Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 79

Daniel xtáa náa majñúnʼ mbaʼin león

Daniel xtáa náa majñúnʼ mbaʼin león

¡ATAYÁÁ! Nakujmaa rí Daniel xtáa náa awúu̱n xkujndu. ¡Mú león nda̱a̱ rí eni̱i̱ nditháan! Lá natayáá náa numuu ráʼ. Tsáa nikumááʼ Daniel náa kajchún xúgínʼ león ráʼ. Guʼyáá.

Rí xúgi̱ mbáa xa̱biya̱ bi̱ nagumbiʼyuu Darío ñajunʼ rey náa Babilonia. Darío nanigu̱ʼ wéñuʼ rí májánʼ a̱jkiu̱u̱n Daniel ga̱jma̱a̱ rí gíʼdoo wéñuʼ edxu̱u̱, ga̱jma̱a̱ Darío naʼni rí maʼga̱nú manindxu̱u̱ mbáa Xa̱bu̱ Ñajunʼ náa reino ndrígóo. Ikha jngó naxígu̱u̱n kuyáá eʼwíínʼ xa̱bekha Daniel, ga̱jma̱a̱ nuni̱i̱ rígi̱:

Nagún náa Darío ga̱jma̱a̱ nuthi: ‹Tátá rey, xúgiáanʼ nanduxu dí matani̱ mbá xtángoo náa gáʼthi rí mbá 30 mbiʼi nimbáa xaʼtajkháan náa dios asndu má nimbáa xa̱bu̱ imbóó ikháánʼ, tátá rey. Á mu mbáa tseʼnimbo̱o̱, gíʼmaa rí majkuáa náa kajchún león›. Darío tseʼyoo náa numuu rí xa̱bu̱ bugi̱ nandún xtángoo rígi̱. Mú ikhaa nandxa̱ʼwáminaʼ rí májánʼ má gáʼni, ikha jngó naʼnirámáʼ xtángoo. Rí xúgi̱ nánguá xú maxtiʼkhu̱u̱ xtángoo.

Índo̱ Daniel naʼdxun rígi̱, na̱jkha̱ náa goʼwóo ga̱jma̱a̱ naʼtájkháan xóo má xtáa raʼni nákha ginii. Xa̱bekha bi̱ ra̱míjínʼ nduyáá rí Daniel xániñuʼ raʼtájkháan náa Jeobá. Nakuwa gagi, numuu rí ikhiin nduyáá rí maʼngu̱u̱n muni̱ rí nandún, rí munimbáti̱ga̱a̱ Daniel.

Índo̱ rey Darío ndaʼyoo náa numuu rí xa̱bekha bugi̱ nandún muni̱ xtángoo rígi̱, naxtáa gíná. Mú nánguá xú mariʼkhu̱u̱ xtángoo, ga̱jma̱a̱ nakuʼma rí majkuáa Daniel náa iñáʼ ndrígu̱ún león. Mú rey naʼthúu̱n Daniel: ‹Magúʼthu̱u̱n rí Dios ndrígáʼ bi̱ natani̱ ñajunʼ maʼni kríñanʼ›.

Darío naxmiéjunʼ wéñuʼ dí asndu táʼndoo gígú mbruʼun rúʼko̱. Índo̱ niʼni wajtse nagáyúu ejkha̱ náa iñáʼ ndrígu̱ún león. Gi̱i̱ natayáá. Darío nandxa̱ʼwá: ‹¡Daniel, xa̱bi̱i̱ Dios bi̱ ndaʼya! Lá nindoo niʼni kríñanʼ náa león, Dios bi̱ natani̱ ñajunʼ ráʼ.›

Daniel nariʼña: ‹Dios nikuʼmaa ángel ndrígóo, ga̱jma̱a̱ nirugoo rawúunʼ león mu nda̱a̱ rí gúniuʼ›.

Rey naxtáa gagi wéñuʼ. Nakuʼmiin xa̱bi̱i̱ rí muriyaaʼ Daniel náa iñáʼ. Ikhú nigruiʼñínʼ náa kajchún león xa̱bekha bi̱ ra̱míjínʼ bi̱ nindúún munimbáti̱ga̱a̱ Daniel. Asndu xóó tsekaún náa iñáʼ xa̱bekha bi̱ ra̱míjínʼ índo̱ león naʼphu̱u̱n ga̱jma̱a̱ nuxphiga̱ʼ xúgíʼ itsu̱ún.

Ikhú rey Darío naʼnirámáʼ i̱yi̱i̱ʼ náa xúgínʼ xa̱bu̱ bi̱ kuwa náa reino ndrígóo: ‹Xúgiáanʼ guyamajkhuíí Dios ndrígóo Daniel. Ikhaa naʼni milagru rí mba̱ʼu̱. Ikhaa niʼni kríyaʼ Daniel mu xúphi̱i̱ león›.

Daniel 6:1-28.