Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Libro ndrígóʼ náa na̱ʼkha̱ raʼthí ga̱jma̱a̱ numuu Biblia

 HISTORIA 68

Ajmi̱i̱n e̱ji̱n nakuwa mbu̱júu̱

Ajmi̱i̱n e̱ji̱n nakuwa mbu̱júu̱

Á MU nikháñaʼ, xú káʼnii gáxtáa ru̱dáʼ á mu ikháánʼ nadxuʼnú naraxtaa mbu̱júu̱ rá. ¡Ikhaa maxtáa gagi wéñuʼ! Mú, lá ma̱ndoo maxtáa mbu̱júu̱ xa̱bu̱ bi̱ nikháñu ráʼ. Lá niguáxu̱u̱n xa̱bu̱ bi̱ nikháñun nákha ginii ráʼ.

Atayáá xa̱biya̱, a̱ʼgu̱ ga̱jma̱a̱ ada̱ bi̱ kamaa náa kiʼniriyaʼ. Xa̱biya̱ bugi̱ ñajunʼ gaʼyee bi̱ nagumbiʼyuu Elías. Aʼgú nikhi̱i̱ ñajunʼ mbáa aʼgú xuáʼa̱ bi̱ xtáa náa xuajin Sarepta, ga̱jma̱a̱ ada̱ ñajunʼ a̱ʼdióo. Mbóo mbiʼi ada̱ naʼniu nandii. Naʼniu itháan gakhi̱i̱ nandii, ga̱jma̱a̱ ikhaa nakháñuu. Ikhú Elías naʼthúu̱n a̱ʼgu̱: ‹Araxniúʼ ada̱›.

Elías na̱jkha̱ kayáa ada̱ bi̱ nikháñu náa guʼwá dí rígá rijma̱a̱ ga̱jma̱a̱ natámaʼ náa xiyoo. Ikhú naʼtakháñuu: ‹Oh Jeobá, atani rí maxtáa mbu̱júu̱ ada̱›. ¡Ga̱jma̱a̱ ada̱ nagíʼdu̱u̱ ndayáxu̱ʼ! Ikhú Elías nagajtaa kayáa ada̱ ga̱jma̱a̱ naʼthúu̱n a̱ʼgu̱: ‹¡Atayáá, a̱ʼdiáaʼ ndaʼya!›. Rúʼko̱ naʼni dí ru̱dúu̱ maxtáa gagi wéñuʼ.

Imba̱a̱ gaʼyee bi̱ gíʼdoo wéñuʼ numuu náa Jeobá nagumbiʼyuu Eliseo. Ikhaa ñajunʼ mbáa xa̱bu̱ bi̱ nambáyuu Elías. Mú nda̱wa̱á Jeobá naʼni rí ma̱ngaa Eliseo maʼni mbaʼa milagro. Mbóo mbiʼi ikhaa na̱jkha̱ náa xuajin Sunem, ga̱jma̱a̱ ikhí Elías nixkamaa mbáa a̱ʼgu̱ bi̱ májánʼ a̱jkiu̱u̱n. Nda̱wa̱á a̱ʼgu̱ bugi̱ nagiʼdaa mbáa ada̱.

Mbóo miʼcha̱, nda̱wa̱á rí ada̱ buʼko̱ naʼni itháan nikhi̱i̱, na̱jkha̱ náa mbaaʼ rí xtáa rañajunʼ anu̱u̱. Mbá nacha̱ endxa̱ʼwá: ‹¡Na̱ʼkhu̱ edxu̱ʼ!›. Índo̱ nagún ku̱ya̱a̱ náa goʼwóo nikháñu. ¡Ra̱ʼkhá tháán gíná xtáa ru̱dúu̱! Nacha̱ ejkha̱ gáyáaʼ Eliseo.

Índo̱ na̱ʼkha̱nú Eliseo, nato̱ʼo̱o̱ kayáa ada̱ bi̱ nikháñu náa cuarto. Naʼtakháñuu Jeobá, ga̱jma̱a̱ nambátamuʼ náa ada̱ bi̱ nikháñu. Nacha̱ má ejkha̱ ragi̱ga̱a̱ ada̱ bi̱ nikháñu, ga̱jma̱a̱ nareʼtsinʼ mbá juwan nutu. ¡Ra̱ʼkhá tháán edxuu ru̱dúu̱ índo̱ nato̱ʼo̱o̱ náa goʼwóo ga̱jma̱a̱ ndaʼyoo rí a̱ʼdióo ndaʼya!

Ra̱ʼkhá tháán mbaʼin wéñuʼ xa̱bu̱ bi̱ nikháñun. Rígi̱ naʼni rí makuwá gíná xa̱bu̱ bi̱ kúwi̱i̱n náa guʼún ga̱jma̱a̱ bi̱ nimbáxu̱u̱n gajmiún. Ikháanʼ xándoo muʼni rí matuxiín xa̱bu̱ bi̱ nikháñun. Mú Jeobá ma̱ndoo maʼni. Nda̱wa̱á gúʼyáá xú káʼnii ikhaa maʼni rí magabi̱ín mbaʼin ra̱ʼkhá tháán mbaʼin xa̱bu̱ bi̱ nikháñun.

1 Reyes 17:8-24; 2 Reyes 4:8-37.