Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 92

Jesús nakuxi̱i̱n bi̱ nikháñun

Jesús nakuxi̱i̱n bi̱ nikháñun

DXÁʼGÚ bi̱ natayáá gíʼdoo 12 tsiguʼ. Jesús kagujtun ñawúunʼ, ru̱dúu̱ ga̱jma̱a̱ anu̱u̱ kúwi̱i̱n mijngii náa xtáa ikhaa. Lá natayáá náa numuu rí kuwa gagi xáʼ. Guʼyáá.

Anu̱u̱ dxáʼgú ñajunʼ mbáa xa̱bu̱ bi̱ gíʼdoo wéñuʼ numuu bi̱ nagumbiʼyuu Jairo. Mbóo mbiʼi a̱ʼdióo naʼniu nandii, ga̱jma̱a̱ nutamaʼ náa mbá xiyoo. Mu dxáʼgú bugi̱ xóó tséʼni maʼni̱i̱ a̱jkiu̱u̱n; naʼniu itháan gakhi̱i̱ nandii. Jairo ga̱jma̱a̱ a̱ʼgiu̱u̱ naxmiéjunʼ wéñuʼ, numuu rí nakujmaa rí dxáʼgú makhañúu. I̱ndó ikhaa ñajunʼ bi̱ guáʼdáá. Ikha jngó Jairo ndayáaʼ Jesús. Ikhaa niʼdxuun ga̱jma̱a̱ numuu milagro rí Jesús xtáa raʼni.

Índo̱ Jairo naxkamaa Jesús, ra̱ʼkhá tháán mbaʼin wéñuʼ xa̱bu̱ kuwa náa mbajndi xtáa ikhaa. Mú Jairo nanújngoo náa tapún xa̱bu̱ bi̱ mbaʼin ga̱jma̱a̱ nasmbátigo̱o̱ náa rajkúu Jesús. Ikhú naʼtákañuu: ‹A̱ʼdióoʼ nandoo kháñuu wéñuʼ. Mbá péñu, ayi̱, ga̱jma̱a̱ atani rí maʼni̱i̱ a̱jkiu̱u̱n›. Jesús naʼthí rí ma̱ʼkha̱.

Índo̱ kuwa ragún, mbaʼin xa̱bu̱ nurmajnguamijna mu magun mijngii. Mbá nacha̱ Jesús nawi̱ji̱ mu maʼni graxe̱. ‹Tsáa nixkajmuun rá.› Jesús niku̱mu̱u̱ rí nigájnuu tsiakii náa ikhaa, ga̱jma̱a̱ ndaʼyoo rí xtáa mbáa bi̱ nixkajmaa. Mú tsáa ni̱ndxu̱u̱ rá. Ikhaa ni̱ndxu̱u̱ mbáa a̱ʼgu̱ bi̱ mbá 12 tsiguʼ ejkha̱ ragiʼi raʼniuu nandii. ¡Ni̱ʼkha̱ ga̱jma̱a̱ nixkajmaa xtíñuu Jesús, xúʼko̱ ikhaa niʼni̱i̱ a̱jkiu̱u̱n!

Rígi̱ naʼni rí Jairo maxtáa májánʼ, numuu rí ndaʼyoo dí Jesús tséʼniuu mingíjyúu maʼni thanuu mbáa xa̱bu̱. Mú ikhú na̱ʼkha̱ mbáa xa̱bu̱ kayá ajngáa ga̱jma̱a̱ naʼthúu̱n Jairo. ‹Xátsigajmáá itháan Jesús. A̱ʼdiáaʼ dxáʼgú nikháñu má.› Jesús naʼdxun rígi̱ ga̱jma̱a̱ naʼthúu̱n Jairo: ‹Xaxmiéjuanʼ; a̱ʼdiáaʼ maxtáa má májánʼ›.

Índo̱ naguanu náa goʼwóo Jairo, xa̱bu̱ kuwa rumbiyaʼ gíná wéñuʼ. Mú Jesús naʼthí: ‹Xúmbiya. Dxáʼgú na̱nguá nikháñu. I̱ndó naʼgu’›. Mú ikhiin nunduʼwa ga̱jma̱a̱ nutsijmaa Jesús, numuu rí ikhiin nduyáá rí ada̱ nikháñu.

Ikhú Jesús nato̱ʼo̱o̱ ga̱jma̱a̱ anu̱u̱ ga̱jma̱a̱ ru̱dúu̱ dxáʼgú gajmíi̱n ajtsíin apóstoles náa cuarto rí kraʼaa ada̱. Naguatun ñawúunʼ ga̱jma̱a̱ naʼthí: ‹¡Araxunʼ!›. Ikhú ikhaa natuxi̱i̱ mbu̱júu̱, xóo má tayáá gi̱i̱. ¡Natuxu̱u̱ ga̱jma̱a̱ najngruigo̱o̱! Ikha jngó anu̱u̱ ga̱jma̱a̱ ru̱dúu̱ nakuwa gagi wéñuʼ.

Ra̱ʼkháa timbáa xa̱bu̱ bugi̱ bi̱ Jesús nakuxi̱i̱ náa xa̱bu̱ nikháñun. Timbáa bi̱ nikuxi̱i̱ ñajunʼ a̱ʼdióo mbáa a̱ʼgú xuáʼa bi̱ xtáa náa xuajin Naín. Nda̱wa̱á, Jesús naʼni rí matuxi̱i̱ Lázaro, ndxájuu María ga̱jma̱a̱ Marta. Índo̱ Jesús gaʼtañejunʼ xóo rey bi̱ nixnáa Dios, maʼni rí matuxi̱i̱n mbaʼin wéñuʼ xa̱bu̱ bi̱ nikháñun. Lá ragíʼmaa makuwáanʼ gagi ga̱jma̱a̱ numuu rúʼko̱ ráʼ.

Lucas 8:40-56; 7:11-17; Juan 11:17-44.