Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Ndiéjunʼ phú eʼsngáa náa Biblia rá.

 CAPÍTULO 17

Rí muʼtájkáan naʼni makuwáanʼ itháan mijngii náa Dios

Rí muʼtájkáan naʼni makuwáanʼ itháan mijngii náa Dios
  • Náa numuu rí gíʼmaa muʼtájkáan rá.

  • Ndiéjunʼ gíʼmaa muʼni mu Dios madxaunʼlu rá.

  • Xú káʼnii eriʼña̱a̱ Dios índo̱ nuʼtákáñii rá.

“Bi̱ Niʼni mekhu ga̱jma̱a̱ ku̱ba̱ʼ” nandoo maʼdxaun rí nuʼtájkáan

1, 2. Ndíjkha rí gíʼdoo wéñuʼ numuu rí muʼtájkáan, ga̱jma̱a̱ náa numuu rí ndayóoʼ mbuʼyáá rí eʼsngáa náa Biblia ga̱jma̱a̱ numuu rí muʼtájkáan rá.

ÍNDO̱ nduʼyáá xúgíʼ dí rígá náa numbaaʼ rí kuwáanʼ nindxu̱u̱ lájuíin wéñuʼ. Mú Jeobá, “bi̱ Niʼni mekhu ga̱jma̱a̱ ku̱ba̱ʼ”, ndaʼyoo xuajen mba̱ʼo̱ xóo mbéʼtsi iyaʼ náa mbá cubeta (Salmo 115:15; Isaías 40:15). Mú, náa Biblia naʼthí rí “Jeobá xtáa mijngii náa xúgínʼ xa̱bu̱ bi̱ nutakáñii, náa xúgínʼ xa̱bu̱ bi̱ nutháán rí gajkhun”, ga̱jma̱a̱ ikhaa “maʼnimbánuu rí nandún xa̱bu̱ bi̱ nuni ñajunʼ ikhaa, ga̱jma̱a̱ maʼdxaun índo̱ gútakáñii rí mambáñun” (Salmo 145:18, 19). Atayáá ndiéjunʼ eyoo gáʼthúu̱n ajngáa rígi̱. Ikhaa bi̱ Niʼni xúgíʼ dí rígá ga̱jma̱a̱ bi̱ gíʼdoo xúgíʼ tsiakii xtáa mijngii náa mámbáa rí ikháanʼ ma̱ngaa maʼdxun á mu “nutháán rí gajkhun”. ¡Ra̱ʼkhá tháán májánʼ nindxu̱u̱ rí ma̱ndoo muʼtákáñii Dios!

2 Á mu nandulúʼ rí Jeobá maʼdxun rí nuʼtháán, gíʼmaa muʼtákáñii xó má e̱nda̱ʼa̱ ikhaa. Mú, xú káʼnii gándoo guʼtájkáan á mu tséʼyáá rí eʼsngáa náa Biblia rá. Gíʼdoo wéñuʼ numuu rí mbuʼyáá, numuu rí índo̱ nuʼtájkáan naʼni makuwáanʼ itháan mijngii náa Jeobá.

NÁA NUMUU RÍ GÍʼMAA MUʼTÁKÁÑII JEOBÁ RÁ.

3. Arathá ndíjkha rí gíʼdoo wéñuʼ numuu muʼtákáñii Jeobá rá.

3 Mbá rí gíʼdoo wéñuʼ numuu mu muʼtákáñii Jeobá, nindxu̱u̱  rí ikhaa má naʼtulúʼ muʼni. Náa Biblia naʼthí: “Xamañajuanʼla jma numu nditan ri riga naʼ numbaʼ riguiʼ, indo utan xoguiʼ riʼcui Dios riʼdo nuni sacun naʼ inu Ica; undaʼja ñujunʼ iyaʼla maxnaʼle, cami utan sinumale jma numu ri Ica naʼni jma nindiʼla. Ga hui ri naʼca naʼ Dios, ica mariga naʼ aun aʼcunʼla, ica hui riʼcui ñajunʼ ri pu-mba ga miŋguijiuʼ macuraʼjo su xabu, ga ica-ma hui riʼcui mbayaun aʼcunʼla jma gacumaʼla muri xahuaʼda gajma muri cuhua cambaxiʼla jmiʼla Cristo Jesús” (Filipenses 4:6, 7). Ikháanʼ tsíyulú gúʼni gaʼduunʼ rí naʼtulúʼ muʼni bi̱ Naʼtáñajúnʼ náa xúgíʼ dí rígá.

4. Ndíjkha rí muʼtákáñii Jeobá tsejtsí mbiʼi naʼni rí mambáxulu itháan májánʼ gajmiúlú rá.

4 I̱mba̱ numuu rí gíʼmaa muʼtákáñii Dios, nindxu̱u̱ índo̱ nuʼtákáñii tsejtsi mbiʼi, naʼni rí mambaxúlúʼ itháan májánʼ gajmiúlú Jeobá. Xa̱bu̱ bi̱ nambáxu̱u̱n májánʼ tsetami̱jná kaʼ índo̱ rígá mbá rí ndaʼñún, nutamijná xúgíʼ mbiʼi numuu rí naxmiéjunʼ kuyamijná. Nambáxu̱u̱n itháan májánʼ índo̱ nutamijná xúgíʼ rí nundxa̱ʼwa̱míjna̱, rí naʼni maxmiéjunʼ ga̱jma̱a̱ rí naku̱mu̱ún. Xúʼko̱ má kaʼnii nindxu̱u̱ rí mambaxúlúʼ gajmiúlú Jeobá ma̱ngaa. Náa libro rígi̱, ikháánʼ nijmañaʼ  wéñuʼ rí xtáa raʼsngáa náa Biblia ga̱jma̱a̱ numuu Jeobá, xú káʼnii xa̱bu̱ nindxu̱u̱ ga̱jma̱a̱ rí wíji̱ maʼni nda̱wa̱á. Ikháánʼ ni̱dxu̱ʼnú nitayáá rí gajkhun xtáa Dios. Índo̱ nuʼtákáñii Anu̱lú bi̱ xtáa mekhuíí nandoo nuʼtháán xúgíʼ rí nundxa̱ʼwa̱míjna̱ ga̱jma̱a̱ xúgíʼ rí naku̱mu̱lú. Ga̱jma̱a̱ xúʼko̱ maraxtaa itháan mijngii náa ikhaa (Santiago 4:8).

NDIÉJUNʼ RÍ GÍʼMAA MUʼNIMBÁNII RÁ.

5. Xú káʼnii eʼngo̱o̱ eʼyáá rí Jeobá tseʼdxun xúgíʼ rí nutajkháan xa̱bu̱ rá.

5 Lá naʼdxaun Jeobá xúgíʼ rí nutajkháan xa̱bu̱ ráʼ. Atayáá rí niʼthún xa̱bu̱ israelitas bi̱ túnimbu̱ún bi̱ nikuwa nákha mbiʼi ndrígóo gaʼyee Isaías: “Maski ajndu ikháanʼ nutajkháan mbaʼa nutu, ikhúúnʼ na̱nguá edxuun; numuu rí niradíin mbaʼin wéñuʼ xa̱bu̱” (Isaías 1:15). Á mu ikháanʼ tséʼni rí nanigu̱ʼ Dios, ikhaa xaʼdxun rí guʼtájkáan. Ikha jngó, mu ikhaa maʼdxaunlú gíʼmaa munimbánii rí na̱nda̱ʼa̱.

6. Mu Dios maʼdxun rí guʼtájkáan, ndiéjunʼ gáʼyóóʼ muʼni rá.

6 Mbá rí phú gíʼmaa muguaʼdáá nindxu̱u̱ fe (atraxnuu Marcos 11:24). Apóstol Pablo niʼnirámáʼ: “Su raguiʼdo ri siaquiyu aʼtiun [fe], numu ri ndayoʼ ri su maŋguiyu naʼ inu Dios, guiʼma maʼnimbo ri xta su Dios jma ri maxnali ri muʼdala naʼ ri su iquin nduyaʼle” (Hebreos 11:6). Mu maraʼdáá mbá fe rí gajkhun raʼkháa i̱ndó ndaʼyóoʼ ma̱ta̱ya̱a̱ rí ikhaa xtáa, o ma̱ta̱ya̱a̱ rí ikhaa naʼdxaun o ma̱ta̱ya̱a̱ rí nariʼña rí nutajkháan xa̱bu̱. Rí xú káʼnii kuwáanʼlú gíʼmaa masngájma rí kuaʼdáá fe (Santiago 2:26).

7. a) Ndíjkha rí gíʼmaa muʼtákáñii Jeobá ga̱jma̱a̱ ajngáa gamajkhu rá. b) Xú káʼnii esngajmá rí ni̱ndxu̱lú xa̱bu̱ wabaʼ índo̱ nuʼtákáñii ga̱jma̱a̱ índo̱ nuʼtháán rí gajkhun rá.

7 Imbo̱o̱ rí na̱nda̱ʼa̱ Jeobá índo̱ guʼtájkáan náa ikhaa rí manindxu̱lúʼ xa̱bu̱ wabaʼ ga̱jma̱a̱ muʼthán rí gajkhun. Lá ragájkhun dí rígá mbaʼa numuu mu manindxu̱lúʼ xa̱bu̱ wabaʼ índo̱ guʼtákáñii Dios ráʼ. Índo̱ xa̱bu̱ nutamijná gajmiún mbáa presidente, ikhiin nutháán ga̱jma̱a̱ gamajkhu, numuu rí nduyáá rí gíʼdoo mbá ñajunʼ mba̱a̱. Ikha jngó, Jeobá  kaʼyoo muʼthán ga̱jma̱a̱ xúgíʼ gamajkhu (Salmo 138:6). Numuu rí ikhaa nindxu̱u̱ mbáa ‹Dios bi̱ gíʼdoo Xúgíʼ tsiakii› (Génesis 17:1). Rí xú káʼnii nuʼtákáñii Dios gíʼmaa masngájma rí nduʼyáá májánʼ rí ikhaa nindxu̱u̱ itháan mba̱a̱ ki xóo ikháanʼ. Rí ni̱ndxu̱lú xa̱bu̱ wabaʼ maʼni rí muthán xúgíʼ rí gajkhun ga̱jma̱a̱ xúʼtha kikháá ajngáa (Mateo 6:7, 8).

8. Xú káʼnii gándoo gúʼnimbaníí rí nunda̱ʼa̱ índo̱ nuʼtájkáan rá.

8 I̱mba̱ rí na̱nda̱ʼa̱ Dios mu ma̱ndoo maʼdxun rí gúʼthán, nindxu̱u̱ rí muʼni xó má ninda̱ʼa̱a̱. Mbá xkri̱da, á mu nunda̱ʼa̱a̱ Jeobá: Araxnuxu “guinisu ri ndayaʼxuʼ xuguiʼ”, gíʼmaa rí muñajunʼ gakhii wéñuʼ náa ñajunʼ rí guxkamaa (Mateo 6:11; 2 Tesalonicenses 3:10). Á mu nunda̱ʼa̱ rí mambáyulúʼ muraʼníí mbá rí tséʼngulú guʼnimbaníí, ndayóoʼ rí xúʼni̱ nimbá rí maʼga̱ kaguáanʼ muxuʼdámi̱jna̱ aʼkhá (Colosenses 3:5). Mú raʼkháa i̱ndó rígi̱ eyóoʼ mbuʼyáá mu muʼtákáñii Dios, ndayóoʼ mbuʼyáá xú káʼnii extiʼña̱a̱ graxe̱ rí naguma ga̱jma̱a̱ numuu rí nuʼtájkáan.

GRAXE̱ RÍ NAGUMA GA̱JMA̱A̱ NUMUU RÍ NUʼTÁJKÁAN

9. Tsáa gíʼmaa muʼtákáñii, ga̱jma̱a̱ tsáa mbiʼyuu gíʼmaa majmulúʼ rá.

9 Tsáa gíʼmaa muʼtákáñii rá. Jesús niʼsngúún discípulos ndrígóo rí mutajkáan xúgi̱ kaʼnii: “Anaʼxoʼ tsan xta mikui” (Mateo 6:9). Ikha jngó, mbáwíi Jeobá Dios gíʼmaa muʼtákáñii. Mú, ikhaa nandoo rí mbuʼyáá xú káʼnii nindxu̱u̱ ñajunʼ rí gíʼdoo Jesús bi̱ nindxu̱u̱ Aʼdá giʼnii. Xó má ndiʼyáá náa capítulo 5, Jeobá nikuʼmaa Jesús náa tsu̱du̱u̱ Ku̱ba̱ʼ mu maʼni káwáanʼ náa aʼkhá ga̱jma̱a̱ rí nakháñulú (Juan 3:16; Romanos 5:12). Ikhaa nayéjkha̱ edxu̱u̱ náa Ndxajkun ga̱jma̱a̱ nigíiʼ xóo Juez (Juan 5:22; Hebreos 6:20). Ikha jngó, náa Biblia naʼthúlúʼ rí muʼtájkáan ga̱jma̱a̱ numuu mbiʼyuu Jesús. Ikhaa mínaʼ niʼthí: “Ikun ñajunʼ ri jamba, gajma ri gako, gajma ri ndaʼya. Asjndo nimba tsiʼka naʼ Ana xi raʼka gajma numuʼ Ikun” (Juan 14:6). Mu Jeobá maʼdxaun rí gúʼthán, ndayóoʼ muʼtájkáan i̱ndó náa Ikhaa ga̱jma̱a̱ majmulúʼ mbiʼyuu A̱ʼdióo.

10. Ndíjkha rí na̱nguá eyóoʼ musmbatígulú índo̱ nuʼtajkháan rá.

 10 Lá rígá xú káʼnii phú gíʼmaa muʼni mu muʼtájkáan ráʼ. Na̱nguá. Jeobá na̱nguá e̱nda̱ʼa̱ rí xú káʼnii gíʼmaa majmulúʼ ñawúnlú o xú káʼnii gíʼmaa mutrigáanʼ. Náa Biblia naʼsngáa dí rígá mbaʼa enii rí xú gíʼmaa muʼtákáñii Dios. Mbá xkri̱da, mbáa xa̱bu̱ ma̱ndoo magi̱ʼi̱, ma̱ndoo maginduti̱ga̱, masmbáti̱go̱o̱ o mawiji̱ (1 Crónicas 17:16; Nehemías 8:6; Daniel 6:10; Marcos 11:25). Rí phú itháan gíʼdoo numuu rí xú káʼnii eʼnilú raʼkháa rí xú káʼnii kuajún mu mbuyulú iʼwíínʼ xa̱bu̱. Ikháanʼ ma̱ndoo muʼtájkáan náa awúu̱n a̱jkiu̱lú asndu náa má kuwáanʼ, ma̱ndoo muʼni náa kuwáanʼ ruñajunʼ o índo̱ nuguaʼnii mbá gamiéjunʼ. Mbáa nimbáa xa̱bu̱ tseʼyoo rí kuwáanʼ ruʼtájkháan, mú Jeobá naʼdxawunlú (Nehemías 2:1-6).

11. Ndiéjunʼ rí naʼni maxmiéjunʼlú gándoo gúʼthá índo̱ guʼtájkáan rá.

11 Ndiéjunʼ gándoo gúʼtá índo̱ guʼtájkáan rá. Náa Biblia naʼthí: “Amu ri icanʼlu nundaʼja”, mu gíʼmaa maʼni “xuri nando Ica, [Jeobá] Ica maxnaʼli” (1 Juan 5:14). Ikha jngó, ma̱ndoo muʼthán xúgíʼ rí nandulúʼ mu gíʼmaa maʼni xó má eyoo Dios. Mbá xkri̱da, lá nanigu̱ʼ muʼthán xúgíʼ rí naʼni maxmiéjunʼlú ráʼ. ¡Ikhaa nanigu̱ʼ rí muʼthán! Rí muʼtákáñii Jeobá nindxu̱u̱ xóo rí maratamíjná ga̱jma̱ʼ mbáa bi̱ nambáxa̱ʼ májánʼ ga̱jma̱ʼ. Ma̱ndoo muʼthán xúgíʼ rí nandulúʼ rí nagájnuu asndu náa a̱jkiu̱lú (Salmo 62:8). Ma̱ngaa ma̱ndoo munda̱ʼa̱ rí mambáyulúʼ ga̱jma̱a̱ xi̱ʼ kaʼwu ndrígóo mu muʼni rí májánʼ (Lucas 11:13). Ma̱ndoo munda̱ʼa̱ rí maxnúlúʼ ikhaa mu muraʼwíí muʼni rí májánʼ ga̱jma̱a̱ rí maxnúlúʼ tsiakii mu maʼngulú muraʼníí xkujndu (Santiago 1:5). Índo̱ nuxuʼdámi̱jna̱ aʼkhá, gíʼmaa munda̱ʼa̱ rí maʼni mba̱a̱ a̱jkiu̱u̱n kaʼyulúʼ, mu ma̱ngaa gíʼmaa maguaʼdáá fe náa tsigijñaʼ ndrígóo Cristo (Efesios 1:3, 7). Mú xúʼtajkáan i̱ndó ga̱jma̱a̱ numulúʼ ikháanʼ, ma̱ngaa guʼtájkáan ga̱jma̱a̱ numún iʼwíínʼ xa̱bu̱ xóo bi̱ kúwi̱i̱n náa guʼulúʼ o a̱ngiu̱lú cristiano (Hechos 12:5; Colosenses 4:12).

12. Xú káʼnii gándoo gusngájma índo̱ nuʼtájkáan rí gíʼdoo itháan numuu rí na̱ʼkha̱ náa Anu̱lú bi̱ xtáa mekhuíí rá.

 12 Índo̱ nuʼtájkáan gíʼmaa mbuʼyáá rí gíʼdoo itháan numuu xúgíʼ rí na̱ʼkha̱ náa Jeobá Dios. Kuaʼdáá mbaʼa numuu mu mbuʼyamajkuíí ga̱jma̱a̱ rí muxnáa núma̱aʼ, numuu rí májánʼ a̱jkiu̱u̱n kaʼyulúʼ (1 Crónicas 29:10-13). Náa Mateo 6:9-13 (atraxnuu) ikhí nuxkamaa xkri̱da rí niniñuʼ Jesús rí xú káʼnii muʼtájkáan. Ikhí naʼsngúlúʼ munda̱ʼa̱ rí maguma kaʼwii mbiʼyuu Dios. Nda̱wa̱á nunda̱ʼa̱ rí ma̱ʼkha̱ Reino ndrígóo Dios ga̱jma̱a̱ maguma rí nandoo náa tsu̱du̱u̱ Ku̱ba̱ʼ xó má rí naguma mekhuíí. Ndiʼyáá rí ginii Jesús ninda̱ʼa̱ rí gíʼdoo itháan numuu náa Jeobá ga̱jma̱a̱ nda̱wa̱á ninda̱ʼa̱ rí ndayóoʼ ikhaa. Á mu rí ikháanʼ mangáanʼ nuniʼñánʼ rí Dios magiʼdoo itháan numuu índo̱ nuʼtájkáan, xúʼko̱ gusngajmá dí raʼkháa i̱ndó naxmiéjunʼlú kuʼyamijná ikháanʼ.

13. Nguáthá mba̱yu̱ʼ gíʼmaa muʼtájkáan eʼthí náa Biblia rá.

13 Nguáthá mba̱yu̱ʼ gíʼmaa muʼtájkáan rá. Náa Biblia tséʼthi nguáthá mba̱yu̱ʼ gíʼmaa muʼtájkáan, rí nuʼni i̱ndó ikháanʼ o náa kuwa mbaʼin xa̱bu̱. Ma̱ndoo má xáʼni mba̱yu̱ʼ wéñuʼ, xóo rí nuʼni índo̱ nugíʼdi̱i̱ muphiʼtsu, o ma̱ndoo maʼni mba̱yu̱ʼ, xó má índo̱ nuʼtháán rí nagájnuu asndu náa a̱jkiu̱lú (1 Samuel 1:12, 15). Jesús nixprígun fariseos bi̱ ra̱míjínʼ bi̱ nutajkháan mba̱yu̱ʼ wéñuʼ mu xúʼko̱ ma̱ndoo mbuñún xa̱bu̱ (Lucas 20:46, 47). Rúʼko̱ tsínigu̱ʼ Jeobá. Itháan gíʼdoo numuu rí muʼtájkáan rí nagájnuu asndu náa a̱jkiu̱lú. Rí muʼtájkáan náa Jeobá ndajyúuʼ xó má rí ndayúlú o asndu náa má kuwáanʼlú.

Dios naʼdxun rí nuʼtájkáan asndu náa má kuwáanʼ

14. Arathá ndiéjunʼ eyoo gáʼthúu̱n ajngáa rígi̱ “gunila [má xúʼko̱] tsakun” ga̱jma̱a̱ ndíjkha rí nindxu̱u̱ májánʼ wéñuʼ rá.

14 Mámbá nguátha mba̱yu̱ʼ gíʼmaa muʼtájkáan rá. Náa Biblia naʼthúlúʼ: “Gunila [ma xúʼko̱] tsakun”, “xuniʼŋaʼ runi sacun” ga̱jma̱a̱ “camba nutun uni sacun” (Mateo 26:41; Romanos 12:12; 1 Tesalonicenses 5:17). Rúʼko̱ tsíyoo gáʼthi rí muʼtájkáan kañiʼ mbiʼi. Nandoo gáʼthi rí gíʼmaa muʼtájkáan mbaʼa nuthu rí mbá mbiʼi náa Jeobá, mu muxnáa̱lú núma̱aʼ  numuu rí májánʼ a̱jkiu̱u̱n ga̱jma̱a̱ munda̱ʼa̱a̱ rí maxnúlúʼ ikha ma̱ngaa rí maxnúlúʼ tsiakii. ¡Ra̱ʼkhá tháán májánʼ nindxu̱u̱ rígi̱! Jeobá naniñuʼ rí muʼtákáñii asndu nguáthá nuthu má eyulú ga̱jma̱a̱ asndu nguáthá mba̱yu̱ʼ eyulú. Á mu nduʼyáá rí gíʼdoo wéñuʼ numuu rí muʼthámijna gajmiúlú Anu̱lú bi̱ xtáa mekhuíí, ikhú muxkamaa mbaʼa nuthu mu muʼthámijna gajmiúlú ikhaa.

15. Ndíjkha rí gíʼmaa muʼthá xúʼko̱ gáʼne índo̱ nuʼtájkáan rá.

15 Ndíjkha rí gíʼmaa muʼthá ‹amén› índo̱ naguámbulú nutajkháan rá. Ajngáa rígi̱ nandoo gáʼthúu̱n “xúʼko̱ gaʼne”. Náa Biblia na̱ʼkha̱ xkri̱da náa nasngájma rí ndayóoʼ muʼthá ‹xúʼko̱ gaʼne› índo̱ naguámbulú nuʼtájkáan náa inún mbaʼin xa̱bu̱ o rí naʼni mámbáa rí ikháanʼlu (1 Crónicas 16:36; Salmo 41:13). Índo̱ nuʼthá ‹xúʼko̱ gaʼne› mámbáa rí ikháanʼlu, nusngajmá rí gajkhun nindxu̱u̱ rí niʼthá. Índo̱ nuʼthá náa inún mbaʼin xa̱bu̱ (tseʼñu á mu nuʼthá gakhii o mañúú), nusngajmá rí nandulúʼ mambanúu rí niʼthí (1 Corintios 14:16).

XÚ KÁʼNII ERIʼÑA̱A̱ DIOS ÍNDO̱ NUʼTÁKÁÑII RÁ.

16. Ndiéjunʼ gándoo guguaʼthi̱i̱n índo̱ nuʼtájkáan rá.

16 Lá gajkhun nariʼña̱a̱ Jeobá rí nuʼtákáñii ráʼ. ¡Xúʼko̱ kaʼnii! Kuaʼdáá mbá numuu májánʼ rí Jeobá nindxu̱u̱ “bi̱ naʼdxaun índo̱ nugríga̱a̱” ga̱jma̱a̱ nariʼña̱a̱ índo̱ xa̱bu̱ nutháán ga̱jma̱a̱ xúgíʼ a̱jkiu̱ún (Salmo 65:2). Ma̱ngaa, gíʼdoo mbaʼa enii xóo mariʼña̱a̱.

17. Náa numuu rí nandoo nuʼthá rí Dios najmiuu ángeles ga̱jma̱a̱ xa̱bu̱ numbaaʼ mu mariʼña̱a̱ rí nuʼtájkáan rá.

17 Mbá xkri̱da, mu mariʼña̱a̱ rí nuʼtájkáan, Jeobá najmiuu ángeles ga̱jma̱a̱ xa̱bu̱ bi̱ nuni ñajunʼ ikhaa (Hebreos 1:13, 14). Mbaʼin xa̱bu̱ bi̱ nitajkáan mu mixtambáñún makru̱ʼu̱u̱n rí naʼthí náa Biblia, ikhiin nimbáñun xa̱bi̱i̱ Jeobá nguáthá mbiʼi nda̱wa̱á índo̱ nigún gúñun. Xúgíʼ rígi̱ nisngájma rí ángeles nuruguambáá náa najuiʼtaraʼa ga̱jma̱a̱ numuu  Reino (Revelación [Apocalipsis] 14:6). Ma̱ngaa, índo̱ ndayóoʼ rí mixtambáyulúʼ, Jeobá ma̱ndoo majmiuu mbáa cristiano mu mambáyulúʼ xó má rí ninda̱ʼa̱ índo̱ niʼtájkáan (Proverbios 12:25; Santiago 2:16).

Jeobá ma̱ndoo majmiuu xa̱bi̱i̱ mu mariʼña̱a̱ rí nuʼtájkáan

18. Xú káʼnii ejmuu xi̱ʼ kaʼwu ndrígóo Jeobá ga̱jma̱a̱ Ajngá rawunʼ mu mariʼña̱a̱ rí nutajkháan xa̱bi̱i̱ rá.

18 Jeobá Dios ma̱ngaa nariʼña̱a̱ rí nutajkháan xa̱bi̱i̱, najmuu xi̱ʼ kaʼwu ndrígóo ga̱jma̱a̱ najmuu Ajngáa rawunʼ. Índo̱ nunda̱ʼa̱a̱ rí mambáyulúʼ muraʼníí mbá xkujndu, ikhaa  ma̱ndoo maxnúlúʼ ikha ga̱jma̱a̱ maxnúlúʼ tsiakii rí na̱ʼkha̱ náa xi̱ʼ kaʼwu ndrígóo (2 Corintios 4:7). Ga̱jma̱a̱ índo̱ nuʼtájkáan mu muraʼwíí muʼni mbá rí májánʼ, mbaʼa nuthu nariʼña̱a̱ ga̱jma̱a̱ Ajngá rawunʼ. Mbáa muxkamaa mbá versículo rí mambáyulúʼ índo̱ nuʼnigajmaa Biblia o índo̱ nuraxnuu i̱ʼwáʼ i̱yi̱i̱ʼ rí nini bi̱ nutaraʼa numuu Jeobá, xó má libro rígi̱. Ma̱ngaa, mbáa maʼni magiwa̱nʼ a̱jkiu̱lú consejo rí naxná náa Biblia dí ragíʼmaa mambumulú. Mbá xkri̱da, índo̱ na̱jkua̱ náa reunión o índo̱ naxnulu consejo mbáa anciano náa nagimbáanʼ bi̱ naxmiéjunʼ kaʼyulúʼ (Gálatas 6:1).

19. Ndiéjunʼ gíʼmaa makru̱ʼu̱lú á mu nduʼyáá rí Jeobá tseriʼña̱a̱ rí nunda̱ʼa̱a̱ rá.

19 Mbáa nguáná nundxa̱ʼwa̱míjna̱ rí Jeobá ndajyúuʼ wéñuʼ mu mariʼña̱a̱ rí nunda̱ʼa̱a̱, mu rúʼko̱ tsíyoo gáʼthúu̱n rí xándoo mariʼña̱a̱. Gagiwanʼ a̱jkiu̱lú rí Jeobá mariʼña̱a̱ xó má eyoo ikhaa ga̱jma̱a̱ mbá mbiʼi rí phú nda̱yúlúʼ. Ikhaa naninuʼ rí nda̱yúlúʼ ga̱jma̱a̱ ndaʼyoo xú káʼnii gaxnúlúʼ itháan májánʼ ki xóo rí ikháanʼ. Nguáná naniñuʼ rí mambanúu rí naʼthí náa Biblia náa naʼthí “Gundaʼala”, “guʼyala” ga̱jma̱a̱ “gutaraʼala” (Lucas 11:5-10). Á mu nuʼni xúgi̱ kaʼnii, musngajmá rí nandulúʼ wéñuʼ mambanúu ga̱jma̱a̱ rí fe ndrígúlú  nindxu̱u̱ gajkhun. Ma̱ngaa, mbáa asndu Jeobá mariʼña̱a̱ rí asndu ikháanʼ xándoo mbuʼyáá. Mbá xkri̱da, á mu nuʼtákáñii numuu rí nuraʼníí mbá xkujndu, mbáa xáʼni gámbáa xkujndu, mú maxnúlúʼ tsiakii mu maʼngulú muraʼníí xkujndu (atraxnuu Filipenses 4:13).

20. Náa numuu rí gíʼmaa muʼtákáñii má xúʼko̱ Jeobá rá.

20 Nuxnáa wéñuʼ núma̱aʼ bi̱ Niʼni xúgíʼ dí rígá, numuu rí xtáa mijngii náa xúgínʼ xa̱bu̱ bi̱ nutakáñii xó má e̱nda̱ʼa̱ ikhaa (atraxnuu Salmo 145:18). Guʼtákáñii má xúʼko̱ Jeobá numuu dí ra̱ʼkhá tháán májánʼ nindxu̱u̱ rí muʼthán ikhaa. Á mu nuʼni xúʼko̱ kaʼnii, ma̱ndoo makuwáanʼ gagi numuu rí nduʼyáá rí ma̱ndoo mu̱ʼgua̱ kanuu itháan mijngii náa Jeobá, bi̱ naʼdxaun índo̱ nugríga̱a̱.