Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Biblia ga̱jma̱a̱ ajngóo

 KÍXNUU 16

Na̱ʼkha̱nú Mesías

Na̱ʼkha̱nú Mesías

Jeobá nasngájma rí Jesús bi̱ Nazaret ni̱ndxu̱u̱ Mesías bi̱ nijuiʼtá ma̱ʼkha̱

XÚ KÁʼNII gándo muniʼniiʼ xa̱bu̱ Mesías rá. Mínaa má Diúu̱ gasngájma xú káʼnii ni̱ndxu̱u̱. Ajkhu̱ cientu tsiguʼ nda̱wa̱á rí niguamba ni̱gu̱mara̱ʼmáʼ Escrituras Hebreas, mbáa ángel bi̱ mbiʼyuu Gabriel ni̱ʼkha̱ náa María, mbáa dxáʼgu bi̱ xtáa náa norte ndrígóo Galilea, náa Nazaret. Gabriel niʼthúu̱n María dí magiʼdaa mbáa ada̱. Maski ajndu ikhaa xóo tsebo̱ʼ ga̱jma̱a̱ nimbáa xa̱bu̱, Diúu̱ má gáʼni dí majkuewa̱a̱n ga̱jma̱a̱ sie̱khi̱i̱ ndrígóo, dí nandoo gaʼthúu̱n espíritu santo. Ada̱ bugi bi̱ nijuiʼtáriyaa rí mani̱ndxu̱u̱ Rey bi̱ maʼtáñajunʼ kámuu mbiʼi. Diúu̱ má gáʼni dí magiwanʼ Aʼdá giʼni náa awúu̱n María, índo̱ niʼthí rígi̱ kaʼnííʼ xóó xtáa mekhuíí Jesús.

María nigruigú ga̱jma̱a̱ májánʼ ñajunʼ rígi̱. Bi̱ mbayáa̱, ni̱ndxu̱u̱ mbáa xa̱bu̱ bi̱ naʼtóo̱ ixi̱ bi̱ mbiʼyuu José, ndiyáa̱ María nda̱wa̱á rí Diúu̱ nikuʼmaa mbáa ángel mú maʼthúu̱n José ndiéjunʼ nirígá. Gakumáaʼlú rí nijuiʼtáriya rí Mesías magumaa náa Belén, raʼkháa náa Nazaret (Miqueas 5:2). Xú káʼnii gambánuu rí nijuiʼtáriyaa, á mu xuajin rúʼko̱ mitsinguanʼ guanúu naʼni 140 kilómetros ga̱jma̱a̱ i̱mbo̱o̱ xuajin rá.

Nguáta mbiʼi nda̱wa̱á, mbáa Xa̱bu̱ Ñajunʼ romano nixná awan rí maguma̱a̱ censo, ga̱jma̱a̱ xúgínʼ xa̱bu̱ ndiyóóʼ rí muriyaa iñu̱únʼ náa xuajin niguwáʼ. Angui̱i̱n ndrígóo José ga̱jma̱a̱ María nikuwa náa Belén, ikha jngó nájmi̱i̱n nigun ikhí índo̱ rí inguata mbiʼi ma eyóoʼ rí maxtáa aʼdióo María (Lucas 2:3). Jesús nigumaa náa kúwi̱i̱n xujkhúʼ, jamí ndiyóóʼ rí mutama̱ʼ náa nuphiʼtsu xujkhúʼ. Ikhaa má mbiʼi rúʼko̱, mijngii má náa kúwi̱i̱n baxtúu nikujmin mbaʼin ángeles, nithi rí ndiʼkhú nigumaa Mesías o Cristo, bi̱ nijuiʼtá ma̱ʼkha̱.

Ma̱ngoo makuwíín eʼwíínʼ xa̱bu̱ bi̱ musngajma gajkhun rí Jesús nijuiʼtá ma̱ʼkha̱ ikhaa má Mesías. Gaʼyee Isaías niʼtáriyaa rí mbáa maʼnimujunʼ ka̱mba̱a̱ ñajunʼ dí gíʼdo numuu rí maʼni Cristo (Isaías 40:3). Ikhaa buʼko̱ nini̱ndxu̱u̱ Juan bi̱ nakumíínʼ iyaʼ xa̱bu̱. Mbá miʼtsú, índo̱ rí ndiʼyoo Jesús, niʼthí: «Jenla Aʼda Borregüi Dios tsi narigu aʼkun numbaaʼ». Nacha̱ má mbiʼin bi̱ náguwaʼ kidxuuʼ Juan nini̱ndxu̱ún discípulos ndrígóo Jesús. Mbáa dí ikhíínʼ niʼthí: «Nixkamaxoʼ Mesías» (Juan 1:29, 36, 41, AMM).

Mú ndayóóʼ makujmaa itháan rí xúʼko̱ kaʼnii ni̱ndxu̱u̱. Índo̱ rí Juan nikumáaʼ iyaʼ Jesús, Jeobá nixná mbiʼyuu Mesías ga̱jma̱a̱ espíritu santo, ma̱ngoo niʼthí: «Aʼdeʼ tsigueʼ tsi naʼne akuinʼ-jayo, jame pu-nadxu akuinʼ jayo» (Mateo 3:16, 17, AMM). ¡Asndu náa ni̱ʼkha̱nú Mesías bi̱ nijuiʼtá ma̱kha̱!

Mú, nguana nirígá rígi̱ rá. Nákha tsiguʼ 29, índo̱ xtáa raramuʼ ajkhu̱ cientu ajkhu̱ skiñuʼ ijtsu̱ mu tsiguʼ rí niʼtáriyaa Daniel. Ikhaa rígi̱ ñajunʼ tikhuʼ rí nasngájma rí Jesús ni̱ndxu̱u̱ Mesías. Dí xúgi̱ rá. Ndiéjunʼ la gáʼthí índo̱ gáxtáa náa tsu̱du̱u̱ Ku̱ba̱ʼ xá.

(Na̱ʼkha̱ náa tsinaʼ mba̱ʼu̱ 1 asjndu 3 ndrígóo Mateo, tsinaʼ mba̱a̱ 1 ndrígóo Marcos, tsinaʼ mba̱a̱ 2 ndrígóo Lucas ga̱jma̱a̱ tsinaʼ mba̱a̱ 1 ndrígóo Juan.)