Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Enero tsiguʼ 2016

Gugími̱jna̱ maʼndala “ku̱ñu̱u̱n má xúʼko̱ a̱ngia̱la”

Gugími̱jna̱ maʼndala “ku̱ñu̱u̱n má xúʼko̱ a̱ngia̱la”

“Gaʼndala ku̱ñu̱u̱n má xúʼko̱ a̱ngia̱la” (HEBREOS 13:1).

AJMÚÚ 72 GA̱JMA̱A̱ 119

1, 2. Náa numuu rí Pablo niʼnirámáʼ carta a los Hebreos rá.

NÁKHA tsiguʼ 61, cristianos bi̱ nikuwa náa Israel nikuwa tsímáá. Apóstol Pablo kraʼaa guʼwá e̱jua̱nʼ náa Roma, mú nigi̱ʼthu̱u̱n rí muniñaʼ magajnáa. Ma̱ngaa Timoteo bi̱ nijnguʼwún ga̱jma̱a̱ ndiʼkhún nigájnáa náa guʼwá e̱jua̱nʼ. Nájmi̱i̱n niriyaʼ awan rí magún mbóó gúñun a̱ngiu̱lú náa Judea (Heb. 13:23). Mú rígi̱ maxtiʼkhu̱u̱, witsu tsiguʼ nda̱wa̱á soldados romanos muruguama̱ʼa̱a̱n Jerusalén. Ga̱jma̱a̱ Jesús má niʼthí rí índo̱ gúyaa rígi̱, cristianos bi̱ kuwa náa Judea ga̱jma̱a̱ náa Jerusalén mbaʼyóoʼ magajnún (Luc. 21:20-24).

2 Naʼni má 28 tsiguʼ rí Jesús niʼthí rí marigá rúʼko̱. Tsiguʼ rúʼko̱ cristianos bi̱ nikuwa náa Israel niguájun jmbu maski ajndu nimíniiʼ wéñuʼ ga̱jma̱a̱ niguáʼdáá xkujndu gakhii (Heb. 10:32-34). Mú na̱ʼkha̱ rajngiyuu mbá náa ma̱ndoo musngajmá fe rí guáʼdáá (Mat. 24:20, 21; Heb. 12:4). Á mu nandún munimbu̱ún kuyáá Jesús ga̱jma̱a̱ makáwíin mbaʼyóoʼ muguaʼdáá fe ga̱jma̱a̱ maʼngu̱u̱n xóo nimbá miʼtsú tusngajma (atraxnuu Hebreos 10:36-39). * Ikha jngó Jeobá niʼni rí Pablo  maʼnirámáʼ mbá carta náa inún a̱ngiu̱lú rí xúgi̱ najmaʼnuʼ xóo carta a los Hebreos. Carta rígi̱ niʼniratiin mu muraʼníí rí ma̱ʼkha̱ ga̱jma̱a̱ nixnúún tsiakii.

3. Náa numuu rí gíʼmaa mbuʼyáá májánʼ wéñuʼ rí e̱ʼkha̱ raʼthí náa carta a los Hebreos rá.

3 Rí mbiʼi xúgi̱, gíʼmaa mbuʼyáá májánʼ wéñuʼ rí e̱ʼkha̱ raʼthí náa carta a los Hebreos. Náa numuu rá. Numuu rí kuwáanʼ xóo a̱ngiu̱lú bi̱ nikuwa náa Judea. Mbaʼánʼ kuwáanʼlu tsímáá ga̱jma̱a̱ na̱nguá emíniʼlú. Mú mbaʼin a̱ngiu̱lú naguájun jmbu maski ajndu naguáʼdáá xkujndu náa “mbiʼi gakhi̱i̱ ga̱jma̱a̱ [náa rí naʼni] mingíjyúuʼ makuwáanʼ” (2 Tim. 3:1, 12). Mú xó má cristianos bi̱ nikuwa nákha mbiʼi rí nixtáa Pablo, xúgiáanʼ gíʼmaa makuwáanʼ xawii numuu rí najngiyuu tsáʼkhá rí itháan mba̱a̱ rí maraʼnuu fe ndrígúlú (atraxnuu Lucas 21:34-36).

4. a) Náa biʼyaa nindxu̱u̱ texto rí kaʼyoo tsiguʼ 2016 rá. b) Náa numuu rí nixtaʼwíí versículo rígi̱ rá.

4 Ndiéjunʼ gambáyuluʼ makuwáanʼ xawii mu muraʼníí rí gáʼkha̱ rá. Mbá rí mambáyulúʼ nindxu̱u̱ xtágabu rí nuraxnuu náa Hebreos 13:1. Ikhí naʼthí: “Gaʼndala ku̱ñu̱u̱n má xúʼko̱ a̱ngia̱la”. Rígi̱ nindxu̱u̱ mbá xtágabu rí nixnúún Pablo bi̱ ni̱ndxu̱ún hebreos mu mambáñun maguaʼdáá mbá fe itháan gujkhuʼ. Nixtaʼwíí versículo rígi̱ mu magiʼma náa texto rí kaʼyoo tsiguʼ 2016. Náa numuu rá. Numuu rí mangáanʼ ma̱ndoo mambáyulúʼ muguaʼdáá mbá fe itháan gujkhuʼ.

Texto rí kaʼyoo tsiguʼ 2016: “Gaʼndala ku̱ñu̱u̱n má xúʼko̱ a̱ngia̱la” (Hebreos 13:1).

NDIÉJUNʼ NINDXU̱U̱ RÍ MAʼNDAʼ XTAYÁÁ NDXÁJUAʼ RÁ.

5. Ndiéjunʼ nindxu̱u̱ rí maʼndaʼ xtayáá ndxájuaʼ rá.

5 Ndiéjunʼ nindxu̱u̱ rí maʼndaʼ xtayáá ndxájuaʼ rá. Ajngáa rígi̱ nandoo gáʼthi rí nandaʼ xtañún bi̱ kuwa náa guʼwáaʼ o mbáa bi̱ nambáxa̱ʼ májánʼ ga̱jma̱ʼ (Juan 11:36) (atayáá kúgumaʼá “Ndiéjunʼ eyoo gáʼthúu̱n”). Ikha jngó cristianos na̱nguá ni̱ndxu̱ún xóo a̱ngiu̱lú numuu rí kanikháanʼ má (Mat. 23:8). Pablo niʼthí: “Gaʼndala kuyamíjna̱ xóo bi̱ kaníkháanʼ. Ikháanʼ guya edxu̱u̱ rí mbuyamajkumijnála” (Rom. 12:10). Ajngáa rígi̱ nasngájma rí ngajua rí kuaʼdáá náa a̱ngiu̱lú gíʼmaa maʼni itháan mba̱a̱. Á mu nandulúʼ kuʼyamijná xóo bi̱ kaníkháanʼ ga̱jma̱a̱ xóo cristianos, mambaxúlúʼ itháan májánʼ ga̱jma̱a̱ makuwáanʼ mbá kambáxulú.

6. Tsíin endulúʼ kuʼñúún bi̱ phú ni̱ndxu̱lú cristianos rá.

6 Mbáa xa̱bu̱ bi̱ najmañuu, naʼthí rí cristianos najmún ajngáa “gaʼndala ku̱ñu̱u̱n má xúʼko̱ a̱ngia̱la” náa iñúnʼ. Nákha wajyúúʼ bi̱ judíos i̱ndó nutún “a̱ngiu̱ún” bi̱ kuñún o tikhun bi̱ nambáxu̱u̱n gajmiún. Nimbá miʼtsú tuthan “ndxájuʼ” mbáa bi̱ na̱nguá nindxu̱u̱ judío. Mu bi̱ phú ni̱ndxu̱ún cristianos, xúgínʼ xa̱bi̱i̱ Jeobá ni̱ndxu̱ún a̱ngiu̱ún, tséʼniuu má náa eguwáʼ (Rom. 10:12). Ikha jngó nandulúʼ kuʼyamijná xóo bi̱ kaníkháanʼ numuu dí rúʼko̱ niʼsngúlúʼ Jeobá (1 Tes. 4:9). Mú ndíjkha rí gíʼdoo numuu rí maʼndulú kuʼyamijná má xúʼko̱ xóo bi̱ kaníkháanʼ rá.

NDÍJKHA RÍ GÍʼDOO NUMUU RÍ MAʼNDULÚ KUʼYAMIJNÁ MÁ XÚʼKO̱ XÓO BI̱ KANÍKHÁANʼ RÁ.

7. a) Xú káʼnii nindxu̱u̱ timbá rí itháan gíʼdoo numuu rí ndayóoʼ maʼndulú kuʼyamijná rá. b) Xú káʼnii nindxu̱u̱ imbo̱o̱ numuu rí gíʼmaa maʼndulú kuʼyamijná itháan rá.

7 Mbá rí itháan gíʼdoo numuu rí maʼndulú kuʼyamijná xóo bi̱ kaníkháanʼ numuu rí Jeobá naʼthúlúʼ muʼni. Xándoo maʼndulú kuʼyáá Jeobá á mu na̱nguá eyulú kuʼñúún a̱ngiu̱lú (1 Juan 4:7, 20, 21). I̱mba̱ numuu rí maʼndulú kuʼyamijná nindxu̱u̱ rí ndayúlú mumbayumíjná, itháan índo̱ narígá xkujndu. Índo̱ Pablo niʼnirámáʼ náa inún hebreos ndiʼyoo rí xájyúuʼ mba̱yu̱ʼ rí mbaʼin mbaʼyóoʼ magajnún ga̱jma̱a̱ muniñaʼ xúgíʼ. Jesús niʼthí rí maʼni mbiʼi gakhii wéñuʼ (Mar. 13:14-18; Luc. 21:21-23). Nákha xóó tséʼkha̱nú mbiʼi rúʼko̱ cristianos buʼko̱ ndiyóoʼ maʼndún kuyamíjna̱ itháan (Rom. 12:9).

8. Ndiéjunʼ gáʼyóoʼ muʼni xúgi̱ nákha xóó tsírígá majphú mba̱a̱ gaʼkhu rá.

8 Najngiyuu rí marigá majphú mba̱a̱ gaʼkhu (Mar. 13:19; Rev. 7:1-3). Índo̱ gági̱ʼdu̱u̱, mbaʼyóoʼ muʼnimbánii rígi̱: “Ata̱ʼa̱ʼ náa awúu̱n guʼwáaʼ,  ga̱jma̱a̱ índo̱ nita̱ʼa̱ʼ má atrugua̱a̱ xkrugua. Atarkaʼuminaʼ mbá xngaa asndu índo̱ gánujngoo rí nakiʼnún” (Is. 26:20). Mbáa “awúu̱n guʼwáaʼ” mani̱ndxu̱u̱ congregación. Ikhí nduʼyamajkuíí Jeobá gajmiúlú a̱ngiu̱lú. Mú raʼkháa i̱ndó magimbáanʼlú xúgíʼ xmáná, Pablo niʼni marmáʼáan a̱jkiu̱ún cristianos hebreos rí gíʼmaa muxnamijná tsiakii mu musngajma rí nandún kuyamijná ga̱jma̱a̱ muniu̱u̱n rí májánʼ eʼwíínʼ (Heb. 10:24, 25). Rí xúgi̱ gíʼmaa maʼndulú kuʼyamijná itháan, numuu dí rúʼko̱ mambáyulúʼ muraʼníí gamiéjunʼ rí gáʼkha̱.

9. a) Xú káʼnii gándoo musngajmá rí nandulúʼ kuʼñúún a̱ngiu̱lú rí mbiʼi xúgi̱ rá. b) Arathá mbá xkri̱da náa a̱ngiu̱lú nisngajma rí nandún kuyamijná náa xtaa o náa i̱ʼwáʼ xuajin.

9 Mbaʼa xú gándoo musngajmá rí nandulúʼ kuʼñúún a̱ngiu̱lú rí mbiʼi xúgi̱, nákha xóó tsírígá majphú mba̱a̱ gaʼkhu. Mbaʼin numíniʼ numuu rí naʼxma, najníʼ iyaaʼ, naʼni giñá mbiiʼ, nagájnuu lamáa ga̱jma̱a̱ i̱ʼwáʼ. Tikhun a̱ngiu̱lú najuixkhún (Mat. 24:6-9). Ga̱jma̱a̱ mbaʼin numíniʼ ga̱jma̱a̱ numuu mbújkha̱a̱ numuu rí xa̱bu̱ ni̱ndxu̱ún ra̱míjínʼ náa numbaaʼ rígi̱ (Rev. 6:5, 6). Índo̱ guáʼdáá itháan xkujndu a̱ngiu̱lú, itháan gándoo gusngajma rí nandulúʼ kuʼñúún. Maski ajndu náa numbaaʼ tsesngajma rí nandún kuyamijná, ikháanʼ gíʼmaa maʼndulú kuʼyamijná má xúʼko̱ (Mat. 24:12) [1] (atayáá nota rí na̱ʼkha̱ náa námbá artículo).

XÚ KÁʼNII GÁNDOO GUSNGAJMÁ RÍ NANDULÚʼ KUʼÑÚÚN A̱NGIU̱LÚ RÁ.

10. Ndiéjunʼ gúʼyáá xúgi̱ rá.

10 Ndiéjunʼ gándoo muʼni mu maʼndulú kuʼyamijná má xúʼko̱ náa numbaaʼ náa narígá wéñuʼ xkujndu rá. Ga̱jma̱a̱ xú káʼnii gusngajmá rí nandulúʼ kuʼñúún xá. Apóstol Pablo niʼthí tikhuu náa capítulo 13 ndrígóo Hebreos, nda̱wa̱á rí niʼthí “gaʼndala ku̱ñu̱u̱n má xúʼko̱ a̱ngia̱la”. Guʼyáá majun enii rí xú káʼnii gándoo musngajmá.

11, 12. Xú káʼnii gándoo gusngajmá rí nundríguíin májánʼ a̱ngiu̱lú rá. (Atayáá timbá xtiʼkhu.)

11 “Xambumala mundriguíin májánʼ bi̱ naguaʼnu náa guʼwála” (atraxnuu Hebreos 13:2). * Mbáa rígi̱ naʼni marmáʼáan a̱jkiu̱lú rí niʼni Abrahán ga̱jma̱a̱ Lot. Nájmi̱i̱n ninindxu̱ún xa̱bu̱ míjínʼ índo̱ nindriguíin bi̱ tsiniʼnuʼ, ga̱jma̱a̱ nda̱wa̱á ndiyáá rí ikhiin ni̱ndxu̱ún ángeles (Gén. 18:2-5; 19:1-3). Pablo niʼthún xkri̱da rígi̱ cristianos hebreos mu maxkaxi̱i̱n rí maʼndún kuyamijná índo̱ mundriguíin a̱ngiu̱ún.

12 Xú káʼnii gándoo gusngajmá rí nundriguíin májánʼ a̱ngiu̱lú rá. Ma̱ndoo muʼthúún a̱ngiu̱lú magún náa guʼwúlú mu muphiʼtsu gajmiúlú o makuwáanʼ mbéguʼ gajmiúlú. Ga̱jma̱a̱ índo̱ ndxájulú superintendente viajante ga̱jma̱a̱ a̱ʼgiu̱u̱ gaguwáʼ náa congregación ndrígúlú ma̱ndoo muʼthúún maguwáʼ maski ajndu tsiniʼnuʼ májánʼ wéñuʼ (3 Juan 5-8). Tséyóoʼ má muni májánʼ wéñuʼ ganitsu ní makiéʼkhulú wéñuʼ mbújkha̱a̱. Rí nandulúʼ, muxnún tsiakii, raʼkháa rí mbuyáá dí ra̱ʼkhá tháán májánʼ a̱jkiu̱lú. Ma̱ngaa xúʼthún i̱ndó bi̱ ma̱ndoo mutulú rí mu̱ʼgua̱ mangáanʼ náa guʼwún (Luc. 10:42; 14:12-14). Maski ajndu tsiguapáanʼ, xámbumulu rí gíʼmaa mundríguíin a̱ngiu̱lú náa guʼwúlú.

13, 14. Xú káʼnii gándoo gumbañúún a̱ngiu̱lú bi̱ kajchún náa guʼwá e̱jua̱nʼ rá.

13 “Agiwanʼ a̱jkia̱la ku̱ñu̱u̱n bi̱ kajchún náa guʼwá e̱jua̱nʼ” (atraxnuu Hebreos 13:3). * Índo̱ Pablo niʼnirámáʼ ajngáaʼ rígi̱, xtáa randxa̱ʼwáminaʼ ga̱jma̱a̱ numún a̱ngiu̱lú bi̱ kajchún náa guʼwá e̱jua̱nʼ numuu rí naguájun jmbu náa Jeobá. Pablo niʼthún cristianos hebreos rí májánʼ nini numuu nigáwiinʼ a̱jkiu̱ún kuñún ‹bi̱ kajchún náa guʼwá e̱jua̱nʼ› (Heb. 10:34). A̱jkhu̱ tsiguʼ rí Pablo nixtáa náa guʼwá e̱jua̱nʼ, tikhun a̱ngiu̱lú bi̱ nikuwa mijngii nimbayíí mú eʼwíínʼ nikuwa tsínguánʼ. Xú káʼnii nimbayíí xá. Índo̱ nitajkháan wéñuʼ ga̱jma̱a̱ numuu (Filip. 1:12-14; Heb. 13:18, 19).

14 Rí mbiʼi xúgi̱, mbaʼin a̱ngiu̱lú kajchún náa  guʼwá e̱jua̱nʼ numuu rí naguajun jmbu náa Jeobá. A̱ngiu̱lú bi̱ kuwa mijngii mixtiʼkhu xóo embañún. Mú mbaʼánʼ rí ikháanʼ kuwáanʼ mitsínguánʼ. Xú káʼnii gándoo gumbañúún ga̱jma̱a̱ musngájma rí tsembumulú kuʼñúún xá. Á mu nandulúʼ kuʼñúún xóo a̱ngiu̱lú, muʼtájkáan má xúʼko̱ ga̱jma̱a̱ numún. Mbá xkri̱da, ma̱ndoo muʼtájkáan ga̱jma̱a̱ numún a̱ngiu̱lú xa̱bekha, gu̱ʼu̱ asndu e̱ji̱n bi̱ kajchún náa guʼwá e̱jua̱nʼ náa Eritrea. Tikhun rí ikhiin ni̱ndxu̱ún Paulos Eyassu, Isaac Mogos, ga̱jma̱a̱ Negede Teklemariam. A̱ngiu̱lú bugi̱ kuwa itháan rí mbá 20 tsiguʼ náa guʼwá e̱jua̱nʼ.

15. Xú káʼnii gándoo gusngajma rí nduʼyamajkhún bi̱ ninigu̱nʼ rá.

15 “Bi̱ nidamijná gaʼni ga̱jma̱a̱ gamajkhu náa xúgínʼ” (atraxnuu Hebreos 13:4). * I̱mba̱ numuu xóo musngajmá rí nandulúʼ kuʼñúún a̱ngiu̱lú nindxu̱u̱ rí mbuʼyamajkún bi̱ ninigu̱nʼ ga̱jma̱a̱ muʼni gaʼduunʼ rí muʼbúlú gajmiúlú mbáa bi̱ ndiyáa má xa̱bu̱ o eʼwíínʼ (1 Tim. 5:1, 2). Mbá xkri̱da, á mu nuʼbúlú gajmiúlú mbáa ndxájulú a̱ʼgu̱ o xa̱biya̱, muʼni gawíínʼ ikhaa ga̱jma̱a̱ bi̱ kuwa náa goʼwóo. Ma̱ngaa muʼni gachíí rí nambáxulúʼ gajmiúlú a̱ngiu̱lú (1 Tes. 4:3-8). Gundxaʼwamíjna̱ xú káʼnii gákumuu mbáa ndxájulú a̱ʼgu̱ á mu ndaʼyoo rí ajmbio̱o̱ ndaʼyoo náa timii xa̱bu̱ xtraʼtsinʼ. Lá maku̱mu̱u̱ rí ajmbio̱o̱ nandoo kaʼyoo ga̱jma̱a̱ ndaʼyamajkhuu rí nidamijná xáʼ. Na̱nguá (Mat. 5:28).

16. Xú káʼnii kagujtuminaʼ rí makuwáanʼ gagi ga̱jma̱a̱ rí kuaʼdáá ma̱ngaa rí maʼndulú kuʼñúún a̱ngiu̱lú rá.

16 “Gaʼdxalá ga̱jma̱a̱ rí kuaʼdáá xúgi̱” (atraxnuu Hebreos 13:5). * Á mu nakumulú kuʼyáá Jeobá, makuwáanʼ gagi ga̱jma̱a̱ rí kuaʼdáá. Mú xú káʼnii nambriguii rí makuwáanʼ gagi ga̱jma̱a̱ rí maʼndulú kuʼñúún a̱ngiu̱lú rá. Á mu kuwáanʼ gagi ga̱jma̱a̱ rí kuaʼdáá, mbuʼyáá rí a̱ngiu̱lú guáʼdáá itháan numún ki xóo rí muguaʼdáá wéñuʼ (1 Tim. 6:6-8). Xúʼthá numún a̱ngiu̱lú ní má xuxieʼkhá ga̱jma̱a̱ rí xú káʼnii kuwáanʼ. Ma̱ngaa xaxigúlú kuʼñúún eʼwíínʼ ní má xánigulú  muguaʼdáá itháan. Rí phú muʼni, manindxu̱lúʼ mbáa xa̱bu̱ bi̱ naxná rí gíʼdoo (1 Tim. 6:17-19).

17. Xú embáyuluʼ mbá a̱jkiu̱lú káxi̱ ga̱jma̱a̱ rí tsimíñulú mu musngajma rí nandulúʼ kuʼñúún a̱ngiu̱lú rá.

17 “Ma̱ndoo muʼthá ga̱jma̱a̱ xúgíʼ a̱jkiu̱lú” (atraxnuu Hebreos 13:6). * Á mu nakumulú kuʼyáá Jeobá ma̱ndoo muguaʼdáá mbá a̱jkiu̱lú káxi̱ ga̱jma̱a̱ xámiñulu muraʼníí xkujndu ma̱ngaa mundxaʼwamíjna̱ májánʼ. Rígi̱ gambáyulú muxnún tsiakii ga̱jma̱a̱ muʼni rí maʼni̱i̱ a̱jkiu̱ún a̱ngiu̱lú. Xúʼko̱ gusngajmúún rí nandulúʼ kuʼñúún (1 Tes. 5:14, 15). Á mu nakumulú kuʼyáá Jeobá, ma̱ngaa maguaʼdáá mbá a̱jkiu̱lú káxi̱ ga̱jma̱a̱ xámiñulu índo̱ garigá majphú mba̱a̱ gaʼkhu, numuu rí nduʼyáá rí ikhaa inuu má maʼni káwáanʼ (Luc. 21:25-28).

18. Ndiéjunʼ gambáyuluʼ mu maʼndulú kuʼñúún itháan bi̱ kuya̱ edxu̱u̱ rá.

18 “Garmáʼáan a̱jkia̱la ku̱ñu̱u̱n bi̱ kuya̱ edxu̱u̱” (atraxnuu Hebreos 13:7, 17). * Bi̱ kuya̱ edxu̱u̱ nuñajunʼ wéñuʼ ga̱jma̱a̱ numuu congregación ma̱ngaa nuriyaʼ mbiʼi mu muni rígi̱. Ikha jngó gíʼmaa ‹mangajulú kuʼñúún wéñuʼ numuu rí nuñajunʼ ga̱jma̱a̱ numulú› (1 Tes. 5:13). Gíʼmaa mundxaʼwamíjna̱ ga̱jma̱a̱ numuu xúgíʼ rí nuni ga̱jma̱a̱ numulúʼ. Á mu nuʼni rígi̱, muxníin núma̱aʼ ga̱jma̱a̱ maʼndulú kuʼñúún itháan. Tsíyulú rí ikhiin makuwá gíná ga̱jma̱a̱ rí magawúunʼ numuu mbóʼ rí gúʼni. Rí phú eyulú, mumbáñuun ga̱jma̱a̱ muʼnimbulúʼ kuʼñúún.

Lá ndu’yamajkuíí xúgí’ ñajun’rí nuni bi̱ kuya̱ edxu̱u̱ ga̱jma̱a̱ numulú rá. (Atayáá kutriga̱ 18)

GAʼNDULÚʼ KUʼÑÚÚN ITHÁAN A̱NGIU̱LÚ MÁMBÁ MBIʼI

19, 20. Ndiéjunʼ gambáyuluʼ mu maʼndulú kuʼñúún itháan a̱ngiu̱lú rá.

19 Bi̱ ni̱ndxu̱lú xa̱bi̱i̱ Jeobá najmaʼniáanʼlú numuu rí nandulúʼ kuʼyamijná wéñuʼ. Nákha mbiʼi rí nixtáa apóstol Pablo xúʼko̱ má nini. Maski ajndu xúʼko̱ Pablo nixnúún tsiakii cristianos rí maʼndún kuyamijná itháan. Niʼthún: “Guni itháan káxi̱ rígi̱” (1 Tes. 4:9, 10). Ndiéjunʼ ikha eʼsngúlúʼ rígi̱ rá. Rí xúgiáanʼ ma̱ndoo muʼni rí mámbá mbiʼi maʼndulú kuʼyamijná itháan.

20 Ikha jngó mámbá rí gúʼyáá texto rí kaʼyoo tsiguʼ 2016 náa Guʼwá nagimbáanʼ, guraximíjna̱: “Lá ma̱ndoo magruígúun itháan májánʼ a̱ngiu̱lú náa goʼwóoʼ ráʼ. Xú káʼnii gándoo gambáñun a̱ngiu̱lú bi̱ kajchún náa guʼwá e̱jua̱nʼ rá. Lá ndayamájkhun xa̱bu̱ bi̱ nidamijná ráʼ. Lá xtáá gagi ga̱jma̱a̱ rí gúʼdóʼ ráʼ. Ndiéjunʼ gámbáyuʼ maku̱mu̱ʼ ka̱yo̱o̱ itháan Jeobá rá. Xú káʼnii gánimboʼ itháan náa a̱ngiu̱lú bi̱ kuya̱ edxu̱u̱ náa congregación rá.” Guʼnimi̱jna̱ muʼnimbánii itháan mbá majun enii rígi̱, xúʼko̱ muʼni rí texto rí kama náa awúu̱n Guʼwá nagimbáanʼ rí kaʼyoo tsiguʼ magiʼdoo itháan numuu. Mani̱ndxu̱u̱ mbá rí maʼni marmáʼáan a̱jkiu̱lú rí mambáyulúʼ muʼnimbaníí xtágabu ndrígóo Pablo: “Gaʼndala ku̱ñu̱u̱n má xúʼko̱ a̱ngia̱la” (Heb. 13:1).

^ [1] (kutriga̱ 9): Á mu nandaʼ ma̱ta̱ya̱a̱ tikhu xkri̱da rí xú káʼnii xa̱bi̱i̱ Jeobá nusngajma rí nandún kuyamijná índo̱ narígá mbá gamiéjunʼ, atayáá video Toda nuestra asociación de hermanos.

^ párr. 2 Hebreos 10:36-39: “Numuu rí ikháanʼ ndayóoʼ maʼngala, numuu rí nda̱wa̱á rí ninila rí nandoo Dios, ma̱ndoo mundrigúla rí nikudaminaʼ rí nimbánuu má. Numuu rí “i̱mbá chíʼgíʼ mbiʼi”, ga̱jma̱a̱ “bi̱ na̱ʼkha̱ ma̱ʼkha̱nú ma̱ngaa xájyúuʼ”. “Mú bi̱ nindxu̱u̱ jmbii maxtáa ga̱jma̱a̱ numuu fe”, ga̱jma̱a̱, “á mu natanga̱a̱, xániguʼ rí gáʼni”. Ikha jngó ikháanʼlu, na̱nguá ñajunlú xa̱bu̱ bi̱ natanga̱a̱ mu maguma gámbáa, ni̱ndxu̱lú bi̱ kuaʼdáá fe mu makuwáanʼ má xúʼko̱”.

^ párr. 11 Hebreos 13:2: “Xambumala mundriguíin májánʼ bi̱ naguaʼnu náa guʼwála, numuu rí xúʼko̱ nini bi̱ nindriguíin ángeles, maski ajndu ikhiin túyáá”.

^ párr. 13 Hebreos 13:3: “Agiwanʼ a̱jkia̱la ku̱ñu̱u̱n bi̱ kajchún náa guʼwá e̱jua̱nʼ, xóo ikháanʼ kuwáanʼ ikhí mangáanʼ, ga̱jma̱a̱ bi̱ najmagíníi, numuu rí mangáanʼ nindxa̱laʼ mbóó xuwiʼ”.

^ párr. 15 Hebreos 13:4: “Bi̱ nidamijná gaʼni ga̱jma̱a̱ gamajkhu náa xúgínʼ, ragíʼmaa mubúnʼ gajmiún eʼwíínʼ, numuu rí Dios mandi̱ʼi̱i̱n cuenta xa̱bu̱ bi̱ nubúnʼ gajmiún bi̱ raʼkhíin guʼñún o ajmbiún ma̱ngaa xa̱bu̱ bi̱ ninigu̱nʼ bi̱ nubúnʼ gajmiún imba̱a̱ kaníí”.

^ párr. 16 Hebreos 13:5: “Rí xóo kuwáanʼ gasngájma rí tsiniguala wéñuʼ mbújkha̱a̱, ma̱ngaa gaʼdxalá ga̱jma̱a̱ rí kuaʼdáá xúgi̱. Numuu rí ikhaa niʼthí: ‹Nimbá miʼtsú xániʼñáʼ ga̱jma̱a̱ xániʼñátiga̱a̱n›”.

^ párr. 17 Hebreos 13:6: “Ikha jngó ma̱ndoo muʼthá ga̱jma̱a̱ xúgíʼ a̱jkiu̱lú: ‹Jeobá nindxu̱u̱ bi̱ nambáyuʼ; xámiñuʼ. Ndiéjunʼ gándoo gáʼniuʼ xa̱biya̱ rá.›”

^ párr. 18 Hebreos 13:7, 17: “Garmáʼáan a̱jkia̱la ku̱ñu̱u̱n bi̱ kuya̱ edxu̱u̱ náa ikháanʼla, bi̱ nithala ga̱jma̱a̱ numuu ajngá rawunʼ Dios, ma̱ngaa índo̱ ndu̱ya̱a̱ májánʼ xú káʼnii eni ikhiin, guyaridáá fe ndrígu̱ún. Gunimbala ku̱ñu̱u̱n bi̱ kuya̱ edxu̱u̱ náa ikháanʼla, guniñámijna rí mutañajuanla, numuu rí ikhiin kuwa ruñawanla ikháanʼ xóo bi̱ muxnaxi̱i̱ cuenta; mu rí ikhiin muni ga̱jma̱a̱ gagi raʼkháa ga̱jma̱a̱ a̱jma̱ a̱jkiu̱ún, numuu dí rígi̱ nda̱a̱ rí gambáyalá ikháanʼ”.