Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 96

Jesús naʼni thanún xa̱bu̱ bi̱ naʼniún nandii

Jesús naʼni thanún xa̱bu̱ bi̱ naʼniún nandii

NÁKHA Jesús xtáa ra̱jkha̱ náa xuajin, naʼni thanún xa̱bu̱ bi̱ naʼniún nandii. Milagro rígi̱ naʼni mawán náa xuajin dí rígá mbajndi. Ikha jngó, xa̱bu̱ nagún kudiin bi̱ tséʼya xuñúnʼ, bi̱ tsikruigu̱u̱n, xa̱bu̱ guʼxuʼ ga̱jma̱a̱ mbaʼin xa̱bu̱ bi̱ guáʼdáá i̱ʼwáʼ nandii. Jesús naʼni thanún xúgínʼ.

Ninújngoo má itháán rí ajtsú tsiguʼ rí Juan nikumáʼ iyáʼ Jesús. Jesús naʼthúún apóstoles rí nacha̱ má maʼga̱ náa Jerusalén, náa muxi̱ya̱a̱ ga̱jma̱a̱ ikhú matuxi̱i̱ náa majñúnʼ bi̱ nikháñun. Mú Jesús xóó xtáa raʼni thanún xa̱bu̱ bi̱ naʼniún nandii.

Jesús xtáa raʼsngáa mbóo mbiʼi sábado. Sábado nindxu̱u̱ mbóo mbiʼi rí nduya̱a̱ xúnʼ xa̱bu̱ judíos. A̱ʼgu̱ bi̱ tayáá gi̱i̱ na̱nguá nindoo gáwi̱ji̱, ikhaa nigindutiga má xúʼko̱ mbá 18 tsiguʼ. Ikha jngó Jesús naxkrámáʼ náa xpajpoo a̱ʼgu̱, ikhú ikhaa nagíʼdu̱u̱ nawi̱ji̱ jmbu. ¡A̱ʼgu̱ naʼni̱i̱la!

Rígi̱ naʼni rí makiʼníin xa̱bu̱ ede̱. Mbáa dí ikhiin nandxaʼwá náa eʼwíínʼ xa̱bu̱: ‹Rígá majun mbiʼi rí gíʼmaa muñajunʼ. ¡Mbiʼi rúʼko̱ gíʼmaa maguwáʼ mu magumatanala, ra̱ʼkháa mbiʼi sábado!›.

Mú Jesús nariʼña: ‹¡Xa̱bu̱ ramíjínʼ nindxalá! Mbáa dí ikháanʼ narajkhúu burru ndrígóo mu maʼga̱ kayáa maxnúu iyaʼ maga̱a̱n mbóo mbiʼi sábado. Ikha jngó, lá ragíʼmaa maguma thanáá a̱ʼgú gínáa bugi̱ bi̱ niʼni má mbá 18 tsiguʼ rí nandoo káñu xáʼ.› Rí Jesús nariʼña̱a̱ rígi̱ naʼni rí mati̱ñu̱nʼ xa̱bekha bi̱ ra̱míjínʼ.

Nda̱wa̱á Jesús gajmíi̱n apóstoles nagún náa Jerusalén. Índo̱ ikhiin kúwi̱i̱n má náa mijngii xuajin Jericó, a̱jmi̱i̱n xa̱bu̱ bi̱ tsikruigu̱u̱n kuwa runda̱ʼa̱ mbújkha̱a̱ nidxawíín rí Jesús xtáa ranújngoo, ikha jngó nindxa̱ʼwa̱: ‹Jesús, atambáyuxuʼ›.

Jesús nandxaʼún xa̱bu̱ bi̱ tsikruigu̱u̱n, ga̱jma̱a̱ naraxu̱u̱n: ‹Ndiéjunʼ eyala mani ga̱jma̱a̱ numalá rá.› Ikhiin nuthi: ‹Tátá, nanduxuʼ rí matarmbáʼta̱a̱ iduxu›. Jesús nixkajmaa idún, ¡ga̱jma̱a̱ núkhu nindoo niyexi! Lá natayáá náa numuu rí Jesús naʼni xúgíʼ milagro rígi̱ ráʼ. Númuu rí nandoo kaʼñún xa̱bu̱ ga̱jma̱a̱ nandoo rí muguaʼdáá fe náa ikhaa. Rígi̱ naʼni mbuʼyáá rí índo̱ ikhaa gaʼtañajunʼ náa tsu̱du̱u̱ Ku̱ba̱ʼ nimbáa xa̱bu̱ ní xáʼniuu nandii mbu̱júu̱.

Mateo 15:30, 31; Lucas 13:10-17; Mateo 20:29-34.