Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 88

Juan nakumáʼ Jesús náa iyaʼ

Juan nakumáʼ Jesús náa iyaʼ

ATAYÁÁ paloma bi̱ nagajtaa náa edxu̱u̱ xa̱biya̱. Xa̱biya̱ ñajunʼ Jesús. Rí xúgi̱ ikhaa gíʼdoo 30 tsiguʼ. Bi̱ xtáa ga̱jma̱a̱ ñajunʼ Juan. Nijmañulúʼ má ga̱jma̱a numuu ikhaa. Lá narmáʼáan a̱jkia̱nʼ índo̱ María ni̱jkha̱ gáʼyoo Elisabet bi̱ kaʼyoo, ga̱jma̱a̱ ada̱ bi̱ kuaʼa̱a̱n náa awúu̱n Elisabet nikixi̱i̱ gagi ráʼ. Ada̱ buʼko̱ bi̱ xóó tsígumaa, ñajunʼ Juan. Mú, ndiéjunʼ eʼni Juan ga̱jma̱a̱ Jesús xúgi̱ rá.

Juan ndiʼkhún nikumááʼ Jesús náa iya mañu ndrígóo Jordán. Xúʼko̱ kaʼnii eʼni rí Jesús najngúun iyááʼ. Nuxuma̱ʼ xúgíʼ náa iyááʼ mbáa xa̱bu̱, ga̱jma̱a̱ ikhú nuriyaʼ. Juan naʼniún rígi̱ xa̱bu̱; ikha jngó nuxna mbiʼí Juan bi̱ nakumíínʼ náa iyaʼ. Mú, náa numuu rí nikumááʼ Jesús náa iyaʼ ráʼ.

Juan nikumááʼ náa iyaʼ Jesús numuu rí ikhaa ni̱ʼkha̱ gándo̱ʼo̱o̱. Juan nakumíínʼ náa iyááʼ xa̱bu̱ bi̱ nandún musngajma rí natanga̱a̱ a̱jkiu̱ún dí raʼkhí nini. Mú, lá niʼni Jesús mbá dí ra̱májánʼ rí naʼni matanga̱a̱ a̱jkiu̱u̱n ráʼ. Na̱nguá, Jesús na̱nguá niʼni nimbá miʼtsú rúʼko̱, numuu rí ikhaa ñajunʼ phú A̱ʼdióo Dios bi̱ ni̱ʼkha̱ náa mekhu. Ikha jngó, gíʼdoo imbo̱o̱ numuu rí nando̱ʼo̱o̱ Juan makumááʼ náa iyaʼ. Guʼyáá ndiéjunʼ ñajunʼ.

Nákha xóó tséʼkha̱ Jesús náa Juan, ikhaa ninindxu̱u̱ mbáa xa̱bu̱ bi̱ naʼtóo ixi̱. Xa̱bu̱ bi̱ naʼtóo ixi̱ naʼni ñajunʼ, xóo má mesa, xíli ga̱jma̱a̱ banca. José ajmbio̱o̱ María, ninindxu̱u̱ xa̱bu̱ bi̱ naʼtóo ixi̱, ga̱jma̱a̱ ikhaa niʼsngóo Jesús maʼni ma̱ngaa. Mú Dios takuʼmaa A̱ʼdióo náa tsu̱du̱u̱ Ku̱ba̱ʼ mu manindxu̱u̱ mbáa bi̱ naʼtóo ixi̱. Gíʼdoo mbá ñajunʼ kiejunʼ náa ikhaa, ga̱jma̱a̱ ni̱jkha̱nú mbiʼi maʼni ñajunʼ rígi̱. Ikha jngó, mu masngájma rí ni̱ʼkha̱ gáʼni rí nandoo Anu̱u̱, Jesús nando̱ʼo̱o̱ Juan rí makumááʼ náa iyaʼ. Lá naniguʼ Dios rígi̱ ráʼ.

Xúʼko̱, nda̱wa̱á rí índo̱ Jesús nagájna̱a̱ náa iyaʼ, nawán mbá aʼwá náa mekhu dí naʼthí: ‹A̱ʼdióoʼ bugi̱ bi̱ naʼni a̱jkiu̱nʼ kayo̱o̱›. Ma̱ngaa, nakujmaa rí mekhu nambaʼtoo ga̱jma̱a̱ paloma bugi̱ nagajtaa náa Jesús. Mú na̱nguá ñajunʼ mbáa paloma bi̱ phú ndaʼya. I̱ndó nakujmaa rí xóo ikhaa. Rí phú nindxu̱u̱, espíritu santo ndrígóo Dios.

Rí xúgi̱ Jesús gíʼdoo mbaʼa rí mandxa̱ʼóo edxu̱u̱, ikha jngó na̱jkha̱ náa mandoo maxtáa mbáwíi mbá 40 mbiʼi. Ikhí Satanás na̱ʼkha̱ náa ikhaa. Satanás nagíiʼ naʼni rí Jesús xáʼnimbo̱o̱ mbá ajtsú nutu xtángoo ndrígóo Dios. Mú Jesús tséʼni rúʼko̱.

Nda̱wa̱á rí ninújngoo rúʼko̱, Jesús natanga̱a̱ Galilea ga̱jma̱a̱ naninúnʼ tikhun xa̱bekha bi̱ naguanu nanindxu̱ún timbíin discípulo ndrígóo. Bugi̱ ñajúúnʼ tikhuun: Andrés, Pedro (ma̱ngaa nagumbiʼyuu Simón), Felipe ga̱jma̱a̱ Natanael (ma̱ngaa nagumbiʼyuu Bartolomeo). Jesús gajmíi̱n discípulo ndrígóo nagájnún nagún náa mbayuuʼ xuajin Galilea. Naguáju̱n náa Caná, xuajin ndrígóo Natanael, náa nunigu̱nʼ tikhun xa̱bu̱, Jesús naʼni timbá milagro. Lá natayáá ndiéjunʼ ñajunʼ ráʼ. Iyaʼ nartaxi̱i̱ vino.

Mateo 3:13-17; 4:1-11; 13:55; Marcos 6:3; Juan 1:29-51; 2:1-12.