Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 109

Pedro na̱jkha̱ gáʼyoo Cornelio

Pedro na̱jkha̱ gáʼyoo Cornelio

GI̱I̱ WÍJI̱ apóstol Pedro, ga̱jma̱a̱ náa ki̱dxu̱ʼ wajun tikhuu bi̱ nambáxu̱u̱ gajmíi̱n. Mú, náa numuu rí xa̱biya̱ bugi̱ nasmbátigo̱o̱ náa inuu Pedro rá. Lá gíʼmaa maʼni rúʼko̱ xáʼ. Lá natayáá tsáa nindxu̱u̱ ráʼ.

Xa̱biya̱ bugi̱ nindxu̱u̱ Cornelio. Ikhaa nindxu̱u̱ mbáa xa̱bu̱ bi̱ kayá edxu̱u̱ náa soldados bi̱ kuwa náa xuajin Roma. Cornelio tsíniniʼ Pedro, mu nitháán Cornelio rí maʼthúu̱n Pedro rí maʼga náa goʼwóo. Guʼyáá xú káʼnii nirígá rígi̱.

Timbíin xa̱bi̱i̱ Jesús ninindxu̱ún judíos, mú Cornelio na̱nguá nindxu̱u̱ judío. Mú, ikhaa nandoo kaʼyoo wéñuʼ Dios, naʼtakháñuu ga̱jma̱a̱ naʼni mbaʼa rí májánʼ ga̱jma̱a̱ numún xa̱bu̱. Mbá wakíʼ mbáa ángel nisngájmaminaʼ náa ikhaa ga̱jma̱a̱ niʼthúu̱n: ‹Nanigu̱ʼ Dios dí xtáa ratani̱ ga̱jma̱a̱ ikhaa gáriʼña̱a̱ rí natanda̱ʼa̱ índo̱ naratakhañi. Ataxuʼma rí mbuyáaʼ mbáa xa̱bu̱ bi̱ nagumbiʼyuu Pedro. Xtáa náa xuajin Jope, náa goʼwóo Simón, bi̱ xtáa náa mijngii lamáa›.

Cornelio naʼni nacha̱ rígi̱. Imba̱ néjtsuu, Pedro xtáa náa tsu̱du̱u̱ goʼwóo Simón. Ikhí Dios naʼni rí Pedro mbaʼyoo mbá manta mba̱a̱ rí nakajtaa mekhuíí. Náa manta rígi̱ kajtiin xúgínʼ enii xujkhúʼ. Náa xtángoo ndrígóo Dios naʼthí rí xujkhúʼ bugi̱ ra̱míjínʼ miʼtsúúnʼ, mú mbá aʼwá naʼthí: ‹Araxunʼ, Pedro. Aradíin xujkhúʼ miʼtsúún›.

Pedro nariʼña: ‹¡Na̱nguá! Nimbá miʼtsú na̱nguá nikhún xujkhúʼ bi̱ tsagiin›. Mú aʼwá naʼthúu̱n: ‹Xárata rí ñajunʼ mitsaga rí Dios naʼthí rí ñajunʼ mikaʼwu›. Rígi̱ narígá ajtsú nuthu. Índo̱ Pedro naraximínáʼ ndiéjunʼ eyoo gáʼthúu̱n rí ndiʼyoo, ikhú naguanu náa guʼwá rí xtáa xa̱bu̱ bi nikuʼmiin Cornelio mu mbuyáaʼ.

Pedro nagajta̱a̱ ga̱jma̱a̱ naʼthí: ‹Ikhúúnʼ ñajunʼ xa̱bu̱ bi̱ eʼyáaʼ. Náa numuu rí niguwaʼla rá.› Índo̱ rí xa̱bekha nuthi rí mbáa angel niʼthúu̱n Cornelio rí maʼthúu̱n Pedro maʼga̱ náa goʼwóo, Pedro naʼthí rí maʼga̱ gajmíi̱n. Imba̱ néjtsu, Pedro ga̱jma̱a̱ bi̱ nambáxuu gajmíi̱n nagájnun mu maguun gúyáá Cornelio náa xuajin Cesarea.

Cornelio nigímbíin bi̱ kaʼñúún ga̱jma̱a̱ bi̱ nambáxuu májánʼ gajmíi̱n. Índo̱ Pedro na̱jkha̱nú, Cornelio nasmbátigo̱o̱ náa inuu Pedro, xóo tayáá gi̱i̱. Mú Pedro naʼthí: ‹Atuxaʼ; ikhúúnʼ mangúún ñajunʼ mbáa xa̱bu̱ xóo má ikháánʼ›. Xúʼko̱, náa Biblia nasngájma dí ra̱májánʼ musmbatigulú náa inuu mbáa xa̱bu̱ mu mbuʼyamajkuíí. I̱ndó Jeobá gíʼmaa mbuʼyamajkuíí.

Rí xúgi̱ Pedro naʼtáruʼun xa̱bu̱ bi̱ kuwa ikhí. Pedro naʼthí: ‹Nda̱yo̱o̱ rí Dios nagruiguíin xúgínʼ xa̱bu̱ bi̱ nandún muni ñajunʼ ndrígóo›. Nákha ikhaa xtáa raʼthí, Dios nakuʼma espíritu santo ndrígóo, ga̱jma̱a̱ xa̱bu̱ buʼko̱ nigi̱ʼdi̱i̱ nuthi mixtiʼkhu ajngáa. Rígi̱ naʼni maguanún tsiánguá discípulos bi̱ ñajúnʼ judíos bi̱ niguwáʼ gajmiún Pedro, bi̱ nikumu̱u̱ rí Dios nandoo kaʼñúún i̱ndó xa̱bu̱ bugi̱. Rígi̱ naʼsngún rí Dios na̱nguá eʼyoo rí mbá raza gíʼdoo itháan numuu ki xóo i̱ʼwáʼ. Májánʼ gáʼni rí magiwa̱nʼ a̱jkiu̱lú rígi̱.

Hechos 10:1-48; 11:1-18; Rí huasjŋgajma Juan 19:10.