Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Ma̱ndoo makuwáanʼ gagi mbá guʼwáanʼ

 SECCIÓN 4

Xóo gájmala mbújkha̱a̱

Xóo gájmala mbújkha̱a̱

“Á mu natraxu̱u̱n eʼwíínʼ, xúgíʼ awan dí natríyaʼ magajnúu májánʼ.” (Proverbios 20:18)

Xúgiáanʼ nda̱yúlúʼ mbújkha̱a̱ mu muxnún rí ndañúnʼ bi̱ kúwi̱i̱n náa guʼwúlú (Proverbios 30:8). “Mbújkha̱a̱ ni̱ndxu̱u̱ mbóo dí mañe̱wa̱nʼ” (Eclesiastés 7:12). Nguáná mingíjyúuʼ miʼtá numuu mbújkha̱a̱ náa mbá guʼwíin, mú xátatsiʼñáʼ dí rúʼko̱ maʼni maraʼdáá xkujndu ga̱jma̱ʼ bi̱ ndiyáa (Efesios 4:32). Gíʼmaa matatsimbaaʼ rí eʼtháanʼ bi̱ ndiyáa ga̱jma̱a̱ nájmáanʼ gutha xú káʼnii gakiéʼkalaʼ mbújkha̱a̱.

 1 ATRÍYAʼ MÁJÁNʼ AWAN

RÍ E̱ʼKHA̱ RAʼTHÍ NÁA BIBLIA: “Xi mba tsi ikanʼla nando maʼne mba torre, ¿an maxaguiʼi guini maguxnu mbuka guata gambo-ra? Numu ri mbaʼ-yo xi mbajndi mbuka guiʼdo ri maʼnegaxu torre” (Lucas 14:28). Gíʼdoo numuu rí nájmáanʼ gambánala xú gájmala mbújkha̱a̱ rí najkua ruʼgíiʼ (Amós 3:3). Gu̱ya̱a̱ májánʼ ndiéjunʼ eyóoʼ mutsi ga̱jma̱a̱ nguáthá gándoo gakiéʼkaláʼ (Proverbios 31:16). Raʼkháa mu guaʼdáá wéñuʼ mbújkha̱a̱ mutsi tsiakii xúgíʼ rí naxtango̱jo̱o̱. Gunimijna rí xuni gidxóó, á mu rígá mbújkha̱a̱ mutsi á mu nda̱a̱ xútsí (Proverbios 21:5; 22:7).

RÍ MA̱NDOO MATANI:

  • Á mu xóó napídunʼ mbújkha̱a̱ enila, nájmáanʼ gúya̱a̱ xú gajmala

  • Á mu tséʼngo̱o̱ mbújkha̱a̱ enila, guríyaʼ májánʼ awan mu xakiéʼkala wéñuʼ. Xóo muʼthá, xútsí rí tséyóoʼ wéñuʼ

 2 ARATHÁ RÍ GAJKHUN MA̱NGAA ATATSAʼWÁMINAʼ MÁJÁNʼ

RÍ E̱ʼKHA̱ RAʼTHÍ NÁA BIBLIA: Arathá rí gajkhun “raʼca indo naʼ inu [Jeobá] ri maŋga ajndu naʼ inu xabu” (2 Corintios 8:21). Aratháán bi̱ ndiyáa nguáthá tadaaʼ ga̱jma̱a̱ nguáthá mbújkha̱a̱ kiéʼkháanʼ.

Gutamíjna̱ nájmáanʼ á mu ndayóoʼ makiéʼkhala mba̱a̱ mbújkha̱a̱ (Proverbios 13:10). Rí mutamíjná ga̱jma̱a̱ numuu rígi̱ maʼni rí makuwaanʼ tsímáá. Mbújkha̱a̱ rí natadaʼ atayáá xóo mbújkhu̱ún xúgínʼ bi̱ kuwa náa guʼwáaʼ, raʼkháa i̱ndó mbújkha̱ʼ ikháánʼ (1 Timoteo 5:8).

RÍ MA̱NDOO MATANI:

  • Gutamíjná nguáthá mbújkha̱a̱ gándoo gakiéʼkhúun mámbáa mu majmuu náa ndayóoʼ

  • Xaráʼthi̱i̱n dí asndu marigá xkujndu numuu mbújkha̱a̱ mu mutamíjnála