Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Biblia ga̱jma̱a̱ ajngóo

 KÍXNUU 26

Ku̱ba̱ʼ naʼni̱i̱ mitsaan mbu̱júu̱

Ku̱ba̱ʼ naʼni̱i̱ mitsaan mbu̱júu̱

Ga̱jma̱a̱ numuu Reino mesiánico, Jeobá naʼnika̱ʼwu̱u̱ mbiʼyuu, naʼnigámbóo ga̱jma̱a̱ xúgíʼ dí tséjmaa ma̱ngoo naniñuʼ mikaʼwu rí ikhaa kaʼyoo maʼtáñajunʼ

RÍ HUASJŊGAJMA Juan, o Apocalipsis —ni̱ndxu̱u̱ i̱yi̱i̱ʼ dí i̱mbó dí najkha̱ rámbá ga̱jma̱a̱ Biblia— ikhaa naʼniún muguaʼthi̱i̱n xúgínʼ xa̱bu̱ numbaaʼ. Apóstol Juan niʼnirámáʼ, kagu mbaʼa rí wasngajma rí kiʼtáriyaaʼ dí ma̱ri̱gá nda̱wa̱á nijkha̱nú nimbánuu rí nikudaminaʼ maʼni Jeobá.

Timbá rí nikhujma rí Jesús bi̱ nitu̱xi̱i̱, naxnún sie̱khi̱i̱ ma̱ngaa naxprigun mbaʼa congregación. Rí nikujmaa nda̱wa̱á nasngájma xú káʼnii ni̱ndxu̱u̱ xíliu̱u̱ Diúu̱ náa mekhuíí ma̱ngaa mbiʼin xa̱bu̱ bi̱ ñajúúnʼ espíritu nunimba̱a̱ Jeobá.

Índo̱ na̱ʼkha̱ rangiyuu rí nikudaminaʼ maʼni Diúu̱, Aʼdá Mugu̱ (Jesucristo) nagruigú mbóo i̱yi̱i̱ʼ kambroʼo ga̱jma̱a̱ mbá juwan sello. Índo̱ rí nimbaʼto rí ajkhu̱ ginii ikhí nikhujmiin ajkhu̱u̱n xa̱bu̱ bi̱ trámiinʼ náa ajkhui̱i̱n guayu. Ti̱mbáa mínaa má Jesús, bi̱ nikánaa corona mu mani̱ndxu̱u̱ Rey karigui mbáa guayu miʼxáa e̱jkha̱. Bi̱ ajtsíin trámiinʼ náa guayu bi̱ mixtiʼkhu color, rígi̱ eyoo gáʼthí aguʼ, ewiiʼ, ga̱jma̱a̱ nandii, rígi̱ makhujmaa rí numbaaʼ rígi̱ gíiʼ mijngii mambáa. Índo̱ nimbaʼto rí maʼni juwan sello niwan juwan aʼphú rí nundiyíí trompeta, nandoo gáʼthi dí miʼthá ndiéjunʼ nagíminaʼ Diúu̱ maʼni. Ikhaa rígi̱ najkha̱ ka̱gu̱u̱ ma̱ri̱gá i̱mbá juwan gamiéjunʼ, o nasngájma rí xú káʼnii gigaa Diúu̱.

Nda̱wa̱á, Juan eʼyoo xú káʼnii egumaa mbáa ada̱, nandoo gáʼthúun rí maʼtáñajunʼ mbu̱júu̱ Reino ndrígóo Diúu̱ náa mekhuíí. Nirígá aguʼ, ma̱ngaa Satanás gajmíi̱n xa̱bu̱ wéñiiʼ ndrígio̱o̱ nixkawíín náa mekhuíí ma̱ngaa nixkriguíín náa Ku̱ba̱ʼ. Ikhú niwan mbá aʼwá dí niʼthí: «Miguini su kuhua naʼ inu numbaʼ». Náa numuu rá. Numuu rí Gixa̱a̱ ndaʼyoo rí nánguá mba̱yu̱u̱ʼ mbiʼi maxtáa, ma̱ngaa nakiʼnáa (Rí huasjŋgajma Juan 12:12).

Jesús nagi̱ʼdu̱u̱ nakujmaa mbu̱júu̱ náa mekhuíí xóo mbáa aʼdá mugu̱, náa nijniúu nakujmin 144,000 xa̱bu̱ bi̱ kixtaʼwíín bi̱ «mutañajunʼ jm[iin]» Cristo. Náa i̱yi̱i̱ʼ rí Rí huasjŋgajma Juan, nduʼyáá rí kúwi̱i̱n eʼwíínʼ bi̱ ñajúúnʼ náa tsígaʼ ikhíínʼ má nindxuún 144,000 xa̱bu̱ numbaaʼ (Rí huasjŋgajma Juan 14:1; 20:6).

Nda̱wa̱á, nagimbíin Xa̱bu̱ Ñajunʼ bi̱ kúwi̱i̱n náa tsu̱du̱u̱ Ku̱ba̱ʼ mu ma̱ri̱gá Armagedón, o «aguʼ, mbiʼi dí phú kiajunʼ ndrígóo Diúu̱ bi̱ gíʼdoo Xúgíʼ sie̱khi̱i̱», ma̱ngaa muxmijná gajmiún mbáa xa̱bu̱ bi̱ karigui guayu miʼxáa, ikhaa ma Jesús, gajmíi̱n xa̱bi̱i̱ mekhuíí. Xú káʼnii eyámbaa aguʼ rígi̱ rá. Xa̱bu̱ Ñajunʼ nagumagámbi̱i̱n ma̱ngaa Satanás najuguaraʼa. Jesús gajmíi̱n 144,000 nutañajunʼ náa tsu̱du̱u̱ Ku̱ba̱ʼ mbá míí tsiguʼ, índo̱ gámbá mbá míí tsiguʼ, Satanás ma̱ngaa mambáa (Rí huasjŋgajma Juan 16:14; 20:4).

Ndiéjunʼ gáʼni Xa̱bu̱ Ñajunʼ ndrígóo Cristo bi̱ maʼtáñajunʼ mbá Míí tsiguʼ ga̱jma̱a̱ numún xa̱bu̱ bi̱ nunimbu̱ún rá. Juan eʼnirámáʼ: «[Jeobá] maʼnigujndoʼle ri yaʼdun [o iyaʼ idún] iquin, ga ri niʼcan [o nakháñuluʼ] naxariga [...], ni ri xtambiyaaʼ, ni ri gisaʼjuasca, ni gaʼcu; numu xoguiʼ ri neriga naca guini, naŋgua-ja-ra» (Rí huasjŋgajma Juan 21:4). Xúʼko̱ gáʼni, ¡Ku̱ba̱ʼ naʼni̱i̱ mitsaan mbu̱júu̱!

Xúʼko̱ kaʼnii, i̱yi̱i̱ʼ Rí huasjŋgajma Juan niguámbóo niʼthí ajngóo Biblia: Ga̱jma̱a̱ numuu Reino mesiánico, Jeobá maʼnika̱ʼwu̱u̱ nambiʼyuu ma̱ngoo rí magíiʼ kámuu dí mbáwii ikhaa kaʼyoo maʼtáñajunʼ.

(Na̱ʼkha̱ náa i̱yi̱i̱ʼ Rí huasjŋgajma Juan.)