Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Ndiéjunʼ phú eʼsngáa náa Biblia rá.

Lá rígi̱ rí nindoo Dios marigá ráʼ.

Lá rígi̱ rí nindoo Dios marigá ráʼ.

XÚ KÁʼNII nindxu̱u̱ noticias rí natayáá índo̱ natraxnuu periódico, índo̱ natayáá televisión o índo̱ natadxawíín radio rá. ¡Ikhí naʼthí dí rígá wéñuʼ delito, guerra ga̱jma̱a̱ terrorismo! Rí xúgi̱ atatsaʼwáminaʼ ga̱jma̱a̱ numuu xkujndu ndrígáʼ. Mbáa ikháánʼ naʼni maxmiéjuanʼ wéñuʼ nandii rí xtaʼdáá, rí nikháñu mbáa ndxájuaʼ o mbáa bi̱ nambáxa̱ʼ májánʼ ga̱jma̱ʼ. Mbáa xtaa xó má Job, mbáa xa̱bu̱ májánʼ bi̱ niʼthí rí “xtáa gíná wéñuʼ” (Job 10:15).

Mbáa ikháánʼ natraximínáʼ:

  • Lá rígi̱ rí nindoo Dios magíʼnuʼ ikhúúnʼ ga̱jma̱a̱ eʼwíínʼ xa̱bu̱ ráʼ.

  • Náa gándoo gaxkamaa rí ma̱ndoo mambáyuʼ mu maraʼnuu xkujndu ndrígóʼ rá.

  • Lá maʼga̱nú mbá mbiʼi rí marigá rí tsímáá náa tsu̱du̱u̱ Ku̱ba̱ʼ ráʼ.

Náa Biblia nariʼña̱a̱ májánʼ wéñuʼ graxe̱ rígi̱.

 NÁA BIBLIA NAʼSNGÁA RÍ DIOS MAʼNI RÍGI̱ NÁA TSU̱DU̱U̱ KU̱BA̱ʼ.

“Makaʼwi̱i̱ xúgíʼ iyoʼ idún, ní xákhañun itháan, ní xárígá xtambiyaʼ, gitsawaʼskha asndu má gaʼkhu, xúgíʼ rígi̱ ninújngoo gáʼni ikhú.” (Revelación [Apocalipsis] 21:4)

“Xa̱bu̱ bi̱ guʼxuʼ maʼga̱nú makixi̱i̱ xó má eʼni añaʼ.” (Isaías 35:6)

“Mambaʼtaa cháʼún xa̱bu̱ bi̱ tsédxuun.” (Isaías 35:5)

 “Xúgínʼ bi̱ kajtiin náa iñá wa̱jinʼ [...] mawaxu̱ún.” (Juan 5:28, 29)

“Nimbáa xa̱bu̱ xáʼthi: ‹Nandoo káñúʼ›.” (Isaías 33:24)

“Maʼga̱nú marigá wéñuʼ ganitsu náa tsu̱du̱u̱ ku̱ba̱ʼ.” (Salmo 72:16)

 GAMBAYAAʼ RÍ XTÁA RAʼSNGÁA NÁA BIBLIA

Xatatsaʼwamínáʼ rí nindxu̱u̱ mbá xnuʼndaa rí nitayáá náa ináa rí ninújngoo. Dios niʼthí marigá, ga̱jma̱a̱ náa Biblia naʼthí xú káʼnii gaʼnimbánuu.

Mú raʼkháa xúgíʼ rúʼko̱. Ma̱ngaa náa Biblia naʼsngúlúʼ xú káʼnii gándoo makuwáanʼ gagi rí mbiʼi xúgi̱. Atatsaʼwáminaʼ mbégu̱ʼ náa xkujndu rí xtaʼdáá ga̱jma̱a̱ rí naʼni maxmiéjuanʼ. Mbáa nindxu̱u̱ ga̱jma̱a̱ numuu mbújkha̱a̱, bi̱ kuwa náa guʼwáaʼ, nandii o rí nikháñu mbáa bi̱ nandaʼ xtayáá. Mú, náa Biblia nambáyulúʼ muraʼníí xkujndu rúʼko̱, ma̱ngaa naʼni̱i̱ a̱jkiu̱lú índo̱ naxtiʼña̱a̱ graxe̱ rígi̱:

  • Náa numuu rí nuraʼníí tsingíná rá.

  • Xú kaʼnii gándoo gúraʼní xkujndu rí kuaʼdáá rá.

  • Ndiéjunʼ gándoo guʼni mu makuwáanʼ itháan gagi mbá guʼwáanʼ rá.

  • Ndiéjunʼ egíʼnii índo̱ nakhañulúʼ rá.

  • Lá muʼguanú mbuʼñún mbu̱júu̱ xa̱bu̱ bi̱ nikháñun bi̱ nandulúʼ kuʼñúún ráʼ.

  • Náa numuu nduʼyáá rí gajkhun Dios manimbánuu rí nikudaminaʼ maʼni rá.

 Rí ikháánʼ xtaa ratraxnuu ajngáa rígi̱ natasngájma rí nandaʼ majmañaaʼ rí xtáa raʼsngáa náa Biblia. Libro rígi̱ mambáyaʼ wéñuʼ. Atayáá rí náa námbáa ináa tima graxe̱ rí kaʼyoo mámbá parráfo. Mbaʼin wéñuʼ xa̱bu̱ nanigu̱nʼ rí xú káʼnii bi̱ nutaraʼa numuu Jeobá najmún graxe̱ mu muriʼña̱a̱ rí xtáa raʼsngáa náa Biblia, ga̱jma̱a̱ muguaʼthi̱i̱n rí xúʼko̱ má gáta̱ya̱a̱ mangáán. Matrigú mbaʼa rí májánʼ wéñuʼ índo̱ gajmañaʼ rí phú eʼsngáa náa Biblia.