Atambaʼtaa mu matraxnuu

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

Atraʼwíí ajngáa me̱ʼpha̱a̱

 HISTORIA 60

Abigaíl ga̱jma̱a̱ David

Abigaíl ga̱jma̱a̱ David

LÁ NATATSINIIʼ a̱ʼgu̱ mitsiʼyáa bi̱ xtáa ra̱ʼkha̱ náa David ráʼ. Nagumbiʼyuu Abigaíl. Ikhaa nandxa̱ʼóo májánʼ edxu̱u̱, ga̱jma̱a̱ tséniñuʼ rí David maʼni dí ra̱májánʼ. Mú nákha xóó tséʼyaa dí nirígá, mbuʼyáá ndiéjunʼ rí nixtáa ragíʼnuu David.

Nda̱wa̱á rí David nagájnuu ragáyúu náa Saúl, narkaʼuminaʼ náa mbá tsíñu. A̱ngui̱i̱n ga̱jma̱a̱ tikhun bi̱ kuwa náa goʼwóo naguwáʼ náa ikhaa. Mbá 400 xa̱bekha kuwa raguwáʼ náa David, ga̱jma̱a̱ ikhaa na̱jkha̱nú nanindxu̱u̱ xa̱bu̱ ede̱ náa ikhiin. Ikhú David na̱jkha̱ náa rey bi̱ xtáa náa Moab ga̱jma̱a̱ naʼthí: ‹Mbá péñu, atatsíñaʼ rí anu̱ʼ ga̱jma̱a̱ ru̱dúʼ maguanún ga̱jma̱á ni̱ndxa̱ʼ asndu índo̱ gáyóo ndiéjunʼ gágíʼnuʼ›. Nda̱wa̱á, David gajmíi̱n xa̱bi̱i̱ nugi̱ʼdi̱i̱ nurkaʼumijná náa kúbá.

Nguátha mbiʼi nda̱wa̱á, David naninuwiinʼ Abigaíl. Ajmbio̱o̱ ikhaa nagumbiʼyuu Nabal, bi̱ gíʼdoo wéñuʼ ga̱jma̱a̱ gíʼdoo mbaʼa wéñuʼ ku̱ba̱ʼ. Gíʼdiin mbá 3,000 mugu̱ ga̱jma̱a̱ 1,000 tsu̱jtuunʼ. Nabal ni̱ndxu̱u̱ mbáa xa̱bu̱ bi̱ tsigáwiinʼ a̱jkiu̱u̱n kaʼñúún eʼwíínʼ. Mú Abigaíl ra̱ʼkhá tháán mitsiʼyáa wéñuʼ. Ga̱jma̱a̱ najmañuu naʼni dí májánʼ. Mbóo miʼtsú asndu niʼnikáwíín bi̱ kuwa náa goʼwóo. Guʼyáá xú káʼnii nirígá.

David gajmíi̱n xa̱bi̱i̱ nanindxu̱ún míjínʼ náa Nabal. Nimbayíí mu mbuñun mugiu̱u̱. Mbóo mbiʼi David nakunguinʼ xa̱bi̱i̱ mu munda̱ʼa̱a̱ Nabal mbá péñu. Ikhiin naguanu náa Nabal nákha ikhaa xtáa naʼdu̱u̱n mugiu̱u̱ gajmíi̱n bi̱ numbayíí. Ni̱ndxu̱u̱ mbóo mbiʼi dí narígá ndxa̱a̱, Nabal gíʼdoo mbaʼa ganitsu miʼtsí. Ikha jngó xa̱bi̱i̱ David nuthi: ‹Nini̱ndxu̱xu̱ʼ májánʼ xa̱bu̱ ga̱jma̱á ni̱ndxa̱ʼ. Na̱nguá ninikuʼwáxu nimbáa mugu̱, asndu nimbáyaaʼxu ndi̱ñu̱u̱n. Rí xúgi̱ atani péñu, araxnúxuʼ ganitsu›.

Nabal eʼthí: ‹Xáxnu̱u̱n ganitsu xa̱bu̱ xóo ikháanʼ›. Tsigawinʼ a̱jkiu̱u̱n kaʼñúún xa̱bu̱ índo̱ naʼthúún, ma̱ngaa naʼthí dí ra̱májánʼ ga̱jma̱a̱ numuu David. Índo̱ xa̱bu̱ nutháán rígi̱ David, ikhaa nakiʼnáa wéñuʼ. Ikha jngó naʼthúún xa̱bi̱i̱: ‹¡Guda chidialaʼ!›. Ikhú nagájnún gúxiyáa Nabal gajmíi̱n xa̱bi̱i̱.

Índo̱ rí mbáa xa̱biya̱ niʼdxuun xúgíʼ ajngáa dí ra̱májánʼ rí niʼthí Nabal, ikhú naʼthúu̱n Abigaíl dí nirígá. Núkhu Abigaíl naʼni mújúnʼ ganitsu, ga̱jma̱a̱ naxieʼduun búrriu̱u̱ ikhú nagájnuu na̱jkha̱. Índo̱ rí Abigaíl natsijnuu David, ikhú nakajtaa náa búrriu̱u̱, nakruigu edxu̱u̱ ga̱jma̱a̱ naʼthúu̱n: ‹Tátá, mbá péñu, xátaʼgíiʼ edxa̱ʼ rí niʼthí ajmbioʼ Nabal. Ikhaa ni̱ndxu̱u̱ mbáa xa̱bu̱ skágunʼ, ga̱jma̱a̱ naʼni dí tséjmaa. Gi̱i̱ ka̱ya̱ tsigijñaʼ maxna̱ʼ. Mbá péñu, atrigú ga̱jma̱a̱ atatsimba̱a̱ a̱jkia̱nʼ xtayuxuʼ dí nirígá›.

David eriʼña: ‹Ikháánʼ ni̱ndxa̱ʼ mbáa a̱ʼgu̱ bi̱ nandxa̱ʼóo májánʼ edxu̱u̱. Nitani̱ rí ní xáxiyáa Nabal ga̱jma̱a̱ numuu rí na̱nguá nigáwiinʼ a̱jkiu̱u̱n kaʼyuxuʼ. Rí xúgi̱ ayuuʼla tsímáá náa guʼwáaʼ›. Nda̱wa̱á, índo̱ rí Nabal nakháñuu, Abigaíl na̱jkha̱nú nanindxu̱u̱ mbáa dí a̱ʼgiu̱u̱ David.

1 Samuel 22:1-4; 25:1-43.