Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Octubre tsiguʼ 2016

Atiewa̱a̱n rí nambáxaʼ ga̱jma̱ʼ Jeobá índo̱ natiambáá náa nuthi i̱mba̱ ajngáa

Atiewa̱a̱n rí nambáxaʼ ga̱jma̱ʼ Jeobá índo̱ natiambáá náa nuthi i̱mba̱ ajngáa

“Náa a̱jkiu̱nʼ niyexíi ajngáaʼ rí gíʼdoo numuu” (SALMO 119:11).

AJMÚÚ 142 GA̱JMA̱A̱ 92

1-3. a) Ndiéjunʼ rí gíʼmaa magiʼdoo itháan numuu náa xa̱bi̱i̱ Dios rá. b) Xú káʼnii gaʼkhu eraʼníí a̱ngiu̱lú bi̱ kuwa rajmañún i̱mba̱ ajngáa rá. c) Xú káʼnii graxe̱ guriʼña̱a̱ náa artículo rígi̱ rá. (Atayáá timbá xtiʼkhu.)

RÍ MBI’I xúgi̱, mbaʼin xa̱bi̱i̱ Jeobá nuyambáá mu mambanúu rí kiʼtáriyaʼ náa Revelación 14:6. Ikhí naʼthí rí ajngá ndrígóo Reino majuiʼtáruʼun xa̱bu̱ “ga̱jma̱a̱ náa xúgíʼ xuajen mba̱ʼu̱, xuajen ma̱jkha̱ʼ ga̱jma̱a̱ náa xúgíʼ ajngáa”. Mbaʼin xa̱bi̱i̱ Jeobá kuwa rajmañún i̱ʼwáʼ ajngáa. Tikhun ni̱ndxu̱ún misioneros o nigún náa i̱ʼwáʼ xuajen náa ndayóoʼ majuiʼtaraʼa itháan. Eʼwíínʼ nigíʼdi̱i̱ nigún náa nagimbáanʼ náa i̱mba̱ ajngáa ikhí má náa xuajñún.

2 Mú rí itháan gíʼmaa magiʼdoo numuu náa xa̱bi̱i̱ Dios nindxu̱u̱ rí muñewa̱a̱n rí nambáxu̱u̱n gajmiún Dios gajmiún bi̱ kuwa náa guʼwún (Mat. 5:3). Mbáa nguáná kuaʼdáá wéñuʼ ñajunʼ rí naʼniulú mingíjyúuʼ muríyaʼ mbiʼi muʼnigajmaa ndajkuáanʼ Biblia. Mú a̱ngiu̱lú bi̱ nuyambáá náa mbá congregación rí nuthi i̱ʼwáʼ ajngáa guáʼdáá i̱ʼwáʼ gaʼkhu.

 3 Ma̱ngaa maski ajndu naʼniún mingíjyúuʼ majmañún i̱ʼwáʼ ajngáa, a̱ngiu̱lú bugi̱ ragíʼmaa mambumún rí munigajmaa nángii e’ni rí mingíjyúuʼ rí na̱ʼkha̱ náa Biblia (1 Cor. 2:10). Ndiéjunʼ rí ma̱ndoo muni cristianos mu munigajmaa rí mingíjyúuʼ rí naʼthí náa Biblia índo̱ rí tsíkru̱ʼu̱u̱n májánʼ rí nuthi náa congregación xá. Náa numuu rí a̱ngiu̱lú bi̱ guáʼdiin e̱ji̱n bi̱ kuwa ruyambáá náa mbá congregación náa nuthi i̱mba̱ ajngáa gíʼmaa mbuyáá rí maʼga̱nú asndu náa a̱jkiu̱ún e̱jñún rí naʼthí náa Biblia rá. Guʼyáá.

MBÁ RÍ MA̱NDOO MAʼNI RÍ NÍ XAMBÁXULÚ MÁJÁNʼ GAJMIÚLÚ JEOBÁ

4. Ndiéjunʼ rí ma̱ndoo maʼni rí ní xambáxulú gajmiúlú Dios rá. Atagíʼ mbá xkri̱da.

4 Rí xákru̱ʼu̱lú rí naʼsngáa náa Biblia náa i̱mba̱ ajngáa ma̱ndoo maʼni rí ní xambáxulú májánʼ gajmiúlú Jeobá. Guʼyáá mbá xkri̱da rí nirígá nákha wajyúúʼ. Índo̱ Nehemías nitanga̱a̱ náa Jerusalén, ndiʼyoo rí tikhun e̱ji̱n bi̱ ni̱ndxu̱ún judíos tsíjmañún muthi ajngáa ndrígu̱ún judíos (atraxnuu Nehemías 13:23, 24). * Ikha jngó, e̱ji̱n bugi̱ tákru̱ʼu̱u̱n Ajngá rawunʼ Dios. Rí nirígá, nánguá nimbáxu̱u̱n májánʼ gajmiún Jeobá (Neh. 8:2, 8).

5, 6. Ndiéjunʼ eyáá bi̱ guáʼdiin e̱jñún bi̱ nuyambáá náa mbá congregación rí nuthi i̱mba̱ ajngáa, ga̱jma̱a̱ xú káʼnii xkujndu eraʼníí xá.

5 Tikhun a̱ngiu̱lú bi̱ guáʼdiin e̱jñún bi̱ nuyambáá náa mbá congregación rí nuthi i̱mba̱ ajngáa ndiyáá rí nánguá embáxu̱u̱n májánʼ gajmiún Jeobá. Ndiéjunʼ niguáʼníí xá. Rí e̱jñún tsíkru̱ʼu̱u̱n májánʼ rí najuiʼthá náa nagimbáanʼ. Ikha jngó, rí najuiʼthá ikhí tséjkha̱nú asndu náa a̱jkiu̱ún ga̱jma̱a̱ tsexkaxi̱i̱n munimbánii. Guʼyáá rí naʼthí Pedro, mbáa bi̱ gíʼdiin e̱ji̱i̱n bi̱ nigún gakuwa náa Sudamérica, Australia: “Índo̱ nuʼtámíjná ga̱jma̱a̱ numuu Dios ndayóoʼ magajnúu asndu náa a̱jkiu̱lú ga̱jma̱a̱ musngajmá” [1] (atayáá nota rí na̱ʼkha̱ náa námbá artículo) (Luc. 24:32).

6 I̱mba̱ xkujndu nindxu̱u̱ índo̱ nuraxnuu náa i̱mba̱ ajngáa, mbáa tsekumulú ikháá má xóo índo̱ nuraxnuu náa ajngúlú. Ma̱ngaa, rí muʼtámíjná náa i̱mba̱ ajngáa nindxu̱u̱ mingíjyúuʼ. Rígi̱ ma̱ndoo maʼni néʼngulú ga̱jma̱a̱ ní xúʼni̱ májánʼ ñajunʼ Jeobá. Ikha jngó, raʼkháa i̱ndó gíʼmaa manigulúʼ muyambáá náa mbá congregación rí nuthi i̱mba̱ ajngáa, gíʼmaa rí muñewa̱a̱n rí nambáxulúʼ gajmiúlú Jeobá (Mat. 4:4).

XA̱BI̱I̱ DIOS BI̱ NIÑEWA̱A̱N RÍ NAMBÁXU̱U̱N GAJMIÚN JEOBÁ

7. Ndiéjunʼ nini bi̱ babilonios mu muni rí Daniel mani̱ndxu̱u̱ xóo ikhiin ga̱jma̱a̱ maʼga̱ náa religión ndrígu̱ún xá.

7 Índo̱ Daniel gajmíi̱n bi̱ nambáxu̱u̱ ni̱jkha̱ kiʼdiin náa Babilonia, xa̱bu̱ babilonios nigíʼ muni rí manindxu̱ún xóo ikhiin ga̱jma̱a̱ magún náa religión ndrígu̱ún. Xú káʼnii nini xá. Nisngúún ajngún ga̱jma̱a̱ nixna mbiʼñún xó má babilonios (Dan. 1:3-7). Mbiʼyuu nuxi̱ʼ Daniel na̱ʼkha̱ náa Bel, dios bi̱ itháan gíʼdoo numuu náa babilonios. Mbáa rey Babilonia nindoo rí Daniel maʼnimbo̱o̱ rí  dios ndrígóo itháan gíʼdoo tsiakii ki xóo Jeobá, Dios ndrígóo Daniel (Dan. 4:8).

Daniel nimbáxu̱u̱ májánʼ ga̱jma̱a̱ Jeobá numuu rí niʼnigajmaa i̱yi̱i̱ʼ mitsúʼkháan náa ajngáa hebreo

8. Ndiéjunʼ niʼni Daniel mu mambáxu̱u̱ itháan májánʼ ga̱jma̱a̱ Jeobá rá.

8 Náa Babilonia, Daniel nixnáá ganitsu miʼtsí rí na̱ʼkhu̱ rey. Mú ikhaa niʼnimbo̱o̱ xtángoo ndrígóo Dios (Dan. 1:8). Daniel nigíʼ mambáxu̱u̱ májánʼ ga̱jma̱a̱ Jeobá maski ajndu xtáa xuajen mitsínguánʼ wéñuʼ. Xú káʼnii niʼni xá. Niʼnigajmaa i̱yi̱i̱ʼ mitsúʼkháan dí rígá náa ajngáa hebreo (Dan. 9:2). Mbá 70 tsiguʼ nda̱wa̱á rí ni̱jkha̱ náa Babilonia, xóó nijmaʼniiʼ Daniel ga̱jma̱a̱ mbiʼyuu hebreo (Dan. 5:13).

9. Xú káʼnii ndiʼyoo Ajngá rawunʼ Dios bi̱ niʼnirámáʼ Salmo 119 rá.

9 Ma̱ngaa kuaʼdáá xkridoo bi̱ niʼnirámáʼ Salmo 119. Ikhaa ndiyóoʼ maʼngo̱o̱ índo̱ nithi dí raʼkhí ga̱jma̱a̱ numuu tikhun bi̱ kuwa náa goʼwóo. Mú ikhaa ndiyááʼ mambáyúu Ajngá rawunʼ Dios, ga̱jma̱a̱ rígi̱ nixnúu tsiakii mu maʼni mixtiʼkuii náa eʼwíínʼ (Sal. 119:23, 61). Ikhaa niniñuʼ maʼga̱nú asndu náa a̱jkiu̱u̱n rí naʼsngáa Dios (atraxnuu Salmo 119:11, 46). *

GUÑEWA̱A̱N RÍ NAMBÁXULÚ GAJMIÚLÚ JEOBÁ

10, 11. a) Ndiéjunʼ gúʼgíʼ muʼni índo̱ nuraxnuu Ajngá rawunʼ Dios rá. b) Xú káʼnii gándoo gúʼni rúʼko̱ rá. Atagíʼ mbá xkri̱da.

10 Maski ajndu kuaʼdáá wéñuʼ ñajunʼ náa congregación ga̱jma̱a̱ náa nuñajunʼ, xúgiáanʼ ndayóoʼ muríyaʼ mbiʼi mu muʼnigajmaa ndajkuáanʼ o bi̱ kuwaanʼ mbá guʼwáanʼ (Efes. 5:15, 16). Índo̱ guʼnigajmaa ragíʼmaa muraxnuu mbaʼa ináa ga̱jma̱a̱ i̱ʼwáʼ i̱yi̱i̱ʼ, o muʼniratáá mbá dí muʼthá náa reunión. Rí nandulúʼ rí Ajngá rawunʼ Dios maʼga̱nú asndu náa a̱jkiu̱lú ga̱jma̱a̱ maʼni itháan gujkhuʼ fe ndrígúlú.

11 Mu muʼnimbánii rí eyulú índo̱ nuʼnigajmaa, gíʼmaa mundxaʼwáá edxu̱lúʼ rí eyúlú raʼkháa i̱ndó rí nda̱ñúnʼ eʼwíínʼ (Filip. 1:9, 10). Náa numuu nuʼthá rígi̱ rá. Numuu rí índo̱ nuʼniratamijná mu muʼtáraʼa, mu̱ʼgua̱ reunión, mbá discurso o mbá demostración, nguáná tsendxaʼwáá edxu̱lúʼ xú kaʼnii gambáyulú dí eraxnuu. Guʼgíʼ xkri̱da ndrígóo bi̱ naʼni mújúnʼ ganitsu. Maski ajndu ikhaa ndayóoʼ mbaʼyoo ginii á mu májánʼ ganitsu, xagiʼmuu ga̱jma̱a̱ i̱ndó rúʼko̱. Mu xáʼniuu nandii, gíʼmaa maʼni mújúnʼ ganitsu rí mambáyúu. Xúʼko̱ má nindxu̱u̱ á mu nandulúʼ mambáxulúʼ májánʼ gajmiúlú Jeobá, gíʼmaa muʼnigajmaa Biblia má xúʼko̱ mu mbuʼyáá rí ndayúlú.

12, 13. Náa numuu rí mbaʼin cristianos nuthi rí májánʼ matanigajmaa Biblia náa ajngáaʼ rá.

12 Mbaʼin cristianos bi̱ nuyambáá náa mbá congregación náa nuthi i̱mba̱ ajngáa nduyáá rí itháan májánʼ á mu naguʼwún nuraxnuu Biblia náa ajngún (Hech. 2:8). Asndu misioneros  naguáʼnu nduyáá dí rígi̱ nambáñun mu makuwá májánʼ náa nuni ñajunʼ Jeobá ga̱jma̱a̱ dí raʼkháa i̱ndó mudxawíín rí nanújngoo náa reunión.

13 Mbáa ndxájulú bi̱ mbiʼyuu Alain xtáa rajmañuu ajngáa persa mbá migiñuʼ tsiguʼ. Ikhaa naʼthí: “Índo̱ nanirataminaʼ rí manújngoo reunión náa ajngáa persa, i̱ndó nandxa̱ʼwa̱mínáʼ náa ajngáa. Numuu rí i̱ndó xtáá najmañuʼ, tséjkha̱nú asndu náa a̱jkiu̱nʼ rí nagúxnuu ga̱jma̱a̱ numuu Dios. Ikha jngó, nanigajmaa Biblia ga̱jma̱a̱ i̱yi̱i̱ʼ i̱ndó náa ajngóʼ”.

GUNI RÍ MAʼGA̱NÚ ASNDU NÁA A̱JKIU̱ÚN E̱JÑA̱LÁ

14. Ndiéjunʼ rí gíʼmaa mbuyáá a̱ngiu̱lú bi̱ guáʼdiin e̱ji̱n, ga̱jma̱a̱ náa numuu rá.

14 A̱ngiu̱lú gíʼmaa mbuyáá á mu e̱jñún nakru̱ʼu̱u̱n ga̱jma̱a̱ nanigunʼ rí gajkhun. Náa numuu rá. Guʼyáá numuu Serge ga̱jma̱a̱ a̱ʼgiu̱u̱, Muriel. Ikhiin nikuwa náa mbá congregación rí nuthi i̱mba̱ ajngáa itháan rí ajtsú tsiguʼ. Ikhiin niguáʼnu ndiyáá rí aʼdiún bi̱ gíʼdoo 17 tsiguʼ nánguá eniguʼ maʼtáraʼa ga̱jma̱a̱ maʼga̱ reunión. Muriel naʼthí: “Tseniguʼ maʼtáraʼa náa i̱mba̱ ajngáa, mú nákha ginii naniguʼ mataráʼa náa ajngáa francés rí phú ajngóoʼ”. Serge naʼthí rí maxtáa náa mbá congregación rí nuthi i̱mba̱ ajngáa niʼni rí a̱ʼdióo ní xáʼni májánʼ ñajunʼ Jeobá. Ikha jngó, nitangi̱i̱n náa congregación rí nikuwa nákha ginii.

Atayáá májánʼ rí maʼga̱nú asndu náa a̱jkiu̱ún e̱jña̱ʼ rí gajkhun dí na̱ʼkha̱ náa Biblia. (Atayáá kutriga̱ 14 ga̱jma̱a̱ 15.)

15. a) Ndiéjunʼ gíʼmaa mbuyáá bi̱ guáʼdiin e̱jñún á mu nundxa̱ʼwa̱míjna̱ muriʼkhuíí congregación rá. b) Xú káʼnii xtágabu exnún Deuteronomio 6:5-7 bi̱ guáʼdiin e̱ji̱n rá.

15 Tikhun a̱ngiu̱lú bi̱ guáʼdiin e̱ji̱n mbáa nundxa̱ʼwa̱míjna̱ matangi̱i̱n náa  congregación náa nuthi ajngáa rí nakru̱ʼu̱u̱n e̱jñún. Ndiéjunʼ gíʼmaa mbuyáá índo̱ guraʼwíí mbá rí muni xá. Timbá, gíʼmaa mbuyáá á mu naguapiin ga̱jma̱a̱ guáʼdáá tsiakii mu musngúún e̱jñún mu maʼndún kuyáá Jeobá ma̱ngaa musngúún i̱mba̱ ajngáa. Raga̱jma̱, gíʼmaa mbuyáá á mu e̱jñún nandún mutaraʼa, magún reunión o muyambáá náa mbá congregación náa nuthi i̱mba̱ ajngáa. Nda̱wa̱á rí ndiyáá rígi̱, mbáa tikhun a̱ngiu̱lú muraʼwíí matangi̱i̱n náa congregación rí nuthi ajngáa rí nakru̱ʼu̱u̱n e̱jñún. Ga̱jma̱a̱ índo̱ e̱jñún gambáxu̱u̱n májánʼ gajmiún Jeobá, ikhú ikhiin ma̱ndoo matangi̱i̱n náa congregación rí nuthi i̱mba̱ ajngáa (atraxnuu Deuteronomio 6:5-7). *

16, 17. Ndiéjunʼ rí nuni tikhun a̱ngiu̱lú mu musngúún e̱jñún numuu Jeobá rá.

16 Tikhun a̱ngiu̱lú nixkamaa xú musngúún e̱jñún ga̱jma̱a̱ numuu Jeobá náa ajngún, maski ajndu kuwa náa mbá congregación o grupo rí nuthi i̱mba̱ ajngáa. Guʼyáá mbá xkri̱da ndrígóo mbáa ndxájulú bi̱ nagumbiʼyuu Charles. Ikhaa gíʼdiin ajtsíin wa̱ʼxa̱ʼ bi̱ guáʼdáá 9 asndu 13 tsigúnʼ. Xúgínʼ bi̱ kuwa náa mbá guʼwíin kuwa náa mbá grupo  rí nuthi ajngáa lingala. Charles naʼthí: “Nitaxu rí munigajmaa Biblia gajmiúxu̱ wa̱ʼxa̱ʼ ga̱jma̱a̱ munigajmaaxu mbá guʼwáanʼ náa ajngúxú. Ma̱ngaa naʼthí rí nuniratamijná ga̱jma̱a̱ nutsíin náa ajngáa lingala mu manigu̱nʼ majmañún e̱jñún”.

Ataniminaʼ majmañaaʼ ajngáa rí nuthi náa congregación rí xtaa ga̱jma̱a̱ arathá rí nikruaʼaʼ. (Atayáá kutriga̱ 16 ga̱jma̱a̱ 17.)

17 Guʼyáá xkridoo Kevin. Ikhaa gíʼdiin a̱jmi̱i̱n wa̱ʼxa̱ʼ, mbáa gíʼdoo witsu ga̱jma̱a̱ imba̱a̱ migiñuʼ tsiguʼ. Kevin naʼniminaʼ mu maʼsngún wa̱ʼxa̱ʼ numuu Biblia, numuu rí xóó tsíkru̱ʼu̱u̱n májánʼ ajngáa rí nuthi náa congregación náa kuwa. Ikhaa naʼthí: “Ikhúúnʼ ga̱jmu̱ʼ a̱ʼgiu̱ʼ nunigajmaaxu náa ajngáa francés gajmiúxu̱ e̱jñu̱xu, ajngáa rí phú nutaxu. Ma̱ngaa nigíʼ mu̱ʼguáxu náa mbá reunión rí nuthi francés mámbá gu̱nʼ. Ga̱jma̱a̱ najmuxu vacación mu mu̱ʼguáxu mbá asamblea rí ajtsú mbiʼi náa ajngúxu”.

18. a) Xú káʼnii gándoo Romanos 15:1, 2 mambáñun xa̱bu̱ bi̱ guáʼdiin e̱jñún mbuyáá rí nindxu̱u̱ itháan májánʼ rá. b) Ndiéjunʼ ethi tikhun bi̱ guáʼdiin e̱jñún rá. (Atayáá nota rí na̱ʼkha̱ náa námbá artículo.)

18 Mámbá guʼwíin gíʼmaa muraʼwíí ndiéjunʼ nindxu̱u̱ itháan májánʼ mu e̱jñún mambaxúún itháan májánʼ gajmiún Jeobá (Gál. 6:5). [2] Náa kutriga̱ 14 niʼthá ga̱jma̱a̱ numuu Muriel ga̱jma̱a̱ Serge. Muriel naʼthí rí ikhaa ga̱jma̱a̱ ajmbio̱o̱ nindúún muyambáá itháan náa congregación náa nuthi i̱mba̱ ajngáa náa kuwa. Maski ajndu xúʼko̱ niraʼwíí magún náa mbá congregación mu mumbayíí aʼdiún maʼndoo kaʼyoo itháan Jeobá (atraxnuu Romanos 15:1, 2). * Rí mbiʼi xúgi̱, Serge naku̱mu̱u̱ rí niraʼwíí muni rí májánʼ. Ikhaa naʼthí rí índo̱ nitangi̱i̱n náa mbá congregación náa nuthi francés, aʼdiún nimbáxu̱u̱ itháan ga̱jma̱a̱ Jeobá ga̱jma̱a̱ nijngúun iyááʼ. Rí xúgi̱ aʼdiún nindxu̱u̱ precursor regular ga̱jma̱a̱ asndu nandxa̱ʼwáminaʼ rí mata̱nga̱a̱ mayambáá náa mbá grupo rí nuthi i̱mba̱ ajngáa.

GUNIʼÑÁʼ RÍ AJNGÁ RAWUNʼ DIOS MAʼGA̱NÚ ASNDU NÁA A̱JKIU̱LÚ

19, 20. Xú káʼnii esngajmá rí nanigulúʼ wéñuʼ Ajngá rawunʼ Dios rá.

19 Jeobá nandoo kaʼñún xúgínʼ xa̱bu̱. Ikhaa niʼni rí Ajngá rawunʼ marigá náa mbaʼa ajngáa mu “rí xúgínʼ xa̱bu̱” ma̱ndoo mbuyáá ku̱ma̱ rí gajkhun (1 Tim. 2:4). Jeobá ndaʼyoo rí nambáxulúʼ itháan májánʼ gajmiúlú ikhaa índo̱ nuraxnuu Biblia náa ajngáa rí itháan nakru̱ʼu̱lú.

20 Xúgiáanʼ gíʼmaa muʼnimi̱jna̱ mambáxulúʼ itháan májánʼ gajmiúlú Jeobá. Mu ma̱ndoo muʼni rígi̱, gíʼmaa maguʼwunlú muʼnigajmaa Biblia náa ajngáa rí itháan nakru̱ʼu̱lú. Xúʼko̱ muyambáá mu mambaxúún itháan májánʼ gajmiún Dios bi̱ kuwa náa guʼwúlú ga̱jma̱a̱ musngájma rí gajkhun nanigulúʼ wéñuʼ Ajngá rawunʼ Dios (Sal. 119:11).

^ [1] (kutriga̱ 5): Nixtiʼkhu̱u̱ mbiʼñún.

^ [2] (kutriga̱ 18): Atayáá artículo “La crianza de los hijos en un país extranjero: desafíos y galardones”, náa La Atalaya 15 ñajunʼ gu̱nʼ octubre tsiguʼ 2002. Ikhí mataxkamaa xtágabu rí na̱ʼkha̱ náa Biblia rí ma̱ndoo mambáñun bi̱ kuwa náa guʼwáaʼ.

^ párr. 4 Nehemías 13:23, 24: “Ma̱ngaa nákha ikhú mbiʼi ndi̱ñu̱u̱n judíos bi̱ nidiin gu̱ʼú asdoditas, ammonitas ga̱jma̱a̱ moabitas. Ga̱jma̱a̱ e̱jñún, mbá taphi̱i̱n nithi asdodeo, ga̱jma̱a̱ táxtáa nimbáa bi̱ nijmañuu niʼthí ajngáa judío, nijmañún muthi ajngáa dí rígá náa i̱ʼwáʼ xuajen”.

^ párr. 9 Salmo 119:11, 46: “Náa a̱jkiu̱nʼ niyexíi ajngáaʼ rí gíʼdoo numuu, mu xakiéʼkhúun náa inaʼ. Ma̱ngaa gajkhun rí matha ga̱jma̱a̱ numuu rí natani marmáʼáan a̱jkiu̱nʼ náa inún reyes, ga̱jma̱a̱ xátiyuʼ”.

^ párr. 15 Deuteronomio 6:5-7: “Gíʼmaa maʼndaʼ xtayáá Jeobá Dios ndrígia̱ʼ ga̱jma̱a̱ xúgíʼ a̱jkia̱nʼ ga̱jma̱a̱ xúgíʼ nímia̱nʼ ga̱jma̱a̱ xúgíʼ tsiakii rí xtaʼdáá. Ga̱jma̱a̱ ajngáa rí xtáá ratha̱nʼ xúgi̱ gíʼmaa magiwa̱nʼ náa a̱jkia̱nʼ; ga̱jma̱a̱ gíʼmaa matagídáʼ náa edxu̱u̱ a̱ʼdiáaʼ ga̱jma̱a̱ gíʼmaa marata̱a̱n índo̱ gáraʼwún náa guʼwáaʼ ga̱jma̱a̱ índo̱ gajngruigaʼ náa kamba̱a̱ ga̱jma̱a̱ índo̱ gátaba̱ʼ ga̱jma̱a̱ índo̱ gáraxunʼ”.

^ párr. 18 Romanos 15:1, 2: “Ikháanʼlu bi̱ kuajún gujkhuʼ, gíʼmaa maʼngulú dí gúni bi̱ gua̱bi̱nʼ, ga̱jma̱a̱ xúʼni̱ rí nanigulúʼ ikháanʼ. Mámbáa rí ikháanʼ gaʼni rí naniguʼ xa̱bu̱ numbaaʼ ga̱jma̱a̱ rí májánʼ, rí mambáyúu ikhaa”.