Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Ndiéjunʼ phú eʼsngáa náa Biblia rá.

 APÉNDICE

Ndiéjunʼ nindxu̱u̱ Mbiʼi rí Dios gánda̱ʼa̱a̱ cuenta rá.

Ndiéjunʼ nindxu̱u̱ Mbiʼi rí Dios gánda̱ʼa̱a̱ cuenta rá.

XÚ KÁʼNII tatsaʼwáminaʼ rí gáʼni mbiʼi rígi̱ rá. Xa̱bu̱ nakumu̱ún dí ra̱ʼkhá tháán mbaʼin wéñuʼ xa̱bu̱ gágun náa inuu Dios mu mámbáa gaxnáxi̱i̱ cuenta náa ikhaa. Ma̱ngaa eʼwíínʼ xa̱bu̱ nundxa̱ʼwa̱míjna̱ rí kuwa tikhun xa̱bu̱ bi̱ magúun mekhuíí, ga̱jma̱a̱ eʼwíínʼ magún náa mikhiin kámuu mbiʼi. Mú, náa Biblia nasngájma rí Mbiʼi rí Dios gánda̱ʼa̱a̱ cuenta mani̱ndxu̱u̱ mixtiʼkhu. Xánindxu̱u̱ mbá mbiʼi rí mamiñáʼ, mbiʼi rígi̱ maʼni rí matatsimbaʼ rí wíji̱ marigá nda̱wa̱á ga̱jma̱a̱ maʼni̱i̱ májánʼ wéñuʼ.

Rí huasjŋgajma Juan (o Apocalipsis) 20:11, 12, apóstol Juan naʼthí xú káʼnii gaʼni Mbiʼi rí Dios gánda̱ʼa̱a̱ cuenta: “Ga icu ndeyo mba [trono] ri pu-mba miʼxa jma ri su guiʼ iqui. Ga naʼ inu Ica ri numbaʼ jma ri mecu neʼni ri nandaʼ mbajayuʼ, ga ni natacujmala naʼ mariga ri numbaʼ jma mecu. Ga icu ndeñu su nicañu, su maquinʼ jma su huanu, huajuin naʼ inu Dios, ga icu nemaʼto mbaʼja yiʼ, ga nemaʼto imba yiʼ, ri ñajunʼ yiʼ ri ndaʼya. Ga icu ri su nicañu huatarugüin jma numu ri jndo xuri jaʼni nini ri nicuhue, jndo xuri eʼtan ri nini naʼ yiʼ ri mbaʼja riʼcui”. Tsáa nindxu̱u̱ Juez bi̱ gíiʼ náa trono rúʼko̱ rá.

Jeobá Dios nindxu̱u̱ mbáa Juez bi̱ itháan gíʼdoo numuu náa xa̱bu̱ numbaaʼ. Mú Jeobá niniñuʼ ñajunʼ rígi̱ náa ñawúunʼ imba̱a̱ xa̱bu̱. Náa Hechos 17:31, apóstol Pablo niʼthí rí Dios “niʼgui mba mbiʼi ri majuaʼ aʼkun xabo gajma ri jmbu, gajma majñu xabo tsi niʼgui”. Juez buʼko̱ nindxu̱u̱ Jesucristo bi̱ nituxi̱i̱ (Juan  5:22). Mú, nguáná gági̱ʼdu̱u̱ Mbiʼi rí Dios manda̱ʼa̱a̱ cuenta ga̱jma̱a̱ nguáthá mba̱yu̱ʼ gájyúuʼ rá.

Náa libro Revelación nasngájma rí Mbiʼi rí Dios gánda̱ʼa̱a̱ cuenta magi̱ʼdu̱u̱ nda̱wa̱á rí ninújngoo guerra rí nagumbiʼyuu Armagedón, rí maʼni gámbáa numbaaʼ ndrígóo Satanás (Revelación 16:14, 16; 19:19–20:3). * Nda̱wa̱á rí ninújngoo Armagedón Satanás maguguaraʼaa gajmíi̱n xa̱bu̱ wéñiʼ ndrígóo náa mbá iñáʼ mbiiʼ, náa makuwá mbá míí tsiguʼ. Rí gájyúuʼ tsiguʼ rúʼko̱, bi̱ ni̱ndxu̱ún 144,000 bi̱ mutañajunʼ mekhuíí munda̱ʼa̱a̱ cuenta náa xa̱bu̱ ga̱jma̱a̱ mutañajunʼ “jmiñi Cristo ri mba mil siguʼ” (Rí huasjŋgajma Juan 14:1-3; 20:1-4; Romanos 8:17). Xó má eʼyáá, Mbiʼi rí manda̱ʼa̱a̱ cuenta Dios xájyúuʼ i̱ndó mbá mbiʼi, rígi̱ mbajyúuʼ mbá míí tsiguʼ.

Índo̱ gáʼga ranújngoo mbá míí tsiguʼ, Jesucristo “magugüin xabu su cuhua nduya, cami xuʼcui-ma su nicañu-ma” (2 Timoteo 4:1). Ajngáa bi̱ “nduya” nandoo gáʼthi náa kuwa “xabu su pu-mbaʼjin”, bi̱ makáwíin náa guerra ndrígóo Armagedón (Rí huasjŋgajma Juan 7:9-17). Apóstol Juan ma̱ngaa ndiʼñún “su nicañu [...] huajuin naʼ inu Dios” mu muxnaxi̱i̱ cuenta. Xó má nikudaminaʼ Jesús, “tsi juhua naʼ iña huajin mudxahuin [rí naʼthí Cristo]” ga̱jma̱a̱ magajníi̱n índo̱ gatuxi̱ín (Juan 5:28, 29; Hechos 24:15). Mú, ndiéjunʼ giʼyáá ginii índo̱ gúnda̱ʼa̱a̱ cuenta náa xúgínʼ xa̱bu̱ buʼko̱ rá.

Rí ndiʼyoo apóstol Juan “ga icu nemaʼto mbaʼja yiʼ” ga̱jma̱a̱ “su nicañu huatarugüin jma numu ri jndo xuri jaʼni nini ri nicuhue, jndo xuri eʼtan ri nini naʼ yiʼ ri mbaʼja riʼcui”. (Revelación 20:12) Lá na̱ʼkha̱ raʼthí náa rollo rígi̱ ndiéjunʼ nini xa̱bu̱ nákha wajyúúʼ ráʼ. Na̱nguá. Ikhiin xúxnaxi̱i̱ cuenta rí nini nákha xóó tsekháñun. Xú káʼnii eʼyáá rá. Numuu rí náa Biblia naʼthí ‹rí xa̱bu̱ bi̱ nikháñun nijngudi̱i̱ aʼkhá ndrígu̱ún› (Romanos 6:7). Xa̱bu̱ bi̱ matuxi̱ín ní xaguaʼdáá aʼkhá. Ikha jngó mbaʼa rollo rúʼko̱ gíʼdoo raʼthí mbaʼa ikha nuxi̱ʼ ndrígóo Dios. Mu makuwáanʼ kámuu mbiʼi, ndayóoʼ muʼnimbulúʼ rí gáʼtañájunlú Dios, xó má  xa̱bu̱ bi̱ gátuxi̱ín makuwa mbu̱júu̱ ga̱jma̱a̱ xa̱bu̱ bi̱ gakáwíin náa Armagedón. Náa ikha rígi̱ ma̱ʼkha̱ xúgíʼ rí eyoo masngájma Jeobá náa mbá míí tsiguʼ. Xúʼko̱ kaʼnii gáʼni rí mámbáa gaxnáxi̱i̱ cuenta índo̱ gáʼni mbá míí tsiguʼ.

Índo̱ gáʼga̱nú mbiʼi rí Dios manda̱ʼa̱a̱ cuenta, ra̱ʼkhá tháán mbaʼin wéñuʼ xa̱bu̱ mugi̱ʼdi̱i̱ majmañún ndiéjunʼ eyoo Dios muni ga̱jma̱a̱ nda̱wa̱á xa̱bu̱ muni xúʼko̱ kaʼnii. Ikha jngó, gíʼmaa rí miʼsngúún xúgínʼ xa̱bu̱. ‹Xa̱bu̱ bi̱ kuwa náa tsu̱du̱u̱ ku̱ba̱ʼ, majmañún rí jmbu› (Isaías 26:9). Mú mbaʼin xa̱bu̱ xáʼndun muni rí eyoo Dios. Isaías 26:10 naʼthí: “Maski ajndu nuni mba̱a̱ a̱jkiu̱ún kuyáá xa̱bu̱ bi̱ ra̱májánʼ, ikhaa xáʼga̱nú majmañuu maʼni rí jmbu. Náa ku̱ba̱ʼ náa rígá rí jmbu ikhaa maʼni dí ra̱májánʼ, ga̱jma̱a̱ xáʼngo̱o̱ gáʼyoo rí Jeobá najmañuu wéñuʼ”. Xa̱bu̱ bugi̱ bi̱ ra̱míjínʼ maguma gámbíin kámuu mbiʼi índo̱ Dios gánda̱ʼa̱a̱ cuenta (Isaías 65:20).

Índo̱ gámbá Mbiʼi rí Dios manda̱ʼa̱a̱ cuenta, xa̱bu̱ bi̱ gakáwíin ‹maguanu makuwá› tsímáá wéñuʼ, numuu rí ní xaguaʼdáá aʼkhá (Revelación 20:5). Ikha jngó, índo̱ Dios gaxtáa randa̱ʼa̱a̱ cuenta, xúgínʼ xa̱bu̱ ní xáguaʼdáá aʼkhá, maʼni xó má nákha nigi̱ʼdu̱u̱ nikuwa timbíi̱n xa̱bu̱ nákha wajyúúʼ (1 Corintios 15:24-28). Nda̱wa̱á kayuʼ marigá imbo̱o̱ prueba. Ikhú Satanás magajnáa ga̱jma̱a̱ muniñaʼ rí maʼninduwiinʼ xóó xa̱bu̱ (Revelación 20:3, 7-10). Xa̱bu̱ bi̱ xúni̱ rí nandoo Gixa̱a̱ mbuyáá xú káʼnii xtáa rambánuu májánʼ wéñuʼ rí naʼthí náa Biblia: “Xa̱bu̱ bi̱ nuni rí jmbu makuwá kámuu mbiʼi náa tsu̱du̱u̱ ku̱ba̱ʼ.” (Salmo 37:29). Ikha jngó, Mbiʼi rí Dios gánda̱ʼa̱a̱ cuenta mani̱ndxu̱u̱ mbá rí májánʼ wéñuʼ náa xa̱bu̱ bi̱ nuni rí jmbu.

^ párr. 1 Ma̱ndoo ma̱ta̱ya̱a̱ itháan ga̱jma̱a̱ numuu Armagedón náa libro Perspicacia para comprender las Escrituras, vol. 1, ináa 680, 681, 1086, 1087, ga̱jma̱a̱ náa capítulo 20 ndrígóo libro Adoremos al único Dios verdadero, libro rígi̱ nini bi̱ nutaraʼa numuu Jeobá.