Atambaʼtaa mu matraxnuu

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

Atraʼwíí ajngáa me̱ʼpha̱a̱

 HISTORIA 106

Nagájni̱i̱n náa guʼwá e̱jua̱nʼ

Nagájni̱i̱n náa guʼwá e̱jua̱nʼ

ATAYÁÁ mbáa ángel xtáa ragujtun xkrugua ndrígóo guʼwá e̱jua̱nʼ. Xtáa raʼnikáwíin apóstoles ndrígóo Jesús. Guʼyáá náa numuu rí ikhiin nikuwa náa guʼwá e̱jua̱nʼ.

Xóó tséʼni mba̱yu̱ʼ mbiʼi asndu nákha Jesús niʼni rí discípulos ndrígóo maguaʼdáá espíritu santo. Rígi̱ ñajunʼ dí narígá: Pedro ga̱jma̱a̱ Juan nagún mbá wakíʼ náa templo ndrígóo Jerusalén. Mijngii má náa xkrugua ndrígóo templo xtáa mbáa xa̱biya̱ bi̱ tsíyoo gáʼga kruígo̱o̱ asndu nákha nigumaa. Xa̱bu̱ nagún kuya̱a̱ mámbá mbiʼi ikhí mu mandu̱ʼu̱u̱n mbújkha̱a̱ xa̱bu̱ bi̱ natu̱ʼu̱u̱n náa templo. Índo̱ ndaʼyoo Pedro ga̱jma̱a̱ Juan, nandu̱ʼu̱u̱n mbújkha̱a̱. Ndiéjunʼ gúní ikhiin xá.

Nawajun ga̱jma̱a̱ nduyáá. Pedro naʼthí: ‹Na̱nguá gúʼdoo mbújkha̱a̱, mu maxnaʼ i̱ndó rí gúʼdoo. ¡Ga̱jma̱a̱ nambiʼyuu Jesús, araxu̱nʼ ga̱jma̱a̱ ayuʼ kruígaʼ!›. Ikhú Pedro nagujtun ñawun mújúnʼ xa̱biya̱, ga̱jma̱a̱ núkhu ikha natuxi̱i̱ ga̱jma̱a̱ na̱jkha̱ kruígo̱o̱. Índo̱ xa̱bu̱ nduyáá milagro rígi̱ naʼni rí maguanún tsiánguá ga̱jma̱a̱ nakuwa gagi índo̱ nduyáá milagro.

Pedro naʼthí: ‹Ninixu milagro rígi̱, ga̱jma̱a̱ tsiakii ndrígóo Dios bi̱ nikuxi̱i̱ Jesús›. Nákha Pedro ga̱jma̱a̱ Juan kuwa ruti, tikhun xa̱bu̱ ede̱ naguwaʼ náa ikhiin. Nakiʼníin numuu rí Pedro ga̱jma̱a̱ Juan nutún xa̱bu̱ rí Jesús nituxi̱i̱. Ikha jngó nurugui̱i̱n ga̱jma̱a̱ nuxudinʼ náa guʼwá e̱jua̱nʼ.

Ímbo̱o̱ mbiʼi xa̱bu̱ ede̱ naguáʼdáá mbá reunión rí gíʼdoo numuu. Naguwaʼ ku̱ya̱a̱ Pedro ga̱jma̱a̱ Juan náa inún xa̱bu̱ ede̱ ma̱ngaa naguwaʼ kuyáá xa̱bu̱ bi̱ nini thanáá. Nuraxu̱u̱n: ‹Náa numuu ninila rígi̱ rá.›

Pedro naʼthí rí tsiakii ndrígóo Dios, bi̱ nikuxi̱i̱ Jesús. Ndxajkun tséyáá rí gúní, numuu rí na̱nguá xú muthi dí tárígá milagro rígi̱ rí májánʼ wéñuʼ. Ikha jngó nutún apóstoles rí ní xúthún xa̱bu̱ ga̱jma̱a̱ numuu Jesús ikhú nuniñunʼ magúun.

Nanújngoo mbiʼi, ga̱jma̱a̱ apóstoles nutaraʼa má xúʼko̱ ga̱jma̱a̱ numuu Jesús ga̱jma̱a̱ nuni thanún xa̱bu̱ bi̱ naʼniún nandii. Xúgínʼ xa̱bu̱ nudxawíín milagro dí nirígá. Ikha jngó asndu mbaʼin wéñuʼ xa̱bu̱ bi̱ kuwa náa xuajin dí rígá mbajndi náa xuajin Jerusalén naguwaʼ kudiin xa̱bu̱ bi̱ guáʼdáá nandii mu xúʼko̱ apóstoles muni thanún. Ikha jngó xa̱bu̱ ede̱ naxígu̱u̱n kuñún apóstoles ga̱jma̱a̱ nuxudi̱nʼ náa guʼwá e̱jua̱nʼ. Mú tsíguanún mba̱yu̱ʼ mbiʼi ikhí.

Mbruʼun, mbáa ángel ndrígóo Dios nambaʼto xkrugua ndrígóo guʼwá e̱jua̱nʼ, xó má tayáá gi̱i̱. Ángel naʼthí: ‹Guʼgua̱ ga̱jma̱a̱ guwajún náa templo ma̱ngaa guthu̱u̱n má xúʼko̱ xa̱bu̱›. Imba̱ néjtsuu miʼcha̱, índo̱ xa̱bu̱ ede̱ nuti rí maguwaʼ kudiin apóstoles, ikhiin nánguá kuwa náa guʼwá e̱jua̱nʼ. Nda̱wa̱á nuxkamin náa templo ga̱jma̱a̱ nagún kudiin náa guʼwá ñajunʼ ndrígóo Sanedrín.

Xa̱bu̱ ede̱ nuthi: ‹Nundaʼala rí ní xúsngáa itháan ga̱jma̱a̱ numuu Jesús. Mú ikháanʼ nisngúún xúgínʼ xa̱bu̱ bi̱ kuwa náa xuajin Jerusalén›. Apóstoles nuthi: ‹Phú ndayóoʼ rí manimbaʼxoʼ juya̱a̱xoʼ rí naʼthán Dios gini, xóo rí nuthan xa̱bo̱›. Ga̱jma̱a̱ ikhiin nutaraʼa má xúʼko̱. ¡Ra̱ʼkhá tháán májánʼ wéñuʼ xkri̱da rí niniñanʼ apóstoles!

Hechos, tsinaʼ mba̱ʼu̱ 3 asndu 5.