Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Ndiéjunʼ phú eʼsngáa náa Biblia rá.

 CAPÍTULO 19

Araxtaa náa Dios numuu rí nandaʼ xtayáá

Araxtaa náa Dios numuu rí nandaʼ xtayáá
  • Ndiéjunʼ eyoo gáʼthi rí maʼnda̱ʼ xtayáá Dios rá.

  • Ndiéjunʼ gíʼmaa muʼni mu ma̱ndoo kaʼyulúʼ Dios rá.

  • Xú káʼnii gáʼni tsajkurámiinʼ Jeobá xa̱bu̱ bi̱ nandún kuyáá rá.

Lá matambáyuminaʼ ikháánʼ náa Jeobá rí mbiʼi mingíjyúuʼ ráʼ.

1, 2. Náa gándoo gumbayúmi̱jna̱ rí mbiʼi xúgi̱ rá.

ATATSAʼWÁMINAʼ rí nákha ikháánʼ xtaa radxuʼ pasia, natayáá rí na̱jkha̱ rambájtu̱u̱n. Ga̱jma̱a̱ naxpíbiʼ, nundxa̱ʼwa̱ a̱jkhu̱u̱n ga̱jma̱a̱ ikhú nagíʼdu̱u̱ naxnúu wéñuʼ ruʼwa. Ikháánʼ natagáyaʼ mu mi̱dxu̱ʼ gátaʼyáaʼ náa matawanʼ. Ikhú natayáá rí náa níjñúu kamba̱a̱ rígá mbá guʼwá. Guʼwá rígi̱ mixooʼ ga̱jma̱a̱ wíji̱ gujkhuʼ wéñuʼ. ¡Ra̱ʼkhá tháán xtáa gagi numuu rí nitaxkamaa guʼwá rígi̱!

2 Rí xúgi̱ kuwáanʼ mbiʼi mingíjyúuʼ ga̱jma̱a̱ migamíi wéñuʼ, numuu rí numbaaʼ na̱jkha̱ raʼni itháán mixkawiʼ. Mú rígá náa phú ma̱ndoo mumbayúmi̱jna̱, náa nda̱a̱ rí gúgiʼnii. Xú káʼnii nindxu̱u̱ rá. Atayáá rí naʼthí náa Biblia: “Ikhúúnʼ mathu̱u̱n Jeobá: Ikháánʼ ni̱ndxa̱ʼ náa mambáyuminaʼ, bi̱ nañewu̱nʼ, Dios ndrígóʼ, bi̱ naku̱mu̱ʼ ka̱yo̱o̱ má xúʼko̱” (Salmo 91:2).

3. Xú káʼnii gumbayúmi̱jna̱ náa Jeobá rá.

3 Jeobá, bi̱ Niʼni xúgíʼ dí rígá ga̱jma̱a̱ Bi̱  itháan gíʼdoo numuu náa tsu̱du̱u̱ numbaaʼ, ikhí ma̱ndoo mumbayúmi̱jna̱lu. ¡Ra̱ʼkhá tháán májánʼ! Ikhaa gíʼdoo itháan tsiakii ki xóo mbáa xa̱bu̱ o i̱mba̱ rí naʼni gínáanʼ. Maski ajndu naguma gínáanʼ, Jeobá ma̱ndoo maʼni̱i̱ májánʼ xúgíʼ dí ra̱májánʼ rí nuraʼníí. Xú káʼnii gándoo gumbayúmi̱jna̱ náa Jeobá rá. Ma̱ndoo muʼni á mu naku̱mu̱lú kuʼyáá má xúʼko̱ ikhaa. Ma̱ngaa náa Biblia naʼthí: “Guni má xúʼko̱ rí nandoo Dios mu ikhaa ma̱ndoo kaʼyalaʼ” (Judas 21). Xúʼko̱ kaʼnii, gíʼmaa muʼni rí Dios maʼndoo kaʼyulúʼ ga̱jma̱a̱ makuwáanʼ mbá kambáxulú gajmiúlú Anu̱lú bi̱ xtáa mekhuíí. Á mu nuʼni xúʼko̱, ma̱ndoo mbuʼyáá rí ikhaa mambáyulúʼ. Mú xú káʼnii gándoo mambaxúlúʼ májánʼ gajmiúlú bi̱ Niʼni xúgíʼ dí rígá rá.

ATATSAʼWÁMINAʼ XÚ KÁʼNII EYOO KAʼYAʼ DIOS GA̱JMA̱A̱ XÚʼKO̱ GÍʼMAA MATANI MANGÁÁN

4, 5. Ndiéjunʼ nindxu̱u̱ tikhuu rí Dios nasngájma rí nandoo kaʼyaʼ rá.

4 Jeobá nasngájmulúʼ mbaʼa enii rí xú káʼnii eyoo kaʼyulúʼ. Guʼyáá ndiéjunʼ nindxu̱u̱, numuu rí á mu nuʼnigajmaa mambáyulúʼ mu ma̱ndoo kaʼyulúʼ má xúʼko̱ Dios. Atatsaʼwáminaʼ tikhuu kiʼsngáa rí na̱ʼkha̱ náa Biblia rí nijmañaʼ náa libro rígi̱. Mbá xkri̱da, mu makuwáanʼ májánʼ, Jeobá bi̱ Niʼni xúgíʼ dí rígá nixnúlú Ku̱ba̱ʼ náa ma̱ndoo makuwáanʼ, náa rígá wéñuʼ ganitsu, iyaʼ, xujkhúʼ bi̱ mitsiʼñíin ga̱jma̱a̱ ku̱ba̱ʼ rí nakujmaa mitsaan. Ma̱ngaa nduʼyáá rí Dios nindxu̱u̱ bi̱ niʼni Biblia, náa naʼtulúʼ xú káʼnii mbiʼyuu ga̱jma̱a̱ xú káʼnii xa̱bu̱ nindxu̱u̱. Náa Escrituras naʼthí rí ikhaa nikunguanʼ A̱ʼdióo bi̱ nandoo kaʼyoo náa tsu̱du̱u̱ Ku̱ba̱ʼ, niniñuʼ rí muni gínáa ga̱jma̱a̱ rí makhañúu ga̱jma̱a̱ numulúʼ (Juan 3:16). Xúgi̱ kaʼnii niʼni rí nixnúlú mbá regalo rí májánʼ wéñuʼ, rí naʼni maguaʼthi̱i̱n rí makuwáanʼ májánʼ nda̱wa̱á.

5 Rígá rí kuaʼthi̱i̱n xóó itháan dí marigá nda̱wa̱á rí Dios nixná. Jeobá nigíiʼ mbáa Xa̱bu̱ Ñajunʼ náa mekhuíí, Reino ndrígóo Mesías. Reino bugi̱ nacha̱ má maʼni gámbóo xúgíʼ tsingíná ga̱jma̱a̱ maʼni mbá Ku̱ba̱ʼ rí mitsaan. ¡Ikhú makuwáanʼ gagi ga̱jma̱a̱ makuwáanʼ tsímáá kámuu mbiʼi! (Salmo 37:29.) Mú xúgi̱, nákha xóó kuaʼthi̱i̱n mbiʼi rúʼko̱, consejo ndrígóo Dios  mambáyulúʼ makuwáanʼ itháan májánʼ. Jeobá ma̱ngaa nixnúlú imbo̱o̱ regalo; rí muʼtákañi xúgíʼ rí nandulúʼ. Rígi̱ nindxu̱u̱ tikhuu rí Dios nasngájma rí nandoo kaʼyaʼ ga̱jma̱a̱ xúʼko̱ má eʼwíínʼ xa̱bu̱.

6. Xú káʼnii gándoo ikháánʼ gatasngajmá rí nandaʼ xtayáá Dios xó má niʼni ikhaa xá.

6 Ikháánʼ gíʼmaa matani graxe̱ rígi̱ rí gíʼdoo wéñuʼ numuu: “Xú káʼnii gáni ikhúúnʼ mu maʼndoʼ ka̱yo̱o̱ Jeobá rá.” Mbáa mbaʼin xa̱bu̱ muriʼña̱a̱: “Maʼndulú kuʼyáá Jeobá”. Lá xúʼko̱ ma tatsaʼwáminaʼ mangáán ráʼ. Jesús niʼthí rígi̱ rí gíʼdoo itháan numuu: “Gaʼne mba jañi-jayu akianʼ-xtaya Señor Diaʼ, jame mba jañi-jayu nimiaʼ, jame mba jañi-jayu jumaʼ” (Mateo 22:37). Ikha jngó, ikháánʼ xtaʼdáá mbaʼa numuu mu maʼnda̱ʼ xtayáá Jeobá ga̱jma̱a̱ xúgíʼ a̱jkia̱nʼ, mbá xúgíʼ rí xa̱bu̱ ni̱ndxa̱ʼ ga̱jma̱a̱ xúgíʼ ku̱ma̱ʼ, lá i̱ndó ndayóoʼ rí magiwa̱nʼ a̱jkia̱nʼ xtayáá xáʼ.

7. Mú maʼnda̱ʼ xtayáá Dios, lá i̱ndó ndayóoʼ rí magiwa̱nʼ a̱jkia̱nʼ xtayáá ikhaa xáʼ. Arathá náa numuu rí natriʼña̱a̱ xúʼko̱ kaʼnii.

7 Náa Biblia nasngájma rí maʼnda̱ʼ xtayáá Dios nandoo gáʼthi itháan ki xóo rí magiwa̱nʼ a̱jkiu̱lú kuʼyáá ikhaa. Maski ajndu rígi̱ gíʼdoo wéñuʼ numuu, nindxu̱u̱ rí mugíʼdi̱i̱ maʼndulú kuʼyáá gajkhun Dios. Mu makru̱ʼu̱lú itháan májánʼ, guʼyáá xkri̱da rígi̱: Á mu ikháánʼ nandaʼ mbá manzana, lá manigua̱ʼ rí muxna̱ʼ i̱ndó tsígoʼ manzana rúʼko̱ ráʼ. Na̱nguá. Gajkhun má rí ndayóoʼ tsígoʼ mu maga̱ja̱a̱ mbá ixi̱ manzana, mu ikháánʼ nandaʼ xndú taun ndrígóo. Xúʼko̱ má kaʼnii erígá índo̱ nagiwa̱nʼ a̱jkiu̱lú kuʼyáá Jeobá ma̱ngaa: Xó má tsígáʼ, ndayóoʼ maga̱ja̱a̱ mu maxná xndú taun ndrígóo. Náa Biblia naʼsngáa: “Muri xabu su naʼni aʼtiun caʼyo Dios naʼnimbo ri naʼtañajunʼ Dios; xoguiʼ ri guitañajunʼ Dios ramiŋguijiuʼeʼyo xabu suʼcui muri ica naʼnimbo jma cañiʼ aʼtiun” (1 Juan 5:3). Xúʼko̱, á mu nandaʼ xtayáá gajkhun Dios gíʼmaa rí manindxa̱ʼ xóo mbá xndú taun rí májánʼ. Rígi̱ gíʼmaa masngájma rí natani (atraxnuu Mateo 7:16-20).

8, 9. Xú káʼnii esngájma rí nandulúʼ kuʼyáá Dios ga̱jma̱a̱ rí nuxnáa̱lu núma̱aʼ rí niʼni ga̱jma̱a̱ numulúʼ xá.

 8 Nusngájma rí nandulúʼ kuʼyáá Dios índo̱ nuʼnimbulúʼ rí naʼtáñajunʼlú ga̱jma̱a̱ índo̱ nuʼnimbánii ikha rí tsixtiʼkhuu. Numuu rí xtángoo ndrígóo Jeobá na̱nguá nindxu̱u̱ gakhii wéñuʼ. Niguma mu makuwáanʼ gagi ga̱jma̱a̱ makuwáanʼ májánʼ (Isaías 48:17, 18). Índo̱ nuniʼñáanʼ rí Jeobá maxnúlúʼ ikha, nusngajmá rí nuxnáa̱lú núma̱aʼ náa xúgíʼ rí niʼni ga̱jma̱a̱ numulúʼ. Gíná wéñuʼ rí tikhun xa̱bu̱ na̱nguá exna̱a̱la núma̱aʼ. Ikháanʼ tsíyulú manindxu̱lúʼ xóo xa̱bu̱ bi̱ nikuwa nákha nixtáa Jesús bi̱ asndu na̱nguá ni̱xna̱a̱ núma̱aʼ. Mbóo mbiʼi, Cristo niʼni thanún mbá gu̱wi̱nʼ xa̱bu̱ bi̱ guáʼdáá lepra, mú mbáwíi nitanga̱a̱ gáxnáa̱ núma̱aʼ (Lucas 17:12-17). Mbáa ikháánʼ nandulúʼ manindxu̱lúʼ xóo xa̱bu̱ buʼko̱, raʼkháa xóo mbá mijna gu̱wi̱nʼ bi̱ tusngajma nditháan gamajkhún.

9 Mú, xú káʼnii nindxu̱u̱ rí naʼtáñajunlú Jeobá rí gíʼmaa muʼnimbánilú rá. Niʼthá tikhuu náa libro rígi̱. Mú guʼyáá tikhuu, á mu nuʼnimbulúʼ rí naʼtáñajunlú Dios, xáʼni mingíjyúuʼ maʼndulú kuʼyáá.

 AYUʼ KANUU NÁA JEOBÁ MÁMBÁ MBIʼI

10. Ndíjkha rí gíʼdoo wéñuʼ numuu matatsiʼniiʼ Jeobá Dios rá.

10 Mú muʼguanú itháan mijngii náa Jeobá gíʼdoo wéñuʼ numuu rí muniʼniiʼlú ikhaa. Rígi̱ nindxu̱u̱ mbá dí ragíʼmaa matumuu. Atatsaʼwáminaʼ rí ikháánʼ xtaa náa mbá kúbá náa naʼni migúwán wéñuʼ ga̱jma̱a̱ ikháánʼ nitagíiʼ aguʼ mu magiga̱a̱n. Lá matatsiʼñáanʼ rí aguʼ maʼga̱ rajuiyuʼ ráʼ. Na̱nguá. Mbáa ikháánʼ madriyaʼ má xúʼko̱ ixi̱ mu aguʼ xáʼga̱nú majuiyúʼ, numuu rí xúʼko̱ ma̱ndoo makríñanʼ. Xó má ixi̱ naʼni rí mi̱kha aguʼ, xúʼko̱ má ‹ku̱ma̱ ndrígóo Dios› naʼni rí marigá náa awúu̱n a̱jkiu̱lú rí maʼndulú kuʼyáá Jeobá (Proverbios 2:1-5).

Rí maʼndulú kuʼyáá Jeobá nindxu̱u̱ xóo mbá aguʼ: Ndayóoʼ madriyaʼ má xúʼko̱ ixi̱ mu aguʼ xáʼga̱nú majuiʼyúʼ

11. Xú káʼnii nimbáñun rí niʼsngáa Jesús náa discípulos ndrígóo rá.

11 Jesús nindoo rí xa̱bi̱i̱ maʼndún kuyáá má xúʼko̱ Jeobá ga̱jma̱a̱ Ajngá rawunʼ náa naʼthí rí gajkhun. Nda̱wa̱á rí nituxi̱i̱ niʼthún a̱jmi̱i̱n discípulos ndrígóo tikhuu rí kiʼtáriyaʼ náa Escrituras Hebreas rí ikhaa niʼnimbánuu. Xú káʼnii nimbáñun ajngáa rígi̱ xá. Nda̱wa̱á, discípulos nithi: “¿A raʼka asjndo xo agu nirmaʼan naʼ aun akianʼlo ri niʼke raʼtanʼlo jamba naki niʼni ri mafraʼaʼlo ri naʼtan naʼ Huaʼtan-dxeʼ [Escrituras]?” (Lucas 24:32).

12, 13. a) Ndiéjunʼ nindxu̱u̱ rí na̱nguá kuwa rusngajmá mbaʼin xa̱bu̱ náa Dios ga̱jma̱a̱ náa Biblia rá. b) Xú káʼnii gándoo guʼni mu xándáti̱ga̱a̱ rí nandaʼ xtayáá Dios rá.

12 Índo̱ ikháánʼ ni̱dxu̱ʼ rajmañaʼ rí phú xtáa raʼsngáa náa Biblia, lá ragájkhun rí xóo aguʼ nirmáʼá náa awúu̱n a̱jkia̱nʼ, rí asndu niraxtaa gagi ga̱jma̱a̱ nindaaʼ xtayáá wéñuʼ Dios ráʼ. Gajkhun rí xúʼko̱. Mbaʼin má nigíʼniin xúʼko̱ kaʼnii. Rí xúgi̱ mingíjyúuʼ nindxu̱u̱ rí maʼndulú kuʼyáá má xúʼko̱ Dios ga̱jma̱a̱ rí muʼni mba̱jo̱o̱. Tsíyulú muʼni xó má Jesús niʼtáriyaʼ marigá náa numbaaʼ rí mbiʼi xúgi̱: “Mbaʼin xabo maxaʼne akuin juyamijna” (Mateo 24:12). Xú káʼnii gándoo gátani mu xándáti̱ga̱a̱ rí nandaʼ xtayáá Jeobá ga̱jma̱a̱ rí xtáa raʼsngáa náa Biblia rá.

13 Atatsiʼniʼ má xúʼko̱ Jeobá Dios ga̱jma̱a̱ Jesucristo (Juan 17:3). Atatsaʼwáminaʼ májánʼ wéñuʼ rí xtaa ratraxnuu náa Ajngá rawunʼ Dios ga̱jma̱a̱ atraxi̱mínáʼ: “Ndiéjunʼ eʼsngóʼ rígi̱ ga̱jma̱a̱ numuu Jeobá rá. Lá naxnúʼ mbá numuu mu maʼndoʼ ka̱yo̱o̱ ga̱jma̱a̱ xúgíʼ a̱jkiu̱nʼ, ku̱ma̱ ga̱jma̱a̱ mbá xúgíʼ rí xa̱bu̱ ni̱ndxu̱ʼ ráʼ.”  (atraxnuu 1 Timoteo 4:15). Á mu natatsaʼwáminaʼ xúgi̱ kaʼnii, rí nandaʼ xtayáá Jeobá xáʼga̱nú mandáti̱ga̱a̱.

14. Ndíjkha rí gíʼdoo wéñuʼ numuu rí muʼtájkáan mu xándáti̱ga̱ rí nandulúʼ kuʼyáá Jeobá rá.

14 Rí muʼtájkáan nángii eʼni nindxu̱u̱ imbo̱o̱ rí xú káʼnii maʼndulú kuʼyáá má xúʼko̱ Jeobá (1 Tesalonicenses 5:17). Náa capítulo 17 nijmañulúʼ rí muʼtájkáan nindxu̱u̱ mbá regalo rí gíʼdoo wéñuʼ numuu rí nixná Dios. Índo̱ nuʼtámíjná nángii eʼni gajmiúlú a̱ngiu̱lú naʼni rí mambáxulu itháan májánʼ. Xúʼko̱ má kaʼnii ma̱ngaa, á mu nuʼtájkáan nángii eʼni náa Jeobá maʼni rí mambáxulu má xúʼko̱ gajmiúlú. Gíʼmaa rí mundxa̱ʼwáá májánʼ e̱dxu̱luʼ índo̱ guʼtájkáan; tsíyulú muʼthá kikháá ajngáa rí asndu xundxa̱ʼwáá e̱dxu̱luʼ rí muʼthá. Gíʼmaa muʼthán Jeobá xó má eʼni mbáa ada̱ ga̱jma̱a̱ anu̱u̱. Xúʼko̱, mú nandulúʼ muʼthán ga̱jma̱a̱ gamajkhu, muʼthán xúgíʼ rí nandulúʼ rí nagájnuu asndu náa a̱jkiu̱lú (Salmo 62:8). Mu mbuʼyamajkuíí Dios gíʼdoo wéñuʼ numuu muʼnigajmaa Biblia ga̱jma̱a̱ muʼthán rí gajkhun. Xúgi̱ kaʼnii gáʼni rí xáʼni mingíjyúuʼ maʼndulú kuʼyáá Dios.

NAKUWÁANʼ GAGI RÍ NDUʼYAMAJKUÍÍ DIOS

15, 16. Ndíjkha rí gíʼmaa mbuʼyáá rí gíʼdoo wéñuʼ numuu rí muʼtáraʼa Reino rí nindxu̱u̱ asndu xóo mbá tesoro rá.

15 Rí muʼnigajmaa Biblia ga̱jma̱a̱ rí muʼtájkáan nindxu̱u̱ mbá rí xú káʼnii mbuʼyamajkuíí Dios rí nuʼni mámbáa rí ikháanʼ. Rí xúgi̱ guʼtá rí nuʼni índo̱ kuwáanʼ gajmiúlú eʼwíínʼ xa̱bu̱: Muʼthá rí kuwáanʼ rajmañulú. Lá niratamíjná ga̱jma̱ʼ mbáa xa̱bu̱ rí naʼsngáa náa Biblia ráʼ. Á mu xúʼko̱, natani mbá rí májánʼ wéñuʼ (Lucas 1:74). Índo̱ nuʼthá rí nijmañulúʼ ga̱jma̱a̱ numuu Jeobá Dios, nuʼnimbánii mbá ñajunʼ rí gíʼdoo wéñuʼ numuu rí nikhanun xúgínʼ cristianos gajkhun: Rí muʼtáraʼa ajngáa rí májánʼ ga̱jma̱a̱ numuu Reino ndrígóo Dios (atraxnuu Mateo 24:14; 28:19, 20).

16 Apóstol Pablo ndiʼyoo rí gíʼdoo wéñuʼ numuu miʼtáraʼa rí asndu niʼthí rí nindxu̱u̱ xóo mbá tesoro (2 Corintios 4:7). Rí muʼthá ga̱jma̱a̱ numuu Jeobá ga̱jma̱a̱ rí wíji̱ maʼni nda̱wa̱á nindxu̱u̱ mbá ñajunʼ rí itháan májánʼ muʼni. Ma̱ngaa naguma mu muʼni ñajunʼ Dios bi̱ itháan májánʼ, ga̱jma̱a̱ xúʼko̱ má naxnulu  rí mambáyulúʼ itháan májánʼ. Índo̱ nutaraʼa, numbañún xa̱bu̱ bi̱ nandún majmañún mu maguanu itháan mijngii náa Anu̱lú bi̱ xtáa mekhuíí ga̱jma̱a̱ matu̱ʼu̱u̱n náa kamba̱a̱ rí na̱jkha̱ kagu̱u̱n makuwá kámuu mbiʼi. Lá rígá imbo̱o̱ ñajunʼ rí naʼni maraxtaa itháan gagi ráʼ. Ma̱ngaa índo̱ naratáraʼa ga̱jma̱a̱ numuu  Jeobá ga̱jma̱a̱ Ajngá rawunʼ, naʼni itháan mba̱a̱ fe ndrígúlú ga̱jma̱a̱ rí maʼndulú kuʼyáá wéñuʼ Dios. Jeobá ndaʼyoo rí gíʼdoo wéñuʼ numuu rí kuwáanʼ ruʼni (Hebreos 6:10). Xó má eʼyáá, rí muʼni má xúʼko̱ ñajunʼ rígi̱ mambáyulúʼ mu maʼndulú kuʼyáá má xúʼko̱ Dios (atraxnuu 1 Corintios 15:58).

17. Ndíjkha rí gíʼdoo wéñuʼ numuu muʼtáraʼa rá.

17 Gíʼdoo wéñuʼ numuu magiwa̱nʼ a̱jkiu̱lú rí ndayóoʼ muʼtáraʼa nacha̱ wéñuʼ ajngáa ndrígóo Reino. Náa Biblia naʼthí: “Arasŋga ajŋgo Dios, arasŋga xoguiʼ mbiʼi” (2 Timoteo 4:2). Ndíjkha rí gíʼdoo wéñuʼ numuu rá. Numuu rí náa Ajngá rawunʼ Dios naʼthí: “Mbiʼi ndrígóo Jeobá na̱ʼkha̱nú mijngii. Na̱ʼkha̱nú mijngii, ga̱jma̱a̱ gíʼmaa rí maʼchu̱lú wéñuʼ” (Sofonías 1:14). Xúʼko̱ kaʼnii, mbiʼi ndrígóo Jeobá na̱ʼkha̱nú nacha̱ wéñuʼ mu maʼni gámbáa xúgíʼ dí ra̱májánʼ dí rígá náa numbaaʼ rígi̱. ¡Xa̱bu̱ gíʼmaa mbuyáá rígi̱! Gíʼmaa makru̱ʼu̱u̱n rí mbiʼi xúgi̱ ndayóoʼ munimbu̱ún náa Jeobá bi̱ itháan mba̱a̱, numuu rí fin ‹ma̱ʼkha̱nú nacha̱› (Habacuc 2:3).

18. Náa numuu rí ndayóoʼ mbuʼyamajkuíí Jeobá gajmiúlú cristianos bi̱ gajkhun rá.

18 Jeobá nandoo rí mbuʼyamajkuíí gajmiúlú cristianos bi̱ gajkhun. Ikha jngó, náa Biblia naʼthí: “Gíʼmaa muniʼnúnʼ májánʼ wéñuʼ eʼwíínʼ mu maxkaxáanʼlu maʼndulú kuʼñúún ma̱ngaa muʼni rí májánʼ, xuniʼñáanʼ rajkua náa nawáanʼlu, xó má eguʼwún eni tikhun, rí phú gíʼmaa muʼni, guxná tsiakimijna kanikháanʼ, numuu rí ikháanʼlu nduʼyáá dí na̱ʼkha̱ rajngiyuu mbiʼi” (Hebreos 10:24, 25). Índo̱ na̱jkua̱ náa reunión gajmiúlú a̱ngiu̱lú bi̱ guáʼdáá fe, xúʼko̱ nandoo nuʼni mba̱a̱ ga̱jma̱a̱ nduʼyamajkuíí Dios ndrígúlú. Ma̱ngaa nuxnamíjná tsiakii mámbáa rí ikháanʼ.

19. Ndiéjunʼ gándoo guʼni mu maʼndulú kuʼyamijná itháan náa nagimbáanʼ rá.

19 Índo̱ nagimbáanʼ gajmiúlú iʼwíínʼ xa̱bi̱i̱ Jeobá, naʼni rí maʼndulú kuʼyamijná ga̱jma̱a̱ naʼni rí mambaxúlúʼ májánʼ náa nagimbáanʼ. Gíʼdoo wéñuʼ numuu mbuʼyáá rí xú káʼnii májánʼ xa̱bu̱ ni̱ndxu̱ún eʼwíínʼ, xó má Jeobá eʼyulú ikháanʼ. Xáraʼti̱i̱n rí a̱ngia̱nʼ mani̱ndxu̱ún xa̱bu̱ jmbiin. Garmáʼáan a̱jkia̱nʼ rí  xúgiáanʼ nakiéʼkulu ga̱jma̱a̱ mámbáa ndajyúuʼ mixtiʼkhu rí xú káʼnii najmañuu (atraxnuu Colosenses 3:13). Gambaxáaʼ gajmiáanʼ xa̱bu̱ bi̱ nandún kuyáá Jeobá ga̱jma̱a̱ xúgíʼ a̱jkiu̱ún, ga̱jma̱a̱ ma̱ta̱ya̱a̱ xú káʼnii gáʼga rajoo rí najmañaʼ ga̱jma̱a̱ numuu Dios. Á mu natayamajkuíí Jeobá gajmiáanʼ a̱ngia̱nʼ bi̱ nuni ñajunʼ ikhaa, xáʼniaʼ mingíjyúuʼ maʼnda̱ʼ xtayáá Dios. Rí xúgi̱ guʼyáá xú káʼnii Jeobá eʼni tsajkurámiinʼ bi̱ nduyamajkuíí káxi̱ ga̱jma̱a̱ nuni rí Dios maʼndún kuñún.

ATANIMINAʼ MARAʼDÁÁ “VIDA RÍ PHÚ NINDXU̱U̱ GAJKHUN”

20, 21. Ndiéjunʼ eyoo gáʼthúu̱n ajngáa “vida rí phú nindxu̱u̱ gajkhun”, ga̱jma̱a̱ náa numuu rí májánʼ maguaʼdáá rá.

20 Jeobá naxnún vida xa̱bu̱ bi̱ kuwa jmbu, mu xú káʼnii nindxu̱u̱ vida rúʼko̱ rá. Mbaʼáanʼ rí ikháanʼ nuʼthá rí nduʼya, numuu rí nandoo nduʼyá xi̱ʼ, nuphiʼtsulú ga̱jma̱a̱ nandoo nuʼwa̱a̱nlú iyaʼ. Índo̱ kuwáanʼlú májánʼ, mbáa asndu nuʼthá: “¡Rígi̱ nindxu̱u̱ rí maraxtaa májánʼ!”. Mú, náa Biblia nasngájma rí mbiʼi xúgi̱ nimbáa xa̱bu̱ na̱nguá xtáa gagi wéñuʼ.

Jeobá nandoo rí ikháánʼ maraʼdáá “vida rí phú nindxu̱u̱ gajkhun”. Lá maʼngaaʼ maraʼdáá ikháánʼ ráʼ.

21 Náa Biblia naʼthúún xúgínʼ xa̱bu̱ “muguaʼdáá vida rí phú nindxu̱u̱ gajkhun” (1 Timoteo 6:19). Ajngáa “vida rí phú nindxu̱u̱ gajkhun” nandoo gáʼthi rí xú káʼnii kuáʼti̱i̱n makuwáanʼ nda̱wa̱á. Índo̱ ní xáguaʼdáá aʼkhá, ikhú makuwáanʼ xó ma eʼthí náa Biblia, xó má nindoo Dios makuwáanʼ asndu nákha ginii. Mbiʼi rí gákuwáanʼ náa Ku̱ba̱ʼ mitsaan ní xáguaʼdáá nandii, makuwáanʼ tsímáá ga̱jma̱a̱ gagi, ikhú maguaʼdáá “vida rí phú nindxu̱u̱ gajkhun”, xóo muʼthá náa makuwáanʼ kámuu mbiʼi (1 Timoteo 6:12). Xúʼko̱ kaʼnii, kuaʼti̱i̱n makuwáanʼ májánʼ wéñuʼ nda̱wa̱á, lá raʼkháa xúʼko̱ tayáá rá.

22. Xú káʼnii gándoo gáraʼdáá ikháánʼ “vida rí phú nindxu̱u̱ gajkhun” rá.

22 Xú káʼnii gándoo mbáa xa̱bu̱ gágiʼdoo “vida rí phú nindxu̱u̱ gajkhun” rá. Nákha xóó tséʼthi ajngáa rígi̱, Pablo niʼthún cristianos rí muni “ñajunʼ rí májánʼ” ga̱jma̱a̱ rí maguaʼdáá “rí májánʼ rí na̱ʼkha̱ náa Dios” (1 Timoteo 6:18). Makujmaa rígi̱ á mu nuʼgíiʼ nuʼni xó má ejmañuluʼ náa Biblia. Mú, lá nindoo gáʼthi Pablo rí á mu nuni rí májánʼ makhánulúʼ “vida rí phú nindxu̱u̱  gajkhun” rá. Na̱nguá, rí makuwáanʼ májánʼ wéñuʼ nda̱wa̱á nindxu̱u̱ rí Dios “pu-neʼne atiun kaʼyaʼluʼ” (Romanos 5:15). Mú, Jeobá nandoo maʼni tsajkurámiinʼ wéñuʼ xa̱bu̱ bi̱ nuni ñajunʼ ndrígóo. Ikhaa nandoo rí ikháánʼ maraʼdáá “vida rí phú nindxu̱u̱ gajkhun”, rí maraxtaa kámuu mbiʼi, rí maraxtaa gagi ga̱jma̱a̱ tsímáá. Vida rúʼko̱ rí guáʼti̱i̱n xúgínʼ xa̱bu̱ bi̱ nandún kuyáá Dios.

23. Ndíjkha gíʼdoo wéñuʼ numuu rí Dios maʼndoo kaʼyulúʼ rá.

23 Mámbáa rí ikháanʼ gíʼmaa maraximínáʼ: “Lá ndayamajkhuu Dios xó ma e̱ʼkha̱ raʼthí náa Biblia rá.” Á mu xúgíʼ mbiʼi nuʼthá rí xúʼko̱, kuwáanʼ rajkua náa mbá kamba̱a̱ májánʼ. Ma̱ndoo mbuʼyáá gajkhun rí Jeobá nindxu̱u̱ náa numbayúmi̱jna̱. Ikhaa mañewu̱u̱n xa̱bu̱ xuajñu bi̱ kuwa jmbu índo̱ gúraʼní mbiʼi migamíi rí na̱jkha̱ ratumuu náa numbaaʼ xkawiʼ rígi̱. Ma̱ngaa, maʼga̱ kaguáanʼ náa mbá numbaaʼ nuxi̱ʼ, dí rígá mijngii. ¡Ra̱ʼkhá tháán májánʼ gáʼni! ¡Ra̱ʼkhá tháán kuwáanʼ gagi numuu rí niraʼwíí muʼnimbulúʼ kuʼyáá Dios mbiʼi rígi̱ rí na̱jkha̱ ratumuu! Á mu ikháánʼ natraʼwíí matani rí májánʼ xúgi̱, ma̱ndoo maraʼdáá kámuu mbiʼi “vida rí phú nindxu̱u̱ gajkhun”, vida rí nindoo Jeobá Dios maguaʼdáá asndu nákha ginii.