Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 85

Jesús nagumaa náa kajchún xujkhúʼ

Jesús nagumaa náa kajchún xujkhúʼ

LÁ NATAYÁÁ tsáa nindxu̱u̱ ada̱ cháñaʼ bugi̱ ráʼ. Xúʼko̱, ikhaa ñajunʼ Jesús. Ndiʼkhún guámbá nigumaa náa guʼwá rí nagixi̱i̱n xujkhúʼ rí nagumbiʼyuu establo. María xtáa ragíwanʼ Jesús náa raguwaʼ o pesebre, náa naphiʼtsumúʼún xtángidiʼ ga̱jma̱a̱ eʼwíínʼ xujkhúʼ. Mú náa numuu rí María ga̱jma̱a̱ José kúwi̱i̱n náa kajchún xujkhúʼ rá. Gi̱i̱ na̱nguá ñajunʼ mbá guʼwá náa ma̱ndoo magumaa mbáa ada̱, lá ragájkhun ráʼ.

Na̱nguá, ra̱ʼkháa ikhaa. Mú ikhiin kuwa gi̱i̱ ga̱jma̱a̱ numuu rígi̱: Xa̱biya̱ César Augusto bi̱ naʼtañajunʼ náa Roma, niʼni mbóo xtángoo náa naʼthí rí xúgínʼ xa̱bu̱ matangi̱i̱n náa xuajin rí nigumiin ga̱jma̱a̱ rí muniraʼmáʼ mbiʼñún náa mbá libro. José nigumaa gi̱i̱ náa xuajin Belén. Mú índo̱ ikhaa ga̱jma̱a̱ María niguáʼnu, nánguá nixkamaa mbá guʼwá. Ikha jngó niguwáʼ náa guʼwá rí kajchún xujkhúʼ. ¡Ga̱jma̱a̱ mbiʼi má rígi̱ María nigiʼdaa Jesús! Mú, xóo má tayáá, ikhaa xtáa májánʼ.

Lá natañún báxtúu bi̱ naguwáʼ gúyaa Jesús ráʼ. Ikhiin kuwa mbruʼun náa xaná ga̱jma̱a̱ mbajndi náa kuwa nimbiʼi mbá aguʼ. ¡Ikhaa ñajunʼ mbáa ángel! Báxtúu nimiñun wéñuʼ. Mú ángel niʼthún: ‹¡Xámiñaláʼ! Gúʼdoo mbá ajngáa májánʼ matalaʼ. Mbiʼi rígi̱ nigumaa náa Belén, Tátá Cristo. ¡Bugi̱ maʼni káwíín xa̱bu̱ xuajin! Ikhaa kambráʼaa mbá xtíin ga̱jma̱a̱ kabóʼ náa naphiʼtsumúʼún xujkhúʼ›. Nda̱a̱ tsuma, mbaʼin ángel niguwáʼ ga̱jma̱a̱ nigi̱ʼdi̱i̱ ndiyamba̱a̱ Dios. Núkhu báxtúu nigañun mu mbuyáaʼ Jesús, ga̱jma̱a̱ rí xúgi̱ nixkamaa.

Lá natayáá náa numuu rí ni̱ndxu̱u̱ xa̱bu̱ kiejunʼ Jesús ráʼ. Lá natayáá tsáa phú ñajunʼ ráʼ. Garmáʼáan a̱jkia̱nʼ, náa timbá historia ndrígóo libro rígi̱ niʼthá ga̱jma̱a̱ numuu timbáa A̱ʼdióo Dios. Ikhaa niñajunʼ ga̱jma̱a̱ Jeobá mu maʼni mekhu ga̱jma̱a̱ Ku̱ba̱ʼ ma̱ngaa xúgíʼ dí rígá. Mú, ¡ikhaa bugi̱ ñajunʼ Jesús!

Mú ní xáxtáa A̱ʼdióo náa mekhu, Jeobá niriʼkhuu rí xú maxtáa índo̱ nigíwanʼ náa awúu̱n María. Núkhu nigíʼdu̱u̱ ni̱jkha̱ ragaja̱a̱ ada̱ náa awúu̱n María xóo má eni̱ eʼwíínʼ e̱ji̱n náa awúu̱n rudún. Mú ada̱ cháñaʼ bugi̱ ninindxu̱u̱ A̱ʼdióo Dios. Nda̱wa̱á kayuʼ nigumaa náa guʼwá náa nagixi̱i̱n xujkhúʼ náa xuajin Belén. Lá nandoo natayáá náa numuu rí kuwa gagi wéñuʼ ángeles índo̱ nithún xa̱bu̱ rí nigumaa Jesús ráʼ.

Lucas 2:1-20.