Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 65

Nawiʼtáa reino

Nawiʼtáa reino

LÁ NATAYÁÁ náa numuu rí xtáa raxkuʼturiga̱a̱ xtíin xa̱bu̱ bugi̱ ráʼ. Jeobá niʼthúu̱n maʼni rúʼko̱. Xa̱bu̱ bugi̱ ni̱ndxu̱u̱ Ahías gaʼyee ndrígóo Dios. Lá natayáá ndiéjunʼ eʼni mbáa gaʼyee ráʼ. Dios naʼthúu̱n xa̱bu̱ bugi̱ dí wíji̱ marigá.

Gi̱i̱ xtáa Ahías raʼtamíjná ga̱jma̱a̱ Jeroboán. Jeroboán ni̱ndxu̱u̱ mbáa xa̱bu̱ bi̱ Salomón nigíiʼ maʼni guʼwá. Índo̱ Ahías naxkamaminaʼ ga̱jma̱a̱ Jeroboán náa kamba̱a̱, naʼni mbá rí na̱nguá kujmaa kayuʼ. Naríyaʼ xtíñuu nuxi̱ʼ rí kagíiʼ ikhú naxkuʼtu mbá 12 xtíin ma̱jkha̱ʼ. Naʼthúu̱n Jeroboán: ‹Ayá ikháánʼ mbá 10 xtíin ma̱jkha̱ʼ›. Lá natayáá náa numuu rí Ahías naxnúu mbá 10 xtíin ma̱jkha̱ʼ Jeroboán ráʼ.

Ahías naʼthí rí Jeobá maríya kaʼyúuʼ rí naʼtañajunʼ Salomón. Naʼthí rí Dios maxnúu Jeroboán mbá 10 xuajin ma̱jkha̱ʼ. Rígi̱ eyoo gáʼthi rí maguanúu i̱ndó a̱jma̱ xuajin ma̱jkha̱ʼ rí maʼtáñajunʼ Roboam a̱ʼdióo Salomón.

Índo̱ Salomón naʼdxun rí Ahías niʼthúu̱n Jeroboán, nakiʼnáa wéñuʼ rí asndu nagíiʼ maxíyáa Jeroboán, mú ikhaa nagájnuu ragáyúu náa Egipto. Nda̱wa̱á, Salomón nakháñuu. Ninindxu̱u̱ rey mbá 40 tsiguʼ, mú xúgi̱ a̱ʼdióo Salomón bi̱ nagumbiʼyuu Roboam ni̱ndxu̱u̱ rey. Náa Egipto xtáa Jeroboán índo̱ naʼdxun rí Salomón nikháñu, ikhú natanga̱a̱ náa Israel.

Roboam na̱nguá ni̱ndxu̱u̱ mbáa rey májánʼ. Ikhaa naʼni gíníín itháan xa̱bu̱ ki xóo Salomón anu̱u̱. Jeroboán gajmíi̱n eʼwíínʼ xa̱bu̱ bi̱ guáʼdáá itháan numún nagún gúyaa Roboam ga̱jma̱a̱ nunda̱ʼa̱a̱ rí mani̱ndxu̱u̱ májánʼ a̱jkiu̱u̱n náa eʼwíínʼ xa̱bu̱. Mú ikhaa na̱nguá eʼdxun. Asndu naʼni itháan mixkawiʼ a̱jkiu̱u̱n ki xóo nákha ginii. Ikha jngó xa̱bu̱ nugíiʼ Jeroboán xóo rey mu maʼtáñajunʼ náa 10 xuajin ma̱jkha̱ʼ, mu Roboam nanindxu̱u̱ ma xúʼko̱ rey náa a̱jma̱ xuajin ma̱jkha̱ʼ ndrígóo Benjamín ga̱jma̱a̱ Judá.

Jeroboán tsíyoo rí xa̱bi̱i̱ magun asndu náa templo dí rígá náa Jerusalén mu mbuyamajkuíí Jeobá. Ikha jngó naʼni a̱jmi̱i̱n e̱jín xédé ga̱jma̱a̱ oro ga̱jma̱a̱ naʼni rí xa̱bu̱ bi̱ kuwa náa 10 xuajin ma̱jkha̱ʼ mbuyamajkhún. Nacha̱ má xa̱bu̱ bi̱ kuwa náa xuajin rúʼko̱ nanigu̱nʼ muxnamijná ga̱jma̱a̱ dí muradíin eʼwíínʼ.

Ma̱ngaa rígá xkujndu náa reino ndrígóo a̱jma̱ xuajin ma̱jkha̱ʼ. Asndu xóó tséʼni witsu tsiguʼ rí xtáa raʼtáñajunʼ Roboam, índo̱ rí rey bi̱ xtáa raʼtáñajunʼ náa Egipto na̱ʼkha̱ gaxnamíjna gajmíi̱n xa̱bu̱ bi̱ kuwa náa Jerusalén. Na̱jkha̱ kagu̱u̱ mbaʼa dí gíʼdoo wéñuʼ numuu dí rígá náa templo ndrígóo Jeobá. Ikha jngó templo nánguá ninindxu̱u̱ xóo nákha niguma.

1 Reyes 11:26-43; 12:1-33; 14:21-31.