Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Ndiéjunʼ phú eʼsngáa náa Biblia rá.

 CAPÍTULO 7

Rí guáʼthi̱i̱n marigá ga̱jma̱a̱ numún xa̱bu̱ bi̱ nikháñun

Rí guáʼthi̱i̱n marigá ga̱jma̱a̱ numún xa̱bu̱ bi̱ nikháñun
  • Ndíjkha rí nduʼyáá gajkhun rí matuxi̱ín xa̱bu̱ bi̱ nikháñun rá.

  • Náa numuu dí ra̱ʼkhá tháán eyoo Jeobá makuxi̱ín xa̱bu̱ bi̱ nikháñun rá.

  • Tsíin gatuxi̱ín rá.

1-3. Tsáa nindxu̱u̱ bi̱ gíʼdoo sia̱nʼ náa ikháanʼ bi̱ naxkulú xúgiáanʼ, ga̱jma̱a̱ xú káʼnii eʼni̱i̱ a̱jkiu̱lú índo̱ nduʼyáá rí naʼsngáa náa Biblia rá.

ATATSAʼWÁMINAʼ rí xtáa raxkaʼ mbáa bi̱ gíʼdoo wéñuʼ sia̱nʼ náa ikháánʼ ga̱jma̱a̱ itháan migújkuíʼ ma̱ngaa itháan nacha̱ egáyúu. Natayáá rí á mu naxkamán, xágáwinʼ a̱jkiu̱u̱n kaʼyaʼ, numuu rí nigudíin má mbaʼin bi̱ nambáxa̱ʼ gajmiáanʼ. Maski ajndu ikháánʼ natagáyaʼ wéñuʼ, mu ikhaa na̱ʼkha̱ itháan mijngii. Nakujmaa rí nánguá kaʼnii makríñanʼ. Mú ikhú na̱ʼkha̱ mbáa bi̱ mambáyaʼ. Ikhaa itháan migújkuíʼ ki xóo bi̱ gíʼdoo sia̱nʼ náa ikháánʼ ga̱jma̱a̱ nambáyaʼ. ¡Ikhú naʼni̱i̱ a̱jkia̱nʼ!

2 Xó má xkri̱da rígi̱, ikháánʼ xtáa má raxkaʼ mbáa bi̱ gíʼdan sia̱nʼ. Mú xtáa raxkulú xúgiáanʼ. Xó má ndiʼyáá náa capítulo rí ninújngoo, náa Biblia nasngájma rí nakháñulú nindxu̱u̱ xóo mbáa xa̱bu̱ bi̱ gíʼdoo sia̱nʼ. Nimbáa xa̱bu̱ xáʼngo̱o̱ gakríyaʼ náa rí nakháñulú ga̱jma̱a̱ nimbáa xáʼngo̱o̱ gaʼni gámbáa, ga̱jma̱a̱ xúgiáanʼ nduʼyáá xú káʼnii bi̱ gíʼdoo sia̱nʼ nagudíin bi̱ nandulúʼ kuʼñúún. Mú Jeobá gíʼdoo itháan tsiakii ki xóo rí nakháñulú. Ikhaa nindxu̱u̱ bi̱ Naʼni káwáanʼ. Nisngájma má rí maʼngo̱o̱ maxmínaʼ ga̱jma̱a̱, ma̱ngaa nakudaminaʼ rí maʼni gámbáa mbá kayuʼ. Náa Biblia naʼthí: “Xóo imbawíí xa̱bu̱ bi̱ sia̱nʼ, rí nakháñulú mandáti̱ga̱a̱ mbá kayuʼ” (1 Corintios 15:26). ¡Phú májánʼ nindxu̱u̱ ajngáa rígi̱!

 3 Gundxaʼwamíjna̱ ga̱jma̱a̱ numuu gaʼkhu dí naʼni marigá bi̱ gíʼdoo sia̱nʼ náa ikháanʼ. Xúʼko̱ makru̱ʼu̱lú mbá dí maʼni makuwáanʼ tsímáá: Jeobá niʼthí rí bi̱ nikháñun makuwá mbu̱júu̱ (Isaías 26:19). Ikhaa maʼni dí matangi̱ín makuwá mbu̱júu̱; rígi̱ nindxu̱u̱ rí guáʼthi̱i̱n xa̱bu̱ bi̱ nikháñun.

ÍNDO̱ NAKHÁÑU MBÁA BI̱ NANDULÚʼ KUʼYÁÁ

4. a) Náa numuu rí nandoo nduʼyáá rí eku̱mu̱u̱ Jeobá índo̱ nduʼyáá rí niʼni Jesús índo̱ nikháñu mbáa bi̱ nambáxu̱u̱ ga̱jma̱a̱ xá. b) Tsáa nimbáxu̱u̱ gajmíi̱n Jesús rá.

4 Lá nikháñu mbáa bi̱ xtayáá o mbáa bi̱ nambáxa̱ʼ ga̱jma̱ʼ ráʼ. Nakujmaa rí xáʼngaʼ matraʼníí gaʼkhu, gajmá, ma̱ngaa natayáá rí nándáa dí ma̱ndoo matani. Ikhú índo̱ ndayúlú mambáyulúʼ itháan rí Ajngá rawunʼ Dios (atraxnuu 2 Corintios 1:3, 4). Náa Biblia nasngájmulúʼ rí eku̱mu̱u̱ Jeobá ga̱jma̱a̱ Jesús índo̱ xa̱bu̱ nakháñun. Nasngájmulúʼ xú káʼnii nixtáa gíná Jesús índo̱ nikháñu mbáa bi̱ nandoo kaʼyoo wéñuʼ, ga̱jma̱a̱ nduʼyáá rí ikhaa nisngájma kaʼwu xú káʼnii xa̱bu̱ nindxu̱u̱ Anu̱u̱ (Juan 14:9). Índo̱ na̱jkha̱ náa xuajin Jerusalén, na̱jkha̱ gáʼyoo Lázaro gajmíi̱n a̱ngui̱i̱n, María ga̱jma̱a̱ Marta, bi̱ nikuwa náa mijngii xuajin Betania. Ikhiin nimbáxu̱u̱n májánʼ wéñuʼ, náa Biblia naʼthí rí “Jesús eʼne akuin-jaʼyo Marta gajma dxuiʼgu gajma Lázaro” (Juan 11:5). Mú Lázaro nikháñu, xó má ndiʼyáá náa capítulo 6.

5, 6. a) Xú káʼnii nixtáa Jesús índo̱ ndiʼyoo rí kuwa rumbiyaʼ a̱ngui̱i̱n Lázaro ga̱jma̱a̱ bi̱ nambáxu̱u̱ gajmíi̱n índo̱ ikhaa nikháñu xá. b) Ndíjkha rí naxnúlú tsiakii rí Jesús nigawúnʼ wéñuʼ rá.

5 Xú káʼnii nixtáa Jesús índo̱ nikháñu bi̱ nimbáxu̱u̱ ga̱jma̱a̱ rá. Náa Biblia nasngájma rí ikhaa ni̱jkha̱ gáʼñun a̱ngui̱i̱n Lázaro ga̱jma̱a̱ bi̱ nimbáxu̱u̱ gajmíi̱n, bi̱ nimbiyaʼ índo̱ nikháñu. Nigáwiinʼ wéñuʼ a̱jkiu̱u̱n índo̱ ndiʼñún. “Aʼkue ri asjndo niguhuen [Jesús] ri nigamigaʼ akuin” ga̱jma̱a̱ nda̱wa̱á nimbiyaʼ (Juan 11:33, 35). Náa numuu rí nixtáa gíná wéñuʼ xá. Lá rígi̱ nandoo gáʼthi rí ikhaa na̱nguá gíʼthu̱u̱n nimbá dí wíji̱ marigá nda̱wa̱á xá. Raʼkháa xúʼko̱. Jesús ndaʼyoo rí nacha̱ má wíji̱ marigá mbá rí májánʼ wéñuʼ (Juan 11:3, 4). Maski ajndu xúʼko̱, ikhaa nigawúnʼ ga̱jma̱a̱ nixtáa gíná rí xa̱bu̱ nakháñun.

 6 Índo̱ nduʼyáá rí Jesús nigawúnʼ wéñuʼ naxnúlú tsiakii. Naʼsngúlúʼ rí Jesús ga̱jma̱a̱ Anu̱u̱ tsíyoo gáʼyoo rí nakháñulú. Ma̱ngaa, Jeobá gíʼdoo xúgíʼ tsiakii mu maxnáminaʼ ga̱jma̱a̱ maʼni gámbáa bi̱ gíʼdoo sia̱nʼ náa ikháanʼ. Guʼyáá milagro rí niʼni Jesús ga̱jma̱a̱ tsiakii rí nigruigú náa Dios.

“LÁZARO, AGAJNAʼ RIXA”

7, 8. Náa numuu rí mbaʼin bi̱ nikuwa ikhí nindxa̱ʼwa̱míjna̱ rí nándáa rí gíʼthu̱u̱n Lázaro nda̱wa̱á rí nikháñu, ga̱jma̱a̱, ndiéjunʼ rí niʼni Jesús rá.

7 Lázaro nijuaʼdi̱i̱ náa mbá tsíñu, ga̱jma̱a̱ Jesús niʼthún rí muyexingaa itsí rí kúgoo ga̱jma̱a̱ riejuun tsíñu. Marta na̱nguá nindoo, ikhaa niʼthúu̱n rí niʼni má a̱jkhu̱ mbiʼi rí nikháñu ga̱jma̱a̱ rí niʼgaa má (Juan 11:39). Mbáa xa̱bu̱ maʼthí rí nánguá xú matuxi̱i̱ mbáa xa̱bu̱ bi̱ nikháñu.

Índo̱ nituxi̱i̱ Lázaro nirígá wéñuʼ gagi (Juan 11:38-44)

8 Índo̱ niyexingaa itsí, Jesús niʼthí gakhii: “Lázaro, agajnaʼ rixa”. Ndiéjunʼ nirígá ikhú rá. “Aʼkue ri nigajna tsi nijañu.” (Juan 11:43, 44.) Lá natatsaʼwáminaʼ xú káʼnii nikuwa gagi xúgínʼ ráʼ. A̱ngui̱i̱n gu̱ʼu̱ ga̱jma̱a̱ xa̱bu̱ bi̱ kaʼñúún, bi̱ nambáxu̱u̱ gajmíi̱n ga̱jma̱a̱ xa̱bu̱ bi̱ kuwa mijngii náa xtáa ndiyáá májánʼ rí Lázaro nikháñu; mú xúgi̱ kuwa gajmiún mbu̱júu̱ xa̱bu̱ bi̱ nandún kuyáá wéñuʼ. Ikhiin ndiyáá rí asndu xóo ragájkhun rí xtáa rarígá. Mbaʼin nikuwa gagi rí asndu ndiyaraʼa. ¡Ra̱ʼkhá tháán májánʼ dí nirígá!

Elías nikuxi̱i̱ a̱ʼdióo mbáa a̱ʼgú xuáʼa̱ (1Reyes 17:17-24)

9, 10. a) Xú káʼnii nisngájma Jesús tsáa nindxu̱u̱ bi̱ nixnúu tsiakii mu makuxi̱i̱ Lázaro rá. b) Xú káʼnii embáyuluʼ rí muraxnuu náa Biblia ga̱jma̱a̱ numún xa̱bu̱ bi̱ nituxi̱ín rá.

9 Jesús táʼthi á mu mbáwíi ikhaa niʼni milagro rígi̱. Nákha xóó tséʼthúu̱n Lázaro, ikhaa niʼtákáñuu Jeobá ga̱jma̱a̱ nisngájma rí Ikhaa nindxu̱u̱ mbáa bi̱ nakuxi̱ín xa̱bu̱ bi̱ nikháñun (atraxnuu Juan 11:41, 42). Raʼkháa i̱ndó mbiʼi rígi̱ rí Jeobá nijmuu tsiakii ndrígóo. Náa Ajngá rawunʼ Dios naʼthí rí kuwa mbá mijna gu̱wi̱nʼ xa̱bu̱ bi̱ nikháñun bi̱ niguánu nituxi̱ín. Mbá xkri̱da ninindxu̱u̱ Lázaro. * Ra̱ʼkhá tháán májánʼ rí  muraxnuu ga̱jma̱a̱ muʼnigajmaa rígi̱. Naʼsngúlúʼ rí Dios na̱nguá eraʼwíin xa̱bu̱, numuu rí nikuxi̱ín jiáma ga̱jma̱a̱ wa̱ʼxa̱ʼ ga̱jma̱a̱ xa̱bu̱ wanii, xa̱bekha ga̱jma̱a̱ gu̱ʼu̱, israelitas ga̱jma̱a̱ xa̱bu̱ bi̱ naguwáʼ i̱mba̱ níʼkhá xuajin. ¡Ra̱ʼkhá tháán mba̱a̱ gagi eʼyáá índo̱ nuraxnuu rí nirígá! Mbá xkri̱da, índo̱ Jesús nikuxi̱i̱ mbáa dxáʼgú, anu̱u̱ ga̱jma̱a̱ ru̱dúu̱ “tsiangua-jayu neʼne akuin” (Marcos 5:42). Jeobá niʼni rí makuwá gagi ga̱jma̱a̱ nimbá miʼtsú xábumun rígi̱.

Apóstol Pedro nikuxi̱i̱ mbáa cristiana bi̱ nigumbiʼyuu Dorcas (Hechos 9:36-42)

10 Xa̱bu̱ bi̱ nikuxi̱ín Jesús niguánu nikháñun mbu̱júu̱. Lá nandoo gáʼthi rígi̱ rí tájmaa mbá kayuʼ rí Jesús nikuxi̱ín xa̱bu̱ bi̱ nikháñun ráʼ. Raʼkháa xúʼko̱. Dí na̱ʼkha̱ raʼthí náa Biblia nasngájma rí gajkhun nirígá rígi̱ ga̱jma̱a̱ naʼni muguaʼthi̱i̱n rí wíji̱ marigá nda̱wa̱á.

NDIÉJUNʼ EʼSNGÚLÚʼ NÁA BIBLIA GA̱JMA̱A̱ NUMÚN XA̱BU̱ BI̱ NITUXI̱ÍN RÁ.

11. Xú káʼnii embáyuluʼ mbuʼyáá rí gajkhun nindxu̱u̱ rí nituxi̱i̱ mbu̱júu̱ Lázaro xó má e̱ʼkha̱ raʼthí náa Eclesiastés 9:5 rá.

11 Náa Biblia naʼsngáa rí xa̱bu̱ bi̱ nikháñun “nánguá eya nditháan kayuʼ”, nandoo gáʼthi, rí na̱nguá kuwa ruya i̱mba̱ níʼkhá asndu nándáa rí eyáá (Eclesiastés 9:5). Rí nigíʼnuu Lázaro nasngájma rí xúʼko̱ kaʼnii rígá. Índo̱ nituxi̱i̱ mbu̱júu̱, lá niʼthún xa̱bu̱ xú káʼnii nindxu̱u̱ mekhuíí xáʼ. Lá niʼnimíñun ga̱jma̱a̱ historia ndrígóo infierno náa nakha rá. Na̱nguá. Náa Biblia tséʼthi nditháan ga̱jma̱a̱ numuu rígi̱. A̱jkhu̱ mbiʼi rí nikháñu Lázaro, nánguá nikumu̱u̱ “nditháan kayuʼ”. Lázaro nikháñu, rí nindxu̱u̱ asndu xóo mbá ginuʼ (Juan 11:11).

12. Náa numuu nandoo nduʼyáá rí gajkhun nituxi̱i̱ Lázaro rá.

12 Rí nigíʼnuu Lázaro ma̱ngaa naʼsngúlúʼ rí gajkhun matuxi̱ín xa̱bu̱ bi̱ nikháñun. Jesús nikuxi̱i̱ Lázaro náa inún xúgínʼ xa̱bu̱. Asndu xa̱bu̱ ede̱ ndiyáá rí gajkhun nirígá milagro rígi̱, maski ajndu ikhiin nikiʼníin kuyáá mbanda̱ʼkho Jesús. Ikhiin nithi: “¿Nala ri guʼnilo-ra? Pu mbaʼa seña eʼne xabo tsigueʼ” (Juan 11:47). Mbaʼin xa̱bu̱ nigún gúyáá bi̱ nituxi̱i̱ ga̱jma̱a̱ ninimbu̱ún náa Jesús. Rí nigíʼnuu Lázaro nisngájma kaʼwu rí  Dios nindxu̱u̱ bi̱ nikunguanʼ Jesús. Ra̱ʼkhá tháán májánʼ nikujmaa rígi̱ rí asndu tikhun xa̱bu̱ ede̱ ndiyáaʼ muxiyáa Jesús ga̱jma̱a̱ Lázaro (Juan 11:53; 12:9-11).

13. Náa numuu rí nandoo nduʼyáá gajkhun rí Jeobá ma̱ndoo makuxi̱ín xa̱bu̱ bi̱ nikháñun rá.

13 Lá ra̱májánʼ nindxu̱u̱ rí mbáa xa̱bu̱ mandxaʼwáminaʼ rí matuxi̱ín mbu̱júu̱ xa̱bu̱ bi̱ nikháñun ráʼ. Májánʼ, numuu rí Jesús niʼthí rí maʼga̱nú mbóo mbiʼi rí “mba xuguinʼ tsi juhua naʼ iña huajin” matuxi̱ín (Juan 5:28). Numuu rí Jeobá Niʼni xúgíʼ rí ndaʼya, lá mingíjyúuʼ muʼnimbulúʼ rí ikhaa ma̱ndoo maʼni rí marigá mbu̱júu̱ xáʼ. Ma̱ndoo maʼni á mu Jeobá naku̱mu̱u̱ kaʼñúún. Lá narmáʼáan a̱jkiu̱u̱n kaʼñúún xa̱bu̱ bi̱ nandulúʼ kuʼñúún xáʼ. Atatsaʼwáminaʼ rígi̱: ¡Dios ndaʼyoo rí mbiʼñún xúgínʼ a̱ʼgua̱a̱n bi̱ kuwa mekhuíí! (Isaías 40:26.) Ikha jngó Jeobá ma̱ndoo marmáʼáan a̱jkiu̱u̱n xúgíʼ rí nini xa̱bu̱ bi̱ nikháñun bi̱ nandulúʼ kuʼñúún, ga̱jma̱a̱ nandoo makuxi̱ín makuwá mbu̱júu̱.

14, 15. Xó má niʼthí Job, náa numuu dí ra̱ʼkhá tháán eyoo Jeobá makuxi̱ín xa̱bu̱ bi̱ nikháñun rá.

14 Náa numuu dí ra̱ʼkhá tháán eyoo Jeobá makuxi̱ín xa̱bu̱ bi̱ nikháñun rá. Náa Biblia naʼsngáa rí ikhaa nandoo maʼni rígi̱. Job, mbáa xa̱bi̱i̱ Dios bi̱ nixtáa jmbu niraxi: “Á mu mbáa xa̱bu̱ na̱jkha̱nú nakháñuu, lá ma̱ndoo maxtáa mbu̱júu̱ xáʼ.” Job niʼthí rí magiʼthu̱u̱n náa iñá wa̱jinʼ asndu índo̱ gáʼga̱nú mbiʼi rí Dios garmáʼáan a̱jkiu̱u̱n kaʼyoo. Ikha jngó Job niʼthúu̱n Jeobá: “Ikháánʼ matandxaʼoʼ ga̱jma̱a̱ ikhúúnʼ mariʼñaʼ. Numuu rí ikháánʼ nandaʼ wéñuʼ matani rígi̱” (Job 14:13-15).

15 Atatsaʼwáminaʼ rígi̱: Jeobá ra̱ʼkhá tháán eyoo makuxi̱ín mbu̱júu̱ xa̱bu̱ bi̱ nikháñun. Lá ragájkhun rí naxnúlú wéñuʼ tsiakii índo̱ nduʼyáá rí Jeobá ra̱ʼkhá tháán eyoo maʼni rígi̱ ráʼ. Mú xú káʼnii gátuxi̱ín xa̱bu̱ bi̱ nikháñun nda̱wa̱á rá. Tsíin gátuxi̱ín ga̱jma̱a̱ náa mínaʼ gáʼni rá.

“XUGUINʼ TSI JUHUA NAʼ IÑA HUAJIN”

16. Xú káʼnii gakuwa xa̱bu̱ bi̱ gatuxi̱ín rá.

16 Índo̱ nuraxnuu náa Biblia xú káʼnii xa̱bu̱ bi̱ nikháñun  nituxi̱ín nákha wajyúúʼ, najmañulúʼ wéñuʼ dí marigá nda̱wa̱á. Xa̱bu̱ bi̱ nituxi̱ín mbu̱júu̱ náa tsu̱du̱u̱ Ku̱ba̱ʼ nákha wajyúúʼ niwi̱i̱n mu makuwá gajmiún xa̱bu̱ bi̱ nandún kuñún. Xúʼko̱ má gatuxi̱ín ma̱ngaa xa̱bu̱ nda̱wa̱á, mú itháan májánʼ gáʼni. Xó má ndiʼyáá náa capítulo 3, Dios nandoo maʼni̱i̱ mitsaan xúgíʼ Ku̱ba̱ʼ. Ikha jngó xa̱bu̱ bi̱ nikháñun ní xátangi̱i̱n makuwá náa numbaaʼ náa rígá wéñuʼ guerra, delito ga̱jma̱a̱ nandii. Ikhiin makuwá gagi ga̱jma̱a̱ makuwá tsímáá kámuu mbiʼi náa tsu̱du̱u̱ Ku̱ba̱ʼ.

17. Nguáthi̱i̱n xa̱bu̱ gatuxi̱ín rá.

17 Tsíin gatuxi̱ín rá. Jesús niʼthí rí “xuguinʼ tsi juhua naʼ iña huajin mudxahuin ri naʼten” ga̱jma̱a̱ ikhú ikhiin magajníin (Juan 5:28, 29). Ma̱ngaa, Revelación (Apocalipsis) 20:13 naʼthí: “Ga̱jma̱a̱ lamáa nixnáxi̱i̱n xa̱bu̱ bi̱ nikháñun ikhí, ga̱jma̱a̱ rí nakháñulú ga̱jma̱a̱ iñá wa̱jinʼ nixnáxi̱i̱n bi̱ kuwa ikhí” (atayáá náa apéndice náa naʼthí “Ndiéjunʼ nindxu̱u̱ Seol ga̱jma̱a̱ Hades rá.”) Nimbáa xa̱bu̱ ní xáxtáa náa iñá wa̱jinʼ índo̱ gatuxi̱ín xúgínʼ xa̱bu̱ bi̱ kuwa ruya̱a̱ xúúnʼ ikhí. Apóstol Pablo niʼthí: “Mbuya tsi jmbun, xuʼkue-ma mbuya tsi rajmbun” (Hechos 24:15). Ndiéjunʼ eyoo gáʼthi ajngáa rígi̱ rá.

Náa Ku̱ba̱ʼ mitsaan, xa̱bu̱ bi̱ nikháñun matangi̱ín makuwá ga̱jma̱a̱ muwi̱i̱n gajmiún bi̱ nandún kuñún

18. Tsíin ñajúnʼ tikhun xa̱bu̱ “jmbun” bi̱ matuxi̱ín, ga̱jma̱a̱ xú káʼnii embáyaʼ ikháánʼ rí marigá nda̱wa̱á rá.

18 Náa Biblia na̱ʼkha̱ raʼthí rí nikuwa mbaʼin xa̱bu̱ “jmbun” bi̱ nikuwa nákha xóó tséʼkha̱ Jesús náa tsu̱du̱u̱ Ku̱ba̱ʼ, xó má Noé, Abrahán, Sara, Moisés, Rut, Ester ga̱jma̱a̱ iʼwíínʼ xa̱bu̱. Náa Hebreos capítulo 11 naʼthí ga̱jma̱a̱ numuu tikhun xa̱bekha bugi̱ ga̱jma̱a̱ gu̱ʼu̱ bi̱ niguáʼdáá fe. Ma̱ngaa náa xa̱bu̱ “jmbun” kuwa xa̱bi̱i̱ Jeobá bi̱ nakháñun rí mbiʼi xúgi̱. Índo̱ nduʼyáá rí maguaxu̱ún xa̱bu̱ bi̱ nikháñun naʼni rí ní xámiñulu á mu nakháñulú (Hebreos 2:15).

19. Tsíin ni̱ndxu̱ún xa̱bu̱ bi̱ “rajmbun”, ga̱jma̱a̱ ndiéjunʼ rí májánʼ wéñuʼ gáxnún Jeobá rá.

19 Nikuwa mbaʼin wéñuʼ xa̱bu̱ bi̱ na̱nguá niguáʼnu muniʼniiʼ Jeobá, na̱nguá nini ñajunʼ ndrígóo ga̱jma̱a̱ asndu túni rí nandoo ikhaa. Ndiéjunʼ gúgiʼnii ikhiin xá. Xa̱bu̱ bugi̱ bi̱ “rajmbun” xambumuu kaʼñúún Dios. Dios bi̱ gajkhun makuxi̱ín  mangiin xa̱bu̱ bi̱ nikháñun ga̱jma̱a̱ ikhaa maʼni rí ma̱ndoo muniʼniiʼ ma̱ngaa muni ñajunʼ ndrígóo. Índo̱ gáʼga ranújngoo mbá míí tsiguʼ, xa̱bu̱ bi̱ nikháñun matangi̱i̱n makuwá mbu̱júu̱ ga̱jma̱a̱ ikhiin ma̱ndoo makuwá mbá kambáxu̱u̱n gajmiún xa̱bu̱ jmbun bi̱ kuwa runi ñajunʼ Jeobá náa tsu̱du̱u̱ Ku̱ba̱ʼ. Mani̱ndxu̱u̱ mbóo mbiʼi mitsaan, náa Biblia naxná mbiʼyuu Mbiʼi rí Dios gánda̱ʼa̱a̱ cuenta. *

20. Ndiéjunʼ nindxu̱u̱ Gehena, ga̱jma̱a̱ tsíin egún ikhí rá.

20 Lá nandoo gáʼthi rígi̱ rí matuxi̱ín xúgínʼ xa̱bu̱ bi̱ nikuwa ráʼ. Na̱nguá. Náa Biblia naʼthí rí tikhun kuwa náa ‹Gehena› (Lucas 12:5). Gehena nigumbiʼyuu náa nagadíí náska dí nirígá náa rawunʼ xuajin Jerusalén nákha wajyúúʼ, ikhí nutsikhi̱i̱n xa̱bu̱ bi̱ nikháñun ga̱jma̱a̱ nutsikha náska. Xa̱bu̱ judíos nagún gúdi̱nʼ xa̱bu̱ bi̱ nikháñun, tsíin ni̱ndxu̱ún xa̱bu̱ buʼko̱ rá. I̱ndó bi̱ nuthi judíos dí rakáʼñún majuaʼdi̱i̱n náa ku̱ba̱ʼ ga̱jma̱a̱ rakáʼñún matuxi̱ín. Ikha jngó, Gehena nandoo gáʼthi rí nandáti̱ga̱a̱ kámuu mbiʼi. Jesús manda̱ʼa̱a̱ cuenta náa xa̱bu̱ bi̱ nikháñun, mú Jeobá nindxu̱u̱ mbá Juez bi̱ itháan gíʼdoo numuu (Hechos 10:42). Ga̱jma̱a̱ Dios xákuxi̱ín xa̱bu̱ bi̱ ndaʼñún rí kuwa runi dí ra̱májánʼ ga̱jma̱a̱ tsíñún guriʼkumijná.

BI̱ MATUXI̱ÍN MAGU̱ÚN MEKHUÍÍ

21, 22. a) Tsíin eʼwíínʼ gatuxi̱ín rá. b) Tsáa ninindxu̱u̱ ginii bi̱ nituxi̱i̱ xóo mbáa ángel rá.

21 Ma̱ngaa náa Biblia naʼsngáa rí kuwa eʼwíínʼ xa̱bu̱ bi̱ matuxi̱ín. Ikhiin matuxi̱ín xóo ángeles mu makuwá mekhuíí. Náa Ajngá rawunʼ Dios naʼthí rí i̱ndó Jesucristo nituxi̱i̱ mu maʼga̱a̱ mekhuíí.

22 Nixiyáa Jesús nákha ikhaa ninindxu̱u̱ xóo mbáa xa̱bu̱ numbaaʼ; Jeobá tániñuʼ A̱ʼdióo bi̱ nixtáa jmbu náa Iñáʼ rí nijuaʼdi̱i̱ (Salmo 16:10; Hechos 13:34, 35). Jeobá nikuxi̱i̱ Jesús mu maxtáa xóo mbáa ángel. Apóstol Pedro niʼthí rí Cristo  “nicañuʼ ri xuyu indo su Espíritu-ye xta ndaʼye ajndo xuguiʼ” (1 Pedro 3:18). ¡Ra̱ʼkhá tháán májánʼ ninindxu̱u̱ milagro rígi̱! Jesús nixtáa mbu̱júu̱ xóo mbáa ángel bi̱ gíʼdoo tsiakii (atraxnuu 1 Corintios 15:3-6). Ikhaa ginii nituxi̱i̱ mú raʼkháa i̱ndó ikhaa gátuxi̱i̱ xúʼko̱ kaʼnii (Juan 3:13).

23, 24. Tsíin kuwa náa “borrego tsi rambaʼin” ndrígóo Jesús, ga̱jma̱a̱ nguáthi̱i̱n gáʼni xá.

23 Jesús ndiʼyoo rí nacha̱ má mata̱nga̱a̱ mekhuíí, ikha jngó niʼthún discípulos ndrígóo bi̱ nikuwa jmbu rí maʼga̱ ‹gáʼni mújúnʼ náa makuwa ikhiin› (Juan 14:2). Bi̱ magu̱ún mekhuíí nixná mbiʼñún xóo “borrego tsi rambaʼin” (Lucas 12:32). Nguáthi̱i̱n cristianos bi̱ nikuwa jmbu kuwa náa grupo rí chímbaʼin rá. Náa Rí huasjŋgajma Juan 14:1 nuraxnuu rí niʼthí apóstol Juan: “Ga ndahua ndeyaŋgo ga ndeyo su Aʼda Mugu su huiji naʼ inu cudu ri mbiʼjiu Sión. Ga iqui xta jmiu mba ciento iʼjma-mu squiñuʼ iʼcu-mu mil xabu su tima mbiʼjiu su Aʼda Mugu naʼ quidunʼ jma ri mbiʼjiu Anu Ica”.

24 Cristianos bugi̱ bi̱ ni̱ndxu̱ún 144,000 —náa kúwa apóstoles ndrígóo Jesús bi̱ nikuwa jmbu—, Dios makuxi̱i̱n mu makuwa mekhuíí. Nguáná gatuxi̱ín xá. Apóstol Pablo niʼnirámáʼ dí rígi̱ marigá índo̱ gáʼkha̱nú mbiʼi ndrígóo Cristo (1 Corintios 15:23). Rí xúgi̱ kuwáanʼ mbiʼi rúʼko̱, xó má gájmañaaʼ náa capítulo 9. Rí mbiʼi xúgi̱ naguanún mbá chímbaʼin xa̱bu̱ bi̱ 144,000. Índo̱ ikhiin gakhañun matuxi̱ín nacha̱ wéñuʼ mu magu̱ún gakuwa mekhuíí (1 Corintios 15:51-55). Mú, mbaʼin wéñuʼ xa̱bu̱ bi̱ nikháñun guáʼthi̱i̱n matuxi̱ín nda̱wa̱á náa tsu̱du̱u̱ Ku̱ba̱ʼ mitsaan.

25. Ndiéjunʼ gájmañúlúʼ náa imbo̱o̱ capítulo rá.

25 Ikháánʼ ma̱ndoo matanimbaaʼ rí Jeobá maʼni gámbáa rí naʼni makhañúlúʼ, bi̱ gíʼdoo sia̱nʼ náa ikháanʼ ga̱jma̱a̱ maʼnimbáti̱ga̱a̱ kámuu mbiʼi (atraxnuu Isaías 25:8). Mu mbáa natraximínáʼ: “Ndiéjunʼ gúni náa mekhuíí bi̱ matuxi̱ín rá.” Ikhiin mani̱ndxu̱ún bi̱ makuwa náa Reino dí rígá mekhuíí dí mitsaan wéñuʼ. Náa imbo̱o̱ capítulo gájmañúlúʼ itháan ga̱jma̱a̱ numuu Xa̱bu̱ Ñajunʼ bugi̱.

^ párr. 9 I̱ʼwáʼ dí nirígá ma̱ndoo mataxkamaa náa 1 Reyes 17:17-24; 2 Reyes 4:32-37; 13:20, 21; Mateo 28:5-7; Lucas 7:11-17; 8:40-56; Hechos 9:36-42 ga̱jma̱a̱ 20:7-12.

^ párr. 19 Náa apéndice náa naʼthí “Ndiéjunʼ nindxu̱u̱ Mbiʼi rí Dios gánda̱ʼa̱a̱ cuenta rá”. Ma̱ta̱ya̱a̱ itháan ga̱jma̱a̱ numuu Mbiʼi ndrígóo Dios ga̱jma̱a̱ xú káʼnii guxnaxi̱i̱ cuenta xa̱bu̱.