Atambaʼtaa mu matraxnuu

Anújngaaʼ náa imbo̱o̱ ináa

Bi̱ nutaraʼa numuu Jeobá

me̱ʼpha̱a̱

Lá manigua̱ʼ ma̱ta̱ya̱a̱ dí gajkhun ráʼ.

Lá manigua̱ʼ ma̱ta̱ya̱a̱ dí gajkhun ráʼ.

DÍ GAJKHUN ga̱jma̱a̱ numuu tikhuu graxe̱ dí gíʼdoo wéñuʼ numuu dí nuni xa̱bu̱. Mbáa ikháánʼ mangáán nitraximínáʼ mbá miʼtsu rígi̱:

  • Lá naxmiéjunʼ Dios kaʼyulúʼ ráʼ.

  • Lá maʼga̱nú mambáa guerra ga̱jma̱a̱ tsingíná ráʼ.

  • Ndiéjunʼ egíʼnii índo̱ nakhañulúʼ rá.

  • Ndiéjunʼ lá guáʼthi̱i̱n xa̱bu̱ bi̱ nikháñun rá.

  • Xú gíʼmaa muʼtájkáan mu maʼdxawunlú Dios rá.

  • Xú gándoo gákuwáanʼ gagi rá.

Náa gátaʼyááʼ ikháánʼ maxtiʼña̱a̱ graxe̱ rígi̱ rá. Rígá mbaʼa wéñuʼ libro náa naʼthí rí nariʼña̱a̱. Mú na̱nguá eʼthí mbríguu. I̱ʼwáʼ nambáyaʼ mbégu̱ʼ mú nda̱wa̱á naʼni̱i̱ wayuu ga̱jma̱a̱ naguma májáánʼ o naxtiʼkhu̱u̱.

Mú rígá mbá libro dí nariʼña̱a̱ mbájmbu ga̱jma̱a̱ naʼthí dí gajkhun. Jesucristo niʼthí índo̱ niʼtákáñuu Dios: “Ajngaʼ ñajun ri gako” (Juan 17:17). Rí xúgi̱ najmaʼnuʼ Ajngáa rígi̱ xóo Santa Biblia. Rí na̱ʼkha̱ ge̱jyooʼ nindxu̱u̱ mbá chíʼgíʼ rí nariʼña̱a̱ kaʼwu ga̱jma̱a̱ mbájmbu náa Biblia graxe̱ dí ndiʼyáá ginii.

 Lá naxmiéjunʼ Dios kaʼyulúʼ ráʼ.

NDÍJKHA RÍ NAGUMA GRAXE̱ RÍGI̱ RÁ. Kuwáanʼ náa mbá numbaaʼ mixkawiʼ ga̱jma̱a̱ ra̱májánʼ. Tikhuu religión nusngáa rí Dios eyoo dí mugíʼnii tsingíná.

DÍ NAʼSNGÁA NÁA BIBLIA. Dios nimbá miʼtsu tséʼni dí ra̱májánʼ. Job 34:10 naʼthí: “¡Dios gajkuwin xándoo maʼni dí ra̱májánʼ, ga̱jma̱a̱ ikhaa tsindxaʼwáminaʼ dí ra̱májánʼ!”. Numuu rí Dios nandoo kaʼyulúʼ wéñuʼ, ra̱ʼkhá tháán májánʼ dí gíʼdoo maxnúlúʼ, ikha jngó Jesús niʼsngúlúʼ munda̱ʼa̱ índo̱ gúʼtájkáan: “Anaʼxoʼ tsan xta mikui [...]. Gaʼka ri naratañajun. Gambanu xo ri nandaʼ Ikan, xoma ri nambanu mikui, xuʼkue-ma gambanu mbayi guejio manga” (Mateo 6:9, 10). Gajkhun rí Dios naxmiéjunʼ kaʼyulúʼ wéñuʼ rí asndu nixnáa a̱ʼdióo mu mambanúu rí nandoo maʼni (Juan 3:16).

Atayáá ma̱ngaa Génesis 1:26-28; Santiago 1:13, ga̱jma̱a̱ 1 Pedro 5:6, 7.

Lá maʼga̱nú mambáa guerra ga̱jma̱a̱ tsingíná ráʼ.

NDÍJKHA RÍ NAGUMA GRAXE̱ RÍGI̱ RÁ. Guerra naʼni rí makhañún mbaʼin wéñuʼ xa̱bu̱. Ga̱jma̱a̱ xúgiáanʼ nuraʼníí mixtiʼkhu tsingíná.

DÍ NAʼSNGÁA NÁA BIBLIA. Dios nikudaminaʼ dí índo̱ gáʼtañajunʼ náa xúgíʼ tsu̱du̱u̱ ku̱ba̱ʼ maʼni̱i̱ tsímáá ga̱jma̱a̱ dí xa̱bu̱ “nánguá majmañún muni itháan aguʼ”, asndu “chidiuún muni̱i̱la xóo reja ndrígóo arado” (Isaías 2:4). Ma̱ngaa Dios maʼni gámbáa dí ra̱májánʼ ga̱jma̱a̱ rí tsingíná. Náa Biblia naʼthí rígi̱ ga̱jma̱a̱ numún xa̱bu̱ numbaaʼ: “[Dios] maʼni kaʼwi̱i̱ xúgíʼ iyoʼ idún, ní xákhañun itháan, ní xárígá xtambiyaʼ, gitsawaʼskha asndu má gaʼkhu, xúgíʼ rígi̱ [ma̱ngaa dí ra̱májánʼ ga̱jma̱a̱ rí tsingíná] ninújngoo gáʼni ikhú” (Revelación [Apocalipsis] 21:3, 4).

Atayáá ma̱ngaa Salmo 37:10, 11; 46:9, ga̱jma̱a̱ Miqueas 4:1-4.

Ndiéjunʼ egíʼnii índo̱ nakhañulúʼ rá.

NDÍJKHA RÍ NAGUMA GRAXE̱ RÍGI̱ RÁ. Náa tikhuu religión nusngáa dí rígá xóó rí ndaʼya nda̱wa̱á rí nikháñu mbáa xa̱bu̱. Kuwa tikhun bi̱ nuthi rí bi̱ nikháñun ma̱ndoo muniu̱u̱n dí ra̱májánʼ xa̱bu̱ bi̱ nduya, o rí Dios naʼni gíníi xa̱bu̱ bi̱ ra̱míjínʼ náa aguʼ kámuu mbiʼi.

DÍ NAʼSNGÁA NÁA BIBLIA. Índo̱ nakháñulú nuniʼñáaʼ rakuwáanʼ. Eclesiastés 9:5 naʼthí rí “bi̱ nikháñun, [...] nánguá eya nditháan kayuʼ”. Nándáa rí eyáá, nándáa rí eku̱mún, asndu nándáa rí eni, ikha jngó ní xándoo muniu̱u̱n dí ra̱májánʼ bi̱ nduya, ni má xándoo mumbañún (Salmo 146:3, 4).

Atayáá ma̱ngaa Génesis 3:19 ga̱jma̱a̱ Eclesiastés 9:6, 10.

 Ndiéjunʼ lá guáʼthi̱i̱n xa̱bu̱ bi̱ nikháñun rá.

NDÍJKHA RÍ NAGUMA GRAXE̱ RÍGI̱ RÁ. Xúgiáanʼ nandulúʼ makuwáanʼ gajmiúlú xa̱bu̱ bi̱ nandulúʼ kuʼñúún. Ikha jngó, nandulúʼ mbuʼñún mbu̱júu̱ a̱ngiu̱lú bi̱ nikháñun.

DÍ NAʼSNGÁA NÁA BIBLIA. Mbaʼin xa̱bu̱ bi̱ nikháñun matangi̱i̱n makuwá mbu̱júu̱ʼ. Jesús niʼthí rí “xúgínʼ bi̱ kajtiin náa iñá wa̱jinʼ mudxawíín aʼwóo ikhú mawuaxu̱ún” (Juan 5:28, 29). Xa̱bu̱ bi̱ mawuaxu̱ún náa tsu̱du̱u̱ ku̱ba̱ʼ makuwá kámuu mbiʼi ga̱jma̱a̱ mbuyáá xú káʼnii gáʼnii mitsaan, xó má nindoo Dios asndu nákha ginii (Lucas 23:43). Xúʼko̱, índo̱ gáʼnii mitsaan, xa̱bu̱ bi̱ naguáju̱n jmbu náa Dios makuwá kámuu mbiʼi ga̱jma̱a̱ ní xáʼniun nandii. Náa Biblia naʼthí: “Xa̱bu̱ bi̱ nuni rí jmbu makuwá kámuu mbiʼi náa tsu̱du̱u̱ ku̱ba̱ʼ” (Salmo 37:29).

Atayáá ma̱ngaa Job 14:14, 15; Lucas 7:11-17, ga̱jma̱a̱ Hechos 24:15.

Xú gíʼmaa muʼtájkáan mu maʼdxawunlú Dios rá.

NDÍJKHA RÍ NAGUMA GRAXE̱ RÍGI̱ RÁ. Náa xúgíʼ religión xa̱bu̱ nutajkháan. Mú, mbaʼin nundxa̱ʼwa̱míjna̱ dí na̱nguá extiʼña̱a̱ rí nutajkháan.

DÍ NAʼSNGÁA NÁA BIBLIA. Jesús niʼthí dí ragíʼmaa muʼthá kikháá ajngáa índo̱ nuʼtájkáan. Niʼthí: “Rido natane tsakun, maxatangan maratan ika ika ajnga ri niratan-ma” (Mateo 6:7). Á mu nandulúʼ rí Dios maʼdxawunlú, gíʼmaa muʼtákañi xó má ikhaa eniguʼ. Mu muʼni rúʼko̱ gíʼmaa mbuʼyáá ndiéjunʼ rí eyoo ga̱jma̱a̱ munda̱ʼa̱ xó má eyoo ikhaa. “Tséʼniuu ndiéjunʼ nindxu̱u̱ rí gúnda̱ʼa̱a̱, ikhaa naʼdxun á mu ikháanʼ nunda̱ʼa̱ rí nandoo ikhaa”, xúʼko̱ eʼthí náa 1 Juan 5:14.

Atayáá ma̱ngaa Salmo 65:2; Juan 14:6, 14, ga̱jma̱a̱ 1 Juan 3:22.

Xú gándoo gákuwáanʼ gagi rá.

NDÍJKHA RÍ NAGUMA GRAXE̱ RÍGI̱ RÁ. Tikhun nakumu̱ún rí mbújkha̱a̱, dí majmaʼnuʼ o dí makujmiin míjínʼ maʼni rí makuwá gagi, mbaʼin xa̱bu̱ nduyááʼ rígi̱. Múʼ na̱nguá kuwa gagi.

DÍ NAʼSNGÁA NÁA BIBLIA. Jesús nisngájma xú káʼnii gándoo gákuwáanʼ gagi nákha niʼthí: “Gagi kuwa bi̱ nduyáá rí ndañúnʼ mbuyáaʼ Dios, numuu dí ikhiin kaʼñúún Reino bi̱ xtáa mekhuíí” (Mateo 5:3). I̱ndó makuwáanʼ gagi á mu nduʼyááʼ dí itháan gíʼdoo numuu: Muniʼnúnʼ rí gajkhun ga̱jma̱a̱ numuu Dios ma̱ngaa rí eyoo maʼni ga̱jma̱a̱ numulúʼ. Ikhaa rúʼko̱ na̱ʼkha̱ raʼthí náa Biblia, ga̱jma̱a̱ á mu nuniʼnúuʼ mambáyulúʼ mbuʼyáá náa biʼyaa dí itháan gíʼdoo numuu ga̱jma̱a̱ náa biʼyaa dí na̱nguá. Índo̱ nuniʼñáʼ dí Biblia maxnúlúʼ ikha índo̱ guraʼwíí rí muʼni, nakuwáanʼ itháan májánʼ (Lucas 11:28).

Atayáá ma̱ngaa Proverbios 3:5, 6, 13-18 ga̱jma̱a̱ 1 Timoteo 6:9, 10.

 Niguámbulú ndiʼyáá mbá chíʼgíʼ xú káʼnii eriʼña̱a̱ Biblia mbá majun graxe̱. Lá nandaʼ ma̱ta̱ya̱a̱ xóó itháan ráʼ. Á mu ikháánʼ ni̱ndxa̱ʼ mbáa “bi̱ nduyáá rí nda̱ñúnʼ mbuyáaʼ Dios”, maʼnda̱ʼ majmañaaʼ itháan. Mbáa natraximínáʼ náa numuu rí Dios naniñuʼ marigá dí ra̱májánʼ ga̱jma̱a̱ dí tsingíná á mu gajkhun naxmiéjunʼ kaʼyulúʼ. O mbáa nandaʼ ma̱ta̱ya̱a̱ xú káʼnii gándoo maraxtaa itháan gagi gajmiáanʼ bi̱ kuwa náa guʼwáaʼ. Náa Biblia nariʼña̱a̱ májánʼ graxe̱ rígi̱ ga̱jma̱a̱ xúʼko̱ má i̱ʼwáʼ graxe̱.

Mú, mbaʼin xa̱bu̱ na̱nguá enigu̱nʼ mbuyááʼ maxtiʼña̱a̱ graxe̱ ndrígu̱ún náa Biblia. Nduyáá xóo mbóo libro dí ra̱ʼkhá tháán mba̱a̱ ga̱jma̱a̱ dí mingíjyúuʼ makruaʼaʼ. Lá nandaʼ mumbayááʼ mu mataxkamaa xú káʼnii eriʼña̱a̱ náa Biblia graxe̱ rí natani ráʼ. Bi̱ nutaraʼa numuu Jeobá guáʼdáá a̱jma̱ enii rí xú káʼnii mumbayááʼ.

Timbá nindxu̱u̱ folleto Ajngáa rí májánʼ na̱ʼkha̱ náa Dios, niguma mu mambáñun xa̱bu̱ —mú itháan bi̱ na̱nguá wapiin— mu mbuyáá xú káʼnii eriʼña̱a̱ Biblia graxe̱ dí itháan gíʼdoo numuu. Dí raga̱jma̱ nindxu̱u̱ rí miʼsngúún xa̱bu̱ ga̱jma̱a̱ numuu Biblia náa guʼwún. Ma̱ndoo maʼga̱ náa guʼwáaʼ mbáa bi̱ naʼtáraʼa numuu Jeobá bi̱ najmañuu maʼsngáa májánʼ o i̱mba̱ níʼkhá náa má eyaaʼ ikháánʼ, ikhaa maríyaaʼ mbá chíʼgíʼ mbiʼi rí mbá xmáná mu matanigajmaa Biblia ga̱jma̱ʼ. Mbaʼin wéñuʼ xa̱bu̱ nimbáñun rí nijuiʼsngúún, ga̱jma̱a̱ mbaʼin niguánu nithi dí nixkamaa rí gajkhun.

Ikháánʼ mangáán ma̱ndoo ma̱ta̱ya̱a̱ rí ra̱ʼkhá tháán gíʼdoo numuu ajngáa rí gajkhun dí na̱ʼkha̱ náa Biblia. Raʼkháa i̱ndó naʼni káwáanʼ náa kiʼsngáa rí minduwaʼ dí naʼni ngawaánlú o naʼni míñulú, ma̱ngaa naʼni muguaʼthi̱i̱n dí májánʼ nda̱wa̱á, dí phú gajkhun makuwáanʼ gagi. Minaʼ Jesús niʼthí: “Muninuhuinla ri gako, jame ri gako maʼnejahuiñaʼla” (Juan 8:32).