa xu̱ʼ” Dios. Gakumulú gajkhun rí ma̱ndoo matu̱ʼu̱lú náa rí ndayáa xu̱ʼ Dios, xó má eʼthí náa Biblia. Ikha jngó nuʼni xóo eʼngulú mu matu̱ʼu̱lú ikhí. Xú káʼnii eʼni rá. Tséʼgíʼ muʼnimbaníí xtángoo ndrígóo Moisés ni má muʼni rí májánʼ i̱ndó numuu rí Dios manigu̱ʼ. Rí phú nuʼni, nuyambáá jma̱a̱ gagi rí maʼni Dios nda̱wa̱á ga̱jma̱a̱ xóó muyambáá numuu rí kuaʼdáá fe náa ikhaa. Mbaʼin xa̱bu̱ náa xúgíʼ numbaaʼ nigi̱ʼdi̱i̱ runigajmaa Biblia ma̱ngaa najmañún rí Dios nisngájma ga̱jma̱a̱ numuu rí nagíʼ maʼni. Rígi̱ naxnún tsiakii mbaʼin rí ikhiin mu muriʼkhumijná xóo kuwa, musngajma fe ga̱jma̱a̱ majngún iyááʼ. Xúgíʼ rígi̱ nasngájma kaʼwu rí “ajngá rawunʼ Dios ndaʼya, ga̱jma̱a̱ gíʼdoo tsiakii”. Rí Dios nisngájma náa Biblia numuu rí nagíʼ maʼni niyambáá náa vida ndrígúlú ga̱jma̱a̱ xóó mambáyulú.