Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Ndiéjunʼ phú eʼsngáa náa Biblia rá.

 CAPÍTULO 16

Araxtaa náa religión rí gajkhun

Araxtaa náa religión rí gajkhun
  • Ndiéjunʼ eʼsngáa náa Biblia ga̱jma̱a̱ numún xándú rá.

  • Xú káʼnii eyáá cristianos ndxa̱a̱ rí nuni i̱ʼwáʼ religión rá.

  • Xú káʼnii gándoo gárathu̱u̱n iʼwíínʼ rí xtaa ratatsimbaʼ mu ikhiin xákiʼníin rá.

1, 2. Ndiéjunʼ graxe̱ gíʼmaa matani ikháánʼ nda̱wa̱á rí nitatsiñanʼ religión dí ragájkhun, ga̱jma̱a̱ ndíjkha rí gíʼdoo wéñuʼ numuu rá.

ATATSAʼWÁMINAʼ rí ni̱dxu̱ʼnú nitayáá mbáa xa̱bu̱ bi̱ xtáa raʼni gachúu iyaʼ rí nagiin, rí xúgi̱ asndu migamíi makhañáaʼ. Ndiéjunʼ gatane rá. Mbáa ikháánʼ mataʼyááʼ xú káʼnii gándoo matiexíi iyaʼ kaʼwu. Índo̱ gámbáʼ ratani̱ rígi̱, ikháánʼ matraximínáʼ: Lá nini gachúu xuyuʼ ga̱jma̱a̱ veneno rá.

2 Xúʼko̱ má kaʼnii náa religión dí ragájkhun. Náa Biblia naʼsngáa rí nichúu ga̱jma̱a̱ kiʼsngáa rí minduwaʼ ga̱jma̱a̱ rí nuni nindxu̱u̱ ra̱májánʼ wéñuʼ (2 Corintios 6:17). Ikha jngó, ndayóoʼ magajnanʼlú nacha̱ wéñuʼ náa “Babilonia ri ñajun xuajin apa”, rí nandoo gaʼthí náa xúgíʼ religión dí ragájkhun dí rígá náa numbaaʼ (Rí huasjŋgajma Juan [Apocalipsis] 18:2, 4). Lá nigajnaʼ má ikhí ikháánʼ ráʼ. Á mu xúʼko̱, nutha̱a̱nʼxu rí májánʼ wéñuʼ nitani̱. Mú raʼkháa i̱ndó ndayóoʼ matatsiʼñáanʼ religión dí ragájkhun o marata rí ní xaraxtaa ikhí. Ma̱ngaa gíʼmaa matraximínaʼ: “Lá rígá xóó rí nani mu mbayamajkuu religión dí ragájkhun ráʼ.” Guʼyáá tikhuu xkri̱da.

 RÍ MATAYAMAJKHÚN XÁNDÚ GA̱JMA̱A̱ BI̱ NIKHÁÑUN

3. a)Ndiéjunʼ eʼthí náa Biblia ga̱jma̱a̱ numún xándú ga̱jma̱a̱ ndíjkha rí tikhun xa̱bu̱ tsénimbu̱ún rá. b) Á mu ikháánʼ xtaʼdáá mbá rí na̱ʼkha̱ náa religión dí ragájkhun, ndiéjunʼ rí gíʼmaa matani rá.

3 Kuwa xa̱bu̱ bi̱ guáʼdiin xándú náa guʼwún asndu nákha wajyúúʼ mbiʼi. Lá xtaʼdin xándú mangáán ráʼ. Á mu xúʼko̱, mbáa raʼkhí gáta̱ya̱a̱ dí maratakáñii Dios á mu tsejmianʼ xándú. Mbáa asndu nangajuaʼ xtañún wéñuʼ. Mú, Dios nindxu̱u̱ bi̱ naʼthí xú káʼnii gíʼmaa mbuʼyamajkhuíí, ga̱jma̱a̱ náa Biblia naʼsngáa rí ikhaa tsinigu̱ʼ majmiulúʼ xándú (atraxnuu Éxodo 20:4, 5; Salmo 115:4-8; Isaías 42:8; 1 Juan 5:21). Ikha jngó, mu matayamajkuíí xó má eyoo Dios, gíʼmaa rí matani gámbáa xúgíʼ rí xtaʼdáá rí na̱ʼkha̱ náa religión dí ragájkhun. Gíʼmaa rí makiʼnáanʼ kuʼyáá mbanda̱ʼkho xó má eʼyoo Jeobá (Deuteronomio 27:15).

4. a) Ndíjkha dí ragíʼdoo nditháan numuu mbuʼyamajkún xa̱bu̱ bi̱ nikháñun rá. b) Náa numuu rí Jeobá tániñúnʼ xa̱bi̱i̱ muni espiritismo rá.

4 Rígá mbaʼa rí nuni religión dí ragájkhun rí najmaʼnuʼ wéñuʼ, ikhaa nindxu̱u̱ rí nduyamajkhúún xa̱bu̱ bi̱ nikháñun. Nákha xóó tsíjmañún rí gajkhun rí xtáa raʼsngáa náa Biblia, tikhun xa̱bu̱ nindxaʼwamíjna̱ rí xa̱bu̱ bi̱ nikháñun kuwa  nduya náa i̱mba̱ numbaaʼ rí tsékujmaa ga̱jma̱a̱ rí ma̱ndoo mumbañún o muniu̱u̱ dí raʼkhí xa̱bu̱ bi̱ nduya. Mbáa asndu rígá rí niraxnún mu xakiʼníin kuyaʼ. Mú, xó má nijmañaʼ náa capítulo 6 ndrígóo libro rígi̱, xa̱bu̱ bi̱ nikháñun na̱nguá kuwa ruya náa i̱mba̱ numbaaʼ. Ikha jngó, na̱nguá gíʼdoo nditháan numuu rí maratamíjná gajmiáanʼ. Xa̱bu̱ wéñíʼ nindxu̱u̱ bi̱ phú xtáa raʼthí índo̱ nuʼdxawíín mbá aʼwóo xa̱bu̱ bi̱ nikháñu. Ikha jngó, Jeobá tániñúnʼ xa̱bu̱ bi̱ nikuwa náa xuajin Israel rí mutamijná gajmiún xa̱bu̱ bi̱ nikháñun ga̱jma̱a̱ rí xúni̱ nditháan rí na̱ʼkha̱ náa espiritismo (atraxnuu Deuteronomio 18:10-12).

5. Ndiéjunʼ gándoo matani ikháánʼ á mu najmiaʼ xándú o á mu natayamajkhún xa̱bu̱ bi̱ nikháñun rá.

5 Ndiéjunʼ gátani ikháánʼ á mu religión náa xtaa rí mbiʼi xúgi̱ ndaʼyamajkhún xándú ga̱jma̱a̱ xa̱bu̱ bi̱ nikháñun rá. Atraxnuu májánʼ wéñuʼ texto ndrígóo Biblia náa nasngájma rí endxa̱ʼwáminaʼ Dios ga̱jma̱a̱ numuu xúgíʼ rígi̱. Aratakháñii Jeobá xúgíʼ mbiʼi; aratháán rí nandaʼ matayamajkuíí xó má eyoo ikhaa ga̱jma̱a̱ atanda̱ʼa̱ rí mambáyaʼ matatsaʼwamínáʼ xó má ikhaa (Isaías 55:9).

CRISTIANOS BI̱ NIKUWA NÁKHA GINII NA̱NGUÁ NINIRIYAʼ NAVIDAD

6, 7. a) Náa numuu rí xa̱bu̱ nuniriyaʼ ndxa̱a̱ navidad ga̱jma̱a̱ ndíjkha rí tuniriyaʼ timbíi̱n cristianos rá. b) Ndiéjunʼ nindxu̱u̱ imbo̱o̱ rí kagujtuminaʼ ga̱jma̱a̱ ndxo̱o̱ tsigúnʼ nákha nikúwi̱i̱n discípulo ndrígóo Jesús rá.

6 Á mu nuʼniriyaʼ tikhuu ndxa̱a̱ rí nuni religión dí ragájkhun asndu maʼni gachúu rí xú káʼnii eʼyamajkhuíí Dios. Guʼyáá mbá xkri̱da ndrígóo ndxa̱a̱ Navidad. Ndxa̱a̱ rígi̱ naʼni marmáʼáan a̱jkiu̱ún rí xú káʼnii nixtáa Jesucristo, ga̱jma̱a̱ xúgíʼ religión bi̱ nuthi rí nindxu̱ún cristianos nuniriyaʼ ndxa̱a̱ rígi̱. Mú, nda̱a̱ nditháan náa nasngájma rí discípulos ndrígóo Jesús bi̱ nikuwa nákha ginii niniriyaʼ ndxa̱a̱ Navidad. Náa libro Los orígenes sagrados de las cosas profundas naʼthí: “Índo̱ niʼni má a̱jma̱ ciento tsiguʼ rí nigumaa Cristo, nimbáa na̱nguá eʼyoo ga̱jma̱a̱ nimbáa na̱nguá nixmiéjunʼ mbaʼyoo náa phú mbiʼi nigumaa Jesús”.

 7 Maski ajndu discípulos ndrígóo Jesús ndiyáá náa phú fecha nigumaa, ikhiin xúniriyaʼ ndxa̱a̱ tsiguʼ ndrígóo Jesús. Náa numuu rá. Numuu rí timbíi̱n cristianos “ndiyáá rí ndxa̱a̱ rí naguma ga̱jma̱a̱ numuu tsigúnʼ nindxu̱u̱ mbá costumbre rí nuni xa̱bu̱ bi̱ tséni rí nandoo Dios” libro (Las cosas nuestras de cada día). Náa Biblia na̱ʼkha̱ raʼthí i̱ndó ga̱jma̱a̱ numún a̱jmi̱i̱n Xa̱bu̱ Ñajunʼ bi̱ na̱nguá eyamajkuíí Jeobá bi̱ niniriyaʼ tsigúnʼ (Génesis 40:20; Marcos 6:21). Ma̱ngaa ndxa̱a̱ rígi̱ nuniriyaʼ ga̱jma̱a̱ numún mbaʼin dios bi̱ ragájkhun. Mbá xkri̱da, xa̱bu̱ romanos niniriyaʼ ndxa̱a̱ mámbá índo̱ naʼni 24 ñajunʼ gu̱nʼ Mayo mu muni ndxa̱a̱ ndrígóo dios bi̱ nigumbiʼyuu Diana ga̱jma̱a̱ i̱mba̱ néjtsúu nuniriyaʼ ndxa̱a̱ ndrígóo Apolo bi̱ nindxu̱u̱ dios ndrígóo a̱jkha̱ʼ. Ikha jngó, ndxa̱a̱ tsigúnʼ nuniriyaʼ mu mbuyamajkún dios bi̱ ragájkhun, ga̱jma̱a̱ tséʼkha̱ náa xa̱bu̱ bi̱ tsénimbu̱ún náa Jesucristo.

8. Arathá náa numuu rí mbríguu nindxu̱u̱ ndxa̱a̱ ndrígóo tsigúnʼ ga̱jma̱a̱ superstición rá.

8 Nirígá imbo̱o̱ numuu rí cristianos bi̱ nikuwa nákha ginii na̱nguá niniriyaʼ rí xú káʼnii nigumaa Jesús: Mbáa ikhiin ndiyáá rí ndxa̱a̱ ndrígóo tsigúnʼ nindxu̱u̱ mbríguu ga̱jma̱a̱ superstición. Mbá xkri̱da, mbaʼín xa̱bu̱ griegos ga̱jma̱a̱ xa̱bu̱ romanos bi̱ nikuwa nákha wajyúúʼ, ninimbu̱ún rí mambáa xa̱bu̱ gíʼdaa mbáa espíritu bi̱ niñewu̱u̱n nákha nigumaa ga̱jma̱a̱ nañewu̱u̱n xúgíʼ mbiʼi rí naxtáa. “Espíritu rígi̱ na̱jkha̱ gáʼyoo dios bi̱ mbríguu erámáʼ tsiguʼ ndrígóo xa̱bu̱” (The Lore of Birthdays [La tradición de los cumpleaños].) Jeobá tsiniguʼ nditháan kayuʼ rí xa̱bu̱ mbuyáá rí mbríguu nindxu̱u̱ superstición ga̱jma̱a̱ rí nuniriyaʼ ndxo̱o̱ Jesús (Isaías 65:11, 12). Náa numuu rí mbaʼin xa̱bu̱ nuniriyaʼ ndxa̱a̱ Navidad rá.

NÁA PHÚ NIKU̱MU̱U̱ NDXA̱A̱ NAVIDAD

9. Náa numuu rí nixtiyáʼ mbiʼi 25 ñajunʼ gu̱nʼ diciembre mu muniriyaʼ ndxa̱a̱ rí xú káʼnii nigumaa Jesús rá.

9 Mba̱yu̱ʼ tsiguʼ nda̱wa̱á rí Jesús ni̱ʼkha̱ náa tsu̱du̱u̱ Ku̱ba̱ʼ, xa̱bu̱ ndiyáaʼ 25 ñajunʼ gu̱nʼ diciembre mu muniriyaʼ ndxa̱a̱ rí xú káʼnii nigumaa. Mú Jesús na̱nguá nigumaa gu̱nʼ  diciembre, * ikhaa nigumaa gu̱nʼ octubre. Mú, náa numuu rí nixtiyáaʼ mbiʼi rúʼko̱ rá. Mbáa mu tikhuun bi̱ nithi rí ni̱ndxu̱ún cristianos nindúún “muriʼkuriyaʼ ndxa̱a̱ rí tseʼyamajkhu Dios ga̱jma̱a̱ i̱ʼwáʼ rí nindxu̱u̱ cristiana. [...] Náa xuajin Roma nikuwa xa̱bu̱ bi̱ tséni rí nandoo Dios bi̱ ndiyamajkuíí mbiʼi 25 ñajunʼ gu̱nʼ diciembre [...] mu muniriyaʼ mbiʼi rí naxtáa A̱jkha̱ʼ bi̱ tséjkha̱nú mambáa” (Enciclopedia de la Religión Católica). Diciembre índo̱ naʼni miguwan wéñuʼ, xa̱bu̱ bi̱ tséni rí nandoo Dios nini ndxa̱a̱ mu xúʼko̱ a̱jkha̱ʼ mata̱nga̱a̱ náa ni̱jkha̱ ga̱jma̱a̱ maxnún agiuʼ ga̱jma̱a̱ mijkha. Ninimbu̱ún rí 25 ñajunʼ gu̱nʼ diciembre nagíʼdu̱u̱ natanga̱a̱ A̱jkha̱ʼ. Ndxajkun nini rí ndxa̱a̱ rígi̱ makujmaa xóo “cristiana” mu xúʼko̱ ma̱ndoo muniriyaʼ eʼwíínʼ xa̱bu̱ bi̱ tséni rí nandoo Dios. *

10. Náa numuu rí tuniriyaʼ ndxa̱a̱ Navidad tikhun xa̱bu̱ bi̱ nikuwa nákha wajyúúʼ rá.

10 Niʼni má mba̱yu̱ʼ tsiguʼ rí nijmaʼnuʼ ndxa̱a̱ Navidad náa xa̱bu̱ bi̱ tséni rí nandoo Dios. Numuu rí tagajnuu náa Biblia, ikha jngó túniñunʼ rí muniriyaʼ ndxa̱a̱ rígi̱ náa xuajen Inglaterra ga̱jma̱a̱ náa tikhuu colonias ndrígóo norteamerica nákha siglo 17. Xúgínʼ xa̱bu̱ naxtumiin mbújkha̱a̱ bi̱ tsegun guñajunʼ mbiʼi rúʼko̱ mu maguanún náa guʼún índo̱ naʼni ndxa̱a̱ Navidad. Mú, tajyuuʼ má mba̱yu̱ʼ mbiʼi índo̱ nitangi̱i̱n muni mbu̱júu̱ costumbre rí wayuu ga̱jma̱a̱ niniriyaʼ i̱ʼwáʼ ndxa̱a̱. Navidad ni̱jkha̱nú ninindxu̱u̱ mbá ndxa̱a̱ rí mba̱a̱ wéñuʼ ga̱jma̱a̱ xóó  narígá má xúʼko̱ náa mbaʼa xuajin. Mú xa̱bu̱ bi̱ nandún muni rí nandoo Dios nduyáá rí ndxa̱a̱ rígi̱ na̱ʼkha̱ náa religión dí ragájkhun ga̱jma̱a̱ ikhiin tseniriyaʼ nimbá ndxa̱a̱ rí nuni xa̱bu̱ bi̱ tseniʼniiʼ Dios. *

LÁ GÍʼDOO WÉÑUʼ NUMUU MBUʼYÁÁ NÁA PHÚ NI̱ʼKHA̱ NDXA̱A̱ RÁʼ.

11. Arathá náa numuu rí nuniriyaʼ ndxa̱a̱ tikhun xa̱bu̱ ga̱jma̱a̱ ndiéjunʼ rí gíʼmaa magiʼdoo wéñuʼ numuu náa ikháánʼ rá.

11 Tikhun xa̱bu̱ nduyáá dí rígá ndxa̱a̱ rí ni̱ʼkha̱ náa xa̱bu̱ bi̱ tseniʼniʼ Dios xó má Navidad, mú ikhiin nduyáá rí májánʼ muniriyaʼ ndxa̱a̱ rígi̱. Xa̱bu̱ nuthi rí ndxa̱a̱ rígi̱ na̱nguá e̱ʼkha̱ náa religión dí ragájkhun, ma̱ngaa nindxu̱u̱ mbá mbiʼi náa nawi̱i̱n mbáa xúgínʼ gajmiún angiún. Lá xúʼko̱ má tatsaʼwáminaʼ mangáán ráʼ. Á mu xúʼko̱, mbáa naʼniaʼ mingíjyúuʼ maraxtaa náa religión dí gajkhun numuu rí nandaʼ xtañún wéñuʼ a̱ngia̱nʼ, raʼkháa mu nandaʼ maraxtaa náa religión dí ragájkhun. Mú, nandoo nduʼyáá gajkhun rí Jeobá bi̱ niʼni makuwíin mbá guʼwíin, nandoo rí ikháánʼ mambaxáʼ májánʼ gajmiáanʼ a̱ngia̱nʼ (Efesios 3:14, 15). Mú rígá mbaʼa rí xú káʼnii matani rí nanigu̱ʼ Dios. Apóstol Pablo niʼthí ndiéjunʼ rí gíʼmaa magiʼdoo wéñuʼ numuu náa ikháánʼ: “Uni macuraʼjaʼla mejanʼ naʼ ri pu-naniguʼ su Señor” (Efesios 5:10).

Lá matiexíi miʼtsu mbá paleta rí kuaʼan náa náska ráʼ.

12. Ndiéjunʼ xkri̱da esngájma dí ragíʼmaa muʼni costumbre ga̱jma̱a̱ rí muʼniriyaʼ ndxa̱a̱ rí na̱ʼkha̱ náa numbaaʼ rí mitsaga rá.

12 Mbáa ikháánʼ natatsaʼwáminaʼ rí ndxa̱a̱ rúʼko̱ tsígumaa xó má nákha wajyúúʼ. Lá gíʼdoo wéñuʼ numuu mbuʼyáá náa phú ni̱ʼkha̱ ráʼ. Xúʼko̱. Atatsaʼwáminaʼ rí ikháánʼ nitayáá rí kuaʼan mbá paleta náa náska. Lá matiexi̱i̱ miʼtsu ráʼ. Na̱nguá, numuu rí mitsaga. Xó má paleta rúʼko̱, rígá ndxa̱a̱ rí nakujmaa mitsaan, mú na̱ʼkha̱ náa numbaaʼ rí mitsaga wéñuʼ. Á mu nandulú makuwáanʼ náa religión rí gajkhun, gíʼmaa rí mundxaʼwamíjna̱ xó má gaʼyee Isaías. Xa̱bu̱ bi̱ nini káxi̱ ñajunʼ Dios, ikhaa niʼthún: “Xurugua nditháan rí mixkawiʼ” (Isaías 52:11).

 ATAYÁÁ MÁJÁNʼ XÚ KÁʼNII GÁRATHU̱U̱N EʼWÍÍNʼ RÍ XTAA RAJMAÑAAʼ

13. Ndiéjunʼ xkujndu gándoo gáraʼdáá á mu tsitaniriyaʼ tikhuu ndxa̱a̱ rá.

13 Mbáa ikháánʼ maraʼdáá xkujndu índo̱ gataʼgíminaʼ matatsiʼñáanʼ tikhuu ndxa̱a̱. Mbá xkri̱da, ndiéjunʼ gátani ikháánʼ á mu mbáa xa̱bu̱ bi̱ natiejunʼ ga̱jma̱ʼ tsikroʼo· náa numuu rí tsitaniriyaʼ tikhuu ndxa̱a̱ rá. Ga̱jma̱a̱ ndiéjunʼ gátane á mu mbáa naxnáʼ mbá regalo ndrígóo Navidad rá. Lá raʼkhí nindxu̱u̱ rí matrigú rá. Xú káʼnii gátani á mu ajmbiaʼ o a̱ʼgia̱ʼ na̱nguá xtáa rajmañuu xó ma rí xtaa rajmañaʼ ikháánʼ rá. Ndiéjunʼ gándoo gátani mu e̱jña̱ʼ xundxaʼwamíjna̱ rí nandáti̱gu̱u̱n mbá rí májánʼ numuu rí tseniriyaʼ ndxa̱a̱ rá.

14, 15. Ndiéjunʼ gándoo matani á mu mbáa xa̱bu̱ naʼthán rí araʼdáá mbá ndxa̱a̱ májánʼ o nandoo maxnáʼ mbá regalo rá.

14 Ndayóoʼ mundxaʼwáá májánʼ edxulú mu mbuʼyáá xú káʼnii guʼni índo̱ guraʼníí mámbá xkujndu. Mbá xkri̱da, á mu mbáa naʼtháanʼ rí araʼdáá mbá ndxa̱a̱ májánʼ, i̱ndó ma̱ndoo maraxna̱ núma̱aʼ. Mú, á mu nindxu̱u̱ mbáa xa̱bu̱ bi̱ natayáá xúgíʼ mbiʼi, xó má mbáa xa̱bu̱ bi̱ natiejunʼ ga̱jma̱ʼ, mbáa mbaʼyóoʼ maratha̱a̱n xóo itháan náa numuu rí tsítani ndxa̱a̱ rígi̱. Náa xúgíʼ rígi̱, atayáá májánʼ xú káʼnii gárathu̱u̱n eʼwíínʼ. Náa Biblia naxná consejo: “Guiʼmaʼla munindxacun mejanʼ xuri manigunʼ xabu, cami guiʼma mbuya xujaʼni guiʼma muriʼjña mamba xabu” (Colosenses 4:6). Araʼdáá gamajkuaʼ índo̱ gárathu̱u̱n eʼwíínʼ rí xtaa rajmañaʼ mu xúʼko̱ ikhiin xákiʼníin. Arathún rí májánʼ má nindxu̱u̱ rí muxna regalo, mu raʼkháa mbiʼi rúʼko̱, guyááʼ i̱mba̱ mbiʼi rí ma̱ndoo muni.

15 Á mu mbáa nandoo maxnáʼ mbá regalo rá. Mbá muthanʼ: “Nda̱yo̱o̱ má rí tsitaniriyaʼ ndxa̱a̱ rígi̱, mu nandoʼ maxnaʼ regalo”. Mbá natatsaʼwáminaʼ rí á mu ikháánʼ natrigú regalo rúʼko̱ tsíyoo gáʼthi rí nataniriyaʼ ndxa̱a̱. Á mu xa̱bu̱ tseʼyoo rí xtaa rajmañaʼ, ikháánʼ ma̱ndoo maratha̱a̱n rí tsitaniriyaʼ ndxa̱a̱ rúʼko̱. Rúʼko̱ gasngájma náa numuu rí natrigú regalo ga̱jma̱a̱ náa numuu rí tseraxná ikháánʼ. Mbáa maʼndún muxnaʼ regalo numuu rí nandún matasnga̱jmá rí tsitanimbánii  rí xtaa rajmañaʼ o nandún rí xátanimbánii xtángoo numuu rí nandaʼ maraʼdáá. Ikha jngó ragíʼmaa matrigú.

XÚ KÁʼNII GÁTANI GAJMIÁANʼ BI̱ KUWA NÁA GUʼWÁAʼ RÁ.

16. Xú káʼnii gándoo gárathu̱u̱n májánʼ bi̱ kuwa náa guʼwáʼ ga̱jma̱a̱ numuu ndxa̱a̱ rá.

16 Ndiéjun gándoo gátani á mu bi̱ kuwa náa guʼwáaʼ na̱nguá ejmañún xó má xtaa rajmañaʼ ikháánʼ rá. Mbáa mbaʼyóoʼ ma̱ta̱ya̱a̱ májánʼ xú káʼnii gárathu̱u̱n mbu̱júu̱. Na̱nguá má eyóoʼ magiʼdaʼ gajmiáanʼ ga̱jma̱a̱ numuu costumbre o ndxa̱a̱ rí nandún muniriyaaʼ. Atayamajkuíí rí ikhiin nundxa̱ʼwa̱míjna̱, xó má nandaʼ rí ikháánʼ mbuyamajkuaʼ (atraxnuu Mateo 7:12). Mú xátani nimbá rí magakañán mataniriyaʼ ndxa̱a̱. Mú atatsaʼwáminaʼ rí matani mu xa̱bu̱ xákru̱ʼu̱u̱n rí ikháánʼ mangáán natani rígi̱. Xúʼko̱ kaʼnii, ikháánʼ ragíʼmaa matani mbá rí maʼni magawún a̱jkia̱nʼ nda̱wa̱á (atraxnuu 1 Timoteo 1:18, 19).

17. Ndiéjunʼ gándoo gátani mu e̱jña̱ʼ xúndxaʼwamíjna̱ rí nandáti̱gu̱u̱n mbá rí májánʼ índo̱ nduyáá rí eʼwíínʼ nuniriyaʼ ndxa̱a̱ rá.

17 Ndiéjunʼ gándoo gátani mu e̱jña̱ʼ xúndxaʼwamíjna̱ rí nandáti̱gu̱u̱n mbá rí májánʼ numuu rí tseniriyaʼ dxa̱a̱ rí tséʼkha̱ raʼthí náa Escrituras rá. Rígi̱ makujmaa rí gátane gajmiáanʼ e̱jña̱ʼ rí mbá tsiguʼ. Kúwi̱i̱n tikhun xa̱bu̱ bi̱ nduyáaʼ i̱mba̱ mbiʼi mu muxnún regalo e̱jñún. Mbá regalo rí itháan májánʼ rí ma̱ndoo muxnún e̱jñún nindxu̱u̱ rí maʼndún kuñún ga̱jma̱a̱ rí muriyaʼ mbiʼi mu makuwá gajmiún.

ATANI XÓ MÁ EʼNI RELIGIÓN RÍ GAJKHUN

Á mu natani xó má eʼni religión rí gajkhun, maraxtaa gagi wéñuʼ

18. Xú káʼnii gándoo gambayaaʼ reunión mu maraxtaa náa religión rí gakhun rá.

18 Mu matani rí naniguʼ Dios, ikháánʼ ragíʼmaa matani rí nandoo religión dí ragájkhun ga̱jma̱a̱ gíʼmaa maraxtaa náa religión rí gajkhun. Xú káʼnii gándoo matani rá. Náa Biblia naʼthí: “Gíʼmaa muniʼnúnʼ májánʼ wéñuʼ eʼwíínʼ mu  maxkaxáanʼlu maʼndulú kuʼñúún ma̱ngaa muʼni rí májánʼ, xúniʼñáanʼ rajkua náa nawáanʼlu, xó má eguʼwun eni tikhun, rí phú gíʼmaa muʼni, guxnáá tsiakimijna kaníkháanʼ, numuu rí ikháanʼlu nduʼyáá dí na̱ʼkha̱ rajngiyuu mbiʼi” (Hebreos 10:24, 25). Índo̱ na̱jkua̱ náa reunión nindxu̱u̱ mbá mbiʼi gagi náa ma̱ndoo mbuyamajkuíí Dios xó má eyoo ikhaa (Salmo 22:22; 122:1). Náa reunión ma̱ndoo “muxnamijna siaqui” cristianos bi̱ kuwa jmbu (Romanos 1:12).

19. Ndíjkha rí gíʼdoo wéñuʼ numuu marathu̱u̱n eʼwíínʼ rí xtaa rajmañaʼ náa Biblia rá.

19 Ndayóoʼ marathu̱u̱n iʼwíínʼ rí xtaa rajmañaʼ náa Biblia gajmiáanʼ bi̱ nutaraʼa numuu Jeobá, rígi̱ nindxu̱u̱ imbo̱o̱ rí ma̱ndoo matani mu maraxtaa náa religión rí gajkhun. Ra̱ʼkhá tháán mbaʼin xa̱bu̱ kuwa ‹gíná wéñuʼ ga̱jma̱a̱ kuwa ruxieʼkhá› numuu rí náa numbaaʼ rígá dí ra̱májánʼ (Ezequiel 9:4). Mbáa natatsiʼnuʼ xa̱bu̱ bi̱ kuwa xúʼko̱ kaʼnii. Náa numuu rí tseratamijná gajmiáanʼ rí e̱ʼkha̱ raʼthí náa Biblia rá. Arathá má xúʼko̱ kiʼsngáa rí májánʼ rí nijmañaʼ náa Biblia ga̱jma̱a̱ ayuʼ má xúʼko̱ náa reunión ndrígu̱ún cristianos bi̱ gajkhun. Á mu natani xúʼko̱ kaʼnii, ma̱ta̱ya̱a̱ rí ní xánigua̱ʼ matani rí eʼni religión dí ragájkhun. Ma̱ndoo ma̱ta̱ya̱a̱ gajkhun rí á mu naraxtaa náa religión rí gajkhun, maraxtaa gagi wéñuʼ ga̱jma̱a̱ matrigú rí májánʼ wéñuʼ (Malaquías 3:10).

^ párr. 9 Atayáá apéndice náa naʼthí “Lá nigumaa Jesús gu̱nʼ diciembre ráʼ”.

^ párr. 9 Ma̱ngaa ndiyáaʼ mbiʼi 25 ñajunʼ gu̱nʼ diciembre mu muni ndxo̱o̱ dios bi̱ nigumbiʼyuu Saturno. Mbiʼi 17 asndu 24 ñajunʼ gu̱nʼ diciembre niniriyaʼ ndxa̱a ga̱jma̱a̱ numuu dios romano bi̱ naʼni marigá ganitsu. Náa ndxa̱a̱ rígi̱ narígá wéñuʼ ganitsu ga̱jma̱a̱ narígá mbaʼa wéñuʼ regalo.

^ párr. 10 Náa apéndice rí na̱ʼkha̱ “Lá gíʼmaa muʼniriyaʼ ndxa̱a̱ ráʼ.”, naʼthí xú káʼnii eyáá cristianos bi̱ gajkhun i̱ʼwáʼ ndxa̱a̱ rí najmaʼnuʼ wéñuʼ.