Atambaʼtaa mu matraxnuu

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

Atraʼwíí ajngáa me̱ʼpha̱a̱

 HISTORIA 36

Aʼdá xédé bi̱ ki̱ʼni̱i̱ ga̱jma̱a̱ oro

Aʼdá xédé bi̱ ki̱ʼni̱i̱ ga̱jma̱a̱ oro

¡AY! ndiéjunʼ rí kuwa runi xa̱bu̱ xúgi̱ rá. ¡Nduyamajkuíí mbáa aʼdá xédé! Náa numuu rí kuwa runi rígi̱ xá.

Índo̱ rí Moisés naguanúu mba̱yu̱u̱ʼ wéñuʼ náa kúbá, xa̱bu̱ xuajin ethi: ‹Na̱nguá eʼyáá káʼnii nigíʼnuu Moisés. Muʼni̱i̱ mbáa dios bi̱ maríñáanlu náa ku̱ba̱ʼ rígi̱›.

Ikhú eʼthí Aarón ndxájuu Moisés: ‹Májánʼ má. Gurawíi xábiala rí ñajunʼ oro, ga̱jma̱a̱ aguwaʼ kudalaʼ náa ikhúúnʼ›. Índo̱ rí xa̱bu̱ xuajin e̱ni̱ rígi̱, Aarón naʼni majuiyaaʼ ma̱ngoo naʼni̱i̱ mbáa aʼdá xédé bi̱ ki̱ʼni̱i̱ ga̱jma̱a̱ oro. Ma̱ngaa xa̱bu̱ xuajin ethi: ‹¡Bugi̱ ni̱ndxu̱u̱ Dios ndrígúlú, bi̱ niríñanʼlú náa Egipto!›. Ikhú nuni̱ mbá ndxa̱a̱ mba̱a̱, ma̱ngaa nduyamajkuíí aʼdá xédé bi̱ ki̱ʼni̱i̱ ga̱jma̱a̱ oro.

Índo̱ Jeobá eʼyoo rígi̱, nakiʼnáa wéñuʼ. Ikhú eʼthúu̱n Moisés: ‹Gaʼcha̱ʼ mu mayejtaa. Ra̱májánʼ kayuʼ rí kuwa runi xa̱bu̱ xuajin. Nimbumún kuyáá xtángoo ndrígóʼ ga̱jma̱a̱ nusmbati̱gu̱u̱n náa inuu aʼdá xédé bi̱ ki̱ʼni̱i̱ ga̱jma̱a̱ oro›.

Moisés nakajta̱a̱ nacha̱ náa kúbá. Ga̱jma̱a̱ índo̱ e̱jkha̱nú mijngii, rígi̱ ni̱ndxu̱u̱ rí eʼyoo. ¡Xa̱bu̱ kuwa runi ajmúú ma̱ngoo nusian mbajndi náa jruigu aʼdá xédé! Moisés nakiʼnáa wéñuʼ rí asndu na̱da̱ʼ nájma̱ itsí rí wajpa náa kiʼnirámáʼ xtángoo, ga̱jma̱a̱ itsí rígi̱ naʼni̱i̱ xójóó. Ikhú egujtun aʼdá xédé ma̱ngoo naʼni rí majuiyaaʼ. Ikhú ikhaa naʼni̱i̱la yujndaʼ.

Xuajin niʼni mbá dí ra̱májánʼ wéñuʼ. Ikha jngó Moisés naʼthúún tikhun xa̱bu̱ rí murajtun chídiuún. Naʼthí: ‹Xa̱bu̱ bi̱ ra̱míjínʼ bi̱ nduyamajkuíí aʼdá xédé gíʼmaa rí makhañún›. ¡Ikha jngó xa̱bekha nuradíin mbá 3,000 xa̱bu̱! Lá tsesngájma rígi̱ rí gíʼmaa muñeumíjna̱ rí xú káʼnii mbuʼyamajkuíí i̱ndó Jeobá, raʼkhíin eʼwíínʼ dios bi̱ ragájkhun ráʼ.

Éxodo 32:1-35.