Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 84

Mbáa ángel na̱jkha̱ gáʼyoo María

Mbáa ángel na̱jkha̱ gáʼyoo María

A̱ʼGÚ mitsiʼyáa bugi̱ ñajunʼ María. Ikhaa ñajunʼ mbáa israelita, ga̱jma̱a̱ xtáa náa xuajin Nazaret. Dios ndaʼyoo rí ikhaa ni̱ndxu̱u̱ mbáa a̱ʼgú májánʼ wéñuʼ. Ikha jngó nikunguanʼ ángel Gabriel mu maʼthúu̱n. La natayáá ndiéjunʼ ni̱ʼkha̱ gáʼthi Gabriel náa María ráʼ. Guʼyáá.

Gabriel naʼthúún: ‹Wajtsaʼ, ikháánʼ nikanaʼ rí phú itháan májánʼ. Jeobá xtáa ga̱jma̱á ni̱ndxa̱ʼ›. María na̱nguá ndiʼyoo nimbá miʼtsú xa̱biya̱ bugi̱ nákha ginii. Naxmiéjunʼ, numuu rí tseʼyoo ndiéjunʼ eyoo gáʼthi. Mú nacha̱ má Gabriel naʼthúu̱n rí xamiñuu.

Naʼthí: ‹Xámiñaʼ María. Ra̱ʼkhá tháán gagi xtáa Jeobá ga̱jma̱á ni̱ndxa̱ʼ. Ikha jngó maʼni mbá rí májánʼ wéñuʼ náa ikháánʼ. Nacha̱ má gáraʼdaa mbáa ada̱. Ga̱jma̱a̱ gíʼmaa maraxna mbíʼii Jesús›.

Gabriel naʼthí má xúʼko̱: ‹Ada̱ bugi̱ magiʼdoo numuu, ga̱jma̱a̱ magumbiʼyuu A̱ʼdióo Dios bi̱ itháan mba̱a̱. Jeobá naʼni rí manindxu̱u̱ rey, xóo má ninindxu̱u̱ David. ¡Mú Jesús manindxu̱u̱ rey kámuu mbiʼi, ga̱jma̱a̱ reino ndrígóo xatumuu!›.

María naʼni graxe̱: ‹Xú káʼnii gándoo garigá xúgíʼ rígi̱ rá. Rí xóó tsinujúnʼ ga̱jma̱a̱ na̱nguá xtáá gajmu̱ʼ mbáa xa̱biya̱, xú káʼnii gándoo gáguʼdaa mbáa ada̱ rá.›

Gabriel naʼthí: ‹Tsiakii ndrígóo Dios gáʼkha náa ikháánʼ. Ikha jngó ada̱ magumbiʼyuu A̱ʼdióo Dios›. Ikhú naʼthúu̱n: ‹Garmáʼáan a̱jkia̱n eʼni Elisabet tsí mijngii xtayáá. Xa̱bu̱ nuti rí ikhaa ñajunʼ mbáa a̱ʼgú ni̱khi̱i̱ wéñuʼ mu magiʼdiin e̱ji̱n. Mú nacha̱ má gágiʼdaa mbáa ada̱, xóo má tayáá nda̱a̱ nimbá rí maʼniu mingíjyúu maʼni Dios›.

Núkhu María naʼthí: ‹¡Ikhúúnʼ ñajunʼ esclava ndrígóo Jeobá! Gagíʼnuʼ xóo má nirata›. Ikhú ángel na̱jkha̱a̱.

María nacha̱ e̱jkha̱ gáʼyoo Elisabet. Índo̱ Elisabet naʼdxaun aʼwóo ndrígóo María, ada̱ bi̱ kuaʼa̱a̱n náa awúu̱n Elisabet naki̱xi̱i̱ gagi. Elisabet nagiʼdoo espíritu santo ga̱jma̱a̱ naʼthúu̱n María: ‹Ikháánʼ phú naguma tsajkuramánʼ náa majñúnʼ gu̱ʼu̱›. María naxtáa ga̱jma̱a̱ Elisabet ajtsú igu̱nʼ, ga̱jma̱a̱ ikhú natanga̱a̱ náa xuajin Nazaret.

Nacha̱ má María manújúnʼ ga̱jma̱a̱ mbáa xa̱biya̱ bi̱ nagumbiʼyuu José. Mú índo̱ ndaʼyoo rí María magiʼdaa mbáa ada̱, ndaʼyoo rí nánguá gíʼmaa manigúnʼ ga̱jma̱a̱ María. Ikhú ángel ndrígóo Dios naʼthúu̱n: ‹Xámiñaʼ mbi̱ya̱a̱ María mú maʼni xóo a̱ʼgia̱ʼ. Numuu rí Dios ñajunʼ bi̱ nixniúu mbáa ada̱›. Ikha jngó María ga̱jma̱a̱ José nunigu̱nʼ, ga̱jma̱a̱ naguaʼti̱i̱n rí Jesús magumaa.

Lucas 1:26-56; Mateo 1:18-25.