Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 64

Salomón naʼni templo

Salomón naʼni templo

NÁKHA xóó tsekhañuu David, nixnúu awan Salomón rí xú káʼnii Jeobá nandoo miʼni templo. A̱jkhu̱ tsiguʼ má eʼtáñajunʼ Salomón, índo̱ nagíʼdu̱u̱ naʼni temploʼ, ga̱jma̱a̱ ndijyúuʼ mbá juwan tsiguʼ tikhu dí niguámbóo niʼni. Itháan rí 180,000 xa̱bu̱ eñajunʼ náa nuni̱ guʼwá rí minumuu wéñuʼ, numuu rí najmaa wéñuʼ oro ga̱jma̱a̱ plata.

Templo rígi̱ gíʼdoo a̱jma̱ cuarto rí phú najmaa, xóo má a̱jma̱ cuarto ndrígóo tabernáculo. Mú itháan mba̱ʼu̱ cuarto rígi̱ ki xóo ndrígóo tabernáculo. Salomón naʼni rí e̱jna̱ rí nimbánuu magida̱ʼ náa cuarto rí gídáʼ asndu itháan awúu̱n; ga̱jma̱a̱ i̱ʼwáʼ dí rígá náa tabernáculo nuxuda̱ʼ náa imbo̱o̱ cuarto.

Índo̱ niguámba niguma templo, narígá mbá ndxa̱a̱ mba̱a̱. Salomón nasmbáti̱go̱o̱ mu maʼtájkháan náa inuu templo, xóo má tayáá náa kiʼniriyaʼ. Salomón naʼthúu̱n Jeobá: ‹Asndu tseʼngo̱o̱ xúgíʼ mekhu garuguaru̱wi̱i̱n, xú káʼnii gándoo garuguaru̱wi̱i̱n templo rígi̱ rá. Mú, Dios ndrígóʼ, atani péñu, atadxawíín rí gutajkháan xa̱bu̱ xuajñaʼ gi̱i̱›.

Índo̱ Salomón naguámbóo raʼtájkháan, nakajtaa aguʼ asndu náa mekhu. Agu̱ʼ rígi̱ natsiká tsigijñaʼ ndrígu̱ún xujkhúʼ rí nijuixná. Ga̱jma̱a̱ mbá aguʼ rí na̱ʼkha̱ náa Jeobá nambiʼita̱ʼa̱ náa templo. Rígi̱ nasngájma rí Jeobá naʼdxun rí naʼtájkháan Salomón. Ma̱ngaa xtáa gagi numuu dí niguma templo ga̱jma̱a̱ rí Salomón ninda̱ʼa̱. Rí xúgi̱ templo ni̱ndxu̱u̱ náa naguwáʼ xa̱bu̱ xuajin mu mbuyamajkuíí Jeobá ní raʼkháa náa tabernáculo.

Mba̱yu̱u̱ʼ tsiguʼ Salomón nagiʼdoo wéñuʼ edxu̱u̱ rí xú naʼtañajunʼ, ga̱jma̱a̱ xa̱bu̱ kuwa gagi. Mú Salomón nanigúnʼ gajmíi̱n mbaʼin gu̱ʼu̱ bi̱ kuwa náa i̱ʼwáʼ xuajin bi̱ tseyamajkuíí Jeobá. Lá nandoo natayáá mbáa a̱ʼgu̱ bi̱ xtáa raʼyamajkuu xándú ráʼ. Nda̱wa̱á kayuʼ gu̱ʼu̱ bugi̱ nuni̱ rí Salomón mbaʼyamajkún eʼwíínʼ dios. Lá natayáá ndiéjunʼ erígá índo̱ Salomón naʼni rígi̱ ráʼ. Salomón nanindxu̱u̱ mbáa xa̱bu̱ ra̱májánʼ bi̱ nánguá egáwiinʼ a̱jkiu̱u̱n kaʼñúún eʼwíínʼ, ga̱jma̱a̱ xa̱bu̱ nánguá kuwa gagi.

Rígi̱ naʼni rí Jeobá makiʼnáa kaʼyoo Salomón, ga̱jma̱a̱ naʼthúu̱n: ‹Ma̱ni̱ rí ní xáratañájunʼ ga̱jma̱a̱ maxnu̱u̱ imba̱a̱ xa̱bu̱ ñajunʼ ndrígáʼ. Xáni rígi̱ índo̱ gáraxtaa ikháánʼ, ma̱ni̱ índo̱ gáxtáa raʼtáñajunʼ a̱ʼdiáaʼ. Mú xariyakaʼñúúnʼ xúgínʼ xa̱bu̱ náa gáʼtañajunʼ a̱ʼdiáaʼ›. Guʼyáá xú káʼnii erígá rígi̱.

1 Crónicas 28:9-21; 29:1-9; 1 Reyes 5:1-18; 2 Crónicas 6:12-42; 7:1-5; 1 Reyes 11:9-13.