“Bi̱ nuñajunʼ gajmiúlú ikhaa, ikháanʼ mangáanʼxu nutakháñala dí raʼkháa i̱ndó mundrígú rí májánʼ wéñuʼ rí na̱ʼkha̱ náa Dios ga̱jma̱a̱ muniʼñáʼlu ruʼnimbaníí rí nandoo ikhaa” (2 CORINTIOS 6:1).

AJMÚÚ 75 GA̱JMA̱A̱ 74

1. Maski ajndu Jeobá gíʼdoo wéñuʼ tsiakii, ndiéjunʼ eniñúnʼ muni iʼwíínʼ xá.

JEOBÁ niʼni xúgíʼ dí rígá. Ikhaa nindxu̱u̱ bi̱ itháán ndaʼyoo ga̱jma̱a̱ bi̱ gíʼdoo itháán tsiakii. Mbóʼ miʼtsú, Job niʼthí rí nijmañuu rí Dios ma̱ndoo maʼni xúgíʼ rí nagíʼ maʼni. Ikhaa ma̱ndoo maʼni xúgíʼ (Job 42:2). Ga̱jma̱a̱, nimbáa tséyóoʼ rí mambáyúu. Maski ajndu xúʼko̱, naniñuʼ rí iʼwíínʼ muñajunʼ ga̱jma̱á nindxu̱u̱. Xúʼko̱ nasngájmún rí nandoo kaʼñúún wéñuʼ.

2. Xú káʼnii ñajunʼ rí nigiʼdoo wéñuʼ numuu nixnúu Jeobá mu maʼni Jesús rá.

2 Timbáa bi̱ niʼnii Dios nindxu̱u̱ A̱ʼdióo, Jesús. Nda̱wa̱á nixnúu A̱ʼdióo mbá ñajunʼ rí gíʼdoo wéñuʼ numuu. Niniñuʼ rí mambáyúu maʼni xúgíʼ dí rígá (Juan 1:1-3, 18). Apóstol Pablo niʼthí dí ga̱jma̱a̱ numuu Jesús “niguma xúgíʼ dí rígá mekhuíí ga̱jma̱a̱ dí rígá náa tsu̱du̱u̱ ku̱ba̱ʼ, dí nakujmaa ga̱jma̱a̱ rí tsekujmaa”. Ma̱ngaa niʼthí rí “xúgíʼ i̱ʼwáʼ niguma ga̱jma̱a̱ numuu ikhaa ga̱jma̱a̱ ikha ndrígóo” (Col. 1:15-17). Ikha jngó Jeobá ndiʼyamajkuu Jesús índo̱ nixnúu mbá ñajunʼ rí gíʼdoo wéñuʼ numuu ga̱jma̱a̱ rí maʼthúún eʼwíínʼ.

3. a) Ndiéjunʼ niniñuʼ Jeobá rí maʼni Adán rá. b) Náa numuu rí Jeobá niniñuʼ rí Adán mambáyúu rá.

 3 Jeobá ma̱ngaa naniñuʼ rí xa̱bu̱ numbaaʼ muñajunʼ gajmiún ikhaa. Mbá xkri̱da, niniñuʼ rí Adán mambáyúu mu maxná mbiʼñún xujkhúʼ (Gén. 2:19, 20). Adán niniguʼ wéñuʼ maʼni ñajunʼ rígi̱. Mú mbaʼyoo xú káʼnii gáxná mbiʼñún, ndiyóoʼ maʼnigajmaa xú káʼnii nindxu̱u̱ mámbáa xujkhúʼ ga̱jma̱a̱ ndiéjunʼ eʼni. Jeobá má ma̱ndoo maʼni ñajunʼ rígi̱, numuu rí ikhaa niʼnii xúgínʼ xujkhúʼ. Mú numuu rí nindoo kaʼyoo wéñuʼ Adán, niniñuʼ rí mambáyúu. Ma̱ngaa niʼthúu̱n rí maʼni̱i̱ mitsaan xúgíʼ tsu̱du̱u̱ Ku̱ba̱ʼ (Gén. 1:27, 28). Mú nda̱wa̱á, Adán niraʼwíí maniñuʼ rañajunʼ ga̱jma̱a̱ Jeobá. Rúʼko̱ niʼni rí Adán ga̱jma̱a̱ xúgiáanʼ ikháanʼ bi̱ nagúwaʼ náa ikhaa numíniʼ wéñuʼ (Gén. 3:17-19, 23).

4. Tsíin niñajunʼ gajmiún Dios mu mambanúu rí ikhaa niʼthí maʼni xá.

4 Nda̱wa̱á, Dios niniñuʼ rí eʼwíínʼ xa̱bu̱ muñajunʼ náa ikhaa. Mbá xkri̱da, Noé niʼni mbá arca mu ikhaa gajmíi̱n bi̱ kúwi̱i̱n náa guʼwóo makáwíin náa ruʼwambiiʼ. Moisés niguwíin israelitas náa Egipto. Josué ni̱jkha̱ kagu̱u̱n israelitas náa Ku̱ba̱ʼ rí Dios niʼthún maxnún. Salomón niʼni templo ndrígóo Jerusalén. Ga̱jma̱a̱ María ninindxu̱u̱ ru̱dúu̱ Jesús. Xa̱bu̱ jmbiin bugi̱ ga̱jma̱a̱ eʼwíínʼ niñajunʼ gajmiún Jeobá mú mambanúu rí ikhaa naʼthí maʼni.

5. a) Xú káʼnii ñajunʼ rí ma̱ndoo muʼnilú xúgiáanʼ rá. b) Lá ndayóoʼ rí mumbaʼyíí Jeobá mu maʼni ñajunʼ rígi̱ rá. (Atayáá timbá xtiʼkhu.)

5 Rí mbiʼi xúgi̱, Jeobá naʼthúlúʼ muʼni xúgíʼ rí naʼngulú mú muñambáá náa Xa̱bu̱ ñajunʼ ndrígóo. Rígá mbaʼa enii xóo ma̱ndoo muʼni. Maski ajndu raʼkháa xúgiáanʼ ma̱ndoo muʼni ikháá, mú xúgiáanʼ ma̱ndoo muʼtáraʼa ajngáa ndrígóo Reino. Lá ndayóoʼ rí mumbaʼyíí Jeobá mu maguma ñajunʼ rígi̱ ráʼ. Na̱nguá. Á mu ikhaa nandoo, ma̱ndoo maʼthúún xa̱bu̱ asndu náa mekhuíí. Ga̱jma̱a̱ Jesús niʼthí rí asndu ma̱ndoo maʼni rí itsí mutún xa̱bu̱ ga̱jma̱a̱ numuu Xa̱bu̱ ñajunʼ ndrígóo Dios (Luc. 19:37-40). Mú Dios naniñuʼ rí muñajunʼ gajmiúlú (1 Cor. 3:9). Apóstol Pablo niʼnirámáʼ: “Bi̱ nuñajunʼ gajmiúlú ikhaa, ikháanʼ mangáanʼxu nutakháñala dí raʼkháa i̱ndó mundrígú rí májánʼ wéñuʼ rí na̱ʼkha̱ náa Dios ga̱jma̱a̱ muniʼñáʼlu ruʼnimbaníí rí nandoo ikhaa” (2 Cor. 6:1). Rí muñajunʼ gajmiúlú Jeobá ra̱ʼkhá tháán gíʼdoo numuu. Guʼyáá tikhuu numuu rí naʼniulú makuwáanʼ gagi.

RÍ MUÑAJUNʼ GAJMIÚLÚ JEOBÁ NAʼNI RÍ MAKUWÁANʼ GAGI

6. Xú káʼnii nikumu̱u̱ A̱ʼdióo Dios índo̱ niñajunʼ ga̱jma̱a̱ Anu̱u̱ rá.

6 Bi̱ ni̱ndxu̱lú xa̱bi̱i̱ Dios nadxulú má xúʼko̱ rí muñajunʼ gajmiúlú Jeobá. Nakha xóó tséʼkha̱ náa tsu̱du̱u̱ Ku̱ba̱ʼ, Jesús niñajunʼ ga̱jma̱a̱ Jeobá “xóo mbáa bi̱ nañajunʼ májánʼ wéñuʼ”, o xóo mbáa artesano bi̱ najmañuu wéñuʼ. Ikhaa ndiʼyoo rí Dios nindoo kaʼyoo wéñuʼ ga̱jma̱a̱ niʼthí: “Ga̱jma̱a̱ nixtáá gagi náa ikhaa xúgíʼ mbiʼi” (Prov. 8:22, 30). Rí mañajunʼ ga̱jma̱a̱ Anu̱u̱ niʼni maxtáa gagi wéñuʼ numuu dí rígá mbaʼa rí niʼni ma̱ngaa ndiʼyoo rí Dios nindoo kaʼyoo wéñuʼ. Ikháanʼlu rá. Lá ma̱ndoo makumulúʼ xúʼko̱ mangáanʼ ráʼ.

Nda̱a̱ imbo̱ʼ rí naʼni makuwáanʼ gagi xóo rí muʼsngáá mbáa xa̱bu̱ rí gajkhun (Atayáá kutriga̱ 7)

7. Náa numuu rí muʼtáraʼa naʼni makuwáanʼ gagi rá.

7 Jesús niʼthí rí nakuwáanʼlu gagi índo̱ nuxná mbá rí kuaʼdáá ga̱jma̱a̱ índo̱ nundrígulú (Hech. 20:35). Índo̱ nisngúlúʼ rí gajkhun, nidxulu wéñuʼ. Mú índo̱ nuʼsngúún eʼwíínʼ rí gajkhun, mangáanʼ nadxulú wéñuʼ. Náa numuu rá. Numuu rí nduʼyáá xú kaʼnii ikhiin kúwi̱i̱n gagi índo̱ najmañún rí naʼsngáa náa Biblia ga̱jma̱a̱ nugíʼdi̱i̱ nuniʼniiʼ Dios. Nadxulú índo̱ nduʼyáá xú káʼnii eriʼkhumijná ma̱ngaa xóo ekúwi̱i̱n. Nduʼyáá á mu rí nambáxu̱u̱n gajmiún Dios ikhiin ma̱ndoo makuwíin kámuu mbiʼi (2 Cor. 5:20). Nduʼyáá gajkhun, rí muʼtáraʼa nindxu̱u̱ mbá ñajunʼ rí itháan gíʼdoo numuu ga̱jma̱a̱ rí naʼni makuwáanʼ itháan gagi.

8. Xú káʼnii eku̱mún tikhun tikhun xa̱bi̱i̱ Jeobá rí muñajunʼ gajmiún xá.

 8 Índo̱ numbaʼñún eʼwíínʼ muniʼniiʼ Dios, nduʼyáá rí Jeobá nadxuu ga̱jma̱á ni̱ndxu̱lú ma̱ngaa ndaʼyoo tsiakii rí nuʼni. Rígi̱ ma̱ngaa naʼni makuwaanʼlú gagi (atraxnuu 1 Corintios 15:58). * Mbáa xa̱bi̱i̱ Jeobá bi̱ xtáa náa Italia bi̱ nagumbiʼyuu Marco naʼthí: “Na̱nguá e̱yo̱o̱ xóo mata dí ra̱ʼkhá tháán xtáá gagi rí maxnu̱u̱ Jeobá xúgíʼ tsiakii rí gúʼdoo ga̱jma̱a̱ raʼkháa mbáa bi̱ mambumuu ñajunʼ rí mani”. I̱mba̱ xa̱bi̱i̱ Jeobá bi̱ xtáa náa Italia bi̱ nagumbiʼyuu Franco naʼthí: “Xúgíʼ mbiʼi Jeobá najmuu Biblia, i̱ʼwáʼ i̱yi̱i̱ʼ ga̱jma̱a̱ reunión mu maʼni marmáʼáan a̱jkiu̱lú dí ra̱ʼkhá tháán eyoo kaʼyulúʼ. Maski ajndu ikháanʼ nakumulúʼ rí tséʼni wéñuʼ, mú ikhaa ndaʼyoo rí gíʼdoo wéñuʼ numuu tsiakii rí nuʼnilú. Ikha jngó, rí mañajunʼ ga̱jmu̱ʼ Dios naʼni maxtáá gagi wéñuʼ ga̱jma̱a̱ naʼni rí manigu̱ʼ maxtáá”.

RÍ MUÑAJUNʼ GAJMIÚLÚ JEOBÁ NAʼNI MU̱ʼGUA̱ KANUU NÁA IKHAA GA̱JMA̱A̱ NÁA A̱NGIU̱LÚ

9. a) Xú káʼnii nimbáxu̱u̱ Jeobá ga̱jma̱a̱ Jesús rá. b) Ndíjkha rí nimbáxu̱u̱n májánʼ wéñuʼ Jeobá ga̱jma̱a̱ Jesús rá.

9 Índo̱ nuñajunʼ gajmiúlú mbáa bi̱ nandulúʼ kuʼyáá, naʼni makuwáanʼ itháan mijngii náa ikhaa. Na̱jkuánu nuniʼnííʼ itháan májánʼ ga̱jma̱a̱ nduʼyáá xú káʼnii xa̱bu̱ nindxu̱u̱. Nduʼyáá xú káʼnii metas gíʼdoo ga̱jma̱a̱ ndiéjunʼ eʼni mu maʼnimbánuu. Xó má Jesús, ikhaa niñajunʼ ga̱jma̱a̱ Jeobá mba̱yu̱ʼ wéñuʼ tsiguʼ nákha xóó tséʼkha̱ náa tsu̱du̱u̱ Ku̱ba̱ʼ. Ikhiin nindúún kuyamijná wéñuʼ rí asndu nimbá xáʼngo̱o̱ gáriʼkhu̱u̱ rúʼko̱. Ikha jngó Jesús niʼthí: “Ikun gajmeʼ Ana mbahui tsi ñajuanʼxoʼ” (Juan 10:30). Nájmi̱i̱n nimbáxu̱u̱n májánʼ wéñuʼ numuu rí nanigu̱nʼ muñajunʼ mbóó ga̱jma̱a̱ rí mumbayúmíjná.

10. Náa numuu rí muʼtáraʼa naʼni mambáxulu itháan gajmiúlú Jeobá ga̱jma̱a̱ a̱ngiu̱lú rá.

10 Jesús nindo̱ʼo̱o̱ Jeobá rí mañewu̱u̱n xa̱bi̱i̱. Náa numuu rá. Jesús má niʼthí: “Ikajngo imbahui xabo ganindxun, xoma ri Ikanlo” (Juan 17:11). Índo̱ nuʼnimbaníí rí Dios naʼthí náa Biblia ga̱jma̱a̱ nuʼtáraʼa, nakru̱ʼu̱lú itháán májánʼ xú káʼnii nindxu̱u̱ Jeobá. Nduʼyáá rí itháan májánʼ rí makumulúʼ kuʼyáá ikhaa ga̱jma̱a̱ muʼnimbánii rí naʼtulúʼ. Ga̱jma̱a̱ á mu nuʼnimi̱jna̱ mambáxulu gajmiúlú, ikhaa mambaxúu ga̱jma̱á ni̱ndxu̱lú (atraxnuu Santiago 4:8). * Rí muʼtáraʼa naʼni makuwáanʼ mbá kambáxulú gajmiúlú a̱ngiu̱lú, numuu rí nduʼyáá tsiakii rí nuni mu muni ñajunʼ Jeobá. Ma̱ngaa nduʼyáá rí kuaʼdáá ikháá xkujndu, ikháá rí naʼni makuwáanʼ gagi ga̱jma̱a̱ ikháá metas. Ikha jngó nuñajunʼ mbóó, nadxulú mbóó ga̱jma̱a̱ naʼngulú nuraʼníí xkujndu mbóó. Mbáa ndxájulú bi̱ xtáa náa Gran Bretaña bi̱ nagumbiʼyuu Octavia naʼthí: “Rí mañajunʼ ga̱jmu̱ʼ Jeobá naʼni maxtáá itháan mijngii náa ikhaa ga̱jma̱a̱ náa a̱ngui̱nʼ”. Náa numuu rá. Ikhaa  naʼthí rí bi̱ nambáxu̱u̱ gajmíi̱n guáʼdáá ikháá metas xó má gíʼdoo ikhaa. Lá raʼkháa xúʼko̱ ekumulú mangáanʼ ráʼ.

11. Ndíjkha rí náa numbaaʼ nuxi̱ʼ makuwáanʼ itháan kambáxulú gajmiúlú a̱ngiu̱lú xúʼko̱ má náa Jeobá rá.

11 Rí xúgi̱ nandulúʼ kuʼyáá wéñuʼ Jeobá ga̱jma̱a̱ a̱ngiu̱lú. Mú náa Ku̱ba̱ʼ mitsaan maʼndulú kuʼñúún itháan. Atatsaʼwáminaʼ ga̱jma̱a̱ numuu ñajunʼ rí muʼni nda̱wa̱á. Mundríguíinlú bi̱ nikháñun ma̱ngaa muʼsngúún ga̱jma̱a̱ numuu Jeobá. Muʼni rí náa xúgíʼ tsu̱du̱u̱ Ku̱ba̱ʼ maʼni̱i̱ mitsaan. Maʼni mitsaan muñajunʼlú mbóó ga̱jma̱a̱ rí maʼga̱ ranindxulu xa̱bu̱ jmbii mañúú mañúú náa gáʼtañajunʼ Cristo. Mámbá mbiʼi makuwáanʼ itháan kambáxulú gajmiúlú a̱ngiu̱lú ma̱ngaa gajmiúlú Jeobá. Mbáa ikhaa má gáxnulú xúgíʼ rí gáʼndulúʼ (Sal. 145:16).

RÍ MUÑAJUNʼ GAJMIÚLÚ JEOBÁ NAÑEWU̱NLÚ

12. Náa numuu rí nañewu̱nlu rí muʼtáraʼa rá.

12 Kuwáanʼlu náa numbaaʼ ndrígóo Gixa̱a̱ ga̱jma̱a̱ ni̱ndxu̱lú xa̱bu̱ aʼkhá. Á mu tseñawamíjna̱lú, maʼni rí mundxaʼwamíjna̱ ga̱jma̱a̱ muʼni rí nuni xa̱bu̱ bi̱ kuwa náa numbaaʼ. Ikha jngó gíʼmaa muñewa̱a̱n rí nambáxulúʼ gajmiúlú Jeobá. Mú ndayóoʼ muʼnimi̱jna̱ wéñuʼ. Nindxu̱u̱ xóo rí mu̱ʼgua̱ náa xkujyuʼ mañu. Á mu tsíyulú dí mañu maʼga̱ kaguáanʼ, ndayóo mu̱ʼgua̱ ga̱jma̱a̱ xúgíʼ tsiakii ndrígúlú. Rí muʼtáraʼa nambáyulúʼ muñewa̱a̱n rí mambáxulu gajmiúlú Jeobá. Náa numuu rá. Numuu rí índo̱ nuʼthá ga̱jma̱a̱ numuu Dios ma̱ngaa ga̱jma̱a̱ numuu Biblia, naʼni rí mundxaʼwáá edxu̱lúʼ náa rí itháan gíʼdoo numuu ma̱ngaa náa dí májánʼ. Na̱nguá endxaʼwamíjna̱lú náa rí maʼni makágua̱ba̱ʼ fe ndrígúlú (Filip. 4:8). Rí mutaráʼa naʼni itháan gujkhuʼ fe ndrígúlú numuu rí naʼni marmáʼáan a̱jkiu̱lú rí nikudaminaʼ maʼni Dios ga̱jma̱a̱ náa xtángoo ndrígóo. Ma̱ngaa, nambáyulúʼ manindxu̱lúʼ xó má gíʼmaa maʼni mbáa cristiano rí nañewu̱nlú náa Gixa̱a̱ ga̱jma̱a̱ náa numbaaʼ ndrígóo (atraxnuu Efesios 6:14-17). *

13. Náa numuu rí ndaʼyamajkhuu wéñuʼ rí maʼtáraʼa mbáa ndxájulú bi̱ xtáa náa Australia rá.

13 Rí muʼtáraʼa, muʼnigajmaa ga̱jma̱a̱ rí mumbáñún a̱ngiu̱lú ma̱ngaa nañewu̱nlu numuu rí tséniñuʼ mbiʼi mundxaʼwáá edxu̱lúʼ wéñuʼ náa xkujndu rí kuaʼdáá. Mbáa ndxájulú bi̱ xtáa náa Australia bi̱ nagumbiʼyuu Joel naʼthí rí ndaʼyamajkhuu wéñuʼ rí miʼtáraʼa. Naʼthí rí nambáyúu mu xambumu rí xa̱bu̱ numbaaʼ guáʼdáá xkujndu gakhii wéñuʼ. Ma̱ngaa, narmáʼáan a̱jkiu̱u̱n xú kaʼnii embáyúu wéñuʼ xtágabu rí na̱ʼkha̱ náa Biblia. Ga̱jma̱a̱ naʼthí: “Rí mataráʼa nambáyuʼ mani̱ndxu̱ʼ xa̱bu̱ gua̱ba̱ʼ ga̱jma̱a̱ rí maku̱mu̱ʼ ka̱yo̱o̱ Jeobá mangiin a̱ngui̱nʼ”.

14. Xú káʼnii eʼyáá rí Dios nambáyulúʼ ga̱jma̱a̱ xi̱ʼ kaʼwu ndrígóo rá.

14 Rí muʼtáraʼa ma̱ngaa nasngájma rí Jeobá nambáyulúʼ ga̱jma̱a̱ xi̱ʼ kaʼwu ndrígóo. Mú makru̱ʼu̱lú, guʼgíiʼ mbá xkri̱da. Atatsaʼwáminaʼ rí mbáa naʼtháanʼ rí maraxnaráʼa ganitsu náa ikháánʼ xtaa. Mú xa̱bu̱ buʼko̱ xáʼni numaʼ nditháan, ikháánʼ kaʼyaʼ matani numáá xúgíʼ. Ma̱ngaa, natayáá rí xa̱bu̱ tsíñún rí mi̱dxu̱ʼ xta̱ʼ ganitsu rúʼko̱ ga̱jma̱a̱ tikhun asndu makiʼníin kuyaʼ. Nguáthá mba̱yu̱ʼ gáʼngaaʼ matani ñajunʼ rúʼko̱ rá. Mbáa xájyúuʼ gáʼni néʼngaʼ ga̱jma̱a̱ matatsiʼñáanʼ ratani̱. Xúʼko̱ má nindxu̱u̱, ikháanʼlu nuʼthúún xa̱bu̱ ajngá rawunʼ Dios. Nakiéʼkulu mbiʼi ga̱jma̱a̱ mbújkha̱a̱, mú xa̱bu̱ nunduʼwajmáanʼlú o asndu tsíñún gúyulú. Mú mámbá tsiguʼ nuʼtáraʼa má xúʼko̱. Rúʼko̱ nasngájma rí Jeobá nambáyulúʼ ga̱jma̱a̱ xi̱ʼ kaʼwu ndrígóo.

 RÍ MUÑAJUNʼ GAJMIÚLÚ JEOBÁ NANIÑULÚ MUSGAJMÁÁ RÍ NANDULÚ KUʼYÁÁ

15. Ndíjkha rí gíʼdoo wéñuʼ numuu rí miʼtáraʼa rá.

15 Rí muʼtáraʼa gíʼdoo wéñuʼ numuu, numuu rí nayambáá mú mambanúu rí nandoo Dios náa xa̱bu̱ numbaaʼ. Jeobá nindoo rí xa̱bu̱ makuwá kámuu, ga̱jma̱a̱ rúʼko̱ táriʼkhu̱u̱ índo̱ Adán nikudaminaʼ aʼkhá (Is. 55:11). Mú maʼni káwáanʼ náa aʼkhá ga̱jma̱a̱ rí nakháñulú, Jeobá nikuʼmaa Jesús náa tsu̱du̱u̱ Ku̱ba̱ʼ mú makhañúu ga̱jma̱a̱ numulúʼ. Á mu nandulúʼ rí mambáyulúʼ rí nixnáximinaʼ Jesús ga̱jma̱a̱ rí makuwáanʼ kámuu mbiʼi, ndayóoʼ muʼnimbulúʼ kuʼyáá Dios. Jesús niʼsngúún xa̱bu̱ rí nandoo Dios muni, ga̱jma̱a̱ niʼtañajúnʼ xa̱bi̱i̱ rí mangiin musngáa xúʼko̱ kaʼnii. Ikha jngó nuʼtáraʼa ga̱jma̱a̱ numbáñun eʼwíínʼ mu mambaxúún gajmiún Dios. Índo̱ nuʼnilú, nuñajunʼ gajmiúlú Jeobá ga̱jma̱a̱ numbáñun xa̱bu̱ mu makáwíin náa aʼkhá ma̱ngaa náa rí nakháñun.

16. Ndiéjunʼ esngajmá índo̱ nuʼtáraʼa rá.

16 Índo̱ mbáa bi̱ kayá edxu̱u̱ náa ndxajkun niraxu̱u̱ Jesús xú káʼnii xtángoo ndrígóo Dios rí itháan gíʼdoo numuu, Jesús niriʼña: “‹Gíʼmaa maʼnda̱ʼ xtayáá Jeobá Dios ndrígia̱ʼ ga̱jma̱a̱ xúgíʼ a̱jkia̱nʼ, ga̱jma̱a̱ xúgíʼ nímia̱nʼ ga̱jma̱a̱ xúgíʼ ku̱ma̱ ndrígáʼ›. Rígi̱ nindxu̱u̱ rí itháan mba̱a̱ ga̱jma̱a̱ timbá kiʼtáñajunʼ. Raga̱jma̱, ikhaa má kayúʼ xóo rígi̱: ‹Gíʼmaa maʼnda̱ʼ xtayáá xa̱bu̱ numbaaʼ ga̱jma̱ʼ xó má eyaʼ xtayaminaʼ ikháánʼ›” (Mat. 22:37-39). Índo̱ nuʼtáruʼun ga̱jma̱a̱ nuʼsngúún xa̱bu̱ xú káʼnii guxkamaa mbiʼi kámuu, nusngájma rí nuʼnimbulúʼ xtángoo rí maʼndulú kuʼñúún xa̱bu̱ ga̱jma̱a̱ Jeobá (atranuu Hechos 10:42). Nduʼyáá rí ikhaa nandoo “rí xúgínʼ xa̱bu̱ makáwíin ga̱jma̱a̱ maguaʼdáá ku̱ma̱ rí gajkhun” (1 Tim. 2:4).

17. Ndiéjunʼ tatsaʼwáminaʼ ikháánʼ rí matiejunʼ ga̱jma̱ʼ Jeobá rá.

17 Ma̱ndoo muxnáalú núma̱aʼ wéñuʼ numuu rí nuñajunʼ gajmiúlú Jeobá. Rí muñajunʼ gajmiúlú ikhaa naʼni makuwáanʼ gagi, naʼni makuwáanʼ itháan mijngii náa ikhaa ga̱jma̱a̱ náa a̱ngiu̱lú ma̱ngaa nañewu̱nlú. Ma̱ngaa, naniñulú musngajmáá Jeobá rí nandulúʼ kuʼyáá ikhaa ga̱jma̱a̱ a̱ngiu̱lú. Náa xúgíʼ numbaaʼ kuwa mbaʼin wéñuʼ xa̱bi̱i̱ Dios ga̱jma̱a̱ mixtiʼkhu xóo kúwi̱i̱n xúgínʼ. Mú xúgiáanʼ nuʼtáraʼa xóo má eʼngo̱o̱, tséʼniún á mu ni̱ndxu̱lú jiáma, wa̱ʼxa̱ʼ, xa̱bu̱ guanii, xa̱bu̱ guáʼdáá, xa̱bu̱ gíníi, bi̱ guáʼdáá tsiakii o bi̱ gua̱bi̱nʼ. Nakumulú xóo mbáa ndxájulú bi̱ xtáa náa Francia, bi̱ niʼthí: “Xa̱bu̱ bi̱ itháan gíʼdoo numuu náa numbaaʼ, bi̱ Niʼniwíi xúgíʼ dí rígá, Dios bi̱ nindxu̱u̱ gagi, naʼthúnʼ: ‹Ayuʼ ga̱jma̱a̱ arathá. Arathá ga̱jma̱a̱ numuʼ. Arathá rí nagájnuu asndu náa a̱jkia̱nʼ. Ikhúúnʼ maxnáʼ tsiakii, Ajngóʼ, ángeles mu mumbayáʼ ga̱jma̱a̱ bi̱ mi̱dxu̱ʼ gajmiáanʼ gárataráʼa. Masngáaʼ xú káʼnii gátani ga̱jma̱a̱ maxnaʼ ikha índo̱ gaʼyáaʼ. Jeobá naniñulú mú muʼnimbánii rí nandoo ga̱jma̱a̱ muñajunʼ mbóó gajmiúlú. ¡Ra̱ʼkhá tháán májánʼ nindxu̱u̱!”.

^ párr. 8 1 Corintios 15:58: “Ikha jngó, a̱ngui̱nʼ aguajunla gujkhuʼ ga̱jma̱a̱ gudrigáanʼla wíí, gaguaʼdáá má xúʼko̱ rí muni náa ñajunʼ ndrígóo Señor, ikháanʼ má ndu̱ya̱a̱la rí ñajunʼ ndrígála na̱nguá nindxu̱u̱ ndíí náa Señor”.

^ párr. 10 Santiago 4:8: “Aʼgua̱ kanuu náa Dios, ga̱jma̱a̱ ikhaa ma̱ʼkha̱ kanuu náa ikháanʼla. Guni kaʼwi̱i̱ ñawánla, xa̱bu̱ aʼkhá, ga̱jma̱a̱ guni kaʼwi̱i̱ a̱jkia̱la, ikháanʼla bi̱ tséya̱a̱ rí muni”.

^ párr. 12 Efesios 6:14-17: “Gakuwáanʼ xawii, gaguaʼdáá asndu xó náa smídala dí gajkhun, gaguʼwanla rí jmbu dí nañewu̱u̱n a̱jkia̱la ga̱jma̱a̱ gakuwáanʼ xawii gajngráʼala chádala mu mu̱ʼgua̱ gútaraʼa ajngáa rí májánʼ dí na̱ʼkha̱ kayóo rí tsímáá. Ma̱ngaa, gíʼmaa maguaʼdáá fe rí nindxu̱u̱ xóo mbá escudo mba̱a̱ rí mambáyala muraʼníí xúgíʼ dí ra̱májánʼ rí nakunguanʼ xa̱bu̱ wéñiʼ. Ma̱ngaa gajmala casco rí maʼni káwáanʼ, ga̱jma̱a̱ espada ndrígóo espíritu, rí nandoo gáʼthúu̱n, Ajngá rawunʼ Dios”.