Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Ndiéjunʼ phú eʼsngáa náa Biblia rá.

 APÉNDICE

Gaʼyee Daniel naʼtáriyaʼ tsiguʼ rí ma̱ʼkha̱ Mesías

Gaʼyee Daniel naʼtáriyaʼ tsiguʼ rí ma̱ʼkha̱ Mesías

GAʼYEE Daniel nixtáa itháan rí 500 tsiguʼ nákha xóó tsígumaa Jesús. Jeobá niʼthúu̱n Daniel xú káʼnii gákujmaa índo̱ gaxtiyáaʼ Jesús mu mani̱ndxu̱u̱ xóo Mesías o Cristo. Daniel nijuiʼtháán: “Gíʼmaa ma̱ta̱ya̱a̱ ga̱jma̱a̱ gíʼmaa makruaʼaʼ dí asndu nákha nijuiʼthá maguma̱a̱  xuajen Jerusalén asndu índo̱ gáʼkha̱ Mesías bi̱ nindxu̱u̱ Caudillo, marigá 7 xmáná, ga̱jma̱a̱ 62 xmáná” (Daniel 9:25).

Guʼyáá xú káʼnii gákujmaa índo̱ gáʼkha̱nú Mesías. Timbá, guʼyáá nguáná gági̱ʼdu̱u̱ magixnuu tsiguʼ rí manújngoo asndu índo̱ gáʼkha̱nú Mesías. Rí kiʼtáriyaʼ nasngájma rí mbiʼi rúʼko̱ nindxu̱u̱ “nákha nijuiʼthá maguma̱a̱ xuajen Jerusalén”. Nguáná nimbánuu rí “nijuiʼthá” rá. Imba̱a̱ xa̱bu̱ bi̱ niʼnirámáʼ Biblia nigumbiʼyuu Nehemías, niʼthí rí nákha nijuiʼthá maguma̱a̱ xtátsí ndrígóo Jerusalén, maʼni “tsiguʼ mbá skíñúʼ nákha xtáa raʼtáñajunʼ rey Artajerjes” (Nehemías 2:1, 5-8). Mbaʼin xa̱bu̱ bi̱ niniraʼmáʼ dí nirígá nákha wajyúúʼ ninimbu̱ún dí timbá tsiguʼ rí nixtáa raʼtáñajunʼ rey Artajerjes ninindxu̱u̱  nákha tsiguʼ 474 tsiguʼ rí nirígá ginii (ts.g.). Índo̱ nuríyaʼ cuenta, nduʼyáá rí tsiguʼ mbá skíñúʼ rí nixtáa raʼtáñajunʼ ninindxu̱u̱ nákha tsiguʼ 455 tsiguʼ rí nirígá ginii (ts.g.). Ikha jngó rí niʼtáriyaʼ Daniel ga̱jma̱a̱ numuu Mesías nagi̱ʼdu̱u̱ nambánuu ikhaa má tsiguʼ rúʼko̱: 455 tsiguʼ rí nirígá ginii (ts.g.).

Daniel niʼthí nguáthá tsiguʼ ganújngoo asndu mbiʼi rúʼko̱ asndu índo̱ gáʼkha̱nú “Mesías bi̱ nindxu̱u̱ Caudillo”. Rí kiʼtáriyaʼ naʼthí rí maʼni “7 xmáná, ga̱jma̱a̱ 62 xmáná”, rí mbá xúgíʼ rígi̱ naʼni mbá 69 xmáná. Nguáthá phú gájyúuʼ tsiguʼ rígi̱ rá. Xó má e̱ʼkha̱ raʼthí náa mbaʼa Biblia, na̱nguá nindxu̱u̱ xmáná rí gíʼdoo juwan mbiʼi, rígi̱ nindxu̱u̱ xmáná rí tsiguʼ. Rí nandoo gáʼthi, mámbá xmáná nindxu̱u̱ mbá juwan tsiguʼ. Xa̱bu̱ judíos bi̱ nikuwa nákha wajyúúʼ nijmañún niraxnuu májánʼ wéñuʼ rí juwan tsiguʼ. Xó má xtángoo rí nixná Jeobá, ikhiin na̱nguá edu náa mbaaʼ mámbá índo̱ naʼni juwan tsiguʼ (Éxodo 23:10, 11). Ikha jngó, 69 xmáná rí kiʼtáriyaʼ naʼni 7 nuthu rí 69, rí mbá xúgíʼ na̱jkha̱nú naʼni 483 tsiguʼ.

Rí xúgi̱ i̱ndó ndayóoʼ muríyaʼlú cuenta. Á mu nuraxnuu 483 tsiguʼ asndu nákha tsiguʼ 455 ts.g. na̱jkha̱ kaguáanʼ asndu tsiguʼ 29 tsiguʼ rí nirígá nda̱wa̱á (ts.n.), tsiguʼ rí ikhaa nijngúun náa iyaʼ ga̱jma̱a̱ ni̱jkha̱nú ninindxu̱u̱ Mesías (Lucas 3:1, 2, 21, 22). * Rí kiʼtáriyaʼ náa Biblia ni̱jkha̱nú nimbánuu májánʼ wéñuʼ.

^ párr. 2 Tsiguʼ 455 ts.g. asndu tsiguʼ 1 ts.g. naʼni mbá 454 tsiguʼ. Tsiguʼ 1 ts.g. asndu imbo̱o̱ tsiguʼ 1 ts.n. na̱jkha̱nú naʼni mbá tsiguʼ. Tsiguʼ 1 ts.n. asndu tsiguʼ 29 ts.n. na̱jkha̱nú naʼni 28 tsiguʼ. Ikha jngó 454+1+28=483 tsiguʼ. Jesús nikháñu tsiguʼ 33, índo̱ niʼni 70 xmáná rí ninindxu̱u̱ tsiguʼ (Daniel 9:24, 26). Á mu nandaʼ ma̱ta̱ya̱a̱ itháan, atayáá náa capítulo 11 ndrígóo libro Prestemos atención a las profecías de Daniel, ga̱jma̱a̱ náa libro Perspicacia para comprender las Escrituras, vol. 2, ináa 1014 asndu 1017. Libro rí nini bi̱ nutaraʼa numuu Jeobá.