Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Octubre tsiguʼ 2016

Gusngajmá fe náa rí nikudaminaʼ maʼni Jeobá

Gusngajmá fe náa rí nikudaminaʼ maʼni Jeobá

“Fe nindxu̱u̱ [...] rí gajkhun rígá ma̱ngaa nduʼyáá ndiéjunʼ nindxu̱u̱ maski ajndu tsékujmaa” (HEBREOS 11:1).

AJMÚÚ 54 GA̱JMA̱A̱ 125

1. Xú káʼnii gíʼmaa makumulúʼ rí kuaʼdáá fe rá.

RAʼKHÁA xúgínʼ xa̱bu̱ numbaaʼ guáʼdáá fe (2 Tes. 3:2). Mú Jeobá naxnún fe xúgínʼ bi̱ nduyamajkuíí (Rom. 12:3; Gál. 5:22). Gíʼmaa muxnáa núma̱aʼ Jeobá numuu rí naxnúlú fe.

2, 3. a) Xú káʼnii eguma tsajkurámáánʼ numuu rí kuaʼdáá fe rá. b) Xú káʼnii graxe̱ guriʼña̱a̱ rá.

2 Jeobá nixnáa A̱ʼdióo bi̱ nandoo kaʼyoo wéñuʼ mu xúgínʼ bi̱ gaguaʼdáá fe náa ikhaa ma̱ndoo maguma mba̱a̱ a̱jkiu̱ún kuñún. Á mu kuaʼdáá fe náa Jesús ma̱ndoo mambaxúlúʼ gajmiúlú Jeobá ga̱jma̱a̱ makuwáanʼ kámuu mbiʼi (Juan 6:44, 65; Rom. 6:23). Jeobá nindxu̱u̱ májáánʼ wéñuʼ náa ikháanʼ. Maski ajndu ni̱ndxu̱lú xa̱bu̱ aʼkhá ga̱jma̱a̱ kaʼyoo makhañúlúʼ, mú ndiʼyoo rí ma̱ndoo muʼni rí májánʼ (Sal. 103:10). Ikha jngó niʼsngúlúʼ ga̱jma̱a̱ numuu Jesús ma̱ngaa rí nixnáximinaʼ. Índo̱ niguáʼdáá fe náa Jesús ga̱jma̱a̱ nini̱ndxu̱lú xa̱bi̱i̱, nigíʼdi̱i̱ nikumulú rí makuwáanʼ kámuu mbiʼi (atraxnuu 1 Juan 4:9, 10). *

 3 Mú ndiéjunʼ gándoo gajmañulú itháan numuu fe rá. Á mu nandulúʼ muguaʼdáá fe, lá i̱ndó ndayóoʼ mbuʼyáá rí Dios niʼni ga̱jma̱a̱ numulúʼ ga̱jma̱a̱ rí gáʼni nda̱wa̱á ráʼ. Gíʼmaa muʼni itháan. Guʼyáá ndiéjunʼ.

GUSNGAJMÁ FE RÍ KUAʼDÁÁ NÁA A̱JKIU̱LÚ

4. Ndiéjunʼ gáʼndulúʼ muʼni á mu kuaʼdáá fe rá.

4 Á mu kuaʼdáá fe náa Jeobá ga̱jma̱a̱ náa Jesús, raʼkháa i̱ndó maʼndulú mbuʼyáá rí nini ga̱jma̱a̱ rí muni ga̱jma̱a̱ numulúʼ. Maʼndulú makuwáanʼ xó má nisngulu ga̱jma̱a̱ mumbañún eʼwíínʼ xa̱bu̱ mu muniʼniiʼ. Apóstol Pablo niʼthí: “Numuu rí á mu naratá pa̱jnu̱ ajngáa rúʼko̱ náa rawanʼ, rí Jesús nindxu̱u̱ Señor, ga̱jma̱a̱ náa a̱jkia̱nʼ naraʼdáá fe rí Dios nikuxi̱i̱ náa wa̱jinʼ, makríñanʼ. Numuu rí náa a̱jkiu̱lú nandoo nuguaʼdáá fe mu muʼni rí jmbu, ga̱jma̱a̱ rí nuʼthá nusngajmá rí nandulúʼ makáwíin eʼwíínʼ” (Rom. 10:9, 10; 2 Cor. 4:13).

5. a) Ndíjkha gíʼdoo wéñuʼ numuu fe rá. b) Arathá ga̱jma̱a̱ mbá xkri̱da rí gíʼmaa muʼni mu muguaʼdáá mbá fe gujkhuʼ.

5 Á mu nandulúʼ makuwáanʼ kámuu mbiʼi náa numbaaʼ nuxi̱ʼ ndrígóo Dios, gíʼmaa muguaʼdáá fe ga̱jma̱a̱ xúniʼñáʼ makáguabaʼ. Fe nindxu̱u̱ xóo mbá planta. Mu mbá planta maʼni mitsaan ga̱jma̱a̱ maʼga̱ ra̱ja̱a̱, ndayóoʼ muxtijyáʼ má xúʼko̱. Á mu tséʼni, mujndoʼ ga̱jma̱a̱ makhañúu. Xúʼko̱ má káʼnii, ndayóoʼ mbuʼyáá rí fe maʼni gujkhuʼ má xúʼko̱ ga̱jma̱a̱ maʼga̱ ra̱ja̱a̱ má xúʼko̱ (Tito 2:2; 2 Tes. 1:3; Luc. 22:32; Heb. 3:12).

NDIÉJUNʼ NINDXU̱U̱ FE EʼTHÍ NÁA BIBLIA RÁ.

6. Ndiéjunʼ a̱jma̱ eyoo gáʼthúu̱n fe rí naʼthí náa Hebreos 11:1 rá.

6 Náa Biblia naʼthí a̱jma̱ enii rí nandoo gáʼthúu̱n fe náa Hebreos 11:1 (atraxnuu). * Ginii naʼthí rí fe nindxu̱u̱ “rí nduʼyáá rí marigá ga̱jma̱a̱ kuwaanʼ raguáʼthi̱i̱n”. Rí kuáʼti̱i̱n ma̱ngaa nandoo gáʼthúu̱n rí nakudaminaʼ maʼni Dios nda̱wa̱á. Mbá xkri̱da, nduʼyáá májánʼ rí xúgíʼ dí ra̱májánʼ ní xárígá ga̱jma̱a̱ rí marigá mbá nuxi̱ʼ numbaaʼ. Raga̱jma̱, náa Biblia naʼthí rí fe nindxu̱u̱ “rí gajkhun rígá ma̱ngaa nduʼyáá ndiéjunʼ nindxu̱u̱ maski ajndu tsékujmaa”. Tikhu nindxu̱u̱ gajkhun mu tséʼyáá xóo Jeobá, Jesucristo, ángeles ga̱jma̱a̱ Reino dí rígá mekhuíí (Heb. 11:3). Xú káʼnii esngajmá rí kuaʼdáá fe gajkhun náa rí nikudaminaʼ maʼni Dios ga̱jma̱a̱ rí tséʼyáá rá. Musngajmá rí xóo gakuwáanʼ ga̱jma̱a̱ rí nuʼthá ga̱jma̱a̱ rí nuʼni.

7. Xú káʼnii embáyulú xkri̱da ndrígóo Noé mu makru̱ʼu̱lú rí eyoo gáʼthi muguaʼdáá fe rá. (Atayáá timbá xtiʼkhu.)

7 Xkridoo Noé nambáyulúʼ makru̱ʼu̱lú ndiéjunʼ eyoo gáʼthúu̱n rí maraʼdáá fe. Apóstol Pablo niʼthí rí Noé nigruigú “rí niʼthúu̱n Dios rí xóó tsékujmaa”, xóo muʼthá, nindxu̱u̱ rí xóó tseʼyoo. Numuu rí Noé nindoo maʼni rí nandoo Dios, “niʼni mbá arca mu makáwíin bi̱ kuwa náa goʼwóo” (Heb. 11:7). Noé nigiʼdoo fe náa rí niʼthí Jeobá, ikha jngó niʼni mbá arca mba̱a̱. Mbáa xa̱bu̱ bi̱ kuwa mijngii niraxi̱i̱ náa numuu eʼni arca. Nduʼyáá májánʼ rí Noé tarugoo rawunʼ, numuu rí náa Biblia naʼthí rí ikhaa “niʼtáraʼa rí jmbu” (2 Ped. 2:5). Ikhaa niʼthún xa̱bu̱ rí Dios ma̱ʼkha̱ kayóo mbá ruʼwa mbiiʼ mu maʼni gámbáa dí ra̱májánʼ. Mbáa ikhaa niʼthún rí Jeobá niʼthúu̱n ikhaa: “Nitha rí maʼgíiʼ mani gámbíin xúgínʼ xa̱bu̱, numuu rí náa ku̱ba̱ʼ ndijoo rí tséjmaa”. Jeobá ma̱ngaa  niʼthúu̱n Noé: “Mani maxnúu mbá ruʼwambiiʼ náa tsu̱du̱u̱ ku̱ba̱ʼ mu mani gámbáa xúgíʼ rí ndaʼya bi̱ gíʼdoo siakii rí naʼni maxtáa xa̱bu̱ ga̱jma̱a̱ xujkhúʼ bi̱ kuwa náa agoo mekhu. Xúgíʼ dí rígá náa tsu̱du̱u̱ ku̱ba̱ʼ mambáa”. Nda̱wa̱á, Noé ndiyóoʼ maʼthúún xa̱bu̱ rí gíʼmaa muni mu makáwíin. Jeobá niʼthúu̱n: ‹Gíʼmaa mata̱ʼa̱ʼ náa arca› (Gén. 6:13, 17, 18).

8. Ndiéjunʼ niʼthí Santiago ga̱jma̱a̱ numuu fe rá.

8 Discípulo Santiago ma̱ngaa niʼnirámáʼ ga̱jma̱a̱ numuu fe. Mbáa niʼni nda̱wa̱á rí Pablo niʼnirámáʼ carta náa inún cristianos hebreos. Santiago niʼthí: “Atasngájmuʼ fe ndrígáʼ raʼkháa rí natani, ga̱jma̱a̱ ikhúúnʼ gasngajmá rí gúʼdoo fe ga̱jma̱a̱ xúgíʼ rí nani” (Sant. 2:18). Ikhaa niʼthí rí á mu nandulúʼ muguaʼdáá fe raʼkháa i̱ndó gíʼmaa makumulúʼ kuʼyáá Dios. Xa̱bu̱ wéñiʼ nakumu̱ún rí Dios xtáa mú na̱nguá guáʼdáá fe náa ikhaa. Tsíñún gúyáá nditháan (Sant. 2:19, 20). Xa̱bu̱ bi̱ gíʼdoo fe nandoo maʼni rí naniguʼ Dios índo̱ naʼni rí májánʼ. Rúʼko̱ rí niʼni Abrahán. Santiago niʼnirámáʼ: “Lá raʼkháa ndiyáá rí anu̱lú Abrahán ninindxu̱u̱ jmbii ga̱jma̱a̱ rí niʼni nda̱wa̱á rí nixnáxi̱i̱ a̱ʼdióo Isaac náa altar ráʼ. Natayáá rí fe ndrígóo nisngájma ga̱jma̱a̱ rí niʼni, ga̱jma̱a̱ rí niʼni fe ndrígóo ninindxu̱u̱ itháan májánʼ”. Nda̱wa̱á, Santiago niʼthí rí fe ragíʼdoo numuu á mu tsesngajmá ga̱jma̱a̱ rí nuʼni. Niʼthí: “Xó má xuwiʼ dí nda̱a̱ espíritu na̱nguá gíʼdoo numuu xúʼko̱ má ma̱ngaa bi̱ gíʼdoo fe mú tseʼnimbanu na̱nguá gíʼdoo numuu” (Sant. 2:21-23, 26).

9, 10. Ndiéjunʼ gíʼmaa muʼni á mu nandulúʼ muguaʼdáá fe náa A̱ʼdióo xá.

9 Itháan rí 30 tsiguʼ nda̱wa̱á rí Santiago niʼnirámáʼ ga̱jma̱a̱ numuu fe, Juan niʼnirámáʼ náa Evangelio ndrígóo ga̱jma̱a̱ náa ajtsú carta. Xó má eʼwíínʼ bi̱ niniraʼmáʼ Biblia, Juan nikro̱ʼo̱o̱ rí nindxu̱u̱ fe. Ikhaa nijmuu mbaʼa nuthu ajngáa griego rí náa xtílóo najuiʼtájuíi xóo “bi̱ gíʼdoo fe”.

Muguaʼdáá fe náa A̱ʼdióo índo̱ guʼnimbulúʼ xtángoo ndrígóo

10 Mbá xkri̱da, Juan niʼthí: “Bi̱ gíʼdoo fe náa A̱ʼdióo maxtáa kámuu mbiʼi; bi̱ tséʼnimbo̱o̱ náa A̱ʼdióo xáxtáa, marigá sia̱nʼ ndrígóo Dios náa ikhaa” (Juan 3:36). Mu maraʼdáá fe náa A̱ʼdióo, ndayóoʼ muʼnimbulúʼ xtángoo ndrígóo (atayáá kúgumaʼá “Ndiéjunʼ eyoo gáʼthúu̱n”). Índo̱ nuraxnuu xúgíʼ rí niʼnirámáʼ Juan, nduʼyáá rí Jesús niʼsngáa má xúʼko̱ rí á mu nandulúʼ makuwáanʼ kámuu mbiʼi ndayóoʼ muguaʼdáá fe náa ikhaa ma̱ngaa náa Anu̱u̱ (Juan 3:16; 6:29, 40; 11:25, 26; 14:1, 12).

11. Xú káʼnii esngajmá rí nuxnáa núma̱aʼ Jeobá numuu rí naʼsngúlú rí gajkhun rá.

11 Jeobá nijmuu xi̱ʼ kaʼwu ndrígóo mu mambáñun makru̱ʼu̱u̱n rí gajkhun ga̱jma̱a̱ numuu ikhaa ma̱ngaa náa A̱ʼdióo, ga̱jma̱a̱ mu mambáyulúʼ muguaʼdáá fe náa ikhiin (atraxnuu Lucas 10:21). Xú káʼnii esngájma rí nuxnáa núma̱aʼ rí Jeobá niʼni rá. Rí muxnáa núma̱aʼ má xúʼko̱ numuu rí naniñulú mambáxulúʼ gajmiúlú ga̱jma̱a̱ numuu Jesús, bi̱ “Kayá edxu̱u̱ bi̱ Naʼni̱i̱ májáánʼ fe ndrígúlú” (Heb. 12:2). Ma̱ngaa ndayóoʼ muʼni itháan gujkhuʼ fe ndrígúlú. Xú káʼnii rá. Rí muʼtájkáan ga̱jma̱a̱ muʼnigajmaa Biblia má xúʼko̱ (Efes. 6:18; 1 Ped. 2:2).

Mámbá rí gándoo, gusngajmá rí kuaʼdáá fe índo̱ nuʼthúún eʼwíínʼ ga̱jma̱a̱ numuu Reino. (Atayáá kutriga̱ 12.)

12. Ndiéjunʼ gúʼni á mu kuaʼdáá fe rá.

12 Á mu kuaʼdáá mbá fe gujkhuʼ náa rí  nikudaminaʼ Jeobá, musngajmá ga̱jma̱a̱ rí nuʼni. Mbá xkri̱da, nuʼthúún má xúʼko̱ xa̱bu̱ ga̱jma̱a̱ numuu Reino ndrígóo Dios ma̱ngaa mumbañún xa̱bu̱ mbuyaridáá má xúʼko̱ Jesús. Ma̱ngaa, “guʼniu̱u̱n rí májánʼ xúgínʼ, mú itháan náa bi̱ guáʼdáá ikháá má fe xóo ikháanʼ” (Gál. 6:10). Ga̱jma̱a̱ muʼni tsiakimijna mu murígúu ‹rí xú káʼnii ni̱ndxu̱lú ga̱jma̱a̱ rí nuʼni nákha ginii› numuu rí tsíyulú muʼni nditháan rí maʼni gachúu rí nambáxulúʼ gajmiúlú Jeobá (Col. 3:5, 8-10).

FE RÍ KUAʼDÁÁ NÁA DIOS NINDXU̱U̱ RÍ NAKU̱MU̱U̱ GINII

13. a) Ndíjkha gíʼdoo numuu muguaʼdáá fe náa Dios rá. b) Ndiéjunʼ eʼthí náa Biblia ga̱jma̱a̱ numuu fe, ga̱jma̱a̱ náa numuu rá.

13 Náa Biblia naʼthí rí na̱nguá xóo muʼni rí naniguʼ Dios á mu nda̱a̱ fe, “numuu rí bi̱ nakuʼmaminaʼ náa Dios, gíʼmaa maʼnimbo̱o̱ rí ikhaa xtáa ga̱jma̱a̱ rí ikhaa naʼni tsajkurámiinʼ bi̱ nduyáaʼ má xúʼko̱” (Heb. 11:6). Náa Biblia ma̱ngaa naʼthí rí fe náa Dios nindxu̱u̱ rí “naku̱mu̱u̱ ginii”. Náa numuu rá. Numuu rí fe náa Dios nindxu̱u̱ timbá rí gíʼmaa magiʼdoo mbáa cristiano gajkhun (Heb. 6:1). Mú ma̱ngaa ndayóoʼ muguaʼdáá i̱ʼwáʼ rí gíʼdoo numuu rí mambáyulúʼ mambáxulúʼ má xúʼko̱ gajmiúlú Dios (atraxnuu 2 Pedro 1:5-7; * Jud. 20, 21).

14, 15. Ndíjkha rí gíʼdoo itháan numuu maʼndulú kuʼyamíjna̱ ki xóo muguaʼdáá fe rá.

14 Bi̱ niniraʼmáʼ Biblia nithi itháan numuu fe ki xóo i̱ʼwáʼ. Lá nandoo gáʼthúu̱n rí fe itháan gíʼdoo numuu ráʼ. Guʼyáá.

15 Pablo niʼthí ga̱jma̱a̱ numuu fe ma̱ngaa numuu rí maʼndulú kuʼyamijná. Ikhaa niʼthí: “Á mu gúʼdoo xúgíʼ fe mu mani maʼga̱ i̱mba̱ níʼkhá kúbá, mú á mu na̱nguá eyoʼ ka̱ñu̱u̱n eʼwíínʼ, nda̱a̱ rí ni̱ndxu̱ʼ” (1 Cor. 13:2). Ga̱jma̱a̱ Jesús niʼthí rí maʼnda̱ʼ xtayáá Dios nindxu̱u̱ “rí itháan mba̱a̱ ga̱jma̱a̱ timbá kiʼtáñajunʼ” (Mat. 22:35-40). Rí maʼndulú kuʼyamijná mambáyulúʼ muʼni rí naniguʼ Dios. Mbá xkri̱da, náa Biblia naʼthí rí á mu nandulúʼ kuʼñúún eʼwíínʼ maʼni rí maʼngulú xúgíʼ. Ikha jngó rí maʼndulú kuʼyamíjna̱ nambáyulúʼ muʼnimbulúʼ o muguaʼdáá fe náa xúgíʼ rí naʼthúlúʼ Dios náa Biblia (1 Cor. 13:4, 7).

16, 17. a) Xú káʼnii esngájma náa Biblia rí fe ga̱jma̱a̱ rí maʼndulú kuʼyamijná gíʼdoo wéñuʼ numuu rá. b) Ndiéjunʼ rí gíʼdoo itháan numuu, ga̱jma̱a̱ náa numuu rá.

 16 Náa Biblia nasngájma rí fe ga̱jma̱a̱ rí nandulúʼ kuʼyamíjna̱ gíʼdoo wéñuʼ numuu. Ikha jngó mbaʼa nuthu bi̱ niniraʼmáʼ Biblia nuthi mbóó ga̱jma̱a̱ numuu rígi̱. Mbá xkri̱da, Pablo niʼthún cristianos mugíʼ “coraza rí nindxu̱u̱ fe ga̱jma̱a̱ rí nandulúʼ kuʼyamíjna̱” (1 Tes. 5:8). Pedro niʼthí rígi̱ ga̱jma̱a̱ numuu Jesús: “Maski ajndu túya̱a̱ nimbá miʼtsú, nandala ku̱ya̱a̱. Maski ajndu xúgi̱ tséya̱a̱la, mu kuaʼdáá fe náa ikhaa” (1 Ped. 1:8). Santiago niʼthún a̱ngiu̱lú bi̱ kaxtaʼwíin: “Dios niraʼwíin xa̱bu̱ bi̱ nakujmiin gíníi náa numbaaʼ mu mani̱ndxu̱ún bi̱ guáʼdáá wéñuʼ fe ga̱jma̱a̱ makhánun Reino, rí nikudaminaʼ maxnún bi̱ nandún kuyáá” (Sant. 2:5). Ga̱jma̱a̱ Juan niʼthí rí Dios naʼtáñajunlú “rí muguaʼdáá fe náa mbiʼyuu A̱ʼdióo Jesucristo ga̱jma̱a̱ rí maʼndulú kuʼyamíjna̱” (1 Juan 3:23).

17 Mú ma̱ngaa Pablo niʼthí rí mbiʼi rí kuwáanʼ “rígá fe, rí muguaʼthi̱i̱n, rí maʼndulú kuʼyamijná, nájtsu rígi̱; mú rí itháan mba̱a̱ nindxu̱u̱ rí maʼndulú kuʼyamijná” (1 Cor. 13:13). Náa numuu rí Pablo niʼthí rí maʼndulú kuʼyamíjna̱ gíʼdoo itháan numuu ki xóo nájtsu rígi̱ rá. Numuu rí nda̱wa̱á ní xáʼyóoʼ muguaʼdáá fe náa rí nikudaminaʼ Dios ga̱jma̱a̱ numuu numbaaʼ nuxi̱ʼ. Makuwáanʼ májánʼ wéñuʼ xó má eʼthí náa Biblia. Mú ndayóoʼ maʼndulú kuʼyáá Dios má xúʼko̱ gajmiúlú xa̱bu̱. Maʼndulú kuʼñúún itháan.

JEOBÁ NIʼNI TSAJKURÁMÁÁʼ FE NDRÍGÓO XUAJÑUU

18, 19. Ndiéjunʼ erígá numuu rí xa̱bi̱i̱ Dios guáʼdáá fe rí mbiʼi xúgi̱ ga̱jma̱a̱ tsáa gíʼmaa muni mba̱a̱ rá.

18 Xa̱bi̱i̱ Dios rí mbiʼi xúgi̱ nuniñaʼ rí xi̱ʼ kaʼwu maxná ikhúún. Ikha jngó guáʼdáá fe náa Reino ndrígóo Dios ga̱jma̱a̱ numbayíí. Ma̱ngaa nandún kuyamíjna̱ (Gál. 5:22, 23). Rí na̱jkha̱nú narígá, rí náa xúgíʼ numbaaʼ kuwa itháan rí migiñuʼ millón bi̱ kuwa tsímáá ga̱jma̱a̱ kuwa mbá kambáxu̱u̱n náa congregación. Nakujmaa májánʼ rí fe ga̱jma̱a̱ rí nandulúʼ kuʼyamijná gíʼdoo wéñuʼ numuu.

19 Núma̱a̱ Jeobá rí ikhiin nakuwa jnduʼ. Ikhaa kaʼyoo rí muʼni mba̱a̱ ga̱jma̱a̱ numuu rígi̱ (Is. 55:13). Nuxnáa wéñuʼ numa̱a̱ Jeobá numuu ‹rí naʼni káwáanʼ ga̱jma̱a̱ numuu fe› (Efes. 2:8). Jeobá mambáñun má xúʼko̱ itháan xa̱bu̱ mu muguaʼdáá fe náa ikhaa. Ga̱jma̱a̱ mbá mbiʼi náa xúgíʼ tsu̱du̱u̱ Ku̱ba̱ʼ makuwá xa̱bu̱ jmbiin ga̱jma̱a̱ makuwá gagi ruyamajkuíí Jeobá asndu kámuu mbiʼi.

^ párr. 2 1 Juan 4:9, 10: “Ikha jngó rí nandoo kaʼyulúʼ Dios nikujmaa náa ikháanʼ, numuu rí Dios nikuʼmaa bi̱ mbáwíi A̱ʼdióo náa numbaaʼ mu ikháanʼ ma̱ndoo makuwáanʼ ga̱jma̱a̱ numuu ikhaa. Rí nandoo kaʼyulúʼ nandoo gáʼthúu̱n raʼkháa rí ikháanʼ nindulúʼ kuʼyáá Dios, rí ikhaa nindoo kaʼyulúʼ ga̱jma̱a̱ nikuʼmaa A̱ʼdióo xóo mbá tsigijñaʼ ga̱jma̱a̱ numuu aʼkhálú”.

^ párr. 6 Hebreos 11:1: “Fe nindxu̱u̱ rí nduʼyáá rí marigá ga̱jma̱a̱ kuwaanʼ raguáʼthi̱i̱n, rí gajkhun rígá ma̱ngaa nduʼyáá ndiéjunʼ nindxu̱u̱ maski ajndu tsékujmaa”.

^ párr. 13 2 Pedro 1:5-7: “Ikha jngó, gúni mbá tsiakii mba̱a̱ ga̱jma̱a̱ guxna̱a̱ fe ndrígála, rí májánʼ wéñuʼ; rí májánʼ wéñuʼ, ku̱ma̱; rí ku̱ma̱ ndrígála, muxprígumijna; rí muxprígumijna, maʼngala; rí maʼngala, mbuyamajkuíí Dios; rí mbuyamajkuíí Dios, mangajuala ku̱ñu̱u̱n a̱ngia̱la; rí mangajuala ku̱ñu̱u̱n a̱ngia̱la, rí maʼndalá kuyamíjna̱”.